Ibraawe Asaassi

11 Ammanoy hidootay polettanaagaa ammanettanaadan oottiyaba; intte ammaniyobaa beꞌana xayikkokka, ammanoy hegee tuma gidiyogawu ammanttiya naqaashaa bessiyaba. 2 Beni wode asawu* Xoossay eta ammanuwan markkattiis.

3 Deꞌiyabay ubbay* Xoossaa qaalan giigidoogaa nuuni ammanuwan akeekoos; hegaa gishshawu, Xoossay beettennabatuppe beettiyabata oottiis.

4 Aabeeli Qaaꞌeelaagaappe aadhdhiya yarshshuwa ammanuwan Xoossaayyo gattiis, qassi I xillo gidiyogaa he ammanuwan Xoossay markkattiis; ayssi giikko, Xoossay A imotaa ekkiis,* qassi I hayqqikkokka, hanno gakkanawu ba ammanuwan haasayees.

5 Heenooki hayquwa beꞌenna mala Xoossay A efiidoogee ammanuwana, qassi Xoossay efiido gishshawu, I awankka beettibeenna; ayssi giikko, Xoossay bana Heenooki ufayssidoogaa A efaanaappe kase markkattiis. 6 Hegaa bollikka, ammanoy baynnan Xoossaa ufayssana danddayettenna; ayssi giikko, Xoossaakko shiiqiya ooninne I deꞌiyogaanne bana wozanappe koyiyageetuyyo woytuwa immiyagaa gidiyogaa ammanana bessees.

7 Biron beꞌibeennabay hananaagee odettido wode, Nohee ammanuwan Xoossaayyo yayyiisinne ba soo asaa ashshanawu markkabiya keexxiis, qassi saꞌaa asay qaxxayettana koshshiyogaa he ammanuwan bessiis; hegaa bollikka, I ammanoy demissiyo xillotettaa laattiyagaa gidiis.

8 Abrahaami xeegettido wode, Xoossaayyo azazettidi I laatissana sohuwa ammanuwan biis; I awa biyakko erennaba gidikkokka, kiyidi biis. 9 I bawu Xoossay immana giido allaga biittaa aara issippe laattiya Yisaaqaaranne Yaaqoobaara yan ammanuwan hara biittaa asadan dunkkaaniyan deꞌiis. 10 Ayssi giikko, I Xoossay keexxidonne medhdhido, mintti hiixxidoban eqqida katamaa naagiis.

11 Yeliyo wodee aadhdhikkonne, naꞌa* shaahariyo wolqqaa Saarakka ammanuwan ekkaasu; ayssi giikko, immana giidaagee ammanettiyagaa gidiyogaa ammanaasu. 12 Hegaappe denddidaagan, hayqqida asa mala issi bitaniyappe saluwa xoolinttiya keena daronne abbaa doona shafiyadan qoodettana danddayenna naati yelettidosona.

13 Hageeti ubbay Xoossay immana giidobaa ekkibeennaba gidikkonne, ammanuwan hayqqidosona; shin eti hegeeta haahuwan beꞌidi hammu giidi ekkidosona, qassi he biittan imattanne gamꞌꞌenna asa gidiyogaa awaajjidosona. 14 Ayssi giikko, hegaadan giyageeti banttabaa gidiya sohuwa wozanappe koyiyogaa bessoosona. 15 Qassi eti aggidi yiido sohuwabaa ubbatoo qoppiyakko, simmiyo qaadi xayenna. 16 Shin eti saluwaba gidida, hegaappe kehiya sohuwa laamotoosona; hegaa gishshawu, Xoossay eta Xoossaa geetettanawu yeellatenna; ayssi giikko, I etawu katamaa giigissi wottiis.

17 Abrahaami paacettido wode ammanuwan oottidobay Yisaaqa yarshshidoogaa mala; Xoossay immana giidobaa hammu giidi ekkida Abrahaami ba xonꞌꞌa* naꞌaa yarshshanawu maliis; 18 gidikkonne, Xoossay ayyo, “Ne naata geetettanaageeti Yisaaqa zerettata gidana” yaagi uttiis. 19 Shin Abrahaami ba naꞌaa Xoossay hayquwappe denttana danddayiyogaa ammaniisinne hayquwappe denddidabadan ekkiis; hegee sinttappe hananabaa bessiis.

20 Sinttappe hananabaara gayttidaagan, Yaaqoobanne Eesawa Yisaaqikka ammanuwan anjjiis.

21 Yaaqoobi hayqqana haniyo wode, ammanuwan Yooseefa naata huuphiyan huuphiyan anjjiisinne xamꞌꞌan zemppidi goynniis.

22 Yooseefi hayqqanawu matido wode, ammanuwan Israaꞌeela naatu kessaabaa* yootiis, ba meqettaara* gayttidabaa waatanaakkokka yootiis.*

23 Muusa yelidaageeti I yeletti simmin heezzu aginawu ammanuwan A qottidosona; eti naꞌay keehi loꞌꞌiyogaa beꞌido gishshawu, kawoy azazidobaa yayyibookkona. 24 Muusee diccidi, ammanuwan Paaroona naꞌee naꞌaa geetettidi xeegettennan ixxiis; 25 I nagaran ufayttiyo gamꞌꞌenna ufayssaappe Xoossaa asaara huqqunettiyogaa dooriis; 26 ayssi giikko, I woytuwa ekkanawu tishshi oottidi xeellido gishshawu, Kiristtoosa* gidiyogan yeellatiyogaa Gibxxe buquraappe keehi aadhdhiyabadan xeelliis. 27 I ammanuwan kawuwa hanqquwawu yayyibeennanne Gibxxeppe kiyidi biis; ayssi giikko, beettenna Xoossaa beꞌiyabadan genccidi deꞌiis. 28 I ammanuwan Paasikaa bonchchiisinne qosilettatu bolli suuttaa tiyiis; hegaappe denddidaagan, woriyagee eta bayra naata bochchenna.*

29 Eti mela biittan hemettiyogaadan, ammanuwan Zoꞌo Abbaa gidduwara pinnidosona, shin Gibxxeti yaatanawu malidi muuketti bayidosona.

30 Asay ammanuwan laappun gallassaa ziiriyan yuuyi simmin, Yarkko gimbbee kunddiis. 31 Shaaramuxiya Raꞌaaba biittaa geeddiyageeta* ammanuwan mokka ekkido gishshawu, azazettennan ixxidaageetuura xayabeykku.

32 Qassi harabaa ay yootoo? Ayssi giikko, taani Geedoonabaa, Baaraaqabaa, Samssoonabaa, Yofttaahebaa, Daawitabaa, Sameelabaanne Xoossay erissidobaa yootiya haratubaa yootenna mala wodee diggees. 33 Eti ammanuwan kawotettata xoonidosona, xillotettay eqqanaadan oottidosona, Xoossay anjjana giidobaa siyidosona, gaammotu doonata gorddidosona, 34 tamaa wolqqaa seerissidosona, bisuwappe kessi ekkidosona, laafata eta wolqqaama kessiis, eti minnidi olettidosona, olanawu yiidaageeta yedettidosona. 35 Macca asati bantta siiqoti hayquwappe denddin mokkidosona, shin issi issi attuma asati wozuwawu qanxxettiyaban laꞌa kiyanawu koyibeenna gishshawu, waayettidi hayqqidosona; hegaappe denddidaagan, eti kehiya dendduwa denddana danddayoosona. 36 Ee, qilliicciyogaaninne shociyogan, ubbakka hegaa bolli, sanssalatan qachchiyogaaninne qasho keettan yeggiyogan harata paaccidosona. 37 Eta shuchchan caddidosona, paaccidosona, magaaziyan naaꞌꞌu kessidosona,* bisuwan gooraꞌidosona; qassi eti metootiiddi, waayettiiddinne naaqettiiddi, dorssaa calaanne deeshshaa calaa maayidi yuuyidosona; 38 eti ha saꞌaa asaa giddon deꞌana bessiya asa gidokkona. Eti bazzotun, deretun, gonggolotuuninne biitta giddo ollatun toylattidosona.

39 Shin hageetu ubbaassi eta ammanuwappe denddidaagan Xoossay loꞌꞌobaa markkattikkonne, I immana giidobaa ekkibookkona; 40 ayssi giikko, Xoossay etaagaappe loꞌꞌobaa nuuyyo qoppi uttiis; hegaappe denddidaagan, eti nuuppe kasetidi wottiyobi baynnaageeta gidokkona.