Nihiku Noophukela, Nintaphulela Exeeni?

NYUWO munuupuwela wira Nihiku Noophukela nintaphulela exeeni? Atthu anceene anuupuwela wira, orii okathi yoowo ibilyau sinceene sa atthu sinrowa aya oruuhiwa ohoolo wa ehice ya Muluku. Nto onrowa ophukeliwaka mmosaa-mmosaa. Atthu akina anrowa waakhela okumi oparayiisu wirimu, akinaku anrowa olamuliwa wira yahaaxiweke moohimala. Masi, Biibiliya onooniherya muupuwelelo mukina voohimya sa okathi owo. Nuulumo na Muluku nnitthokiherya wira Nihiku nno Noophukela khahiyo okathi wowoopiha, masi okathi wa nlipelelo ni okathi wa olokiherya itthu.

Voohimya sa Nihiku nna Noophukela, Wisupulula 20:11, 12, murummwa Yohani onihimya wira: “Miyo kahona ehije yulupale yottela n’ule akilanthe-vo. Elapo n’erimu sahitthyawa oholo wawe, khuhihiya-tho iravula saya. Numalá, kahiwona alipa-òkhwa, alupale n’akhani, yemenlene oholo w’ehije. Vano, sahitthukuliwa ilívuru: nlelo yahitthukuliwa elívuru ekina, yari elívuru y’ekumi. Alipa-òkhwa yahiphukiwa sitthariheliwaka miteko savanryaya, ntoko salempwaya mulivuruni”. Nto Namaphuka owo ori veehiceni onihimmwa va tanii?

Yehova Muluku tokhanle Namaphuka muulupale aapinaatamu. Hataa vari siiso, owo oomuthanla mutthu mukina wira okhalee namaphuka. Moovarihana ni Miteko s’Arummwa 17:31, murummwa Paulo ohimmye wira “Muluku òthanla nihiku ninrowawe waphuka atthu othene n’ixariya, elamuliwaka ni Mutthu mmosá omukupalihalyawe oholo w’atthu othene”. Namaphuka ola omukupanly’awe ti Yesu Kristu yoowo ohihimuxiwe. (Yohani 5:22) Nto, Nihiku Noophukela ninrowa opacerya silini? Ni ninrowa omala silini?

Eliivuru ya Wisupulula enooniherya wira Nihiku nno Noophukela ninrowa opacerya nuumala ekhotto ya Harmagedoni, vaavo elapo ya Satana vanrowa aya opwetexiwa.a (Wisupulula 16:14, 16; 19:19–20:3) Nuumala Harmagedoni, Satana ni axetwani awe anrowa otthukweliwa moowiixani mpakha iyaakha ekonto emosaa. Okathi ene yoowo, ale anrowa wirimu oophiyeryaka 144.000, anrowa waakhela omwene wira akhalee anamaphuka ni “mamwene vamosá ni Kristu mpakha iyakha ekonto emosá”. (Wisupulula 14:1-3; 20:1-4; aRoma 8:17) Nihiku Noophukela khahiyo okathi wa nihiku nimosaa nrina iwoora 24 paahi. Orii okathi wa iyaakha ekonto emosaa.

Okathi wa iyaakha iyo ekonto emosaa, Yesu Kristu onrowa “walamula atthu akumi n’ale akhwiye”. (2 Timótheyo 4:1) “Atthu akumi” anrowa okhala “muttitthi mulupalexa” yoowo onrowa woopowa mu Harmagedoni. (Wisupulula 7:9-17) Murummwa Yohani aahiwoona-tho “alipa-òkhwa . . . yemenlene oholo w’ehije” ya ophukela. Yesu aahihimya vahinatthi wira “atthu othene ari mmahiye, yiwe nsu na Mwana a Mutthu [Kristu], ekhume mmahiye”, orweela mwa ohihimuwa. (Yohani 5:28, 29; Miteko s’Arummwa 24:15) Masi anrowa ophukeliwaka sitthariheliwaka miteko xeeni?

Moovarihana ni itthu soonaly’awe murummwa Yohani, “sahitthukuliwa ilívuru”, nto “alipa-òkhwa yahiphukiwa sitthariheliwaka miteko savanryaya, ntoko salempwaya mulivuruni”. Niireke wira iye saalempwale muliivuruni saari miteko saavanre aya ahinatthi okhwa toko? Nnaari, ophukela iwo khonrowa ottharihiwaka miteko atthu saavanre aya ahinatthi okhwa. Ninsuwela sai eyo? Biibiliya onihimya wira: “Vekekhai, ole okhwiye ohàkiheriwa etampi”. (aRoma 6:7) Ti mulattu aya, ale anihihimuwa anrowa okhuma sittipihiwe ene itampi saya. Tivonto, iliivuru sohaana othoonyerya soovekela sikina sa Muluku. Wira akhalee moohimala, ale anrowa woopowa mu Harmagedoni ni ale anrowa ohihimuxiwa ahaana wiiwelela sooruma sa Muluku, khino sinrowa ohela muhina soovekela isyaa seiyo Yehova sinrowa awe wuupulula okathi wa iyaakha ekonto emosaa. Mwekeekhai, khuta mutthu onrowa ophukeliwaka moovarihana ni miteko sinrowa awe ovara okathi wa Nihiku nno Noophukela.

Nihiku Noophukela ninrowa waavaha okathi wooreerela atthu ibilyau sinceene yaawo yahaatonko omurumeela Muluku wira yiixutte soovekela sawe ni weettela. Ela enitaphulela wira mulaponi motheene munrowa okhala muteko muulupale wa wiixuttiha. Tthiri, “okathi onrowanyu olamula milattu vathí-va, atthu othene anoxutta exariy’anyu”. (Yesaya 26:9) Masi, khahiyo wira atthu otheene anrowa ophavelaka weettela soovekela sa Muluku. Yesaya 26:10, onihimya wira: “Nyuwo munnavilela atakhali, nto awo khanìxutta makhalelo òloka. Ekhalaka eriyari y’atthu òloka, awo annikhalela nthiti sotakhala: annikhotta wottittimihani”. Atthu ala ootakhala anrowa opwetexiwa moomalela okathi wa Nihiku Noophukela.—Yesaya 65:20.

Wanikisa wa Nihiku Noophukela, ale anrowa woopowa anookhalana “ekumi” yooloka ntoko apinaatamu oomalela. (Wisupulula 20:5) Nto Nihiku nna Noophukela, apinaatamu anrowa olokiheriwa wira akhalee oomalela ntoko wanipacerya wa opattuxiwa waya. (1 aKorinto 15:24-28) Nuumala-vo, vanrowa orwa weehereriwa wookiserya. Satana onrowa otaphuliwa wira eererye waahapuxa apinaatamu okathi wookiserya. (Wisupulula 20:3, 7-10) Vano, otheene yaale anrowa omukhoottela Satana animwaakhela waakhwanela wa natiri a Muluku oowi: “Anaxariya animwakhela elapo yohiyeriw’aya: anrowa okhalaka-mo mahiku othene”. (Esalimo 37:29) Aayo, Nihiku Noophukela ninrowa okhala okathi wa mareeliho wa apinaatamu otheene oororomeleya!

[Footnote]