Nihihiye Olipiha Waaphenta Wahu Anna ni Arokora

1-2. a) Xeeni murummwa Paulo aahimmye awe wiira ophenta tori mukhalelo ‘muulupalexa’? b) Mwaha ola, ninrowa othokorerya makoho xeeni?

OKATHI murummwa Paulo aalavula awe sa mikhalelo ntoko waamini, nlipelelo ni ophenta, owo aahimaliha oriki: “Ophenta tori wuulupalexa”. (1 aKor. 13:13) Exeeni yaamwiirinhe murummwa Paulo ohimya eyo? Okhala wiira muhoolo, sooleiherya sootheene sa Muluku voohimya sa elapo esya sinimwiiraneya. Nto khaninrowa opirisariki okhalana nlipelelo ni waamini ni sooleiherya iyo, maana sinrowa wiiraka siiraneyale ene. Masi khula okathi ninrowa opirisariki omphenta Yehova ni atthu akina. Veekeekhai waaphenta wahu atthu akina onaamutepa okhala woolipa khula okathi.

² Ophenta onrowa okhala mukhalelo wootepa okhalana efaita mookumini mwahu. Mwaha ola, ninrowa othokorerya makoho ala mararu: Noopacerya, xeeni ninreerela ahu ophentanaka mukina ni mukhwaawe? Na nenli, nnooniherya sai wiira ninniphentana mukina ni mukhwaawe? Na neeraru, ninrowa owerya sai ohihiya olipiha waaphenta wahu anna ni arokora?

XEENI NINREERELA AHU OPHENTANAKA MUKINA NI MUKHWAAWE?

3. Itthu xeeni sinniiriha ophentanaka mukina ni mukhwaawe?

³ Xeeni eri aya etthu ya faita ophentanaka mukina ni mukhwaawe? Vaavo nimphentana ahu mukina ni mukhwaawe, ninnooniherya wiira na Makristau a ekeekhai. Yesu aahaaleela awiixutti awe ohimyaka so: “Atthu otheene anoosuwela wira mwa awiixutti aka, mwaaphentanaka mukina ni mukhwaawe”. (Yoh. 13:35) Ohiya-vo, ophenta onninikhaliherya ohihiya okhala oowiiraana. Paulo aahimmye wiira ophenta “onniwiiraaniha atthu otheene voomalela”. (aKol. 3:14) Masi yookhala etthu ekina ya faita enniiriha ophentanaka mukina ni mukhwaawe. Murummwa Yohani olempe so: “Ole onimphenta Muluku, nave ohaana omphenta munnawe”. (1 Yoh. 4:21) Okathi nimphentana ahu mukina ni mukhwaawe, ninnooniherya wiira ninnimphenta Muluku.

4-5. Omphenta wahu Muluku onivarihana sai ni waaphenta wahu anna ni arokora? Mutthokiherye.

⁴ Omphenta wahu Muluku onivarihana sai ni waaphenta wahu anna ni arokora? Wiira nisuwele, nuupuwele ovarihana okhanle murima ahu ni ipantta sikina sa erutthu. Mwa ntakiheryo, ikwaha sikina ninrowa ahu ospitaali, mameediku annirumeela matata aya khuvarela moono ahu, masi aphavelaka omwaleya moota murima ahu onitthimaka aya ni akhala wiira onnivara muteko saana aahiiso nnaari. Mwa enamuna eyo, awo anniwerya osuwela itthu sinivarihana ni murima wa mutthu oniwereiwa. Niire mooweha etthu ntakiheryo nna ninniixuttiha voohimya sa ophenta?

⁵ Ntoko siisaale meediku oniwerya awe osuwela moota murima wa mutthu onitthimaka aya orumeelaka moono ahu, nave hiyo nnoowerya osuwela akhala wiira omphenta wahu Muluku ti woolipa, niwehaka moota nnaaphenta ahu anna ni arokora. Nasuwela wiira waaphenta wahu woopacerya ovukuwa, eyo enooniherya wiira omphenta wahu Yehova onnivukuwa. Masi vakhala wiira ninnaaphenta anna ni arokora khula okathi, eyo enooniherya wiira ophenta wahu Yehova ti woolipa.

6. Vakhala wiira waaphenta wahu anna ni arokora onnivukuwa, xeeni ori aya muxankiho muulupale? (1 Yohani 4:7-9, 11)

⁶ Vakhala wiira waaphenta wahu anna ni arokora onnivukuwa, owo muxankiho muulupale. Mwaha wa xeeni? Mwaha woowi eyo enooniherya wiira waataana wahu ni Yehova onnivukuwa. Murummwa Yohani aahiiwanyeiha eyo okathi aahimmye awe so: “Ole ohinimphenta munnawe, onimoona awe, khoniwerya omphenta Muluku, ohinimoona awe”. (1 Yoh. 4:20) Exeeni nniixutta ahu? Nniixutta wiira noowerya omuhakalaliha Yehova ‘naaphentanaka mukina ni mukhwaawe’. — Mmusome 1 Yohani 4:7-9, 11.

NINROWA WOONIHERYA SAI WIIRA NINNIPHENTANA?

7-8. Ninrowa wooniherya sai wiira ninniphentana mukina ni mukhwaawe?

⁷ Ikwaha sinceene mbiibiliyani ninniphwanya yooruma ya Muluku eni: “Mphentaneke mukina ni mukhwaawe”. (Yoh. 15:12, 17; aRom. 13:8; 1 aTes. 4:9; 1 Ped. 1:22; 1 Yoh. 4:11) Ophenta mukhalelo mmosa onikhuma vamurimani va mutthu, khuuvo pinaatamu oniwerya woona. Nto atthu akina anrowa osuwela sai wiira ninnaaphenta? Anoosuwela ni moolumo ahu ni miteko sahu.

⁸ Sookhala inamuna sinceene nikhanle ahu oowooniherya wiira ninnaaphenta anna ni arokora. Nwehe matakiheryo anittharelana: “Mulavuleke ekekhai mukina ni mukhw’ awe”. (Zak. 8:16) “Mukhalaneke murettele mukina ni mukhwaawe”. (Mar. 9:50) “Mphaveleke waattittimiha akina ni murima anyu wotheene”. (aRom. 12:10) “Mwaakhelaneke mukina ni mukhwaawe”. (aRom. 15:7) “Mulevelelaneke ni murima wotheene ikwaha sotheene”. (aKol. 3:13) “Mukhaliheryaneke ni itthu sinooxankihani”. (aGal. 6:2) “Mulipihaneke mukina ni mukhwaawe”. (1 aTes. 4:18) “Mukhaliheryaneke mukina ni mukhwaawe”. (1 aTes. 5:11) “Nvekelelaneke”. — Yak. 5:16.

9. Xeeni vari aya vooloka waalipiha anna ni arokora? (Nwehe efootu.)

⁹ Nrowe niwehe inamuna sikina nikhanle ahu oowooniherya wiira ninniphentana mukina ni mukhwaawe. Ettima evinre nihoona wiira Pedru aahitumererya wiira “mulipihaneke mukina ni mukhwaawe”. Xeeni vari aya wa faita waalipiha anna ni arokora? Ereferensia emosa ya mbiibiliyani, masu ala a Paulo anihimya wiira “mulipihaneke”, anitaphulela wiira “nihaana omukhaliherya ni omulipiha okathi mutthu sinimphwanya aya mixankiho”. Okathi nnaalipiha ahu anna ni arokora, ninnaakhaliherya ohihiya weetta ephiro eniphwanyiha okumi woohimala. Khula okathi nnimukhaliherya ahu munna aahiiso murokora oriipiwe murima, ninnooniherya wiira ninnimphenta vanceene. — 2 aKor. 7:6, 7, 13.

10. Othunku ni nimaaliho sinivarihana sai?

¹⁰ Vakhala wiira mutthu onnimoonela othunku ole simphwannye mixankiho, onoophavelaka omukhaliherya ni omulipiha. Waanipacerya nimmoonela othunku, nuumala-vo nnamukhaliherya. Nrowe niwehe moota Paulo aalikanyinhe awe othunku wa Yehova ni nimaaliho onnivaha awe. Owo aahimmye wiira Yehova “Tiithi oomoriwa ikharari vanceene, ni Muluku onnimaaliha mwa mikhalelo sotheene”. (2 aKor. 1:3) Enoota ya Biibiliya a estudo, eversiikulu ela Paulo onnitthokiherya nuulumo noowi ‘omoriwa ikharari vanceene’ ophavelaka wooniherya moota nnaamorela ahu ikharari atthu akina. Tivonto, Yehova oniitthaniwa awe okhala Tiithi aahiiso Maphattuwelo a omoriwa ikharari okhala wiira onniwoonela othunku arumeyi awe. Othunku owo onnimwiiriha ‘onimaaliha wa khula muxankiho onniphwanya’. (2 aKor. 1:4) Siisale ehime enirikiwa maasi ooloka, aninvaha aya ikuru mutthu ninvonle ntthona, nave Yehova onninoonela othunku ni onilipiha okathi sinniphwanya aya mixankiho. Ninrowa omutakiha sai Yehova niwoonelaka othunku ni waalipiha atthu akina? Enamuna emosa nikhanle ahu oopaka eyo, ori okhalana mikhalelo sinrowa waalipiha atthu akina. Mikhalelo xeeni iyo?

11. Moovarihana ni aKolosi 3:12 ni 1 Pedru 3:8, mikhalelo xeeni ninreerela ahu okhalana wiira nihihiye waaphenta ni waalipiha anna ni arokora?

¹¹ Exeeni enrowa onikhaliherya ophentana ni ohihiya ‘olipihana mukina ni mukhwaawe’? Etthu enrowa onikhaliherya, ori okhalana mikhalelo ntoko omoriwa ikharari, oreera murima ni omaala. (Mmusome aKolosi 3:12; 1 Pedru 3:8.) Masi mikhalelo iyo sinrowa onikhaliherya sai? Okathi nnaamorela ahu ikharari anna ni arokora ni waathokorerya, eyo enooniiriha waalipiha okathi sinaaphwanya aya mixankiho. Yesu aahimmye so: “Eyano enilavula itthu sisareyale vamurimani. Mutthu ooreera murima, onnilavula itthu sooreera”. (Math. 12:34, 35) Waalipiha anna ni arokora sinaaphwanya mixankiho, enamuna emosa enooniherya wiira ninnaaphenta.

NINROWA OLIPIHA SAI OPHENTANA WAHU?

12. a) Xeeni ninreerela ahu okhalana ephoole wiira nihihiye waaphenta anna ni arokora? b) Nikoho xeeni ninrowa ahu waakhula?

¹² Ootheene ahu nimphavela ‘ohihiya ophentana mukina ni mukhwaawe’. (1 Yoh. 4:7) Nihiliyale wiira Yesu aahihimya wiira “ophenta wa anamunceene onoovukuwa”. (Math. 24:12) Owo khaaphavela ohimya wiira aatthareli awe akina yaamuhiya ophentana mukina ni mukhwaawe. Masi atthu a moolumwenkuni khaniphentana nto nihaana okhalana ephoole wiira ahiniirihe ohiya waaphenta anna ni arokora. Nlavulaka sa mmwaha ola, nrowe niwehe nikoho na efaita yuulupale. Nikoho nene ti nla: Ninrowa osuwela sai akhala wiira waaphenta wahu anna ni arokora ti woolipa?

13. Exeeni ekhanle ooweehererya waaphenta wahu anna ni arokora?

¹³ Moota nimphuka ahu mixankiho okathi anna ni arokora annitthekela aya aahiiso anninyoonyiha aya, enamuna emosa enrowa wooniherya akhala wiira waaphenta wahu ti woolipa. (2 aKor. 8:8) Eyo ti etthu murummwa Paulo aattittimihenrye awe ohimyaka so: “Mphentaneke vanceenexa, okhala wira ophenta onnikhuneela itampi sinceene”. (1 Ped. 4:8) Vakhala wiira nnoowehexexaka ifaalya sa anna ni arokora, eyo pooti ovukula aahiiso weehererya waaphenta wahu.

14. Moovarihana ni 1 Pedru 4:8, niphento xeeni ninreerela ahu okhalana? Mutthokiherye.

¹⁴ Nrowe nthokorerye moolumo a murummwa Pedru ari 1 Pedru 4:8. Wanipacerya wa eversiikulu 8, owo onnilavula enamuna ya ophenta ninreerela ahu wooniherya, eyo piiyo, ‘ophentanaka vanceenexa’. Nuulumo murummwa Pedru orumenle awe noowi “vanceenexa” nintaphulela etthu ‘yoowookowa’ aahiiso yootapuruxiwa. Epantta ya nenli ya eversiikulu eyo, ennooniherya etthu enrowa okhumelela akhala wiira nnoophentanaka vanceene. Nnoorowa okhuneela aahiiso khaninrowa owehexexaka ifaalya saya. Mwa ntakiheryo, nkuupuwelani murina ene meesa oonanara ipantta sinceene. Exeeni mukhanle anyu oopaka wiira ipantta iyo sihooneyeke? Etthu mukhanle anyu oopaka, ori okuxa ekuwo ‘mukhuneela’ meesa ootheene ohiya paahi epantta emosa aahiiso piili sihireere onanara. Moolikanasa, vakhala wiira nnimwaaphentaka vanceenexa anna ni arokora, vanooweryaneya okhuneela aahiiso waalevelela ohiya paahi efaalya emosa wala piili, masi “itampi sinceene”.

15. Vakhala wiira waaphenta wahu anna ni arokora ti woolipa exeeni nikhanle ahu oopaka? (aKolosi 3:13)

¹⁵ Nihaana okhalana ophenta woolipa, wiira niwerye olevelela ifaalya sa anna ni arokora hata ikwaha sikina vaxankihaka. (Mmusome aKolosi 3:13.) Okathi nnaalevelela ahu, ninnooniherya wiira nookhalana ophenta woolipa nave ninniphavela omuhakalaliha Yehova. Masi exeeni enrowa onikhaliherya oliyala ifaalya sa anna ni arokora?

16-17. Exeeni enrowa onikhaliherya ohiwehexexa ifaalya sa anna ni arokora? Nvahe ntakiheryo. (Nwehe efootu.)

¹⁶ Nihaana owehexexaka itthu sooloka anna ni arokora anivara aya, ohiya ifaalya saya. Nrowe nthokorerye ntakiheryo nla: Nkuupuwelani muri ene ofestani mutthekulaka ni ekhurupu ya anna ni arokora. Wanikisa wa efesta nyuwo munnikumiha efootu ni atthu ootheene nave munnikumiha-tho ifootu piili wiira yakhala emosa ehikhumme saana muranttelihe. Nuumala-vo, munnoona wiira efootu emosa ookhala munna okhumme onanariwe ene. Exeeni munrowa anyu wiiriha efootu eyo? Etthu mukhanle anyu oopaka ottipiha efootu eyo okhala wiira mookhalana sikina, seiyo munna ole aananariwe vamosa ni atthu akina akhumme aya atheyaka.

¹⁷ Vano mulikanyihe efootu eyo muhiyale anyu ni miyuupuwelo murina anyu. Moohaanyiherya nyuwo munnuupuwelela itthu sooreera nvirinhe anyu muri ene ni anna ni arokora. Masi okathi owo, woonasa wene munna aahiiso murokora oohimya etthu yoowereyaleni. Exeeni mwaarowa anyu opaka ni muupuwelo owo? Xeeni muhiniimananiha anyu oliyala ntoko mwaattipinhe anyu efootu ele yoohiloka? (Mir. 19:11; aEef. 4:32) Vakhala wiira munimuupuwelelaka okathi wooreera nvirinhe anyu ni munna aahiiso murokora, vanimookhweelani oliyala okathi ole wooxankiha. Nto okathi owo wooreera nvirinhe anyu ni anna ni arokora tonireerela wuupuwelelaka.

XEENI OPHENTA ORI AYA WA FAITA OLELO-VA?

18. Nilavulaka sa ophenta, mwaha ola owiixuttinheni exeeni?

¹⁸ Xeeni ninreerela ahu ohihiya ophentanaka mukina ni mukhwaawe? Ntoko niixuntte ahu, waaphenta wahu anna ni arokora, onnooniherya wiira ninnimphenta Yehova. Ninrowa wooniherya sai wiira ninnaaphenta anna ni arokora? Enamuna emosa nikhanle ahu oopaka eyo, ori waalipiha. Nave owoonela othunku onoonikhaliherya ohihiya ‘olipihana mukina ni mukhwaawe’. Masi ninrowa owerya sai ohihiya olipihana mukina ni mukhwaawe? Nnoowerya niimananihaka waalevelela anna awo hata vaxankihaka opaka eyo.

19. Olelo-va xeeni vari aya va faita waaphenta anna ni arokora?

¹⁹ Xeeni olelo-va vari aya va faita ophentana mukina ni mukhwaawe? Pedru aahihimya etthu ene okathi aalavunle awe so: “Omala wa itthu sotheene ori vakhiviru. Tivonto . . . mphentaneke vanceenexa”. (1 Ped. 4:7, 8) Wanikisa wa olumwenku ola wootakhala ori vakhiviru, nto osuwela eyo eniiriheke wupuwela exeeni? Yesu aahaalopola awiixutti awe ohimyaka so: “Atthu a maloko otheene anrowa woonyokhani mwaha wa nsina naka”. (Math. 24:9) Wiira nivilele onyokhiwa iyo wootheene, nihaana ohihiya okhala oowiiraana ni ophentana. Napaka eyo, Satana khonrowa owerya onivalaanya, maana ophenta “onniwiiraaniha atthu otheene voomalela”. — aKol. 3:14; aFil. 2:1, 2.