Yoosoma 16

Mooniherye Wira Munnimphenta Muluku

Wira opatthani ohimale, nihaana olavulanaka ni mpatthani ahu. Nyuwo munninwiriyana navee owo onnowiriyanani. Nave-tho, nyuwo munimulavula saana mpatthani anyu waakina. Vamosaru enniiraneya n’ule ori mpatthani a Muluku. Muthokorerye enihimya Biibiliya mwa mwaha yoowo:

Mulavuleke ni Yehova khuta okathi mu nivekelo. “Muthipelele ovekela.”—aRoma 12:12, NM.

Musomeke Nuulumo na Muluku, Biibiliya. “Solempwa sotheene sivereliwe ni Muluku ni sinnivaha mureerelo wira siixuttiheke, wira sipwapweleke, wira sookololeke itthu.”—2 Timótheyo 3:16, NM.

Nwiixuttihe akina voohimya sa Muluku. “Vano, murowé, mwawixuttiheke atthu a maloko othene . . . Mwawixuttiheke wettela sothene sòrumalyakani.”—Matheyo 28:19, 20.

Mwiixattamiherye ni apatthani a Muluku. “Onetta n’asuweli onokhala musuweli.”—Miruku 13:20.

Mwetteke mmuthukumanoni Osalau wa Omwene. “Nupuwelaneke mukina ni mukhw’awe, wira nakuviheryaneke ophenta n’uvara miteko sorera . . . nlipiheryaneke.”—aHéberi 10:24, 25.

Mukhaliherye oxeererya muteko wa Omwene. “Vano, khula mutthu avaheke attharihaka murim’awe, khahiyó ni murima omuripalene, nnákhala mwaha w’okhanyereriwa: tthiri Muluku onisiveliwa n’ule onivaha murima omuttenlene.”—2 aKorinto 9:7.