Maio

Mahiku ala atthu anceene annitthyawa ilapo saya arowaka okhala ilapo sikina. Nto, muhaana wiixutta moota wowaakoha ihaali ni nttaava naya. Nave-tho, nyuwo pooti wiixutta moolumo vakhaani anrowa owiiriha ophavela ovaanela ni nyuwo. Ya neeraru, nyuwo pooti owooniherya eviidiyu aahiiso iliivuru sa nttaava naya siri va jw.org. Yehova oonivaha ele enitthuneya wira nikhumeleke saana naalaleeryaka. Mwa ntakiheryo, ele eniixutta ahu Muthukumano wa Okumi ni Orummwa Ahu wa eKristau, enninikhaliherya osuwela moota woopaka mikwaha sootthikela oxukurya ni opaceriha soosoma sa Biibiliya. Nave nyuwo anamuyari, nwiixuttiheke aniinyu okomentari arumeelaka moolumo aya. Atthu akina ahiixutta ekeekhai mwaha woowiiwa anamwane avahaka ikomentaario soovara murima.—1 aKor. 14:25. w18.06 22-23 itti. 7-9

Ti vooloka wuupuwela wira otheene ahu naahimurakamela Muluku. (aÉf. 2:12) Masi Yehova oonithanla mwaha wooniphenta. (Hos. 11:4; Yoh. 6:44) Nave Yesu oonaakhela. Maana tonikhalihenrye wiirela mpantta emusi ya Muluku. Hata nri ene anatampi, mooreerela murima Yesu oonaakhela, tivo, nimananiheke osyaka waanyokha atthu! Vaavo olumwenku ola wootakhala oniphiya aya wanikisa, atthu anootepa okawanyeya, okhalelana nthalu ni onyokhana. (aGal. 5:19-21; 2 Tim. 3:13) Masi ntoko atthu a Yehova, nimphavela okhalana “ankhili ankhuma wa Muluku”, yaawo annikhaliherya osyaka nthalu ni okhaliha murettele. (Yak. 3:17, 18) Ninnihakalala waapaka apatthani atthu anikhuma ilapo sikina, weemererya moota anipaka aya itthu ni wiixutta nttaava naya. Vaavo nimpaka ahu eyo, ninnikhalana murettele ntoko “màsi anririha ematta”, ni exariya ntoko “mawimpi a mphareya”.—Yes. 48:17, 18. w18.06 14 itti. 18-19

Nakhotto ooRoma khaarowa owana ohiwanre ixapattho. Okhala wira esapala ya ixapattho saya yaaphitaanyiwa ikwaha tthaaru, nto saanilipa vanceene. Nave, okhala wira saanilipa vanceene, eyo yaanimwiiriha nakhotto okhala saana ni ohivulalihiwa. Ixapattho sa anakhotto ooRoma saanaakhaliherya oxintta ekhotto, nave ixapattho sahu sa nthoonyeryo, sinninikhaliherya olaleya “ihapari sorera” sa murettele. (Yes. 52:7; aRom. 10:15) Okathi mukina ontthuneya olipa murima vanceene wira nilaleerye. Bo, orina iyaakha 20, onihimya so: “Kaanoova waalaleerya anaxikola akhwaaka. Kinoona wira kuuliwa muru. Kuupuwelaka okathi ovinre, nkinsuwela etthu yaakiiriha wuuliwa muru. Vano kinnihakalala waalaleerya amiravo akhwaaka”. w18.05 23-24 itti. 9-11

Ohiyu ole Yesu aarowa awe wiiviwa, aahaaleela arummwa awe wira: “Kinovahani murettele aka”. (Yoh. 14:27) Moota xeeni murettele wa Yesu onnikhaliherya aya ovikaniha olaleerya? Vaavo ninvikaniha ahu olaleerya, nin-nikhalana murettele mwaha woosuwela wira ninnimuhakalaliha Yehova ni Yesu. (Esal. 149:4; aRom. 5:3, 4; aKol. 3:15) Nuumala Yesu waaleela arummwa awe wira aaphavela wira atteeliweke murima, aahaatthokiherya otthuneya waya wooniherya ophenta wekeekhai. (Yoh. 15:11-13) Nuumala-vo, Yesu aahimmye wira: “Kiniwirelani apatthani aka”. Tthiri eparakha yuulupale okhala mpatthani a Yesu! Masi, arummwa yaarowa ovikaniha sai okhala apatthani a Yesu? Yesu aatthokihenrye so: “Murowé mwireke sorera”, niire so, wiima mihokorokho. (Yoh. 15:14-16) Mwa enamuna ekina, awo yaahaana ovikaniha olaleerya. Iyaakha piili saavinre Yesu ohinatthi olavula siiso, owo aahaaleela arummwa awe wira: “Virani mwettaka, mulaleyaka wira: ‘Omwene wa wirimu ori vakhiviru!’” (Math. 10:7) Ti nthowa naya ohiyu ole Yesu ohinatthi wiiviwa, aalipinhe awe awiixutti awe wira avileleke vaavo yaarowa aya olaleeryaka.​—Math. 24:13; Mar. 3:14. w18.05 13-14 itti. 15-16

Nyuwo amiravo murumeeleke okumi anyu wira mmusiveliheke Yehova ni okhalana soolukama somunepani. Masi amiravo akhwiinyu aniphavela opaka itthu sikina aniphavela aya. Nto awo pooti wootumereryani opaka itthu anipaka aya. Moohipisa aahiiso muhoolo, munimwaakhaliherya akina oweha wira munnoona otthuneya waakhwaniherya soolukama sanyu. Nto, exeeni enrowa wookhaliheryani ovikaniha okhala oolipa hata atthu akina yookhanyereryakani opaka itthu anipaka aya? Musyakeke okhala opuro waarowa oxankiha okhootta sookhanyererya iyo. (Mir. 22:3) Muupuweleke owereya onikhumelela mwaha woopaka itthu soohiloka. Moowiiyeviha muhaana weemererya miruku munivahiwa anyu. Mwaawiriyaneke anamuyari anyu, anna ni arokora oolipa momunepani okathi anoovahaayani miruku. (1 Ped. 5:5, 6) Niireke munniiyeviha wira mweemererye miruku munivahiwa anyu? w18.04 31 itti. 14-16

Muhupi aaroihenle awe miloko sa wAsia Menor Yesu aahixukhurela miteko atthareli awe yaapaka aya. Mwa ntakiheryo Yesu aahipacerya muhupi aaroihenle awe muloko wa oTiyatira ohimyaka wira: “Miyo kosuwela mwettelo anyu: kosuwela ophentana wanyu ni wamini wanyu ni warumela wanyu akhw’inyu ni nthiti nanyu. Kosuwela-tho wira munnitepa ovara miteko sorera ovikana khalai”. (Wis. 2:19) Yesu khahiyo aahimmye wuncererya wa muteko aya paahi masi aahaattottopela mwaha wa mikhalelo sooloka saawiiriha opaka itthu sooloka. Nnaamwi aatthuneya waavaha miruku atthu akina a muloko wa oTiyatira Yesu aahipacerya ni aahimaliha muhupi awe aattottopelaka. (Wis. 2:27, 28) Nkahaya muupuwele owerya Yesu orina awe ntoko muhooleli a miloko sotheene. Owo khaatthuneya oxukhurela miteko ninvara ahu. Masi hata vari siiso owo onniimananiha onittottopela. Tthiri Yesu ohaavaha ntakiheryo nooloka axitokweene a mmulokoni! w19.02 16 etti. 10

Eseekulu yoopacerya, Yehova aahirumeela nikhuuru noolamulela wira naalipiheke maKristau otheene, waahela muhina ale yaahoolela mmulokoni. Maana naahaaruma atthu anli, Pedru ni Yohani wira yaavekelele maKristau ale masya yaawo yaakhenle munepa wootteela. (Mit. 8:5, 14-17) Tthiri Filipi, anna ni arokora ale asya yaahilipa vanceene mwaha wa okhaliheriwa ni nikhuuru noolamulela! Olelo-va, Nikhuuru Noolamulela na Anamoona a Yehova ninnaalipiha maBethelita, mapioneero a vameekhaaya, mamisionaario, axitokweene a esirkwiitu, ale anteka Ipa sa Omwene ni otheene ahu. Tthiri, ntoko maKristau a eseekulu yoopacerya, hiyo ninnihakalala vanceene mwaha woolipihiwa! Nave, wira naakhaliherye ale ahiiye ekeekhai wira atthikele wa Yehova, mwaakha wa 2015 Nikhuuru Noolamulela nookumiherya ebroxura eni: Muhokolowele wa Yehova. w18.04 20 itti. 18-20

Atthu akina anuupuwela wira vaamuloka okhalana otaphuwa ohirina mukano. Niireke eyo ekeekhai? Nnaari. Nkaha-ya nuupuwele etthu yaarowa okhumelela vaakhanle wira olumwenku ola khakhanle malamulo. Enciclopédia World Book enihimya wira malamulo aneettiha muttetthe wootthokiheya toovila, okhala wira ahaana waakhapelela atthu ni ohela mukano otaphuwa waya. Nto eyo khahiyo etthu yookhweya. Ti nthowa naya, ninweha ahu malamulo manceene ni maadvogado manceene ni alipa-oophuka milattu yaawo aneererya otthokiherya ni ovarihela muteko malamulo awo. Tivonto Yesu aahimmye awe wira, naphavela okhalana otaphuwa wekeekhai, nihaana opaka itthu piili. Yoopacerya: Nihaana weemererya ekeekhai Yesu iixuttinhe awe. Ya nenli: Nihaana okhala awiixutti awe. Opaka itthu iya sinoonikhaliherya ophwanya otaphuwa wekeekhai. Otaphuwa xeeni? Yesu aahimmye wira: “Othene ale anìra etampi, t’akhanle ipottha s’etam-pi”. Nave aahincererya oriki: “Mwana awopolani, tthiri munokhala òtaphuwa”.​—Yoh. 8:34, 36. w18.04 7-8 itti. 13-14

Ninnisiveliwa vanceene okhala ni atthu anthokorerya moonelo ni okhala wahu saana. Awo anneererya wiihela nipuro nahu wira asuwele ele nnuupuwela ahu ni moonelo ahu. Nto annoona ele ennixankiha ananikhaliherya hata nihaavekenle nikhaliheryo. Tthiri ninnaaxukhurela atthu ale ‘Okhala wira na maKristau ekeekhai nimphavela owoonela othunku aahiiso waakhupanyerya atthu akina. Masi ohimya ekeekhai okathi mukina onnivila opaka eyo. Nthowa xeeni? Nthowa nimosa okhala wira na atthu oohimalela. (aRom. 3:23) Nto nintthuneya wiimananiha vanceene wira nihiisuupuweleke mmansihu paahi. Mwaha wa mahuweliwo aya aahiiso itthu sikina saakhumelenle mookumini woonasa wene atthu akina ahaana wiimananiha vanceene wira awooneleke othunku akhwaaya. Nave hiyo pooti ohapuxiwa ni muupuwelo ni moonelo wa atthu a moolumwenkuni. Mahiku ala ookiserya atthu anceene khanthokorerya moonelo wa atthu akina. Eyo enniiraneya mwaha woowi atthu ‘anisupuwela mmansaya pahi’. (2 Tim. 3:1, 2) Nnoowerya othokorerya moonelo wa atthu akina akhala wira ninnimutakiha Yehova Muluku ni Mwanawe Yesu Kristu. w19.03 14 itti. 1-3

Nlamulo nookiserya na Malamulo Muloko naanikhoottiha okhalela nrima itthu sa mutthu mukina aahiiso wunlela itthu sa mutthu mukina. (Otum. 5:21; aRom. 7:7) Yehova aahivaha nlamulo nla wira owiixuttihe atthu awe etthu yootthuneya eyo piiyo atthu awe yahaana okhapelela murima aya muupuwelo aya ni moonelo aya. Maana Yehova aanisuwela wira itthu sootakhala simpacerya ni muupuwelo ni moonelo woohiloka. (Mwa ntakiheryo Mwene Davidi aahimorela muraakho owo. Okhala wene owo aari mutthu ooreera murima. Masi okathi omosa owo aahimukhalela nrima muthiyana a mulopwana mukina. Nto nrima naahimwiiriha opaka etampi). (Yak. 1:14, 15) Vano Davidi aahiraruwa ni muthiyana ole, aaheererya onwoka iyawe ni wanikisa waya aahimwiiva. (2 Sam. 11:2-4; 12:7-11) Yehova onniweha ohiya paahi mukhalelo ahu wa ota. Owo onniweha mukhalelo ahu wa muhina aahiiso murima ahu. (1 Sam. 16:7) Khuuvo muupuwelo moonelo aahiiso etthu envitheya vamaithoni va Yehova. Nave onniweha ni olipiha itthu sooloka nrina ahu. Masi owo oniphavela wira nsuweleke ni osyaka miyuupuwelelo soohiloka sihinatthi oniiriha opaka etampi.​—2 Wah. 16:9; Math. 5:27-30. w19.02 21-22 etti. 9, 11

MBiibiliyani Moise onnihimmwa okhala “mutthu omàla vanjene ovikana atthu othene a mulaponi-mu”. (Moth. 12:3) Niireke eyo enitaphulela wira aari mutthu oolosowa ni oowoova? Atthu akina anoona wira mutthu oomaala toolosowa aahiiso oowoova. Masi eyo khahiyo ekeekhai. Moise aari murumeyi a Muluku aikuru oohoova ni oolipa murima. Okhaliheriwaka ni Yehova owo aahiwerya omuxintta mwene oowerya a wEjiitu. Nave woonasa wene aahaahoolela moothakoni atthu 3.000.000 ni aahaakhaliherya aIsarayeli waaxintta awanani aya. Woonasa wene mixankiho sahu khasinlikana ni sa Moise masi hata vari siiso khula nihiku ninkhala ni atthu aahiiso itthu sinniiriha woona ovila okhala oowiiyeviha. Masi sookhala itthu sinnikhaliherya okhalana mukhalelo owo wootepa oloka. Yehova ooleiherya wira “atthu òmàla anoreriwa vathí-va”. (Esal. 37:11) Niireke nyuwo mwa mutthu oomaala aahiiso oowiiyeviha? w19.02 8 itti. 1-2

Apinaatamu aakhalana yowuupuxerya ya murima. Ninsuwela sai wira Adamu ni Eva yaahikhalana yowuupuxerya ya murima? Okhala wira nuumala ohimwiiwelela Muluku, awo yaahiipitha. Maana yowuupuxerya ya murima aya yaanaaphukela. Yowuupuxerya ya murima, etthu nrina ahu yeeyo eneettiha okumi ahu ni ennikhaliherya osuwela othanla etthu yooloka ni yoohiloka. Mutthu yoole yowuupuxerya ya murima awe ehiixuttihiwe saana, onlikana ni pakiti eleemi awe ehononeyale. Nto epheyo ni maasi a mphareya pooti omwiiriha pakiti owo orowa opuro ohiniphavela awe. Masi akhala wira eleemi ennivara saana, enoomukhaliherya ole onimweettiha pakiti otthara ephiro onrowa awe. Moolikanasa, naixuttiha saana yowuupuxerya ya murima ahu, enoonikhaliherya vanceene. Akhala wira yowuupuxerya ya murima ahu khiyiixuttihiwe saana, khenrowa onilopolaka wira nihipake itthu soohiloka. (1 Tim. 4:1, 2) Eyo enooniiriha woonaka wira “sorera . . . [ti] sotakhala”. w18.06 15-16 itti. 1-3

Nave-tho, nihaana woonela ni okhootta muupuwelo wa olumwenku onikumiheriwa moolavilavi. Mwa ntakiheryo, irelatoorio sikina sinnooniheriwa mwa enamuna enikhaliherya epoliitika. Nave soohimmwa sikina sinnitumererya soophavela ni soolukama sinaatikiniha atthu. Iliivuru ni ifilme sinceene, sinnitumererya muupuwelo woophavela okhala “oopacerya” aahiiso “wira emusi aka teri opuro woopacerya”. Nto muupuwelo owo pooti okhalaka ntoko ti wookhalela, wooreerela ni wa xariya. Masi miyuupuwelo iyo, sinninvirikanya Biibiliya. Maana owo, onihimya wira etthoko ahu enrowa ohakalala akhala wira ninnimphenta Yehova ovikana itthu sotheene. (Math. 22:36-39) Nto eyo kheniphavela ohimya wira nihitthekuleke mooreerela. Masi nihaana wiikoha so: ‘Kiireke kinnoonela miyuupuwelo sa mulaponi hata sihooniheriwaka mooluluwanya? Kiireke kinniwaakiherya anaaka ni miyo wira nihiweheke iprograma sikina sa TV? Kiireke kinnaakhaliherya anaaka okhalana muupuwelo wa Yehova wira ahihapuxiwe ni itthu aniiwa aya aahiiso woona, sa olumwenku ola?’ w18.11 26 itti. 18-19

Yehova onnooniherya wira ori ni hiyo onikhaliheryaka ni onikhapelela moophenta. Nkahaya moone moota onooniherya awe oniphenta wawe vaavo aahimmye awe wira: “Nyuwo mun-niphwanelela vamaithoni vaka: miyo kinnolemelihani vanjene kinnophen-tani vorera”. (Yes. 43:4) Khiivo etthu molumwenkuni ekhanle oomwiiriha Yehova ohiya waaphenta ale animurumeela. Tthiri ororomeleya wawe ti woolipa ntoko mwala. (Yes. 54:10) Yehova khonnileiherya okumiha mixankiho sahu masi khonkhala-khala eemereryaka “moro” eyo piiyo mixankiho ‘sinipahaka’ aahiiso oniiriha ohiya omurumeela. Yehova onninlipiherya wira onookhala ni hiyo wira onikhaliherye ‘olapuwa’ aahiiso oxintta mixankiho sahu. Nto Yehova onrowa opaka exeeni? Owo onoonikhaliherya okhala oomaaleleya ni ohitepa woova wira nivikanihe ororomeleya wa yena hata nihalaka okhwa. (Yes. 41:13; 43:2) Vaavo ninkupali ahu yooleiherya ya Yehova yoowi “Miyo kiri ni nyuwo” ninnilipa murima ni ovilela okathi sinniphwanya aya mixankiho. w19.01 3-4 itti. 4-6

Akhala wira mwa mmiravo, woonasa wene moovahiwa miruku sinceene ni maprusoore ni atthu anivaha miruku, wira orowa wuniversidade ni ophwanya muteko onliviwa musurukhu munceene, onimookhaliheryani othaaciri. Masi Yehova onnoovahani miruku soovirikana niiyo. Nave oniphavela wira mwiimananiheke oxikola wira nweryeke wiikhapelela. (aKol. 3:23) Nave-tho, onnisuwela wira amiravo ahaana opaka soothanla suulupale sinivarihana ni mukhalelo aya wa muhoolo. Tivonto onaavaha awe malakiheryo anrowa waakhaliherya orumeela okumi aya mwa enamuna enimuhakalaliha Muluku, mahiku ala ookiserya. (Math. 24:14) Muupuweleke wira Yehova onnisuwela ele enrowa okhumelela muhoolo ni nihiku olumwenku ola onrowa aya omala. (Yes. 46:10; Math. 24:3, 36) Nave Yehova onnoosuwelani. Owo onnisuwela etthu enrowa woriipihani murima ni etthu enrowa woohakalalihani. Okathi mukina, miruku sa apinaatamu pooti okhalaka ntoko sooloka, masi akhala wira khasinivarihana ni Biibiliya, miruku iyo khahiyo sooloka. w18.12 15-16 itti. 1-2

Vano, “atthu òmàla anoreriwa vathí-va: anokhala-mu ni murettele womalela”. Nave-tho Davidi aahihimya vahinatthi wira: “Anaxariya animwakhela elapo yohiyeriw’aya: anrowa okhalaka-mo mahiku othene”. (Esal. 37:11, 29; 2 Sam. 23:2) Nkahaya muupuwele moota ale anipaka yootthuna ya Muluku anoonela aya sooleiherya iyo. Awo annisuwela wira nnoophiya nihiku anrowa aya okhalaka mparayiisu valaponi ntoko ejardim ya wEdeni. Ikwaha sinceene, aIsarayeli yaawo yaihimya omukokhorela Yehova yaanihiya okokhorela wekeekhai. Nto Muluku aahiweemererya aBabilonia waaxintta atthu awe, opwetexa elapo aya ni waaroiha weepotthani atthu anceene. (2 Wah. 36:15-21; Yer. 4:22-27) Masi maprofeta a Muluku yaahihimya vahinatthi wira nuuvira iyaakha 70, aIsarayeli yaamutthikela elapo aya. Nto iprofesia iyo sahiiraneya. Nave olelo-va, sookhalana yootaphulela aya yoowi enookhala eparayiisu valaponi. w18.12 5 itti. 9-10

Malakiheryo manceene olumwenku ola onvaha aya, annivirikanya ni ele Biibiliya onniixuttiha awe. Olelo-va, niireke miruku sa olumwenku ola ti soovareleya muteko ovikana sa Biibiliya? Yesu aahimmye so: “Ankhili annòneya okhala òloka mwaha wa miteko saya”. (Math. 11:19) Nnaamwi etekonologia eronwe ene vahoolo, olumwenku khowenrye omaliha mixankiho suulupale sinnikhoottiherya ohakalala, ntoko ikhotto, nthalu ni ikrime. Nave olumwenku khonikhoottiherya orupihana woohiloka. Nto atthu anceene anneemererya wira mweettelo owo onnihonona itthoko, okumiherya iretta, ni maxakha makina. Ankhi miruku sa Yehova? MaKristau aneemererya moonelo wa Yehova voohimya sa ele enihakalaliha etthoko, annisyaka mixankiho ni annaataana saana ni atthu a Yehova, olumwenku wotheene. (Yes. 2:4; Mit. 10:34, 35; 1 aKor. 6:9-11) Eyo enooniherya wira muupuwelo wa Yehova tori muulupale ovikana wa olumwenku ola. w18.11 23-24 itti. 8-10

Ninnimananiha waareerela murima ni okhalana waataana wooloka ni amusi ahu. Masi khaninrowa ohiya weettela malamulo a Yehova wira naahakalalihe atthu awo. Masi, nihaana waathanla apatthani animphenta Yehova. Wira neetteleke ekeekhai, nihaana okhala oowaarya aahiiso ooratta vamaithoni va Yehova. (Yes. 35:8; 1 Ped. 1:14-16) Nuumala wiixutta ekeekhai, noopaka marukunuxo wira nitthareke malamulo a Biibiliya. Akina a hiyo noopaka marukunuxo maalupale. Masi nihaana ovaha ephoole wira itthu soohiloka sihihonone mweettelo ahu wooloka. Exeeni enrowa onikhaliherya wira nikhootte opaka itthu soohiloka? Nihaana wuupuwela ele Yehova onivanhe awe wira nikhale atthu oowaarya. Yehova oonivaha Yesu Kristu, Mwanawe a vameekhaawe! (1 Ped. 1:18, 19) Wira nikhale oowaarya vamaithoni va Yehova, okathi wotheene nihaana wuupuwela mukuttho Yesu ovanhe awe. w18.11 12 itti. 10-11

Anna anceene ari muteko wa Muluku wa okathi wotheene, anihimya wira oluttuweliwa olaleerya onnaakhaliherya ohakalala ni okhalana moonelo wooloka, hata makhalelo aya aturukeyaka. Hiyo ninnipaka ele ninwerya ahu moovarihana ni makhalelo ahu ni omuroromela Yehova, onooniphwanyiha murettele wa mmuupuweloni, hata nikhalanaka mixankiho. Nuuvira okathi, nnimoona wira okhala moovarihana ni makhalelo ahu masya onnilipiha waataana wahu ni Yehova. Olumwenku ola, makhalelo ahu pooti oturukeya mootutuxerya. Hiyo pooti ovahiwa muteko mukina mmutthenkesoni mwa Yehova, owereiwa aahiiso orowa waakhapelela amusi ahu. Moohicikha etthu enrowa wookhumelelani, mukupaliki wira Yehova onimookhapelelani ni wookhaliheryani okathi wooreerela. (aHéb. 4:16; 1 Ped. 5:6, 7) Nto mwiimananiheke opaka itthu moovarihana ni makhalelo anyu. Munvekeleke Tiithi inyu Yehova ni mmuroromeleke ni murima wotheene. Mwiira siiso, hata makhalelo anyu aturukeyaka, okathi wotheene munookhalana murettele wa mmuupuweloni onikhuma wa Yehova. w18.10 25-27 itti. 17, 19, 22

MBiibiliyani, aakhala matakiheryo anooniherya wira Yehova onnaathokorerya atthu awe. Wanipacerya, moone moota Yehova aamukhalihenrye awe mmiravo Samuweli omuleela Eli, Mukhulupale Aanamukuttho, muhupi woophukela. Ntoko sinooniherya aya 1 Samuweli 3:1-18. Nlamulo na Yehova ninnaatumererya anamwane waattittimiha atthu oowuuluvala, otepexa wene ale arina okhulupale. (Okhum. 22:27; Onam. 19:32) Nto, vaaninvila mmiravo Samuweli orowa voosiisu wa Eli, omuleela moolipa murima muhupi woophukela wa Muluku. Tivo Biibiliya onihimya awe wira Samuweli “anova omuhimerya Eli molumo aiwalyawe”. Masi Eli aahikhaliheriwa woona wira Samuweli iihaniwa ni Muluku. Vano Eli aahinvekela Samuweli wira omuleele itthu sotheene Muluku aahimmye awe. Tivonto, Samuweli “ahimuhimerya [Eli] molumo othene”. Nave, moolumo awe yaanivarihana ni moolumo a “mutthu a Muluku” aatonko omuleela Eli muhupi ene yoole. (1 Sam. 2:27-36) Yowiiraneya ela, enniniixuttiha wira Yehova toothokorerya ni ta miruku. w18.09 21-23 itti. 2, 4-5

Wootha onnisuweliwa ntoko etthu eri mphomeni mwa apinaatamu”. Mwa enamuna ekina, atthu anuupuwela wira wootha etthu yeephattu ni ti wooloka. Nave, atthu annootha aphavelaka wiisaakiha, woonasa wene avithaka soovonya ni ikrime apanke aya. Akina annootha aphavelaka ophwanya musurukhu aahiiso mireerelo. Nave yoohimmwa eyo, enihimya wira atthu akina annaawoka “anamurwa, ale anivarana aya muteko, apatthani aya ni ale anaaphenta aya”. Exeeni enikhumelela mwaha wa wootha iwo? Yookhumelela aya ti yoowi atthu khaniroromelana ni ompatthani onnimala. Davidi aahinvekela Yehova wira: “Nyuwo munnikiphavelela murima wekekhai”. (Esal. 51:8) Davidi aanisuwela wira etthu yootepa otthuneya ti okhalana murima wooloka. Tivonto okathi wotheene maKristau eekeekhai annilavula “ekekhai mukina ni mukhw’awe”.​—Zak. 8:16. w18.10 4 etti. 4; 5 itti. 9-10; 8 etti. 19

AIsarayeli yaakhumme wEjiitu mwakha wa 1513 ohinatthi Kristu orwa. Woonasa wene, yaahivikana imilyau 3. Egrupu ele, yaahikhala anamwane, atthu oowuuluvala ni waaniheryasa atthu akina oowereyasiwa ni oorakala. Nto muttitthi ole muulupale wa atthu, waatthuneya okhalana Muhooleli oothokorerya ni oosuwela. Eyo ti etthu Yehova aapanke awe omurumeelaka Moise. Nto aIsarayeli yaahoopoliwa mwa enamuna yahaalipelela aya. (Esal. 78:52) Yehova aawooponle sai aIsarayeli? Vaavo yaakhuma aya wEjiitu, aIsarayeli yaahikuxa ‘iyuma saya s’ekhotto’. (Okhum. 13:18) Mwaha wootthokihiwa mwa enamuna ele, awo yaaniwerya woona wira Yehova taahoolela. Nto, wira Yehova owooniherye wira aanaakhapelela ni aari ni yena, “othana wothene aniwettiherya nneku” ni “khula ohiyu, anahola nneku nowarya”. (Esal. 78:14) Tthiri aIsarayeli yaahaana olipihiwa mwaha wa ele yaarowa waakhumelela muhoolo. w18.09 24-25 itti. 11-12

Okathi wa Biibiliya, arumeyi akina oororomeleya a Muluku saahaaphwanya mixankiho anaphavela okhwa. Mwa ntakiheryo, Yobi aahihaawa vanceene khuhimya wira: “Kophweliwa n’ikumi aka ela: nkinikhala-tho mahiku othene”. (Yobi 7:16) Nave, Yona aahinyoonyiheya mpakha ohimya wira: “Tivó vano, kovarelani metto, mukuxeke ekumi aka, halali kikhweke: okhala mukumi wokiphwela”. (Yona 4:3) Profeta Eliya, oxankale ene, aahimmye wira: “Nyuwo Apwiya! Okumi wokimalela. Kuxani eroho [okumi] aka!” (1 Mam. 19:4) Okhala wira Yehova aanaaphenta vanceene arumeyi ale, owo aaphavela wira avikaniheke okhala akumi. Tivonto, Yehova khaapwapwenle. Masi, aahaakhaliherya wira aphaveleke okhala akumi ni ovikaniha omurumeela moororomeleya. w18.09 9 etti. 4

Ale anivara vamosa ni Muluku annisuweliwa okhala atthu oowaakhela aletto. MBiibiliyani, nuulumo na eGriki noowi “owakhela aletto”, nintaphulela “waareerela murima amalapo”. (aHéb. 13:2) Hiyo ninnisoma mBiibiliyani matakiheryo anniixuttiha moota wowaareerela murima atthu. (Maph. 18:1-5) Nihaana waakhaliherya atthu akina okathi wotheene ninwerya ahu, hata ari ene “aKristu” aahiiso nnaari. (aGal. 6:10) Niireke munoovara vamosa ni Yehova mwaavahaka opuro wookhala arumeyi anivara muteko wa Muluku wa okathi wotheene? (3 Yoh. 5, 8) Niira siiso, nnoophwanya mureerelo vamosa naawo. Eyo ti etthu Biibiliya oniitthana awe okhala ‘olipihana’. (aRom. 1:11, 12) Nuulumo na Muluku ninnaatumererya alopwana mmulokoni ovara vamosa ni Muluku, akhalaka arummwa oorumeela aahiiso axitokweene. (1 Tim. 3:1, 8, 9; 1 Ped. 5:2, 3) Annipaka eyo wira yaakhaliheryeke atthu akina omukokhorela Muluku. (Mit. 6:1-4) Anna anikhaliherya mwa inamuna soovirikana mmulokoni, annihakalala vanceene. w18.08 23 itti. 6-7; 24 etti. 10

Nnaamwi Timootheyo aarina miritti waavikana axitokweene akina, okathi wotheene aahaana owoonela othunku ni waattittimiha. Ankhi akhala wira moolakelela, mutthu oowuuluvala onnipaka etampi aahiiso okhaliherya etthu ehinimusivela Yehova? Yehova khonrowa ohiya omphukela mutthu owo mwaha wa wuuluvala aahiiso nttittimiho orina awe. Nrowe niwehe malakiheryo ari Yesaya 65:20, Biblya Exirima, ani: “[Hata ophiyerihaka] iyakha milokó mulokó [100], onimùlumeliwa” aahiiso opwapweliwa. Nave yowoonihiwa ya Ezekiyeli, ninniphwanya malakiheryo ntoko awo. (Ezek. 9:5-7) Etthu yootepa otthuneya ori omuttittimiha Yehova, Humu Muulupale. (Dan. 7:9, 10, 13, 14) Omuttittimiha wahu Yehova onooniiriha ompwapwela ole onitthuneya okhaliheriwa, hata uuluvanle ene.​—aGal. 6:1. w18.08 13 itti. 13-14

Otheene ahu, nihaana wiixutta otokosa mwaha wira nisuwele ekeekhai. (Mir. 3:21-23; 8:4, 5) Akhala wira khanintokosa, nnoomukhweiherya Satana ni olumwenku awe ohonona muupuwelo ahu. (aÉf. 5:6; aKol. 2:8) Tthiri, wira nisuwele ekeekhai, nihaana osuwela itthu sotheene sa mwaha owo. Olelo-va, sinniphwanyaneya myaha sa khula enamuna. Iyo pooti ophwanyaneya munternetini, mutelevisauni ni ikaruma sikina sinilaleya ihapari. Nave apatthani ihu anninruuhela e-mail, mensaxe ni sowiiraneya sikina. Tthiri soohimmwa iyo khasireere. Tivonto, nihaana okhalana ephoole. Pooti wira apatthani ihu awo aniphavela mureerelo ahu, masi aakhala atthu akina animwarexa moolakelela ihapari soohiloka. Malakiheryo xeeni a Biibiliya anrowa onikhaliherya otokosa itthu nniiwa ahu? w18.08 3-4 itti. 1, 3

Yehova aahimuthanla mwali oowiiyeviha iihaniwa Maria wira omuyare Yesu. Maria aakhala epooma yaamukhaani yiihaniwa Nazarethi. Epooma ele yaahittaivela oYerusalemu opuro yoowo yaakhala aya etemplo. (Luka 1:26-33) Ele Maria aamulenle awe mmusi awe Elizabeti, ennooniherya wira Maria aahikhalana wataana wooloka ni Yehova. (Luka 1:46-55) Yehova aanisuwela mukhalelo wa Maria, nave okhala wira aari oororomeleya, Yehova aahimureeliha mwa enamuna ahaalipelela awe. Okathi Yesu aayariwa awe, Yehova aalenle aani oyariwa wa Yesu? Owo khaalenle makhulupale ni anamalamulela ooYerusalemu aahiiso oBethelehemu. Masi, Yehova aahiruma malaikha, orowa waaleela amakampusi oowiiyeviha, yaawo yaakhapelela ipwittipwitthi mmathalani, ota wa oBethelehemu. (Luka 2:8-14) Nuumala-vo, amakampusi ale yaahirowa omuxukurya mwaana ole aayariwe niinaanoru. (Luka 2:15-17) Maria ni Yosefe khiyaatikinihiwe onweha Yesu ottittimihiwaka mwa enamuna ele. w18.07 6 itti. 11-12

Xeeni Yehova ohalaka onanariwa ni ele Salomoni aapanke awe? Biibiliya onihimya awe wira: “Apwiya yahinviruwela Salomoni mulattu w’opheruwa murim’awe ni wanyanyala Apwiya Muluku awe”. Muluku aaheererya omukhaliherya Salomoni. Nave Yehova ‘ahimukhumelela imara pili, [wira] . . . amukhottiherye watthara amuluku akina. Vano Salomoni khaìwelenle sarummwalyawe ni Muluku’. Nto Muluku aahimukhootta Salomoni. Yehova kheemerenrye wira osuulu wa Salomoni ovikanihe olamulela nloko notheene na Isarayeli. Nto awo yaahikhalana mixankiho suulupale iyaakha sinceene. (1 Mam. 11:9-13) Akhala wira nnaathanla apatthani ahintthara nnakhala ottittimiha malamulo a Muluku, awo pooti ohonona muupuwelo ahu ni wataana wahu ni Yehova. Pooti wira awo anna a mmulokoni, masi ahirina wataana wooloka ni Yehova. Woonasa wene, atthu awo amusi ihu, anamwaattamanani ihu, ninvara muteko hoothe aahiiso ninsoma exikola emosa, masi khanimukokhorela Yehova. Vano oviriha okathi munceene ni atthu awo ahineettela malamulo a Yehova, pooti onihapuxa mpakha oyeleela wataana wahu ni Muluku. w18.07 17-18 itti. 9-10

Satana onnirumeela iviidiyu ni iprograma sa televisau wira omwara-mwarye muupuwelo awe. Maana oosuwela wira itthu sinilavuliwa pooti opahula muupuwelo ahu moonelo ahu ni moota nimpaka ahu itthu. Yesu aahilavula malikanyiho wira iixuttihe saana. Mwa ntakiheryo Yesu aahilavula nlikanyiho na muSamariya ooreera murima ni na mwaana oomwareya aahononne soohiyeriwa sawe. (Math. 13:34; Luka 10:29-37; 15:11-32) Nave atthu yaale ahononiwe ni muupuwelo wa Satana pooti ohimya itthu wira ahonone muupuwelo ahu. Nintthuneya okhalana moonelo wooloka. Iviidiyu ni iprograma sa TV sinnooniherya itthu sikhanle oohonona muupuwelo ahu. Nto nihaana okhalana ephoole naawehaka itthu iyo. Vaavo ninthanla ahu matthekulelo nihaana wiikoha so: ‘Kiireke eviidiyu ela aahiiso eprograma ela ya TV enkitumererya ohela nipuro noopacerya itthu sa weerutthuni?’ (aGal. 5:19-21; aÉf. 2:1-3) Munrowa opaka exeeni mwasuwela wira eprograma eyo enooniherya muupuwelo wa Satana? Niireke munnisyaka ntoko munsyaka anyu orava iretta? w19.01 15-16 itti. 6-7

Ntoko siisaale ekapaseeti enikhapelela aya oramattha aahiiso ottoopare wa nakhotto, “wopowa” wahu onnikhapelela muupuwelo ahu. (1 aTes. 5:8; Mir. 3:21) Exeeni Satana ekhanle awe oopaka wira nrule ekapaseeti ahu? Muupuwele ele aaphavela awe omwiiriha Yesu. Satana aanisuwela wira Yesu aamukhala mwene aapinaatamu. Masi, Yesu aahaana ohaawa mpakha wiiviwa ohinatthi okhala mwene. Nave aahaana olipelela mpakha okathi Yehova aarowa awe omukhaliha Mwene. Masi, Satana aahimweehererya Yesu onvahaka omwene mowaakuveya. Satana aahimuleiherya Yesu wira amukokhorela paahi, aamukhala mwene a olumwenku okathi ene yoole. (Luka 4:5-7) Nave oosuwela wira Yehova oonileiherya onivaha itthu sooloka elapo esya. Masi nihaana olipelela wiiraneya yooleiherya eyo. Nave ninnikumana mixankiho sinceene. Masi, Satana onnineehererya onleiheryaka okumi wooloka vano. Owo oniphavela wira nipweheke opuro woopacerya itthu sinnisivela, ohiya Omwene wa Muluku.​—Math. 6:31-33. w18.05 25 itti. 15-17

Tthiri Yehova oniphavela wira mpuheke nlelo muri ene mmiravo. Akhala wira munoopaka eyo nlelo muyenve ene, moohipisa munimoona wira Yehova onimookhapelelani, woolakiheryani ni wooreelihani. Muupuweleke miruku sotheene onoovahaaweni omurumeelaka Biibiliya ni mutthareke miruku iya: “Muhimuliyaleké Muluku òpattunxeni nlelo muri mmiravo”. (Mus. 12:1) Nyuwo amiravo, munniphwanela ottottopeliwa, maana munnivikaniha omurumeela Yehova okumi anyu wotheene. Nyuwo mookhalana soolukama somunepani ni munnoona wira muteko woolaleerya ti wootepa otthuneya mookumini mwanyu. Nave-tho, khamuneemererya olumwenku ola wooliyalihakani soolukama sanyu. Tthiri, mukupaliki wira muteko muninvarela anyu Yehova khahiyo wa mahala. Nave mookhalana anna ni arokora anoophentani ni wookhaliheryani. Tivonto “muhele mmatatani mw’Apwiya miteko sanyu sothene: khamunojela muteko anyu nnakhala mmosá”. w18.04 32 itti. 17, 19