Ibraawe Asaassi
13 Issoy issuwa ishanttudan siiqiyogaa aggoppite. 2 Imattatussi kehiyogaa* dogoppite; ayssi giikko, issoti issoti erennan kiitanchchata imattidosona. 3 Inttekka etaara issippe qashettidabadan, qasho keettan deꞌiyageeta* qoppiyogaa aggoppite; qassi inttekka asa gidiyo gishshawu,* asay naaqqiyogeeta qoppiyogaa aggoppite. 4 Asay ekkiyonne geliyo wode hegaa ubbay bonchchana koshshees, qassi azinaanne machchee hiixay geeshsha gidana koshshees; ayssi giikko, pokkiya tuna nagaraa* oottiyanne wodiraa laammiya asatu bolli Xoossay pirddana. 5 Intte deꞌuwan miishshaa siiqoppite, shin intteyyo deꞌiyaban ufayttidi deꞌite. Ayssi giikko, I, “Taani nena mule yegga bayikke, qassi taani nena mule agga bayikke” yaagiis. 6 Hegaa gishshawu, nuuni muleera ammanettidi, “Tana maaddiyagee Yihoowa; taani yayyikke. Asi tana waatana danddayii?” yaagoos.
7 Intteyyo Xoossaa qaalaa yootida, intte giddon sintta xeera gididi oottiyageeta hassayite; eta oosuwa loꞌꞌo ayfiya yuushshi qoppidi, etaagaadan ammanite.
8 Yesuus Kiristtoosi zinekka, hachchikka, merinawukka issi mala.
9 Dumma dumma allaga timirttetun wora simmoppite; ayssi giikko, A wogaa mintti naagiyageeta maaddenna quman* wozanaa minttiyogaappe, laggetiyabi baynna Xoossaa kehatettan minttiyogee loꞌꞌo.
10 Nuuyyo yarshshiyo sohoy deꞌees, shin dunkkaaniyan geeshsha haggaazaa haggaaziyageetuyyo appe miyo maati baawa. 11 Ayssi giikko, gita kahinee nagaraa yarshshuwawu suuttaa geeshsha sohuwa efiido mehetu bollay asay deꞌiyosaappe* gaxan xuugettees. 12 Hegaa gishshawu, Yesuusikka asaa ba suuttan geeshshanawu katamaappe* gaxan waayettidi hayqqiis. 13 Hegaa gishshawu, simi I tooshettidoogaadan tooshettiiddi asay deꞌiyosaappe* gaxi akko boos; 14 ayssi giikko, hagan nuuyyo deꞌiigiya katami baawa, shin sinttappe yaana katamaa yeemottidi naagoos. 15 Simi nuuni ubbatoo Yesuusan Xoossaayyo sabaa yarshshuwa, hegeekka, A sunttaa asaayyo awaajjiyo, menttershshaa yarshshuwa gattoos. 16 Hegaa bollikka, hegaa mala yarshshoti Xoossaa keehi ufayssiyo gishshawu, loꞌꞌobaa oottanaagaanne intteyyo deꞌiyaban harata maaddanaagaa dogoppite.
17 Intte giddon sintta xeera gididi oottiyageetuyyo eeno giitenne ziqqi giidi azazettite; ayssi giikko, eti Xoossaayyo zaarana asadan inttena* ubbatoo naagoosona; yaatiyogan hegaa ufayttiiddi oottanaappe attin, azzaniiddi oottokkona; yaaniyakko, inttena qohana.
18 Nuuni ubbaban xillobaa hananawu koyiyo wode nu kahay xillo* gidiyogaa ammanettiyo gishshawu, nuussi woossiyogaa aggoppite. 19 Shin taani inttekko gamꞌꞌennan simmanaadan woossana mala, intteyyo mintta yootays.
20 Xoossay dorssatu henttanchchaa gitaa nu Godaa Yesuusa hayquwappe denttiis, qassi Yesuusi merinaa maachchaa suuttaa Xoossaayyo gattiis; sarotettaa Xoossay 21 I koyiyobaa oottanaadan loꞌꞌobaa ubbaa inttena gixissana mala woossays. I ba sinttan keehi ufayssiyabaa Kiristtoos Yesuusan nu giddon oottanaadankka woossays; Xoossaayyo meri merinawu sabay gido. Aminꞌꞌi.
22 Ishatoo, taani intteyyo qantta dabddaabbiya xaafido gishshawu, ha minttettiyabaa nabbabiyo wode danddayan ezgganaadan inttena woossays. 23 Nu ishay Ximootiyosi birshshettidoogaa intte eranaadan koyays. I mata wode yiikko, taani aara issippe inttekko baana.
24 Intte giddon sintta xeera gididi oottiya ubbatussinne geeshshatu ubbatussi ta sarotaa yootite. Xaaliyan deꞌiyageeti inttena saro yaagoosona.
25 Laggetiyabi baynna Xoossaa kehatettay inttessi ubbaassi gido.