Junho

Yehova aahaareeliha Makristau a okathi wa arummwa okathi yaarina aya mixankiho. Ikwaha sinceene, Makristau yaanilupatthiwa. Ikwaha sinceene eyo yaaniiraneya okathi yahaalipelela aya. Nwehe etthu yaamwiiranenle Paulo ni Baarnaba okathi yoowo yaalaleerya aya muttetthe wa oLiistra. Wanipacerya, awo yaahaakheliwa saana ni atthu yaaniwiriyana ele yaahimya aya. Masi nihiku nenne anamavirikanya yaahirwa anapacerya “waawoka atthu” nave atthu yaale yaamwaakhenle saana Paulo yaahinvonyakasa maluku aphavelaka omwiiva. (Mit. 14:19) Hata vari siiso Baarnaba ni Paulo khiyaahiyale olaleerya mittetthe sikina. Nto exeeni yaakhumelenle? Awo yaahiwerya “waapaka awiixutti anceene”. Ohiya-vo, moolumo aya ni ntakiheryo naya tthiri naahaalipiha anna okathi ole. (Mit. 14:21, 22) Nnaamwi yaalupatthiwa, Paulo ni Baarnaba khiyaahiyale olaleerya, nto eyo yaahaakhaliherya atthu anceene. Moolikanasa, akhala wiira khannihiya ovara muteko Yehova onirumme awe, onoonivaha mareeliho manceene. w23.04 16-17 itti. 13-14

Okumi awe wootheene, mwene Davidi aahikhalana awanani anceene, nto okathi wootheene annivekela Yehova wiira omukhaliherye. Davidi, aanikupali wiira Yehova aaniwiriyana ni anaakhula mavekelo awe. Ntoko nasalimo Davidi ni nyuwo mukupaliki wiira Yehova onniwiriyana ni onnaakhula mavekelo anyu. Biibiliya onnooniherya tthiri wiira Yehova onoonivaha miruku ni ikuru nimprisari ahu wiira nivilele mixankiho. Owo pooti waaruma anna ni arokora wala ale ahinimurumeela yena wiira anikhaliherye. Ekeekhai wiira Yehova kaahiyo khula okathi onrowa waakhulaka mavekelo ahu mwa enamuna nimphavela ahu. Ekeekhai ti yoowi Yehova onimwaakhulaka mavekelo ahu khula okathi. Nave owo onoonivahaka khula etthu nimprisari ahu okathi onoona awe oreerela. Nto muhihiye ovekela mukupaliki wiira Yehova onimookhapelelani niinano-va ni muhoolo elapo esya okathi onrowa awe ‘waavahaka yoolya atthu ootheene’. — Esal. 145:16. w23.05 8 etti. 4; 13 itti. 17-18

Ti vooloka wuupuwela mareeliho munrowa anyu ophwanya akhala wiira munoophwanya soolukama sanyu. Mareeliho xeeni munrowa anyu ophwanya? Akhala wiira etthu muniphavela anyu enihela muhina omusoma Biibiliya aahiiso opaka mavekelo muupuweleleke itthu iyo moota sinrowa aya olipiha waataana wanyu ni Yehova. (Esal. 145:18, 19) Akhala wiira muniphavela wunnuuherya mukhalelo mmosa wa ekristau, muupuweleke moota mukhalelo owo onrowa aya wookhaliheryani waataana ni atthu akina. (aKol. 3:14) Nyuwo pooti opaka elista ya itthu sootheene sooreera sinrowa okhumelela, akhala wiira munoomaleliha itthu muniphavela anyu. Nto nweheke elista eyo khula okathi. Nave mweetteke ni atthu anrowa wookhaliheryani. (Mir. 13:20) Ekeekhai wiira aakhala mahiku ninkhulumuwa ahu. Masi niireke eyo pooti oniiriha ohiwerya ophwanya itthu nimphavela ahu? Nnaari. Hiyo nave nnoowerya ophwanya itthu nimphavela ahu hata nihirina ikuru sinceene. Ekeekhai wiira ikwaha sikina pooti ohikhweyaka, masi nnoowerya. w23.05 27-28 itti. 5-8

Osuwela wiira nihaana weemererya mixankiho sinikhumelela mwaha wa soothanla sahu, eyo pooti oniiriha ohimya soottheka sahu, olokiherya ni ohitthikela opaka. Opaka itthu iya sinoonikhaliherya ohihiya otthimaka. Akhala wiira mootoko opaka yoothanla yoohiloka masi muttharuwa, exeeni mukhanle anyu oopaka? Muhihononeke okathi anyu ni ikuru sanyu mmananihaka olokiherya etthu yoohiloka mwaapanke anyu aahiiso waavaha nthowa atthu akina. Ohiya-vo, mweemereryeke wiira moovonya ni mmananiheke opaka itthu sooloka moovarihana ni makhalelo anyu a niinano. Masi akhala wiira munniivaha nthowa mwaha wa etthu mpanke anyu, mukhaleke oowiiyeviha, munvekeleke Yehova, mweemereryeke wiira moottheka ni nvekeleke oleveleliwa. (Esal. 25:11; 51:3, 4) Mwaavekeleke ale mwaatthekenle anyu wiira yooleveleleni, ni vaareerelaka mwaavekeleke axitokweene wiira yookhaliheryeni. (Yak. 5:14, 15) Mwiixutteke etthu ni soovonya sanyu ni mwiimananiheke wiira muhitthikele opaka soottheka simosa-ru. Akhala wiira munoopaka itthu iya, mukupaliki wiira Yehova onoowoonelani othunku ni onimookhaliheryani. — Esal. 103:8-13. w23.08 28-29 itti. 8-9

Yehoyada aahimukhaliherya mwene Yowasi okhala mutthu ooreera murima. Ti maana aya okathi Yowasi aari awe mmiravo, aaniphavela omusiveliha Yehova. Masi nuumala Yehoyada okhwa, Yowasi aahihapuxiwa ni makhulupale yahaamwiiwelela Yehova. (2Wah. 24:4, 17, 18) Nto Yehova aahiriipiwa murima vanceene. Masi “anaaruma maprofeta eriyari aya wiira aattikiherye wa Yehova . . . masi awo yaanikhootta waawiriyana”. Nave awo khiyaaphavenle onwiriyana Zakariya yoowo aari mwaana a Yehoyada, mmusi awe Yowasi nave aari profeta ni namukuttho a Yehova. Nave vaakhanle wiira Yowasi khaakhapeleliwe ni anamuyari awe Zakariya aamwiiviwa. Yowasi aahiruma wiiviwa Zakariya. (2Wah. 22:11; 24:19-22) Yowasi khaamuttittimiha Yehova mwa enamuna yooloka. Yehova aahimmye wiira: “Ale ahinkittittimiha khanrowa ottittimihiwaka”. (1Sam. 2:30) Nnaamwi Yowasi aarina “anakhotto anceene” owo aahixinttiwa ni anakhotto vakhaani a wAsiria ni ‘aahivulalihiwa vanceene’.(2Wah. 24:24, 25) Masi asiria khiyaamwiivale, nto arumeyi awe ti yaamwiivale muhoolo mwaya mwaha woomwiiva Zakariya. w23.06 18-19 itti. 16-17

Murummwa Paulo aahiimananiha orumeela okathi awe wEefeso, wiira olaleerye ni wiixuttiha ihapari sooreera. (Mit. 19:1, 8-10; 20:20, 21) Paulo aanaaphenta vanceene anna ni arokora ni aaphavela waakhaliherya wiira ahihiye okhala oororomeleya wa Yehova. Atthu ale a wEefeso yaari mweepiphini okhala wiira yeettela etiini yoowootha ni yaakupali itthu sa onammunepani. Atthu a wEefeso yaanirupihana voohiloka nave khiyuuleliwa muru ni mweettelo aya owo. Atthu anceene a epooma ele, okathi yaatthekula aya aahiiso yaapaka aya ifesta sa itiini, yaahilimalela olavula mwa enamuna yoohiloka aahiiso yoovekana. (aEef. 5:3) Anamunceene yaakhala epooma ele, ‘yaahirimeeliwa mukhalelo wootheene wooreera’ eyo yaataphulela wiira ‘khiyoona ehaaya’. (aEef. 4:17-19) Ahinatthi wiixutta malamulo a Yehova voohimya sa etthu yooloka ni yoohiloka, murima aya waaniwiiriha opaka itthu soohiloka. Eyo ti etthu yaamwiirinhe Paulo waalopola ohimyaka wiira “muupuwelo aya oneettihiwa ni epiphi, nave aarakamela okumi Muluku onivaha awe”. Atthu akina a wEefeso, yaahikhuma mweepiphini mmo. w24.03 20 itti. 2, 4; 21 itti. 5-6

Wiira okhale mukhulupale aisarayeli, Gideyoni aahaana okhalana ikuru sinceene. Okathi atthu a oMadiyani yaatthyanwe aya ohiyu eriyari, Gideyoni aahiwoomola okhuma elapo yoowaataleya ya oYezireyeli mpakha muro Yordani. (Aph. 7:22) Niireke Gideyoni nuumala ophiya muro Yordani aaheemela? Nnaari! Hata yaatemmwe, awo yaahilapuwa muro Yordani ni khiyaahiyale owoomola awanani aya. Gideyoni ni anakhotto awe 300, moohakalaliha awo yaahaavara ni khwaamala-maliha awanani aya awo, eyo piiyo, yaahaaxintta aMadiyani. (Aph. 8:4-12) Gideyoni aanikupali wiira anvahiwa ikuru ni Yehova, tthiri Yehova aahipaka eyo. (Aph. 6:14, 34) Ekwaha emosa, Gideyoni vamosa ni anakhotto awe yaahiwoomola mamwene manli a oMadiyani. Gideyoni ni anakhotto awe yaawoomola mwentto, woonasa wene mamwene ale oMadiyani yaawenle ikamelo. (Aph. 8:12, 21) Tthiri, akhaliheriwaka ni Yehova yaahaaxintta awanani aya. Nto axitokweene ahaana omuroromelaka Yehova, yoowo ‘ohinkhulumuwa nnakhala ohinooceya’. Tthiri ahaana okupali wiira Yehova onimwaavaha ikuru anipirisari aya. — Yes. 40:28, 29. w23.06 6 itti. 14, 16

Hata nirina ene mixankiho sinceene, nnoowerya ohihiya ororomeleya. Nto mmuroromeleke Yehova. Nwehe moota Baraki aareelihiwe awe mwaha woomuroromela Yehova. Okathi ole aisarayeli khiyailokihenrye wiira yawane ekhotto, nnakhala khiyaarina ikaruma sa ekhotto. Masi Yehova aahimuruma Baraki orowa owana ni mukhulupale a anakhotto a oKanani iitthaniwa Sisera, yoowo aarina ikaruma sinceene sa ekhotto. (Aph. 5:8) Deebora, yoowo aari profeta, aahimuleela Baraki wiira orowe muttetthe woowaataleya wa omiyakoni, wiira akumane ni Sisera vamosa ni anakhotto awe yaarina ikaaro 900 sa ekhotto. Opuro ole khiwaarowa waaxankiha akaanani owana ekhotto, hata vari siiso, Baraki aahiiwelela. Okathi anakhotto a Sisera yaakhuruwa aya omwaako Tabori, Yehova aahiiriha orupa epula yinceene. Nto okathi yaarupa aya epula ele, ikaaro sootheene sa Sisera saahiphara munttopheni. Yehova aahimukhaliherya Baraki waaxintta awanani awe. (Aph. 4:1-7, 10, 13-16) Ntoko siisaale Yehova aamukhalihenrye awe Baraki, owo onoonikhaliherya akhala wiira nnoomuroromelaka ni wiiwelela malakiheryo onnivaha awe orumeelaka mutthenkeso awe. w23.07 19 itti. 17-18

Nihaana opixa murima wiira niphwanye okumi woohimala. Ntoko arumeyi a Yehova a khalai, nihaana olipelela moopixa murima itthu Yehova oleihenrya awe. (aHep. 6:11, 12) Biibiliya onnaalikanyiha arumeyi a Yehova ni mulipa oolima. (Yak. 5:7, 8) Mulipa oolima onnivara muteko muulupale wowaala ni orekari masi khonsuwela silini ipyo sawe sinrowa aya wunnuwa. Nto mulipa oolima owo, ohaana olipelela moopixa murima, okupaliki wiira onoohepha etthu aalale awe. Mwa enamuna emosa-ru, hiyo nihaana wiimananiha okhala atthareli a Yesu, nnaamwi nihisuwelaka “nihiku ninrwa awe Pwiya ahu”. (Math. 24:42) Ninnilipelela moopixa murima wiira Yehova onoomaliherya itthu sootheene oleeihenrya awe okathi wooreerela. Nto vakhala wiira khaninrowa opixa murima nnootemwa olipelela nihiku nno, vakhaani-vakhaani nihiyeke omurumeela Yehova. Nihaana opacerya owehexexa itthu sinniiriha ohakalala nenna-va. Masi nakhala oopixa murima, nnoowerya ovilela mpakha wanikisa. — Mik. 7:7. w23.08 22 etti. 7

Nalikanyiha eprofesia eri Daniyeli 2:41-43 ni iprofesia sikina siri eliivuru ya Daniyeli ni Wiisuupulula, ninnoona wiira inawu iyo sintaphulela olamulelo wa Grã-Bretanha ni Estados Unidos. Maloko yaawo yiiraanale khukhala olamulelo wa olumwenku wootheene olelo-va. Olavulaka sa olamulelo owo, Daniyeli aahimmye wiira ‘wamukhala wokina wolipa, wokina wowolowa’. Xeeni Daniyeli aahimmye awe siiso? Okhala wiira atthu pure anlikanyihiwa ni oloko, khanwerya opaka itthu ntoko owerya wa eyuuma. Ninniixutta itthu sinceene ni elatarato Daniyeli aatthokihenrye awe. Etthu yoopacerya okhala wiira, ninnoona wiira Estados Unidos ni Grã-Bretanha annooniherya owerya waya mwa inamuna soovirikana. Mwa ntakiheryo, Estados Unidos ni Grã-Bretanha saari ikurupu saaxinttale Ekhotto Yoopacerya ni Yanenli ya Olumwenku Wootheene. Masi ikuru sa olamulelo owo sinnivukuwa ni sinrowa otepaka ovukuwa, okhala wiira atthu khaniiwanana ni khansiveliwa ni ikuvernu saya. Etthu ekina niixuntte ahu, okhala wiira olamulela wa Anglo-Americana onrowa okhala wookiserya ehinatthi ekuvernu ya Muluku opwetexa ikuvernu sootheene sa apinaatamu. w23.08 10-11 itti. 12-13

Ikwaha sikina, Davidi aanixanka mwaha wa mixankiho ni sooweeha sinceene samphwanya. (Esal. 18:4, 5) Masi osuwela wiira aaniphentiwa ni okhapeleliwa ni Yehova, waahimwiiriha Davidi okhala oolipa. Yehova aanimukuxa Davidi oxankale ene omurowanaka “mapuro òwatta yolya” ni ‘omuró ori màsi òrirya wira amumuleke’. Moottharelana, Davidi aahiphwanya ikuru ni khaahiyale omurumeela Yehova moohakalala. (Esal. 18:28-32; 23:2) Mwa enamuna emosa-ru, olelo-va ninniwerya oxintta ni ovilela okathi sinniphwanya aya mixankiho, mwaha wa ‘ophenta ohinimala’ wa Yehova. (Wikh. 3:22, Piipiliya Emakhuwa; aKol. 1:11) Okumi wa Davidi ikwaha sinceene waari mmaxakhani, okhala wiira aahikhalana awanani awe ooweryexa onvikana yena. Hata vari siiso, ophenta wa Yehova waanimukhaliherya okhala oovareleleya ni woona wiira aanikhapeleliwa. Davidi aanisuwela wiira Yehova ari ni yena okathi wa mixankiho, nto eyo yaanimukhaliherya okhala oomaaleleya. Owo aahimwiipela Yehova ohimyaka so: ‘[Yehova] ookaakiherya sowopiha sothene’. (Esal. 34:4) Woova wa Davidi waari weekeekhai, masi ophenta wa Yehova waahikhalana owerya ovikana woova wawe. w24.01 30 itti. 15-17

Mwiixutteke etthu ni soothanla soohiloka sa Yowasi. Nuumala Yehoyada okhwa, Yowasi aahipacerya okhalana apatthani oohiloka. (2Wah. 24:17,18) Owo aahithanla otthara miruku sa makhulupale a oYuda, yahamphenta Yehova. Woonasa wene, munnikupali wiira Yowasi aahaana okhala ottaiwene aahiiso ohaataana ni atthu siiso. Ohiya opaka eyo, Yowasi aari mulolo, nave aahithanla wiiwelela miruku soohiloka sa atthu ale. Mooriipiha murima, okathi mmusi awe iitthaniwa Zakariya aimananiha awe wiira omukhaliherye, Yowasi aahiruma wiira iiviwe. (2Wah. 24:20, 21; Math. 23:35) Tthiri ele yaari etthu yoohiirya! Yowasi aahipacerya saana, masi mooriipiha murima owo aahipakeya namavirikanya ni nawiive. Muhoolo mwaya, owo aahiiviwa ni arumeyi awe. (2Wah. 24:22-25) Itthu saarowa okhala sooloka, vakhanle wiira khaahiiye omwiiwelela Yehova ni atthu yamphenta! w23.09 9 etti. 6

Yesu aanisuwela wiira murummwa Pedru anwerya ohihiya ororomeleya. Mooreera murima Yesu aahimuhimeerya Pedru wiira “muhoove!” Moolumo ala yaanooniherya wiira Yesu aanimuroromela Pedru nave yaahimwiiriha oturuka okumi awe. Pedru ni muhima awe iitthaniwa Andreya yaahihiya muteko ole woototha ihopa ni yaahipacerya omutthara Yesu muteko woolaleerya. Mwaha waivaavo, awo yaahaakhela mareeliho manceene yaakhuma wa Yehova. (Mar. 1:16-18) Mwaha woomutthara Kristu, Pedru aahikhalana soowiiraneya soohakalaliha. Owo aahinweha Yesu aapenuxaka aretta, oomolaka malaikha ootakhala ni aahihimuxaka alipa-ookhwa. (Math. 8:14-17; Mar. 5:37, 41, 42) Nave Pedru aahimoona Yesu muhoolo mwaya ori ene mwene oovuwa a Omwene wa Muluku. Nto okathi wootheene, yena aanuupuwela yoowoonihiwa eyo. (Mar. 9:1-8; 2Ped. 1:16-18) Veekeekhai Pedru aahiwerya oweha itthu sinceene ahaarowa awe oweha ahaamutthanre Kristu. Moohaanyiherya, owo aahihakalala vanceene mwaha wooxintta muupuwelo awe woohiloka ni okhalana eparakha ya waakhela mareeliho ale! w23.09 21 itti. 4-5

Ekarta awe yoopacerya, Pedru aahirumeela nuulumo noowi “mphentaneke vanceenexa”. Owo aahilavula eyo ophavelaka onisuweliha wiira ophentana “onnikhuneela itampi sinceene”. (1Ped. 4:8) Woonasa wene, Pedru aanuupuwela itthu iixuntte awe ni Yesu iyaakha saavinre voohimya sa olevelela. Okathi ole, Pedru oona wiira anaareerela murima atthu akina aalevelelaka “ikwaha 7”. Masi Yesu aahimwiixuttiha Pedru, nave onniniixuttiha hiyo wiira nihaana waalevelela atthu akina “ikwaha 77”, aahiiso okathi wootheene vaareerelaka. (Math. 18:21) Vakhala wiira vannoovilani weettela miruku iya, muhikhulumuwe! Ootheene ahu, okathi mukina vanninivila waalevelela atthu akina. Etthu eri ya efaita yuulupale, ori wiimananiha waalevelela atthu akina ni okhaliha murettele. w23.09 29 etti. 12

Okathi aari awe mmirimani mwa ehopa, Yoona aanikupali wiira Yehova anwiriyana nivekelo nawe ni ammukhaliherya. Yehova aahimoopola Yoona, muhoolo mwaya owo aari oolikana ene wiira omalelihe muteko ole aarummwale awe. (Yoona 2:10–3:4) Niireke mootoko oxanka muhinawerya onvekela Yehova? Niireke mootoko okhulumuwa, muhinawerya osoma? Muhiliyale wiira Yehova onnisuwela saana mixankiho sanyu. Hata mpakaka nivekelo nookhuveya, mukupaliki wiira Yehova onimoovahani itthu mumpirisari anyu. (aEef. 3:20) Akhala wiira erutthu enimoowereyani aahiiso mookhalana muxankiho mukina muhinawerya omusoma Biibiliya, mmananiheke onwiriyana audiyu a Biibiliya ookaravariwa aahiiso a iliivuru sikina sinimutthokiherya Biibiliya. Nave owiriyana isipo sa Omwene aahiiso oweha iviidiyu mu jw.org pooti wookhaliheryani. Okathi munninvekela anyu Yehova ni ophavelasa waakhuliwa waya mbiibiliyani ni iliivuru sinimutthokiherya Biibiliya, vanikhala ntoko wiira munimulatthula Yehova wiira oolipiheni. Nave owo onoopaka eyo. w23.10 13 etti. 6; 14 etti. 9

Etabernaakulu ni etemplo yaatekiwe muhoolo mwaya oYerusalemu, muhina mwaya saamulikana. Muhina mwaya saakawanyiwe ipantta piili, “Nipuro Noowaarya” ni “Nipuro Noowaaryexa”. Ipantta iyo saakawanyiwe ni ekortiina. (aHep. 9:2-5; Okhu. 26:31-33) Nipuro Noowaarya, saahikhala mithuko, meesa ni iphaawu saavahiwa Muluku. Nto “anamukuttho oothanliwa” ti yeemereriwa paahi ovolowa muhina wiira yavare muteko wa onamukuttho. (Mmr. 3:3, 7, 10) Nave Nipuro Noowaaryexa, naahikhala nivuku na waataana naataphulela wiira Yehova aarowa okhalaka mutemplo mme. (Okhu. 25:21, 22) Namukuttho muulupale paahi teemereriwa ohula ekortiina eyo orowaka nipuro nno ekwaha emosa paahi vamwaakhani, okathi wa oleveleliwa itampi. (Onam. 16:2, 17) Owo aanikela okunxe ene ephome ya axinama wiira aleveleliwe itampi sawe ni sa atthu akina. Nuuvira okathi, Yehova orumeelaka munepa awe wowaarya aahooniherya etthu saataphulela aya ipantte iye piili sa etabernaakulu. — aHep. 9:6-7. w23.10 27 etti. 12

Ikwaha sinceene mbiibiliyani ninniphwanya yooruma ya Muluku eni: “Mphentaneke mukina ni mukhwaawe”. (Yoh. 15:12, 17; aRom. 13:8; 1aTes. 4:9; 1Ped. 1:22; 1Yoh. 4:11) Ophenta mukhalelo mmosa onikhuma vamurimani va mutthu, khuuvo pinaatamu oniwerya woona. Nto atthu akina anrowa osuwela sai wiira ninnaaphenta? Anoosuwela ni moolumo ahu ni miteko sahu. Sookhala inamuna sinceene nikhanle ahu oowooniherya wiira ninnaaphenta anna ni arokora. Nwehe matakiheryo anittharelana: “Mulavuleke ekekhai mukina ni mukhw’ awe”. (Zak. 8:16) “Mukhalaneke murettele mukina ni mukhwaawe”. (Mar. 9:50) “Mphaveleke waattittimiha akina ni murima anyu wotheene”. (aRom. 12:10) “Mwaakhelaneke mukina ni mukhwaawe”. (aRom. 15:7) “Mulevelelaneke ni murima wotheene ikwaha sotheene”. (aKol. 3:13) “Mukhaliheryaneke ni itthu sinooxankihani”. (aKal. 6:2) “Mulipihaneke mukina ni mukhwaawe”. (1aTes. 4:18) “Mukhaliheryaneke mukina ni mukhwaawe”. (1aTes. 5:11) “Nvekelelaneke”. — Yak. 5:16. w23.11 9 itti. 7-8

Khula nihiku, nihaana opaka soothanla, suulupale wala saamukhaani. Okhalana waamini woolipa, onoonikhaliherya opaka soothanla sooloka. Mwa ntakiheryo, khula nihiku ninnipaka soothanla sinihela muhina waathanla apatthani, otthekula, osoma oxikola, othela wala otheliwa, anamwane ni muteko wa mulaponi. Nto nihaana wiikoha so: ‘Kiireke soothanla saka sinnooniherya wiira kinnikupali wiira elapo ela ehanle vakhaani oranttelihiwa ni elapo esya? Aahiiso soothanla saka sinivarihana ni muupuwelo wa atthu a mulaponi yaawo anikupali wiira khivaniweryaneya okhala moohimala?’ (Math. 6:19, 20; Luka 12:16-21) Akhala wiira nnoolipiha waamini wahu wiira elapo esya eri vakhiviru, nnoowerya opaka soothanla mwa miruku. Hiyo nihaana okhalana waamini woolipa wiira nivilele mixankiho sinniphwanya. Mixankiho ntoko olupatthiwa, iretta sihinivoniwa, wala mixankiho sikina pooti onikhulumula. Woopaceryani, hiyo pooti wuupuwelaka wiira nnoowerya oxintta mixankiho sinniphwanya. Masi, mixankiho ntoko iyo, ikwaha sinceene sinnipisa omala. Ti maana aya vari aya vooloka olipiha waamini wahu wiira nihihiye omurumeela Yehova moohakalala. — 1Ped. 1:6, 7. w23.04 27 itti. 4-5

Yehova oniphavela wiira nikhaleke moovarihana ni mavekelo ahu. Mwa ntakiheryo, munna mosa pooti onvekela Yehova wiira onvahe ikuru wiira owerye olavula ni patarau awe, ovekelaka ifeeriya wiira anwehe konkresu. Yehova onrowa waakhula sai nivekelo nlo? Owo pooti waakhula onvahaka munna owo olipa murima, wiira owerye olavula ni patarau awe. Masi munna owo ohaana opaka etthu, orowa okumana ni patarau awe omuleelaka etthu eniphavela awe. Woonasa wene owo ohaana opaka eyo ikwaha sinceene. Aahiiso owo pooti olavulana mpatthani awe a omutekoni wiira aturukane mahiku ni weemererya akhala wiira patarau onihimya wiira kinoovukula esalaario anyu ya mweeri owo. Yehova oniphavela wiira nihihiye ovekela itthu nimpirisari ahu. Yesu aahimmye wiira itthu sikina ninvekela ahu, khasinrowa waakhuliwa moowakuveya. (Luka 11:9) Nto muhikhulumuwe! Tivonto nvekeleke ikwaha sinceene ni murima anyu wootheene. (Luka 18:1-7) Vakhala wiira nnoopaka eyo, nnimooniherya wiira etthu ninvekela ahu yookhalana efaita. Ohiya-vo, ninnooniherya wiira nookhalana waamini wiira onoonikhaliherya. w23.11 22 itti. 10-11

Yehova aahimuleiherya mpatthani awe, Abrahamu, wiira aamukhalana mwaana, nave maloko ootheene a valaponi yaamureelihiwa mwaha wa mwaana owo. (Maph. 15:5; 22:18) Abrahamu aanimwaamini vanceene Muluku, eyo yaahimwiiriha okupali wiira yooleiherya ya Muluku yaamwiiraneya. Masi Abrahamu aarina iyaakha 100 nave Sara 90, nlelo awo yiira ahinatthi omuyarasa mwaana. (Maph. 21:1-7) Hata vari siiso, Biibiliya onihimya so: “Mwaha wa nlipelelo aarina awe, owo aanaamini wira aamukhala tiithi a maloko manceene, ntoko Muluku aahimmye awe”. (aRom. 4:18) Ntoko ninsuwela ahu, etthu Abrahamu aalipelela awe yaahiiraneya. Owo aahikhala tiithi a mwaana aaleiheriwe, Isakhi. Xeeni Abrahamu aareerela awe okupali wiira Yehova ammaleliha yooleiherya awe? Abrahamu aanimusuwela oratteene Yehova, ti nthowa naya “owo aanikupali tthiri wira Muluku aarowa opaka ele aaleihenrye awe”. (aRom. 4:21) Yehova aahimuthokorerya Abrahamu okhala naxariya mwaha wa waamini wawe. — Yak. 2:23. w23.12 8 itti. 1-2

Mmiravo oororomeleya, onnivara saana miteko sawe. Muupuwele ntakiheryo nooloka na Yesu. Yesu khaatonko ohiyererya miteko sawe, ohiya vo owo aanivara miteko sootheene aavekeliwa awe ni Yehova hata saari sooxankiha. Yena aanaaphenta atthu ootheene otepexa wene awiixutti awe ni aahileva okumi awe mwaha wa mureerelo aya. (Yoh. 13:1) Nyuwo pooti omutakiha Yesu, nvaraka muteko munceene wiira mmalelihe yoothanleliwa anyu. Vakhala wiira khamunsuwela ovara saana etthu nvekeliwe anyu, mwiiyeviheke ni mwaavekeleke anna anisuwela wiira yookhaliheryeni. Muhivareke miteko vakhaani musuwelaka wiira sookhala sikina. (aRom. 12:11) Ohiya-vo, mmaleliheke soothanleliwa sanyu “ntoko munimurumeela Yehova, ohiya atthu”. (aKol. 3:23) Ekeekhai wiira mwa mutthu oottheka, nto mwiiyeviheke ni mweemereryeke soovonya sanyu. — Mir. 11:2. w23.12 26 etti. 8

Etthu yoohakalaliha opatisiwa ni wiirela mpantta emusi ya Yehova. Ale apatisiwe, annimukupali Nasaalimo Davidi, yoowo aahimmye so: “Ooreeriwa ti ole nyuwo mmuthanlale anyu, munampixa vari anyu, wiira okhaleke vate vanyu”. (Esal. 65:4, Piipiliya Emakhuwa) Yehova khonimukhanyererya mutthu wiira okhale mpatthani awe. Owo onnaathanla okhala apatthani awe atthu yaale aniphavela okhala mpatthani awe. (Yak. 4:8) Munnithanla okhala mpatthani a Yehova mwa enamuna ya vameekha aya, okathi yoole muniivahererya anyu wa yena ni opatisiwa. Mukupaliki wiira Yehova onrowa ‘owiitthelelani mareeliho oowaatta ahinrowa anyu woona woopweha’. (Mal. 3:10, Piipiliya Emakhuwa; Yer. 17: 8) Opatiso, nivalo munooniherya anyu wiira muniphavela omurumeelaka Yehova. Muhaana opaka ele muniwerya anyu wiira mummalelihe natiri anyu a omurumeela Yehova, hata waamini wanyu weehereriwaka. (Mus. 5:4, 5) Ntoko mutthareli a Yesu, nyuwo mookhalana muritti wa ottharaka malakiheryo awe ni ntakiheryo nawe. — Math. 28:19, 20; 1Ped. 2:21. w24.03 8 itti. 1-3

Ankhi akhala wiira khivanoosivela-ni oviriha okathi muri ene hoothe nuule muthelanne anyu? Etthu exeeni mukhanle anyu oopaka? Nkahaya muupuwele mooro. Mooro khonaakuva opatta. Nto wiira mooro owo opatte vanceene, nihaana otetheeryaka ikhuni suulupale. Nuupuwelaka ntakiheryo nno, munoonela sai opacerya oviriha okathi muri ene hoothe khula nihiku? Nto okathi owo musyakeke opaka itthu, saarowa omunyoonyiha ole muthelanne anyu mpakeke itthu sinrowa woosivelani oowanli anyu. (Yak. 3:18) Vakhaani-vakhaani munoowerya wuncererya ophentana wanyu. Ottittimihana ti wa faita vanceene mukasamentoni. Ottittimihana vatthokoni pooti olikanyihiwa ni epheyo. Okhala wiira yaahikhale epheyo mooro onnaakuva ottipha. Mwa enamuna emosaru, anamathelana yaahittittimihaneke ophentana waya onoovukuwa. Moovirikana ni vo vakhala wiira anamathelana annittittimihana ophentana waya onnincerereya. Woonasa wene, nyuwo pooti wuupuwelaka wiira munnimuttittimiha ole muthelanne anyu. Masi niireke iyanyu, aahiiso mwaarinyu onnoona tthiri wiira munnimuttittimiha? w23.05 22 etti. 9; 24 itti. 14-15

Biibiliya onnaalavula arumeyi a Muluku oororomeleya, yaawo ikwaha sikina, yoova mwaha wa awanani aya ni itthu sikina. (Esal. 18:4; 55:1, 5) Moolikanasa, ikwaha sikina hiyo pooti olupatthiwaka oskola, omutekoni ni amusi aahiiso kuvernu. Nave okathi onniphwanya aya oretta, ikwaha sikina ninnoova okhwa. Okathi itthu iyo sinnikhumelela aya, woonasa wene hiyo pooti wuupuwelaka ntoko mwaana onoona wiira khonikhapeleliwa. Yehova onnikhaliherya sai okathi sinnikhumelela aya itthu ntoko iyo? Ikwaha sinceene owo onninimaaliha ni onihakalaliha. Nto ikwaha sinceene nviriheke okathi munceene mulavulaka ni Yehova munvekelaka, ni osoma Nuulumo nawe. (Esal. 77:1, 12-14) Vakhala wiira munoopaka eyo, okathi sinoophwanyaayani mixankiho etthu yoopacerya munrowa anyu opaka, ori onvekela Yehova wiira ookhaliheryeni. Mmuleeleke Yehova itthu sootheene siniwiirihani woova ni sinooxankihani. Nuumala-vo, nwiriyaneke etthu Yehova onihimya awe mmusomaka Biibiliya. Mwiira siiso, munimoona wiira Yehova onnoomaalihani. — Esal. 119:28. w24.01 24-25 itti. 14-16

Wiira niwerye omaleliha itthu nimphavela ahu mmutthenkesoni mwa Yehova, nihaana okhalana moonelo wooloka. Nto okhalana moonelo wooloka mukhalelo onnikhaliherya omaleliha itthu nimphavela ahu. Akhala wiira ninnikhalana moonelo wooloka, nnoowerya omaleliha itthu nimphavela ahu. Exeeni mukhanle anyu oopaka wiira mukhalane moonelo wooloka? Munvekeleke Yehova wiira mukhalane moonelo wooloka. Yehova onimoovahani munepa awe woowaarya, wiira mukhalane moonelo wooloka yoowo onrowa wookhaliheryani ophwanya itthu muniphavela anyu. Ikwaha sikina, hiyo pooti ophavelaka omaleliha etthu emosa nnoona ahu wiira ti yooloka. Masi pooti ohikhalana moonelo wooloka aahiiso ohiphavela omaleliha etthu nimphavela ahu. Muupuweleleke itthu Yehova oopakenlyaaweni. (Esal. 143:5) Murummwa Paulo aanuupuwelela moota Yehova aamureerenle awe murima nto eyo yaanimwiiriha oluttuweliwa omurumeela Yehova. (1aKor. 15:9, 10; 1Tim. 1:12-14) Moolikanasa, akhala wiira munimuupuwelelaka itthu Yehova oopakenlyaaweni, eyo enimookhaliheryakani omaleliha itthu muniphavela anyu. — Esal. 116:12. w23.05 27 itti. 3-5

Tiithi ahu a wiirimu, onnihakalala vanceene okathi ninvuwiha ahu nsina nawe. (Esal. 119:108) Atthu akina, khanikupali okathi aanittottopeliwa aya ni anilavuliwa aya mwa enamuna yooloka. Niireke Yehova onoonela siiso? Nnaari. Nave okathi nimmuttottopela ahu Yehova, ninnooniherya wiira itthu Satana olavunle awe, oonootherya khula mmosa a hiyo. Moota xeeni? Owo aahimmye wiira khuuvo pinaatamu aarowa okhala oororomeleya wa Yehova ni waakiherya nsina nawe. Nave aahimmye wiira khuuvo pinaatamu nuumala omphwanya mixankiho, aarowa ovikaniha okhala oororomeleya. Aahihimya-tho wiira ootheene ahu nammunyanyala Yehova, akhala wiira mutthu mukina aamunivaha etthu yootepa oloka. (Yoobi 1:9-11; 2:4) Masi murumeyi oororomeleya, Yoobi, aahooniherya wiira Satana nawoothe. Ankhi hiyo? Khula mmosa a hiyo, ookhalana eparakha ya omurumeela moororomeleya ni okhaliherya nsina na Tiithi ahu. (Mir. 27:11) Tthiri opaka eyo eparakha yuulupale. w24.02 8-9 itti. 3-5

Nuuvira okathi wa Moise ni Yoxuwa, Yehova aahaathanla makhulupale wiira aweettiheke atthu awe. Nave okathi wa mamwene, Yehova aahaathanla maprofeta wiira aweettiheke atthu awe. Nto mamwene yaari oororomeleya, yaanitthara miruku yaavahiwa aya ni maprofeta. Mwa ntakiheryo, Mwene Davidi, moowiiyeviha aaheemererya ottaruxiwa ni profeta Natani. (2Sam. 12:7, 13; 1Wah. 17:3, 4) Ottharaka malakiheryo aavahiwa awe ni profeta Yahaziyeli, Mwene Yosafati aahaalipiha atthu a oYuda, ohimyaka wiira “mwaakupali maprofeta awe” Muluku. (2Wah. 20:14, 15) Nave Mwene Ezekiya okathi aaxankale awe, aahimphavelasa profeta Yesaya. (Yes. 37:1-6) Khula okathi mamwene yaatthara aya malakiheryo a Yehova, awo yaanireelihiwa nave nloko nootheene naanikhapeleliwa. (2Wah. 20:29, 30; 32:22) Vannooneya wiira Yehova aanaaruma maprofeta wiira oweettiheke atthu awe. w24.02 21 etti. 8

Satana oniphavela wiira naataaneke ni atthu ahiniphavela weettela malakiheryo a Yehova. Olelo-va, nihaana okhalana ephoole yuulupale ovikana makristau a wEefeso. Mwaha woowi, ohiya paahi okhala niri ene hoothe, masi-tho pooti ovirihaka okathi munceene nivaanelaka ni atthu awo, nimurumeelaka redes socias. Nihaana wiimananihaka vanceene wiira nisyake mweettelo woohiloka yoowo ohireere wuulaana olumwenku ola. Noosuwela wiira owo ti woohiloka. (aEef. 4:19, 20) Etthu enrowa onikhaliherya ori wiikoha so: ‘Kiireke kinnisyaka weetta ni atthu oohiloka okhale omutekoni, oskola aahiiso atthu akina ahinttittimiha malamulo a xariya a Yehova? Kiireke moolipa murima, kinnaakiherya malamulo a Yehova hata atthu akina yuupuwelaka wiira kamulolo?’ Moovarihana ni 2 Timootheyo 2:20-22, nihaana okhalana ephoole, okathi nnaathanla ahu apatthani hata mmulokoni mwa ekristau. Nihiliyale wiira akina, pooti ohinikhaliherya wiira nimurumeeleke Yehova moororomeleya. w24.03 22-23 itti. 11-12

Niireke mootoko wuupuwela moota Yehova ori awe? Nnaamwi apinaatamu ahiweryaka onweha Yehova, masi Biibiliya onnimulavula mwa inamuna soovirikana. Owo onihimya wiira Muluku ‘tonnivaha ikuru’ nave onlikana ni “mooro onipwetexa”. (Esal. 84:11; aHep. 12:29) Ezekiyeli aahoonihiwa Yehova olikanaka ni nluku noowaryexa, eyuuma yoowooxiwa ni ekhweyi erina waarya wootutha. (Ezek. 1:26-28) Okhala wiira khaninwerya onweha Yehova, pooti onivilaka okupali wiira onniniphenta. Mwaha wa itthu siwiiranenle mweekumini mwaya, atthu akina anuupuwela wiira Yehova khonaaphenta. Yehova onnisuwela miyoonelo iyo ni moota vannixankiha aya omwaattamela. Wiira onikhaliherye, owo oorumiha olempwa mukhalelo awe wootepa ooreera mbiibiliyani. Biibiliya onnimuhimya Yehova okhala Muluku oophenta. (1Yoh. 4:8) Tthiri mukhalelo muulupale wa Yehova, ophenta. Eyo enooniherya wiira Yehova onnipaka itthu sootheene mwa niphento. Ophenta wa Yehova ti wuulupale ni khorina mukano nave onniwooniherya ale ahinimphenta. — Math. 5:44, 45. w24.01 26 itti. 1-3

Yehova aahimuthanla Moise wiira aakumihe aisarayeli wExiitu ni aahaavaha aisarayeli itthu saakhaliherya, woona eyo, owo aahirumeela etthu yaalikana ni neeku wiira niweettiheke othana, ni etthu yaalikana ni mooro wiira yaamwaleeleke ohiyu. (Okhu. 13:21) Nto Moise ottharaka neeku nno, owo aahiwerya waakuxa aisarayeli aaroihaka Ephareya Yooxeerya. Aisarayeli yaahixanka vanceene nuumala woona wiira ohoolo waya yaari Ephareya yooxeerya, masi ottuli waya yoomoliwa ni anakhotto a wExiitu. Ohimya ekeekhai Moise khaapanke etthu yoohiloka. Yehova taalakenle waakuxa atthu ale aaroihaka opuro ole, omurumaka Moise. (Okhu. 14:2) Eyo yaahinvaha eparakha Muluku ya owooniherya owerya wawe mwa enamuna yahuupuwela aya. (Okhu. 14:26-28) Mwa iyaakha 40, Moise khaahiyale otthara malakiheryo a Yehova ni oweettiha aisarayeli moothakoni. (Okhu. 33:7, 9, 10) Nto Yehova ori ene vaneekuni aanilavula ni Moise, nave yena aanaaleela aisarayeli malakiheryo aavahiwa awe ni Yehova. Tthiri aisarayeli yanwerya woona wiira Yehova aanimuruma Moise wiira oweettiheke. w24.02 21 itti. 4-5