Nuulumo na Muluku ti Noowerya
1. Muru xeeni orina aya asembeleya a vameekhaaya a mwaakha wa muteko a 2014?
1 Moovirikana ni itthu sotheene sinipakiwa ni atthu oohimalela, Biibiliya ookhalana owerya wa orukunuxa okumi ahu, miyuupuwelelo ni sowiira sahu wira simwiiweleleke Yehova. Nto owerya wa Nuulumo na Muluku ti wa moota xeeni? Ninrowa orumeela sai owerya wa masu a Muluku mookumini mwahu? Ninrowa orumeela sai oratteene wira naakhaliherye akina? Nto ninniroromela wira ninrowa olipa momunepani vaavo iponto iya sinithokoreriwa aya okathi wa nihiku na asembeleya a vameekhaaya mwaakha wa muteko a 2014. Muru aya oni: “Nuulumo na Muluku ti Noowerya”, okumihiwe yoolepa ya aHéberi 4:12.
2. Makoho xeeni anrowa waakhuliwa okathi wa eprograma ya asembeleya?
2 Mphwanye Waakhuliwa wa Makoho Ala: Vaavo munrowa anyu owiriyanaka eprograma, mwalepe waakhuliwa wa makoho ala:
• Xeeni nintthuneya ahu ororomelaka Nuulumo na Yehova? (Esal. 29:4)
• Ninrowa woona sai owerya wa Nuulumo na Muluku mookumini mwahu? (Esal. 34:9)
• Munrowa orumeela sai owerya wa Nuulumo na Muluku okathi woolaleerya? (2 Tim. 3:16, 17)
• Ninrowa osyaka sai owokiwa ni ikuru soowerya sa olumwenku wa Satana? (1 Yoh. 5:19)
• Nyuwo amiravo, munrowa okhumela sai saana mmukhalelo womunepani? (Yer. 17:7)
• Ninrowa owerya sai okhala oolipa hata okathi nintteettheya ahu? (2 aKor. 12:10)
• Ninrowa ovikaniha sai opaka marukunuxo mookumini, hata voohimya sa mikhalelo ni soolema sooxankiha vanceene? (aÉf. 4:23)
3. Ohiya owiriyana eprograma, mireerelo xeeni sikina nikhanle ahu oophwanya nihiku na asembeleya a vameekhaaya?
3 Tthiri, ninrowa ottottela mureerelo owiriyana saana myaha iyo sootthuneya! Ohiya-vo, nihiku na asembeleya a vameekhaaya, asembeleya a esirkwitu ni kongresu, ti okathi wooreerela wira ‘natthukulele murima’ annihu ni arokorihu a miloko sikina. (Esal. 133:1-3; 2 aKor. 6:11-13) Tivonto, mwaivahe okathi woovaanela ni anna munaasuwela anyu, ni opaka opatthani ni anna asya. Nave-tho, akhala wira oolavula mwaha onixukurya ntoko mutokweene a eDistritu wala munna onikhuma oBetheli oothanleliwa asembeleya anyu a vameekhaaya, nyuwo pooti ottottela mureerelo okathi owo wira mmwaakhele. Tthiri, nookhalana mathowa manceene wira nilipelele nihiku na asembeleya a vameekhaaya a 2014!