YOOSOMA 30

Atthu Munaaphenta Anyu Akhwiiye Anootthikela Okhala Akumi!

Edição Impressa

Okhwa onnikumiherya owereya ni oriipiwa murima vanceene. Tivonto Biibiliya onihimya awe wira okhwa nwanani. (1 aKorinto 15:26) Yoosoma 27, nyuwo muhiixutta wira Yehova onommala-maliha nwanani owo. Masi etthu xeeni enrowa owiiraneela atthu ale akhwiiye? Yoosoma ela, nyuwo munimwiixutta yooleiherya yoovara murima ya Yehova. Owo onimwaahihimuxa atthu ibilyau sinceene wira akhaleke mahiku otheene! Niireke atthu akhwiiye anoohihimuxiwa tthiri? Anrowa ohihimuxiwa wira yakhaleke wiirimu wala valaponi vaava?

1. Yehova onrowa owiiriha exeeni amusi ni apatthani ahu akhwiiye?

Yehova onrowa waahihimuxa atthu akhwiiye. Mulopwana oowaamini iihaniwa Yobi, aanikupali ni murima wotheene wira nuumala okhwa Muluku khaarowa omuliyala. Owo aahimuleela Muluku wira: “Nyuwo mwamukìhana, miyo kiwakhuleni [Mmahiye]”.—Mmusome Yobi 14:13-15.

2. Ninsuwela sai wira atthu akhwiiye anoohihimuxiwa?

Okathi Yesu aari awe valaponi, Muluku aahinvaha ikuru wira aahihimuxe atthu yaakhwiiye. Mwa ntakiheryo, Yesu aahimuhihimuxa mwaaruusi aarina iyaakha 12. Nave aahimuhihimuxa mwaana a naamukhweli. (Marko 5:41, 42; Luka 7:12-15) Muhoolo mwaya, mpatthani awe iihaniwa Laazaro aahikhwa. Nnaamwi yaavinre mahiku maxexe Laazaro okhwiiye ene ni ori ene mmahiye, Yesu aahimuhihimuxa. Nuumala onvekela Muluku, Yesu aahihimya so: “Laazaro, mukhumele ota!” Nto “mulopwana ole aakhwiiye aahikhumela ota”. Tthiri Laazaro aahitthikela okhala mukumi! (Yohani 11:43, 44) Nkahaya muupuwele moota amusi ni apatthani awe Laazaro yaahakalanle aya!

3. Nlipelelo xeeni arina aya apatthani ni amusi ahu akhwiiye?

Biibiliya onileiherya wira: ‘Onokhala ohihimuxiwa’. (Miteko 24:15) Atthu Yesu aahihimunxe awe khalai khiyaaronwe wiirimu. (Yohani 3:13) Awo yaahihakalala vanceene otthikela okhala valaponi vaava. Mwa enamuna emosaru, moohipisa Yesu onrowa waahihimuxa atthu ibilyau sinceene wira atthikele okhala mahiku otheene mparayiisu valaponi vaava. Yesu aahimmye wira “atthu otheene ari mmahiye” anoohihimuxiwa. Eyo enooniherya wira atthu otheene ari mmuupuweloni mwa Muluku hata yaale anikhala ntoko wira aaliyaliwa anootthikela okhala akumi.—Yohani 5:28, 29.

MWIIXUTTE ITTHU SIKINA

Nwehe itthu sikina siri mBiibiliyani sinooniherya wira atthu akhwiiye anoohihimuxiwa. Nave nwehe moota ohihimuxiwa okhanle aya oowoomaalihani ni woovahani nlipelelo.

Laazaro ohihimuxiwe ene ni Yesu, atthu akina anwehaka atikinihiwe ene.

4. Yesu aahooniherya wira onoowerya waahihimuxa alipa-ookhwa

Nwehe itthu sikina Yesu aamwiirinhe awe mpatthani awe Laazaro. Mmusome Yohani 11:14, 38-44, nuumala-vo mwaakhule makoho anittharelana:

Ninsuwela sai wira Laazaro aahikhwa tthiri?— Eversiikulu 39.
Vaakhanle wira Laazaro aahirowa wiirimu, munoona wira Yesu ammuhihimuxa wira otthikeleke okhala valaponi vaava?

Nwehe EVIIDIYU.

EVIIDIYU: Yesu Aahimuhihimuxa Laazaro (1:16)

5. Anoohihimuxiwa atthu anceene!

Musome Esalimo 37:29, nuumala-vo mwaakhule nikoho ninttharelana:

Atthu ibilyau sinceene anrowa ohihimuxiwa, anrowa okhalaka woowi?

Ohiya paahi waahihimuxa arumeyi oororomeleya a Yehova, Yesu onimwaahihimuxa atthu akina. Musome Miteko 24:15, nuumala-vo mwaakhule nikoho ninttharelana:

Tani mwaaphavela anyu waaweha ahihimuxiwe ene?

Mooreerela murima paapa onvenxaka mwanawe aarupa.

Vannikhweya tiithi onvenxa mwanawe onirupa. Mwa enamuna emosaru, vanoomukhweela Yesu waahihimuxa atthu akhwiiye

6. Ohihimuxiwa onimoomaalihani ni woovahani nlipelelo

Yowiiraneya ya mBiibiliyani ya ohihimuxiwa wa mwaana mwaamuthiyana a Jairo onnaamaaliha ni waalipiha atthu anceene yaawo aniriipiwa murima mwaha wa okhweliwa. Musome yowiiraneya eyo yekeekhai eri Luka 8:40-42, 49-56.

Ohinatthi omuhihimuxa mwaana mwaamuthiyana a Jairo, Yesu aahimuleela tiithi awe wira: “Muhoove etthu, mwaamini paahi”. (Nwehe eversiikulu 50.) Nlipelelo na ohihimuxiwa ninrowa wookhaliheryani sai . . .

vaavo onikhwa awe mmusi wala mpatthani anyu?
vaavo munoopopihiwa anyu wiiviwa?

Nwehe EVIIDIYU, nuumala-vo mwaakhule nikoho.

EVIIDIYU: Nlipelelo na Ohihimuxiwa Ninnilipiha Murima Ahu—Moota Xeeni? (3:21)

Ifootu sinooniheriwa eviidiyu eni: ‘Nlipelelo na Ohihimuxiwa Ninnilipiha Murima Ahu—Moota Xeeni?’ 1. Murokora ommaalihaka Veronica okathi wa mithukumano nuumala Phelicity okhwa. 2. Veronica ni mwanawe mwaamuthiyana amurumeelaka Biibiliya wira ammaalihe muthiyana.

Nlipelelo na ohihimuxiwa naalipinhe ni naakurununxe sai murima aya anamuyari a Phelicity?

ATTHU AKINA ANIHIMYA WIRA: “Nlipelelo na ohihimuxiwa etthu yootepa oreera, masi khahiyo neekeekhai”.

Nyuwo munoonela sai?
Yoolepa xeeni mwaarowa anyu orumeela wira mmooniherye mutthu wira ohihimuxiwa onimwiiraneya tthiri?

IPONTO SUULUPALE

Biibiliya ooleiherya wira ibilyau sinceene sa atthu akhwiiye anoohihimuxiwa. Yehova oniphavela wira atthu awo atthikele okhala akumi ni onvaha Yesu owerya wira aahihimuxe.

Wuuluula

Yehova ni Yesu anrowa owiiriha exeeni atthu ale akhwiiye?
Atthu ibilyau sinceene anrowa ohihimuxiwa, anrowa okhalaka woowi, wiirimu wala valaponi? Nyuwo munoonela sai?
Etthu xeeni enookupalihani wira amusi ni apatthani anyu akhwiiye anoohihimuxiwa?

Yoosoma ela kimalinhe nihiku:

Yoolakela aka

Akhala wira moomusuwela mutthu oriipiwe murima mwaha wa okhweliwa, mmuleeleke nlipelelo na ohihimuxiwa.

Ekina:

Soolukama sanyu sikina

NWEHE ITTHU SIKINA

Nwehe itthu mukhanle anyu oopaka wira nvilele oriipiwa murima mwaha wa okhweliwa.

“Itthu Sinaakhaliherya Ale Akhweliwe” (Nvenye! N^o. 3 2018)

Niireke malakiheryo a mBiibiliyani pooti omukhaliherya mutthu okhweliwe?

Okathi Onikhwa Awe Mutthu Namphenta Ahu (5:06)

Munrowa waakhaliherya sai anamwane ovilela oriipiwa murima mwaha wa okhweliwa?

Yowoopola (2:07)

Niireke aakhala anrowa ohihimuxiwa wira yakhaleke wiirimu? Tani ahinrowa ohihimuxiwa?

“Ohihimuxiwa Exeeni?” (Mwaha ori va jw.org)