Ophenta wa Muluku Khonimala

1-2. Muxankiho xeeni onaaphwanya makristau manceene?

NKAHAYA mmuupuwele pakiti ori ene mphareya eriyari, okathi enoopa aya epheyo yuulupale. Mawimpi ootupa annimukakhela osulu ni vathi. Vakhala wiira khuuvo mutthu onrowa omurihela nankura mmaasini, pakiti owo onoorowa khula opuro maasi animukakhela aya. Masi nankura onoomwiiriha pakiti ohikhuma opuro ori awe ni ohirimeela.

² Okathi sinoophwanyaayani mixankiho suulupale, nyuwo pooti olikanaka ni pakiti ole nimulavunle ahu. Nave moonelo anyu pooti oturukeya vanceene. Nihiku nimosa, nyuwo pooti okupaliki ni murima wootheene wiira Yehova onnoophentani ni onnookhaliheryani. Masi, nihiku nikina, nyuwo pooti waanyiheryaka akhala wiira Muluku onnoophentani ni onniweha mixankiho munivilela anyu. (Esal. 10:1; 13:1) Woonasa wene, mpatthani anyu pooti olavula moolumo anrowa wookhaliheryani ni anrowa owiirihani woona saana mwa okathi vakhaani. (Mir. 17:17; 25:11) Masi nuuvira okathi, munatthikela waanyiherya akhala wiira Yehova onnoophentani ni onnookhaliheryani. Nave pooti opaceryaka wiikoha vakhala wiira Yehova khoonyanyanleni. Munrowa omulipiha sai nankura anyu, okathi sinoophwanyaayani mixankiho iyo? Munrowa owerya sai ohihiya okupali wiira Yehova onnoophentani ni onnookhaliheryani?

3. a) Anitaphulela exeeni moolumo oowi “ophenta woororomeleya” ari Esaalimu 31:7 ni 136:1? b) Xeeni ohimyaka wiira Yehova ntakiheryo nuulupale na ophenta woororomeleya? (Nwehe eteseenyu.)

³ Enamuna emosa nikhanle ahu oomulipiha nankura ahu okathi wa mixankiho, ori ohiliyala wiira Yehova onniniphenta. (Musome Esaalimu 31:7; 136:1.) Moolumo oowi “ophenta woororomeleya”, anooniherya opatthani wuulupale ni ohinimala mutthu onikhalana awe ni mukhwaawe. Yehova tori ntakiheryo nuulupale na ophenta ni ororomeleya. Tthiri, Biibiliya onnihimya wiira Yehova toosareya ophenta ‘wororomeleya’. (Okhu. 34:​6, 7) Omuhimyaka Yehova, Biibiliya onihimya so: “Ophenta wanyu woororomeleya, ti wuulupale para atthu ootheene anoovekelani”. (Esal. 86:5) Moolumo ala anitaphulela exeeni? Anitaphulela wiira Yehova khonikhala-khala aanyanyalaka arumeyi awe oororomeleya! Ohiliyala wiira Yehova toororomeleya, pooti wookhaliheryani okathi wa mixankiho, ntoko siisaale nankura onimukhaliherya awe pakiti okathi wa epheyo yuulupale. — Esal. 23:4.

OPHENTA WA YEHOVA ETTHU YOOPACERYA NNIIXUTTA AHU MBIIBILIYANI

4. Muhimye matakiheryo a soowiixuttiha soopacerya sa mbiibiliyani ni etthu enniiriha okupali soowiixuttiha iyo.

⁴ Enamuna ekina nikhanle ahu oomulipiha nankura ahu okathi wa mixankiho, ori wuupuwela wiira ophenta wa Yehova etthu yoopacerya nniixutta ahu mbiibiliyani. Anitaphulela exeeni para nyuwo, moolumo oowi “soowiixuttiha soopacerya sa mbiibiliyani”? Woonasa wene, nyuwo munuupuwela ikeekhai soopacerya mwiixuntte anyu Nuulumo na Muluku. Mwa ntakiheryo, mwaahiixutta wiira nsina na Muluku ti Yehova, Yesu Mwaana mmoseene a Muluku, alipa-ookhwa khanisuwela etthu ni elapo enrowa okhala eparayiisu, yeeyo apinaatamu anrowa aya okhalaka mahiku ootheene. (Esal. 83:18; Mus. 9:5; Yoh. 3:16; Wis. 21:​3, 4) Nuumala okupali wiira soowiixuttiha iyo ti seekeekhai, khamweemerenrye-tho owokiwa ni mutthu mukina. Mwaha wa xeeni? Mwaha woowi, mwaanikupali wiira soowiixuttiha iyo ti seekeekhai ni sinnivarihana ni Biibiliya. Nrowe niwehe moota yoowiixuttiha yoopacerya ya mbiibiliyani yoowi Yehova toophenta, enrowa aya wookhaliheryani ohiya muupuwelo woohiloka woowi Yehova khonoophentani ni khoniweha mixankiho sanyu.

5. Muhimye moota mutthu okhanle awe ookhootta soowiixuttiha soowoothiwa.

⁵ Okathi mwaapacenrye anyu omusoma Biibiliya, etthu xeeni yookhalihenryeni okhootta soowiixuttiha soowoothiwa? Woonasa wene, etthu yookhalihenryeni waari olikanyiha itthu mwiixuttihiwe anyu etiini anyu ni itthu mwiixutta anyu mbiibiliyani. Nrowe nithokorerye ntakiheryo nla: Muupuwele wiira munikupali wiira Yesu, Muluku Oowerya Sootheene. Nuumala opacerya omusoma Biibiliya, muniikoha so: ‘Kiireke yoowiixuttiha ela ti yeekeekhai?’ Nuumala osuwela ele Biibiliya oniixuttiha awe voohimya sa mwaha owo, nyuwo munnoona wiira Yesu khahiyo Muluku Oowerya Sootheene. Nto munnirantteliha yoowiixuttiha yoowoothiwa ni ele Biibiliya oniixuttiha awe oriki: Yesu “topacenrye opattuxiwa mwa itthu sotheene” ni “Mwaana mmoseene a Muluku”. (aKol. 1:15; Yoh. 3:18) Ekeekhai wiira soowiixuttiha soowoothiwa pooti okhala “itthu soolipexa” ni onixankiha ohiya. (2aKor. 10:​4, 5) Masi nuumala wiixutta ekeekhai, nyuwo khamunikupali-tho soowiixuttiha iyo soowoothiwa. — aFil. 3:13.

6. Xeeni munireerela anyu okupali wiira ophenta wa Yehova “onikhala mahiku ootheene”?

⁶ Nyuwo pooti opaka etthu emosa-ru ni ele Biibiliya oniixuttiha awe sa ophenta wa Yehova. Okathi munikhalana anyu mixankiho, munaanyiherya vakhala wiira Yehova onnoophentani, mwiikoheke so: ‘Kiireke kinnuupuwela mwa enamuna yooloka?’ Nuumala-vo, mulikanyiheke moonelo anyu ni ophenta wa Yehova oniromoliwa Esaalimu 136:​1, yeeyo eri yoolepa ya mwaha ola. Xeeni Yehova onihimya awe wiira ophenta wawe ti “woororomleya”? Xeeni moolumo oowi “ophenta wawe woororomeleya onikhala mahiku ootheene”, anitthikeliwa aya ikwaha 26 Esaalimu ela? Ntoko nithokorenrye ahu, ophenta woororomeleya Yehova oniwooniherya awe arumeyi awe, yoowiixuttiha yuulupale ya mbiibiliyani, ntoko soowiixuttiha sikina ninkupali ahu siri mbiibiliyani. Muupuwelo woowi Yehova khonoovahani efaita aahiiso khonoophentani, ti weethiru. Nto, muhaana okhootta moowaakuveya ntoko mwaarowa anyu okhootta soowiixuttiha sikina soowoothiwa!

7. Muhimye soolepa sinnikupaliha wiira Yehova onniniphenta.

⁷ Mbiibiliyani sookhala itthu sinceene sinooniherya wiira Yehova onniniphenta. Mwa ntakiheryo, Yesu aahaaleela awiixutti awe wiira: “Nyuwo mookhalana efaita yuulupale ovikana iphera sinceene”. (Math. 10:31) Yehova mwaneene, aahaaleela arumeyi awe wiira: “Miyo kinnolipihani: kinnokhaliheryani. Ayo! Kinnovarelani ni ntata naka”. (Yes. 41:10) Tthiri, moolumo ala toolipiha. Moone wiira Yesu khaahimmye wiira: ‘Nyuwo mwaamukhalana efaita ovikana iphera sinceene’. Nave Yehova khaahimmye wiira: ‘Miyo kaamookhaliheryani’. Masi Yesu aahimmye wiira: “Nyuwo mookhalana efaita yuulupale ovikana iphera sinceene”. Nave Yehova aahimmye wiira: “Miyo kinnokhaliheryani”. Akhala wiira okathi wa mixankiho khamunikupali wiira Yehova onnoophentani, soolepa iya sinimookhaliheryani woona wiira Yehova onnoophentani. Nave-tho, sinoowiirihani okupali wiira Yehova onnoophentani. Soolepa iya sinihimya ekeekhai. Vakhala wiira ninrowa wuupuwelelaka oratteene soolepa iya ni onvekela Yehova wiira onikupalihe, nnoowerya olavula moolumo ari 1 Yohani 4:​16, yaawo ani: “Hiyo ninnisuwela ni okupali wira Muluku onniniphenta”.a

8. Mpakeke exeeni akhala wiira ikwaha sikina munnaanyiherya wiira Yehova onnoophentani?

⁸ Ankhi akhala wiira ikwaha sikina, khamunikupali wiira Yehova onnoophentani? Mulikanyihe moonelo anyu ni itthu munisuwela anyu voohimya sa Yehova. Ntoko Biibiliya onniixuttiha awe, moonelo ahu khoniroromeleya, masi ophenta wa Yehova ti woororomeleya. Naahikupaliki wiira Yehova onniniphenta, weeso khaninvaha efaita mukhalelo muulupale wa Yehova, eyo piiyo, ophenta. — 1Yoh. 4:8.

MUUPUWELEKE WIIRA YEHOVA ‘ONNOOPHENTANI’

9-10. Yesu aaphavela ohimya exeeni ni moolumo oowi: “Atiithi annoophentani”, ari Yohani 16:​26, 27? (Nwehe efootu.)

⁹ Nnoowerya wiixutta itthu sikina sinooniherya wiira Yehova onniniphenta, nithokoreryaka moolumo Yesu aahimenrye awe awiixutti awe, yaawo ani: “Atiithi annoophentani”. (Mmusome Yohani 16:​26, 27.) Yesu khaalavunle moolumo ala ophavelaka paahi waahakalaliha awiixutti awe. Iversiikulu siri ahinatthi moolumo ala, ninnoona wiira Yesu khaalavula moonelo wa awiixutti awe. Masi aalavula mwaha mukina, eyo piiyo, ovekela.

¹⁰ Yesu aahaaleela awiixutti awe wiira yaahaana ovekelaka mwa nsina nawe, ohiya onvekela yoowo. (Yoh. 16:​23, 24) Ola waari mwaha muulupale, awiixutti ale yaareerela aya osuwela. Nuumala Yesu ohihimuxiwa, pooti wiira awiixutti yaarowa ophavelaka onvekela Yesu. Mweekeekhai, awiixutti ale yaari apatthani a Yesu. Awiixutti yaarowa wuupuwela wiira, okhala wiira Yesu aanaaphenta vanceene, owo aarowa ophavela owiriyana itthu yaavekela aya ni omuleela Tiithi awe wiira aakhaliherye. Masi Yesu aahaaleela wiira ahuupuweleke mwa enamuna eyo. Mwaha wa xeeni? Mwaha woowi, Yesu aahaaleela wiira: “Atiithi annoophentani”. Moolumo awo, aniirela mpantta soowiixuttiha soopacerya sa mbiibiliyani voohimya sa ovekela. Nkahaya muupuwele etthu moolumo ala anitaphulela aya para nyuwo. Okathi mwaamusoma anyu Biibiliya, mwaahimusuwela ni omphenta Yesu. (Yoh. 14:21) Mwaatakihaka awiixutti ale, munoowerya onvekela Muluku, mukupaliki ni musuwelaka wiira Yehova mwaneene ‘onnoophentani’. Khula okathi muninvekela anyu Yehova, munnooniherya wiira munnikupali moolumo awo. — 1Yoh. 5:14.

MMUSUWELEKE OLE ONIWIIRIHANI WAANYIHERYA

11. Xeeni Satana aarowa awe ohakalala vakhala wiira naamwaanyiherya wiira Yehova onniniphenta?

¹¹ Ti pani onniiriha waanyiherya vakhala wiira Yehova onniniphenta? Nyuwo pooti waakhula wiira: Satana tonniiriha wuupuwela mwa enamuna eyo. Nave sookhala itthu sinceene sinniiriha ohimya siiso. Diabo, ‘oniphavela onikhuura’, nto vammusivela oniweha naanyiheryaka wiira Yehova onniniphenta. (1Ped. 5:8) Okhala wiira Yehova onniniphenta, owo oonivaha yoowoopola. Nto Satana oniphavela nuupuweleke wiira yoowoopola, kheniwerya ottipiha itampi sahu. (aHep. 2:9) Ti pani onrowa ohakalala akhala wiira ninrowa waanyiheryaka wiira Yehova onniniphenta? Ti Satana. Nave, ti pani onrowa ohakalala akhala wiira nnookhulumuwa ni ohiya omurumeela Yehova? Ti Satana. Tthiri, Satana oniphavela nuupuweleke wiira Yehova khonniphenta. Masi eyo khahiyo ekeekhai. Ekeekhai ti yoowi, Yehova khonimphenta Satana. Vano Satana onnirumeela “miteko soolavilavi”, ophavelaka oniiriha wuupuwela wiira khanimphentiwa ni Yehova. (aEef. 6:11) Okathi ninsuwela ahu etthu nwanani ahu oniphavela awe opaka, hiyo ninrowa otepaka ‘omukhootta Diabo’. — Yak. 4:7.

12-13. Okhala wiira niyariwe nirina ene etampi, eyo enniiriha wuupuwela exeeni?

¹² Yookhala etthu ekina, ekhanle ooniiriha waanyiherya vakhala wiira Yehova onniniphenta. Etthu xeeni? Etthu ene, ti etampi niravihiwe ahu. (Esal. 51:5; aRom. 5:12) Etampi, pooti ohonona ompatthani apinaatamu arina aya ni Mpattuxa. Nave etampi, pooti ohonona muupuwelo ahu, murima ahu ni erutthu ahu.

¹³ Etampi, pooti oniiriha ohikhalana muupuwelo wooloka, wiivaha nthowa, oxanka, ohikhala oovareleleya ni wuuliwa muru. Hiyo, pooti okhalana miyoonelo iyo, otepexa wene okathi nimpaka ahu etampi. Nave-tho, pooti okhalana miyoonelo iyo mwaha woowi niyariwe nirina ene etampi. (aRom. 8:​20, 21) Ntoko siisaale epenewu ya ekaaro yaphuleya ehineetta aya saana, mwa enamuna emosa-ru, khaninwerya opaka itthu ntoko nipattuxiwe ahu, okhala wiira niyariwe nirina ene etampi. Nto mwaha wa yeeyo, ikwaha sikina ninnaanyiherya vakhala wiira Yehova onniniphenta. Okathi eyo eniiraneya aya, nuupuweleke wiira Yehova, “Muluku muulupale ni oowoopiha, . . . oniwooniherya ophenta woororomeleya ale animphenta ni aneettela sooruma sawe”. — Neh. 1:5.

14. Mukuttho woowoopola onrowa onikhaliherya sai ohiya waanyiherya wiira Yehova onniniphenta? (aRoma 5:8) (Nwehe ekaaxa eni: “Mukhalane Ephoole Wiira ‘Muhiwokiwe ni Owerya wa Etampi’”.)

¹⁴ Ekeekhai wiira okathi mukina, pooti wuupuwelaka wiira khanimphwanela ophentiwa ni Yehova. Masi mwaha woosuwela wiira khinaaphwanela ophentiwa ni Yehova, eyo enniniiriha ovaha efaita yinceene oniphenta wawe. Musuweleke wiira Yehova khonniphenta mwaha woowi erookhala etthu nipanke ahu wiira niphwanelele. Hata vari siiso, mukuttho woowoopola onnikhuneela itampi sahu. Nave Yehova oonivaha mukuttho owo mwaha woowi onniniphenta. (1Yoh. 4:10) Muhiliyale wiira Yesu aahirwa valaponi wiira owoopole anatampi, ohiya atthu ahirina etampi. (Mmusome aRoma 5:8.) Khuuvo mutthu oniwerya opaka itthu moomalela. Nave, Yehova khonilipelela wiira ninrowa opakaka itthu moomalela. Okathi ninsuwela ahu wiira etampi tenniiriha waanyiherya vakhala wiira Yehova onniniphenta, osuwela iwo onniniiriha wiimananiha wiira nihiye muupuwelo owo woohiloka. — aRom. 7:​24, 25.

MUHIHIYE OROROMELEYA

15-16. Nikupaliki exeeni vakhala wiira khannihiya ororomeleya wa Yehova ni mwaha wa xeeni? (2 Samuweli 22:26)

¹⁵ Yehova oniphavela wiira nipake yoothanla yooloka, eyo piiyo, ninvarexexeke yoowo. (Otum. 30:​19, 20) Vakhala wiira nnoopaka eyo, nikupaliki wiira Yehova khonrowa ohiya ororomeleya wa hiyo. (Mmusome 2 Samuweli 22:26.) Akhala wiira khannihiya ororomeleya wa Yehova, nikupaliki wiira onoonikhaliherya khula muxankiho onrowa oniphwanya mookumini mwahu.

¹⁶ Ntoko nithokorenrye ahu mwaha ola, sookhala itthu sinceene sinnikupaliha wiira nnoowerya okhala oolipa, okathi sinniphwanya aya mixankiho niinaano-va ni muhoolo. Ninnisuwela wiira Yehova onniniphenta ni onrowa onikhaliheryaka. Tthiri eyo, ti etthu Biibiliya oniixuttiha awe. Okathi nnaanyiherya ahu vakhala wiira Yehova onniniphenta, nihaana wuupuwela itthu ninsuwela ahu wiira ti seekeekhai, ohiya otthara moonelo ahu. Ntoko Biibiliya onihimya awe, nihihiye okupali wiira ophenta woororomeleya wa Yehova, khonimala.