Nweheke Saana Oreera Murima wa Yehova

Okumanana mixankiho onnimwiiriha mutthu okhala ooriipiwa murima. Mixankiho sinniwerya waakanyerya muupuwelo ahu, ovukula ikuru, ni opahula moonelo ahu wooloka voohimya sa okumi ahu. Mwene Davidi a wIsarayeli a khalai, aahikumanana masooso manceenexa. Nto eettihenrye sai? Ni masu oovara murima a esalimo, Davidi onaakhula so: ‘Kinnikhuwelela w’Apwiya ni nsu naka nothene; kinnavara metto Apwiya n’ikuru saka sothene. Kinnaroihela wipulela waka wothene; kinnahimerya ovelavela waka wothene. Okathi onihalaka okhwa, nyuwo ti musuwenle mwettelo aka’. Aayo, Davidi mowiiyeviha ahinvekela Muluku wira omukhaliherye.​—Esal. 142:1-4.

Esalimo ekina Davidi iipale so: ‘Etthu emosa kooveka wa Yehova, nto ti etthu enitepa aka ophavela: Okhala mpaani mwa Yehova mahiku otheene a okumi aka, wira kiweheke saana oreera murima wa Yehova ni otokosa-tho etemplo awe ni murima wooxukhurela’. (Esal. 27:4, NM) Davidi khahiyo aari muLevita, masi nkahaya muupuwele moota waamusivela aya weemeela ota wa nivate nowaarya, waattamela nipuro nuulupale na okokhorela. Tthiri murima wa Davidi waanitupha mwaha woxukhurela, tivonto aaphavela awe oviriha okumi awe wotheene oryeene vaavale wira ‘oweheke saana oreera murima wa Yehova’.

Nuulumo nitaphuleliwe ‘oreera murima’ ninvarihana ni makhalelo ooreera ‘anihakalaliha muupuwelelo, moonelo ni murima wa mutthu’. Khuta okathi Davidi aaniweha marehereryo ookokhorela a Muluku ni murima wooxukhurela. Nto hiyo nihaana wiikoha so: ‘Murima aka onoona siisaale ntoko Davidi?’

OWEHA MAREHERERYO OOKOKHORELA A MULUKU NI ‘MURIMA WOOXUKHURELA’

Mahiku ala, marehereryo a Yehova a omwaattamela yena kakhanle nipuro nnooneya ntoko etemplo. Olelo-va, marehereryo awo anihela muhina etemplo yomunepani, eyo piiyo, marehereryo a Muluku a okokhorela wekeekhai.a Akhala wira ninniweha marehereryo ala ni ‘murima wooxukhurela’ nto moolikana ni Davidi, nnoowerya-tho ‘oweha saana oreera murima wa Yehova’.

Nkahaya muthokorerye moota sarya aya altari a mukuttho aari a ekobre, waattamela mukhora wa etemplo. (Okhu. 38:1, 2; 40:6) Altari owo aathoonyerya otthuna wa Muluku wira eemye mukuttho wa erutthu ya Yesu ntoko pinaatamu. (aHéb. 10:5-10) Nkahaya muupuwele ele enitaphulela aya wa hiyo! Murummwa Paulo aalempe so: “Okathi waryahu awanani awe, Muluku ònatàniha ni owo mwaha w’okhwa wa Mwan’awe”. (aRom. 5:10) Naroromela ephome eyeehiwe ya Yesu, nnoowerya omoreliwa ikharari ni okhala oororomeleya mwaha wookhala mpatthani a Muluku. Eyo enoniiriha ‘wataana ni Yehova’.​—Esal. 25:14.

Okhala wira ‘itampi sahu sottipihiwa’, vano ninkhala ‘mahiku a murettele’ onikhuma wa Yehova. (Mit. 3:19) Mukhalelo ahu onilikana ni namutthukiwa iittarunxe ikrime sawe, nto khiyapaka marukunuxo maalupale nnaamwi olipelelaka wiiviwa mwaha wa ikrime sa khalai. Nuumala woona mweettelo a namutthukiwa ole, namaphuka milattu, ooreera murima oniphavela omulevelela, ni oturuka olamula wawe wiiviwa. Tthiri eyo yaarowa omuhakalaliha vanceene namutthukiwa ole! Moolikanasa ni namaphuka milattu ole, Yehova onnaareerela murima apinaatamu aniittaruxa nto owo onnituruka waalamula wawe wira akhwe.

MUHAKALALEKE NI OKOKHORELA WEKEEKHAI

Mwa itthu sinci Davidi saawerya awe oweha sa okokhorela wekeekhai mpaani mwa Yehova, waari othukumana wa aIsarayeli akhwaawe, osommwa wa Nlamulo ni otthokiheriwa ohoolo wa atthu otheene, opahiwa wa nsenso, ni miteko sikina saavariwa ni maLevita. (Okhm. 30:34-38; Moth. 3:5-8; Otum. 31:9-12) Inamuna iye sa okokhorela wa aIsarayeli a khalai, sihaana itthu sinilikana aya olelo-va.

Ntoko sarya aya khalai, mahiku ala ‘ti vorera ni vosivela tthiri wira anna akhale vamosá’. (Esal. 133:1) Emusi ahu ya ‘axinnihu òwamini’ ennitepa wunnuwa. (1 Ped. 2:17) Omuthukumanoni ninnisoma Nuulumo na Muluku ni otthokiheriwa atthu otheene ari-vo. Orumeelaka mulokiheryo awe Yehova onnikumiherya eprograma yoreera wira atthu awe axuttihiweke. Eyoolya yinceene yomunepani, enniphwanyaneya mwa iliivuru silempwale wira nisomeke mekhihu wala ni emusi ahu. Munna mmosa a Nikhuuru Noolamulela aahimmye so: “Otthokelela Nuulumo na Yehova, ni wuupuwelela ele enitaphulela aya, ni otokosa wira kiiwexexe, wookiiriha ophwanya mareeliho manceene ni ohakalala”. Aayo “osuwela onotteliha murim’anyu”.​—Mir. 2:10.

Olelo-va, mavekelo ooloka anipakiwa ni arumeyi a Muluku, annirowa wa Yehova khula nihiku. Nto Yehova onnoona mavekelo awo okhala ntoko erupani yowunkhela. (Esal. 141:2) Tthiri murima ahu onnihakalala osuwela wira Yehova Muluku, vannimusivela okathi onimulompa ahu mowiiyeviha!

Moise aavekenle so: ‘Muluku ahu, munirerihe n’urera wanyu murima; munirerele murima mwa miteko sahu sothene’. (Esal. 90:17) Nakhalela nthiti olaleerya wahu, Yehova onrowa oreeliha muteko ahu. (Mir. 10:22) Waaniheryasa nihaakhaliherya atthu akina wiixutta ekeekhai. Aahiiso okhuma khalai ninwanana mixankiho ntoko iya: olaleerya mittetthe seiye atthu akina ahimphavela aya, owereyasiwa, oxankiherya mwaha wowiireliwa itthu soohiloka, wala olupatthiwa. (1 aTes. 2:2) Hata vari siiso, niireke khinoonale ‘orera murima wa Yehova’, ni wira Tiithi ahu a wiirimu onnisiveliwa ni wiimananiha wahu?

Davidi aahiipa oriki: ‘Yehova tori epantte aka, epantte evahiwa aka. Onnisuka sana yohiyeriwa aka. Kophimeliwa mapuro orera’. (Esal. 16:5, 6) Davidi aanixukhurela ‘epantte’ yaavahiwe awe, eyo piiyo, okhalana wataana wooloka ni Yehova ni eparakha ya omurumeela. Nimutakihaka Davidi, hiyo pooti okumanana mixankiho, masi nuupuweleke mareeliho manceene arina ahu! Nto nrowe othene ahu nooniheryeke ohakalala mwaha wa okokhorela wekeekhai, nto khuta okathi niweheke ni murima wooxukhurela etemplo ya Yehova yoomunepani.

[Enoota]

[Eponto yuulupale epaaxina 29]

Okathi wa mixankiho, mowiiyeviha Davidi aaninvekela Yehova wira omukhaliherye