Muupuweleke Ophenta Wuulupale wa Yehova
“Kinnupuwela miteko sothene sìralyanyu”.—ESAL. 77:13.
MWAAROWA WAAKHULA SAI?
Exeeni ennikupaliha wira Yehova onniniphenta?
Exeeni enniiriha ohimyaka wira Yehova onnaaphenta atthu awe?
Nooneleke sai niphento na Yehova?
1, 2. (a) Exeeni eniwiirihani okupaliki wira Yehova onnaaphenta atthu awe? (b) Etthu xeeni epattuxaniwe aya apinaatamu?
EXEENI eniwiirihani nyuwo okupali wira Yehova onnaaphenta atthu awe? Muhinatthi waakhula nikoho nla, muthokorerye matakiheryo ala: Mwa iyaakha sinceene anna ni arokora anceene yaanimutumererya murokora mmosa oniireliwa Taylene wira ohitepeke oxankiheya ni ophavela opaka itthu sihiniwerya awe. Owo onihimya so: “Vaakhanle wira Yehova khonikiphenta nto khaarowa okivaha malakiheryo awe moohihiyererya”. Brigitte yoowo aahunwe anamwane anli mekhawe nuumala okhweliwa aiyawe, onihimya so: “Waahuwa anamwane olumwenku ola wa Satana ti vooxankiha, vaatepa-tho vakhala wira mutthu onaahuwa mekhawe. Masi miyo kinnaamini wira Yehova onnikiphenta ni okilakiherya okathi wooxanka, ni owo khoneemererya wira ekikhumelele etthu ehiniwerya aka ovilela”. (1 aKor. 10:13) Sandra yoowo orina eretta ehinvoniwa, okathi aaryaawe okongresuni aahikhapeleliwa mooreerela ni mwaarawe munna osuweliwa saana. Iyawe Sandra onihimya so: “Nnaamwi hiyo nahaamusuwela murokora ole, oreera wawe murima waahiniphwanyiha ohakalala. Tthiri onikhapelela saana wa anna ni arokora onninooniherya wira Yehova onniniphenta”.
2 Apinaatamu okhala wene anniphavela ophentiwa ni anniwerya waaphenta akina. Hiyo waakuva okhulumuwa vakhala wira enninikhumelela etthu yootutuxerya ntoko owereyasiwa, othoiwa musurukhu, wala ohikhumela saana mmutekoni woolaleerya. Vakhala wira ninnipacerya wuupuwela wira Yehova khonniphenta, vaamureerela wuupuwelela wira hiyo nookhalana efaita ni wira owo ori vakhiviru vahu, ‘onivarelelaka ntata’ nahu ni onikhaliherya. Owo khonirowa oninyanyala vakhala wira ninnimuroromela.—Yes. 41:13; 49:15.
3. Exeeni enrowa onikhaliherya olipiha okupali wahu wira oniphenta wawe Yehova ti wuulupale?
3 Atthu ala otheene aromoliwe osulu iwe yaanikupali wira Muluku ari ni yaawo okathi wa mixankiho. Hiyo nave nnoowerya okhalana waamini omosaru wira Yehova ori vakhiviru vahu. (Esal. 118:6, 7) Muru ola onrowa othokorerya moota ophenta wa Muluku onooneya aya mmyaha iya (1) miteko sawe soopattuxa, (2) Nuulumo nawe, Biibiliya, (3) nivekelo, ni (4) yowoopola. Wuupuwelela itthu sooloka Yehova opanke awe, onimunnuuherya oxukhurela wahu oniphenta wawe wuulupale.—Musome Esalimo 77:12, 13.
NUUPUWELELEKE SOOPATTUXA SA YEHOVA
4. Wuupuwelela oratteene itthu sipattuxiwe ni Yehova onnikhaliherya osuwela exeeni?
4 Niireke hiyo ninniwerya woona oniphenta wuulupale wa Yehova ni itthu sipattunxe awe? Aayo, okhala wira itthu sotheene sipattuxiwe sinnooniherya ophenta wa Muluku. (aRom. 1:20) Owo oopattuxa elapo ni makhalelo aya otheene anneemererya okhala akumi ni oyarana. Masi owo khonivanhe ekumi paahi. Onnisuwela wira hiyo nintthuneya olyaaka. Tivonto Yehova opanke awe marehereryo wira etthaya ekumiheryeke miri sa makhalelo oovirikana sinikumiherya yoolya ennikhaliha akumi. Ohiya-vo, ohiiriha wira naalyaaka vale nooneke osiva! (Mus. 9:7) Murokora mmosa oniireliwa Catherine onnisiveliwa oweha itthu soopattuxiwa, vanceenexa mweeri wa Abril okathi wa ephovo vaavo miri sinipacerya aya ophuwa oCanadá. Owo onihimya so: “Tthiri etthu yoothikila muthana woona moota itthu sinitthikela aya okhala sikumi, itthu sipakeliwe wira sikhumeleleke okathi aya sinimela vatthayani ni axinuuni anitthikela mapuro anikhala, waahela muhina axinuuni acikhaani anithupa yoolya waattamela vaxanelani ya okosinya waka. Tthiri Yehova onniniphenta, tivo vannivaha awe itthu sinceene sinnisivela”. Tiithi ahu oophenta a wiirimu onnisiveliwa ni itthu sipattunxe awe, ni owo oniphavela wira hiyo nave sinisiveleke.—Miteko 14:16, 17.
5. Moota xeeni ipattuxeriwo sa apinaatamu sinooniherya aya ophenta wa Yehova?
5 Yehova aapattunxe apinaatamu ni owerya wa ovara muteko yoowo onaaphwanyiha ohakalala mweekumini mwaya. (Mus. 2:24) Yoolakela awe yaari wira elapo ela esareye apinaatamu, ahooleleke ihopa, axinuuni ni inama sikina. (Maph. 1:26-28) Tthiri niphento na Yehova noomwiiriha owo onivaha makhalelo ooloka anneemererya omutakiha!—aÉf. 5:1.
NIVAHEKE EFAITA NUULUMO NA MULUKU
6. Xeeni vanitthuneya ahu ovaha efaita yuulupale Nuulumo na Muluku?
6 Muluku ohooniherya oniphenta wawe onivahaka nuulumo nawe, Biibiliya. Owo onniniixuttiha sotheene voohimya sa Yehova ni moota sinaakhapelela awe apinaatamu. Mwa ntakiheryo, Biibiliya onninitthokiherya moota Yehova aakhapelenle awe aIsarayeli, yaawo yaamakela omutthekela. Esalimo 78:38 enihimya so: “Vano Muluku, n’umoriwa wawe ikharari, analevelela sottheka saya, khuhinapwetexa. Imara sinjene ahìsinanela, ahaviruwelaka; khaviheriwe n’uviruwa wawe wothene”. Wuupuwelela eveersu ela onimookhaliheryani woona wira Yehova onnoophentani ni wookhapelelani. Musuwelexe tthiri wira Yehova onnoophentani.—Mmusome 1 Pedru 5:6, 7.
7. Xeeni vanireerela ahu onvaha efaita yuulupale Biibiliya?
7 Nihaana onvaha efaita yuulupale Biibiliya okhala wira Muluku onimurumeela yoowo wira olavule ni hiyo. Olavulihana wooloka wa tiithi ni anaawe ti wootthuneya wira atthu awo aroromelaneke ni ophentana. Ankhi Yehova onoonela sai? Nnaamwi nihitonko omoona wala wiiwa nsu na Yehova, owo “onnilavula” ni hiyo orumeelaka Nuulumo nawe Biibiliya, nto hiyo nihaana onwiriyana. (Yes. 30:20, 21) Yehova oniphavela onilakiherya hiyo nikhanle atthu awe owiivahererya ni onikhapelela wira ehinikhumelele ehasara. Owo oniphavela wira hiyo nimusuwele ni omuroromela.—Musome Esalimo 19:8-12; Miruku 1:33.
8, 9. Exeeni Yehova eniphavela awe wira nisuwele? Nvahe ntakiheryo niri mBiibiliyani.
8 Yehova oniphavela wira hiyo nisuwele wira owo onniniphenta ni khonniweha paahi ophavelaka onihukhumu mwaha wa ohimalela wahu. Owo oniphavela oweha ele erina ahu yooloka. (2 Wah. 16:9) Mwa ntakiheryo owo aahipaka eyo ni Mwene Yosafati a oYuda. Mwaha woothoiwa ankhili, Yosafati aheemererya orowa ni Mwene Akhabi a wIsarayeli okhottoni wira yawaakhe aSiria muttetthe waoRamothi w’oGalaadi. Nnaamwi maprofeta oowootha 400, yaamulipihenrye Akhabi wira aamuxintta ekhotto ele, Mikaya, profeta a Muluku a ekeekhai, Yehova, aahimuleela wira aamuxinttiwa. Tthiri Akhabi aahikhwa okhottoni ni Yosafati aahanle vakhaani wiiviwa nave. Nuumala otthikela oYerusalemu aahipwapweliwa mwaha wa wiiraana ni Mwene Akhabi. Hata vari siiso, Yehu, mwaana a Hanani aahimuhimeerya Yosafati wira: “Vano mophwanyaniwa miteko sikina sorera”.—2 Wah. 18:4, 5, 18-22, 33, 34; 19:1-3.
9 Woopaceryani wa omwene awe, Yosafati aahaaruma mapewe, aLevi ni anamukuttho orowa mittetthe sotheene sa oYuda, owiixuttiha atthu Malamulo a Yehova. Muteko ole waahivariwa mooluttuwa mpakha wiiriha maloko yaakhala waattamela oYuda opacerya omoova Yehova. (2 Wah. 17:3-10) Ekeekhai wira Yosafati aahipaka etthu yoohiloka, masi Yehova khaaliyanle itthu sooloka saapanke awe wanipacerya. Yowiiraneya ela ya mBiibiliyani enninuupuxerya wira hata nryeene atthu oohimalela, Yehova onninipixerya murima vakhala wira ninniimananiha opaka itthu sinimusivela.
NIVAHEKE EFAITA EPARAKHA ERINA AHU YA OPAKA NIVEKELO
10, 11. (a) Xeeni vanireerela aya wooniwaka nivekelo okhala yoovaha yuulupalexa enikhuma wa Yehova? (b) Muluku onaakhula sai mavekelo ahu? (Nwehe elatarato yoopacerya.)
10 Tiithi oophenta onniviriha okathi aawiriyanaka anaawe yaamulavulihaka. Owo onipaka eyo ophavelaka osuwela mixankiho saya ni itthu siri vamurimani vaya. Tiithi ahu a wiirimu, Yehova, onniniwiriyana vaavo vanimwaattamela ahu nirumeelaka eparakha yuulupale erina ahu, nivekelo.
11 Hiyo pooti omulavulana Yehova ninvekelaka khula okathi. Owo khonihelenle mukano. Yehova Mpatthani ahu onniwiriyana khula okathi onilavula ahu. Taylene, yoole oromoliwe wanipacerya, onihimya so: “Nyuwo munoowerya omuleela khula etthu”. Vaavo vanimuleela ahu Muluku itthu siri vamurimani vahu, owo pooti onaakhula orumeelaka masu ari mBiibiliyani, muru olempwale murevistani mwahu, wala ni masu oolipiha anilavuliwa ni munna. Yehova onniniiwa naamuxonttelaka ni owo onnisuwela moota woonikhapelela hata ohikhanle mutthu oniwerya onikhaliherya. Waakhula wawe mavekelo ahu ti enamuna yuulupale enooniherya oniphenta wawe.
12. Xeeni vanireerela aya othokorerya mavekelo alempwale mBiibiliyani? Nvahe ntakiheryo.
12 Mavekelo alempwale mBiibiliyani anoowerya oniixuttiha etthu. Vaamureerela othokorerya mavekelo awo okathi wa omulompa Muluku vatthokoni. Wuupuwelela moota arumeyi a Yehova a khalai yaamulavulanne aya amuleelaka Muluku itthu saari vamurimani vaya, onoonikhaliherya olokiherya saana mavekelo ahu. Mwa ntakiheryo, muthokorerye nivekelo noomoriha ikharari naapakiwe ni Yona oryeene mmirimani mwa ehopa yuulupalexa. (Yona 2: 1-10) Muuluule nivekelo Salomoni aapanke awe ni murima wotheene onvahereryaka Yehova etemplo aatenke awe. (1 Mam. 8:22-53) Wuupuwelela nivekelo na ntakiheryo naapanke awe Yesu nnoonikhaliherya-tho. (Math. 6:9-13) Etthu yootepexa otthuneya ti ‘omulompa Muluku okathi wothene’. Eyo enooniphwanyiha “murettele wa Muluku, onvikana osuwela wa mutthu, onosuka mirima sanyu n’iroho sanyu”. Oxukhurela wahu niphento na Yehova onimunnuwa.—aFil. 4:6, 7.
NIXUKHURELEKE YOWOOPOLA
13. Eparakha xeeni erina aya apinaatamu mwaha wa yowoopola?
13 Yoovaha yuulupale enikhuma wa Yesu ti yowoopola enneemererya okhalana “ekumi”. (1 Yoh. 4:9) Olavulaka sa yoovaha eyo yuulupalexa enooniherya ophenta wa Muluku, murummwa Paulo aalempe so: “Yesu Kristu ohakhwela atthu òtakhala, okathi wophwanelela. Orikarika omphwanya mutthu onìleva wira omukhwele mukhw’awe àxariya; nto vanniweryaneya wira mutthu ailipihe wira amukhwele mukhw’awe òrera murima. Vano Muluku ònithonyerya khuluwi oniphenta wawe; tthiri Kristu ònikhwela hiyo, varyahu nlelo anatampi”. (aRom. 5:6-8) Yoovaha ela enooniherya ophenta wa Muluku ehaavaha apinaatamu eparakha wira yooniweke okhala ooloka ohoolo wa Yehova.
14, 15. Yowoopola enitaphulela exeeni wa (a) maKristau oowoottihiwa? (b) wa ale arina nlipelelo na okhala valaponi?
14 Akhala atthu vakhaani arina niphento na Yehova mwa enamuna ya vameekhaaya. (Yoh. 1:12, 13; 3:5-7) Mwaha wa woottihiwa ni munepa wootteela awo aakhalihiwa “àna a Muluku”. (aRom. 8:15, 16) Paulo aahaahimya alipa-oowoottihiwa okhala atthu ‘ahihimuxiwe vamosa ni Kristu akilathihiwe ni yowo wirimu’. (aÉf. 2:6) Awo annivahiwa makhalelo awo a omunepani okhala wira munepa wootteela ti ‘nemexeryo na sorera sinrowa aya wakhela’, eyo piiyo, itthu ‘sisukeriwe aya wirimu’.—aÉf. 1:13, 14; aKol. 1:5.
15 Nto anamunceene a apinaatamu ale aniroromela yowoopola, aakhalana eparakha ya okhala apatthani a Yehova ni anaawe Muluku awehereryaka eParayiisu eleiheriwe valaponi. Tthiri mwaha wa yowoopola, Yehova onnooniherya waaphenta wawe apinaatamu. (Yoh. 3:16) Vakhala wira hiyo ninniwehererya okhala valaponi ni ovikaniha omurumeela Yehova moororomeleya, tthiri niwehereryeke wira owo onimwiiriha ekumi okhala yoohakalaliha elapo esya. Tivonto vanireerela aya woonaka yowoopola okhala yoovaha enooniherya oniphenta wuulupale wa Muluku!
NIVAHEKE EFAITA ONIPHENTA WAWE YEHOVA
16. Wuupuwelela inamuna sinceene sa oniphenta wa Yehova onnitumererya opaka exeeni?
16 Hiyo khanniwerya waalikela inamuna soovirikana sa niphento nuulupale na Yehova. Nasalimo Davidi iipale so: “Muluku aka! Tthiri miyupuwelo sanyu sinnikitikiniha; watta waya ti wohalikeleya. Kaphavela walikela; masi sinnivikana mihava s’ophareya”. (Esal. 139:17, 18) Muupuwelelo owo ohaana oniiriha omphenta Yehova mwaha wa itthu sinceene sooloka sinniirela awe. Vano nipake sotheene siniwerya ahu wira nimuxukhurele.
17, 18. Mwa inamuna xeeni ninrowa ahu wooniherya wira ninnimphenta Muluku?
17 Sookhala inamuna sinceene sa wooniherya wira ninnimphenta Yehova. Mwa ntakiheryo, hiyo ninnooniherya wira ninnimphenta Muluku ni anamwaattamanani ahu vakhala wira ninnikhalela nthiti muteko woolaleerya Omwene. (Math. 24:14; 28:19, 20) Ninnooniherya omphenta wahu Yehova vaavo vanivilela ahu mixankiho ni omuroromela. (Musome Esalimo 84:12b; Yakobo 1:2-5.) Vakhala wira onninikhumelela muxankiho muulupalexa nisuweleke wira Muluku onnoona muxankiho owo ni wira onrowa onikhaliherya okhala wira khula okathi onninivaha efaita.—Esal. 56:9.
18 Omphenta wahu Yehova onniniiriha wuupuwelela itthu sipattunxe awe ni miteko sawe sootikiniha. Ninnooniherya wira ninniphenta Muluku vaavo vanivaha ahu efaita ni osoma nuulumo nawe, Biibiliya. Nivekelo ninniniiriha omwaattamela Yehova. Tthiri omphenta wahu Yehova onninnuwa vaavo vanuupuwelela ahu yowoopola ekumihenrye oleveleliwa soottheka sahu. (1 Yoh. 2:1, 2) Iya ti inamuna sinnivaha mathowa a omphenta Yehova mwaha wa oniphenta wawe wuulupale.