Julyo

Namararu, 1 a Julyo

Mphaveleke osuwela sintthunawe Muluku.​—aÉf. 5:17.

Ninkhala “mahiku òxanka” ni oovila okhala. (2 Tim. 3:1) Nave itthu sinrowa otepaka oxankiha mpakha nihiku Yehova onrowa awe opwetexa olumwenku ola wootakhala ni oruuha murettele wekeekhai valaponi. Tivonto, nihaana wiikoha so: ‘Ti pani oninvekela aka nikhaliheryo ni malakiheryo?’ Khalai, namalepa mmosa a Biibiliya aatthokihenrye wira ti vootthuneya onwehexexa Yehova, niire so, onvekela nikhaliheryo. (Esal. 123:1-4) Owo ohimmye wira vaavo nninwehexexa ahu Yehova, ninlikana ni murumeyi oninwehexexa pwiyawe. Moota xeeni? Murumeyi onnimuroromela pwiyawe wira ovahiwe yoolya ni okhapeleliwa. Nave onninwehexexa wira osuwele ele enivekeliwa awe ni pwiyawe ni opaka etthu eyo. Moolikanasa, nihaana osoma khula nihiku Nuulumo na Muluku, wira nisuwele ele Yehova oniphavela awe wira nipakeke. Nto nikupaliki wira Yehova onrowa onikhaliherya okathi oninvekela ahu nikhaliheryo. w18.07 9-10 itti. 1-2

Namaxexe, 2 a Julyo

Mwana awopolani, tthiri munokhala òtaphuwa.​—Yoh 8:36.

Yesu aalavula sa otaphuwa wa okhala ipottha sa etampi, opottha wootepa otakhala waaphwannye apinaatamu. (Yoh. 8:34) Mwa inamuna xeeni niri ahu ipottha sa etampi? Etampi enniniiriha opaka itthu soohiloka. Nave enninikhoottiherya wiimananiha aahiiso opaka itthu ninsuwela ahu okhala sooloka. Nto eyo ennikumiherya onyoonyiheya, owereya, ohaawa aahiiso okhwa. (aRom. 6:23) Nuumala okumihiwa etampi moomalela, ninrowa okhalana otaphuwa wekeekhai Adamu ni Eva yaarina aya. Mwaha woohimya wira “mwakhalela nthiti molumo aka”, Yesu aahooniherya wira naaphavelaka wira onitaphule nihaana opaka itthu sinimusivela. (Yoh. 8:31) Itthu xeeni? Nuumala obatiziwa, nihiikhootta ni niheemererya mikano Yesu aavanhe awe awiixutti awe. (Math. 16:24) Ntoko Yesu aaleihenrye awe, muhoolo ninrowa otaphuwa tthiri vaavo ninrowa ahu waakhela mareeliho otheene a mukuttho awe wowoopola. w18.04 7-8 itti. 14-16

Namathanu, 3 a Julyo

Nyuwo munnisuwela mirima [sa atthu].​—2 Wah. 6:30.

Yehova onnithokorerya moonelo wa atthu awe hata osuwelaka wira muupuwelo aya ti woohiloka. Nkahaya nthokorerye ntakiheryo na Yona. Muluku aahimuruma Yona orowa waalaleerya muhupi woophukela atthu a oNiinive. Nto okathi yaattharunwe aya, Muluku khaapwetenxe. Masi Yona khaasiveliwe ni yoothanla ele ya Muluku. Nto Yona ‘ahiximwa’ okhala wira muhupi awe woophukela khiwiiraneyale. Yehova aahimpixerya murima Yona ni aahimukhaliherya olokiherya muupuwelo awe. (Yona 3:10–4:11) Muhoolo mwaya aahiiwexexa etthu Yehova aamwiixuttinhe awe nave Yona tolempe yowiiraneya awe mmureerelo ahu. (aRom. 15:4) Enamuna Yehova onaathokorerya awe atthu awe ennooniherya wira onniwoonela othunku. Tthiri Owo onnisuwela mixankiho sinimphwanya khula mmosa a hiyo. Nave onnisuwela muupuwelo ahu itthu ninwerya ahu ni nihinwerya ahu. Owo “khanihiya wira mwehereriwe ovikana ikuru sanyu”. (1 aKor. 10:13) Tthiri moolumo awo toomaaliha! w19.03 16 itti. 6-7

Saabadu, 4 a Julyo

Khivo etthu epattuxiwe envitheya vamaithoni va Muluku: vamaithoni vawe itthu sothene ti sowoneya. Owo t’unrowa onikoha mwaha wa miteko sahu.​—aHéb. 4:13.

Nlamulo na Moise makhulupale yahaana waaphukela mwa xariya atthu a Yehova. Awo yaahivahiwa muritti ohiya paahi ophuka myaha saavarihana ni okokhorela masi-tho yahaana ophuka myaha saavarihana ni ohiiwanana ni ikrime. Nrowe niwehe matakiheryo anittharelana. Vaavo mwIsarayeli aamwiiva awe mutthu owo khiiviwa moowaakuveya. Axitokweene epooma eyo yaahaana otokosa saana mwaha owo wira asuwele akhala wira mutthu owo aahaana wiiviwa aahiiso nnaari. (Otum. 19:2-7, 11-13) Makhulupale awo yaahikhalana muritti woophuka myaha sa khula nihiku. Ohela muhina onyakulihana mwaha wa mireerelo aahiiso myaha sa vatthokoni. (Okhum. 21:35; Otum. 22:13-19) Vaavo makhulupale yaakhala aya a xariya ni aIsarayeli yiiwelela aya Nlamulo atthu otheene yaanittottela mureerelo nave nloko nne naaninvuwiha Yehova. (Onam. 20:7, 8; Yes. 48:17, 18) Yehova onnivaha efaita myaha sotheene sa okumi wa khula nihiku. Owo oniphavela wira naathokoreryeke atthu akina moophenta ni mwa xariya. Onnoona itthu ninlavula ahu ni nimpaka ahu hata niri ene mekhihu. w19.02 23 itti. 16-18

Ettiminku, 5 a Julyo

Owo òhasuliwa, khuvilela ni wiyeviha: khatthukunle eyano awe.​—Yes. 53:7.

Vaavo ninnyoonyiheya ahu vannivila okhala oowiiyeviha. Itthu seiye khalai sahaaninyoonyiha pooti opacerya oninyoonyiha. Okathi owo hiyo pooti olavula itthu soohiloka aahiiso moohireerela. Akhala wira munooxanka nyuwo pooti othokorerya ntakiheryo na Yesu. Myeeri sookiserya aari awe valaponi Yesu aahixanka vanceene. Owo aanisuwela wira aamuhaaxiwa vanceene ni aarowa wiiviwa vamwirini va nihaaxeryo. (Yoh. 3:14, 15; aGal. 3:13) Myeeri vakhaani ohinatthi wiiviwa Yesu aahihimya wira khaareere oxanka. (Luka 12:50) Nave ahalaka mahiku vakhaani wira iiviwe Yesu ahimmye so: “Murim’aka wokìna”. Nivekelo aapanke awe ninnooniherya wira Yesu toowiiyeviha ni onnimwiiwelela Muluku. (Yoh. 12:27, 28) Vaavo okathi waaphiyale aya moolipa murima Yesu aahiivahererya mmatatani mwa awanani a Muluku yaawo yaamukhomenle mwa enamuna yoowereya ni yoowooniha othunku. Nnaamwi aaxankale ni oona owereya vanceene moowiiyeviha Yesu aanipaka yootthuna ya Yehova. Ninnoona wira Yesu oovaha ntakiheryo nooloka na mutthu oomaala ni oowiiyeviha okathi wooxankiha!​—Yes. 53:10. w19.02 11 itti. 14-15

Segunda-feira, 6 a Julyo

Nùpuxeryaneke mukina ni mukhw’awe, wira nakuviheryaneke ophenta n’uvara miteko sorera.​—aHéb. 10:24.

Wira nihicompeleke mithukumano nihaana olipa murima okathi ninkumana ahu mixankiho. Anna ni arokora anceene annirowela mithukumano hata ariipiwe ene murima okhulumuwa aahiiso awereyasiwaka. Moolipa murima anna akina annirowela mithukumano nnaamwi alupatthiwaka ni amusi aahiiso ni makhulupale a guvernu. Nkahaya muupuwele moota ntakiheryo nahu nooloka nnaakhaliherya aya anna ni arokora atthukweliwe mwaha wa waamini waya. (aHéb. 13:3) Nto vaavo aniiwa aya wira ninnivikaniha omurumeela Yehova hata nikhalanaka mixankiho awo annilipiha waamini waya olipa murima ni ovikaniha ororomeleya. Okathi Paulo atthukweliwe awe mukhatteya oRoma, owo aahihakalala nuumala wiiwa wira annawe yaanimurumeela Muluku moororomeleya. (aFil. 1:3-5, 12-14) Moohipisa nuumala okumihiwa mukhatteya Paulo aahilepa epaphelo ya aHeeberi. Epaphelo eyo Paulo aahaatumererya maKristau oororomeleya wira ahicompeleke mithukumano.​—aHéb. 10: 25. w19.01 28 etti. 9

Namanli, 7 a Julyo

Elapo yothene enniweriwa ni mutakhali.​—1 Yoh. 5:19.

Satana oniphavela wira nikhale ntoko yena, nihiiwelelaka malamulo a Yehova. Mwa ntakiheryo ninkhala olumwenku atthu anceene ahononiwe aya ni Satana. (1 aKor. 15:33) Nave Satana onneererya ohonona murima ahu oniirihaka ororomela osuwela wa apinaatamu ohiya ororomela osuwela wa Yehova. (aKol. 2:8) Olelo-va Satana oomwara-mwarya muupuwelo woowi ophavela muhakhu ohaana okhala nipuro noopacerya mookumini mwahu. Atthu arina muupuwelo owo pooti othaaciri aahiiso nnaari. Masi pooti waakhumelela etthu yoohiloka. Moota xeeni? Mwaha woowi awo anniimananiha okhala athaaciri hata arowaka opweteiwa okumi aya waataana ni emusi aya aahiiso waataana waya ni Muluku wira aphwanye ele aniphavela aya. (1 Tim. 6:10) Ninnimuxukhurela Tiithi ihu a wiirimu yoowo onnikhaliherya okhalana moonelo wooloka voohimya sa mihakhu.​—Mus. 7:12; Luka 12:15. w19.01 15 etti. 6; 17 etti. 9

Namararu, 8 a Julyo

Varera siso, murumeyi òrumeya ni òroromeleya. Nyuwo muroromeleiye n’itthu sikhani, kinowinnyeryani itthu sinjene. Murwé, mutteliweke murima vamosá ni pwiy’anyu!​—Math. 25:21.

Hata Yesu ohinatthi orwa valaponi ovaha ntakiheryo, arumeyi a Yehova yaanisuwela otthuneya waya waalipiha akina. Nkahaya mmuupuwele Ezekiya! Okathi Asiria yaaphavela aya waatuphela atthu a oYerusalemu, Ezekiya aahaathukumanya ahooleli a anakhotto ni atthu akina wira aalipihe. Nto awo “yahilipihiwa ni molumo Èzekiya”. (2 Wah. 32:6-8) Nave Yobi onniniixuttiha etthu voohimya sa waalipiha akina. Nnaamwi Yobi aatthuneya olipihiwa, owo aahiwiixuttiha atthu akina moota woomulipiha mutthu. Yobi aahaaleela alopwana yaarwiiye omulipiha wira aari yena aaphavela waalipiha, aarowa olavulaka moolumo oolipiha yaarowa owiiriha okhala saana ohiya waakhulumula. (Yobi 16:1-5) Nuumala-vo, Yobi aahilipihiwa ni Elihu ni Yehova.​—Yobi 33:24, 25; 36:1, 11; 42:7, 10. w18.04 16 etti. 6; 17 itti. 8-9

Namaxexe, 9 a Julyo

Miyo kinnolipihani: kinnokhaliheryani.​—Yes. 41:10.

Yesaya aahihimya moota Yehova onaalipiha awe atthu awe vaavo aahimmye awe wira: “Muluku onrwa n’ikuru wira àlamule atthu n’uwerya [wa moono awe]”. (Yes. 40:10) Ikwaha sinceene Biibiliya onnirumeela nuulumo noowi “moono” ophavelaka wooniherya owerya wa Yehova. Tivonto nuulumo noowi “àlamule atthu n’uwerya wawe” ninnooniherya wira Yehova Mwene ooweryexa. Khalai Yehova aahirumeela ikuru sawe wira aakhaliherye ni owaakiherya arumeyi awe ni onnivikaniha waalipiha ni owaakiherya atthu yaale animuroromela olelo-va. (Otum. 1:30, 31; Yes. 43:10) Okathi awanani ahu annilupattha aya Yehova onnitepa omaleliha yooleiherya awe eni: “Miyo kinnolipihani”. Ilapo sikina awanani ahu anneererya onikhoottiherya olaleerya aahiiso omala-maliha mutthenkeso ahu. Hata vari siiso hiyo khanintepa oxanka mwaha wa olupatthiwa iwo. Maana Yehova oonivaha sooleiherya sinnilipiha ni onroromeliha. Yehova onihimya wira: “Iyuma sothene sipakeliwe wolupatthani khasinvara-tho muteko”.​—Yes. 54:17. w19.01 5-6 itti. 12-13

Namathanu, 10 a Julyo

Òreriwa t’ale ari amasikhini murohoni mwaya.​—Math. 5:3.

Axinama khanitthuneya okhapelela mukhalelo aya womunepani, niire so, khanitthuneya omusuwela Mpattuxa aya. Masi hiyo nihaana omusuwela. (Math. 4:4) Vaavo nninwiriyana ahu Muluku, ninnikhalana osuwela, ankhili ni ohakalala. Yehova oonivaha Biibiliya ni onnimurumeela “murumeyi òroromelaya ni ànkhili”, yoowo onnivaha iliivuru sinnikhaliherya olipiha waamini wahu. (Math. 24:45) Iliivuru iyo yoolya yomunepani, maana sinnikhaliherya waamini wahu ni olipiha waataana wahu ni Yehova. Tthiri nookhalana yoolya yinceene yomunepani! (Yes. 65:13, 14) Yoolya yomunepani enimoovahani ankhili, eyo piiyo, wuupuwela oratteene weiwo onrowa wookhapelelani mwa inamuna soovirikana. (Mir. 2:10-14) Mwa ntakiheryo, ankhili animookhaliheryani osuwela itthu sowoothiwa, ntoko yowoothiwa yoowi khokhanle Mpattuxa aahiiso wira musurukhu ni itthu sa werutthuni sinimoophwanyihani ohakalala. Nave, ankhili animookhaliheryani osyaka soophavela ni soolema soohasula. Tivonto, mwiimananiheke wira mukhalane ankhili ni wuupuwela oratteene. w18.12 16-17 itti. 6-7

Saabadu, 11 a Julyo

Iyakha s’atthu aka sinrowa olikanaka n’iyakha sa miri.​—Yes. 65:22.

Miri sikina sinnikhala iyaakha ikonto sinceene. Nto wira mutthu okhale iyaakha ntoko iyo, ohaana okhalana okumi wooloka. Akhala wira yaarowa okhalaka ni murettele ni opuro wooloka ntoko Yesaya aahimmye awe vahinatthi, eyo yaarowa okhala yooreera, niire so, eparayiisu! Tthiri eprofesia ela enimwiiraneya! Nkahaya muupuwele sooleiherya seiyo sinooniherya wira muhoolo enookhala eparayiisu. Elapo yotheene anoosareya atthu areelihiwe ni Muluku. Khuuvo mutthu onrowa woovaka otupheliwa ni inama soowali aahiiso atthu ootakhala. Ale ahinoona, ahiniiwa ni oorakala anrowa ovonihiwa. Atthu anrowa otekaka ipa saya ni olya soolya soosiva anrowa aya olimaka. Awo anrowa okhalaka iyaakha sinceene ovikana iyaakha sa miri. Tthiri Biibiliya onnooniherya wira enookhala eparayiisu muhoolo. Masi atthu akina ninlavulana ahu pooti ohimyaka wira iprofesia iyo khasintaphulela wira enookhala eparayiisu valaponi. Mathowa xeeni aniwiirihani olipelela eparayiisu valaponi? Yesu, mulopwana muulupalexa aatonko okhala, oonivaha mathowa ooloka.​—Luka 23:43. w18.12 6 itti. 13-15

Ettiminku, 12 a Julyo

Murukunuxe mukhalelo anyu, mùlule osuwela wanyu.​—aRom. 12:2.

Muupuwelo ahu pooti oturukeya. Nto eyo enimwiiraneya mwaha wa itthu nnuupuwela ahu. Tivonto, akhala wira nookhalana muupuwelo wa Yehova, nnimooniherya wira moonelo awe tori wooloka okathi wotheene. Nto ninrowa ophavelaka woona itthu ntoko Yehova onoona awe. Wira nuupuweleke ntoko Yehova onuupuwela awe, nihaana osyaka otthara “mwettelo w’atthu a vathí”. Eyo enooniherya wira nihaana osyaka oweha, osoma ni owiriyana itthu sotheene sihinivarihana ni muupuwelo wa Yehova. Wira niiwexexe otthuneya waya opaka eyo, nrowe niwehe ntakiheryo na yoolya. Mutthu oniphavela okhalana ekumi yooloka, ohaana olya soolya sooloka. Nto wiimananiha wawe khonrowa okhalana efaita, akhala wira onimoolya soolya soohiloka. Moolikanasa, wiimananiha wahu okhalana muupuwelo wa Yehova khonrowa okhalana efaita, akhala wira ninneemererya weettihiwa ni muupuwelo wa olumwenku. w18.11 24-25 itti. 14-15

Segunda-feira, 13 a Julyo

Mukhale òlikanene! Mwitthukele muyununi n’ikhulula [esintu], eri ekekhai.​—aÉf. 6:14.

Mulakele ovarihela muteko ekeekhai khula nihiku. Biibiliya onnilikanyiha ekeekhai ni esintu ya nakhotto. Okathi aalempwa awe Biibiliya, esintu ya nakhotto yaanimukhaliherya okhottoni vakhala wira yaanilipiha soowara sawe. Akhala wira esintu eyo khiyaalipiha, khiyaarowa omukhaliherya. Moota xeeni ekeekhai ennaakiherya aya ntoko esintu? Akhala wira nnoovikaniha weettela ekeekhai, ekeekhai eyo enoonikhaliherya ohuupuwela itthu soohiloka ni opaka soothanla sooloka. Vaavo ninkhalana ahu muxankiho muulupale aahiiso nneehereriwa ahu opaka etthu yoohiloka, ekeekhai enoonikhaliherya opaka itthu sooloka. Ntoko siisaale nakhotto ahaarowa awe okhottoni ohiwanre esintu, nihikhala-khale nihiyaka ekeekhai. Nto nihaana ovarihela muteko ekeekhai okumi ahu wotheene. w18.11 13-14 etti. 15

Namanli, 14 a Julyo

Othume, mene [masi] ohitumihe ekhaikhai.​—Mir. 23:23,Biblya Exirima.

Nihaana wiimananiha wira niixutte ekeekhai ya mBiibiliyani. Nto eyo enivekela oleva itthu sikina. Nuumala othuma “ekekhai”, eyo piiyo, wiixutta ekeekhai, nihaana ovaha ephoole wira nihikhala-khale nitumihaka, niire so, ohiya. Hata etthu eyo eri ene ya mahala, khentaphulela wira munoophwanya muhipanke etthu. Nuulumo na eHeeberi nri Miruku 23:23, nitaphuleliwe ni aBiibiliya akina noowi othuma, pooti-tho otaphulela “ophwanya”. Moolumo ala, antaphulela wira mutthu ohaana wiimananiha aahiiso oleva etthu, wira ophwanye ele onoona awe okhala yootthuneya. Wira niiwexexe moota woothuma ekeekhai, nrowe nuupuwele ela: Nkahaya muupuwele wira omerkaatu enikaiwa enika. Niireke enika eyo enimoorwa mekhaya-ru vate vahu? Nnaari. Maana nihaana orowa omerkaatu wira navahiwe enika eyo. Tivonto, nnaamwi enika ele evahiwaka mahala, hiyo nihaana wiimananiha wira nrowele. Vamosaru, hata nihilivaka etthu wira niixutte ekeekhai, nihaana wiimananiha ni oleva itthu sikina. w18.11 4 itti. 4-5

Namararu, 15 a Julyo

Owitho wawe wanatutha ntoko nsuwa, ikuwo sawe sahittela, sinàrya.​—Math. 17:2.

Yesu aahimukuxa Pedru Yakobo ni Yohani arowasa mwaako woorakama. Ari ene opuro ole awo yaahoonihiwa etthu yootikiniha. Wanipacerya owiitho ni ikuwo sa Yesu saanaarya vanceene. Moottharelana yaahaaweha atthu anli yaawo yaakhala ntoko Moise ni Eliya. Atthu awo yaahipacerya olavula voohimya sa okhwa ni ohihimuxiwa wa Yesu. (Luka 9:29-32) Moottharelana yaahikhuneeliwa ni neeku noowaarya. Nuumala-vo yaahiiwa nsu na Muluku! Yowoonihiwa ele yaanooniherya ovuwa ni owerya wa Yesu ntoko Mwene a Omwene wa Muluku. Tthiri eyo yaahimulipiha Kristu wira ovilele mixankiho saarowa omukhumelela ntoko ohasuliwa ni wiiviwa. Ohiya-vo yowoonihiwa ele yaahilipiha waamini wa awiixutti. Nave yaahaakhaliherya ovilela mixankiho saarowa waakhumelela ni muteko yaarowa aya ovaraka muhoolo. Mwa iyaakha 30 muhoolo mwaya murummwa Pedru aahihimya wira aanuupuwela vanceene yowoonihiwa ele.​—2 Ped. 1:16-18. w19.03 10 itti. 7-8

Namaxexe, 16 a Julyo

Hiyo ninnivahererya mwa sothene ntoko anamuteko a Muluku, . . . mwa masu a ekeekhayi.​—2 aKor. 6:4, 7, Waataana wa Naanaano.

Enamuna xeeni emosa maKristau eekeekhai avirikanne aya ni atthu a etiini yoowootha? Okhala wira hiyo ‘ninlavula ekekhai’. (Zak. 8:16, 17) Hiyo ninnaaleela ekeekhai anamurwa, ale anivarana ahu muteko, apatthani ahu ni ale nnaaphenta ahu. Nto mwiimananiheke wira muhikhalane mirima miili. Amiravo akina, anniimananiha okhalana mweettelo wooloka ari ene ni anamuyari aya aahiiso anna a mmulokoni, masi okathi anaarumeela aya redes sociais wala anikhala aya ni atthu ahinimurumeela Yehova anikhalana mweettelo mukina. Awo annaawoka anamuyari aya, anna, arokora ni Yehova. (Esal. 26:4, 5) Yehova onnisuwela vaavo nimpaka ahu itthu oninyokha awe. (Mar. 7:6) Ti vooloka opaka ele Biibiliya onihimya awe wira: “Muhakhalelé nrima alipa-òttheka: mwattittimihe Apwiya mahiku othene”.​—Mir. 23:17. w18.10 6-7 itti. 14-15

Namathanu, 17 a Julyo

Muluku ophentá: ole onetta n’uphenta onkhala mwa Muluku, nave Muluku onkhala mwa yowo.​—1 Yoh. 4:16.

Olumwenku wotheene, atthu a Yehova aniirela mpantta emusi emosa. Awo anna ni arokora aniphentana mukina ni mukhwaawe. (1 Yoh. 4: 21) Ikwaha sikina, anniimananiha waakhaliherya annaya, masi ikwaha sinceene annooniherya ophenta awiirelaka itthu saamukhaani. Mwa ntakiheryo, annilavula itthu soolipiha aahiiso oreerelana murima. Nto vaavo nnaathokorerya ahu atthu, nimmutakiha Tiithi ihu a wiirimu. (aÉf. 5:1) Yesu aanimutakiha Tiithi awe moomalela. Maana okathi wotheene aanaareerela murima atthu. Owo aahimmye so: “Nyuwo othene mukhulumunwe, mulemeliwene muritti mulupale, mukirwele miyo: komumuliheni”. (Math. 11:28, 29) Vaavo nimmutakiha ahu Yesu ‘nakhapelelaka alipa-òthoiwa’, ninnihakalala ni omusiveliha Yehova. (Esal. 41:2) Nto nihaana wooniherya ophenta wahu naathokoreryaka atthu a vatthokoni vahu, anna ni arokora ni ale nnaalaleerya ahu. w18.09 27-28 itti. 1-2

Saabadu, 18 a Julyo

Ninvara vamosá . . . [ni] Muluku.​—1 aKor. 3:9.

Nave nnoowerya ovara vamosa ni Yehova, naakhaliheryaka anna aphwanyiwe ehasara. Mwa ntakiheryo, hiyo pooti okhaliherya nivahaka musurukhu ahu. (Yoh. 13:34, 35; Mit. 11:27-30) Enamuna ekina nikhanle ahu ookhaliherya ti orattela ni olokiherya itthu sihononeyale nuuvira ehasara. Gabriela, murokora a oPolônia yoowo empa awe yaamonre mwaha wa osarya maasi, aahihakalala waaweha anna a muloko wowaattamela arwaaka omukhaliherya. Okathi onuupuwela awe yowiiraneya ele, owo onihimya wira khonixanka mwaha wa mireerelo sawe sihononeyale, masi oniweha itthu ophwannye awe, oriki: “Ehasara ela, yookiiriha woona wira eparakha yuulupale wiirela mpantta muloko wa eKristau, ni ti etthu enihakalaliha vanceene”. Atthu anceene akhaliheriwe nuuvira ehasara arina moonelo mmosa-ru. Nave, ale anivara vamosa ni Yehova yaakhaliheryaka anna awo annihakalala vanceene.​—Mit. 20:35; 2 aKor. 9:6, 7. w18.08 25 etti. 12

Ettiminku, 19 a Julyo

[Mukhapelele] mukhalelo wa mmurimani mwanyu.​—Mir. 4:23.

Naaphavelaka okhapelela saana murima ahu nihaana oweha itthu sikhanle oohonona ni opaka khula etthu wira niikhapelele. Nuulumo noowi mukhapelele ninnuupuxerya muteko wa mulipa-oolipelela. Mahiku a Mwene Salomoni mulipa-oolipelela eemela vasulu va makokoro a epooma wira yaarwaaka awanani aaleeleke atthu ari muhina mwa epooma. Eyo enninikhaliherya osuwela etthu nikhanle ahu oopaka wira Satana ohihonone muupuwelo ahu. Khalai alipa-oolipelela yaavara vamosa ni alipa-oohula mikhora. (2 Sam. 18:24-26) Otheene aya yaanikhaliherya okhapelela epooma ni asuwelexaka akhala wira mikhora saahiwaliwa saana hata awanani aya ari ene vakhiviru. (Neh. 7:1-3) Yowuupuxerya ya murima ahu yiixuttihiwe ni Biibiliya eri ntoko mulipa-oolipelela ahu ni enninleela akhala wira Satana onneererya ohonona murima ahu niire so vaavo oneererya awe opahula muupuwelo ahu moonelo ahu etthu enniiriha opaka etthu eyo aahiiso soophavela sahu. Nto vaavo yowuupuxerya ya murima ahu ennileela aya etthu nihaana owala mikhora sahu sa mmuupuweloni wira niikhapelele. w19.01 17 itti. 10-11

Segunda-feira, 20 a Julyo

Ehinatthi othanliwa, epajeryeke owehiwa murim’aya.​—1 Tim. 3:10.

Axitokweene ahaaphukeleke amiravo attharaka muupuwelo aya aahiiso soolema sa muttetthe aya, masi ahaana otthara Nuulumo na Muluku. (2 Tim. 3:16, 17) Akhala wira axitokweene khanitthara malamulo a Biibiliya voohimya sa waathanla arummwa oorumeela aahiiso axitokweene, animwaavololiha anna awo aniphwanela othanliwa. Elapo emosa, murummwa oorumeela aanivara miteko sinceene, nto axitokweene yaaneemererya wira ookhalana mikhalelo sinivekeliwa mBiibiliyani wira okhale mutokweene. Masi axitokweene akina oowuuluvala yaahimya wira khaaphwanela okhala mutokweene mwaha woowi aahitepa okhala mmiravo. Mooriipiha murima, munna ole khaathanliwe mwaha wookhala mmiravo. Nave, moonelo owo ohuulaana ilapo sinceene. Ti vootthuneya ororomela miruku sa Biibiliya, ohiya moonelo ahu aahiiso soolema sa mapuro awo. Niira siiso, ninrowa omwiiwelela Yesu ni khaninrowa waaphukela atthu nittharaka itthu sinooneya paahi.​—Yoh. 7:24. w18.08 14 itti. 16-17

Namanli, 21 a Julyo

Onakhula ahinatthi wiwa, muloló: onimùliwa muru vamaithoni v’atthu othene.​—Mir. 18:13.

Ti vootakhala oroiha e-mail aahiiso mensaxe naakhenle ahu nihinatthi otokosa. Ilapo sikina, muteko ahu onnikhoottihiwa. Awanani ihu a ilapo iyo, pooti ohimya itthu sowoothiwa wira anivarihe aahiiso wira nihoveryaneke. Nkahaya muupuwele ele yaakhumelenle mapuro anivariwa muteko mookhanyereriwa União Soviética. Egrupu ya mapoliisia yaasuweliwe okhala KGB, yaahuulaanyiha muhupi wowoothiwa woowi anna akina yaarina miritti yaahaavariha atthu a Yehova. Mooriipiha murima, anna anceene yaahikupali itthu iye sowoothiwa khuhiya mutthenkeso wa Yehova. Muhoolo mwaya, anamunceene a yaawo yaahitthikela mmutthenkesoni mwa Yehova, masi akina nnaari. Awo yaahihiya itthu iyo sowoothiwa sihononaka waamini waya. (1 Tim. 1:19) Ninrowa osyaka sai maxakha awo? Nisyakaka omwara-mwarya soohimmwa nihinsuwela ahu saana. Nave muhikupaliki khula etthu muniiwa anyu. Masi, mpaceryeke osuwela itthu sotheene sa mwaha owo. w18.08 5-6 etti. 8

Namararu, 22 a Julyo

Kinohimeryani ekhweli wira: olelo vava munokhala ni miyo [mParayiisu].​—Luka 23:43.

Idukumento soopacerya sa eGriki, ikwaha sikina khiyaarumeeliwa vanceene aponto. Nto pooti wira ninniikoha so: Niireke Yesu aahimmye wira “Kinooleelani wira, olelo munrowa okhala ni miyo mParayiisu”? Aahiiso aahimmye wira: “Kinooleelani olelo, wira munrowa okhala ni miyo mParayiisu”? Muupuweleke wira Yesu aahilavula ni atthareli awe voohimya sa okhwa wawe, oriki: “Mwana a mutthu onokhala muhina mw’etthaya mahiku mararu n’ohiyu miraru”. (Math. 12:40; 16:21; 17:22, 23; Mar. 10:34; Mit. 10:39, 40) Tivonto, Yesu ni nakrime ole khiyaaronwe mParayiisu nihiku nenne. Biibiliya onihimya wira Yesu aari “Mmahiye” mahiku ale mararu, mpakha nihiku Muluku aamuhihimunxe awe. (Mit. 2:31, 32) Vaavo Yesu aamulenle awe nakrime ole voohimya sa eParayiisu, Yesu khaahimya eparayiisu ya wiirimu. Ninsuwela sai? Nthowa nimosa, okhala wira nakrime ole khaasuwela wira Yesu aahipaka nivarihano ni arummwa awe oororomeleya, yaawo anrowa olamulelaka ni Yesu wiirimu. (Luka 22:29) Nave-tho, nakrime ole khaabatiziwe. (Yoh. 3:3-6, 12) Tivonto, vaavo Yesu aamuleihenrye awe nakrime ole, owo aalavula sa eparayiisu valaponi yeeyo yaarowa okhala muhoolo mwaya. w18.12 6-8 itti. 17-18, 20-21

Namaxexe, 23 a Julyo

Munipakele amuluku wira eniholeke: Moise ole onikumihale mulaponi mwa wEjitu, khansuwenle emukhumelenle.​—Okhum. 32:1.

AIsarayeli yaahipacerya omukokhorela mwaanyompe a eweero! Hata yahiiwelenle malamulo a Yehova, awo yaaniiwoka yuupuwelaka wira yaari mpantta wa Yehova. Aroni aahiitthana okhala “nirá no watthapela Apwiya!”, okokhoreliwa wa mwaanyompe ole. Exeeni Yehova aapanke awe? Yehova aahimuleela Moise wira atthu ale “àhononeya murima” ni aahiya otthara ephiro “yalakihenryaka“. Vano Yehova aahinanariwa vanceene onuupuwela opwetexa nloko notheene. (Okhum. 32:5-10) Masi Yehova khaapwetenxe nloko nle. (Okhum. 32:14) Nnaamwi Aroni ampanke mwaanyompe ole a eweero, owo aahittharuwa vamosa ni aLevi akina yaawo yaathanlale okhala mpantta wa Yehova. Tthiri awo yaahipaka yoothanla yooloka, maana nuuvira okathi nihiku nenne, ikonto sinceene sa atthu yaamukokhorenle mwaanyompe, yaahiiviwa. Masi ale yaari mpantta wa Yehova, yaahoopowa ntoko Muluku aaleihenrye awe.​—Okhum. 32:26-29. w18.07 18-19 itti. 13-16

Namathanu, 24 a Julyo

Mwipasope n’awixuttihi a ikano. Awo wasivela . . . ukhomasiwa mmuthukumanoni. Anniphavela okilathi . . . mapuro òsuwanyeya, mumpakiwa nìra.​—Luka 20:46.

Enamuna xeeni yoolokexa ya osuweliwa? Khahiyo osuweliwa anamunceene aniphavela aya arumeelaka osoma wuniversidade, anakoso aalupale ni matthekulelo a olumwenku ola. Murummwa Paulo aahitthokiherya enamuna yoolokexa ya osuweliwa, oriki: “Nto vano, vamusuwenlyanyu Muluku walá kìreke so: vano Muluku vosuwenlyaweni munwerya sai ohokolowela wettela ikano iye sihinwerya wopola, sihintekeliwa etthu? Mumphavelela-ni wikhaliha-tho ipottha?” (aGal. 4:9) Tthiri, eparakha yuulupale ‘osuweliwa ni Muluku’ Mukhulupale a olumwenku wotheene! Yehova tonipattunxe, tivonto Owo oonisuwela, onniniphenta ni oniphavela wira nikhale apatthani awe.​—Mus. 12:13, 14. w18.07 4 itti. 3-4

Saabadu, 25 a Julyo

Kinnitthokelela molumo anyu.​—Esal. 119:99.

Naaphavelaka okhaliheriwa ni malamulo a Muluku, nihaana wiixutta ophenta ni ottittimiha malamulo awo. Biibiliya onihimya so: “Munyokheke sotakhala, mphenteke orera murima”. (Am. 5:15) Ninrowa opaka sai eyo? Nihaana wiixutta woona itthu ntoko Yehova onoona awe. Nkahaya muupuwele ela: Vaakhanle wira khamumphwanya ikhove, nto totoro oovahani malakiheryo ala: olya yoolya eniphwanyiha ekumi, wiina nikuruta ni opaka marukunuxo makina mweekumini mwanyu. Nuumala otthara malakiheryo awo, ekumi anyu enakhala saana! Mwaarowa woonela sai malakiheryo a totoro ole? Moolikanasa, Mpattuxa ahu oonivaha malamulo annikhaliherya osyaka etampi wira nikhalaneke ekumi yooloka. Mwa ntakiheryo, Biibiliya onniniixuttiha wira nihootheke, owoka, wiiya, oraruwa, owali aahiiso opaka itthu sa onammunepani. (Mir. 6:16-19; Wis. 21:8) Vaavo nimphwanya ahu mireerelo mwaha womwiiwelela Yehova, omphenta wahu ni malamulo awe onninnuwa. w18.06 16 itti. 5-6

Ettiminku, 26 a Julyo

Nyuwo mwá mwené àYuda?​—Yoh. 18:33.

Woonasa wene, Pilato aanoova wira Yesu anwiiriha atthu waamwareela aRoma. Masi Yesu aahimwaakhula iiraka: “Omwene aka khuhiyó wa vathí-va”. (Yoh. 18:36) Yesu aahikhootta okhaliherya myaha sa epoliitika, maana Omwene awe waarowa okhala wiirimu. Yesu aahimmye wira muteko awe valaponi waari ovaha ‘onamona wèkekhai’. (Yoh. 18:37) Yesu aanisuwela muteko awe. Nto akhala wira ninnisuwela muteko ahu, nnoosyaka okhaliherya ipartido hata vamurimani vahu. Ikwaha sikina eyo khenikhweya. Mutokweene a esirkwiitu ohimmye wira atthu a muttetthe awe yaanitepa wiitthuna. Awo yaaniixinnuwiha mwaha wa nloko naya, ni yaakupali wira makhalelo aya yaamuloka akhala wira yaalamuleliwa ni mutthu a elapo aya. Owo onihimya so: “Ti voohakalaliha woona wira anna yaahivikaniha okhala oowiiraana alaleyaka ihapari sooreera sa Omwene. Awo annisuwela wira Muluku paahi tonrowa ophuka ohixariya ni mixankiho sikina sinaaphwanya”. w18.06 5-6 itti. 6-7

Segunda-feira, 27 a Julyo

Mmukhotteke Satana: Satan’owo onimotthyawani.​—Yak. 4:7.

Iliivuru tthaaru paahi sa Soolempwa sa eHeeberi sinromola nsina na Satana, 1 Wahala, Yobi ni Zakariya. Xeeni nwanani ola ohalaka olavuliwa ikwaha vakhaani paahi ohinatthi orwa Mesiya? Soolempwa sa eHeeberi, Yehova khohimmye itthu sinceene voohimya sa Satana ni miteko sawe. Tivonto, yoolakela ya Soolempwa sa eHeeberi yaari waakhaliherya atthu omusuwela ni omutthara Mesiya. (Luka 24:44; aGal. 3:24) Nuumala Mesiya orwa, Yehova aahimurumeela Mesiya ni awiixutti awe wira anisuwelihe miteko sa Satana ni malaikha animutthara. Eyo etthu yookhalela, maana Yehova onrowa omurumeela Yesu ni maKristau oowoottihiwa, wira ampwetexe Satana ni malaikha awe. (aRom. 16:20; Wis. 17:14; 20:10) Muupuweleke wira khanintthuneya omoova Diabo, maana owerya wawe wookhalana mukano. Nto hiyo ninnikhapeleliwa ni Yehova, Yesu ni malaikha oororomeleya. Nikhaliheriwaka naawo, nnoowerya omukhootta nwanani ihu. w18.05 15-16 itti. 2-4

Namanli, 28 a Julyo

Eritta yothene eri mwa miyo, ehinìma mihokorokho, Atithi annìkittha.​—Yoh 15:2.

Hiyo nnookhala arumeyi a Yehova, paahi akhala wira ninniima mihokorokho. (Math. 13:23; 21:43) Tivonto, nlikanyiho nri Yohani 15:1-5, wiima mihokorokho khontaphulela waapaka awiixutti asya. (Math. 28:19) Maana vaakhanle wira ti siiso, Anamoona oororomeleya ahiwenrye omukhaliherya mutthu okhala mutthareli a Kristu, yaarowa olikanaka ni iritta sihiniima mihokorokho. Eyo khiyaarowa okhalela! Nthowa xeeni? Nthowa noowi hiyo khannaakhanyererya atthu wira akhale atthareli a Kristu. Okhala wira Yehova toophenta, owo khonkhala-khala onivekelaka opaka etthu ehinwerya ahu. Masi onnivekela itthu siniwerya ahu opaka. (Otum. 30:11-14) Nto, ontaphulela exeeni wiima mihokorokho? Etthu enitaphulela aya, otheene ahu ninniwerya opaka. Muteko xeeni? Ti olaleya ihapari sooreera sa Omwene wa Muluku.​—Math. 24:14. w18.05 5 itti. 8-9

Namararu, 29 a Julyo

Nyuwo, tith’inyu ti Satana: . . . uwo mulipa-òwotha ni tithi a wothá.​—Yoh. 8:44.

Olelo-va, khareere ahooleli a itiini. Awo annivahiwa maihaneliwo a nttittimiho oowi: mapastoore, mapaatiri, mapaapa, mwaaliimo aahiiso mahanifa ni maihaneliwo makina. Ntoko aFarisi, awo khaniixuttiha ekeekhai ya Nuulumo na Muluku, masi ‘annitthukela ekekhai mwa sotakhala saya’. (aRom. 1:18, 25) Nave annootha ariki: “mutthu onoopowa omosa”, apinaatamu aakhalana erooho ehinikhwa, mutthu akhwa onthatuwa etthu ekina, Muluku onniweemererya ale anrupihana alopwanaru aahiiso athiyanaru ni othelana atthu a enoka emosaru. Nave, anapoliitika annirumeela wootha wira yaahapuxe apinaatamu. Moohipisa, ahooleli a epoliitika anrowa olaleya wira “nokhalana murettele [ni ovareleleya]”, nto iwo onrowa okhala wootha wuulupale. Masi ‘onimwarwela opweteya nananoru’. Tivonto nihikhala-khale naakupaliki ahooleli awo eepoliitika, anihimya wira itthu sinooloka. Ekeekhai tiila: “Nyuwo mwaxinene mosuwela sana wira orwa w’Apwiya onolikana n’urwa wa nawiye, ohiyu”.​—1 aTes. 5:1-4. w18.10 4-5 itti. 6-8

Namaxexe, 30 a Julyo

Mwa sothene kowoniheryani wira nivaraka sisa, ti nrinahu wakhaliherya atthu òthoiwa, nùpuwelaka molumo Pwiya Yesu ohimalyawe wira: ‘Mulipa-òvaha onoreriwa [onoohakalala] onvikana mulipa-òvahiwa’.​—Mit. 20:35.

Okhala wira ninkhala okathi wooxankiha, ti vookhweya oriipiwa murima ni okhulumuwa. Tivonto, Yesu Kristu onaarumeela awe annawe oowoottihiwa ni “makhulupale” a ipwittipwitthi sikina wira yaalipiheke ni waalakiherya ale akhulumunwe mahiku ala. Masi axitokweene awo a mmulokoni khahiyo ‘anene’ waamini wahu masi awo anivara “muteko vamosá” wira nihakalaleke. Awo aniphavela wira nihakalaleke ni ovikaniha okhala oororomeleya. (Yes. 32:1, 2; 2 aKor. 1:24) Axitokweene ahaana omutakiha murummwa Paulo, yoowo okathi wotheene aamananiha waalipiha annawe. Owo aahaalepela maKristau a oTesalonika yaawo yaalupatthiwa, wira: “Miyo kihophentani vanjene, mpakha ophavela okawana ni nyuwo vohikhala ehapari yorera ya Muluku pahi, kaniphavela-tho wovahani hatá ekumi aka. Tthiri nyuwo mokisiveliha vanjene”. (1 aTes. 2:8) Axitokweene anoowerya onlipiha vanceene ni masu aya. Niireke okathi wotheene masu paahi anniphiyerya? Paulo aahaaleela axitokweene a muloko a wEefeso masu a yoolepa ya olelo. w18.04 22-23 itti. 6-8

Namathanu, 31 a Julyo

Apwiy’awo ti eroho [munepa]: Vavo vankhalaya eroho [munepa wa Yehova], vavo-tho onniphwanyaneya otaphuwa.​—2 aKor. 3:17.

Masi wira nikhalane otaphuwa iwo, nihaana otthikela wa Yehova. Eyo enitaphulela wira nihaana okhalana wataana wooloka ni yena. (2 aKor. 3:16) Okathi aIsarayeli yaari aya mothakoni, yaaweha itthu mmoonelo wa opinaatamu ohiya mmoonelo wa Yehova. Nto eyo yaahiwiiriha wuumiha murima ni muupuwelo aya. Awo yaaphavela orumeela otaphuwa yaarina aya wira apakeke itthu yaaphavela aya. (aHéb. 3:8-10) Otaphuwa onikumiheriwa ni munepa wa Yehova onnivikana otaphuwa wa okhala epottha. Maana munepa owo onniphwanyiha otaphuwa wuulupale apinaatamu ahinwerya aya, eyo piiyo, onnintaphula okhala epottha ya etampi ni okhwa. Nave onnintaphula okhala epottha ya etiini yoowootha ni soolema saya. (aRom. 6:23; 8: 2) Tthiri iwo otaphuwa wuulupale! Hata atthu yaale atthukweliwe mukhatteya pooti ophwanya otaphuwa iwo.​—Maph. 39:20-23. w18.04 10 itti. 3-5