Niireke Munniroromela Moota Yehova Onipaka Awe Itthu?

1-2. (a) Xeeni olelo-va atthu anceene anoona aya ovila waaroromela ale arina okhulupale? (b) Exeeni ninrowa ahu othokorerya mwaha ola?

OLELO-VA, anamunceene vannaavila waaroromela atthu arina okhulupale. Awo anniweha wira okhalawene makhulupale, anaavaha efaita atthu yaale arina musurukhu ni owerya. Nave khaniwoonela vatthu atthu oohaawa. Biibiliya onooniherya wira tthiri eyo enniiraneya. Onihimya so: “Àkhala akina arina owerya, àkhala-tho akina anihaawa epuheriwaka n’awo”. (Mus. 8:9) Ohiya vo, ahooleli akina a itiini annipaka itthu soohiloka. Eyo enniwiiriha atthu akina ohimuroromela Muluku. Okathi nimmusomiha ahu Biibiliya mutthu, nihaana omukhaliherya omuroromela Yehova ni ale aathanlale awe wira aweheryeke muteko awe valaponi.

² Masi hata vari siiso, khahiyo paahi anireerela okhaliheriwa omuroromela Yehova ni mutthenkeso awe, taale anisomihiwa Biibiliya. Hata ale animurumeela Yehova mwa iyaakha sinceene, nave ahaana ohiliyala wira okathi wootheene Yehova onipaka itthu mwa enamuna yooloka. Ikwaha sikina pooti okhumelelaka itthu sineehererya omuroromela wahu Yehova. Mwaha ola, nnoothokorerya itthu tthaaru sikhanle ooweehererya ororomeleya wahu: (1) okathi nihiniiwexexa ahu eversiikulu ya mBiibiliyani, (2) okathi nnaakhela ahu malakiheryo a mutthenkeso wa Yehova, ni (3) okathi sinrowa aya oniphwanya mixankiho muhoolo.

MMUROROMELEKE YEHOVA OKATHI MUNIMUSOMA ANYU BIIBILIYA

3. Sowiiraneya sikina sa mBiibiliyani sineehererya sai omuroromela wahu Yehova?

³ Okathi nimmusoma ahu Biibiliya, hiyo pooti wiikohaka nthowa naya Yehova aathokorenrya awe atthu akina mwa enamuna emosa. Ni nthowa naya aapanke awe soothanla sikina. Mwa ntakiheryo, eliivuru ya Mothakoni, ennooniherya wira Yehova aahirumiha wiiviwa mwisarayeli mmosa mwaha woophwanyiwa othayaka ikhuni esaabadu. Samuweli a nenli, ninniphwanya wira sivinre ene iyaakha sinceene, Mwene Davidi aahiraruwa ni mwaara aaneene ni aahimwiiviha iyawe muthiyana ole. Masi hata vari siiso Yehova aahimulevelela. (Moth. 15:32, 35; 2 Sam. 12:9, 13) Hiyo pooti wuupuwelaka so: ‘Xeeni Yehova aamulevelenle awe Davidi mwaha woomwiiva mutthu ni oraruwa, masi orumiha wiiviwa mutthu aapanke etampi yaakhala ntoko yaari yaamukhaani?’ Wira naakhule nikoho nna, nihaana othokorerya itthu 3 ninreerela ahu wuupuwelelaka okathi nimmusoma ahu Biibiliya.

4. Maphattuwelo 18:20, 21 ni Otumererya 10:17 onlipiha sai ororomela wahu moota Yehova oniphuka awe?

⁴ Ikwaha sikina Biibiliya khonihimya itthu sootheene. Mwa ntakiheryo, ninnisuwela wira Davidi aahittharuwa itampi aapanke awe ni murima awe wootheene. (Esal. 51:4-6) Masi mulopwana ole ahaiwelenle nlamulo na esaabadu, mweettelo awe waari sai? Niireke aahittharuwa, aahiiso ahoona wira aahipaka etthu yootakhala? Niireke aahitoko ohiiwelela malamulo a Yehova? Niireke aahilopoliwa masi ohithokorerya etthu? Biibiliya khonihimya. Masi hata vari siiso ehaavo etthu ninreerela ahu ohiliyala, eyo piiyo, okathi wootheene Yehova “t’àxariya”. (Otum. 32:4) Okathi onipaka awe soothanla, onnivarerya itthu sootheene sikhumelenle. Khonitthara itthu sowoothiwa, khahiyo a nthalu, aahiiso etthu ekina ekhanle owiiriha mwaha ohithokoreriwa saana. (Musome Maphattuwelo 18:20, 21; Otumererya 10:17.) Akhala wira nnimuncererya omusuwela wahu Yehova ni moota onipaka awe itthu, nnootepaka ororomela soothanla sawe. Hata ekhalaka etthu nihiniiwexexa ahu saana, nikupaliki wira Muluku ahu “t’àxariya mwa itthu sothene” onipaka awe.—Esal. 145:17.

5. Moota xeeni oyariwa nitthenke ene onniiriha aya ikwaha sikina ohiweryaka ophuka mwa xariya? (Nwehe-tho ekaaxa enihimya so: “Etampi Niyaraniwe Ahu, Enniniiriha Ohiweha Itthu Mwa Xariya”.)

⁵ Mwaha wooyariwa nitthenke ene, ikwaha sikina khaninwerya ophuka mwa xariya. Muluku onipattunxe wira niweryeke wooniherya mikhalelo sawe. Tivonto vannireerela waathokoreryaka atthu ootheene mwa xariya. (Maph. 1:26) Masi mwaha wooyariwa nitthenke ene, hata nuupuwelaka wira ninnisuwela itthu sootheene siiraneyale, hiyo pooti ophukaka moohixariya. Mwa ntakiheryo, nkahaya nuupuwele moota Yona aariipiwe awe murima, okathi Yehova aawoonenle awe othunku atthu a oNiinive. (Yona 3:10–4:1) Masi nkahaya muupuwele etthu yaakhumelenle mwaha wa Yehova opaka eyo. Atthu a oNiinive yaawo yaavikana 120.000, yaahittharuwa mweettelo aya wootakhala, ni khiyaiviwe. Wanikisa waya, vaahooneya wira Yona, taareerela ottaruxiwa, ohiya Yehova.

6. Xeeni Yehova ohinnitthokiherya awe mathowa animwiiriha opaka soothanla?

⁶ Yehova khonkhanyereriwa waaleela apinaatamu mathowa animwiiriha opaka soothanla. Ekeekhai wira khalai, Yehova aahiweemererya arumeyi awe ohimya moota yoonela aya soothanla aapanke awe, aahiiso aarowa awe opaka. (Maph. 18:25; Yona 4:2, 3) Nave, okathi mukina, Yehova aahitthokiherya nthowa naya aapanke awe soothanla iyo. (Yona 4:10, 11) Masi hata vari siiso, Yehova khonkhanyereriwa onileela nthowa naya onipaka awe yoothanla. Okhala wira yena Mpattuxa ahu, ohinatthi opaka etthu aahiiso nuumala opaka, khonlipelela weemereriwa ni apinaatamu.—Yes. 40:13, 14; 55:9.

MMUROROMELEKE YEHOVA OKATHI MUNAAKHELA ANYU MALAKIHERYO

7. Woonasa wene exeeni ekhanle oonixankiha? Ni nthowa xeeni?

⁷ Ninnikupali ni murima ahu wootheene, wira khula okathi etthu Yehova onipaka awe, ti yooloka. Masi ikwaha sikina pooti onixankiha waaroromela atthu aathanlale awe. Okathi mukina hiyo pooti wiikohaka vakhala wira tthiri atthu awo annipaka itthu ettharaka malakiheryo a mutthenkeso wa Yehova, ohiya otthara murima aya. Woonasa wene khalai, atthu akina nave yuupuwela siiso. Nrowe nithokorerye matakiheryo aromoliwe ettima 3. Waanyiheryasa amusi awe mulopwana ole ahaiwelenle nlamulo na esaabadu, yaaniikoha vakhala wira Moise ohinatthi orumiha wiiviwa mmusi aya, aahimukoha toko Yehova. Nave apatthani awe Uria muhiti, yoole amwaarawe yaararunwe ni Davidi, woonasa wene yuupuwela wira Davidi aahirumeela okhulupale awe sintoko mwene wira iisaakihe ohiphwanye ehukhumu aaphwanela awe. Yehova ohaathanla apinaatamu wira ahooleleke mutthenkeso awe ni muloko wa ekristau. Nto khivaniweryaneya ohimya wira ninnimuroromela Yehova, nihaaroromelaka ale Yehova aathanlale awe wira ahooleleke mutthenkeso awe valaponi.

8. Olelo-va, miloko sa ekristau sintthara sai ntakiheryo niri Miteko 16:4, 5?

⁸ Olelo-va, Yehova onneettiha mutthenkeso awe mpantta wa valaponi, omurumeelaka “murumeyi oororomeleya ni a ankhili”. (Math. 24:45) Moolikanasa ni nikhuuru noolamulela na okathi wa makristau oopacerya, murumeyi owo oororomeleya, onnaakhapelela atthu a Muluku olumwenku wootheene. Nave onnaavaha malakiheryo axitokweene a mmulokoni. (Musome Miteko 16:4, 5.) Nuumala-vo, axitokweene annivaha ephoole wira malakiheryo awo atthariweke mmulokoni. Ninnooniherya wira ninniroromela moota Yehova onipaka awe itthu, nittharaka malakiheryo ninvahiwa ahu ni mutthenkeso awe vamosa ni axitokweene.

9. Okathi xeeni vanixankiha aya wiiwelela soothanla sa axitokweene? Nave mwaha wa xeeni?

⁹ Ikwaha sikina pooti oxankiha wiiwelela soothanla sinipakiwa ni axitokweene. Iyaakha vakhaani sivinre, miloko sinceene ni isirkwiitu, saahikawanyiwa, nave sikina saahitakaahiwa. Nave wira sirumeeliweke saana Inupa sa Omwene, axitokweene yaahaavekela anamalaleerya akina wira yarumeeleke miloko sikina. Woonasa wene pooti wooxankihani othaama muloko ori apatthani anyu ni amusi. Masi niireke Yehova onnaaleela axitokweene muloko xeeni akhanle aya oomuthanlela khula namalaleerya? Nnaari. Tivonto pooti onixankihaka otthara malakiheryo ninvahiwa ahu. Masi Yehova onniroromela wira axitokweene anoopaka soothanla sooloka. Hiyo-tho nihaana waaroromela anna awo.b

10. Sintoko onihimya awe aHeeberi 13:17, xeeni vanireerela aya owiiwelela axitokweene?

¹⁰ Xeeni vanireerela aya owiiwelela axitokweene ni okhaliherya soothanla saya, hata sihinisivelaka? Mwaha woowi okathi ninwiiwelela ahu, ninnaakhaliherya arumeyi a Muluku okhala oowiiwanana. (aEef. 4:2, 3) Vaavo atthu ootheene mmulokoni anikhaliherya aya soothanla sinipakiwa ni nikhuuru na axitokweene, muloko wootheene onniphwanya mureerelo. (Mmusome aHeeberi 13:17.) Nave ninnooniherya wira ninnimuroromela Yehova, okathi ninwiiwelela ahu atthu aathanlale awe wira anikhapeleleke.—Mit. 20:28.

11. Exeeni enrowa onikhaliherya olipiha ororomela wahu malakiheryo ninvahiwa ahu ni axitokweene?

¹¹ Etthu enrowa onikhaliherya ororomela ni murima ahu wootheene soothanla sa axitokweene, ohiliyala wira okathi anithokorerya aya myaha sa mmulokoni, anninvekela wira avahiwe munepa woowaarya. Nave annivarerya ni ephoole soolepa sa mBiibiliyani, ni malakiheryo anivahiwa ni mutthenkeso wa Yehova. Awo anniphavela omuhakalaliha Yehova ni murima aya wootheene, ni waakhapelela saana atthu awe. Alopwana awo oororomeleya, annisuwela wira anookohiwa ni Muluku mwaha wa moota anikhapelela aya muritti avahiwe aya. (1 Ped. 5:2, 3) Nkahaya nuupuwele paahi: Nnaamwi atthu a olumwenku ola akawanyeyaka mwaha wa eraasa, etiini ni ipoliitika, arumeyi a Yehova toowiiraana, maana animukokhorela Muluku mmosa paahi eekeekhai. Wiiraana iwo, oniweryaneya mwaha woowi Yehova onnireeliha mutthenkeso awe.

12. Itthu xeeni axitokweene anivarerya aya okathi aniweha aya vakhala wira mutthu oottharuwa?

¹² Yehova ohaavaha axitokweene muritti muulupale wookhaliherya muloko okhala woowaarya. Akhala wira ookhala mukristau opanke etampi yuulupale, axitokweene ahaana ovarerya wira awehe vakhala wira mutthu owo onnireerela nlelo okhala mmulokoni, aahiiso ohaana okumihiwa. Okathi anipaka aya eyo, ahaana wiikoha so: ‘Nnaamwi ohimyaka wira oottharuwa, masi niireke tthiri onninyokha etthu opanke awe? Khonrowa otthikela opaka etampi emosaru? Akhala wira apatthani awe tamwiirinhe opaka etampi eyo, niireke onnikhootta weetta ni atthu awo?’ Anna awo anninvekela Yehova, annivarerya mwaha owo attharaka Nuulumo na Muluku. Nave annivarerya itthu sootheene sikhumelenle ni moota mutthu owo onoonela awe etampi eyo opanke awe. Nuumala-vo, anniweha vakhala wira mutthu owo nlelo onnireerela okhala mmulokoni aahiiso nnaari. Ikwaha sikina mutthu owo pooti okumihiwaka mmulokoni.—1 aKor. 5:11-13.

13. Woonasa wene exeeni ekhanle oonixankiha okathi mmusi ahu aahiiso mpatthani onikumihiwa awe mmulokoni?

¹³ Waaroromela wahu axitokweene onrowa weehereriwa sai? Akhala wira mutthu okumihiwe mmulokoni khahiyo mmusi aahiiso mpatthani ahu, vannikhweya weemererya yoothanla ya axitokweene. Masi ankhi vakhala wira mpatthani ahu? Woonasa wene hiyo pooti wiikohaka vakhala wira axitokweene aavarerya itthu sootheene aahiiso aatthara moonelo wa Yehova. Exeeni enrowa onikhaliherya weemererya yoothanla aya?

14. Exeeni enrowa onikhaliherya akhala wira axitokweene anoothanla wira mmusi aahiiso mpatthani ahu ohaana okumihiwa mmulokoni?

¹⁴ Nihiliyale wira okumihiwa mmulokoni mareheryo a Yehova. Nave-tho annikhaliherya muloko ni annimukhaliherya ole opanke etampi. Akhala wira mutthu opanke etampi ohinattharuwa khonikumihiwa mmulokoni, mutthu owo pooti owiirihaka atthu akina a mmulokoni opaka etampi emosaru. (aGal. 5:9) Owo pooti wuupuwelaka wira etampi opanke awe etthu yaamukhaani paahi, ni khivanreerela oturuka mweettelo awe ni muupuwelo awe wira otthikele ophentiwa ni Yehova. (Mus. 8:11) Nikupaliki wira okathi axitokweene anithanla aya akhala wira mutthu onnireerela okumihiwa mmulokoni, annivara ni murima aya wootheene muritti avahiwe aya. Axitokweene annisuwela wira moolikanasa ni aphuki a wisarayeli wa khalai, awo khaniphukela ni nsina na mutthu, “masi ni nsina n’Apwiya Yehova”.—2 Wah. 19:6, 7.

OMUROROMELA YEHOVA OLELO-VA ONOONIKHALIHERYA MUHOOLO

15. Xeeni vanireerela aya otepa ororomela malakiheryo a Yehova olelo-va ovikana khalai?

¹⁵ Wanikisa wa olumwenku ola wootakhala ori vakhiviru. Tivonto, nihaana otepaka ororomela moota Yehova onipaka awe itthu olelo-va. Mwaha wa xeeni? Mwaha woowi, okathi wa maxakha maalupale, nnoovahiwaka malakiheryo anrowa okhalaka wira tooxankiha ni khanivareleya muteko. Ntoko ninsuwela ahu, Yehova khonrowa olavulaka ni hiyo mmensawe. Onrowa onivahaka malakiheryo aarumeelaka atthu aathanlale awe. Owo khahiyo onrowa okhala okathi woovaanyiha malakiheryo awo. Hiyo pooti wuupuwelaka so: ‘Niireke tthiri malakiheryo ala anikhuma wa Yehova? Aahiiso khahiyo aroopakeleliwa ni anna annihoolela?’ Niireke okathi owo wooxankiha munoomuroromela Yehova ni mutthenkeso awe? Moota olelo-va munaathokorerya anyu ale athanliwe wira anihooleleke, onimooniherya waakhula wanyu. Akhala wira munoororomela malakiheryo munaakhela anyu, ni wiiwelela moohiixinliya, woonasa wene munoowerya opaka etthu emosaru okathi wa maxakha maalupale.—Luka 16:10.

16. Ororomela wahu ophukele wa Yehova onrowa weehereriwa sai muhoolo?

¹⁶ Nave nihaana ovarerya ni ephoole moota ninrowa ahu okhala, okathi Yehova onrowa awe ophukela olumwenku ola wootakhala. Ninlipelela wira atthu anceene ahinimurumeela Yehova olelo-va, waahela muhina amusi ahu, anoopacerya omurumeela olumwenku ola ohinatthi omala. Masi okathi wa Armagedoni, hiyo khahiyo ninrowa waathanlaka atthu aniphwanela wooneliwa othunku ni Yehova. (Math. 25:31-33; 2 aTes. 1:7-9) Omurumeelaka Yesu, Yehova tonrowa waathanla atthu anniphwanela ophwanya ekumi ehinimala aahiiso nnaari. (Math. 25:34, 41, 46) Nto niireke nnoororomela ophukela wa Yehova? Nave niireke khaninrowa ohiya omurumeela Yehova mwaha wooheemererya soothanla onrowa awe opaka? Nihaana olipiha omuroromela wahu Yehova olelo-va, wira niwerye omuroromela muhoolo ni murima ahu wootheene.

17. Ophukela wa Yehova, onrowa oniphwanyiha mireerelo xeeni wanikisa wa olumwenku ola?

¹⁷ Tthiri elapo esya, nnoohakalala vanceene okathi ninrowa ahu owehaka mireerelo sinrowa okhumelela mwaha wa maphukelo a Yehova. Itiini sowootha khasinrowa okhala-tho. Khanrowa okhala alipa a nakoso a nrima, ni anamalamulela anaahaaxa atthu. Nave khaninrowa ohaawaka mwaha wa iretta, wuuluvala ni okhweliwa atthu nnaaphenta ahu. Mwa iyaakha 1000, Satana ni malaikha awe ootakhala, khanrowa waahaaxaka apinaatamu. Nave mixankiho sikhumelenle mwaha wa ohiiwelela waya, sinoomala. (Wiis. 20:2, 3) Okathi owo nnooweha wira naahipaka etthu yooreera mwaha woororomela moota Yehova onipaka awe itthu!

18. Exeeni ninniixuttiha aya ntakiheryo na aisarayeli niri Mothakoni 11:4-6; 21:5?

¹⁸ Niireke elapo esya ya Muluku sinookhala mixankiho sikhanle ooniiriha ohiroromela moota Yehova onipaka awe itthu? Mwa ntakiheryo, nkahaya nuupuwele etthu yaakhumelenle moohipisa nuumala aisarayeli okhuma wExiitu, weiwo yaakhalihiwe aya ipottha. Atthu akina yaahipacerya wiixinliha mwaha wa wunkheliwa eyoolya ya wExiitu. Nuumala-vo, yaahipacerya othanya emana yaavahiwa aya ni Yehova. (Mmusome Mothakoni 11:4-6; 21:5.) Niireke nuumala maxakha maalupale pooti oniiraneela etthu emosaru? Khaninsuwela miteko xeeni ninrowa ahu ovaraka wira nireerihe elapo para okhala eparayiisu. Woonasa wene onookhala muteko munceene nave woopaceryani itthu sikina sinooxankihaka. Niireke nnoohakalala ni itthu Yehova onrowa awe onivahaka okathi owo? Akhala wira nnooxukhurela itthu sootheene Yehova onnivaha awe olelo-va, nave nnoowerya ohakalala ni iye onrowa awe onivaha muhoolo.

19. Mwaarowa wuuluula sai itthu nithokorenrye ahu mwaha ola?

¹⁹ Nikupaliki wira okhala wene, itthu Yehova onnivaha awe ti sooloka. Nave nihaana waaroromela atthu aaroromenle awe wira enivaheke malakiheryo awe. Nihikhala-khale niliyalaka moolumo Yehova aamulenle awe Profeta Yesaya, ohimyaka so: “Mwakiroromela ni murima, munolipa”.—Yes. 30:15.