Silempwale ni Yohani

6 Nuumala itthu iya, Yesu aahilapuwela ekhopela ekina ya ephareya ya oGalileya, aahiiso oTiberiyade.+ 2 Muttitthi muulupale wa atthu waanimutthara,+ okhala wiira yaaniweha miiriirya aapaka awe, aapenuxaka aretta.+ 3 Vano Yesu aahiwela vamwaako, okilaathi vaavo ni awiixutti awe. 4 Nto efesta ya ayuda, yeeyo yiihaniwa Paasikha,+ yaanaattamela. 5 Okathi Yesu aavenxale awe maitho, aahiweha muttitthi muulupale wa atthu orwaaka vaari awe. Nto aahimukoha Filipe oriki: “Ninrowa othuma vai iphaawu, wiira atthu ala ootheene akhuure?”+ 6 Masi, Yesu aahihimya eyo wiira osuwele etthu Filipe uupuwela awe. Tthiri Yesu aanisuwela etthu aarowa awe opaka. 7 Filipe aahimwaakhula wiira: “Hata nrowaka othuma iphaawu sa itenaario* 200, khasimphiyerya. Nave pooti nikawanyaka iphaawu iyo ipetaaso saamukhaani, nlelo khisaarowa ophiyerya”. 8 Mwiixutti awe mukina, aihaniwa Andreya, munnawe Simoni Pedru, aahimuhimeerya Yesu wiira: 9 “Ookhala-va mmiravo mmosa orina iphaawu thanu ni ihopa piili saamukhaani. Niireke sinimwaaphiyerya atthu oowaatta siisa?”+

10 Yesu aahihimya wiira: “Mwaaleele atthu akilaathi”. Nipuro nle khiyaareere malaxi. Nto atthu awo yaahikilaathi. Muttitthi ole, yaahikhala alopwana oowiiraka 5.000.+ 11 Yesu aahikuxa iphaawu, nuumala onvekela Muluku, aahaakawela atthu yaakilanthi vaavale. Nave aahipaka etthu emosa-ru ni ihopa saamukhaani, nto awo yaahikhuura mpakha ovona. 12 Nuumala atthu ale olya mpakha ovona, Yesu aahaaleela awiixutti awe wiira: “Muttottele ipetaaso sihanle,* wiira ehihononeye etthu”. 13 Siiso, awiixutti yaahittottela, khusarya ittanka* 12 sa ipetaaso saahanle sa* iphaawu iye thanu, nuumala atthu olya mpakha ovona.

14 Okathi atthu yaawenhe aya mwiiriirya aapanke awe, yaahipacerya ohimya wiira: “Tthiri ola Profeta aakela orwa moolumwenkuni”.+ 15 Yesu aasuwenle awe wiira atthu yaaphavela omukhanyererya okhala mwene aya,+ aahirowa-tho omwaako mekhawe.+

16 Vailale aya, awiixutti yaahirowa ophareya,+ 17 awela ekalawa, analapuwela ekhopela ekina ya ephareya, erowaka oKafarnawu. Vano vaahiriipa, nave Yesu iira nlelo ohirwaale okumana naawo.+ 18 Nave-tho, ephareya yaaninyakula, okhala wiira yaanoopa epheyo yuulupale.+ 19 Masi, nuumala weettiha ekalawa eyo ikiloomo thanu aahiiso 6,* yaahimoona Yesu eettaka vasulu va maasi a mphareya, aattamelaka ekalawa, nto awo yaahoova vanceene. 20 Masi Yesu aahaaleela wiira: “Muhoove, ti miyo!”+ 21 Awo yaahihakalala omukuxa mukalawani mwaya. Niinaano-ru, ekalawa yaahiphiya okhopela, opuro yaarowa aya.+

22 Mmeeloni mwaya, muttitthi wa atthu waahanle ekhopela ekina ya ephareya, waahoona wiira khiyaakhanle ekalawa opuro ole. Masi yaakhanle ekalawa emosa paahi yaamukhaani. Nave Yesu khaaronwe mukalawani ni awiixutti, okhala wiira awiixutti awe yaaronwe mekhaya. 23 Vano ikalawa sikina, saakhuma oTiberiyade, saahiphiya nipuro nenlo atthu yaakhunre aya iphaawu, nuumala Pwiya onvekela Muluku. 24 Okathi atthu awo yoonale aya wiira Yesu khaakhanle opuro ole, nnakhala awiixutti awe, yaahikela mukalawani mwaya, anarowa oKafarnawu, amwaavyaka Yesu.

25 Nuumala omphwanya ekhopela ekina ya ephareya, yaahimukoha wiira: “Rabi,*+ mphiyale silini nno?” 26 Yesu aahiwaakhula oriki: “Kinooleelani ekeekhai wiira, nyuwo khahiyo munikaavya mwaha wa miiriirya moonale anyu, masi munikaavya mwaha wa iphaawu mukhuurale anyu mpakha ovona.+ 27 Muhivareke muteko mwaha wa yoolya enintta, masi mwaha wa yoolya enikhala, enivaha okumi woohimala,+ yeeyo Mwaana a Mutthu, onrowa awe woovahani. Mweekeekhai, mwaneene Muluku, Tiithi, oomuhela ekanyeryo awe enooniherya wiira onnimweemererya”.+

28 Vano atthu ale yaahimukoha ariki: “Muteko xeeni nikhanle ahu oovara wiira neemereriwe ni Muluku?” 29 Yesu aahiwaakhula wiira: “Muteko okhanle anyu onvarela Muluku tuula: mooniheryeke wiira munnimwaamini ole omurumme awe”.+ 30 Nto awo yaahimukoha ariki: “Mwiiriirya xeeni munrowa anyu opaka,+ wiira noone ni nookupalini? Muteko xeeni munivara anyu? 31 Amuhavinre ahu, yaahilya emana moothakoni,+ ntoko silempwale aya wiira: ‘Owo aahaavaha ephaawu yaakhuma wiirimu wiira akhuure’”.+ 32 Yesu aahaahimeerya wiira: “Kinooleelani ekeekhai wiira, Moise khoovanheni ephaawu enikhuma wiirimu, masi Tiithi aka toovanheni ephaawu yeekeekhai, yeeyo enikhuma wiirimu. 33 Tthiri ephaawu Muluku onivaha awe, tuule okhurunwe wiirimu, ni onaavaha okumi atthu”.* 34 Awo yaahimuleela wiira: “Pwiya, okathi wootheene munivaheke ephaawu eyo”.

35 Yesu aahaahimeerya wiira: “Miyo ka ephaawu ya okumi. Ole onirwa wa miyo, khonrowa ovoliwa-tho etala, nave ole onikaamini, khonrowa ovoliwa-tho ntthona.+ 36 Masi miyo kihoohimeeryani wiira, nyuwo mookiweha, hata vari siiso, khamunikikupali.+ 37 Ootheene ale Tiithi okivanhe awe animoorwa wa miyo, nto miyo nkinikhala-khala kimukhoottaka ole onikirweela.+ 38 Tthiri, miyo nkikhurunwe wiirimu+ wiira kipakeke kiniphavela aka, masi kirwenle opaka oniphavela awe ole okirumme.+ 39 Etthu oniphavela awe ole okirumme tiila: ohikirimeele nnakhala mmosa wa ale okivanhe awe, masi wiira kaahihimuxe+ nihiku nookiserya. 40 Tthiri, oniphavela awe Tiithi aka tiila: ole onimweemererya Mwaana ni omwaamini yoowo, okhalane okumi woohimala,+ nave kinoomuhihimuxa+ nihiku nookiserya”.

41 Vano, ayuda yaahipacerya omwaapa okhala wiira aahilavula oriki: “Miyo ka ephaawu enikhuma wiirimu”.+ 42 Nto awo yaahipacerya okohana ariki: “Ola khahiyo Yesu, mwaana a Yosefe, yoowo apapawe ni amamawe nnaasuwela ahu?+ Xeeni ohimyaka wiira: ‘Miyo kinikhuma wiirimu’?” 43 Yesu aahiwaakhula oriki: “Muhiye okaapa. 44 Khuuvo mutthu oniwerya orwa wa miyo, vahikhanle wiira kiruuheliwe ni Tiithi, yoowo okirumme.+ Nave miyo kinoomuhihimuxa mutthu owo nihiku nookiserya.+ 45 Ela ti etthu elempwale ni Maprofeta: ‘Ootheene aya anrowa wiixuttihiwa ni Yehova’.*+ Ootheene ale animwiiwa Tiithi ni yiixuttihiwe ni yoowo, annoorwa wa miyo. 46 Khuuvo otonko omoona Tiithi.+ Omonne paahi tuule okhumme wa Muluku, yoowo paahi tomonne Tiithi.+ 47 Kinooleelani ekeekhai wiira, ole onikaamini onoophwanya okumi woohimala.+

48 “Miyo ka ephaawu ya okumi.+ 49 Amuhavinre anyu yaahilya emana moothakoni, masi ahookhwa.+ 50 Ela ti ephaawu enikhuma wiirimu, wiira ootheene ale anikhuura, ahikhwe. 51 Miyo ka ephaawu ekumi, yeeyo ekhumme wiirimu. Akhala wiira mutthu onookhuura ephaawu ela, onookhala mukumi mahiku ootheene. Mweekeekhai, ephaawu enivaha aka ti erutthu aka wiira atthu anikhala valaponi aphwanye okumi”.+

52 Vano ayuda yaahipacerya onyakulihana, ariki: “Vaniweryaneya sai mulopwana ola onivaha erutthu awe wiira nikhuure?” 53 Tivo, Yesu aahaahimeerya wiira: “Kinooleelani ekeekhai wiira, mwaahikhuure-ru erutthu ya Mwaana a Mutthu, ni mwaahiwurye-ru ephome awe, khamunrowa ophwanya okumi.*+ 54 Ole onikhuura erutthu aka ni oniwurya ephome aka, onoophwanya okumi woohimala, nave miyo kinrowa omuhihimuxa+ nihiku nookiserya. 55 Tthiri, erutthu aka, ti yoolya yeekeekhai, nave ephome aka, ti yoowurya yeekeekhai. 56 Ole onikhuura erutthu aka ni oniwurya ephome aka, onniiraana ni miyo, nave miyo kinniiraana nuuwo.+ 57 Siisaale miyo kinikhala aka mwaha wa Tiithi, yoowo ori mukumi ni okirumme, siiso-tho, ole onikhuura erutthu aka, onookhala mukumi mwaha wa miyo.+ 58 Ela ti ephaawu enikhuma wiirimu. Ephaawu ela, khenlikana ni ele amuhavinre anyu yaakhuurale aya, masi khukhwa. Akhala wiira mutthu onookhuura ephaawu ela, onookhala mukumi mahiku ootheene”.+ 59 Yesu aahilavula itthu iya, okathi aixuttiha awe musinagoga,* oKafarnawu.

60 Okathi yaiwale eyo, awiixutti anceene yaahihimya wiira: “Moolumo ala toovila otthara. Ti pani oniwerya owiriyana?” 61 Masi okathi Yesu aasuwenle awe wiira awiixutti awe yaanivaanyihana mwaha wa moolumo ale, aahaakoha oriki: “Niireke etthu ela enniwiirihani ohiya waamini?* 62 Nto, ankhi mwanweha Mwaana a Mutthu, owelaka opuro aari awe khalai?+ 63 Ikuru soowaarya sinivaha okumi,+ vano erutthu kherina efaita. Moolumo koohimenryaakani anikhuma wa ikuru soowaarya ni annivaha okumi.+ 64 Masi aakhala akina a nyuwo ahinikupali”. Tthiri okhuma woopaceryani, Yesu aanaasuwela ale yahaakupali ni aanimusuwela ole aarowa onvariha.+ 65 Yesu aahihimya-tho wiira: “Tivo kinoohimeeryakani wiira, khuuvo onwerya orwa wa miyo, vahikhanle wiira Tiithi tophavenle okiruuhela”.+

66 Mwaha wa yeeyo, awiixutti awe anceene yaahitthikela itthu yaahiyale aya ottuli,+ nave yaahihiya weetta nuuwo. 67 Siiso Yesu aahaakoha arummwa 12, wiira: “Niireke ni nyuwo muniphavela orowa?” 68 Simoni Pedru aahimwaakhula oriki: “Pwiya, ninrowa omutthara pani?+ Ti nyuwo murina moolumo a okumi woohimala.+ 69 Hiyo nookupali ni noosuwela wiira nyuwo mwa murumeyi Oowaarya a Muluku”.+ 70 Yesu aahaaleela wiira: “Kiira kihoothanlani nyuwo arummwa 12?+ Masi mmosa a nyuwo, mulipa-oowootherya”.*+ 71 Tthiri, Yesu aamuhimya Yuda, mwaana a Simoni Isikariyoti, maana owo taarowa onvariha, hata aari mmosa a arummwa 12.+