Agosto

Vaavo nihincompela ahu mithukumano, ninnuupuxeriwa ele Yehova ni Yesu apanke aya mmureerelo ahu. Nto mwaha wooxukhurela iwo ninniimananiha omutakiha Yesu khula nihiku. (2 aKor. 5:14, 15) Nave murima ahu onniniiriha onvuwiha Yehova mwaha woonivaha yowoopola. Enamuna emosa nninvuwiha ahu Yehova ori okomentari okathi wa mithukumano. Nnimooniherya omphenta wahu vanceene Yehova ni Mwanawe nlevaka itthu saanisivela wira naahakalalihe. Ikwaha sinceene ninnipaka eyo nrowelaka mithukumano. Miloko sinceene sinnikhalana muthukumano mmosa wanikisa wa nihiku na muteko okathi yoowo atthu anceene anikhulumuwa aya. Nave mithukumano sikina sinkhala wanikisa wa esumana okathi yoowo atthu anceene amphavela aya ophumurya. Niireke Yehova onnoona wiimananiha wahu orowela mithukumano hata nikhulumunwe ene? Aayo! Yehova onniweha ni onnivaha efaita wiimananiha wahu orowela mithukumano hata nikhulumuwaka maana ninnooniherya wira ninnimphenta.​—Mar. 12:41-44. w19.01 29 itti. 12-13

Yesu saahimphwanya mixankiho sikina sinaaphwanya apinaatamu. Mwa ntakiheryo vanikhala ntoko wira Yesu aahuuwale etthoko ya atthu oohaawa. Muteko aavara awe tiithi awe omphwanya iihaniwa Yosefe waahimukhaliherya Yesu woona wira ovila ovara muteko wooxankiha. (Math. 13:55; Mar. 6:3) Woonasa wene Yosefe aakhwiiye ohinatthi opacerya muteko woolaleerya wa Yesu. Nave Yesu aanisuwela owereya onimphwanya mutthu okhweliwe. Nave-tho aanisuwela oxankiha waya okhala etthoko atthu arina aya itiini soovirikana. (Yoh. 7:5) Nto mixankiho iyo ni sikina saahimukhaliherya Yesu osuwela mixankiho ni moonelo wa apinaatamu. Othokorerya wa Yesu onnooneya okathi aapaka awe miiriirya. Yesu khaapaka miiriirya mwaha wookhanyereriwa masi etthu yuulupale yaamwiiriha opaka miiriirya okhala wira ‘anamorela ikharari’ atthu ale yaahaawa. (Math. 20:29-34; Mar. 1:40-42) Tthiri Yesu aaniwoonela othunku atthu ale tivonto aakhalihenrye awe.​—Mar. 7:32-35; Luka 7:12-15. w19.03 16 itti. 10-11

Ohiyu wookiserya Yesu aari awe valaponi arummwa awe yaaheehererya omaala wawe. Nkahaya muupuwele moota Yesu aaxankale awe ohiyu ole. Niireke anvikaniha ororomeleya mpakha wiiviwa? Vaakhanle wira khaavikaninhe ororomeleya khuuvo aarowa okhalana nlipelelo na ophwanya ekumi yoohimala. (aRom. 5:18, 19) Ohiya-vo mwaha ole waahela muhina omutthu ni nsina na Tiithi awe. (Yobi 2:4) Nave vaavo aavaanela awe ni aalya awe yoolya yookiserya ni arummwa awe “wahikhumelela-tho ovanyihana yaworu t’ani a yawo òniwa okhala mulupalexa”. Etthu yootepa otthuneya okhala wira Yesu khaanyoonyiheyale. Ohiya-vo owo aahivikaniha okhala oomaala. Nave mooreerela murima Yesu aahiwooniherya moonelo yaatthuneya aya okhalana. Yesu aahaattottopela mwaha woovikaniha omukhaliherya moororomeleya. (Luka 22:24-28; Yoh. 13:1-5, 12-15) Nihaana omutakiha Yesu nivikanihaka okhala oomaala okathi ninxanka ahu aahiiso onyoonyiheya. Nihaana wuupuwela wira okathi mukina ninnaanyoonyiha atthu akina. (Mir. 12:18; Yak. 3:2, 5) Nave muhaana ottottopela itthu sooloka atthu akina anipaka aya.—aÉf. 4:29. w19.02 11-12 itti. 16-17

Nlamulo naanimukhapelela mutthu ootheriwa opaka ekrime. Owo aanikhalana ehakhi ya omusuwela mutthu omoothenrye. (Otum. 19:16-19; 25:1) Nto ohinatthi wiiviwa yaahaana okhala anamoona anli ahimyaka etthu emosa-ru. (Otum. 17:6; 19:15) Ankhi akhala wira mwIsarayeli aanipaka ekrime yooniwa ni mutthu mmosa paahi? Mutthu owo opanke ekrime eyo khaatthuneya wuupuwela wira khaarowa ohukhummwa. Maana Yehova ohoona etthu opanke awe. Yehova oovaha ntakiheryo; khiivo etthu ompaka awe enooniherya ohixariya. Yehova onnaatthuvela ale anroromeleya wa yena ni anikhaliherya okhulupale ni malamulo awe. Masi onnaahukhumu otheene ale ampuherya okhulupale aya. (2 Sam. 22:21-23; Ezek. 9:9, 10) Atthu akina annipaka itthu sootakhala yuupuwelaka wira Yehova khonrowa waahukhumu masi waphiya okathi aya owo onrowa waahukhumu wira okumiherye exariya. (Mir. 28:13) Akhala wira khanttharuwa moohipisa anrowa woona wira “etthu yowopihexa oviruweliwa ni Muluku mukumi!”​—aHéb. 10:30, 31. w19.02 23-24 itti. 20-21

Moise aamakela onwehexexa Yehova maana aaphavela ovahiwa malakiheryo. Biibiliya onihimya wira Moise “ahilipiha murim’awe, ntoko amona Muluku ohinòneya”. (aHéb. 11:24-27) Sihinatthi ovira myeeri miili, nuumala aIsarayeli okhuma wEjiitu ni ahinatthi ophiya Mwaako Sinayi, yaahikhumelela etthu emosa. Atthu ale yaahipacerya wiixinliha mwaha woohikhala maasi. Nto yaahipacerya omwaapa Moise, vano onanariwe ene, “Moise ahikhuwelela w’Apwiya, iraka: Kintthuna owìriha exeni atthu ala? Ahalanse vakhani okivonyakasa maluku, ekìve”. (Okhum. 17:4) Yehova aahinvaha Moise malakiheryo oowiiwanyeya. Nto aahimuleela Moise wira omukuxe ttootto awe wira amane mwala wa Horebi. Biibiliya onihimya so: “Moise ahira siso, makhulupale a Isarayeli emònaka”. Vano yaahikhuma maasi manceene, nto muxankiho ole waahimala.​—Okhum. 17:5, 6. w18.07 10 itti. 4-5

Nave Yehova onninlipiha orumeelaka muloko awe woophenta. Vaavo nnaaphenta ahu anna ni arokora ninnooniherya wira ninnimphenta Yehova. Nto nihaana opaka khula etthu eniwerya ahu wira naakhaliherye anna nisuwelaka wira ta faita ni Yehova onnaaphenta. (1 Yoh. 4:19-21) Murummwa Paulo aalempe so: “Mulipihaneke murima, mukhaliheryaneke ntoko sinìranyu vano”. (1 aTes. 5:11) Owo khahiyo muteko wa axitokweene paahi. Maana khula mutthu onoowerya omutakiha Yehova ni Yesu aalipihaka anna ni arokora. (aRom. 15:1, 2) Anna akina anihaawa mwaha wooriipiwa murima aahiiso oxanka, ahaana ophavela okhaliheriwa ni mameediku. (Luka 5:31) Ekeekhai wira axitokweene ni anna akina khahiyo mameediku, masi anoowerya waakhaliherya anna awo. Tthiri anna otheene a mmulokoni ahaana ‘walipiha murima ale ahilimpe, wakhaliherya ale òlosowa, wavilela atthu othene’.​—1 aTes. 5:14. w18.09 11-12 itti. 10-11

Ninnilipiha omuroromela wahu Yehova vaavo nintepa ahu omusuwela. Nto enamuna emosa nikhanle ahu oomusuwela oratteene Muluku ti omusoma Biibiliya ni wuupuwelela ele ninsoma ahu. MBiibiliyani sookhala soohimmwa sinceene sinooniherya wira Yehova aahaakhapelela atthu awe khalai. Soohimmwa iyo sinninroromeliha wira Yehova onoonikhapelela okathi wa mixankiho. Nkahaya moone moolumo ooreera Yesaya aarumenle awe wira ooniherye moota Yehova onnikhapelela awe. Owo aahimulikanyiha Yehova ni makampusi, arumeyi a Muluku ni ipwittipwitthi. Omuhimyaka Yehova Yesaya aalempe so: “Onnakuxa axinama mmatatani mwawe onnettiha vorera iye siniwamwiha axan’aya”. (Yes. 40:11) Vaavo nnoona ahu wira Yehova oonikuxa mmatatani mwawe hiyo khannoova ni ninnimaaleleya. Wira ookhaliheryeni okhala oomaaleleya hata mukumanaka mixankiho suulupale muupuweleleke moolumo a yoolepa ya olelo. Mwiira siiso animookhaliheryani ovilela mixankiho sinrowa wookhumelelani muhoolo. w19.01 7 itti. 17-18

Niireke sookhala soolukama muniphavela anyu ophwanya? Woonasa wene, moolakela omusoma Biibiliya khula nihiku aahiiso wiilokiherya wira nvaheke ikomentaario sooloka mmithukumanoni. Nave pooti wira muniphavela omurumeela saana Biibiliya mwaalaleeryaka. Munoonela sai vaavo munoona anyu wira munnirowa vahoolo aahiiso mutthu mukina onooleelaweni eyo? Woonasa wene munnihakalala vanceene, mwaha wa ele mpanke anyu! Nthowa xeeni? Mwaha woowi munnisuwela wira mumpaka ele Yehova oniphavela awe ntoko Yesu aapaka awe. (Mir. 27:11) Vaavo muniimananiha anyu omurumeela Yehova, munrowa ovaraka muteko onrowa woohakalalihani ni woophwanyihani nlipelelo nooloka. Paulo aahimmye so: “Tivó, axinn’aka amphentanaka, mukhaleke aKristu òlipa ni òhittikinyeya. Mutepeke okelela oholo mmutekoni mw’Apwiya vohihiyererya, musuwelaka wira wilipiherya wanyu khahiyó w’ethiru vamaithoni v’Apwiya”. (1 aKor. 15:58) Masi vaavo atthu akina aniimananiha aya othaaciri ni ovuwa olumwenku ola, awo khanihakalala mwekeekhai. Hata aphwanyaka ele yaaphavela aya, nlelo khaniphiyeriwa.—Luka 9:25. w18.12 18 itti. 12-13

Davidi aahimya okathi atthu otheene valaponi anrowa aya wiiwelelaka malakiheryo a xariya a Muluku. (2 Ped. 3:13) Maana, Yesaya 65:22 onihimya wira: “Iyakha s’atthu aka sinrowa olikanaka n’iyakha sa miri”. Eyo enooniherya wira atthu anrowa omurumeelaka Yehova elapo esya, anrowa okhalaka mahiku otheene. Moovarihana ni Wisupulula 21:1-4, Muluku onimwaareeliha apinaatamu, nto, mareeliho awo anihela muhina ‘ohikhala-tho okhwa’. Hata Adamu ni Eva, apweteiwale ene okhala mahiku otheene mParayiisu, elapo enookhala-tho eparayiisu. Ntoko Muluku oleihenrye awe, owo onimwaareeliha atthu otheene valaponi. Davidi, aahimmye wira atthu oomaala ni anaxariya animwaakhela elapo ni anrowa okhalaka mahiku otheene. (Esal. 37:11) Tthiri iprofesia siniphwanyaneya eliivuru ya Yesaya, sinninikhaliherya woona okathi ninrowa ahu okhalana okumi wooloka mparayiisu. (Yes. 11:6-9; 35:5-10; 65:21-23) Eyo enrowa wiiraneya silini? Enrowa wiiraneya nuumala waakhwanela ele Yesu aamuleihenrye awe nakrime ole. (Luka 23:43) Mukupaliki wira munrowa okhalaka mParayiisu. w18.12 8 itti. 22-23

Niireke nnoowerya osyaka moomalela muupuwelo wa mulaponi? Nnaari, okhala wira muupuwelo wa mulaponi ohuulaana, nto hiyo khanniwerya omaliha. (1 aKor. 5:9, 10) Okathi ninlaleerya ahu, ninniwiiwa atthu ahimyaka miyuupuwelo soohiloka aahiiso sookupali sowoothiwa. Nnaamwi nihirowaka osyaka moomalela miyuupuwelo iyo, khanintthuneya ovikaniha wuupuwelela nnakhala weemererya. Ntoko Yesu, nihaana waakuvela okhootta muupuwelo woohiloka Satana oniphavela awe wira nikhalane. Nave wira niikhapelele, nihaana osyaka okhala ni atthu antumererya muupuwelo wa olumwenku ola. Mwa ntakiheryo, nihaana waathanla mwa miruku apatthani ahu. Biibiliya onnilopola wira opatthana ni atthu ahinimukokhorela Yehova, onooniiriha wuupuwelaka ntoko anuupuwela aya. (Mir. 13:20; 1 aKor. 15:12, 32, 33) Vaavo ninkhootta ahu matthekulelo aniixuttiha othatuwa, owali, orupihana woohiloka, ninnisyaka opahula muupuwelo ahu wira ‘ohiwanane [ni] osuwela wa Muluku’.​—2 aKor. 10:5. w18.11 25 itti. 16-17

Ninrowa ovikaniha sai weettela ekeekhai? Enamuna emosa, ori omananiha owiixuttiha atthu akina ekeekhai ya mBiibiliyani. Biibiliya onlikanyihiwa ni ekatana. Ntoko siisaale esintu ya nakhotto enlipiha aya ekatana awe eri muyuununi, nave hiyo nihaana ovikaniha olipihiwa ni Nuulumo na Muluku. (aÉf. 6:17) Otheene ahu nnoowerya okhala awiixuttihi ooloka ‘anlaleya vophwanela ehapari y’ekekhai’. (2 Tim. 2:15) Vaavo ninwiixuttiha ahu atthu Biibiliya, ninnisuwela ekeekhai ni otepa ophenta. Nave ninnitepa ovikaniha weettela ekeekhai. Ekeekhai, ti yoovaha yootepa otthuneya enikhuma wa Yehova. Maana enninikhaliherya waataana ni Tiithi ihu a wiirimu. Eyo ti etthu yootepa otthuneya eniwerya ahu okhalana. Ekeekhai wira Yehova ooniixuttiha itthu sinceene, masi sookhala sikina sirina ahu osuwela! Nto onrowa ovikanihaka oniixuttiha mahiku otheene. Tivonto, nvaheke efaita ekeekhai ntoko siisaale mwaarowa anyu ovaha efaita nluku noowaaryexa. Nvikanihe othuma “ekekhai” ni muhitumihe.​—Mir. 23:23. w18.11 9 etti. 2; 13-14 itti. 15-17

Ehinatthi Epula ya Mutaaseke, muhupi Nowe aalaleerya awe atthu waahela muhina waalopola wira olumwenku ole waarowa opwetexiwa. Okhala wira Yesu aahimmye wira: “Tthirí, mahiku awo, ehalaka orupa epula ya Mutáseke, atthu yanilya, yaniwurya, yanithelana, mpakha nihiku Nowé nakenlyawe mukalawani. Awo khiyànyiherya etthu, mpakha ophiya epula ya Mutáseke, khuwivakasa atthu othene. Vanimwiraneya siso-tho okathi onrwawe Mwana a mutthu”. (Math. 24:38, 39) Nnaamwi atthu anceene yahaacalela muhupi Nowe aalaleya awe, moororomeleya owo aahilaleya muhupi woolopola Yehova anvanhe awe. Olelo-va, ninnilaleya muhupi wa Omwene wira atthu yiixutte yoolakela ya Muluku wa apinaatamu. Ntoko Yehova, hiyo nimphavela wira atthu awiriyane muhupi “wira akhaleke [akumi]”. (Ezek. 18:23) Okathi onilaleerya ahu empa ni empa ni khula opuro, ninnaalopola atthu anceene wira Omwene wa Muluku onrowa opwetexa olumwenku ola wootakhala.​—Ezek. 3:18, 19; Dan. 2:44; Wis. 14:6, 7. w18.05 11-12 itti. 8-9

Sai akhala wira elapo anyu muteko ahu wookhoottihiwa ni moovariwa ni mapoliisia munakohiwa voohimya sa anna? Niireke muhaana waaleela itthu sotheene munisuwela anyu? Nnaari! Muupuweleke ele Yesu aapanke awe okathi aakohiwa awe ni guvernatoro a oRoma. Yesu aahivarihela muteko malakiheryo a Biibiliya anihimya wira, wookhala “okathi w’omàla n’ukathi w’olavula”. Nto Yesu aaroomaala! (Mus. 3:1, 7; Math. 27:11-14) Akhala wira eyo enoowiiraneelani, muhaana waarumeela ankhili wira muhaakumiherye maxakha anna. (Mir. 10:19; 11:12) Exeeni munrowa anyu opaka mwasuwela wira mpatthani anyu muulupale aahiiso mmusi anyu oopaka etampi yuulupale? ‘Mulavule exariya’. Tivonto mookhalana muritti wowaaleela axitokweene itthu sotheene munisuwela anyu sa mwaha owo. Maana, axitokweene ahaana osuwela ekeekhai wira awerye omukhaliherya mutthu owo olokiherya wataana wawe ni Yehova.—Yak. 5:14, 15. w18.10 7-8 itti. 17-18

Ninrowa waalipiha sai atthu akina ni moophenta? Enamuna emosa waawiriyana saana. (Yak. 1:19) Ninnooniherya waaphenta anna naawiriyanaka mwa enamuna enooniherya othunku. Nto mmukoheke mwa enamuna enrowa wookhaliheryani osuwela moonelo awe. Makhalelo a owiitho wanyu anoomukhaliherya woona wira munnimuthokorerya saana. Vano okathi onilavula awe, mpixeke murima wira ohimye moonelo awe mootaphuwa. Mwanwiriyana saana, munoosuwela moonelo awe ni owo onimoororomelakani. Nave eyo enoomwiiriha woowiriyanani vaavo muniphavela anyu omukhaliherya. Tivonto, akhala wira munnaathokorerya saana, munimwaalipiha vanceene. w18.09 11 etti. 10; 12 etti. 13

Onitthuneya okathi wira mutthu owiriyane muhupi wa Omwene, omusoma Biibiliya, iliivuru sinimutthokiherya Biibiliya, osomihiwa ni Anamoona a Yehova, oreherya mithukumano ni orowa omuthukumanoni. Wira nipake itthu iyo, nihaana orumeela okathi naarowa ahu ovaraka itthu sihirina efaita yinceene. (aÉf. 5:15, 16) Wira mutthu iixutte ikeekhai soopacerya sa Biibiliya, ohaana ovira okathi mikavi? Eyo enlipa ni khula mutthu. Maana ninrowa ovikanihaka wiixutta voohimya sa miruku, iphiro ni itthu Yehova opanke awe. (aRom. 11:33) Erevista yoopacerya ya Watch Tower yaahilikanyiha ekeekhai ni “efilori yooreera” nto khuhimya wira: “Nuumala ophwanya efilori emosa, eyo piiyo, ekeekhai emosa, muhuupuweleke wira yoophiyerya. Masi muhaana ovikaniha ophavela sikina”. Hata nrowaka okhalaka mahiku otheene, ninrowa ovikanihaka wiixutta voohimya sa Yehova. Tivonto, olelo-va nihaana omananiha wiixutta itthu sinceene. w18.11 5 etti. 7

Biibiliya onihimya wira mulopwana ohaana omuthokorerya ni omukhapelela mwaarawe. (1 Ped. 3:7) Mulopwana oothokorerya onnisuwela wira hata ohilikanaka ni mwaarawe mwa inamuna sinceene, owo khahiyo ootthuneya onvikana yena. (Maph. 2:18) Nave, owo onnithokorerya moonelo wa mwaarawe ni onnimuttittimiha. Mulopwana onithokorerya moonelo wa mwaarawe, khonilavula moovekana ni athiyana akina, hata orumeelaka redes sociais aahiiso interneti. (Yobi 31:1) Nave khoniweha itthu soohiloka orumeelaka interneti. Masi onnivikaniha ororomeleya, okhala wira onnimphenta mwaarawe, Yehova, ni onninyokha itthu soohiloka.​—Esal. 19:15; 97:10. w18.09 28 itti. 3-4

Xeeni vanivila aya ovarihela muteko itthu siniixutta ahu mBiibiliyani? Nthowa nimosa, mwaha woowi, wira nipake itthu sooloka, nihaana wiiyeviha. Nave “mahiku [ala] ookiserya” vannivila wiiyeviha, okhala wira atthu anceene ‘aniiphenta mmansaya, atthu a milili, oowittottopa, atthu oowisoona, ooveeha’ ni “oohisumaaliha”. (2 Tim. 3:1-3, Waataana wa Naanaano) Okhala wira na arumeyi a Muluku, ninnisuwela wira mikhalelo iyo ti soohiloka. Masi pooti woonaka wira atthu arina mikhalelo iyo annikhumela saana ni annipuha. (Esal. 37:1; 73:3) Nave pooti wiikoha so: ‘Kiireke vannireerela ohela soophavela sa atthu akina nipuro noopacerya? Akhala wira kinimwiiyeviha, kiireke atthu anrowa okittittimihaka?’ Akhala wira ninneemererya ohapuxiwa ni olumwenku ola, nnoohonona wataana wahu ni anna, nave vanoovila atthu onisuwela wira na maKristau. Masi vaavo ninsoma ahu matakiheryo a arumeyi oowiiyeviha a Muluku ni otthara ntakiheryo naya, nnoophwanya mareeliho. w18.09 3-4 etti. 1

Waahikhala okathi Yehova aari awe mekhawe. Muhoolo mwaya, Yehova aahipattuxa malaikha wira akhaleke wiirimu ni apinaatamu wira akhaleke valaponi. Okhala wira Yehova ti Muluku oohakalala, owo onnisiveliwa ovaha itthu sooloka. (1 Tim. 1:11; Yak. 1:17) Nave, okhala wira Yehova oniphavela wira nihakalaleke, onniniixuttiha okhala atthu oovaha. (aRom. 1:20) Muluku ohaapattuxa apinaatamu ailikanyihaka mmansawe. (Maph. 1:27) Eyo enooniherya wira Yehova oonipattuxa khunivaha mikhalelo orina awe. Wira nihakalaleke ni waakhela mareeliho a Yehova, nihaana otthara ntakiheryo nawe. Nave nihaana waathokorerya saana atthu ni waavaha itthu sinaathowa. (aFil. 2:3, 4; Yak. 1:5) Nthowa xeeni? Nthowa noowi, Yehova onipattunxe ni mukhalelo woovaha. Nnaamwi nri ene atthu oohimalela, nnoowerya omutakiha Yehova nikhalaka atthu oovaha. Yehova oniphavela wira nimutakiheke ni onnihakalala vaavo ninvaha ahu.​—aÉf. 5:1. w18.08 15-16 itti. 1-2, 4

Atthareli a Yesu annooniherya wira anniwiriyana nsu nawe ohiya paahi avahaka ephoole moolumo awe masi okathi aneettela aya moolumo awe. Awo khanitepa oxanka mwaha wa “sovelaveliha s’ekumi”. (Luka 21:34) Annihela nipuro noopacerya wiiwelela malamulo a Yesu hata avirihaka mixankiho sinceene mookumini. Hata avirihaka mixankiho iyo awo annivikaniha ororomeleya wa Yehova nnaamwi ahaawaka vanceene. Enamuna ekina nnooniherya ahu omwiiwelela Yesu ori wiiwelela ni otthara malakiheryo a atthu athanliwe wira anihooleleke. (aHéb. 13:7, 17) Mahiku ala mutthenkeso wa Muluku onnipaka marukunuxo manceene ohela muhina ikaruma ni inamuna isya sa olaleerya moota woopaka mithukumano sa eriyari ya esumana enamuna yooteka olokiherya ni okhapelela Ipa sa Omwene. Tthiri ninnixukhurela malakiheryo awo oophenta ni ookhapelela a mutthenkeso wa Muluku. Nikupaliki wira Yehova onooreeliha wiimananiha wahu otthara malakiheryo otheene ninvahiwa ahu ni mutthenkeso awe olelo-va. w19.03 10-11 itti. 11-12

Ikwaha sinceene soohimmwa soohimalela sinnihapuxa vanceene. Ninniixutta etthu ni ele yaawiiranenle aIsarayeli yaakhala mpantta onikela nsuwa wa Muro Yordani, mahiku a Yoxuwa. (Yox. 22:9-34) Awo yaahileeliwa wira aIsarayeli yaakhala mpantta onikhuma nsuwa wa Yordani, yaahimpaka altari muulupale. Nnaamwi eyo yaari ekeekhai, khisaahimmwale itthu sotheene sa mwaha owo. Eyo yaahiwiiriha aIsarayeli a onikela nsuwa wuupuwela wira annaya yaahimmwareela Yehova. (Yox. 22:9-12) Masi ahinatthi orowa waatuphela, awo yaahaaruma alopwana akina wira yatokose mwaha ole. Exeeni yaaphwannye aya? Awo yaahoona wira annaya khiyampanke altari ole wira yaavaheke mukuttho amuluku eethiru. Masi yampanke wira okhale ntoko nthoonyeryo noowi yaamukokhorela Yehova paahi. Okhala wira aIsarayeli yaapacenrye osuwela ekeekhai, awo yaahihakalala maana khiyaaronwe owana ni annaya. w18.08 6 itti. 9-10

Ntoko anooniherya aya masu a Paulo, ale animukokhorela Yehova pooti opacerya ovara itthu soohiloka. Awo pooti wuupuwela wira nlelo Yehova onneemererya mweettelo aya. Ophavela paahi okhala mpatthani a Yehova aahiiso wiihimya okhala oororomeleya, khontaphulela wira onneemereriwa ni Yehova. (1 aKor. 10:1-5) Mwaha wa Moise opisa okhuruwa omwaako Sinayi, aIsarayeli yaahixanka. Akhala wira wanikisa wa olumwenku ola onnipisa orwa, hiyo-tho pooti oxanka. Waaniheryasa, hiyo pooti opacerya wuupuwelaka wira sooleiherya sa Yehova soorakamela ni khasinrowa wiiraneya. Nave eyo pooti oniiriha oluttuweliwa miteko sahu, ohiya sa Yehova. Naahivahe ephoole, nnoohiya omurumeela Yehova ni opacerya opaka itthu nahuupuwela ahu. w18.07 19-20 itti. 17-18

Nnoowerya waakhela mareeliho a Yehova, vaavo onnisuwela awe khula mmosa a hiyo. Nto nipakeke exeeni wira nikhale apatthani a Yehova? Nihaana omphenta ni wiivahererya wa yena. (1 aKor. 8:3) Nave nihaana olipiha wataana wahu ni Tiithi ihu a wiirimu. Ntoko maKristau a oGalasia, nihaana ohiya okhala ipottha sa “ikano iye sihinwerya wopola, sihintekeliwa etthu” sa olumwenku ola, ohela muhina ele enihimmwa okhala okhumela saana ni ovuwa. (aGal. 4:9) MaKristau ale a oGalasia yaanimusuwela Muluku ni owo aanaasuwela. Vano Paulo aahimmye wira anna ale ‘yahihokolowela ikano’ sihikhanle etthu. Mwa enamuna ekina Paulo aakonhe so: ‘Xeeni mumphavela anyu otthikela okhala ipottha sa itthu sa ololo sihimphwanyiha etthu?’ w18.07 4 itti. 5-6

Khanintthuneya ophwanya maxakha mwaha woohiiwelela malamulo a Muluku, niphavelaka wiixutta ele eri yooloka ni yoohiloka. Nihaana wiixutta ni soovonya sa atthu akina anilavuliwa mBiibiliyani. Malakiheryo ala anikhuma wa Muluku yoowo ori namalakiherya ootepa osuwela! Nkahaya muupuwele moota Davidi aahaawale awe mwaha woohimwiiwelela Yehova vaavo aararunwe awe ni Bathi-Xeba. (2 Sam. 12:7-14) Vaavo munisoma anyu yowiiraneya ela, mwiikoheke so: ‘Davidi aarowa osyaka sai mixankiho iye? Kinrowa opaka exeeni yakikhumelela etthu siisa? Yakiphwanya yoweeha ya orupihana woohiloka, kinrowa omutakiha Davidi aahiiso Yosefe?’ (Maph. 39:11-15) Wuupuwelela maxakha akhanle ookhumelela nattheka, onoonikhaliherya ‘onyokha sotakhala’.​—Am. 5:15. w18.06 16-17 itti. 5, 7

Ikwaha sinceene vaavo atthu anithokoreriwa aya moohixariya, awo anniihela muhina myaha sa epoliitika. Mahiku a Yesu, oliva mpoosito waari mwaha waawiiriha atthu anceene okhaliherya ipartido soovirikana. Okathi ole saahikhala mipoosito sinceene saaliviwa, ntoko mpoosito wa mireerelo, elapo ni ipa. Nave-tho, alipa-ooliviha mpoosito yaaniwiiyerya atthu, nto eyo yaanitepiha mwaha ole. Awo yaanivaha makhwankwa aphavelaka owela ekhatera ni ophwanya owerya wira yiiyeke musurukhu munceene. Zakeyo, xeefi aalipa-ooliviha mpoosito oYerikho, aahithaaciri mwaha woowiiyerya atthu. (Luka 19:2, 8) Ohixariya xeeni aYuda yiireliwa aya mahiku a Yesu? Arumeelaka mwaha wa mpoosito, ale yaamunyokha Yesu, yaaniphavela enamuna yonvara. Tivo yaamukonhe aya sa “mùlutha” wa khula mutthu, mpoosito wa edenaario emosa, yoowo aYuda otheene yaaliva aya. (Math. 22:16-18) Tthiri aYuda khiyaasiveliwa oliva mpoosito ole, maana waaniwuupuxerya wira aRoma ti yaalamulela. w18.06 6 itti. 8-10

Wataana ni Satana khonikumiherya mireerelo sooloka! (Yobi 21:7-17; aGal. 6:8) Xeeni vari aya vootthuneya osuwela wira Satana toneettiha olumwenku ola? Eyo enoonikhaliherya okhalana moonelo wooloka voohimya sa anamalamulela ni olaleya ihapari sooreera. Noosuwela wira Yehova oniphavela wira naattittimiheke anamalamulela. (1 Ped. 2:17) Nave nihaana wiiwelela malamulo aya akhala wira khanivaanyihana ni Biibiliya. (aRom. 13:1-4) Nave-tho, noosuwela wira nihaana osyaka wiirela mpantta epoliitika aahiiso omukhaliherya napoliitika ni epartido awe. (Yoh. 17:15, 16; 18:36) Okhala wira noosuwela wira Satana oneererya ovitha nsina ni ohonona omutthu wa Yehova, nto nihaana wiimananiha owiixuttiha atthu ekeekhai voohimya sa Muluku. Eparakha yuulupale wiihaneliwa nsina na Muluku ni orumeela. Omphenta Muluku etthu yootepa otthuneya ovikana ophenta musurukhu ni itthu.​—Yes. 43:10; 1 Tim. 6:6-10. w18.05 17-18 itti. 8-9

Niireke vanneemereriwa ovalaana sakhumelela mixankiho? Biibiliya khonihimya mathowa akhanle oomwiiriha mutthu ovalaana. Paulo olempe so: “Muthiyana obatiziwe atheliwa ni mulopwana ohinamini, vano iy’awe ola anatthuna okhala poromosa, muthiyan’owo ahimwalané n’iy’awe yowo”. (1 aKor. 7:12, 13) Malakiheryo ala annivareleya muteko olelo-va. Pooti wira sookhala itthu soohiloka “mulopwana [owo] ohinamini” onipaka awe ooniheryaka wira khoniphavela “okhala poromosa” ni mwaarawe. Mwa ntakiheryo, pooti wira onnimuhasula mwaarawe, nto muthiyana owo onoona wira avikaniha okhala vamosa onimwiirihiwa ehasara. Nave pooti wira onnikhootta olyiha etthoko awe wala onnimukhoottiherya mwaarawe omurumeela Muluku. Akhala wira ti siiso muthiyana owo muKristau ohaana othanla “okhala poromosa” aahiiso ovalaana. MaKristau arina muxankiho ntoko owo, pooti othanla ohivalaana. Awo ahaana wiimananiha olokiherya ekasamento aya. w18.12 13 itti. 14, 16; 14 etti. 17

Nlikanyiho na mulipa-oowaala nri Luka 8:5-8, 11-15, Yesu aahitthokiherya wira epyo, “masu a Muluku” aahiiso muhupi voohimya sa Omwene wa Muluku. Etthaya ti mirima sa atthu. Vano epyo yaamorenle etthaya yooloka, yaahinnuwa khwiima mihokorokho “mpakha miloko mulokó”, niire so, 100. Vano nlikanyiho na Yesu, epyo emosa yaahivikaniha wunnuwa mpakha wiima mihokorokho. Nto, nikala na etrigu khannikumiherya makala masya, masi ipyo isya, nto hiyo khannaakumiherya awiixutti asya, masi ipyo isya. Nimpaka sai eyo? Ninnipaka eyo okathi onaaleela ahu atthu akina voohimya sa Omwene wa Muluku. Vanikhala ntoko wira nnincererya mihokorokho sa epyo yaaliwe vamurimani vahu. (Luka 6:45; 8:1) Tivonto, vaavo ninvikaniha ahu olaleya muhupi wa Omwene wa Muluku, ninniima “mihokorokho mwaha wa nthiti” nahu. w18.05 5-6 itti. 10-11

Paulo aaniileva “vomalela wira” aakhaliherye annawe. Miteko sawe saanooniherya wira aaniileva wira aakhaliherye. (2 aKor. 12:15) Moolikanasa, axitokweene ahaana waalipiha ni waamaaliha anna ohiya paahi ni moolumo masi ni miteko saya. Eyo tenooniherya wira anninikhapelela. (1 aKor. 14:3) Wira yaalipihe anna, okathi mukina axitokweene pooti waavaha miruku. Axitokweene pooti wiixutta moota woopaka eyo amurumeelaka Biibiliya. Nuumala okhwa ni ohihimuxiwa, Yesu oovaha ntakiheryo nooloka na moota woovaha miruku okathi aaroihale awe muhupi miloko saari wAsia Menor. Yesu aahivaha miruku soolopola miloko sa wEefeso, oPergamo ni oTiyatira. Masi ohinatthi waavaha miruku, Yesu aapacenrye waattottopela mwaha wa itthu sooloka yaapaka aya. (Wis. 2:1-5, 12, 13, 18, 19) Tthiri axitokweene annimananiha omutakiha Kristu okathi anivaha aya miruku. w18.04 22-23 itti. 8-9

Nyuwo anamuyari mookhalana muritti muulupale wowaakhapelela aniinyu wira murima aya ohihononiwe ni Satana. Tthiri munnipaka itthu sotheene muniwerya anyu wira aniinyu ahiphwanye iretta. Munnipaka eyo murattelaka empa anyu ni murihaka khula etthu yaarowa woophwanyihani iretta nyuwo ni aniinyu. Moolikanasa muhaana osuwela iviidiyu aniinyu aniweha aya iprograma sa TV axooku eletroniko ni awebsaite anaarumeela aya wira Satana ohihonone muupuwelo aya. Musuweleke wira Yehova ohoovahani muritti wowaakhaliherya aniinyu momunepani. (Mir. 1:8) Nto muhooveleleke waavaha malamulo anikhuma mBiibiliyani. Mwaaleeleke etthu ekhanle aya ooweha ni ohiweha nave mwaakhaliheryeke osuwela mathowa aniwiirihani opaka eyo. (Math. 5:37) Nto vaavo aninnuwa aya mwaakhaliheryeke osuwela etthu yooloka ni yoohiloka moovarihana ni malamulo a Yehova. (aHéb. 5:14) Musuweleke wira aniinyu anrowa ottharaka ele munipaka anyu.​—Otum. 6:6, 7; aRom. 2:21. w19.01 16 etti. 8

Enamuna emosa yoopaka eyo ti waapaka apatthani anna ni arokora oowuuluvala. Mwaakoheke etthu enaakhaliherya ovikaniha omurumeela Yehova iyaakha sinceene. Awo anoowiixuttihani itthu sinceene sootthuneya. Nto eyo enimwaalipiha awo ni nyuwo! Hata nri ene amiravo aahiiso nuuluvanle ene, nnoowerya owiiriha ale annixukurya Mmulokoni woona wira annaakheliwa saana. Akhala wira moothanliwa ohoolela muthukumano woorowa olaleerya, muhaana waakhaliherya anna oowuuluvala ovikaniha ohiya muthuko aya waaryaka. Nto muhaaroiheke muttetthe woorakamela. Nave mwaathanleke amiravo wira alaleeryeke ni anna awo. Okathi mukina anna ni arokora oowuuluvala ni ale aniwereyasiwa annikhulumuwa mwaha woowi khaniwerya olaleerya vanceene ntoko yiira aya khalai. Tthiri anoolipa vanceene osuwela wira munnaathokorerya ni munnisuwela mukhalelo aya. Nnaamwi yuuluvanle ene aahiiso yiixuntte ene ekeekhai khalai, waareerela wanyu murima onoowiiriha ovikaniha olaleerya mooluttuweliwa.​—Onam. 19:32. w18.06 23-24 itti. 10-12

Nihikhala-khale nliyalaka wira Yehova oonitaphula okhala epottha ya etampi ni okhwa. Maana mukuttho wowoopola onninikhaliherya omurumeela Muluku ni yowuupuxerya ya murima yooloka, nto eyo enninihakalaliha. (Esal. 40:9) Khivaniphiyerya ohimya paahi wira ninnimuxukhurela Yehova. Masi nihaana ovaha ephoole wira nihirumeele moohiloka otaphuwa wahu. Mwa ntakiheryo, murummwa Pedru onlopola wira nihirumeeleke otaphuwa wahu wira nipakeke itthu soohiloka. Yoolopola ela ennuupuxerya ele yaawiiranenle aIsarayeli mothakoni. Olelo-va, nihaana ovarihela muteko nlopolo nna. Satana ni olumwenku awe onnikumiherya itthu soowara, soolya, soowurya ni sootthekulana. Ale anlaleya itthu iyo anniwooniherya atthu ooreera aphavelaka oniiriha wuupuwela wira nihaana othuma itthu iyo, hata nihirowaka orumeela. Ti vookhweya owokiwa ni olumwenku ola wira nirumeeleke moohiloka otaphuwa wahu. w18.04 11-12 itti. 7-8