Pheexiroosi Xaafido Koyroogaa
2 Simi iitatettaa, baletuwa, shollooretettaa, qanaatiyanne zigirssaa ubbaa intteppe qaari olite. 2 Biron yelettiya naatudan walahi baynna* qaalaa maattaa laamotite; yaanikko, intte an diccananne attana danddayeeta; 3 ayssi giikko, Goday keha gidiyogaa beꞌideta.*
4 Xoossay siiqiyo doorettidaba gidikkonne, asay phenqqeshido paxa deꞌiya shuchchaakko intte shiiqido wode, 5 Yesuus Kiristtoosa baggaara Xoossaa ufayssiya ayyaanaa yarshshota ayyo yarshshana mala, inttekka paxa deꞌiya shuchcha gidiyo gishshawu, geeshsha kahineta gidanawu Xoossaa ayyaanan keexettiiddi deꞌiya keetta. 6 Ayssi giikko, Geeshsha Maxaafay hagaadan gees: “Beꞌite! Taani Xiyonen doorettida shuchchaa, zooziyan hiixettiya alꞌꞌo shuchchaa wottays, qassi A ammaniya ooninne mule yeellatenna.”*
7 Yaaniyo gishshawu, intte A ammaniyogaappe denddidaagan, I alꞌꞌo gididoy inttessa; shin ammanennaageetuyyo “keexxiyageeti phenqqeshido shuchchay, hegee zooziyawu liiphe shuchcha* gidiis,” 8 qassi “xube shuchchaanne ooggiya zaallaa” wottays. Eti qaalawu azazettenna gishshawu xubettoosona. Etawu hegee hananaagee maacettiis. 9 Shin intte xumaappe malaaliya ba pooꞌuwawu inttena xeegidaagaa “gitatettaa* ubbasan yootana mala doorettida dere, kawo gididi oottiya kahineta, geeshsha dere, Xoossaa aqo gidiya dere.” 10 Ayssi giikko, intte issi wode dere gidekketa, shin haꞌꞌi Xoossaa dere; issi wode Xoossay inttena maaribeenna, shin haꞌꞌi I inttena maariis.
11 Ta siiqotoo, intte hara biittaa asatanne haꞌꞌissawu deꞌiyageeta gidiyo gishshawu, inttenaara* olettiya ashuwa amuwappe baqiyogaa intte aggennaadan zorays. 12 Ha saꞌaa asaa giddon loꞌꞌobaa haniiddi deꞌite; yaatikko, eti inttena mooranchchadan mootiyo wode, intte oottiyo loꞌꞌobaa beꞌana danddayoosonanne, hegaappe denddidaagan, Xoossay yiggi xeelliyo gallassi A bonchchana danddayoosona.
13 Asi medhdhidobawu* ubbawu Godaassi giidi haarettite, kawoy leqqiyagaa gidiyo gishshawu, ayyo gidin, 14 woy ayssiyageeti loꞌꞌobaa oottiyageeta nashshanaassa gidikkonne mooranchchata qaxxayanaassi I kiittidoogeeta gidiyo gishshawu, etassikka haarettite. 15 Ayssi giikko, intte loꞌꞌobaa oottiyogan, pattennabaa haasayiya akeeki baynna asata sirphphi oottanaadan* Xoossay koyees. 16 Laꞌa asatudan deꞌite; he laꞌatettan Xoossaa aylletudan deꞌiteppe attin, iitabaa oottiyogaa kammoppite.* 17 Ubba qommo asaa bonchchite, intte ishata ubbaa* siiqite, Xoossaayyo yayyite, kawuwa bonchchite.
18 Son haggaaziyageeti loꞌꞌonne looxiga godatu xalaalaassi gidennan, ufayssanawu wayssiya godatussikka bessiyagaadan yayyiiddi haarettona. 19 Ayssi giikko, issi asi Xoossaa sinttan A kahay geeshsha gidanaadan baaxetiyaba gidikkonne, waayettiiddinne metootiiddi* genccikko, Xoossay an ufayttees. 20 Intte nagaraa oottido gishshawu asay inttena shociyo wode intte genccikko, woni inttena nashissiyabi aybi deꞌii? Shin intte loꞌꞌobaa oottido gishshawu waayettiiddi genccikko, hegee Xoossaa ufayssiyaba.
21 Intte hegaassi xeegettideta; ayssi giikko, Kiristtoosikka intte A deꞌuwa ogiya mintti kaallana mala, waatanaakko inttena bessidi intte gishshawu waayettiis. 22 I nagaraa oottibeenna, woy balettiyabaa haasayibeenna. 23 I bana asay cayiyo* wode zaaridi cayibeenna.* I waayettiyo wode baabisibeenna, shin suure pirddiya Daannaayyo bana sheedhdhiis. 24 I mittaa bolli kaqettida ba bollan nu nagaraa tookkiis; hegaappe denddidaagan, nuuni nagarawu hayqqidi* xillotettawu deꞌana danddayoos. Qassi “A masunttan intte paxideta.” 25 Ayssi giikko, intte kase wora biya dorssatu mala, shin haꞌꞌi intte shemppuwa* naagiya henttanchchaakko simmideta.