Tani Anirowa Wiirimu?
Waakhuliwa wa mBiibiliyani
Muluku ohaathanla makristau vakhaani oororomeleya wiira nuumala okhwa ehihimuxiwe ni erooke wiirimu. (1 Pedru 1:3, 4) Nuumala Makristau awo othanliwa, ahaana othipelela weettela malakiheryo a ekristau ekhalaka mwa enamuna enimusivela Muluku. Awo ahaana wiimananiha opaka eyo wiira ehaakhiwe eparakha eyo ni operteri yoolipelela aya yoorowa wiirimu.— aEefeso 5:5; aFilipi 3:12-14.
Etthu xeeni anrowa aya opakaka atthu awo anrowa wiirimu?
Anrowa ovaraka hoothe ni Yesu sintoko mamwene ni anamukuttho, mpakha ovira iyaakha 1.000. (Wiisuupulula 5:9, 10; 20:6) Atthu awo anrowa wiirelaka mpantta “erimu esya”, aahiiso anrowa okhala anamalamulela a wiirimu, ni anrowa olamulelaka “elapo esya” wala atthu anrowa okhalaka valaponi. Makhulupale awo a wiirimu anookhaliherya wiira apinaatamu etthikele okhala oohittheka, sintoko Muluku aaphavela awe okhuma khalai.— Yesaya 65:17; 2 Pedru 3:13.
Ari atthu akavi anrowa ohihimuxiwa wiira yakhaleke wiirimu?
Biibiliya onooniherya wiira atthu 144.000 anrowa ohihimuxiwa wiira yakhaleke wiirimu. (Wiisuupulula 7:4) Yoowoonihiwa eri Wiisuupulula 14:1-3, murummwa Yohani aahinweha “mwaapwittipwitthi eemenle ene vamwaako Siyoni” ni ori ene ni “atthu 144.000”. Yoowoonihiwa ele, mwaapwittipwitthi onithoonyerya Yesu nuumala ohihimuxiwa. (Yohani 1:29; 1 Pedru 1:19) ‘Mwaako Siyoni’, onithoonyerya okhulupale wuulupale orina awe Yesu ni makristau 144.000 anrowa olamulelaka nuuwo wiirimu.— Esalimo 2:6; aHeeberi 12:22.
“Ale yiihaniwe ni athanliwe ni oororomeleya, athanliwe wiira yalamuleleke ni Kristu mOomweneni, annihimmwa okhala “nikoto naamukhaani”. (Wiisuupulula 17:14; Luka 12:32) Eyo enooniherya wiira atthu awo ari vakhaani yalikanyihiwa ni mwaattelo wa ipwittipwitthi sootheene sa Yesu.— Yohani 10:16.
Itthu sowoothiwa sinaahimya ale anrowa wiirimu
Etthu yowoothiwa: Atthu ootheene ooreera murima anrowa wiirimu.
Ekeekhai ya mwaha ola: Muluku ooleiherya waavaha ekumi ehinimala valaponi atthu ootheene ooreera murima.— Esalimo 37:11, 29, 34.
Yesu aahimmye so: “Khuuvo mutthu otonko owela wiirimu”. (Yohani 3:13) Yesu aahooniherya wiira atthu ooreera murima yaakhwiiye ohinatthi yena okhwa, ntoko, Abrahamu, Moise, Yobi ni Davidi, khiyaaronwe wiirimu. (Miteko 2:29, 34) Hata vari siiso, yaanilipelela wiira yaamuhihimuxiwa wiira ekhaleke valaponi.— Yoobi 14:13-15.
Ohihimuxiwa para orowa wiirimu onnihimmwa ‘okhala ohihimuwa woopacerya’. (Wiisuupulula 20:6, Biblia Solempwa Sowarya) Ela enooniherya wiira, onookhala ohihimuwa wa nenli. Ohihimuwa iwo onrowa wiiraneya valaponi.
Biibiliya oniixuttiha wiira okathi Omwene wa Muluku, onrowa aya olamulelaka “khunrowa-tho okhala okhwa”. (Wiisuupulula 21:3, 4) Yooleiherya ela enrowa wiiraneya valaponi, maana okhala wene elapo ya vathi paahi tokhanle aya okhwa.
Etthu Yowoothiwa: Khuta mutthu onithanla mmensawe aaphavelaka orowa wiirimu wala ohala valaponi vaava.
Ekeekhai ya mwaha ola: Muluku tonaathanla makristau xeeni oororomeleya aniphwanela waakhela “etthuvo” nihimye so, okumi wiirimu. (aFilipi 3:14) Hata mutthu owo ophavelaka orowa wiirimu wala ohala valaponi vaava, Muluku tonithanla opuro onrowa awe okhalaka mutthu owo.— Matheyo 20:20-23.
Etthu Yowoothiwa: Yoolipelela ya ophwanya okumi valaponi kherina efaita yuulupale, paahi atthu avahiwe etthu yuulupale ni yooreerexa taale anrowa wiirimu.
Ekeekhai ya mwaha ola: Muluku onnaahimya ale anrowa ophwanya okumi ohinimala valaponi okhala “atthu aka”, nave onnaahimya okhala nloko “norerihiwa n’Apwiya [Yehova]”. (Yesaya 65:21-23) Atthu awo anookhalana eparakha yoomaliherya etthu Muluku aaphavela awe waavaha apinaatamu okhuma khalai, nihimye so: ekumi yoohimala, ni yooloka oparayiisu valaponi.— Maphattuwelo 1:28; Esalimo 115:16; Yesaya 45:18.
Etthu Yowoothiwa: Nummeru na 144.000 ti na nthoonyeryo, khahiyo neekeekhai.
Ekeekhai ya mwaha ola: Nnaamwi eliivuru ya Wiisuupulula erina ene mammeru a nthoonyeryo, mammeru makina teekeekhai. Mwa ntakiheryo, anniromoliwa “masina 12 a arummwa 12 a Mwaapwittipwitthi”. (Wiisuupulula 21:14) Nrowe niwehe etthu ennikupaliha wiira nummeru 144,000 khahiyo na nthoonyeryo.
Wiisuupulula 7:4 onnihimya wiira mwaattelo wa aatthu yaarowa othanliwa wiira yakhaleke wiirimu, “yaari 144.000. Masi Iversiikulu sikina sinittharelana sinooniherya wiira yaakhala ekurupu ekina ya nenli, yoovirikana, eyo piiyo: “muttitthi muulupale wa atthu” ahiniweryaneya waakontari. Makristau awo a “muttitthi muulupale” nave animoopoliwa ni Muluku. (Wiisuupulula 7:9, 10) Vaakhanle wiira nummeru 144.000 ti na nthoonyeryo, ni nnaahimya atthu anceene ahinkontareya, khivaarowa okhala vookhalela ohimmwaka wiira ikrupu iya ti soovirikana.a
Nave ale a ekurupu 144.000 vanihimmwa wiira athummwale “eriyari ya apinaatamu, ntoko milipu”. (Wisupulula 14:4) Nuulumo noowi “milipu” ninrumeeliwa ophavelaka ohimmwa mwaattelo vakhaani wa etthu ethanliwe. Nuulumo nla ninnaahimya saana ale anrowa olamulelaka ni Yesu wiirimu. Nummeru nlo naamukhaani nalikanyihiwa ni mwaattelo ohinkontareya wa atthu anrowa okhalaka valaponi.— Wiisuupulula 5:10.
a Moolikanasa, Musomi Rober L. Thomas okathi aalavula awe sa nummeru nla na 144.000, ninromoliwa Wiisuupulula 7:4, aahimmye so: “Nummeru nla khahiyo na nthoonyeryo, nave ti noovirikana vanceene ni nummeru nuulupale na atthu yahaaweryaneya waakontari ninromoliwa ekapiitulu 7 eversiikulu 9. Akhala wiira naarowa wooniwaka ntoko nummeru na nthoonyeryo, nto entaphulela wiira nave mammeru ootheene aniromoliwa eliivuru ela yaahaana okhala-tho a nthoonyeryo”.— Wiisuupulula 1-7: An Exegetical Commentary, (um Comentário Exegético), epaaxina 474.