Mwiixutte Onvekela Yehova ni Murima Wootheene

1-2. a) Itthu xeeni sikhanle oonikhoottiherya omutthukulela Yehova murima ahu okathi nninvekela ahu? b) Ninsuwela sai wiira Yehova onniwiriyana mavekelo ahu?

NIIREKE ikwaha sikina munoona wiira okathi munivekela anyu munimakela ohimya itthu simosa-ru, khamunimuleela Yehova itthu muniphavela anyu ni moonelo anyu? Vakhala wiira ti siiso, khamukhanle mekhinyu. Ootheene ahu, ninnaatteliwa miteko, nto ikwaha sikina pooti omakela opaka mavekelo ookhuveya nnaliyala opaka mavekelo oopisa vakhaani. Nave pooti onixankihaka omutthukulela Yehova murima ahu, mwaha woowi nnoona wiira khanimphwanela onvekela.

² Biibiliya onniniixuttiha wiira etthu Yehova onivaha awe efaita, khahiyo orumeela moolumo ooreera, masi onvekela ni murima ahu wootheene. Yehova onniwiriyana mavekelo “a atthu oowiiyeviha”. (Esal. 10:17) Nave onniwiriyana khula etthu ninlavula ahu, okhala wiira onninthokorerya. — Esal. 139:​1-3.

3. Mwaha ola, ninrowa othokorerya makoho xeeni?

³ Woonasa wene, hiyo pooti wiikohaka so: Ninrowa owerya sai onvekela Yehova ni murima ahu wootheene? Ninrowa onvekela sai Yehova mwa enamuna enrowa onikhaliherya okhala mpatthani awe? Anniixuttiha exeeni, mavekelo a arumeyi a Yehova alempwale mbiibiliyani? Onrowa onikhaliherya sai onvekela ni murima ahu wootheene? Etthu xeeni nikhanle ahu oopaka vakhala wiira khaninsuwela itthu nikhanle ahu oomuleela Yehova naavekelaka? Nrowe niwehe waakhuliwa wa makoho ala.

MUHOOVELELEKE ONVEKELA YEHOVA

4. Exeeni enrowa onikhaliherya ohoovelela onvekela Yehova ni murima ahu wootheene? (Esaalimu 119:145)

⁴ Okathi ninsuwela ahu wiira Yehova mpatthani oororomeleya, yoowo oniphavela mureerelo ahu, eyo pooti oniiriha ohoovelela onvekela. Mulipa-oolepa Esaalimu 119, aahiimananiha omuthokorerya Yehova ntoko mpatthani awe, okathi anvekela awe. Masi owo saanimphwanya mixankiho. Mwa ntakiheryo, atthu akina yaanimootherya wiira aanipaka itthu soohiloka. (Esa. 119:​23, 69, 78) Ikwaha sikina, nasaalimu owo aanikhulumuwa mwaha woowi aanifalyari. Hata vari siiso, khoovelela omutthukulela Yehova murima awe. — Musome Esaalimu 119:145.

5. Xeeni nihinreerela ahu weemererya moonelo woohiloka onikhoottiheryaka onvekela Yehova? Nvahe ntakiheryo.

⁵ Yehova oniphavela wiira hata ale apanke itampi suulupale, anvekeleke. (Yes. 55:​6, 7) Nto, niheemererye moonelo woohiloka onikhoottiheryaka onvekela Yehova. Mwa ntakiheryo, mutthu oneettiha eviyau, onnisuwela wiira ohaana ovaanelaka ni alipa aniwehaweha eviyau, yaawo anikhala weereportu wiira amukhaliheryeke. Niireke mutthu oneettiha eviyau, arimeela aahiiso apaka etthu yoohiloka, ohaana woovelela waavekela nikhaliheryo? Naari! Mwa enamuna emosa-ru, hata nihisuwelaka etthu yoopaka aahiiso nipanke ene etampi, nihaana onvekela Yehova wiira onikhaliherye. — Esal. 119:​25, 176.

MOOTA WONVEKELA YEHOVA NI MURIMA WOOTHEENE

6-7. Okathi nninvekela ahu Yehova, etthu xeeni enrowa onikhaliherya omuleela moonelo ni muupuwelo ahu? Nvahe ntakiheryo. (Nwehe enoota.)

⁶ Okathi nimmutthukulela ahu Yehova murima ahu, nimuleelaka muupuwelo ni moonelo ahu, eyo enninikhaliherya olipiha ompatthani ahu ni yena. Itthu xeeni nikhanle ahu oopaka wiira nimutthukuleleke Yehova murima ahu, okathi nninvekela ahu?

⁷ Muupuweleleke mikhalelo sa Yehova.a Okathi nnuupuwela ahu mikhalelo sooreera Yehova orina awe, eyo enoonikhaliherya omuleela muupuwelo ahu ni moonelo ahu. (Esal. 145:​8, 9, 18) Nrowe niwehe yoowiiraneya ya murokora Kristine, yoowo paapa awe aari ootakhala murima. Kristine onihimya so: “Okhala wiira paapa aka aari mutthu ootakhala murima, vaanikixankiha okupali wiira Yehova, Tiithi oophenta. Mwaha wa yeeyo, vaanikixankiha onvekela. Nave kuupuwela wiira Yehova aamuhiya okiphenta, mwaha wa ifaalya saka”. Mukhalelo xeeni wa Yehova waamukhalihenrye? Kristine onihimya-tho so: “Wuupuwelela ophenta woororomeleya wa Yehova, waahikikhaliherya woona wiira Yehova, onnikiphenta. Nave kinnisuwela wiira okathi wootheene onrowa okikhaliheryaka. Hata kifalyariki, Yehova khonrowa ohiya okiphenta ni okikhaliherya. Okathi kinuupuwela aka wiira Yehova onnikiphenta, eyo ennikikhaliherya omuleela itthu sinikihakalaliha ni itthu sinikiriipiha murima”.

8-9. Wuupuwela etthu yoohimya muhinatthi ovekela, enrowa wookhaliheryani sai? Nvahe ntakiheryo.

⁸ Muupuweleke etthu munrowa anyu ohimya. Mwa ntakiheryo, muhinatthi ovekela, mwiikoheke so: ‘Muxankiho xeeni kirina aka niinaano-va? Kiireke ookhala mutthu kinipirisari aka omulevelela? Kiireke yookhala yooweeha kinipirisari aka onvekela Yehova wiira okikhaliherye oxintta?’ (2Mam. 19:​15-19) Nave hiyo pooti otthara ntakiheryo na Yesu, nuupuwelaka itthu nikhanle ahu onvekela Yehova, seiyo sinivarihana ni nsina nawe, Omwene awe ni etthu oniphavela awe. — Math. 6:​9, 10.

⁹ Okathi murokora oniihaniwa Aliska, aasuwenle awe wiira iyawe aahimphwanya kanser a moottoopareni aahiiso a mooramatthani, yoowo aarowa omwiiva, vaanimuxankiha onvekela Yehova. Aliska onitthokiherya so: “Okathi kaapacenrye aka ovekela, kaanixanka kihinoona yoohimya”. Etthu xeeni yaamukhalihenrye Aliska? Aliska onihimya so: “Kihinatthi ovekela, kaanaavya okathi wiira kuupuwelele etthu kaarowa aka omuleela Yehova. Nto eyo yaanikikhaliherya, ohiya paahi omuleela mixankiho saka, masi-tho, omuleela oretta wa iyaka. Okathi kinipakaka eyo, kinnikhala oomaaleleya ni kinniwerya onvekela Yehova myaha soovirikana”.

10. Xeeni ninreerela ahu oviriha okathi munceene nivekelaka? (Nwehe ifootu.)

¹⁰ Muhivekeleke mwaakuveyasaka. Ekeekhai wiira mavekelo ookhuveya, anninikhaliherya omwaattamela Yehova. Masi vaavo ninviriha ahu okathi munceene ninvekelaka Yehova, eyo enninikhaliherya omuleela itthu sootheene siri vamurimani vahu ni moonelo ahu.b Iyawe murokora Aliska, oniihaniwa Elijah, onihimya so: “Vaavo kaaviriha aka okathi munceene kinvekelaka Yehova, eyo yaanikikhaliherya olipiha ompatthani aka ni yena. Moohicikha okathi kiniviriha aka kinvekelaka, Yehova toopixa murima ni onnikilipelela omaliha ovekela waka”. Mweererye opaka ela: Muthanle okathi aahiiso opuro munrowa anyu onvekela Yehova, ehikhanle etthu enrowa owaakanyeryani, ni mukhanle anyu ooviriha okathi munceene nvekelaka, woonasa wene, mulavulaka ni nsu noowiiwanyeya. Nave-tho, mwiimananiheke opaka eyo mahiku anittharelana.

MUUPUWELEKE MATAKIHERYO OOLOKA ARI MBIIBILIYANI

11. Moota xeeni mavekelo a arumeyi a Yehova aniromoliwa mbiibiliyani, anrowa aya wookhaliheryani? (Nwehe ekaaxa eni: “Niireke Muxankiho Aya Onoolikana ni Muxankiho Anyu?”)

¹¹ Etthu ekina enrowa wookhaliheryani, ori wuupuwela itthu arumeyi a Yehova a khalai, yaahimmye aya okathi yaavekela aya ni yiipa aya isipo sanvuwiha Yehova. Okathi munrowa anyu owehaka moota arumeyi awo a Muluku, yaamuleela aya moonelo ni muupuwela aya, eyo enimookhaliheryani omutthukulela Yehova murima anyu, okathi munivekela anyu. Nave mavekelo aya, pooti wookhaliheryani ophwanya moolumo masya, mukhanle anyu oorumeela okathi munivekela anyu. Nave-tho, munrowa oweha mixankiho arumeyi a Yehova yaarina aya, ni munoophwanya mavekelo, yaawo yaapanke aya anivarihana ni makhalelo anyu.

12. Okathi nnuupuwela ahu mavekelo a arumeyi a Yehova a khalai, makoho xeeni ninreerela ahu wiikoha?

¹² Okathi munisoma anyu mavekelo a arumeyi a Yehova a khalai ari mbiibiliyani, mwiikoheke so: ‘Ti pani aapanke nivekelo nla? Makhalelo a okumi awe yaari sai? Etthu xeeni yaamwiirihale ovekela siisa? Kiireke kihaana orumeela moolumo mamosa-ru okathi kinivekela aka? Nivekelo nla, ninkiixuttiha exeeni?’ Pooti ophavelaka opeskisari wiira mwaavye waakhuliwa wa makoho ala, masi opaka eyo, onimookhaliheryani vanceene. Nrowe nithokorerye mavekelo 4.

13. Nivekelo Ana aapanke awe, ninniixuttiha exeeni? (1 Samuweli 1:​10, 11) (Nwehe eteseenyu vakaapani.)

¹³ Mmusome 1 Samuweli 1:​10, 11. Okathi Ana aapanke awe nivekelo nla, owo aahikhalana mixankiho miili suulupale. Ana khaayara, nave aanihasuliwa ni muthiyana mukina aatheliwe ni iyawe. (1Sam. 1:​4-7) Niireke wookhala muxankiho muniwanana anyu okhuma khalai? Nivekelo Ana aapanke awe, ninwiixuttihani exeeni? Ana, aahiviriha okathi munceene onvekelaka Yehova. Masi, nuumala opaka eyo, owo aahimaaleleya. (1Sam. 1:​12, 18) Nave hiyo nnoophwanya omaaleleya, vakhala wiira ‘nnoomurihela Yehova muritti ahu woolemela’, niire so, vakhala wiira nnoomuleela Yehova itthu sootheene sinnixankiha. — Esal. 55:22.

14. a) Etthu xeeni ekina ntakiheryo na Ana ninniixuttiha aya? b) Etthu xeeni enrowa onikhaliherya omutthukulela Yehova murima ahu? (Nwehe enoota.)

¹⁴ Nuuvira iyaakha vakhaani, nuumala omuyara mwanawe aihaniwa Samuweli, Ana aahirowa onvahererya namukuttho muulupale aihaniwa Eli. (1Sam. 1:​24-28) Nivekelo aapanke awe, Ana aahimuxukhurela Yehova maana aahoona wiira Yehova onnaakhapelela arumeyi awe oororomeleya.c (1Sam. 2:​1, 8, 9) Hata mixankiho sawe sa vatthokoni sahaamanle, Ana aaniwehexexa moota Yehova aamureeliha awe. Etthu xeeni nniixutta ahu? Nniixutta wiira, nnoowerya ovilela mixankiho sahu, vakhala wiira nnoowehexexaka moota Yehova onnikhaliherya awe mpakha-va.

15. Ntakiheryo na profeta Yeremiya, ninniixuttiha exeeni okathi atthu akina annithokorerya aya moohixariya? (Yeremiya 12:1)

¹⁵ Mmusome Yeremiya 12:1. Waahikhala okathi, profeta Yeremiya oona awe wiira atthu ootakhala yaanihakalala ni yaanikhala saana. Nave aanikhulumuwa okathi aisarayeli akhwaawe, yaamuthokorerya aya moohiloka. (Yer. 20:​7, 8) Nto, hiyo pooti okhalanaka moonelo mmosa-ru aarina awe profeta Yeremiya, okathi atthu akina annithokorerya aya moohixariya ni okathi nnaaweha ahu atakhali athaaciriki. Nnaamwi Yeremiya aamulenle Yehova itthu sootheene saamuxankiha, owo khaamoothenrye Yehova wiira aapaka itthu soohiloka. Okupali wawe exariya ya Yehova, waahilipa okathi anwehale awe Yehova aaphukela aka atthu awe yaapaka itthu soohiloka. (Yer. 32:19) Nave, hiyo nihaana omuleela Yehova moota atthu akina annithokorerya aya moohixariya. Nave-tho, nihaana okupali wiira okathi wooreerela, Yehova onoopaka itthu mwa xariya.

16. Ntakiheryo na mulevi, ninniixuttiha exeeni okathi ninkhalana ahu mixankiho? (Esaalimu 42:​1-4) (Nwehe ifootu.)

¹⁶ Musome Esaalimu 42:​1-4. Esaalimu ela, yaalempwale ni mulevi, yoowo aaroihiwe weepotthani ni ahaawerya omukokhorela Yehova mutemplo ni aisarayeli akina. Mulevi owo onnihimya moonelo awe. Woonasa wene, hiyo pooti okhalana moonelo aarina awe mulevi, okathi onniphwanya aya oretta nihinawerya okhuma owaani aahiiso okathi nintthukweliwa ahu mukhatteya mwaha wa waamini wahu. Ikwaha sikina hiyo pooti ohakalalaka, masi okathi mukina nnariipiwa murima. Moohicikha moonelo ahu, nihaana onvekela Yehova nimuleelaka itthu sinnixankiha. Opaka eyo, enoonikhaliherya okhalana moonelo wooloka ni ohiliyala itthu sirina efaita. Mwa ntakiheryo, mulevi ole aahoona wiira aamukhalana eparakha ekina ya onvuwiha Yehova. (Esal. 42:5) Nave aanuupuwela moota Yehova aamukhapelela awe. (Esal. 42:8) Onvekela Yehova ni murima ahu wootheene, onoonikhaliherya osuwela etthu enniiriha okhalana moonelo owo, okhalana murettele ni owerya ovilela.

17. a) Nivekelo na profeta Yoona ninniixuttiha exeeni? (Yoona 2:​1, 2) b) Wuupuwelela moolumo ari mbiibiliyani, anrowa onikhaliherya sai okathi wa mixankiho? (Nwehe enoota.)

¹⁷ Mmusome Yoona 2:​1, 2. Profeta Yoona, aahipaka nivekelo nla okathi aari awe mmirimani mwa ehopa yuulupale. Nnaamwi aamutthyawa Yehova, Yoona aanikupali wiira Muluku anwiriyana nivekelo nawe. Okathi aavekela awe, Yoona aahirumeela moolumo manceene aniphwanyaneya eliivuru ya Isaalimu.d Owo aanisuwela oratteene isaalimu iyo. Okathi uupuwelela awe isaalimu iyo, Yoona aanikupali wiira Yehova ammukhaliherya. Mwa enamuna emosa-ru, vaavo nnuupuwelela ahu moolumo a mbiibiliyani, awo pooti onimaaliha vaavo nninvekela ahu Yehova okathi wa mixankiho.

MUHIHIYE OMWAATTAMELA YEHOVA MUNVEKELAKA

18-19. Yoolepa ya aRoma 8:​26, 27, ennikhaliherya sai okathi nihinoona ahu etthu yoohimya nanvekelaka Yehova? Nvahe ntakiheryo.

¹⁸ Mmusome aRoma 8:​26, 27. Okathi mukina, ninnixanka vanceene nihinawerya omuleela Yehova moonelo ahu. Etthu xeeni enrowa onikhaliherya okathi owo? Etthu enrowa onikhaliherya tiila: Ikuru soowaarya pooti “onivekelela”. Mwa enamuna xeeni? Yehova aahirumeela ikuru sawe soowaarya, wiira owiirihe alipa-yaamulepa Biibiliya olepa mavekelo manceene. Vakhala wiira khaninwerya omuleela Yehova moonelo ahu okathi ninvekela ahu, Yehova pooti orumeela mavekelo ari mbiibiliyani, anakhala ntoko ti hiyo nivekenle. Nto onimwaakhula mavekelo awo, mwa mureerelo ahu.

¹⁹ Osuwela eyo, yaahimukhaliherya murokora mmosa onikhala oRússia oniihaniwa Yelena. Owo aahitthukweliwa mukhatteya mwaha wa ovekela ni omusoma Biibiliya. Yelena aahiriipiwa murima vanceene ohinawerya ovekela. Owo onitthokiherya so: “Okathi kinixanka aka kihinawerya ovekela, Yehova pooti waakhula mavekelo a arumeyi awe a khalai anakhala ntoko mavekelo aka. . . . Nto eyo yaahikimaaliha vanceene okathi ole wa mixankiho”.

20. Okathi ninxanka ahu, etthu xeeni nikhanle ahu oopaka nihinatthi ovekela?

²⁰ Okathi ninxanka ahu nnanvekela Yehova, pooti ohiweryaka omuleela etthu naaphavela ahu. Etthu xeeni enrowa onikhaliherya? Etthu enrowa onikhaliherya, ori waawiriyana autiyu a eliivuru ya Isaalimu. Nimutakihaka Davidi, nihaana olepa moonelo ahu. (Esal. 18, 34, 142; moolumo oopacerya.) Ekeekhai ti yoowi, khasikhanle ireekera sa itthu nikhanle ahu oopaka nihinatthi ovekela. (Esal. 141:2) Nto mwiimananiheke oweha etthu enrowa wookhaliheryani.

21. Xeeni ninreerela ahu onvekela Yehova ni murima ahu wootheene?

²¹ Ti voohakalaliha osuwela wiira Yehova onnisuwela moonelo ahu, hata nihinatthi onvekela. (Esal. 139:4) Hata vari siiso, owo onnihakalala okathi nnivekela ahu, maana nnooniherya wiira ninnimuroromela ni murima ahu wootheene. Nto, muhooveleleke onvekela Tiithi inyu a wiirimu. Murumeeleke mavekelo alempwale mbiibiliyani wiira yookhaliheryeni. Muhihiye ovekela ni murima anyu wootheene. Nave mmuleeleke Yehova itthu sinoohakalalihani ni sinooriipihani murima. Yehova mpatthani anyu muulupale, tivonto okathi wootheene onrowa wookhaliheryakani!