Yehova Tori Mpatthani Ahu Oororomeleya
‘Abrahamu ahikhalihiwa mpatthani a Yehova’.—YAK. 2:23.
MWAAROWA WAAKHULA SAI?
Vaniweryaneya sai Yehova okhala mpatthani ahu?
Ntoko sirya aya va Esalimo 15:3, 5, Muluku onnivekela exeeni wira hiyo nikhale mpatthani awe?
Exeeni enrowa onikhaliherya otthukula murima ahu wa Mpatthani ahu oororomeleya?
1. Okhala wira Muluku oonipattuxa ailikanyihaka mmansawe, mikhalelo xeeni sirina ahu?
IKWAHA sinceene ninniiwa moolumo ani: ‘mwaana ola khareere olikana ni atithi awe’. Tthiri makhalelo aanamwane anceene anolikana ni anamuyari aya. Eyo etthu yookhalela, maana makhalelo aanamwane anikhuma wa tiithi ni maama. Masi, Yehova, tiithi ahu a wiirimu tori namavaha a ekumi. (Esal. 36:10) Nave-tho, mwaha wookhala apinaatamu, anaawe, mwa inamuna sikina ninnilikana ni Yehova. Okhala wira Muluku oonipattuxa ailikanyihaka mmansawe, nookhalana owerya wowuupuwelela saana wira nithanle etthu yoopaka, ni okhala mutthu oopatthaneya.—Maph. 1:26.
2. Etthu xeeni enimwiiriha Yehova okhala Mpatthani ahu?
2 Yehova oniphavela wira nikhale mpatthani awe oororomeleya. Ophenta wa Muluku vamosa ni omuroromela wahu yena ni Mwanawe tonilipiha ompatthani owo. Yesu aahimyale so: “Vekekhai, Muluku ahaphentexa atthu mpakha wavaha Mwan’awe mmosene, wira othene ale animwamini yowo, ehirimelé, masi ekhalane ekumi ehinimala”. (Yoh. 3:16) Aakhala matakiheryo a atthu anceene yaari apatthani a Yehova. Nrowe nthokorerye matakiheryo aatthu anli.
“ABRAHAMU, MPATTHANI AKA”
3, 4. Voohimya sa ompatthani ni Yehova, Abrahamu ovirikanne sai ni aIsarayeli?
3 Yehova aahilavula sa muhavinre ni nakhulu a nloko na Isarayeli ariki: “Abrahamu, mpatthani aka”. (Yes. 41:8) Eliivuru ya 2 Wahala 20:7, ennimuhimya-tho Abrahamu okhala mpatthani a Muluku. Nto etthu xeeni yamwiiriha mulopwana ola oororomeleya okhala mpatthani a Mpattuxa? Waari waamini wa Abrahamu.—Maph.15:6; mmusome Yakobo 2:21-23.
4 Osuulu wa Abrahamu yoole ohoolo waya waari nloko na Isarayeli, wanipacerya waanimoona Yehova okhala Tiithi aya ni Mpatthani aya. Masi, mooriipiha murima, opatthani aya ni Muluku waahimala. Mwaha wa xeeni? Mwaha woohiya waamini solaiherya sa Yehova.
5, 6. (a) Yehova okhanle sai mpatthani anyu? (b) Makoho xeeni anitthuneya ahu okohaka?
5 Okathi onitepa anyu osoma voohimya sa Yehova, munootepaka olipiha omwaamini wanyu, ni wunnuuherya omphenta wanyu. Nkatthikelani wuupuwela okathi waaxuttale anyu ekeekhai yoowi Yehova ti Muluku okhanle tthiri, ni wiira vanniweryaneya wataana ni yena. Mwahiixutta-tho wira otheene ahu niyariwe ni etampi mwaha wa ohiiwelela wa Adamu. Mwahoona wira apinaatamu otheene aarakamelana ni Muluku. (aKol. 1:21) Nto mwahiiwexexa wira Tiithi ahu oophenta a wiirimu khahiyo mutthu onikhala opuro woorakamela ohimphavela onikhaliherya. Tivonto, okathi oniixutta ahu sa mareheryo awe a mukuttho onoopola wa Yesu, ni waamini yoovaha eyo, hiyo ninnipacerya opaka ompatthani ni Muluku.
6 Okathi onuupuwela ahu mwaha ola, vannireera wiikoha so: “Opatthana waka ni Muluku ori sai? Kiireke omuroromela waka ni omphenta waka Tiithi Yehova, onnilipa khula nihiku? Mutthu mukina a khalai, ataanale saana ni Yehova, aari Gideyoni. Nrowe nithokorerye ntakiheryo nawe ni woona moota woomutakina.
‘YEHOVA TI MURETTELE’
7-9. (a) Etthu xeeni ehinliyaleya yaamwiiranenle Gedeyoni, nto etthu xeeni yaakhumelenle? (Nwehe elatarato yoopacerya.) (b) Ninrowa okhala sai mpatthani a Yehova?
7 Okathi wa mixankiho, nuumala aIsarayeli ovolowa Elapo Yolaiheriwa aya, aahikhala murumeyi a Yehova iitthaniwa Gedeyoni. Eliivuru ya Makhulupale ekapiitulu 6 enihimya wira nlaikha na Yehova naahilavula ni Gedeyoni muttetthe wa Ofra. Okathi ole, atthu a elapo ya Midiyani yanaakumiherya ekhotto aIsarayeli, yaawo yaari anamwaattamanani aya. Tivonto Gedeyoni eepettha awe etrigu wiphiini wiira aakuveleke ovitha etrigu eyo nuumala owoona anyokhani. Vootikiniha-vo, nlaikha nahimukhumelela khuhimya wira: ‘mulopwana òlipa murima ni òwerya’; Gedeyoni aaniphavela osuwela akhala wira Yehova, yoowo awooponle aIsarayeli wEjitu, aarowa waakhaliherya tthiri atthu awe. Olavulaka ntoko namitthaka a Mpattuxa, nlaikha naahimulipiherya Gedeyoni wira Yehova aarowa waakhaliherya tthiri.
8 Gedeyoni aahitikinihiwa nto onaphavela osuwela moota Yehova aarowa awe owoopola aIsarayeli mmatatani mwa atthu oMidiyani. Waakhuliwa wawe wowiiweya wari so: ‘Miyo kinokhala ni nyuwo; ti siso nyuwo munrowa wapwetexa othene vamosá’. (Makh. 6:11-16) Nlelo ophavelaka osuwela moota saarowa aya wiiraneya, Gedeyoni aahiveka ethoonyeryo. Ovaanela waya onnooneya saana wira Gedeyoni aanimoona Yehova ntoko Muluku okhanle tthiri.
9 Nto etthu yiiranen’ye moottharelana yaahilipiha waamini wa Gedeyoni ni yaahimwiiriha omwaattamela Muluku. Gedeyoni aahipaka yoolya khuvaha nlaikha nle. Okathi yoolya ele yaapantte aya mooro mwaha wa ekopo ya nlaikha, Gedeyoni aahoona wira nlaikha nle tthiri naarummwale ni Yehova. Mwaha wa woova, Gedeyoni aahikhuwela oriki: ‘Apwiya Muluku aka, vekekhai miyo kihona nlaikha na Yehova, nitho nnitho’. (Makh. 6:17-22) Nto niireke itthu siiranen’ye saahimwiiriha Gedeyoni orakamelana ni Muluku? Nnaari! Itthu iye saaromulipiha. Owo aahimusuwela saana Yehova mpakha woonaka wira aahikhalana murettele ni Muluku. Ninnisuwela eyo mwaha wa nsina noowi: ‘Yehova salom’ nanvaha awe altari aamutenke awe. Nsina nlo nintaphulela wira, ‘Yehova ti Murettele’. (Musome Makhulupale 6:23, 24) Okathi onuupuwela ahu ele Yehova enipaka awe mmureerelo ahu khuta nihiku, ninnoona wira tthiri Yehova ti Mpatthani ahu muulupale. Vaavo vanitepa ahu omwaattamela Muluku nivekelaka okathi ti okathi, nnootepaka woona murettele ni otepa olipiha opatthana wahu ni Muluku.
TI PANI ONROWA OKHALA MULETTO MPAANI MWA YEHOVA?
10. Ntoko sinihimya aya Esalimo 15:3, 5, Yehova onnivekela exeeni wira nikhale mpatthani awe?
10 Masi wira Yehova okhale Mpatthani ahu, nihaana waakhwaniherya ele eniveka awe. Ntoko silempwale aya va Esalimo 15, Davidi aahiipa ohimyaka ele enivekeliwa wira nikhale ‘muletto mpaani mwa Yehova’, eyo piiyo, okhala mpatthani a Muluku. (Esal. 15:1) Vano nrowe nithokorerye itthu piili mwa iye sinivekeliwa: Osyaka owootherya akina ni okhala mutthu ekeekhai mwa itthu sotheene. Voohimya sa mwaha owo, Davidi aahihimya sa ole oniphavela okhala muletto mpaani mwa Yehova oriki: ‘T’ule onettela exariya. . . . Ole onkhotta wakhela makhwankwa wira amutthukwe ohitthenke’.—Esal. 15:3, 5.
11. Xeeni vanitthuneya ahu wiimananiha ohiwootherya atthu akina?
11 Yoolepa ekina ya Esalimo, Davidi aahimmye so: ‘Weso mpasopeke nlumi nanyu wira muhihimye sotakhala’. (Esal. 34:14) Oheettela miruku iya sa Muluku onnimwiiriha mutthu ovalaana ni Tiithi ahu a xariya a wiirimu. Tthiri wootha ori mukhalelo wa Satana, munyokhani muulupale a Yehova. Nuulumo noowi “Diabo” ninkhuma wa elavulelo ya eGriki yoowi “nawoothe”. Okhalana ephoole ni ele enilavula ahu, onoonikhaliherya ovikaniha wataana ni Yehova. Nto ti vootepexa otthuneya wiimananiha waalavula saana anna oothanliwa a mmulokoni.—Mmusome aHéberi 13:17; 1 aTesalonika 5:12.
12, 13. (a) Xeeni vanitthuneya ahu okhala oororomeleya mwa itthu sotheene? (b) Okhala oororomeleya onrowa okumiherya exeeni wa atthu akina?
12 Ororomeleya, ohiya owiiyerya akina, ti etthu enaasuwanyeiha arumeyi a Yehova. Murummwa Paulo aalempe so: ‘Nlelo munivekeleleke hiyo. Ninnona wira murim’ahu ti worera, okhala wira mahiku othene nimphavela wira itthu mororomeleya’. (aHéb. 13:18) Okhala wira nilakenle weetta mwa enamuna ‘yororomeleya’ khinimphavela-tho waapuherya annihu. Mwa ntakiheryo, akhala wira annihu anninivarela muteko wa mulaponi, nihaana omananiha waathokorerya mookhalela ni waaliva ntoko savarihanne ahu. Ntoko maKristau ekeekhai nihaana okhalaka oororomeleya ni anamuteko ahu hata ni atthu akina. Nto akhala hiyo ninvara muteko wa munna, nikhalaneke ephoole wira nihimpuherye munnihu khiyuupuwela wira ninrowa othokoreriwa saana waavikana akina.
13 Tthiri ikwaha sinceene atthu a mulaponi annaalavula mooloka Anamoona a Yehova mwaha woororomeleya waya. Mwa ntakiheryo, diretore mmosa a empresa eniteka inupa aahimyale wira Anamoona a Yehova annaakhwaniherya khuta etthu enihimya aya. Owo aahimmye so: “Nyuwosa munnimananiha waakhwaniherya khuta etthu yalaihenrya anyu opaka”. (Esal. 15:4) Mweettelo owo wooloka onninikhaliherya ovikaniha wataana ni Yehova. Ohiya-vo onniwiiriha atthu onvuwiha Tiithi ahu a wirimu.
MWAAKHALIHERYE AKINA WIRA AKHALE MPATTHANI A MULUKU
14, 15. Mmuteko ahu wolaleerya, ninrowa waakhaliherya sai akina okhala mpatthani a Muluku?
14 Nnaamwi atthu akina akupaliki wira Muluku ookhala, anamunceene anikumanana ahu nilaleeryaka, khanimoona okhala Mpatthani aya oororomeleya. Nto naakhaliheryeke sai? Nkathokoreryani malakiheryo Yesu aavanha awe awiixutti awe 70, okathi aarummye awe anli-anli wira yalaleerye, owo ahahimyeerya wira: ‘Khula etthoko enkelanyu omaka, mpajeryeke wira: ‘Murettele okhalé etthoko ela’. Akhalá weiwo mpatthani a murettele, mwa yowo onokhala murettele anyu. Ahikhalé mutthu sisa, murettele onimohokolowelani’. (Luka 10:5, 6) Nalavula mopatthaneya nnoowerya owiiriha atthu akina osiveliwa ekeekhai. Wa atthu yaale annivaanyiha, opatthaneya onowiiriha ohipaka etthu yoowali ni woonasa wene owiiriha weemya ovaanela ikwaha sikina.
15 Namphwanya mutthu oninyeserya etiini yoowoka wala onitthara muupuwelo woohikhala wa mBiibiliyani, nihaana ovikaniha okhala oopatthaneya ni a murettele. Tivonto niwaakheleke saana atthu yaale ahinisiveliwa ni makhalelo a mulaponi, nto anirwa mmuthukumanoni wira yiixutte sa Muluku onimukokhorela ahu. Myaha sinikhumela murevistani mwahu sini: “Biibiliya Onnirukunuxa Mirima sa Atthu”, sinnooniherya wira atthu anceene annirukunuxa mirima saya mwaha wa ekeekhai.
OVARA MUTEKO NI MPATTHANI AHU OOROROMELEYA
16. Vaniweryaneya sai hiyo okhala mpatthani ni ‘namavara muteko vamosa ni Muluku’?
16 Vannikhweya okhala mpatthani a mutthu yoole onivarana ahu muteko. Tivonto, otheene yiivaherenrye wa Yehova, aakhalana iparakha piili: okhala mpatthani awe, ni ‘ovaraka muteko vamosa ni Muluku’. (Mmusome 1 aKorinto 3:9.) Tthiri, vaavo vanitepa ahu olaleerya ni waapaka awiixutti, hiyo nnootepaka osuwela saana mikhalelo sooreerexa sa Tiithi ahu a wiirimu. Ninnoona-tho moota munepa awe woowaarya onnikhaliherya awe ovara saana muteko woolaleerya ihapari sooreera.
17. Moota xeeni yoolya ya omunepani enikumiheriwa okongresuni ni asembeleya enooniherya aya wira Yehova Mpatthani ahu tthiri?
17 Okathi onitepa ahu ovara muteko wowaapaka awiixutti, nnootepaka omwaattamela Yehova. Mwa ntakiheryo, ninnoona moota Yehova sinakhoottiherya awe anamavaanyiha waakanyerya muteko awe. Nkuupuwelani vakhaani iyaakha sivinre niinaano. Niireke ninnoona moota Yehova sinnikhaliherya awe? Ninnihakalala woona moota sinivahiwa ahu yoolya yinceene ya omunepani. Akongresu ahu vamosa ni mithukumano sa asembeleya, sinooniherya moota Tiithi ahu Yehova siniwerya awe woona saana mixankiho ni sootthuneya sahu. Yooniheryaka osiveliwa waya myaha sa kongresu, emusi emosa yaahilepa so: “Myaha silavuliwe soovara murima ahu tthiri, ninnoona moota Yehova sinniphenta awe ni ophavela wawe wira khuta mmosa okhumele saana”. Nuumala onweha kongresu a vameekha aya wIrlanda, emusi emosa yaakhuma wAlemanha, yaahixukhurela moota saakheliwa aya ni othokoreriwa saana, awosa yaalempe so: “Ninnimuxukhuru vanceene Yehova ni Mwene awe Yesu Kristu. Maana awo aanilattula wira nikhale eriyari ya nloko nla nowiiwanana saana. Khahiyo nnolavula paahi, nnaari, khula nihiku ninnooniherya moota onikhala ahu owiiwanana. Etthu yoonale ahu okongresuni oDublin wIrlanda, enrowa onuupuxeryaka eparakha erina ahu yuulupale ya omurumeela Muluku ahu mowiraana”.
APATTHANI ANNILAVULIHANA
18. Makoho xeeni akhanle ahu oopaka voohimya sa olavulana ni Yehova?
18 Ompatthani onnilipa akhala wira apatthani awo annilavula saana. Olumwenku ola osaren’ye iteknologia sa vano, atthu anceene aapaka okhala yoolema aya orumeela mensagem wala interneti wira alavuleke ni akina. Wira nilikanyihe: niireke hiyo mekhihu ninnikhalana yoolema ya olavula ni Mpatthani ahu oororomeleya Yehova? Ekeekhai wira owo ‘onniwa mavekelo’ ahu. (Esal. 65:3) Masi niireke ninnimakela olavula ni Yehova?
19. Akhala wira vanninivila otthukula murima ahu wa Yehova, nikhaliheryo xeeni nirina ahu?
19 Arumeyi akina a Muluku, khanoona okhweya otthukula murima aya wira ahimye etthu eniwiira. Masi, eyo ti etthu Yehova eniphavela awe wira nipakeke okathi onivekela ahu. (Esal. 119:145; Wikh. 3:41) Hata noonaka ovila ohimya mixankiho iyo, nimananiheke maana ninrowa okhaliheriwa. Wa maKristau oRoma Paulo aalempe so: ‘Munepa wa Muluku onnorwa onikhaliherya ohilipa wahu, okhala wira khaninsuwela olompa ntoko vanrerelaya. Munepa wa Muluku onninilompela wipulela ohiniwerya ahu otaphulela. Vano Muluku, yowo onitokosa mirima, onnisuwela orattene entthuna ahu ovekela, okhala wira munepa onnavekelela atthu aya ntoko Muluku sintthunawe’. (aRom. 8:26, 27) Wuupuwelela masu ari va eliivuru ya Yobi, Esalimo, ni Miruku anrowa onikhaliherya omuleela Yehova itthu siri vamurimani vahu.
20, 21. Yomaaliha xeeni eniphwanya ahu mmasu a Paulo va aFilipi 4:6, 7?
20 Okathi onikumana ahu etthu ennipwexa muru, nihaana weettela miruku seiye Paulo uupuxeriwaka ni Muluku saalepenle awe aFilipi wira: ‘Muhukhuwé mwaha w’etthu p’itthu. Okathi wothene nweliheke mavekelo anyu wa Muluku mmulompaka, munvaraka metto, mmuxukhuruku-tho’. Tthiri otthukula murima mmoota owo nilavulaka ni Mpatthani ahu oororomeleya, onoonimaaliha ntoko Paulo sinihimya awe oriki: ‘Siso murettele wa Muluku, onvikana osuwela wa mutthu, onosuka mirima sanyu ni owerya wanyu wupuwela mwa Yesu Kristu’. (aFil. 4:6, 7) Nto nihiliyaleke ovaha efaita ‘murettele wa Muluku’ yoowo onikhapelela tthiri mirima sahu ni muupuwelo ahu.
21 Mavekelo anninikhaliherya winnuuherya ompatthani ahu ni Yehova. Tivonto ‘nilompeke vohihiyererya’. (1 aTes. 5:17) Ninlompa wira yoosoma ela elipihe wataana wahu ni Muluku ni olakela wahu weettela sooruma sa Muluku sa xariya. Nto nrowe naavyeke okathi wira nuupuweleleke mareeliho arina ahu mwaha woowi Yehova tthiri Tiithi ahu, Muluku ahu, Mpatthani ahu.