Setembro

Murummwa Pedru aahipaka marukunuxo vakhaani a eprofesia ya Yoweli. (Mit. 2:16, 17) Ohiya opacerya ni moolumo oowi nuumala-vo, murummwa Pedru aahimmye wira “mahiku òkiserya”, eyo piiyo, mahiku ookiserya a makhalelo a aYuda. Mahiku awo ookiserya, ikuru sowaarya sa Muluku saarowa omwarexeliwa “atthu othene”. Eyo enooniherya wira waahivira okathi eprofesia ya Yoweli ehiiraneyale. Nuumala Muluku waamwarexela ikuru sawe sowaarya maKristau a eseekulu yoopacerya, awo yaahipaceriha muteko woolaleerya waarowa omwareela olumwenku wotheene. Tivonto, okathi murummwa Paulo aalepenle awe ewarakha aKolosi, mwaakha 61 nuumala Kristu orwa, owo aahimmye wira ihapari sooreera aahilaleeriwa “khula mutthu vathí-va”. (aKol. 1:23) Vaavo Paulo aahimmye awe wira ihapari sooreera aahilaleeriwa “khula mutthu vathí-va”, owo aahimya ilapo aalaleeryale awe. Nikhaliheriwaka ni ikuru sowaarya sa Muluku, olelo-va ihapari sooreera sinnilaleiwa ilapo sinceene “mpakha wokiseryani w’elapo”.—Mit. 13:47. w20.04 6-7 itti. 15-16

Yehova onniniphenta otheene ahu, waahela muhina ootheene ale arimenle. (Math. 18:12-14) Muluku aahileiherya wira aarowa waavya ipwittipwitthi sawe sirimenle. Nuumala ophwanya, aarowa okhaliherya wira sitthikele okhalana waataana wooloka ni yena. Nave aahihimya etthu aarowa awe opaka wira sitthikele wa yena. Etthu aarowa awe opaka enoolikana ni ele yaapaka aya amakampusi a wIsarayeli yarimeela epwittipwitthi aya. (Ezek. 34:12-16) Awo yaapaka exeeni? Wanipacerya, makampusi aanirowa ophavelasa epwittipwitthi erimenle. Opaka eyo, waatthuneya okathi ni wiimananiha vanceene. Nuumala ophwanya, owo aanittikiherya nipuro saari aya ipwittipwitthi sikina. Nave akhala wira epwittipwitthi eyo yaahikhulumuwa aahiiso yaahivulalihiwa, makampusi aanikhaliherya wira ekhalane ikuru, orapiha makhwatta, okapatta ni olyiha oratteene. Olelo-va, axitokweene yaawo ari amakampusi a ‘ipwittipwitthi sa Muluku’, ahaana opaka etthu emosaru yaapaka aya amakampusi ale. Awo ahaana omukhaliherya khula mutthu orimenle. (1 Ped. 5:2, 3) Axitokweene ahaana owaavya ni waakhaliherya otthikela mmulokoni ni moophenta owooniherya wira anoowerya otthikela okhala apatthani a Yehova. w20.06 20 etti. 10

Okhala wira Yesu aanoona wira mihokorokho saahittokottha mmatta wira sihemphweke, niireke aalipelela wira atthu otheene yammutthara? Nnaari. Soolempwa saahihimya vahinatthi wira atthu vakhaani paahi ti yaarowa omwaamini Yesu. (Yoh. 12:37, 38) Nave Yesu aahikhalana owerya wooweha ele eri vamurimani va mutthu. (Math. 9:4) Hata vari siiso, owo aaniimananiha waakhaliherya ale yaamwaamini, ni oluttuweliwa waalaleerya atthu otheene. Akhala wira Yesu yoowo aawerya osuwela ele eri vamurimani va mutthu khaakuvela waaphukela atthu, ankhi hiyo? Ohiya opaka eyo, nweheke mikhalelo saya sooloka. Muupuweleke ele Yesu aalenle awe awiixutti awe. Mihokorokho soottokottha mmatta, eyo piiyo, soolikana wira sihemphweke. Tthiri, atthu akina pooti opaka marukunuxo wira akhale awiixutti a Kristu. Yehova onnikupali wira atthu a muttetthe ahu anoowerya okhala awiixutti ni onniwoona okhala “mihakhu”, niire so, onnaavaha efaita yinceene. (Hag. 2:7) Akhala wira munnathokorerya atthu a muttetthe anyu ntoko Yehova ni Yesu anaathokorerya aya, eyo enimookhaliheryani osuwela makhalelo aya ni itthu sinaasivela. Nyuwo khamunrowa waathokoreryaka ntoko amalapo masi ntoko anna ni arokora. w20.04 13 itti. 18-19

Biibiliya onnooniherya oratteene wira naaphavelaka omusiveliha Yehova, nihaana omphenta Yesu. Etthu emosa ninreerela ahu opaka wira nikhale apatthani a Yesu ori omusuwela oratteene Yesu. Nnoowerya omusuwela Yesu nisomaka eliivuru ya Matheyo, Marko, Luka ni Yohani. Tthiri vaavo nnuupuwelela ahu sowiiraneya sa Yesu silempwale mBiibiliyani, ninnipacerya omphenta Yesu mwaha woowi ninnisuwela moota aareerela awe murima atthu. Mwa ntakiheryo, nnaamwi Yesu aari Mwiixuttihi, owo khaathokorerya awiixutti awe ntoko ipottha. Ohiya opaka eyo, Yesu aanaaleela moonelo ni muupuwelo awe. Nto okathi yaariipiwa aya murima, owo nave aaniriipiwa murima ni aaninla vamosa naawo. (Yoh. 11:32-36) Musuweleke wira, hata atthu yaale yaamunyokha Yesu yaanisuwela wira atthu ale yeemererya muhupi aalaleya awe yaanikhala apatthani awe. (Math. 11:19) Akhala wira nnootakiha enamuna Yesu aathokorerya awe awiixutti awe, waataana wahu ni atthu akina onooloka ni ninrowa ohakalalaka. Nto eyo enooniiriha wuncererya omphenta ni omuttittimiha wahu Yesu. w20.04 22 itti. 9-10

Mwaakha wa 1870, elapo ya oGrã-Bretanha yaahikhala olamulelo wa olumwenku wotheene ni yaahikhalana anakhotto anceene ni ootupa. Profeta Daniyeli aahihimya wira Grã-Bretanha aari ntoko nnyaka naamukhaani naaxinttale manyaka mararu, eyo piiyo, oFrança, wEspanha ni Holanda. (Dan. 7:7, 8) Nto Grã-Bretanha aahikhala mwene a osul okathi wa Ekhotto Yoopacerya ya Olumwenku Wotheene. Okathi omosaru, Estados Unidos da América, yaahikhala elapo yootepa othaaciri olumwenku wotheene ni yaahipacerya waataana ni Grã-Bretanha. Okathi wa Ekhotto Yoopacerya ya Olumwenku Wotheene, Estados Unidos ni Grã-Bretanha yaahikhaliheryana owana ekhotto ni yaahikhala oowerya vanceene. Okathi ole, ilapo iye soowerya saahitakaahana khukhala Potência Mundial Anglo-Americana. Eprofesia ya Daniyeli ennihimya epotensia ele okhala mwene onaathukumanya “anakhotto anjene ni òwerya”. Okhuma okathi wookiserya, Anglo-Americana tori mwene a osul. w20.05 4 itti. 7-8

Maasi aakhala valaponi mwaha woowi elapo khetempe orakamelana ni nsuwa ni khetempe okhuveelana ni nsuwa. Vaakhanle wira elapo ehaattamelana vakhaani ni nsuwa khiyaarowa okhala maasi valaponi. Elapo yotheene yaarowa okhala ntoko mwala wooviha vanceene ni khuuvo aarowa owerya okhala mukumi valaponi. Nave, vaakhanle wira elapo yoorakamelana vanceene ni nsuwa, maasi otheene ari valaponi yaarowa okhala ntoko xeelu. Tthiri elapo yaarowa okhala ntoko boola muulupale a xeelu. Okhala wira Yehova opweha elapo opuro wooreerela, maasi anneetta mwa enamuna enikhaliherya soopattuxiwa okhala sikumi. Maasi awo aneetta sai? Maasi ari mphareya, mmuro ni mapuro makina annitthikela wiirimu anapakeya meeku. Masientista anihimya wira, khula mwakha, nsuwa ninniiriha maasi anivikana 500.000 cúbicos otthikela wiirimu ni opakeya meeku. Maasi awo manceene nalikanyiha ni maasi ari matthiya otheene molumwenkuni. Vano maasi awo antthikela wiirimu annikhala mahiku 10, nuumala-vo annipakeya epula anatthikela valaponi vaava. Tthiri maasi awo annimora ntoko epula, anatthikela mphareya ni miro sikina aneetta ntoko yeetta aya. Moohaanyiherya enamuna maasi awo aneetta aya enooniherya wira, ohiya paahi Yehova okhalana ankhili, owo tooweryexa.—Yobi 36:27, 28. w20.05 22 etti. 6

Ikuru sowaarya sa Muluku, muhakhu mukina nivahiwe ahu ohinooneya. Yesu oonitumererya ohihiyererya ovekela ikuru sowaarya sa Muluku. (Luka 11:9, 13) Yehova onnirumeela ikuru sawe sowaarya wira onivahe “owerya . . . wulupalexa”. (2 aKor. 4:7) Nikhaliheriwaka ni ikuru sowaarya sa Muluku, nnoowerya ovilela mixankiho sotheene ninkumana ahu. Ikuru sowaarya sa Muluku sinoonikhaliherya ovara miteko sotheene ninvahiwa ahu mmutthenkesoni mwa Muluku. Nave pooti onikhaliherya olokiherya itthu ninsuwela ahu. Hiyo ninnisuwela wira itthu sooloka ninvara ahu mmutthenkesoni mwa Muluku ninkhaliheriwa ni ikuru sowaarya sa Muluku. Hiyo nnoowerya wooniherya wira ninnivaha efaita ikuru sowaarya sa Muluku ori ovekela wira sinikhaliherye oweha muupuwelo ni itthu soohiloka siri vamurimani vahu. (Esal. 139:23, 24) Akhala wira ninnipaka mavekelo ntoko awo, orumeelaka ikuru sawe, Yehova pooti onikhaliherya osuwela moonelo ni muupuwelo woohiloka nrina ahu. Nto akhala wira ninnoona wira nookhalana muupuwelo ni soophavela soohiloka, nihaana ovekela ikuru sa Muluku wira sinikhaliherye oxintta moonelo ni soophavela iyo soohiloka. Akhala wira nnoopaka eyo, nnimooniherya wira ninniimananiha ohipaka nnakhala etthu emosa yaarowa omwiiriha Yehova ohiya onikhaliherya orumeelaka ikuru sawe.—aEef. 4:30. w20.05 28-29 itti. 10-12

Vaavo nnaakiherya ahu nsina na Yehova, hiyo ninnipaka ele Yesu aapaka awe. Yesu aanaasuweliha atthu akina. Ohiya paahi waasuweliha ni orumeela nsina na Muluku, Yesu aanaakiherya omutthu wa Yehova. Mwa ntakiheryo, aFarisi yaanihonona vanceene nsina na Yehova ni yaaniwiiriha atthu ohisiveliwa ni Muluku. Maana yaaniwiiriha atthu wuupuwelaka wira Yehova toohaaxa, a mphwini, oorumexa, oohipatthaneya ni ohirina othunku. Masi Yesu khaapaka ele aFarisi yaapaka aya, maana aanaakhaliherya atthu omuthokorerya Yehova okhala Tiithi oophenta, ooreera murima, oopixa murima ni oolevelela. Ohiya paahi opaka eyo, Yesu aanitakiha moomalela mikhalelo sa Tiithi awe. Nto eyo yaanaakhaliherya atthu osuwela mikhalelo sa Yehova. (Yoh. 14:9) Hiyo nnoowerya waakiherya itthu Yehova onootheriwa awe. Moota xeeni? Niimananihaka omutakiha Yesu. Nnoowerya opaka eyo naakhaliheryaka atthu osuwela wira Yehova, Muluku oophenta ni ooreera murima. Niira siiso, nnimwaakhaliherya atthu otteeliha nsina na Yehova vamurimani ni mmuupuweloni mwaya. Khula nihiku, moolumo ni miteko sahu sinnaakhaliherya atthu omusuwela Yehova. Nave musuweleke wira ninnikhaliherya otteeliha nsina na Yehova vaavo nnaakhaliherya ahu atthu okumiha mmuupuweloni mwaya moonelo woohiloka arina aya voohimya sa nsina na Yehova. w20.06 6 itti. 17-18

Redes sociais pooti orumeeliwa wira mutthu opake itthu sooloka. Mwa ntakiheryo, pooti waarumeela wira mutthu ovaanele ni amusi wala apatthani. Niireke muhoona wira mpantta muulupale wa itthu atthu anihela aya munternetini aniphavela wiivuwiha? Vanikhala ntoko wira aniphavela ohimya wira: “Mukiweheke miyo”. Nave atthu akina annihela ikomentaario wala itthu sowuuliha muru aphavelaka okomentari ifootu saya wala sa atthu akina. Eyo yoovirikana ni ele Biibiliya onaatumererya awe maKristau wira ahaana okhala oowiiyeviha ni oothunku. (1 Ped. 3:8) Akhala wira munnaarumeela redes sociais mwiikoheke so: ‘Kiireke ifootu, iviidiyu ni ikomentaario kinhela aka munternetini sinooniherya wira kinimwiivuwiha? Kiireke sinoowiiriha atthu akina okhalela nrima?’ MaKristau ahaana osyaka wiixoona okhalana efaita waavikana akina wala okhala ntoko oottittimiheya waavikana akina. Awo ahaana otthara miruku sa mBiibiliyani siniphwanyaneya yoolepa ya olelo. Wiiyeviha onoonikhaliherya ohihapuxiwa ni wiixinnuwiha wa atthu a mulaponi.—1 Yoh. 2:16. w20.07 6 itti. 14-15

Ohinatthi okhala mwiixutti a Kristu, murummwa Paulo aari mmiravo oohittittimiha ni aalupattha vanceene atthareli a Yesu. (Mit. 7:58) Okathi aasuweliwa awe okhala Sawuli, Paulo aanaaxankiha vanceene maKristau a okathi ole. Ori ene wiirimu, Yesu aahimulavuliha ni aahimwiiriha ohoona. Wira otthikele woona, Paulo aahaana waavekela nikhaliheryo atthu yaale aalupattha awe. Nto moowiiyeviha, Paulo aaheemererya okhaliheriwa ni mwiixutti a Yesu iitthaniwa Ananiya, yoowo aamukhalihenrye Paulo otthikela woona. (Mit. 9:3-9, 17, 18) Muhoolo mwaya, Paulo aahikhala mutthu aasuweliwa oratteene mmulokoni mwa eKristau. Masi owo khaaliyanle etthu Yesu aamwiixuttinhe awe mphironi orowaka oDamaasiko. Paulo khaahiyale okhala mutthu oowiiyeviha, mutthu oneemererya okhaliheriwa ni axinnawe ni axirokorawe maKristau. Nave Paulo aanisuwela wira axinnawe yaanimulipiha vanceene.—aKol. 4:10, 11. w20.07 18-19 itti. 16-17

Hata Yehova ori ene Oowerya sotheene, owo onnaavaha okhulupale atthu akina. Mwa ntakiheryo, Yehova oomuthanla Yesu wira okhale Mwene a Omwene awe ni ohaavaha okhulupale apinaatamu 144.000 wira yalamuleleke ni Yesu. Ekeekhai wira Yehova oomwiixuttiha Yesu wira okhale Mwene ni Mukhulupale Aanamukuttho. (aHeeb. 5:8, 9) Nave Yehova onniwiixuttiha ale anrowa olamulelaka ni Yesu. Masi Yehova khoniweha-weha khula etthu anipaka aya wira avare saana muteko aya. Ohiya-vo, Yehova onnikupali wira anoopaka yootthuna awe. (Wiis. 5:10) Tiithi ahu a wiirimu Yehova khaareerela okhaliheriwa ni atthu akina, masi hata vari siiso onnaavaha miteko wala miritti atthu akina. Hiyo nave nihaana opaka etthu emosaru! Mwa ntakiheryo, niireke nyuwo mwa muhooleli a etthoko wala mutokweene? Akhala wira ti siiso, mmutakiheke Yehova, mwaavahaka miteko atthu akina ni muhiweha-weheke khula etthu anivara aya ni moota anipaka aya muteko owo. Akhala wira munootthara ntakiheryo na Yehova, nyuwo munoohakalalaka oweha miteko sinvariwa, munoowiixuttiha atthu akina ni waakhaliherya woororomelani.—Yes. 41:10. w20.08 9 itti. 5-6

Yehova oniphavela wira niwooneleke sai ale arimenle? Yesu oonivaha ntakiheryo ninreerela ahu otthara. Owo aanisuwela wira khula mutthu ookhalana efaita vamaithoni va Yehova, nto Yesu aahilakela waakhaliherya “atthu a Isarayeli, ari ntoko ipwittipwitthi sirimenle”. (Math. 15:24) Okhala wira makampusi ooloka, Yesu aahipaka itthu sotheene aawerya awe wira ehirimeele nnakhala epwittipwitthi emosa ya Yehova. (Yoh. 6:39) Murummwa Paulo aahaatumererya axitokweene a muloko a wEefeso omutakiha Yesu. Owo aalenle so: “Mwa sothene kowoniheryani wira nivaraka sisa, ti nrina ahu wakhaliherya atthu òthoiwa, nùpuwelaka molumo Pwiya Yesu ohimyalyawe wira: ‘Mulipa-òvaha onoreriwa onvikana mulipa-òvahiwa’”. (Mit. 20:17, 35) Tthiri, olelo-va axitokweene aakhalana muritti muulupale wowaakhapelela atthu a Yehova. Mutokweene oniihaniwa Salvador onikhala wEspanha onihimya so: “Vaavo kinuupuwela aka moota Yehova onaakhapelela awe atthu awe, eyo ennikiiriha opaka itthu sotheene kiniwerya aka wira kaakhapelele atthu awe. Koosuwela wira Yehova oniphavela wira kaakhapeleleke oratteene”. w20.06 23 itti. 15-16

Yehova onnisuwela wira ninrowa okhala atthu oomalela nuumala Iyaakha Ekonto Emosa ya Olamulelo wa Yesu. Mpakha okathi owo, Yehova onrowa onipixeryaka murima ni onilevelela itampi sahu. Nto hiyo nave nihaana oweha itthu sooloka atthu akina arina aya ni waapixerya murima. Yesu ni malaikha yaahihakalala vanceene okathi yaapattuxiwe aya erimu ni elapo. Vano nkahaya muupuwele moota anrowa aya ohakalala vaavo elapo yotheene enrowa aya osareya atthu animphenta ni omurumeela Yehova. Nave nkahaya muupuwele ohakalala ale oothanliwa ari ene wiirimu alamulelaka ni Kristu, vaavo anrowa aya waawehaka apinaatamu attottelaka mureerelo muteko aya. (Wiis. 4:4, 9-11; 5:9, 10) Ohiya-vo, nkahaya muupuwele okhala olumwenku maithori a wunla anrowa aya oranttelihiwa ni maithori a ohakalala, owereya, iretta, oriipiwa murima, oxanka ni okhwa onrowa omalihiwa. Nlipelelaka ophiya nihiku nlo, mwiimananiheke otakiha ophenta, ankhili ni opixa murima wa Tiithi ihu. Mwiira siiso, khamunrowa oyeleela ohakalala wanyu hata murina ene mixankiho sinceene. (Yak. 1:2-4) Moohaanyiherya, nihaana omuxukhurela Yehova vanceene mwaha wa onileiherya wira “anohihimuwa mokhwani”!—Mit. 24:15. w20.08 19 itti. 18-19

Biibiliya yoovaha enooniherya vanceene wira Muluku onniniphenta. Tiithi ihu a wiirimu onninthokorerya ntoko anaawe mwaha woowi aahaavekela alopwana owaamini omulepa Biibiliya. Omurumeelaka Biibiliya, Yehova onnaakhula makoho ahu ootepa otthuneya ntoko: Nikhumme woowi? Tiivi eri yoolakela ya okumi? Exeeni enrowa wiiraneya muhoolo? Yehova oniphavela wira anaawe otheene asuwele waakhuliwa wa makoho awo. Nto wira owerye opaka eyo, mwa iyaakha sinceene Yehova onniwiiriha alopwana omutaphulela Biibiliya mattaava manceene. Olelo-va, Biibiliya oomalela aahiiso oohimalela onniphwanyaneya mattaava anivikana 3.000. Tthiri Biibiliya eliivuru ehireere otaphuleliwa olumwenku wotheene. Hiyo pooti wooniherya wira ninnixukhurela ovahiwa Biibiliya nimusomaka khula nihiku, wuupuwelela ele nniixutta ahu ni wiimananiha ovarihela muteko mookumini mwahu. Ohiya-vo, ninnimooniherya Muluku wira ninnimuxukhurela niimananihaka waalaleerya atthu anceene ihapari sooreera siri mBiibiliyani.—Esal. 1:1-3; Math. 28:19, 20. w20.05 24-25 itti. 15-16

Profeta Yeremiya aahithanleliwa olaleerya muttetthe wooxankiha vanceene. Okathi omosa aahikhulumuwa vanceene mpakha wuupuwela ohiya olaleerya. Masi khaapanke eyo. Mwaha wa xeeni? Mwaha woowi “masu Àpwiya” Yehova yaari ntoko mooro wooviha vanceene mmurimani mwa Yeremiya, nto owo khaawerya omaala! (Yer. 20:9) Etthu emosaru pooti oniiraneela akhala wira ninnisariha vamurimani ni mmuupuweloni mwahu Nuulumo na Muluku. Tthiri eyo enimwiiraneya akhala wira ninnimusoma Biibiliya khula nihiku ni wuupuwelela ele ninsoma ahu. Niira siiso, ohakalala wahu onimuncerereya ni woonasa wene atthu anceene anoophavelaka oniwiriyana naalaleeryaka. (Yer. 15:16) Nto okathi munikhulumuwa anyu, moohicikha etthu ene enookhulumulani, mmuxontteleke Yehova wira ookhaliheryeni. Owo onimookhaliheryani owanana soovonya ni sootteettheya sanyu aahiiso oretta onoowereyani. Ohiya-vo, Yehova onimookhaliheryani okhalana moonelo wooloka voohimya sa iparakha. Nave onimookhaliheryani okhalana moonelo wooloka voohimya sa muteko woolaleerya. Nto munvekeleke Tiithi anyu oophenta a wiirimu ni mmuleeleke itthu sotheene sinooxankihani. Mukhaliheriwaka ni Yehova, nyuwo munoowerya owanana ni oxintta okhulumuwa. w20.12 27 itti. 20-21

Arokora akina mithukumano sinnaakhaliherya okhala vamosa ni anna ni arokora. Nto nihaana ottottela mureerelo okathi owo wira niwaakhele mooreerela murima, ovaanelana ni owooniherya wira ninnaavaha efaita. Nimutakihaka Yesu, nihaana waavya okathi wira nitthekule ni arokora. (Luka 10:38-42) Mwa ntakiheryo, munoonela sai waalattula arokora akina wira mulye vamosa wala mutthekule? Okathi owo nyuwo pooti waalipiha vanceene. (aRom. 1:11, 12) Akhala wira mwa mutokweene, okathi wotheene muupuweleke ntakiheryo na Yesu. Owo aanisuwela wira atthu akina vannaaxankiha okhala ahithenle wala ahitheliwe. Masi Yesu aahooniherya oratteene wira khivanitthuneya mutthu othela ni waayara anamwane wira ophwanye ohakalala wekeekhai. (Luka 11:27, 28) Tthiri, etthu eniphwanyiha ohakalala wekeekhai ori ohela nipuro noopacerya ovara miteko sa Yehova. (Math. 19:12) Axitokweene ahaana waathokorerya athiyana a mmulokoni ntoko axirokoraya ni aximaama aya oomunepani. Ti vooloka axitokweene ophavelasa okathi sihinatthi ni nuumala mithukumano wira avaanele ni arokora. w20.09 21-22 itti. 7-9

WIsarayeli wa khalai, mulimi aanaala epyo awe okathi yaapacerya aya orupa epula ni anihepha nuuvira epula ya eyiita. (Mar. 4:28) Opixa murima wa mulimi, ntakiheryo nooloka ninreerela ahu otthara. Masi khahiyo vookhweya opaka eyo. Okhala wene, apinaatamu oohimalela aniphavela woona sookhumelela sa muteko aya moowaakuveya. Masi mulimi ohaana olipelela, maana ohaana opatthula, waala epyo, okhuwari, olimela ni okhapelela saana miri iyo. Nave muteko wowaapaka awiixutti ninvara ahu, nihaana wiimananiha. Nave onnivira okathi wira nimukhaliherye ole nimmusomiha ahu Biibiliya okumiha vamurimani vawe muupuwelo wa nthalu wira okhaleke mutthu oophenta. Akhala wira nnoopixa murima, mixankiho khasinrowa onikhulumula nave hata atthu akina yeemereryaka ihapari sooreera nnaalaleerya ahu, nihaana opixa murima. Musuweleke wira hiyo khanikhanle oomukhanyererya ole nimmusomiha ahu Biibiliya wira okhalane waamini woolipa. Muhiliyale wira hata awiixutti a Yesu, okathi mukina yaanipisa wiiwexexa ele Yesu aawiixuttiha awe. (Yoh. 14:9) Nave-tho muhiliyale wira muteko ahu waala ni okhuwari paahi, maana Muluku toninnuwiha.—1 aKor. 3:6. w20.09 11 itti. 10-11

Otheene ahu nimphavela wira ole nimmusomiha ahu Biibiliya okele vahoolo mpakha opatisiwa. Wira nimukhaliherye opaka eyo, nihaana omutumererya orowela mithukumano mmulokoni. Ikwaha sinceene, naxikola a Biibiliya onaakuvela orowela mithukumano onnakuva okela vahoolo momunepani. Anamalaleerya akina annimutthokiherya ole animusomiha aya Biibiliya wira yoosoma awe ya Biibiliya mpantta mmosa paahi wa omusoma Biibiliya, mpantta mukina ohaana orowela mithukumano mmulokoni wira omalelihe. Mmusome aHeeberi 10:24, 25 ni naxikola anyu ni mmooniherye itthu sooloka onrowa awe ophwanya akhala wira onoorowela mithukumano. Mmuleeleke moohakalala etthu mwiixuntte anyu mmithukumanoni. Eyo enoomukhaliherya naxikola anyu orowela mithukumano. Etthu naxikola anyu enrowa awe owiriyana ni wiixutta muthukumano awe woopacerya enoomusivela vanceene ovikana mithukumano aaweha awe itiini sikina. (1 aKor. 14:24, 25) Owo onimwaasuwela atthu onrowa awe otthara ntakiheryo naya ni eyo enoomukhaliherya okela vahoolo mpakha opatisiwa. w20.10 10-11 itti. 14-15

Nvekeleke munepa wootteela, owo onimookhaliheryani ovarihela muteko ele munisoma anyu mBiibiliyani. Nave nvekeleke ntoko nasaalimo aavekenle so: “Apwiya! Mukithonyerye iphiro sanyu, wira ketteleke ekekhai anyu; mukhomalihe murim’aka, wira kitthareke otthuna wanyu”. (Esal. 86:11) Ohiya-vo muhihiye omusoma Biibiliya ni iliivuru Yehova onnivaha awe orumeelaka mutthenkeso awe. Muhiliyale wira yoolakela anyu khahiyo okhalana osuwela paahi, masi muniphavela wira ekeekhai ekhale vamurimani ni nvariheleke muteko mookumi mwanyu. Nto munepa wootteela wa Muluku onimookhaliheryani opaka eyo. Nave muhihiye waalipiha anna ni arokora. (aHeeb. 10:24, 25) Mwaha wa xeeni? Mwaha woowi awo amusi anyu oomunepani. Nto nvekeleke munepa wa Muluku wira wookhaliheryeni ovaha ikomentaario soovara murima ni opaka oratteene mpantta anyu. Mwiira siiso, nyuwo munoomooniherya Yehova ni Mwanawe wira munniphenta vanceene “ipwittipwitthi” sawe. (Yoh. 21:15-17) Moohipisa, mpantta wa valaponi wa mutthenkeso wa Yehova onrowa ohooleliwaka ni munepa wootteela wa Muluku. w20.10 24-25 itti. 15-17

Yesu aathokorenrye sai arummwa awe okathi ole yaakhulumunwe aya? Okathi vakhaani nuumala ohihimuxiwa, Yesu ahaalela atthareli awe akina wira: “Muhòvé! Murowé mwàhimerye axinn’aka wira [koohihimuxiwa]”. (Math. 28:10a) Tthiri vannooneya wira Yesu khaahiyale waakhaliherya arummwa awe. Nnaamwi awo yaamutthyanwe, Yesu khaahiyale owiitthana okhala “arummwa awe ni okhala axinna awe”. Nimutakihaka Yehova ni Yesu, nihaana okhala atthu oomoriwa ikharari ni oolevelela. (2 Mam. 13:23) Mwa enamuna emosaru hiyo ninnaathokorerya ni ninnaavaha efaita ale ahiyale olaleerya. Nlelo awo anna ni arokora ni ninnaaphenta vanceene! Tthiri ninnuupuwela muteko wotheene anna ni arokora awo anvarenle aya Yehova. Akina a yaawo aaviriha iyaakha sinceene avaraka muteko wa Muluku. (aHeeb. 6:10) Ohiya-vo, hiyo ninninkheliwa vanceene ni anna awo! (Luka 15:4-7) Naalipiheke ni waalattula orowela mithukumano anna ni arokora ahiyale olaleerya. Nave vaavo munna wala murokora ohiyale olaleerya oniphiya awe Empa ya Omwene nihaana wiimananiha omukhomasa ni oviriha okathi nivaanelaka nuuwo. w20.11 6 itti. 14-17

Yakobo ni Yohani vamosa ni maama aya yaahirowa onvekela okhulupale Yesu. Moohipisa, Yesu aahaaleela moowiiwanyeya wira Tiithi awe a wiirimu paahi taarowa othanla akhala wira mukina aamukilaathi moono woolopwana mukina moono woothiyana Momweneni. (Math. 20:20-23) Yesu aanisuwela wira saahikhala itthu aahaawerya awe ni aanisuwela mikano sawe. Tthiri Yesu aari mutthu oowiisuumaaliha. Nave khaapaka etthu ahaarummwale awe ni Tiithi awe. (Yoh. 12:49) Ninrowa otthara sai ntakiheryo nooloka na Yesu? Hiyo nnoowerya otthara ntakiheryo na wiisuumaaliha wa Yesu nivarihelaka muteko malakiheryo a mBiibiliyani ari yoolepa ya olelo. Nto akhala wira ninnivekeliwa miruku nihaana osyaka ohimya paahi moonelo ahu wala ohimya ele nnuupuwela ahu nihinatthi wuupuwela oratteene ni otokosa mwaha owo. Ohiya opaka eyo, nihaana omooniherya mutthu owo miruku sa mBiibiliyani ni ele iliivuru sahu sinimutthokiherya Biibiliya sinihimya aya. Niira siiso, nnimooniherya wira ninnisuwela wira sookhala itthu nihinsuwela ahu ni ninnisuwela mikano sahu. Wiisuumaaliha onninikhaliherya osuwela wira malamulo “a xariya” a Muluku Oowerya Sotheene tooloka ovikana muupuwelo ahu.—Wiis. 15:3, 4. w20.08 11-12 itti. 14-15

Akhala wira muniphavela orowa onvaha miruku mpatthani anyu, itthu xeeni munireerela anyu wuupuwelela? Muhinatthi olavulana, nyuwo muhaana wiikoha so: ‘Kiireke kinnitepa okhala “òrera murima nnákhala musuweli”?’ Mutthu oniixoona okhala ootepa oreera murima wala naxariya, owo onnaaphukela atthu ohiya moovarihana ni malamulo a xariya a Yehova, masi moovarihana ni muupuwelo awe ni moonelo awe. Nave mutthu owo khonoona othunku. Masi akhala wira nuumala othokorerya saana mwaha owo, munoona wira vannireerela onvaha miruku mpatthani anyu, muhaana osuwela oratteene mwaha ene ni murumeeleke makoho wira mmukhaliherye mpatthani anyu osuwela etthu ene ehilonke. Nave miruku sanyu sihaana ovarihana ni Biibiliya. Mwaha wa xeeni? Mwaha woowi khahiyo muritti anyu omphukela mpatthani anyu, masi muniphavela omukhaliherya osuwela moonelo wa Yehova voohimya sa etthu onipaka awe. (aRom. 14:10) Okathi muninvaha anyu miruku mutthu murumeeleke malakiheryo a mBiibiliyani ni mutakiheke othunku wa Yesu. (Mir. 3:5; Math. 12:20) Mwaha wa xeeni? Mwaha woowi, Yehova onrowa onithokorerya mwa enamuna emosaru nnaathokorerya ahu atthu akina.—Yak. 2:13. w20.11 21 etti. 13

Niireke vaamoosivelani atthu woothokoreryani moovarihana ni nikhuli nanyu, makhalelo eerutthu anyu, owiitho wanyu, mwaari mutthu oorakama wala ookhuveya? Woonasa wene, nnaari. Ti voohakalaliha osuwela wira Yehova khonipaka eyo! Maana Yehova khonaaweha atthu ntoko apinaatamu anaaweha aya. Mwa ntakiheryo, okathi Samuweli aaweha awe anamwane a Yese, Samuweli khaawenhe ele Yehova aawenhe awe. Yehova aahimuleela Samuweli wira mwaana mmosa a Yese aarowa okhala mwene aIsarayeli. Mwaana xeeni? Okathi Samuweli anwenhe awe mwaana oopacerya oyariwa a Yese iihaniwa Eliyabi, Samuweli aahimmye so: “Vekekhai, ti yola othanliwe n’Apwiya”. Vaakhala ntoko wira Eliyabi aaniphwanela okhala mwene. “Vano Apwiya [Yehova] yahimuhimerya wira: Muhimoné orera owitho, nnákhala orekama wawe. Miyo nkimuthanlalé ola”. Eyo enniixuttiha exeeni? Yehova onnivikaniha oriki: “Atthu anona erutthu, masi Apwiya [Yehova] aniweha murima”. (1 Sam. 16:1, 6, 7) Nto nihaana omutakiha Yehova okathi ninlavula ahu ni anna ni arokora. w20.04 14 etti. 1; 15 etti. 3

Okathi Yesu eetta awe mukwaha awe, aaheemela mmatta woonasa wene, ematta ya esevada ekithi. (Yoh. 4:3-6) Saahala myeeri mixexe (4) wira ophiye okathi woohepha. Nto Yesu aahilavula etthu, atthu akina yahiiwexenxe aya, oriki: “Muttukhule maitho, nwehé imatta: mihokorokho sottokottha, sihemphweke”. (Yoh. 4:35, 36) Yesu aaphavela ohimya exeeni? Vanikhala ntoko wira Yesu aalavula ohepha wa nthoonyeryo, eyo piiyo, waahepha atthu. Nkahaya muupuwele ele yiiraneyale okathi vakhaani waavinre. Nnaamwi aYuda yahiiwanana ni aSamariya, Yesu aahimulaleerya muthiyana a oSamariya, yoowo anwiriyanne oratteene! Tthiri okathi Yesu aalavunle awe wira “imatta, mihokorokho sottokottha, sihemphweke”, aSamariya anceene yanwiriyanne muthiyana ole olavulaka itthu Yesu aahimmye awe, awo yaahirowa onwiriyana Yesu. (Yoh. 4:9, 39-42) Okomentariki iversiikulu iya mulopwana mmosa ohimye so: “Atthu ale yaaniphavela vanceene onwiriyana Yesu . . . Nto eyo enooniherya wira atthu ale yaari ntoko mihokorokho saattokontthe wira sihemphwe”. w20.04 8 itti. 1-2

Mithukumano sinninikhaliherya mwa inamuna sikina. Maana mithukumano sinninikhaliherya olokiherya inamuna sahu sa olaleerya ni okhala anamalaleerya ooloka. Mwa ntakiheryo, ninniixutta orumeela oratteene ikaruma siri Ekaaxa Ahu Ennikhaliherya Wiixuttiha. Nto nihaana olokiherya oratteene mithukumano. Nave okathi wa mithukumano muhaana owiriyana oratteene. Nuumala-vo, nvariheleke muteko itthu sotheene mwiixuntte anyu. Mwiira siiso, nyuwo munookhala “toropa eekeekhai a Kristu Yesu”. (2 Tim. 2:3) Hiyo ninnikhaliheriwa ni imilyau sinceene sa malaikha. Nkahaya muupuwele etthu nlaikha nimosa paahi ninwerya aya opaka! (Yes. 37:36) Vano-nto, muupuwele etthu malaikha manceene yaarowa aya opaka. Tthiri khuuvo pinaatamu nnakhala minepa sootakhala sinwerya waaxintta anakhotto ootupa a Yehova. Vanihimmwa wira Namoona mmosa oororomeleya vamosa ni Yehova toolipa vanceene ntoko atthu anceene. (Makh. 6:16) Tthiri eyo ekeekhai! Nto muhiliyale eyo okathi wotheene munikhulumuwa anyu mwaha wa etthu anipaka aya wala anihimya aya amusi anyu ahikhanle Anamoona a Yehova, ale munivarana anyu muteko wala munsomana anyu oxikola. Muhiliyale wira khamuniwana mekhinyu. Maana muri vamosa ni Yehova, ni mutthareke malakiheryo awe. w21.03 29 itti. 13-14

Murummwa Paulo aahimya moolumo a profeta Yesaya, yaawo aahimya awe aIsarayeli ari Yesaya 22:13. Ohiya wiimananiha okhalana waataana wooloka ni Yehova, aIsarayeli ale yaaphavela wiihakalaliha paahi, awo yuupuwela so: “Nihaana ottottela mureerelo okumi olelo vaava, maana khula okathi ninlipelela okhwa”. Nave moonelo owo ohuulaana olelo-va. Waamini wahu wira atthu anoohihimuxiwa ohaana ovarihana ni enamuna nnaathanla ahu apatthani ahu. Anna a muloko wa oKorinto yaahaana okhalana ephoole ni apatthani aya, yaawo yahaakupali wira atthu ookhwa anoohihimuxiwa. Etthu xeeni nniixutta ahu? Akhala wira apatthani ahu atthu yaale arina moonelo woohiloka anihimya wira ahaana ottottela mureerelo okumi olelo-va, awo pooti onikumiherya mixankiho sinceene. Maana apatthani oohiloka pooti ohonona moonelo ni muupuwelo wooloka wa muKristau, nave pooti omwiiriha opaka itthu Yehova oninyokha awe. Tivonto Paulo oniloponle oriki: “Mwahokolowele ankhili n’ixariya: muhiyé itampi”.—1 aKor. 15:33, 34. w20.12 9 itti. 3, 5-6

Eversiikulu ela, ennooniherya moota Yehova otthokinhe awe emusi awe ya wiirimu ni valaponi. Okhulupale onihela muhina itthu piili: Ohoolela ni okohiwa ni Yehova. Musuweleke wira Yehova tori muhooleli muulupalexa, maana okhulupale awe ori vasuluxa. Nave oopaka mareheryo a okhulupale ni ohaavaha atthu akina okhulupale. Hata vari siiso, owo oniphavela wira atthu awo aavanhe awe okhulupale arumeeleke mwa enamuna yooloka. (aRom. 14:10; aEef. 3:14, 15) Yehova oomuthanla Yesu wira okhale mukhulupale a muloko, masi Yesu onookohiwa ni Yehova voohimya sa moota onithokorerya awe. (1 aKor. 15:27) Nave Yehova ohaavaha alopwana oothela wira akhale ahooleli a axaaraya ni anaaya. Mulopwana onrowa okhala sai muhooleli ooloka a etthoko? Wanipacerya owo ohaana osuwela oratteene ele Yehova oniphavela awe wira opakeke. Nave, owo ohaana osuwela nthowa naya Yehova opanke awe malamulo awo a ohoolela ni moota okhanle awe ootthara ntakiheryo na Yehova ni Yesu. Xeeni vari aya vooloka mulopwana osuwela itthu iyo sotheene? Mwaha woowi, Yehova ohaavaha alopwana okhulupale vatthokoni vaya ni oniphavela wira arumeeleke saana okhulupale aya.—Luka 12:48b. w21.02 2 itti. 1-3

Masi, muhiliyale wira sookhala itthu Yehova onithanla awe oliyala nnaamwi orina ene muupuwelo woomalela. Mwa ntakiheryo, akhala wira ninnittharuwa opaka itthu soohiloka, Yehova onninlevelela ni onniliyala itampi sotheene nipanke ahu. (Esal. 25:7; 130:3, 4) Tthiri ti vooloka otthara ntakiheryo na Yehova. Akhala wira mutthu ooniirela etthu yoohiloka aahiiso ooniwereiha murima onattharuwa, nihaana omulevelela ni oliyala etthu oniirenle awe. (Math. 6:14; Luka 17:3, 4) Moohaanyiherya, oramattha aahiiso ottoopare yoovaha ya vameekhaaya. Nnimooniherya wira ninnixukhurela yoovaha eyo akhala wira nnoorumeela ottoopare ahu wira ninvuwihe Ole onivanhe. Atthu akina aathanla orumeela oramattha wala ottoopare aya mwa enamuna yoohiloka vaavo anithanla aya mmensaya ele eri yooloka ni yoohiloka. Okhala wira nipattuxiwe ni Yehova, vannooneya wira malamulo ni malakiheryo a Yehova tooloka ovikana awihu. (aRom. 12:1, 2) Vaavo nniiwelela ahu malamulo ni malakiheryo a Yehova, ninnikhalana murettele. (Yes. 48:18) Nave ninnikhalana yoolukama yooloka mookumini mwahu, vaavo nninvuwiha ahu Mpattuxa ahu, nto vaavo nimpaka ahu eyo ninnimuhakalaliha vanceene.—Mir. 27:11. w20.05 23-24 itti. 13-14

Olelo-va, ninrowa wuncererya sai waaphenta wahu anna ni arokora? Nihaana wiimananiha waasuwela oratteene anna ni arokora. Niira siiso, vanoonikhweela osuwela mikhalelo saya ni waaphenta vanceene. Nave nnoowerya waapaka apatthani anna ni arokora oowuuluvala, amiravo ni a ilapo sikina. Muhiliyale wira Yonathani aahikhalana iyaakha 30 onvikana Davidi. Masi hata vari siiso, awo yaahikhalana waataana ni ompatthani woolipa mukina ni mukhwaawe. Nto niireke ookhala munna aahiiso murokora mmulokoni mwanyu oowuuluvala wala mmiravo aareerela okhala mpatthani anyu? Akhala wira nyuwo munoopaka eyo, munimooniherya wira ‘munnaaphenta anna a olumwenku wotheene’. (1 Ped. 2:17) Niireke waaphenta anna ni arokora ontaphulela wira anna otheene a mmulokoni anrowa okhala apatthani ahu? Ohimya ekeekhai, nnaari. Maana hiyo pooti okhala ootaphuwa ni atthu akina ni okhalana waataana woolipa ni atthu awo mwaha woowi sookhala itthu sinlikana ahu. Mwa ntakiheryo, arummwa otheene yaari “apatthani” a Yesu. Masi hata vaari siiso, Yesu aanimphenta mwa enamuna ya vameekhaaya murummwa Yohani. (Yoh. 13:23; 15:15; 20:2) Nnaamwi vaari siiso, Yesu khahiyo aarina nthalu, niire so, khahiyo aatepa onvaha efaita Yohani waavikana arummwa awe akina.—Mar. 10:35-40. w21.01 23 itti. 12-13

Murummwa Paulo khaalaleerya Amalapo a wAthena mwa enamuna emosaru aalaleerya awe aYuda musinagoga. Owo aaniweha oratteene itthu saamurukurenrye ni aahoona soolema sa etiini sa atthu ale. (Mit. 17:23) Moottharelana, Paulo aaniphavelasa enamuna yaavarihana ni okokhorela wa atthu ale ni ekeekhai ya Soolempwa. Paulo aaniimananiha olokiherya enamuna aalaleerya awe moovarihana ni atthu aalavulana awe. Owo aahaaleela atthu a wAthena wira muhupi aalaleya awe waakhuma wa “Muluku òhisuweliwa”, yoowo yaimananiha aya omukokhorela. Nnaamwi Amalapo yahaasuwela soolempwa, Paulo khaahiyale waalaleerya. Ohiya-vo, owo aathokorerya ntoko mihokorokho soottokottha wira sihemphweke. Eyo yaahimwiiriha Paulo waalaleerya ihapari sooreera moovarihana ni makhalelo aya. Nimutakihaka Paulo, nihaana okhala atthu oowehaweha. Nweheke itthu sinooniherya sookupali sa atthu a muttetthe anyu. Mwa ntakiheryo, niireke sookhala ilatarato sa etiini vate vawe wala mukaaroni mwawe? Niireke nsina nawe, ikuwo sawe, enamuna ya wiitthokiha aahiiso enamuna onilavula awe enooniherya wira ookhalana etiini? w20.04 9-10 itti. 7-8