Junyo

Mwekeekhai, yooleiherya ya Yesu yaahaalipiha arummwa! Arummwa khiyaasuwela saana wira moohipisa Yesu aarowa wiiviwa. Masi okhwa wawe khiwaataphulela wira khiyaarowa okhalana nikhaliheryo. Maana Yehova aarowa waakhulaka mavekelo aya ni waakhaliherya muteko woolaleerya. Nto eyo ti etthu Yehova aapanke awe. Moohipisa, nuumala Yesu wiiviwa, arummwa yaahimuxonttela Yehova wira aavahe olipa murima, nto Yehova aahiwaakhula. (Mit. 4:29, 31) Eyo ti etthu eniiraneya olelo-va. Vaavo ninvilela ahu muteko woolaleerya, ninnivikaniha okhala apatthani a Yesu. Nave nikupaliki wira, okathi ninkumana ahu mixankiho naalaleeryaka, Yehova onimwaakhula mavekelo ahu. (aFil. 4:13) Ninnixukhurela vanceene, osuwela wira Yehova onnaakhula mavekelo ahu ni okhala apatthani a Yesu. Soovaha iya sa Yehova sinninikhaliherya ovikaniha wiima mihokorokho.​—Yak. 1:17. w18.05 14 itti. 17-18

Nuuvira iyaakha 5, maKristau a muloko wa eHeeberi yaahoona etthu yaamwiirinhe Paulo waatumererya otepa olipihana mukina ni mukhwaawe. Maana okathi owo, yaahoona naattamelaka nihiku Yehova aarowa awe omphukela Yerusalemu. Awo yaahaana otthyawa epooma ele ntoko Yesu aahimmye awe. (Luka 21:20-22; Mit. 2:19, 20) Nihiku noophukela na Yehova naahiphiya mwaakha wa 70 EC, vaavo aRoma yaapwetenxe aya epooma ya oYerusalemu. Olelo-va, mukhalelo ahu onoolikana ni maKristau ale. Maana “nihiku n’Apwiya [nri vakhiviru, nave] ti nulupalexa ni ti notepa wopiha”. (Yow. 2:11) Nto, moolumo a profeta Sofoniya annivareleya muteko olelo-va, yaawo ani: “Nihiku nulupale n’Apwiya nri vakhiviru: nihanle ophiya vowakuveya”. (Sof. 1:14) Tivonto nintumereriwa ahu wira “nùpuxeryaneke mukina ni mukhw’awe, wira nakuviheryaneke ophenta n’uvara miteko sorera”. (aHéb. 10:24) Nihaana waathokorerya vanceenexa anna wira niweryeke waalipiha okathi onireerela aya. w18.04 21-22 itti. 1-2

Tthiri ala moolumo oolipiha Yehova anvanhe awe Yoxuwa ohinatthi okela elapo yooleiheriwa. Nave Yehova aanaalipiha atthu awe ntoko egrupu. Mwa ntakiheryo, Yehova aahisuwela wira okathi aYuda yaari aya ipottha oBabilonia, yaahaana olipihiwa. Nto aahaavaha masu oolipiha a eprofesia ela eni: “Muhové! Miyo kiri ni nyuwo. Muhivelavelé! Miyo ki Muluku anyu. Miyo kinnolipihani: kinnokhaliheryani. Ayo! Kinnovarelani ni ntata naka: kinniwakihani, kinniwòpolani”. (Yes. 41:10) Muhoolo mwaya, Yehova aahaalipiha maKristau a eseekulu yoopacerya. Nave olelo-va onninlipiha. (2 aKor. 1:3, 4) Nave-tho Yehova aahimulipiha Mwanawe. Nuumala Yesu obatiziwa, owo aahiiwa nsu naakhuma wiirimu nriki: “Ola mwan’aka onimphentexaka: miyo kosiveliwa ni yowo”. (Math. 3:17) Munniwerya woona moota masu ala yaamulipinhe aya Yesu okathi aari awe valaponi? w18.04 16 itti. 3-5

Atthu akina anuupuwela wira Yehova khaavanhe Adamu otaphuwa wira apakeke itthu yaaphavela aya. Masi, awo khansuwela wira othanla mootaphuwa khonitaphulela okhalana ehakhi ya othanla etthu ekhanle yooloka ni yoohiloka. Adamu ni Eva, yaahikhalana otaphuwa woothanla omwiiwelela Muluku aahiiso ohimwiiwelela. Masi Yehova paahi torina ehakhi ya othanla ele eri yooloka ni yoohiloka. Tthiri “mwirí onsuweliha oreriwa walá otakhaliwa”, waanooniherya wira Adamu ni Eva khiyaarina ehakhi ya othanla ele eri yooloka aahiiso yoohiloka. (Maph. 2:9) Tthiri apinaatamu aakhalana mukano voohimya sa itthu anipaka aya. Eyo ti etthu yaamwiirinhe Yehova waavaha Adamu ni Eva nlamulo na ohilya mwiri ole ophavelaka owiixuttiha wira yaahaana omwiiwelela wira aphwanye otaphuwa wekeekhai. Nto Adamu ni Eva khiyiiwelenle. Niireke yoothanla ya Adamu ni Eva yahaaphwanyiha otaphuwa ntoko Satana aahimmye awe? Nnaari. Nto awo aayeleela otaphuwa wekeekhai yaavahiwa aya ni Yehova. w18.04 5-7 itti. 9-12

Yehova khahiyo paahi oniwoonela othunku atthu awe yaahaawaka. Masi onnipaka etthu wira aakhaliherye. Mwa ntakiheryo okathi aIsarayeli yaahasuliwa aya weepotthani wEjiitu Yehova aanoona owereya waaphwanya ni aahiwoopola. Nto Yehova aahimuleela Moise wira: “Miyo kihona ohawa w’atthu aka wEjitu. Kihìwa ikuttho saya . . . Kosuwela tthiri ohawa waya. Tivó kokhuruwela owakiha mmatatani mw’atthu a wEjitu”. (Okhum. 3:7, 8) Okhala wira Yehova aaniwoonela othunku atthu awe owo aahiwoopola weepotthani. Iseekulu sinceene muhoolo mwaya aIsarayeli ari ene Elapo Yooleiheriwa yaanihasuliwa ni awanani aya. Yehova oonenle sai? Yehova aaniiwa “wikhupanyerya waya mwaha w’atthu ale yahaxa ni yalupattha enamorela ikharari”. Yehova aahitthikela-tho owoonela othunku atthu awe ni aahipaka etthu wira aakhaliherye. Okathi ole Yehova aahaaruma makhulupale wira awoopole aIsarayeli mmatatani mwa awanani aya.​—Makh. 2:16, 18. w19.03 15 itti. 4-5

Malamulo manli oopacerya a Malamulo Muloko yaatumererya aIsarayeli omukokhorela Yehova paahi ni yaanikhoottiha okokhorela ilatarato. (Okhum. 20:3-6) Malamulo ale khahiyo yamphwanyiha mureerelo Yehova. Masi yaaphwanyiha mureerelo atthu awe. Nto vaavo yaakokhorela aya amuluku eethiru a maloko makina awo yaaniphwanya mixankiho sinceene. Yehova aanaareeliha atthu awe vaavo yaavikaniha aya ororomeleya wa yena ni waathokorerya mwa xariya atthu akina. (1 Mam. 10:4-9) Yehova khorina nthowa vaavo atthu ale aniihimya omurumeela ahiniiwelela aya malamulo awe ni anaahasula aya atthu awe. Masi Yehova onniniphenta ni onnisuwela vaavo ninthokoreriwa ahu moohixariya. Owo onnoona owereya ovikana owereya maama onoona awe mwaha wa mwanawe. Nnaamwi Yehova ohaaphukelaka moowaakuveya okathi wooreerela Yehova onimwaahukhumu ale anaathokorerya voohixariya atthu akina. w19.02 22 itti. 13-15

Sihalaka isumana vakhaani wira niphiye nihiku na Wuupuwelela mithukumano sahu sinnittittimiherya wiiyeviha wa Yesu oonihenrye awe vaavo aavanhe awe okumi awe ntoko yowoopola. Eyo enninikhaliherya otakiha wiiyeviha wa Yesu ni opaka yootthuna ya Yehova hata nikumanaka mixankiho sinceene. Nihaana wuupuwela olipa murima Yesu oonihenrye awe nihalaka nihiku nimosa wira iiviwe. Owo aanisuwela wira moohipisa awanani awe yaarowa omuramusa ommana ni omwiiva. (Math. 20:17-19) Hata vaari siiso Yesu aaheemererya wiiviwa. Nto vaavo okathi waaphiyale aya owo aahaaleela arummwa aarina awe ejardim ya oJeseemani wira: “Venyani nrowé! Ole onrwa okivariha òphiya!” (Math. 26:36 46) Nave vaavo waaphiyale aya muttitthi waakunxe ikatana wira onvare Yesu aahiisooniherya ni aahaaleela anakhotto wira yaahiye arummwa awe aroweke. (Yoh. 18:3-8) Tthiri Yesu aahooniherya olipa murima vanceene. Olelo-va maKristau oowoottihiwa ni a ipwittipwitthi sikina annitakiha olipa murima wa Yesu. w19.01 27-28 itti. 7-8

Ntoko siisaale ikoore soovirikana ni sookuxa murima sinireeriha aya ekuwo hiyo nihaana okhalana mikhalelo sooloka ni soovirikana wira nikhale atthu oomaala aahiiso oowiiyeviha. Mikhalelo iyo sinihela muhina wiiyeviha wiiwelela oreera murima ni olipa-murima. Atthu oowiiyeviha paahi taniiwelela yootthuna ya Muluku. Omaala oniirela mpantta yootthuna ya Muluku. (Math. 5:5; aGal. 5:23) Satana khonsiveliwa vaavo hiyo nimpaka ahu yootthuna ya Muluku. Nave hata niri ene atthu oowiiyeviha ni oomaala atthu anceene aneettihiwa ni Satana anninnyokha. (Yoh. 15:18, 19) Nto nihaana okhala atthu oolipa murima wira niwanane Satana. Mutthu oomaala onnivirikana ni mutthu oowiixinnuwiha maana mutthu oowiixinnuwiha towaakuva onanariwa ni khonimwiiwelela Yehova. Tthiri mikhalelo iyo sinlikana ni sa Satana. Mwaha woowi owo onnaanyokha atthu oowiiyeviha! Atthu oomaala annooniherya wira mikhalelo sa Satana ti soohiloka. Nave annooniherya wira Satana nawoothe. Nthowa xeeni? Moohicikha etthu anihimya aya aahiiso opaka Satana khoniwerya waakhoottiherya atthu oomaala omurumeela Yehova!​—Yobi 2:3-5. w19.02 8-9 itti. 3-5

Yehova aanisuwela wira atthu a oBabilonia yaarowa woovaka. Exeeni yaarowa owiiriha woova? ABabilonia yaarowa otupheliwa ni anakhotto ootupa oMedo-Persia. Yehova aarowa waarumeela aMedo-Persia wira yaakumihe atthu awe weepotthani oBabilonia. (Yes. 41:2-4) Vaavo aBabilonia ni atthu a maloko makina yaasuwela aya wira awanani aya yaanirwa awo yaaniimananiha olipihana mukina ni mukhwaawe ahimyaka wira: Mulipe murima. Nave yaanapaka amuluku anceene yuupuwelaka wira yaamwaakhaliherya oxintta. (Yes. 41:5-7) Okathi ene yoowo Yehova aahaalipiha aYuda yaari weepotthani oriki: “Nyuwo atthu a Isarayeli arumeyi aka . . . Muhivelavelé! Miyo ki Muluku anyu”. (Yes. 41:8-10) Moone wira Yehova aahimmye wira: “Miyo ki Muluku anyu”. Ni moolumo ala Yehova aahaakhaliherya atthu awe oororomeleya wira ahooveke maana nlelo khaaliyanle ni awo yaarowa okhalaka atthu awe. Nave aahaaleela wira: “Kinimokhapelelani-tho . . . kinowopolani”. Moolumo ala oomaaliha yahaalipiha aYuda ale yaari weepotthani.​—Yes. 46:3, 4. w19.01 4 etti. 8

Ekwaha yoopacerya Yehova onlavula awe ori ene wiirimu eniphwanyaneya eliivuru ya Marko 1:9-11. Owo aahimmye so: “Nyuwo mwá mwan’aka onimphentexaka: miyo kosiveliwa ni nyuwo”. Tthiri Yesu aahilipa vanceene nuumala omwiiwa Tiithi awe ohimyaka wira aanimphenta ni omuroromela! Moolumo a Yehova annooniherya ikeekhai tthaaru voohimya sa Yesu. Yoopacerya, Yesu Mwaana a Muluku. Ya nenli, Yehova onnimphenta Mwanawe. Ya neeraru, Yehova onnisiveliwa aahiiso onnimweemererya Mwanawe. Mwaha woohimya wira “Nyuwo mwá Mwan’aka”, Yehova aahooniherya wira Yesu Mwanawe onimphentexa awe aahikhalana waataana musya ni Yena. Okathi Yesu aari awe wiirimu owo aari mwaana oomunepani a Muluku. Masi vaavo Yesu aabatiziwe awe owo aahithanliwa ni munepa wootteela. Nto okathi owo Muluku aahooniherya wira Yesu aari Mwaana awe oowoottihiwa ni aahikhalana nlipelelo nootthikela wiirimu ntoko Mukhulupale a Anamukuttho othanliwe ni Muluku. (Luka 1:31-33; aHéb. 1:8, 9; 2:17) Nto ninnoona nthowa naamwiirinhe Yehova ohimya wira: “Nyuwo mwá Mwan’aka” okathi Yesu aabatiziwe awe.​—Luka 3:22. w19.03 8-9 itti. 3-4

Okhuma khalai, miruku soohiloka sihuulaana. Satana topacenrye waavaha apinaatamu miruku soohiloka. Owo aahaaleela Adamu ni Eva wira yaamuhakalalaka akhala wira yaamweettelaka murima aya. (Maph. 3:1-6) Satana toowiitthuna! Owo aaphavela wira Adamu ni Eva vamosa ni osuulu aya amwiiweleleke ni omukokhorela Satana, ohiya Yehova. Maana Yehova paahi taavanhe itthu sotheene yaarina aya. Nave Yehova aahaavaha ejardim yooreera ni irutthu soohittheka wira akhaleke mahiku otheene. Mooriipiha murima, Adamu ni Eva khiyaamwiiwelenle Muluku. Nto mwaha woopaka eyo, awo yaahimuhiya ole aavanhe ekumi. Nave eyo yahaakumiherya maxakha. Ntoko siisaale ethutu erukuliwe vamwirini vaya vakhaani-vakhaani ennyaala aya, Adamu ni Eva vakhaani-vakhaani yaahuuluvala mpakha okhwa. Awo anraviha mixankiho iyo sotheene. (aRom. 5:12) Atthu anceene olelo-va, aneettela murima aya ni khaniphavela omwiiwelela Muluku. (aÉf. 2:1-3) Nto exeeni enikhumelela? Biibiliya onnihimya yookhumelela aya yoolepa ya olelo. w18.12 16 itti. 3-4

Murummwa Paulo aari mutthu ankhili, aasomme ni aalavula oratteene mattaava manli. (Mit. 5:34; 21:37, 39; 22:2, 3) Owo khaatthara miruku sa mulaponi, masi aatthara malakiheryo a Nuulumo na Muluku okathi aapaka awe soothanla. (Mit. 17:2; 1 aKor. 2:6, 7, 13) Nto eyo yaahimukhaliherya okhumela saana okathi aalaleerya awe ni aaniwehexexa etthuvo ya muhoolo. (2 Tim. 4:8) Mwekeekhai, muupuwelo wa Muluku ti muulupale ovikana wa mulaponi. Akhala wira nnootthara malamulo a Muluku, ninrowa ohakalala ni okhumela saana. Masi Yehova khonnikhanyererya wira nuupuweleke ntoko yena. “Murumeyi òroromeleya ni ànkhili” khoneettelela muupuwelo ahu, nnakhala axitokweene khanipaka eyo. (Math. 24:45; 2 aKor. 1:24) Maana otheene ahu nookhalana muritti woolokiherya muupuwelo ahu wira nooneke itthu ntoko Yehova onoona awe. w18.11 24 itti. 12-13

Omurumeelaka profeta Yesaya, Muluku aahihimya vahinatthi wira okathi aIsarayeli yaarowa aya otthikela elapo aya, yaamukhalana murettele. Inama khisaarowa waahaaxaka atthu. Amiravo ni atthu oowuuluvala yaarowa okhala moovareleleya. (Yes. 11:6-9; 35:5-10; 51:3) Yesaya aahihimya vahinatthi wira elapo yotheene, ohiya paahi elapo ya aIsarayeli, yaarowa “osareya osuwela w’Apwiya, ntoko vansareyaya màsi mphareya”. Eyo enrowa wiiraneya muhoolo. Moone wira Yesaya, aahihimya-tho vahinatthi wira nuumala aIsarayeli otthikela elapo aya, khiyaarowa otupheliwa ni inama soowali aahiiso atthu ootakhala. Nave, Yesaya aahimmye wira elapo aya yaarowa okumiheryaka yoolya yooloka okhala wira yaamwaatta maasi ntoko ejardim ya wEdeni. (Maph. 2:10-14; Yer. 31:12) Niireke eprofesia ela yaarowa wiiraneya okathi wa aIsarayeli paahi? Nnaari. Maana, eprofesia ele yaahimmye wira ale ahinoona, oorakala ni ahiniiwa anrowa openuxiwa. Eyo khiyaawiiranenle aIsarayeli nuumala otthika oBabilonia. Eyo enooniherya wira Muluku aahimya okathi onrowa awe waapenuxa ale anwereiwa muhoolo. w18.12 5 itti. 11-12

Nihaana ovikaniha weettela ekeekhai mahiku otheene. Exeeni enrowa onikhaliherya olakela ni ovikaniha weettela ekeekhai? Nvikanihe omusoma Biibiliya ni wuupuwelela ele enisoma anyu. Nave muhihiye eprograma anyu yoomusoma Biibiliya. Vaavo munitepa anyu omusoma, munrowa otepaka ophenta ekeekhai ni khamunkhala-khala muhiyaka. Miruku 23:23, onihimya wira “[nithume] ekekhai n’osuwela n’ikano n’ankhili”. Tivo, khivaniphiyerya osuwela ekeekhai paahi. Nihaana ovarihela muteko mookumini mwahu. Okathi nniiwexexa ahu ekeekhai, ninnitakaaha itthu nniixutta ahu niiye ninsuwela ahu. Maana ankhili anniniiriha orumeela itthu ninsuwela ahu. Ikwaha sikina ekeekhai enninttaruxa, enooniheryaka marukunuxo nintthuneya ahu opaka. Nto nihaana weemererya ottaruxiwa iwo, maana Biibiliya onihimya wira ankhili, annivikana eparatha.—Mir. 8:10. w18.11 10 etti. 3; 13 itti. 13-14

Etthu xeeni yootepa otthuneya mookumini mwanyu? Hiyo Anamoona a Yehova, etthu yootepa otthuneya ti waataana wahu ni Yehova. Nto nihikhala-khale nitumihaka waataana wahu. Nave ninnivaha efaita ekeekhai ya mBiibiliyani, maana enninikhaliherya okhala apatthani a Yehova. (aKol. 1:9, 10) Yehova tori Mwiixuttihi ahu Muulupalexa, nto onniniixuttiha ikeekhai sootthuneya siri mBiibiliyani. Nave onniniixuttiha efaita nrina aya nsina nawe ni onninleela mikhalelo sawe. Owo ooniphenta vanceene mpakha onivaha Mwanawe. Onniniixuttiha voohimya sa Omwene wa oMesiya. Oonivaha nlipelelo na muhoolo, na okhalaka mParayiisu valaponi. Yehova onniniixuttiha moota wookhalana okumi wooloka. Nto ninnivaha efaita ikeekhai iyo, okhala wira sinninikhaliherya omwaattamela Mpattuxa ahu yoowo onnikhaliherya mookumini mwahu. w18.11 3-4 itti. 1-2

Khanniwerya onwoka Yehova. Biibiliya onihimya wira: “Khivo etthu epattuxiwe envitheya vamaithoni va Muluku”. (aHéb. 4:13) MBiibiliyani, nookhala ntakiheryo na Ananiya ni Safira, yaawo yaawonke arummwa. Awo yaahitumiha ematta aya, masi khiyaavanhe musurukhu wotheene arummwa. Aphavelaka wooniwa okhala atthu oovaha, awo yaahaawoka ahimyaka wira yaahivaha musurukhu wotheene. Masi Yehova aahisuwela wira yaamootha, tivonto aahaahukhumu. (Mit. 5:1-10) Yehova oniwoonela sai atthu anootha? Atthu otheene anootha ni ahinattharuwa anrowa oriheliwa vamosa ni Satana “mphareya mwa moro”, eyo piiyo, opwetexiwa moohikhalana nlipelelo na ohihimuxiwa. (Wis. 20:10; 21:8; Esal. 5:7) Noosuwela wira Yehova “khanotha: owo khanlikana ni mutthu” ni ‘khonwerya wotha’. (Moth. 23:19; aHéb. 6:18) Miruku 6:16, 17 onihimya wira: “Apwiya . . . [waananara] nlumi nowotha”. Nto naaphavelaka omusiveliha Yehova, nihaana olavula ekeekhai. w18.10 5-6 itti. 10-13

Munrowa opaka exeeni, akhala wira patarau anyu, onnoovekelani ovaha musurukhu anyu wira mukhaliherye niira ninvarihana ni etiini yoowootha? Ohiya olipelela okhumelela etthu ntoko eyo, vaamuloka wuupuwelela vano, moota Yehova onoonela awe mwaha owo. Nto, akhala wira eyo enooniiraneela, vanoonikhweela opaka aahiiso ohimya etthu yooloka. Okhalana muupuwelo wa Yehova onoonikhaliherya ororomeleya okathi enniphwanya aya eretta mootutuxerya. Tthiri, noolakela okhootta oheleliwa ephome aahiiso mipantta mixexe suulupale sa ephome. (Mit. 15:28, 29) Masi sookhala inamuna sikina sa olooliwa sirumeeliwaka ifrasau sa ephome onitthuneya awe khula muKristau opaka yoothanla awe ottharaka malakiheryo a Biibiliya. Tuuvi ori okathi wooreerela othanla ele ninrowa ahu opaka? Wakhala oxiripitali, woona owereya ni okhanyereriwa pooti oniiriha opaka yoothanla yoohiloka. Tivonto, ola ti okathi wootokosa mwaha owo ni olepa edukumento ntthokiheryaka enamuna yoolooliwa ni olavula ni totoro ahu. w18.11 28 etti. 5; 30-31 itti. 15-16

Yehova makampusi oophenta ni onnaakhaliherya atthu awe wira ahixinttiwe ni awanani aya. Nto eyo enninimaaliha ni onlipiha vanceene vaavo nintepa ahu waattamela wanikisa wa olumwenku ola. Nave-tho, Yehova onrowa waakhapelela atthu awe okathi wa maxakha maalupale anaattamela. (Wis. 7:9, 10) Hata ari ene amiravo aahiiso oowuuluvala, arina ene ekumi yooloka wala arakanle ene, atthu a Muluku khanrowa oxanka aahiiso woova okathi wa maxakha maalupale. Tthiri awo anrowa omuroromelaka moomalela Yehova! Okhala wira animuupuwela masu a Yesu oowi: “Mulipihe murima, nvenxe muru, okhala wira wopoliwa wanyu ori vakhiviru”. (Luka 21:28) Hata okathi anrowa aya otupheliwa ni Gogi, maloko oowerya, atthu a Muluku anniroromela wira Yehova onoowaakiherya. (Ezek. 38:2, 14-16) Nthowa xeeni? Nthowa noowi annisuwela wira Yehova khoturukeyale. Okathi wotheene, owo onrowa wooniheryaka wira onnikhapelela ni Moopoli onaathokorerya atthu awe.—Yes. 26:20. w18.09 26 itti. 15-16

Nkahaya muupuwele moota aIsarayeli yoonenle aya okathi Yehova aalenle awe moolumo ala a yoolepa ya olelo. Noosuwela wira khula mutthu tootthuneya wa Yehova. Biibiliya onileiherya wira: “Owerya waya onowopolani. Awo kharere otteliwa murima mwaha wa nyuwo”. (Sof. 3:16, 17) Yehova ooleiherya waalipiha ni waamaaliha arumeyi awe hata saaphwanyaka mixankiho, oriki: “Anamwane awe anrowa okuxiwa mmatatani, anrowa wepesiwa vamettoni. Ntoko muthiyana onimmaliha mwan’awe, siso miyo kinrowa wohakalalihani”. (Yes. 66:12, 13) Tthiri mwaana khonoova okathi maama awe onimuyara awe ottuli aahiiso onimukuxa awe mmatatani mwawe! Nave Yehova onnoophentani vanceene ni oniphavela wira muhooveke. Mukupaliki wira Yehova onnoovahani efaita yuulupale.—Yer. 31:3. w18.09 9-10 itti. 6-7

Khalai, aIsarayeli yaahikhalana inamuna sinceene wira akhaliherye muteko wa Muluku. (Okhum. 36:2; Neh. 11:2) Nave olelo-va, nyuwo mookhalana inamuna sinceene wira murumeele okathi anyu, mireerelo sanyu ni osuwela wanyu ovara muteko wira mwaakhaliherye anna ni arokora. Mwapaka eyo, munoohakalala ni Yehova onimooreelihani. Ale anikhaliherya oteka ipa sa Omwene annaapaka apatthani asya. Murokora oniihaniwa Margie, aahikhaliherya oteka Ipa sa Omwene iyaakha 18. Opuro mmosa aateka awe empa ya Omwene, aahipatthana ni aximwali ni aahiwiixuttiha ovara muteko owo. Murokora owo onihimya wira, eyo enamuna yooloka ya olipihana mukina ni mukhwaawe. (aRom. 1:12) Okathi aakumanne awe muxankiho, apatthani awe ale yaahimulipiha. Niireke mootoko okhaliherya muteko ola wooteka? w18.08 24 itti. 9, 11

Okathi Paulo aamulepenle awe Timootheyo masu ala, woonasa wene, Timootheyo aarina iyaakha 30. Hata vari siiso, Paulo aahinvaha Timootheyo miritti sinceene. Exeeni eniixutta ahu? Nniixutta wira, nihaaphukeleke amiravo mwaha wa iyaakha saya. Nkahaya muupuwele itthu Yesu aapanke awe orina ene iyaakha 33! Ilapo sikina, amiravo khanttittimihiwa. Tivonto, axitokweene akina khanaathanla amiravo wira akhale arummwa oorumeela aahiiso axitokweene, hata arina ene mikhalelo sinivekeliwa mBiibiliyani. Masi Biibiliya, khonihimya iyaakha sinitthuneya wira munna othanliwe okhala murummwa oorumeela aahiiso mutokweene.—1 Tim. 3:1-10, 12, 13; Tito 1:5-9. w18.08 13-14 itti. 15-16

Wira nipake soothanla sooloka, nihaana ophavelasa soohimmwa soororomeleya. Tivonto, nihaana okhalana ephoole ni itthu ninsoma ahu. (aFil. 4:8, 9) Nihihononeke okathi ahu niwehaka itthu soohiroromeleya munternetini aahiiso nisomaka e-mail sinuulaanyiha itthu sowoothiwa. Eyo pooti onikhaliherya waasyaka awebsaite a anammwareya. Maana aniphavela ohonona ekeekhai ni waamini wa atthu a Muluku. Soohimmwa soohiloka sinnimwiiriha mutthu opaka soothanla soohiloka. Nto muhikhala-khale mwiiwokaka wira soohimmwa soohiloka khasinoohapuxani. Mwa ntakiheryo, Moise aahaaruma anamahottela 12 orowa Elapo Yooleiheriwa. Masi anamahottela 10 yaahihimya itthu soohiloka. (Moth. 13:25-33) Awo yaahitepiha itthu yaawenhe aya, nto atthu a Yehova yaahipacerya woova ni ovolola. (Moth. 14:1-4, 6-10) Ohiya ophavela osuwela ekeekhai ni omuroromela Yehova, moololo yaahithanla okupali yoohimmwa yoohiloka. w18.08 4 itti. 4-5

Ekeekhai wira atthu akina aakhalana mikhalelo sooreera. Nave khahiyo wira atthu ale ahinimukokhorela Yehova, okhala wene, anipaka itthu soohiloka. Pooti wira nyuwo munnaasuwela atthu awo. Niireke eyo entaphulela wira nihaana opatthana ni atthu awo? Niireke animookhaliheryani olipiha wataana wanyu ni Yehova? Animookhaliheryani omwaattamela Muluku? Etthu xeeni enipweha aya nipuro noopacerya? Itthu xeeni sinaasivela olavula? Niireke onaasivela olavula musurukhu, itthu sikumiheriwe niinaano, apareelyo eletroniko, matthekulelo ni itthu ntoko iyo? Niireke onaasivela waavaanyiha akina? Niireke onaasivela olavula itthu sootheiha siri ene sooveeha? Yesu aahimmye so: “Eyano ennilavula itthu sisanrye mmirimani”. (Math. 12:34) Nto moona wira atthu muneettana anyu annihonona wataana wanyu ni Yehova, muhaana opaka etthu! Mmananihe ohiviriha okathi munceene ni atthu awo, vaatthuneyaka, muhiye weettana.​—Mir. 13:20. w18.07 18 etti. 11

Okathi Moise aarina awe iyaakha 80, Yehova aahinvaha muteko wa owoopola aIsarayeli weepotthani wEjiitu. (Okhum. 3:10) Ikwaha sinceene, Moise aahoothererya etthu ekina. Masi Yehova aahimpixerya murima Moise, nave, aahinvaha owerya woopaka miiriirya. Nto Moise ti pinaatamu oopacerya opaka miiriirya onilavuliwa mBiibiliyani. (Okhum. 4:2-9, 21) Nto Yehova anwerya omoopopiha Moise wira omwiiweleleke. Masi, Yehova aahimpixerya ni omureerela murima, omulipiheryaka wira aarowa omukhaliheryaka murumeyi awe ole oowiiyeviha. Niireke eyo yaahimukhaliherya? Aayo! Moise aahikhala muhooleli ooloka a atthu a Muluku. Omutakihaka Yehova, Moise aanaapixerya murima ni waathokorerya saana atthu. Akhala wira moovahiwa owerya wowaahoolela akina, ti vootthuneya omutakiha Yehova mwaathokoreryaka, waareerela murima ni ompixerya murima mwaarinyu, aniinyu ni anna a mmulokoni. (aKol. 3:19-21; 1 Ped. 5:1-3) Mwamutakiha Yehova Muluku ni Yesu Kristu, yoowo ori Moise Muulupale, munimwaakhweiherya atthu olavula ni nyuwo ni munimwaalipiha.​—Math. 11:28, 29. w18.09 23-24 itti. 7-10

Nnoowerya waalipiha anna ni arokora vaavo nnaaphenta ahu ni waareerela murima. Nto eyo enniiriha muloko okhala wowiiraana. Niireke munoomananiha waasuwela saana anna ni arokora a muloko anyu? (2 aKor. 6:11-13) Moohicikha etthu sa opuro onikhala anyu, munoowerya ohiya muthuko anyu waaryaka. Oreera wanyu murima pooti owiiriha ale mwaattamanne anyu ophavela wiixutta voohimya sa Yehova. Mwiikoheke so: ‘Ale kaattamanne aka ankoonela sai? Vate vaka ti vooratteleya? Atthu kaattamanne aka anoonela sai? Kiireke kinnaakhaliherya ale kaattamanne aka?’ Nave mwaakoheke Anamoona akina moota oreera waya murima ni ntakiheryo naya nooloka naakhalihenrye aya amusi aya, atthu yaattamanne aya ni anivarana aya muteko aahiiso anaxikola akhwaaya.​—aÉf. 5:9. w18.06 24 itti. 13-14

Eyo ti etthu yuupuwela aya atthu ale yaamwiivale mwiixutti Siteefano. (Mit. 6:8, 12; 7:54-60) Okhuma khalai, anatiini anceene aapaka ikrime suulupale, ntoko wiiva ahimyaka wira anvara yootthuna ya Muluku. Masi etthu ampaka aya khenivarihana ni malamulo a Muluku. (Okhum. 20:13) Tthiri yowuupuxerya ya murima aya kheniweettiha saana! Nto ninrowa osuwela sai wira yowuupuxerya ya murima ahu ennivara saana? Malamulo ni malakiheryo a Biibiliya apakeliwe ‘wira yixuttiheke ekekhai, yavanyiheke ale anvonya, yattaruxeke ale anttheka, ewettiheke atthu ephiro ya xariya’. (2 Tim. 3:16) Tivonto, nihaana omusoma Biibiliya khula nihiku, wuupuwelela ele enisoma ahu ni ovarihela muteko mookumini mwahu. Opaka eyo, enooniiriha wuupuwelaka ntoko Yehova. Nto nnookupaliki wira yowuupuxerya ya murima ahu enooneettihaka saana. w18.06 16 itti. 3-4

Anakhotto ooRoma yaanirumeela ikatana. Nto ikatana iyo saarina erakamelo ya nimeya na emeeturu. Anakhotto awo yaanisuwela saana orumeela ikatana mwaha woowi khula nihiku yaaniina nikuruta. Murummwa Paulo oolikanyiha Nuulumo na Muluku ni ekatana. Yehova oonivaha nuulumo nawe. Masi nihaana wiixutta moota woorumeela saana wira naakiherye waamini wahu ni olokiherya muupuwelo ahu. (2 aKor. 10:4, 5; 2 Tim. 2:15) Tthiri khanintthuneya omoova Satana ni malaikha awe ootakhala. Ekeekhai wira awo aakhalana owerya, masi owerya waya khoninvikana Yehova. Nave awo khanrowa okhalaka mahiku otheene. Maana anrowa otthukweliwa, nto khanrowa okhalana owerya woowaahapuxa atthu okathi wa Eyaakha Ekonto Emosa ya Olamulelo wa Kristu. Nuumala-vo, anrowa opwetexiwa. (Wis. 20:1-3, 7-10) Hiyo ninnimusuwela nwanani ihu, olavilavi awe, ni yoolakela awe. Masi nikhaliheriwaka ni Yehova nnoowerya omukhootta Satana! w18.05 25 etti. 15; 26 itti. 19-21

Adamu aanisuwela wira enowa khenlavula. Tivonto, okathi aasuwenle awe wira enowa yoolavula ni Eva, woonasa wene Adamu aahoona wira naari nlaikha. (Maph. 3:1-6) Adamu ni Eva khiyaasuwela nlaikha nene. Masi Adamu yaahithanla omutthara ole yahaamusuwela aya, nto yaahimmwareela Tiithi aya oophenta a wiirimu. (1 Tim. 2:14) Moohipisa, Yehova aahipacerya omuupulula nwanani ole ootakhala ni ooleiherya wira onrowa ompwetexa. Masi, okathi ole Yehova aahaalopola wira nlaikha naalavunle ni Eva nrumeelaka enowa, naarowa waanyokhaka atthu otheene animphenta Muluku. (Maph. 3:15) Yehova khaahimmye nsina na nlaikha nammwarenle. Masi nuuvira iyaakha 2.500, okhuma vaavale aamwareeliwe awe wEedeni, Yehova aahuupulula nsina na nwanani ihu.​—Yobi 1:6. w18.05 15-16 itti. 1-2

Niireke mootoko onyoonyiheya mwaha woowi atthu a muttetthe anyu khamphavela wiiwa muhupi wa Omwene? Akhala wira ti siiso, munimwiiwexexa ele Paulo oona awe. Maana owo aahiviriha iyaakha sowiiraka 30 olaleeryaka, ni aahaakhaliherya atthu anceene okhala maKristau. (Mit. 14:21; 2 aKor. 3:2, 3) Hata vaari siiso, Paulo khaawenrye waakhaliherya aYuda anceene okhala maKristau. Maana aYuda anceene yaahikhootta onwiriyana, nave akina yaanimulupattha. (Mit. 14:19; 17:1, 4, 5, 13) Paulo oonela sai, nnaamwi atthu awo yahaaphavela wiiwa? Owo aahimmye wira: “Murim’aka onnikiripa vanjene: kinnihawa nihiku ti níhiku vohihiyererya”. (aRom. 9:1-3) Exeeni yaamwiiriha Paulo woona siiso? Okhala wira Paulo aanisiveliwa olaleerya ni aanaaphenta atthu. Nave, aanaaphenta vanceene aYuda, ti maana aya aariipiwa awe murima vaavo yaakhootta aya omoriwa ikharari wa Muluku. Ntoko Paulo, hiyo nnaalaleerya atthu mwaha wowaaphenta.​—Math. 22:39; 1 aKor. 11:1. w18.05 4 itti. 4-5