Muhiliyaleke Waavekelela Atthu Akina

1. Ninsuwela sai wiira Yehova onnivaha efaita mavekelo ahu?

OVEKELA, yoovaha yuulupale enikhuma wa Yehova. Nkuupuwelani ela: Yehova oothanla miteko sikina wiira sivariweke ni malaikha. (Esal. 91:11) Nave owo onvaha Mwanawe miteko suulupale ni sirina efaita yinceene. (Math. 28:18) Masi niireke onvaha mutthu mukina eparakha ya wiiwa ni waakhula mavekelo? Nnaari. Nivekelo, etthu mwaneene ene Yehova othanlale awe wiira owiriyaneke ni aakhuleke mmansawe. Yehova paahi, tuule ‘oniiwa mavekelo’ ahu. — Esal. 65:2.

2. Ntakiheryo xeeni Paulo ovahale awe na waavekelela atthu akina?

² Nnaamwi nirina ene eparakha ya onvekela Yehova nimuleelaka mixankiho sahu, masi nihiliyaleke waavekelela atthu akina. Murummwa Paulo, aanaavekelela atthu akina. Mwa ntakiheryo, owo aahaalepela anna a muloko wa wEefeso, ohimyaka so: “Nkinahiye wooromolani kaavekelaka”. (aEef. 1:16) Nave-tho, owo aanaavekelela atthu akina oromolaka masina aya. Mwa ntakiheryo, Paulo aahimuleela Timootheyo wiira: “Kinnimuxukhuru Muluku, . . . okathi wotheene kinivekela aka, kinniwuupuwelani othana ni ohiyu”. (2Tim. 1:3) Paulo aahikhalana mixankiho sawe aareerela awe onvekela Yehova wiira omukhaliherye. (2aKor. 11:23; 12:​7, 8) Masi hata vari siiso, owo aanaavya okathi wiira aavekelele atthu akina.

3. Xeeni okathi mukina ninliyala ahu waavekela atthu akina?

³ Okathi mukina, hiyo pooti oliyalaka waavekelela atthu akina. Mwaha wa xeeni? Murokora mmosa oniihaniwa Sabrina,a onnihimya etthu emosa enniiriha oliyala waavekelela atthu akina. Sabrina onihimya so: “Olumwenku ola, hiyo ninnaatteliwa miteko. Nto pooti owehexexaka paahi mixankiho sahu, nnamakela onvekela Yehova mwaha wa itthu nimpirisari ahu”. Niireke eyo enniwiiraneelani? Vakhala wiira enniwiiraneelani, mwaha ola onimookhaliheryani vanceene. Mwaha ola, ninrowa oweha 1) nthowa naya vari aya vooloka waavekelela atthu akina ni 2) malakiheryo anrowa onikhaliherya waavekelela atthu akina.

XEENI NINREERELA AHU WAAVEKELELA ATTHU AKINA?

4-5. Xeeni waavekelela atthu akina orina aya “owerya wuulupale”? (Yakobo 5:16)

⁴ Waavekelela atthu akina ‘wookhalana owerya wuulupale’. (Mmusome Yakobo 5:16.) Niireke waavekelela atthu akina onimwaakhaliherya? Aayo, onimwaakhaliherya. Okathi Yesu aasuwenle awe wiira murummwa Pedru aarowa omukhootta, Yesu aahimmye so: “Kinnimuxonttela Muluku wira waamini wanyu ohihononeye”. (Luka 22:32) Nave murummwa Paulo, aanisuwela wiira mavekelo pooti omukhaliherya mutthu. Okathi aatthukweliwe awe mukhatteya oRoma ohipanke etthu yootakhala, murummwa Paulo aahimulepela Fileemoni wiira: “Tthiri, kinniroromela wira mwaha wa mavekelo anyu, kinootaphuliwa kitthikele weiwo”. (Fil. 22) Eyo ti etthu yiiraneyale, maana murummwa Paulo aahitaphuliwa ni aahitthikela muteko awe woolaleerya.

⁵ Ekeekhai wiira, okathi ninvekela ahu, eyo khentaphulela wiira nimmukhanyererya Yehova opaka etthu. Owo onniweha mixankiho arumeyi awe arina aya, ni nuuvira okathi onnithanla opaka etthu, moovarihana ni etthu aninvekela aya. Osuwela eyo, enninikhaliherya onvekela Yehova ni murima wootheene, ni omuhiyerya mwaha owo nikupaliki wiira onoonikhaliherya. — Esal. 37:5; 2aKor. 1:11.

6. Waavekelela atthu akina onniiriha opaka exeeni? (1 Pedru 3:8)

⁶ Waavekelela atthu akina onninikhaliherya ‘owoonela othunku’. (Mmusome 1 Pedru 3:8.) Mutthu orina othunku, onniweha mixankiho sa atthu akina ni onnipaka etthu wiira aakhaliherye. (Mar. 1:​40, 41) Mutokweene mmosa oniihaniwa Michael, onihimya so: “Okathi kinaavekelela aka atthu akina moovarihana ni itthu anipirisari aya, eyo ennikikhaliherya osuwela mixankiho saya ni ennincererya waaphenta waka. Nave eyo, ennikikhaliherya owaattamela nnaamwi awo ahisuwelaka”. Mutokweene mukina oniihaniwa Richard, onnihimya etthu ekina yooreera enikhumelela okathi nnaavekelela ahu atthu akina. Richard onihimya so: “Okathi nninvekelela ahu mutthu, eyo enniniiriha opaka etthu wiira nimukhaliherye”. Owo onnincererya oriki: “Okathi nimmukhaliherya ahu mutthu nninvekelela ahu, ninnikhaliherya waakhuliwa mavekelo awe”.

7. Waavekelela atthu akina onnikhaliherya sai okhalana moonelo wooloka voohimya sa mixankiho sahu? (aFilipi 2:​3, 4) (Nwehe ifootu.)

⁷ Waavekelela atthu akina, onniniiriha okhalana moonelo wooloka voohimya sa mixankiho sahu. (Mmusome aFilipi 2:​3, 4.) Okhala wiira ninkhala olumwenku onilamuleliwa ni Diabo, khula mmosa a hiyo ookhala mixankiho sawe. (1Yoh. 5:19; Wis. 12:12) Vakhala wiira khula nihiku ninnaavekelela atthu akina, eyo enooniherya wiira khaninliyala wiira ‘annihu a olumwenku wotheene annihaawa ntoko hiyo’. (1Ped. 5:9) Pioneera mmosa oniihaniwa Katherine, onihimya so: “Okathi kinaavekelela aka atthu akina, nkinliyala wiira nave awo sinnaaphwanya mixankiho. Nto eyo, ennikiiriha ohiwehexexa mixankiho saka paahi”.

AWO ANNIPIRISARI OVEKELELIWA

8. Nvahe matakiheryo a atthu nikhanle ahu oowaavekelela.

⁸ Atthu xeeni nikhanle ahu oowaahela muhina okathi ninvekela ahu? Hiyo pooti waavekelela atthu ntoko: Ale aniwereiwa, amiravo, yaawo aniveehiwa aahiiso aneehereriwa opaka itthu soohiloka oskola. Nave pooti waavekelela anna ni arokora, yaawo anihaawa mwaha wa wuuluvala. Anna ni arokora anceene, annivilela mwaha wa olupatthiwa ni amusi aya aahiiso makhulupale a kuvernu. (Math. 10:​18, 36; Mit. 12:5) Nave akina, aakhuma owannyeya mwaha wa ikhotto sinikumiheriwa ni anapoliitika. Nave-tho, akina sinnaaphwanya ihasara sa ephattu. Hiyo khaninsuwela masina aya anna ni arokora awo. Hata vari siiso, nihaana waavekelela nooniheryaka wiiwelela ele Yesu onirumme awe oriki: “Mphentaneke mukina ni mukhwaawe”. — Yoh. 13:34.

9. Xeeni ninreerela ahu waavekelela anna anihoolela mmutthenkesoni mwa Yehova ni axaaraya?

⁹ Nave nihaana waavekelela anna anihoolela mmutthenkesoni mwa Yehova. Anna awo anihela muhina, anna a Nikhuuru Noolamulela ni anamakhaliherya aya, anna a Ekomisau ya Efiliyaali, masuperitententi a oBeteli, axitokweene a esirkwiitu, axitokweene a mmulokoni ni arumeyi ookhaliherya. Anna anceene a yaawo, aakhalana mixankiho saya, masi hata vari siiso, awo anniimananiha vanceene wiira anikhaliheryeke. (2aKor. 12:15) Mwa ntakiheryo, mutokweene a esirkwiitu oniihaniwa Mark, onihimya so: “Muxankiho kirina aka, ori ohiwerya waakhapelela oratteene anamuyari aka, yaawo yuuluvanle. Oowanli aya anniwereyasiwa. Nnaamwi murokoraka ni iyawe yaakhapelelaka ni yaavahaka itthu anipirisari aya, miyo kinnixanka mwaha woohikhala hoothe wiira kaakhaliheryeke”. Hata nisuwelaka aahiiso nihisuwelaka itthu sinaaxankiha anna awo, ti vooreera waavekelela. (1aTes. 5:​12, 13) Nave nihaana waavekelela axaaraya anna awo, wiira ahihiyeke waakhaliherya axiiyaya ovara saana miteko athanleliwe aya.

10-11. Niireke ovekela naahelaka muhina anna ni arokora ootheene sinaaphwanya mixankiho, onnimusivela Yehova? Mutthokiherye.

¹⁰ Ntoko nithokorenrye ahu, hiyo ninnaavekelela anna ni arokora a makhalelo oovirikana. Mwa ntakiheryo, hata nihisuwelaka masina a anna awo, nihaana onvekela Yehova wiira aakhaliherye ale atthukweliwe aahiiso aalipihe ale akhweliwe mutthu yamphenta aya. Mutokweene mmosa oniihaniwa Donald, onihimya so: “Aakhala anna ni arokora anceene, yaawo ninreerela ahu waavekelela wiira Yehova aakhaliherye ovilela mixankiho saya”.

¹¹ Niireke mavekelo awo annimusivela Yehova? Aayo! Hiyo khaninsuwela mixankiho sootheene sinaaphwanya anna ni arokora. Tivonto vari aya vooloka, ovekela naahelaka muhina anna ni arokora sinaaphwanya mixankiho. (Yoh. 17:20; aEef. 6:18) Mavekelo awo, annooniherya wiira ninnaaphenta “anna a olumwenku wotheene”. — 1Ped. 2:17.

OKATHI NNAAVEKELELA AHU ATTHU AKINA

12. Moota xeeni waasuwela anna ni arokora onrowa aya onikhaliherya?

¹² Mwaasuweleke anna ni arokora. Nnaamwi naavekelelaka anna ni arokora moovarihana ni makhalelo aya, masi ti vooloka waavekelela niromolaka masina aya. Mmulokoni mwanyu, niireke ookhala munna aahiiso murokora orina oretta muulupale? Niireke ookhala mmiravo okhulumunwe mwaha woowi onikhanyereriwa opaka itthu soohiloka oskola? Niireke ookhala paapa aahiiso maama, vanimuxankiha waahuwa anamwane mekhawe ‘ottharaka malakiheryo a Yehova’? (aEef. 6:4) Vakhala wiira nnimwiimananiha waasuwela anna ni arokora, eyo enoonikhaliherya owoonela othunku, waaphenta ni waavekelela.b — aRom. 12:15.

13. Moota xeeni nikhanle ahu oowaavekelela ale nihitonko ahu waaweha?

¹³ Mwaavekeleleke muromolaka masina aya. Hiyo pooti waavekelela anna ni arokora, hata nihitonko waaweha. Mwa ntakiheryo, nkahaya nwuupuwele anna ni arokora atthukweliwe mukhatteya ilapo ntoko: oCrimeia, wEritreia, oRússia ni oSingapura. Hiyo pooti ophwanya masina a anna ni arokora awo, esaiti ahu jw.org.c Mutokweene a esirkwiitu oniihaniwa Brian, onihimya so: “Miyo kinnilepa masina a anna ni arokora atthukweliwe mukhatteya ni kinniromola ni nsu noowiiwanyeya. Opaka eyo, ennikikhaliherya waahela muhina okathi kinivekela aka”.

14-15. Ninrowa owerya sai waavekelela anna ni arokora mooluluwanya?

¹⁴ Mpakeke mavekelo ooluluwanya. Michael, yoowo nimulavunle ahu wanipacerya wa mwaha ola, onihimya so: “Okathi kinisoma aka soowiiraneya sa anna ni arokora atthukweliwe mukhatteya, esaiti jw.org, kinniimananiha wuupuwela moota kaarowa aka woonela kaari ti miyo kitthukweliwe mukhatteya. Miyo kammananiha wuupuwela itthu sinimuxankiha mwaaraka, nave kaamweererya opaka etthu eniwerya aka wiira kimukhaliherye. Opaka eyo, ennikikhaliherya osuwela etthu yooluluwanya kikhanle aka oowaavekelela anna athenle, yaawo atthukweliwe mukhatteya”. — aHep. 13:​3, enoota.

¹⁵ Okathi nniimananiha ahu osuwela khula nihiku mixankiho sa anna ni arokora atthukweliwe mukhatteya, eyo enoonikhaliherya ophwanya etthu yooluluwanya nikhanle ahu oowaavekelela. Mwa ntakiheryo, nihaana waavekelela mapooliisiya wiira yaareereleke murima anna ni arokora awo atthukweliwe. Nave nihaana waavekelela ale arina okhulupale wiira ahaakhoottiheryeke anna awo omukokhorela Yehova. (1Tim. 2:​1, 2) Hiyo pooti waavekelela anna ni arokora wiira alipiheke waamini waya, vaavo aniweha aya olipa murima wa anna ni arokora awo atthukweliwe. Nave, nihaana waavekelela atthu ahikhanle Anamoona a Yehova aniweha mweettelo wooloka wa anna ni arokora awo atthukweliwe, wiira yeemereryeke okathi nnaalaleerya ahu. (1Ped. 2:12) Nave-tho, pooti opaka etthu emosa-ru, okathi nnaavekelela ahu anna awo, anivilela mixankiho sinaaphwanya. Nto vaavo nnaasuwela ahu anna ni arokora, waavekelela nromolaka masina aya ni waavekelela mooluluwanya, eyo enoonikhaliherya ‘wuncererya ophentana wahu’. — 1aTes. 3:12.

MUKHALANEKE MOONELO WOOLOKA

16. Okathi ninvekela ahu, ninrowa okhalana sai moonelo wooloka? (Matheyo 6:8)

¹⁶ Ntoko nithokorenrye ahu, mavekelo ahu pooti omukhaliherya mutthu sinimphwanya mixankiho. Masi nihaana okhalana moonelo wooloka. Nihiliyale wiira, okathi ninvekela ahu khahiyo nimmuleela Yehova etthu ehinsuwela awe, ni khahiyo nninvaha miruku sa moota woophuka muxankiho owo. Yehova onnisuwela itthu arumeyi awe anipirisari aya, hata awo ahisuwelaka aahiiso hiyo nihisuwelaka. (Mmusome Matheyo 6:8.) Nto xeeni ninreerela ahu waavekelela atthu akina? Etthu emosa, noolavula mwaha ola, eyo piiyo, ninnooniherya wiira ninnaakhapelela atthu akina. Nave ophenta onniniiriha waavekelela. Nto Yehova onnihakalala vaavo onaaweha awe arumeyi awe, atakihaka ophenta wawe.

17-18. Ntakiheryo xeeni ninnikhaliherya ohihiya waavekelela anna ni arokora?

¹⁷ Hata noonaka wiira mavekelo ahu khakhalihenrye ntoko naaphavela ahu, masi awo annooniherya waaphenta wahu anna ni arokora, nave Yehova onniweha. Mwa ntakiheryo, nkahaya nwuupuwele anamathelana arina anamwane anli acikhaani, mmosa mulopwana ni mukina muthiyana. Nto mwaana mwaamulopwana onawereiwa. Vano mwaana mwaamuthiyana onamuxonttela paapa awe oriki: “Xontte paapa, mmukhaliherye murokoraka. Owo onoowereiwa!” Paapa ole onnisuwela wiira mwanawe onniwereiwa, nave onnimphenta ni onnimukhapelela oratteene. Hata vari siiso, paapa owo onnihakalala vaavo oninweha awe mwanawe mwaamuthiyana, ooniheryaka wiira onnimphenta murokorawe, okathi onimuxonttela awe paapa awe wiira omukhaliherye.

¹⁸ Mwa enamuna emosa-ru, Yehova onnitumererya okhapelelana ni ovekelelana mukina ni mukhwaawe. Okathi nimpaka ahu eyo, khannooniherya wiira nniithokorerya mmensihu paahi, masi ninnooniherya wiira ninnaaphenta anna ni arokora ni murima wootheene. Nto Yehova onniweha eyo. (2aTes. 1:3; aHep. 6:10) Ntoko nithokorenrye ahu mwaha ola, mavekelo ahu pooti waakhaliherya anna ni arokora ovilela mixankiho. Tivonto, ootheene ahu nihiliyaleke waavekelela atthu akina.