Miteko sa Arummwa
3 Nihiku nimosa, Pedru ni Yohani yaarowa mutemplo ovekela makaaripi. Mavekelo awo, yaapakiwa 15 oora.* 2 Okathi ene yoowo, aahikhala mulopwana mmosa aayariwe oorakala ene, aateexiwe. Khula nihiku, aaniruuhiwa onapwehiwa waattamela vamukhora wa etemplo, wiihaniwa mukhora Wooreera, wiira aavekeleke esimola ale yaakela mutemplo. 3 Okathi anwenhe awe Pedru ni Yohani ahalaka okela mutemplo, aahipacerya waavekela esimola. 4 Masi Pedru ni Yohani, yaahinwehexexa mulopwana ole, anahimya wiira: “Nkaniweheeni”. 5 Nto owo aahaawehexexa oratteene, olipelelaka wiira yaamunvaha etthu. 6 Vano, Pedru aahimuhimeerya wiira: “Miyo nkirina eparatha nnakhala eweero. Masi kirina aka tiila kinoovahaakani. Mwa nsina na Yesu Kristu munazarethi, mweemele, mweetteke!”+ 7 Siiso, Pedru aahivarela moono woolopwana wa mulopwana ole, khimweemexa.+ Niinaano-ru, metto sawe saahilipa.+ 8 Nuumala-vo, aahitupha,+ onapacerya weetta naawo, okelaka mutemplo. Owo aaneetta ni aanitupha omuttottopelaka Muluku. 9 Atthu ootheene yaahinweha eettaka ni omuttottopelaka Muluku. 10 Nto atthu awo yaahimusuwela mulopwana ole, wiira ti yoole aamakela okilaathi Vamukhora Wooreera wa etemplo,+ olipelelaka ovahiwa esimola. Vano, yaahitikinihiwa vanceene mwaha wa etthu ele yaamukhumelenle mulopwana ole.
11 Nlelo mulopwana ole ovarenle ene ntata na Pedru ni Yohani, atthu ootheene yaahitthimakela opuro yaari aya, wiihaniwa Niphiryo* na Salomooni,+ atikinihiwe ene vanceene. 12 Okathi Pedru aawenhe awe eyo, aahaahimeerya atthu ale wiira: “Nyuwo atthu a wIsarayeli, xeeni munitikinihiwa anyu vanceene ni etthu ela? Nave xeeni munniwehexexa anyu, okhalaka ntoko ti hiyo nimwiirinhe mulopwana ola weetta nirumeelaka owerya wahu, aahiiso mwaha woowi ninnimurumeela Muluku ni murima wootheene? 13 Muluku a Abrahamu ni a Isaakhi ni a Yakobe+ ni Muluku a amuhavinre ahu, onvuwiha Murumeyi awe,+ Yesu,+ yoowo mwanvaherenrye anyu+ ni mwaamukhoottale anyu ohoolo wa Pilato, hata Pilato owo aalakenle omutaphula. 14 Aayo, nyuwo moomukhootta mulopwana oowaarya ni a xariya, ni moovekela wiira nvahereriwe nawiive.+ 15 Masi moomwiiva Murumeyi Muulupale onivaha okumi.+ Muluku oomuhihimuxa mookhwaani, nto hiyo nooweha eyo yiiraneyaka.+ 16 Mwa nsina na Yesu, ni mwaha woowi hiyo ninnaamini nsina nawe, metto sa mulopwana ola munimoona anyu ni munimusuwela anyu, soolipihiwa. Tthiri, okhala wiira hiyo ninnimwaamini Yesu, mulopwana ola munimoona anyu, ookhala saana. 17 Axinnaka, koosuwela wiira nyuwo moopaka itthu iya mwaha woohisuwela,+ siisaale yiirale aya anamalamulela anyu.+ 18 Siiso, Muluku oomaliherya itthu aahimmye awe khalai, aarumeelaka maprofeta awe ootheene, wiira Kristu aahaana ohaawa.+
19 “Tivo, murukunuxe murima anyu,+ muturuke mweettelo anyu,*+ wiira Yehova ottipihe itampi sanyu+ ni ooruuheleni mahiku a murettele. 20 Nave wiira ooruuheleni Kristu omuthanlale awe, eyo piiyo, Yesu. 21 Aarumeelaka maprofeta awe oororomeleya, Muluku ooleiherya khalai ene wiira nihiku nimosa, itthu sootheene sinoolokiheriwa.* Masi mpakha ophiya okathi itthu sootheene sinrowa aya okhalihiwa isya, Yesu ohaana okhala wiirimu. 22 Mweekeekhai, Moise oohimya wiira: ‘Yehova* Muluku anyu, onoomuthanla eriyari ya axinninyu profeta onlikana ni miyo.+ Muhaana owiriyana khula etthu onooleelaaweni.+ 23 Tthiri, ole ohininwiriyana Profeta owo, Muluku onompwetexa’.+ 24 Mweekeekhai, maprofeta ootheene, opaceryaka ni profeta Samuweli, aalaleya oratteene mahiku ala.+ 25 Maprofeta awo aahimya nivarihano Muluku aapanke awe ni amuhavinre anyu.+ Nivarihano nlo, ninnoohelani-tho muhina, okhala wiira Muluku aahimuleiherya Abrahamu wiira: ‘Maloko ootheene a mulaponi anooreelihiwa mwaha wa osuulu anyu’.+ 26 Nuumala Muluku omuhihimuxa Murumeyi awe,* oomuruma wiira opacerye+ wooreelihani nyuwo, owiirihakani ottharuwa miteko sanyu sootakhala”.