Outubro

Namusuwela oratteene Yesu, nnoowerya otakiha muupuwelo awe ni enamuna aapaka awe itthu. Vaavo nintepa ahu omusuwela ni otakiha enamuna Yesu uupuwela awe, ninrowa otepaka okhala apatthani awe. Ninrowa omutakiha sai Yesu? Nkahaya nwehe ntakiheryo nimosa. Yesu aahiixuttiha ikwaha sinceene voohimya sa waakhaliherya atthu akina ohiya wiisiveliha mmensihu. (Math. 20:28; aRom. 15:1-3) Okhala wira aahikhalana muupuwelo owo, Yesu anaakhaliherya atthu akina ni aari oolevelela. Owo khahiyo aari mutthu oowaakuva oveeheya aahiiso onanariwa vaavo atthu akina yaamulavula aya moohiloka. (Yoh. 1:46, 47) Nave kheemererya wira itthu soohiloka atthu akina yaapanke aya khalai simwiirihe ohaathokorerya saana. (1 Tim. 1:12-14) Yesu aahimmye so: “Atthu othene anosuwela wira mwá awixutti aka, mwaphentanaka mukina ni mukhw’awe”. (Yoh. 13:35) Tthiri ti vooloka nyuwo wiikoha so: “Kiireke kinniimananiha okhala ni murettele vamosa ni anna ni arokora kittharaka ntakiheryo na Yesu?” w20.04 24 etti. 11

Hata nikhalaka olumwenku ola woosareya atthu aniramusa ni oveeha nsina na Yehova, nyuwo mookhalana eparakha yoohimya ekeekhai wira Yehova toowaarya, a xariya, tooloka ni toophenta. Moohaanyiherya, muhaana wooniherya wira munnikhaliherya olamulela wa Yehova. Munoowerya opaka eyo, mwaakhaliheryaka atthu akina woona wira enamuna Yehova onilamulela awe ti ya xariya ni Yehova paahi tonrowa oruuha murettele ni ohakalala wekeekhai valaponi. (Esal. 37:9, 37; 146:5, 6, 10) Vaavo ninwiixuttiha ahu atthu akina ikeekhai sa mBiibiliyani, hiyo ninnittittimiherya okhulupale wa Muluku, niire so, ehakhi ya Yehova olamulela olumwenku wotheene, wiirimu ni valaponi. Masi, nnaamwi vari ene vooloka owiixuttiha atthu malamulo a Muluku, yoolakela ahu yuulupale waakhaliherya atthu omphenta Yehova Tiithi ihu ni malamulo awe. Nto okathi munaasomiha anyu atthu Biibiliya, muttittimiheryeke mikhalelo sookuxa murima sa Yehova. Nave nwooniheryeke omutthu wa Yehova ni ele nsina nawe nintaphulela aya. (Yes. 63:7) Akhala wira nnoowiixuttiha mwa enamuna eyo, nnimwaakhaliherya atthu omphenta Yehova. Nto eyo enoowiiriha omuroromela ni omwiiwelela. w20.06 6 etti. 16; 7 etti. 19

Oramattha aahiiso ottoopare wa apinaatamu ti wootikiniha vanceene. Okathi mwaari anyu mmirimani mwa amaminyu, oramattha anyu waaninnuwa moovarihana ntoko opakiwe awe ni khula minuutu saanipakeya iseelula sinceene sa mmuru! Anamatokosa anihimya wira, oramattha wala ottoopare wa mutthu muulupale wookhalana ibilyau 100 sa iseelula sa vameekhaaya siniihaniwa neurônios suuraanyiwa khukhala nipuro nimosa paahi onalemela 1.5 kg eniihaniwa ottoopare. Moota ottoopare onivara awe muteko mwa enamuna yootikiniha. Khula nuulumo munilavula anyu, oramattha anyu ohaana ovarihana ni mitika sinivikana 100 seiyo siri vanlumini vanyu, vammilo, iyano, manyakela ni epeeto. Wira moolumo anyu yiiwanyeyeke saana, mitika iyo sotheene sihaana ovara saana. Eliivuru emosa yaakumiheriwe 2019 yaahooniherya wira mwaana oyariwe niinaano onniwerya osuwela khula nuulumo. Eliivuru ele, ennilipiherya ele anamatokosa anikupali aya, eyo piiyo, khula mutthu oniyariwa oweryaka osuwela ni wiixutta mattaava oovirikana. Tthiri eyo enooniherya wira, olavula yoovaha ya Yehova. w20.05 22-23 itti. 8-9

Abrahamu aahikhalana makhalelo ooloka epooma ya wUri. Hata vaari siiso owo aahikhuma. Mwaha wa xeeni? Mwaha woowi owo “aanilipelela epooma yaarina alisenso eekeekhai”. (aHeeb. 11:8-10, 16) Epooma Abrahamu aawehererya awe, Omwene wa Muluku. Nto Omwene owo onilamuleliwa ni Yesu vamosa ni maKristau oothanliwa 144,000. Nave murummwa Paulo aahihimya wira Omwene owo “muttetthe wa Muluku mukumi, oYerusalemu wa wirimu”. (aHeeb. 12:22; Wiis. 5:8-10; 14:1) Yesu aahaaleela awiixutti awe ovekela Omwene owo ni wira orwe opake yootthuna ya Muluku valaponi ntoko wiirimu. (Math. 6:10) Niireke Abrahamu aanisuwela itthu sotheene sa moota Omwene wa Muluku waarowa aya otthokihiwa? Nnaari. Maana mwa iyaakha sinceene, itthu iyo sotheene sa Omwene saari “esiri yaipithihiwe”. (aEef. 1:8-10; aKol. 1:26, 27) Masi Abrahamu aanisuwela wira osuulu awe mukina waarowa okhala mamwene. Yehova aahimuleiherya eyo Abrahamu.—Maph. 17:1, 2, 6. w20.08 2-3 itti. 2-4

Nihaana osyaka soowiixuttiha sa anammwareya. Okhuma okathi waapakiwe aya muloko wa eKristau, Diabo onniimananiha vanceene wira ohonone waamini wa arumeyi oororomeleya a Muluku. Nto nihaana osuwela itthu sekeekhai ni itthu sowoothiwa. Awanani ahu pooti orumeela interneti wala redes sociais wira ahonone omwaamini wahu Yehova ni waaphenta wahu anna ni arokora. Muhiliyale wira Satana tonikumiherya itthu iyo sotheene, nto muhaana okhootta! (1 Yoh. 4:1, 6; Wiis. 12:9) Naaphavelaka oxintta soweeha sa Satana, nihaana olipiha omwaamini wahu Yesu ni okupali enamuna Yehova onimurumeela awe Yesu wira opake yootthuna awe. Nave nihaana okupali enamuna onirumeela awe olelo-va wira eettihe mutthenkeso awe. (Math. 24:45-47) Nnoolipiha waamini wahu nisomaka Nuulumo na Muluku khula nihiku. Niira siiso, waamini wahu onrowa okhalaka ntoko mwiri woolipa, yoowo orina mitathaari soowiixerya. Murummwa Paulo aahaaleela maKristau a muloko wa oKolosi etthu yaalikana ni moolumo a yoolepa ya olelo. w20.07 23-24 itti. 11-12

Okhala wira na anatampi, otheene ahu ninnaakuvela waaphukela atthu akina moovarihana ni ele nnoona ahu. (Yoh. 7:24) Khivaniweryaneya omusuwela oratteene mutthu moovarihana ni ele ninweha ahu paahi. Mwa ntakiheryo, nkahaya mmuupuwele meediku oosuwela vanceene ni okhumme khalai ovara muteko. Niireke onoomusuwela muretta mwaha wa onweha paahi? Nnaari. Owo ohaana onwiriyana oratteene vaavo onilavula awe makhalelo a okumi awe, moonelo ni muupuwelo awe, ni itthu sinooniherya eretta eninwereya. Woonasa wene, meediku owo pooti ompaka raio-X wira owehe mwerutthuni mwa muretta owo. Akhala wira meediku khonipaka eyo, pooti onvaha mirette sihinivarihana ni eretta eninwereya. Mwa enamuna emosaru, khaninwerya waasuwela anna ni arokora moovarihana ni ele ninweha ahu paahi aahiiso makhalelo aya oota. Nihaana wiimananiha oweha omutthu aya ni mikhalelo saya. Ekeekhai wira khaninwerya osoma mirima sa atthu akina. Masi nihaana wiimananiha omutakiha Yehova. Moota xeeni? Owo onnaawiriyana oratteene. Nave onnihela muhina makhalelo aya ni itthu sinaakhumelela. Nave-tho onniwoonela othunku. w20.04 14-15 itti. 1-3

Nihaana okhala atthu oowiiyeviha mwaha woowi mutthu oowiixinnuwiha khorina “miruku”. Mutthu oowiixinnuwiha omusivela onyakulihana ni onoona wira ookhalana efaita vanceene. Okhala wene, muupuwelo ni enamuna onipaka awe itthu ennimunyoonyiha ni onnaanyoonyiha atthu akina. Akhala wira mutthu owo khonituruka moonelo awe, Satana onoottiyela muupuwelo wa mutthu owo. (2 aKor. 4:4; 11:3) Mutthu oowiiyeviha ookhalana miruku. Owo onniithokorerya mwa enamuna yooloka ni onnisuwela wira atthu akina taalupale mwa inamuna soovirikana. (aFil. 2:3) Nave onnisuwela wira “Muluku onnakhotta atthu òwisona, masi onnavaha eparakha atthu òwiyeviha”. (1 Ped. 5:5) Mutthu oowiiyeviha, khoniphavela okhala nwanani a Yehova. Wira nihihiye okhala atthu oowiiyeviha, nihaana ovarihela muteko miruku sa mBiibiliyani sinihimya wira ‘murule omutthu wa khalai ni miteko saya, nware omutthu wa nanano’. Nave nihaana osoma ntakiheryo Yesu onivanhe awe ni wiimananiha otthara oratteene.—aKol. 3:9, 10; 1 Ped. 2:21. w20.07 7 itti. 16-17

Eparakha yuulupale wiirela mpantta muloko wa Yehova. Tthiri hiyo ninkhala eparayiisu ya omunepani erina atthu a murettele ni oohakalala. Masi, tuuvi ori opuro anyu mmulokoni? Murummwa Paulo aahilikanyiha muloko ni erutthu ya apinaatamu. Nave aahaalikanyiha atthu a mmulokoni ni mipantta sa erutthu. (aRom. 12:4-8; 1 aKor. 12:12-27; aEef. 4:16) Etthu nniixutta ahu ni nlikanyiho na Paulo tiila: Khula mmosa a hiyo ookhalana opuro wa faita mweemusini mwa Yehova. Paulo aapacerinhe nlikanyiho nawe ohimyaka wira: “Mwerutthuni emosá hiyo nokhalana itthu sinjene: khula emosá mwa itthu iya ennivara muteko aya. Siso hiyo, nri atthu anjene, ninnikhala erutthu emosá mwa Kristu, ninnùpana mutthu ni mukhw’awe ntoko itthu s’erutthu”. (aRom. 12:4, 5) Paulo aaphavela oniixuttiha exeeni? Aaphavela oniixuttiha wira nnaamwi otheene ahu nrina ene miteko soovirikana mmulokoni, otheene ahu nookhalana efaita yinceene. w20.08 20 itti. 1-2; 21 etti. 4

Ankhi nyuwo anamuyari, munrowa otthara sai ntakiheryo na wiiyeviha na Yehova? Vaareerelaka mwaakoheke aniinyu moota woopaka itthu sikina vatthokoni vanyu. Nto akhala wira moonelo aya ti wooloka, mpakeke etthu ntoko ahimmye aya. Nave-tho Yehova onnivaha ntakiheryo na opixa murima, hata ale yaamurumeela yaakoha mwaha wa soothanla sawe. Owo aahinwiriyana oratteene vaavo Abrahamu aahimya awe wira vaarowa okhala voohixariya Yehova opwetexa mittetthe sa oSodoma ni oGomora. (Maph. 18:22-33) Niireke munnuupuwela moota Yehova aamuthokorenrye awe mwaarawe Abrahamu iihaniwa Sara? Sara aahitheya vaavo Yehova aahimmye awe wira aamurupala nnaamwi uuluvanle. Hata vaari siiso, Yehova khoonale wira aahiveehiwa ni khaananarinwe. (Maph. 18:10-14) Ohiya-vo, Yehova aahimuthokorerya Sara mwa nttittimiho. Niireke nyuwo mwa namuyari wala mutokweene? Akhala wira ti siiso, munrowa otthara sai ntakiheryo na Yehova? Nkahaya muupuwele etthu mwaarowa anyu opaka akhala wira mwaninyu wala anna a mmulokoni annookohani etthu ewiirinheni opaka yoothanla. Niireke munrowa waakuvela wiixaakiha? Wala munrowa wiimananiha osuwela etthu emwiirinhe opaka eyo? Vaavo ale arina okhulupale anitakiha aya wiiyeviha wa Yehova, imusi ni anna a mmulokoni annittottela mureerelo. w20.08 10 itti. 7-9

Pooti wira wanipacerya, okathi niixutta ahu ekeekhai vaaninikhweela weemererya nikhaliheryo na atthu akina, maana naithokorerya ntoko anamwane momunepani ni naaphavela wiixuttihiwa itthu sinceene. (1 aKor. 3:1, 2) Masi ankhi olelo-va? Niireke iyaakha sotheene nivirinhe ahu nimurumeelaka Yehova ni ninsuwela ahu itthu sinceene, ninneemererya okhaliheriwa ni atthu akina? Pooti wira vano onninivila opaka eyo, otepexa wene akhala wira ninkhaliheriwa ni mutthu iixuntte ekeekhai niinaano. Masi muhiliyale wira Yehova onnaarumeela anna ni arokora wira anivahe ikuru nimphavela ahu. (aRom. 1:11, 12) Naaphavelaka wira Yehova onivahe ikuru, nihikhala-khale niliyalaka wira nihaana okhaliheriwa ni anna ni arokora mmulokoni. Okhumela wahu saana khonlipa ni ikuru sahu, osoma wahu, musurukhu nrina ahu wala okhulupale nrina ahu. Masi okhumela saana mookumini onlipa ni wiiyeviha ni omuroromela Yehova ni murima wotheene. Nihaana orowa ohoolo (1) nimuroromelaka Yehova, (2) niixuttaka matakiheryo a atthu aniromoliwa mBiibiliyani ni (3) weemererya okhaliheriwa ni atthu akina. Mwiira siiso, hata muupuwelaka wira khamulimpe, Yehova onimookhaliheryani okhala oolipa! w20.07 14 etti. 2; 19 itti. 18-19

Okathi mukina vannivila opixa murima vaavo nnaalaleerya ahu amusi ahu ahikhanle Anamoona a Yehova. Malakiheryo ari Musuweli 3:1,  7 anoonikhaliherya vanceene. Awo ani: “Itthu sothene molumwenkuni-mu sokhalana okathi aya . . . okathi w’omàla n’ukathi w’ olavula”. Ikwaha sikina ti vooloka omaala ni ohiya wira mweettelo ahu okhaleke tonlavula. Nave-tho ti vooloka ottottela mureerelo khula eparakha ninkhalana ahu wira naaleele ekeekhai. (1 Ped. 3:1, 2) Ti vooloka oluttuweliwa waalaleerya, owiixuttiha ni waapixerya murima atthu ootheene waahela muhina amusi ahu. Matakiheryo a arumeyi oororomeleya a Muluku a khalai ni a mahiku ahu ala, anniniixuttiha opixa murima. Habakuki aanilipelela woona otakhala omanle ene, masi aahooniherya wira aanipixa murima vaavo aahimmye awe so: “Kinowehererya nipuro n’olipelela”. (Hab. 2:1) Murummwa Paulo aaniphavela omaliha muteko awe woolaleerya, masi owo khaahiyale ‘olaleya [moomalela] ehapari yorera’ moopixa murima.—Mit. 20:24. w20.09 11-12 itti. 12-14

Nuumala okhulupale wa Yehova, mutthu ori nipuro na nenli ti Yesu. Hata vari siiso, owo khonitepa wiisuupuwela ovikana vanireerela aya. Amutakihaka Yesu, wiiyeviha wa arumeyi a Yehova onnikhaliherya muloko ophentana ni ophenta iwo onnisuwanyeiha wira mutthenkeso wa Muluku. (Luka 9:48; Yoh. 13:35) Pooti wira muloko anyu sookhala mixankiho munoona anyu wira axitokweene khaniphuka saana. Nto muhaana opaka exeeni? Ohiya wiixinliha, mwiiyeviheke ni mwaakhaliheryeke ale annihoolela. (aHeeb. 13:17) Ti vooloka wuupuwelela saana makoho ala: ‘Kiireke mixankiho kinoona aka ti suulupale sinreerela aya ophukiwa mowaakuveya? Niireke ola okathi wooreerela ophuka mixankiho iyo? Kiireke kivahiwe muritti woophuka mixankiho iyo? Kiireke kinnikumiherya murettele mmulokoni wala kiniphavela wiivuwiha?’ Yehova onnivaha efaita yinceene wiiyeviha ovikana itthu ninsuwela ahu, nave wiiraana wookhalana efaita yinceene ovikana ovara saana miteko. Tivonto, nihaana wiimananiha omurumeela Yehova moowiiyeviha. Niira siiso, nnookumiherya wiiraana mmulokoni.—aEef. 4:2, 3. w20.07 4-5 itti. 9-11

Athiyana akina oororomeleya, yaanimukhaliherya Yesu ‘anvahaka mihakhu saya’, nto Yesu aanixukhurela vanceene. (Luka 8:1-3) Yesu aahiwiixuttiha ikeekhai sinceene sa omunepani. Mwa ntakiheryo, Yesu aahaaleela wira aamwiiviwa ni aarowa ohihimuxiwa. (Luka 24:5-8) Ntoko siisaale aakhalihenrye awe arummwa awe wira awerye ovilela mixankiho saarowa waakhumelela muhoolo, Yesu aahaakhaliherya athiyana awo. (Mar. 9:30-32; 10:32-34) Moone wira okathi Yesu aatthukiwe awe arummwa otheene yaahitthyawa, masi okathi aakhwa awe vamwirini va nihaaxeryo, athiyana akina yaamukhaliherya yaari vaavo. (Math. 26:56; Mar. 15:40, 41) Atthu yaapacenrye onweha Yesu nuumala ohihimuxiwa yaari athiyana oororomeleya. Nave Yesu aahaaruma athiyana ale orowa waaleela arummwa voohimya sa ohihimuxiwa wawe. (Math. 28:5, 9, 10) Ohiya-vo, vanikhala ntoko wira nihiku na Pentekoositi a 33, nuumala Kristu orwa, yaahikhala athiyana vaavo waamwarexiwe aya munepa wootteela. Ootheene ale yaahikhalana eparakha ya vameekhaaya ya olavula mattaava a ilapo sikina. Nto eyo enooniherya wira athiyana ale yaahiirela mpantta muteko woolaleya “miteko sulupale sa Muluku”.—Mit. 1:14; 2:2-4, 11. w20.09 23 itti. 11-12

Muteko wowaapaka awiixutti wookhalana efaita yinceene, mwaha woowi onnoopola ikumi sa atthu! Ninsuwela sai eyo? Ninnisuwela mwaha woowi okathi Yesu aavanhe awe yooruma eri Matheyo 28:19, 20, owo aahimmye so: “Murowé, mwawixuttiheke atthu . . . , mwabatizaka”. Masi ninsuwela sai wira opatisiwa wookhalana efaita yinceene? Wookhalana efaita, mwaha woowi naaphavelaka woopowa nihaana opatisiwa. Ale aniivahererya wira apatisiwe, ahaana waamini wira anoophwanya okumi woohimala, mwaha woowi Yesu ohookhwa ni oohihimuxiwa. Eyo ti etthu yaamwiirinhe murummwa Pedru waaleela maKristau akhwaawe wira: “Obatizo onniwòpolani mwaha w’ohihimuwa wa Yesu Kristu mokhwani”. (1 Ped. 3:21) Nto eyo enooniherya wira, vaavo mutthu onipatisiwa awe onnikhalana nlipelelo na okhalana okumi woohimala. Wira naapake awiixutti nihaana osuwela oratteene owiixuttiha atthu. (2 Tim. 4:1, 2) Mwaha wa xeeni? Yesu onirumme wira: “Murowé, mwawixuttiheke atthu”. Murummwa Paulo ohimmye wira nihaana ‘okhalana murima wovilela’ naavaraka muteko owo. Maana “mwira siso, munimòpowa mmansinyu vamosá n’ale aniwiwani”. w20.10 14 itti. 1-2

Murummwa Pedru aanisiveliwa vanceene waatotha atthu. Okhaliheriwaka ni Yehova, Pedru aanisuwela ovara oratteene muteko owo. (Mit. 2:14, 41) Hiyo ninnilaleerya mwaha woowi ninnimphenta Yehova, eyo ti etthu yuulupale enniiriha ovara muteko owo. Omphenta wahu Yehova onoonikhaliherya hata nuupuwelaka wira khaninwerya olaleerya. Okathi aamulattunle awe Pedru wira okhale mutothi aatthu, Yesu aahimuleela Pedru wira: “Muhòvé!” (Luka 5:8-11) Etthu yaamwiiriha Pedru woova, khahiyo saari itthu saarowa okhumelela nuumala okhala mutthareli a Yesu. Masi owo uupuwela wira khaaphwanela okhala mutthareli a Yesu. Maana aahimoona Yesu opakaka mwiiriirya wa ototha ihopa, nto oona wira khaaphwanelela ovara vamosa ni Yesu. Ntoko Pedru, woonasa wene nyuwo munnoova mwaha woowi munuupuwela itthu sotheene sinihela muhina okhala mutthareli a Yesu. Akhala wira ti siiso, mulipihe omphenta wanyu Yehova, Yesu ni atthu akina. Opaka eyo enimookhaliheryani weemererya nlattulo na Yesu na okhala mutothi aatthu.—Math. 22:37, 39; Yoh. 14:15 w20.09 3 itti. 4-5

Hiyo ninnihakalala orumeela okathi ahu, ikuru sahu ni mireerelo sahu wira naphwanye atthu ale arina murima wooloka wira yaakhele okumi woohimala. (Mit. 13:48) Vaavo nimpaka ahu eyo ninnitthara ntakiheryo na Yesu. Owo aahimmye so: “Yoly’aka miyo, wettela otthuna wawe ole okirumme n’umaliherya miteko sawe”. (Yoh. 4:34; 17:4) Tthiri hiyo ninniphavela opaka eyo. Maana yoolakela ahu omaliha muteko Yesu onirummye awe. (Yoh. 20:21) Ohiya-vo, nimphavela wira otheene ahu waahela muhina ale ahiyale olaleerya nivikaniheke ovara muteko owo hoothe. (Math. 24:13) Ekeekhai wira muteko Yesu onirummye awe wookhalana mixankiho sawe. Masi khaninvara mekhihu, maana Yesu oonileiherya wira onrowa okhalaka ni hiyo. Vaavo ninvara ahu yoothanleliwa ahu ya waapaka awiixutti, “ninvara vamosá . . . [ni] Muluku” naataanaka ni Kristu. (1 aKor. 3:9; 2 aKor. 2:17) Eyo enninikupaliha wira nnoowerya omaliha muteko ola. Tthiri eparakha yuulupale ovara muteko ola ni waakhaliherya atthu akina ovara ni hiyo!—aFil. 4:13. w20.11 7 itti. 19-20

Soothanla anamuyari anipaka aya pooti waakhaliherya anaaya aahiiso nnaari. Akhala wira anamuyari anoopaka soothanla soohiloka, eyo pooti waakumiherya mixankiho anaaya. Masi akhala wira anamuyari anoopaka soothanla sooloka animwaakhaliherya anaaya okhalana okumi woohakalaliha. Ekeekhai wira anamwane nave, ahaana opaka soothanla sooloka. Muhiliyale wira yoothanla yootepexa oloka mutthu okhanle awe oopaka ori omurumeela Tiithi ihu oophenta a wiirimu, Yehova. (Esal. 73:28) Anamuyari a Yesu, Yosefe ni Maria yaaniimananiha vanceene waakhaliherya anaaya omurumeela Yehova. Nto soothanla yaapanke aya saanooniherya wira yaanivaha efaita yinceene omurumeela Yehova. (Luka 2:40, 41, 52) Nave Yesu aahipaka soothanla sooloka saamukhalihenrye opaka yootthuna ya Yehova. (Math. 4:1-10) Yesu aahinnuwa khukhala mutthu ooreera murima, oororomeleya ni oolipa murima. Anamuyari otheene animphenta Yehova yaamuhakalala okhalana mwaana ntoko Yesu. w20.10 26 itti. 1-2

Nkahaya muupuwele matakiheryo ala mararu. Murokora oowuuluvala onuupuwela itthu sooloka saamwiiranenle khalai. Nnaamwi okumi awe ori ene wooxankiha, owo onniimananiha opaka itthu mmutthenkesoni mwa Yehova mpakha vaniwerya awe. (1 aKor. 15:58) Khula nihiku, owo onnuupuwela ori ene mparayiisu ni amusi awe vamosa ni apatthani awe. Murokora mukina onnuupuwela moota mutthu mmosa a mmulokoni aamunyoonyinhe awe. Masi owo onnithanla ohipweha mathowa vamurimani. (aKol. 3:13) Vano munna mmosa onnuupuwela itthu soohiloka aapanke awe khalai. Masi owo onnipaka sotheene oniwerya awe wira ohihiye ororomeleya wa Yehova. (Esal. 51:12) Itthu xeeni sinlikana anna ala araru arina aya? Otheene aya annuupuwelela itthu saawiiranenle khalai. Masi awo khanimakela wuupuwela itthu iyo sivinre. Masi ‘maitho aya anniweha oholo itthu soloka’. Xeeni eyo eri aya yooloka? Mutthu onimakela oweha ottuli eettaka, owo khoniwerya weetta oratteene ni okela ohoolo. Mwa enamuna emosaru khaninwerya omurumeela Yehova moomalela akhala wira nimmakela wuupuwela itthu sa khalai.—Luka 9:62. w20.11 24 itti. 1-3

Okathi aari awe ohoolo wa nakhotto ootupa ni oowerya Goliyathi, Davidi aakhala ntoko oohilipa. Ohiya-vo, Goliyathi aari nakhotto muulupale, ooneneva, oorakama, aarina ikaruma sotheene sa ekhotto ni iixuttihiwe oratteene owana ekhotto. Masi Davidi aari mmiravo ahaasuwela owana ekhotto ni ahaatonko orowa okhottoni. Hata vari siiso, Davidi aanimuroromela ni murima wotheene Yehova, nto aahiwerya omuxintta nwanani awe ole ootupa. (1 Sam. 17:41-45, 50) Davidi aahikhalana muxankiho mukina waarowa omwiiriha wuupuwelaka wira aari ootteettheya wala oohilipa. Owo aahimurumeela moororomeleya mwene Sawuli, yoowo aathanliwe ni Yehova. Wanipacerya, mwene Sawuli aanimuttittimiha Davidi. Muhoolo mwaya, wiixinnuwiha waahimwiiriha Sawuli omukhalela nrima Davidi. Nto Sawuli aahipacerya omuhasula Davidi ni aaphavela omwiiva. (1 Sam. 18:6-9, 29; 19:9-11) Hata aathokoreriwe voohixariya ni Sawuli, Davidi khaahiyale omuttittimiha, mwaha woowi Sawuli aari mwene aathanliwe ni Yehova. (1 Sam. 24:6) Davidi aanikupali wira Yehova aamunvaha ikuru wira ovilele muxankiho ole.—Esal. 18:1, masu oopacerya. w20.07 17 itti. 11-13

Iprofesia sinceene sinilavula sa mwene a onorte ni mwene a osul sihiiraneya. Tthiri ninnikupali wira, mpantta mukina wa eprofesia ela onimwiiraneya. Wira niiwexexe eprofesia ya Daniyeli ekapiitulu 11, nihaana osuwela itthu piili. Yoopacerya: Eprofesia ela, enaalavula mamwene manli aahiiso anamalamulela yaawo yaalupattha atthu a Muluku. Ekeekhai wira okhuma khalai, atthu a Muluku yaari vakhaani naalikanyiha ni atthu a olumwenku wotheene. Hata vari siiso, awo yaamakela olupatthiwa ni anamalamulela. Mwaha wa xeeni? Mwaha woowi, Satana ni mutthenkeso awe arina yoolakela emosaru, yoolakela ene tiila: Waamalamaliha atthu otheene animurumeela Yehova ni Yesu. (Maph. 3:15; Wiis. 11:7; 12:17) Ya nenli, eprofesia ya Daniyeli ehaana ovarihana ni iprofesia sikina sa Nuulumo na Muluku. Tthiri, nnoowerya wiiwexexa oratteene eprofesia ya Daniyeli akhala wira nnoolikanyiha ni soolepa sikina sa mBiibiliyani. w20.05 2 itti. 1-2

Atthu anceene olelo-va aakhalana moonelo woovirikana voohimya sa okumi nuumala mutthu okhwa. Masi, Biibiliya oniixuttiha exeeni? Nuumala mutthu okhwa erutthu awe ennintta. Masi ole opattunxe olumwenku, owo khahiyo muxankiho. Maana Muluku pooti omuhihimuxa mutthu okhwiiye ni onvaha erutthu yootepexa oloka. (Maph. 1:1; 2:7) Murummwa Paulo aahipaka nlikanyiho wira ooniherye wira khivanitthuneya Muluku omuhihimuxa mutthu ni erutthu aarina awe ohinatthi okhwa. Murummwa Paulo aahirumeela nlikanyiho na “epyó” enaaliwa aahiiso enuku ya mwiri. Musuweleke wira vaavo epyo wala enuku enaaliwa aya ennimela onakhumelela mwiri musya. Mwiri owo omenle onnivirikana vanceene ni enuku wala epyo ele yaaliwe. Paulo aahirumeela nlikanyiho nla ophavelaka wooniherya wira mutthu ole onrowa ohihimuxiwa, Muluku onrowa onvaha “erutthu ntoko sitthunnyawe”. Nave-tho Paulo aahimmye wira sookhala irutthu sa wiirimu ni irutthu sa valaponi. Moota xeeni? Valaponi sookhala irutthu sirina enama ni makhuva, masi wiirimu siri irutthu sa omunepani ntoko irutthu sa malaikha.—1 aKor. 15:36-41. w20.12 9-10 itti. 7-9

Otheene ahu ninniphavela okhala oomaaleleya ni okhalana murettele. Tthiri khuuvo mutthu oniphavela oxanka. Masi hata vari siiso, okathi mukina hiyo ninnixanka. Nto akina anniikoha ntoko Mwene Davidi aakohe ntoko enooniherya aya yoolepa ya olelo. Sookhala itthu sinceene, sinniiriha oxanka. Masi itthu sikina hiyo khaninwerya osyaka. Mwa ntakiheryo, khula mwaakha hiyo khaninwerya okhoottiherya wuncerereya epereso ya yoolya, ikuwo, ni opuro wookhala. Nave hiyo khaninwerya okasoopa aahiiso osuwela ikwaha sotheene ale anivarana ahu muteko aahiiso ale anisomana ahu oxikola anrowa aya oneehererya opaka itthu soohiloka wala orupihana woohiloka. Nave khaninwerya okhoottiherya wira sihiiraneye ikrime muttetthe ninkhala ahu. Mixankiho iyo sookhala mwaha woowi ninkhala olumwenku atthu anceene ahiniiwelela aya malakiheryo a mBiibiliyani. Satana yoowo ori muluku a olumwenku ola onnisuwela wira oxanka mwaha wa itthu sa valaponi onniwiiriha atthu akina ohiya omurumeela Yehova. (Math. 13:22; 1 Yoh. 5:19) Nto khanintikinihiwa woona olumwenku ola osareyale ene itthu sooxankiha! w21.01 2 itti. 1, 3

Murummwa Yohani oonitumererya wira nihaana osyaka waanyokha anna ni arokora. Akhala wira hiyo khanintthara miruku iyo, hiyo pooti opacerya weettela miruku sa Satana. (1 Yoh. 2:11) Eyo ti etthu yiiraneyale wanikisa wa eseekulu yoopacerya. Satana aahipaka sotheene aawerya awe wira anna ni arokora apaceryeke onyokhana ni okawanyeya. Okathi Yohani aalempe awe ikarta sawe, alopwana akina yaarina moonelo wa Satana yaahikela mmulokoni. Mmosa a alopwana awo aari Diotrefe yoowo aakumiherya okawanyeya mmulokoni. (3 Yoh. 9, 10) Diotrefe khaattittimiha axitokweene yeetteetta okathi ole, yaawo yaakhala nipuro na nikhuuru noolamulela na okathi ole. Nave Diotrefe aaniimananiha owoomola atthu otheene yaawaakhela vate vaya atthu yaale ahaaphavela awe. Tthiri itthu Diotrefe aapaka awe saari sootakhala! Olelo-va, Satana onniimananiha vanceene wira atthu a Muluku akhaleke ookawanyeya. Nto nihikhala-khale neemereryaka wira onyokhana oniirihe okawanyeya ni anna ni arokora. w21.01 11 etti. 14

Okathi wa Ekhotto Yoopacerya ya Olumwenku Wotheene, Alemanha ni Grã-Bretanha yaanaalupattha vanceene atthu a Muluku mwaha woowi yaanikhootta orowa okhottoni. Vano Ekuvernu ya wEstados Unidos yaahaatthukwela mukhatteya anna yaahoolela muteko woolaleerya. Olupatthiwa iwe, waahaakhwanyiherya eprofesia eri Wisupulula 11:7-10. Iyaakha sa 1930 otepexa wene okathi wa Ekhotto ya Nenli ya Olumwenku Wotheene, mwene a onorte aahaalupattha vanceene atthu a Muluku ohiwoonelaka othunku. Hitler ni ale yaamukhaliherya yaahikhoottiha muteko woolaleerya wa atthu a Muluku elapo ele. Anamoona a Yehova 1.500 yaahiiviwa ni imilyau sinceene yaahiroihiwa mapuro onivariwa muteko mookhanyereriwa. Eprofesia yaahimmye wira mwene a onorte “ononanariha empa ya Muluku, [ni] onokhottiherya oheliwa mukuttho”. Eyo yaahiiraneya vaavo Alemanha aakhoottinhe awe moomalela muteko woolaleerya. (Dan. 11:30b, 31a) Okathi ole, Hitler yoowo aari muhooleli a kuvernu, aahilapha wira aamwaamala-maliha atthu a Muluku wAlemanha. w20.05 6 itti. 12-13

Vaavo hiyo nimphentana ahu vanceene mukina ni mukhwaawe, hiyo khanniimananiha oxinttana ni atthu akina a mmulokoni. Muupuweleke wira Yonathani khaaphavela oxinttana ni Davidi ni khaamuthokorerya okhala nwanani awe. (1 Sam. 20:42) Otheene ahu nihaana otthara ntakiheryo nooloka Yonathani onivanhe awe. Nto muhaakhaleleke nrima ni muhiwooneke ntoko awanani anyu anna ni arokora anisuwela itthu sinceene woovikanani nyuwo. Ohiya-vo, “mwiiyeviheke, khula mutthu awooneleke vatthu akhwaawe ovikana mmensawe”. (aFil. 2:3) Musuweleke wira anna otheene a mmulokoni anoowerya opaka etthu wira akhaliherye muloko. Nto akhala wira nnimwiiyeviha nnoowerya oweha mikhalelo sooloka anna ni arokora arina aya ni nnoottottela mureerelo ntakiheryo naya na ororomeleya. (1 aKor. 12:21-25) Okathi nimphentana ahu mwekeekhai mukina ni mukhwaawe ninniwerya waamaliha ni waalipiha atthu a Muluku. Nave eyo ennooniherya wira naatthareli eekeekhai a Yesu ni enniwiiriha atthu akina ophavela wiirela mpantta okokhorela wekeekhai. Etthu yootepexa otthuneya ninninvuwiha Yehova, “Tiithi oomoriwa ikharari vanceene, ni Muluku onnimaaliha mwa mikhalelo sotheene”.—2 aKor. 1:3. w21.01 24 etti. 14; 25 etti. 16

Olelo-va, atthu akina khanaattittimiha Anamoona a Yehova ni anninruwana mwaha woowi anuupuwela wira na atthu oohisoma ni oohilipa. Mwaha wa xeeni? Mwaha woowi khanneemererya mweettelo woohiloka. Hiyo ninniimananiha okhala atthu oowiiyeviha, oomaala ni oowiiwelela. Masi atthu anceene olelo-va toowiixinnuwiha, oowiitthuna ni oohiiwelela. Nave hiyo khaninkhaliherya myaha sa epoliitika ni khaninrowa okhottoni. Hiyo na atthu oovirikana ni atthu a olumwenku ola, nto mwaha wa yeeyo, awo anuupuwela wira khanrina efaita. (aRom. 12:2) Hata atthu a mulaponi yuupuwelaka wira naatthu oohilipa, Yehova oonithanla wira nipakeke itthu suulupale. Aarumeelaka atthu awe, Yehova onnipaka ekampaanya ya olaleya ihapari sooreera olumwenku wotheene, yeeyo yahaatonko opakiwa okhuma vaavale apattuxiwe aya apinaatamu. Olelo-va, atthu a Muluku annipaka ni otaphulela irevista anikawa aya olumwenku wotheene ni annimurumeela Biibiliya wira yaakhaliherye atthu imilyau sinceene okhalana okumi wooloka. Yehova tonireerela ovuwihiwa mwaha wa itthu iyo sotheene atthu awe anipaka aya. w20.07 15 itti. 5-6

Yesu animwiiwelela Yehova. Nto niireke wiiwelela wawe wooniherya wira aari mulolo wala khaasuwela itthu sinceene? Nnaari. Mwaha woowi, enamuna Yesu iixuttiha awe ennooniherya wira ookhalana ankhili. (Yoh. 7:45, 46) Yehova aanisuwela wira Yesu onnisuwela ovara saana miteko. Tivonto aamweemerenrye awe ovara ni yena opattuxaka itthu sotheene siri wiirimu ni vathi. (Mir. 8:30; aHeeb. 1:2-4) Musuweleke wira nuumala Yehova omuhihimuxa Yesu onvaha “okhulupale wotheene wiirimu ni vathiva-va”. (Math. 28:18) Nnaamwi Yesu osuwelaka itthu sinceene, owo onnimuroromela Yehova ni onnitthara malakiheryo awe. Mwaha wa xeeni? Mwaha woowi Yesu onnimphenta Tiithi awe. Alopwana oothela ahaana wiixutta opaka eyo. Yehova khomurumme muthiyana omwiiwelela iyawe mwaha woowi onimoona ohikhalana efaita ntoko iyawe. Ninsuwela sai? Ninnisuwela eyo mwaha woowi Yehova ohaathanla alopwana ni athiyana wira yalamuleleke wiirimu ni Kristu. (aGal. 3:26-29) Okhala wira Yehova onvaha Mwanawe okhulupale, eyo enooniherya wira onnimuroromela ni murima wotheene. Mwa enamuna emosaru, mulopwana ankhili onninvaha okhulupale mwaarawe. w21.02 11 itti. 13-14

Biibiliya ori ntoko espeelyo, yeeyo ennikhaliherya oweha etthu ninreerela ahu olokiherya ni moota woolokiherya. (Yak. 1:23-25) Mwa ntakiheryo, nuumala omusoma Biibiliya, hiyo pooti woona moota nikhanle ahu oowiikasoopa, nto nikhaliheriwaka ni Yehova, hiyo nnimwiixutta moota nikhanle ahu okhala oomaala vaavo atthu akina annipaca aya aahiiso ninkhalana ahu mixankiho. Nave ninniwerya wuupuwela saana ni opaka soothanla sooloka. (Yak. 3:13) Tthiri ti vooloka omusuwela saana Biibiliya! Okathi mukina ninniixutta opaka itthu sooloka nuumala opaka itthu soohiloka sinikhumelela mixankiho. Masi enamuna yooloka ya okhalana ankhili ori wiixutta ni itthu sooloka ni soovonya sa atthu akina. Nto eyo ti etthu yaamwiirinhe Yakobo onitumererya oweha matakiheryo ari mBiibiliyani ntoko na Abrahamu, Rahabi, Yobi ni Eliya. (Yak. 2:21-26; 5:10, 11, 17, 18) Arumeyi awo oororomeleya a Yehova yaahiwerya ovilela mixankiho moohakalala hata saakhanle itthu saarowa owiiriha ohihakalala. Nto matakiheryo a ovilela waya annooniherya wira nikhaliheriwaka ni Yehova nnoowerya ovilela mixankiho. w21.02 29-30 itti. 12-13

Okathi eniirihiwa aya yoosoma ya Biibiliya, ole onimusomiha Biibiliya torina muritti woomukhaliherya naxikola awe wiiwexexa oratteene Nuulumo na Muluku. Vaavo munna wala murokora onoolattulaweni orowa wiiriha yoosoma awe ya Biibiliya, nyuwo munoomuhoola. Nto muritti anyu omukhaliherya paahi. (Mus. 4:9, 10) Etthu xeeni mukhanle anyu oopaka wira yoosoma eyo ekhumele saana? Mwiilokiheryeke wira mwiirihe yoosoma ya Biibiliya. Wanipacerya, munvekeleke ole onimusomiha Biibiliya wira ooleeleni itthu vakhaani sa naxikola owo. Nyuwo pooti omukoha so: Itthu xeeni munisuwela anyu sa naxikola anyu? Mwaha xeeni ninrowa ahu othokorerya? Tiivi eri yoolakela ya mpantta owo? Yookhala etthu kinreerela aka olavula, ohilavula opaka wala ohipaka okathi wa yoosoma? Etthu xeeni kinreerela aka opaka wira kimukhaliherye okela vahoolo? Ekeekhai wira ole onimusomiha Biibiliya khonrowa wooleelani isiiri sa naxikola awe. Masi itthu onrowa awe wooleelani sinimookhaliheryani vanceene. Misionaaria oniihaniwa Joy onihimya so: “Onnikisivela omulela itthu iyo murokora kinrowana aka olaleerya, maana kinnimukhaliherya omuthokorerya saana naxikola aka a Biibiliya ni woona moota okhanle awe ookhaliherya okathi wa yoosoma”. w21.03 9 itti. 5-6

Okathi mukina ninninyokhiwa mwaha woowi ninniiwelela malamulo a xariya a Muluku. Tthiri ele Muluku onihimya awe wira ti yooloka ni yoohiloka ti yoovirikana ni ele atthu a olumwenku ola anihimya aya okhala yooloka ni yoohiloka. Mwa ntakiheryo, atthu anceene olelo-va, annikhaliherya orupihana woohiloka weiwo waamwiirinhe Yehova opwetexa epooma ya oSodoma ni oGomora! (Yuda 7) Nto okhala wira hiyo ninkhaliherya malamulo a xariya a Muluku ni khaninkhaliherya itthu sootakhala, atthu anceene a olumwenku ola anniniveeha ni annoona okhala alolo! (1 Ped. 4:3, 4) Etthu xeeni enrowa onikhaliherya ovilela vaavo ninnyokhiwa ahu ni oruwaniwa? Nihaana olipiha omwaamini wahu Yehova wira onoonikhaliherya. Ntoko nikula noowiisaakihana, waamini wahu onnittipiha “mattheere a mooro a Mutakhali”. (aEef. 6:16) Masi nihaana opaka itthu sikina ohiya paahi okhalana waamini. Nihaana okhalana ophenta. Mwaha wa xeeni? Mwaha woowi ole oniphenta “khonaakuva opaceya”. Tthiri ophenta onninikhaliherya ovilela itthu sotheene sootakhala. (1 aKor. 13:4-7, 13) Omphenta Yehova, waaphenta anna ni arokora ni waaphenta awanani ahu onninikhaliherya ovilela onyokhiwa. w21.03 20-21 itti. 3-4

Okathi mukina ninnooniherya wira ninnaaphenta anna ni arokora mwaha wa itthu nihimpaka ahu. Mwa ntakiheryo hiyo khannaakuvela oveeheya mwaha wa itthu anihimya aya. Nkahaya muupuwele itthu siiraneyale wanikisa wa okumi wa Yesu valaponi. Yesu aahaaleela awiixutti awe wira yahaana okhuura erutthu awe ni owurya ephome awe wira aphwanye ekumi. (Yoh. 6:53-57) Moolumo ale a Yesu yaahaanyoonyiha vanceene awiixutti. Akina yaahihiya omutthara Yesu. Masi apatthani awe eekeekhai khiyaamuhiyale. Awo khayiiwexenxe etthu Yesu aahimmye awe, nto yaahixanka. Masi awiixutti ale khiyaakuvenle wuupuwela wira Yesu aahihimya etthu yoohiloka nave khiyaaveeheyale. Ohiya opaka eyo, awo yaanimuroromela Yesu maana yaanisuwela wira okathi wotheene Yesu aalavula ekeekhai. (Yoh. 6:60, 66-69) Nave hiyo, khanimphavela waakuveya oveeheya mwaha wa itthu apatthani ahu anihimya aya. Ohiya-vo, hiyo nihaana waavaha eparakha wira anitthokiherye ele yaaphavela aya ohimya.—Mir. 18:13. w21.01 11 etti. 13