Laappune

Nena lanccissida uri intte gubaaꞌiyan deꞌii? Neeni lancciyoogaa agganawu baaxetana xayikko, hegaa agganawu danddayakka. Haray atto morkketuura sigettanawukka eta imattanaadan Geeshsha Maxaafay zorees. (Lee. 25:21, 22) Harata imattiyoogee lancciyoogaa agganaadaaninne nuuni sigettanaadan maaddees. Yaatiyoogee, Yihooway he ura tumawu ehiyo wode beꞌido A loꞌꞌo eeshshaa nuunikka akeekanaadan oottees. (Yoh. 6:44) Issi uri qoppennan deꞌishin nuuni siiquwan A shoobbikko, loꞌꞌo laggetettay doommana danddayees. Yaatanawu, siiqoy nena denttettidoogaa waata akeekana danddayay? Hegawu maaddiya issibay gallassa xiqisee zoriyoobaa oosuwan peeshshiyoogaa. Ammanuwan, genccan, xalatettan woy hara loꞌꞌo eeshshan nu ishantti woy nu michchontti nuuppe aadhdhiyoogaa akeekiyoogee nuuni eta keehi siiqanaadaaninne wozanappe ufayttidi eta mokkanaadan maaddees. w18.03 17 ¶18-19

Issi naꞌi bohettiyo wode azazettiyoogee yelida amaridaageeta keehi metana danddayees. Bohettida naꞌiyaa sooppe kiyada biido issi aayee hanotaa qoppa. He aayyiyaa hagaadan gaasu: “Taani ta naꞌeeranne ta naꞌee naꞌeera wodiyaa attanawu qoppada nu xuufetun kiyida qofaappe hegawu maaddiyaabaa demmanawu purddiyaa koyays.” SHin, I azinay bantta naꞌiyaa haꞌꞌi Yihoowa kushiyan deꞌiyoogaa A akeekanaadan kehatettan O maaddiis. Hegaa gishshawu, Xoossay eta naꞌiyo seeriyoogan eti kelttiyaa gelana koshshennaagaa akeekana bessees. Amarida layttappe guyyiyan, naꞌiyaa gubaaꞌiyaa simmaasu. Aayyiyaa hagaadan gaasu: “A nuuni Xoossawu azazettidoogaa eriyo gishshawu ba aawaanne tana keehippe bonchchawusu.” Neeyyo bohettida naꞌi deꞌikko, “ne polo wozanan GODAA ammanetta; ne akeekan zemppoppa.” (Lee  3:5, 6) Yihoowa seeraaninne kaaletuwan ammanettite. Yihooway yootiyoobaa oottiyoogee metiyaaba gidikkokka, oottite. Yihoowa seeraara maayiyaabaa oottiteppe attin, dummatiyaabaa oottoppite. w18.03 31 ¶12-13

Issi uri xammaqettanawu gakkiyo laytti awudekko Geeshsha Maxaafay yootenna. Maatiyoosa 28:19n “kaalliyaageeta oottite” geetettidi birshshettida qaalay Kiristtoosi erissiyo ashkkara oottanawu halchchidi tamaarissiyoogaa bessiyaaba. Erissiyo ashkkari Yesuusi tamaarissidobaa tamaariyaanne akeekiya, qassi hegaa polanawu murttida asa. Yaatiyo gishshawu, yelida Kiristtaaneti ubbay bantta naati Kiristtoosi erissiyo, xammaqettida ashkkarata gidana mala, guutta naatettaappe doommidi maaddanawu halchchana koshshees. Gacino naꞌi xammaqettana danddayennaagee tuma. SHin, yelaga naatikka Geeshsha Maxaafaa tumaa akeekananne nashshana danddayiyoogaa Xoossaa Qaalay bessees. Leemisuwawu, Ximootiyoosi naatettan tumaa mintti oyqqida erissiyo ashkkara. A ammanoy yeeqennaagaa gidiis. (2 Xim. 1:5; 3:14, 15) Ximootiyoosi bawu layttay 20 heera gidido wode, gubaaꞌiyan dumma maataa ekkana danddayiya asa gidiis.—Oos. 16:1-3. w18.03 9 ¶4-5

Nuuni Yihoowa Markka gidiyo wode laamettida. Nuuni nu deꞌuwan ubbaban laamettida. Qassi xammaqetti simmidikka laamettiyoogaa aggibookko. Nuuni ubbay nagaranchcha gidiyo gishshawu, ubbatoo laamettana bessees. (Pili. 3:12, 13) Nuuni yelaga gidin cima gidin, hagaadan giidi nuna oychchana danddayoos: ‘Taani ayyaanaabaa qoppiya ura gidanawu dicciyoogaa bessiyaabaa akeekiyaanaa? Ta eeshshay Kiristtoosaagaa mala gidiiddi deꞌii? Nu shiiquwan ta haniyoobay taani ayyaanaaban ay keena mino gidiyoogaa qonccissii? Ta haasayiyoobay ta koshshaabaa ay bessii? Ta xinaatiyaabay, ta maayuwaabay, woy asi zoriyo wode ta haniyoobay tabaa ay qonccissii? Paacee gakkiyo wode waaniyaanaa? Biron doommiyo wodiyaagaappe diccada, Kiristtaanetuppe koyettiyaagaa keenaa wozannaama gididanaa?’ (Efi. 4:13) Nuuni ha oyshatussi zaariyoobaa qoppiyoogee ayyaanaaban dicciiddi deꞌiyaakkonne akeekanaadan maaddees. w18.02 24 ¶4-5

Nuuni ay wodeegaappenne dumma wodiyan deꞌoos. Geeshsha Maxaafay kasetidi yootidoogaadan, Yihooway “zare ubbaappe, qommo ubbaappe, yara ubbaappenne dumma dumma biitta qaala ubbaappe ooninne qoodanau danddayenna zawai bainna daro asaa” shiishshiiddi deꞌees. He shiiqidaageeti ufayttidi ‘qamminne gallassi Xoossaayyo oottiya’ hosppun miilooneppe dariyaageeta; eti “gita kawotetta” gididosona. (Ajj. 7:9, 15; Isi. 60:22) Xoossaanne ba mala Kiristtaaneta siiqiya keehi daro asay hagaappe kase mule deꞌi erenna. SHin, ha wodiyan deꞌiya, Xoossaappe haakkida asay ba xallaa siiqiyo, bessenna siiquwaa siiqanaagaa Geeshsha Maxaafay kasetidi yootiis. Kiitettida PHawuloosi hagaadan giis: “Wurssetta gallassi . . . , asati banttana siiqiyaageeta, miishshaa siiqiyaageeta, . . . Xoossaappe aattidi, ufaittiyoobaa dosiyaageeta gidana.” (2 Xim. 3:1-4) Ba xallaa siiqiyo he siiqoy Xoossaa siiqiyo siiquwaappe dummatees. Ubba hegee alamee bana siiqiyaagaa gidanaadan oottees; qassi asa ubbawu deꞌoy metanaadan oottees. w18.01 22 ¶1-2

Tumu eray Noheyyo ammanoynne Xoossaa aadhdhida eratettay deꞌanaadan oottiis; hegee I harabankka, ubba qassi ayyaanaaban qohettennaadan naagiis. Leemisuwawu, Nohee ‘Xoossaara hemettido’ gishshawu, Xoossaa yayyennaageetuura hemettibeenna woykko laggetibeenna. Ashuwaa maayida dayddanttati A cimmibookkona; he dayddanttatuyyo deꞌiya asaagaappe aadhdhiya wolqqay ammanoy baynna eeyya asati geella eeqadan qoodidi eta nashshanaadan oottidoogee qoncce. (Doo. 6:1-4) Qassi yelettidi saꞌaa kumanaadan asaassi odettidoogaa Nohee erees. (Doo. 1:27, 28) Yaatiyo gishshawu, ashuwaa maayida kiitanchati maccaasaara zinꞌꞌiyoogee bessennabanne nagara gidiyoogaa I erennan aggenna. Hegaadan gayttin yelettida naati hara naatu ubbaappe keehi gitanne wolqqaama gididoogee hegee qonccanaadan oottiis. Guyyeppe, kumetta saꞌan bashshaa haattaa ehaanaagaa Xoossay Noheyyo yootiis. Xoossay yootidobaa ammanidoogee Nohee ba soo asaa ashshanawu markkabiyaa keexxanaadan denttettiis.—Ibr. 11:7. w18.02 9 ¶8

Neeni gita nagaraa oottidaba gidikko, Yihooway nena maaddanawu koyees. Cimatu baggaara nena maaddanawu I giigissidoban neeni goꞌettana koshshees. (Lee. 24:16; Yaaq. 5:13-15) Merinaa deꞌoy neeppe halana danddayiyo gishshawu, haganaa sugoppa! Gidoppe attin, ne nagaray atto geetettoosappe daro wodee aadhdhi simminkka, kase mooridoban neeni zilꞌꞌettiyaabaa gidikko shin? Kiitettida PHawuloosi kase mooridoban issi issitoo azzanidoogee qoncce. I hagaadan giis: “Yesuusi kiittido ubbaappe taani laafa; taani Xoossaa woosa keettaa waissido gishshau, Yesuusi kiittidoogaa geetettada xeesettanaukka bessikke.” (1 Qor. 15:9) Yihooway PHawuloosi nagaranchcha gidiyoogaa erees. SHin A baakko shiishshi ekkiis, qassi PHawuloosi hegaa eranaadan koyees. Neeni kase oottido nagaraappe simmada hegaa paaxikko, Yihooway nena maaranaagaa ammanettana danddayaasa. Hegaa gishshawu, Yihooway ba qaalaa naaganaagaa ammanetta; qassi A maarotaa eeno gaada ekka!—Isi. 55:6, 7. w18.01 11 ¶17-18

Nuuni Yihoowa dabbo gidanawu, i yootiyoobaa siyananne aara haasayana koshshees. Nuuni Geeshsha Maxaafaa xannaꞌiyoogee Yihooway yootiyoobaa siyiyo waanna oge. Yaatanawu, Xoossaa Qaalaanne Geeshsha Maxaafaa qofay deꞌiyo xuufeta nabbabiyoogaaninne wotti dentti qoppiyoogan eraa demmana koshshees. SHin, Geeshsha Maxaafaa xannaꞌiyoogee timirtte keettaa eraa mala gidennaagaa hassaya. He xinaatee neeni timirtte keettaa paaciyaa aadhana xallawu tamaaridobaa hassayiyoogaa mala gidenna. SHin hegee neeni Yihoowabaa oorattabaa pilggada eriyo ufayssiya manddaraa biyoogaa mala. Geeshsha Maxaafaa xannaꞌiyoogee neeni Xoossaakko shiiqanaadan maaddana; yaatikko i neekko shiiqana. Xannaꞌanawu nena maaddiya darobaa Yihoowa dirijjitee giigissiis. Leemisuwawu, jw.org saytiyan xannaꞌanawu giigida, “Tumuppe Geeshsha Maxaafay Tamaarissiyoy Aybee?” giya qofay neeni mintta ammananaadan maaddana danddayees.—Maz. 119:105. w17.12 25 ¶8-9

Hagaa mala sarotettay ‘saꞌay Yihoowa eriyoogan kumiyo’ wode deꞌana. Doꞌati Yihoowabaa tamaarana danddayenna gishshawu, ha hiraagay asaa eeshshay laamettanaagaa leemiso hanotan yootees. (Isi. 11:6, 7) Daroti wanggireellotudan kase iita; shin eti haꞌꞌi haratuura saruwan deꞌoosona. “Geeshsha Maxaafay Asay Laamettanaadan Oottees” giya, jw.org saytiyan deꞌiya huuphe yohuwan amaridaageetu deꞌuwan hanidabaa nabbabana danddayaasa. Kase iita asati “tumu xillotettaaninne geeshshatettan Xoossaa leemisuwan merettida ooratta asatettaa” maayidosona. (Efi. 4:23, 24) Asay Xoossaabaa tamaariyo wode, eti A maaraadan deꞌana koshshiyoogaa akeekoosona. Hegee eti bantta ammanuwaa, qofaanne eeshshaa laamanaadan maaddiis. Hegaadan laamettiyoogee deexxiyaabaa gidikkonne, Xoossaa sheniyaa oottanawu wozanappe koyiyaageeta Xoossa ayyaanay maaddiyo gishshawu eti laamettana danddayidosona. w18.01 31 ¶15-16

Saluwan deꞌanawu denddiyaageeta xeelliyaagan Geeshsha Maxaafay “ubbaikka ba kayan kayan” denddanaagaa yootees. Hegaadankka, saꞌan deꞌanawu denddiyaageeti kayan kayan denddanaagaa nuuni ammanettana danddayoos. Hegee nuuni kaalliyaagaadan oychanaadan oottana danddayees. Mata wode hayqqidaageeti Kiristtoosa SHaꞌu Layttaa Haaruwaa doomettaa heeran denddin, eta siiqiyaageeti eta mokkanee? Beni wode deꞌida, kaalettiyo eray deꞌiyo ammanettida asati ooratta alamiyan Xoossaa asaa darajjayiyoogan maaddanawu kasetidi denddanee? Yihoowawu haggaazi erenna asay shin? Eti denddanay awudee; qassi awaanee? Daro oyshata oychana danddayoos. SHin, haꞌꞌi ha oyshatubaa qoppana koshshii? Hegee gakkiyo wode Yihooway oottiyoobaa beꞌoos. He wode gakkanaashin, Xoossay hassayiyo hayqqidaageeti denddanaagaa nuuyyo Yesuusa baggaara yootida Yihoowa mintti ammanana bessees.—Yoh. 5:28, 29; 11:23. w17.12 12 ¶20-21

Ha zoree intte so asaa waati maaddana danddayiyaakko akeekadii? Xoossaa Qaalay azinatussi, “Intte maccaasaa siiqite; etaara woppu giidi de7ite” yaagees. (Qol. 3:19) Siiqiya azinay ba machiyaa yootiyoobaa siyiyoogaaninne i qofaa nashshiyoogaa yootiyoogan ba machiyo bonchees. (1 PHe. 3:7) I ubbatoo a oychidoogaadan oottana xayikkonne, iira zorettiyoogan bessiyaabaa kuuyees. (Lee. 15:22) Siiqiya azinay a machiyaa a bonchanaadan oychenna. SHin i bana bonchissiyaabaa oottees. Ba machiyoonne ba naata siiqiya azinay ba so asay ufayssan Yihoowawu oottanaadaaninne deꞌuwaa woytuwaa ekkanaadan maaddana danddayees. w17.11 28 ¶12; 29 ¶15

Kiitettida PHawuloosi Roomen koyro qashettido wodee wuriyo 60-61 M.L. heeran Qolasiyaasan deꞌiya Kiristtaanetussi dabddaabbiyaa xaafiis. Ayyaanaabaa ‘akeekiyoogee’ keehi koshshiyaaba gidiyoogaa i etayyo qonccissiis. (Qol. 1:9) PHawuloosi gujjidi hagaadan giis: “Ooninne inttena cimo qaalan balettenna mala, taani inttena hassayissais. Kiristtoosappe gidenna timirttiyan, ha sa7aa haariya ayyaanatu timirttiyaaninne asappe yiida eratettan, qassi mela cimuwan inttena ooninne omooddenna mala naagettite.” (Qol. 2:4, 8) Asay dosiyo issi issi qofay bala gidiyoonne alamiyaa qofay nagarancha asaa ufayssana danddayiyo gaasuwaakka PHawuloosi yootiis. Leemisuwawu, hegee issi uri haratuppe aaruwan eriyaabadaaninne etappe aadhiyaabadan qoppanaadan oottana danddayees. He dabddaabbee ishantti alamee qoppiyoonne oottiyo iitabaa kaallennaadan maaddanawu xaafettiis.—Qol. 2:16, 17, 23. w17.11 20 ¶1

Issi Kiristtaanee ubbatoo Xoossaa maarotaa demmanawu aggana danddayiyoobay aybee? I keehi dosiyoobaykka a nagaraa ootissana danddayiyaaba gidikko, i hegaa aggana bessees. (Maa. 18:9) Issi issi laggeti neeni Yihooway dosennabaa oottanaadan nena denttettiyaabaa oottikko, etaara laggetiyoogaa agguutee? Neeni uyana bessiya likkiyaa eranawu metootikko, likkiyaappe aattada uyanaadan paacciyaabaappe haakkuutee? Neeni shori baynnabaa amottiyoogaa agganawu baaxetiyaaba gidikko, iitabaa qoppanaadan oottiya pilmiyaa beꞌennaadan, web saytiyaa xomoosennaadan woy hegaa mala harabaa oottennaadan naagettuutee? Yihoowawu ammanettidi deꞌanawu giidi aybanne aggiyoogee nuna maaddiyoogaa hassaya. Yihooway nuna yeggi bayiyoogaappe aadhiya iitabi baa. Qassi, a “merinaa siiquwan” deꞌiyoogaappe aaruwan ufayssiyaabi baawa.—Isi. 54:7, 8. w17.11 11 ¶12

Zakkaariyaasa 5:4y ‘qanggettay kaysuwaa soo gelanaagaanne yan deꞌiiddi he keettaa xayssanaagaa’ yootiyoogaa akeekadii? Hegaa gishshawu, Yihooway ba asaa giddon oosettiya nagaraa qoncciyaa kesseesinne pirddees. Issi uri wuuqqidi ba oottidobaa polisiyaappe, ootissiyaageetuppe, cimatuppe, woy yelidaageetuppe qosana danddayikkonne, Yihoowappe qosana danddayenna. (Ibr. 4:13) Ubbaban ammanettidi deꞌiyoogaa akeekiya asaara deꞌiyoogee keehi ufayssiyaaba! (Ibr. 13:18) Ayba ogiyankka wuuqqiyoogee Yihoowa ufayssenna. Nuuni Yihooway kessido kandduwaa maaraa kaallidi, a sunttay aybiininne cayettennaadan oottiya deꞌuwaa deꞌiyoogaa bonchodan xeelloos. Yaatiyo gishshawu, nuuni Yihooway ba higgiyaa eriiddi kanttiyaageetu bolli pirddiyo pirddaappe aattana danddayoos. w17.10 22 ¶6-7

Harati nu hanotaa bala ogiyan akeekiyo wode woy nuna maaraa oyqqibeennabadan siyettiyo wode, nuuni nu ishanttuura saruwan deꞌanawu nuussi danddayettida ubbabaa oottoos. (Roo. 12:17, 18) Atto gaanaadan oychiyoogee qohettida ura maaddana danddayees; shin hegee wozanappe gidana bessees. Sarotettay aqo deꞌuwan keehi koshshees. Azinaynne machiyaa asaa sinttan issoy issuwaa siiqiyaabaa milatidi, banttarkka deꞌiyo wode issoy issuwawu lanccana, iita qaalaa haasayananne qohiyaabaa oottana bessenna. Qassi coo atto gaanawu koyana bessees. Nuuni nuna naaqqida uraa maariyoogaaninne lanccido lancciyaa aggiyoogan awu atto goos. Nuuni wozanappe atto gaanawu, ‘naaqettidobaa paydenna’ mala nu qoppiyooban naagettana bessees. (1 Qor. 13:4, 5) Nuuni uluwan lancciyaa oyqqikko, nu ishaara woy micheera deꞌiya dabbotaa xalla gidennan, Yihoowaara deꞌiya nu dabbotaykka muleera moorettana danddayees.—Maa. 6:14, 15. w17.10 10 ¶14-15

Zakkaariyaasi yootidobay he wode deꞌiya Ayhudata waati maaddidee? Eti beeta maqidasiyaa keexxi wurssanaadan Yihooway maaddanaagaanne naaganaagaa qaalaa geliis. Yihooway gelido he qaalay hidootaa qanxxida asati minettanaadan oottennan aggenna. SHin he deexo oosuwaa guutta asati waati polanee? Zakkaariyaasi kaallidi yootidobay eti aynne yayyennaadan woy sirennaadan oottees. Helddaaya, Xoobbiyaanne Yadaaya mala ammanettida asatuppe hara darotikka “GODAA Beeta Maqidasiyaa keexxidi maaddanau” yaanaagaa Xoossay yootiis. Ayhudati Xoossay maaddanaagaa ammanettidi, eti keexxennaadan Parsse kawoy digettikkokka keexxiiddi aggosaappe sohuwaara doommidosona. Keexxennaadan teqqiya, dere mala gidida kawuwaa awaajjuwaa Yihooway diggin, beeta maqidasee 515n K.K. keexettidi wuriis. (Izi. 6:22; Zak. 4:6, 7) SHin Yihooway yootidobay he wodeegaappekka aadhiyaabay haꞌꞌi polettiiddi deꞌiyoogaa qonccissees. w17.10 29 ¶17

Yerusalaamen beeta maqidasiyaa keexxiyo oosuwaa xomoosiyo keehi gita aawatettay Solomonayyo imettiis; hegee hanno gakkanawu gitabaa halchidi keexxido keettatuppe issuwaa. He beeta maqidasee “biitta ubban erettidanne bonchchettida, lo77o keetta” gidana. Hegaappekka aaruwan, he keettay ‘Yihoowa beeta maqidasiyaa’ gidana. He oosuwaa kaalettanaadan Yihooway Solomona dooriis. (1 Odi. 22:1, 5, 9-11) Kawuwaa Daawiti Xoossay maaddanaagaa ammanettiis; shin Solomoni “lammachchanne yelaga na7a.” Solomoni xalidi beeta maqidasiyaa keexxiyo oosuwaa doommanee? I yelaganne lammacha gidiyoogee xube gidanee? Solomoni he oosuwaa polanawu, xalidi doommana bessees. Solomoni xala gidennaakko yashshaa maashana; hegee qassi i oosuwaa doommennaadan diggana. Nuuni xala gidanaadaaninne oosuwaa polanaadan Solomonaagaadan nuuyyookka Yihoowa maadoy koshshees. w17.09 28 ¶1-2; 29 ¶4-5

Geeshsha Maxaafay baynnaakko ne deꞌoy ay mala gidanee? Ne deꞌuwan ubba galla maaddiya, ammanttiya zore demmana danddayakka. Xoossaabaa, deꞌuwaabaanne sinttanaabaa xeelliyaagan denddiya oyshatuyyo suure zaaro demmakka. Qassi Yihooway beni asawu oottidobaa erana danddayakka. Nuuni hegaa mala azzanttiya hanotan deꞌenna gishshawu galatoos. Yihooway ba Qaalaa, Geeshsha Maxaafaa nuussi immiis. Qassi i ba Qaalay merinawu daanaagaa yootiis. Kiitettida PHeexiroosi Isiyaasa 40:8⁠ppe hegaa yootiis. He xiqisee yootiyoy Geeshsha Maxaafaabaa gidennaagaa nuuni eroos; shin ayyaanaa kaaletuwan xaafettida he qofay Geeshsha Maxaafay yootiyoobawukka hanees. (1 PHe. 1:24, 25) Hegee metiyaaba gidikkonne, ashkke asati daro xeetu layttawu Geeshsha Maxaafaa birshshiyoogaaninne asawu gattiyoogan minnidi oottidosona. Eta koshshay, “Asai ubbai attanaadaaninne tumatettaa eranaadan” koyiya Xoossaa qofaara maayiyaaba.—1 Xim. 2:3, 4. w17.09 18 ¶1-2

Yelaga Kiristtaaneta darota Yooseefaagaa mala paacee gakkees. (Doo. 39:7) Kimi hanotaa beꞌa. Iira tamaariya naati saaminttaa wurssettan asho gaytotettaa polidoogaa ufayttiiddi yootoosona. SHin Kima yootiyo hegaa malabi baawa. Etappe dummatiyoogee a issi issitoo bana asi “yeggi bayidobadaan” qoppanaadaaninne boorasanaadan oottiyoogaa, qassi a attuma naatuura laggettenna gishshawu iira tamaariya naati o eeyyadan xeelliyoogaa yootaasu. SHin Kima daro yelagatussi asho gaytotettaa paacee wolqqaama gidiyoogaa loytta erawusu. (2 Xim. 2:22) Iira tamaariyaageeti a geelaꞌokkonne darotoo oychoosona. Eti hegaadan oychiyo wode, a etadan hanennay aybissakko yootawusu. Kandduwaaban shori baynnabaa oottennan agganawu murttida yelaga Kiristtaaneta nashshoos; Yihoowaykka eta nashshees! w17.09 4 ¶8; 5 ¶10

Elle hanqqettiya asi darotoo cayiyoogan ba hanqquwaa qonccissees. He eeshshay so asay ufayttanaadan oottana danddayennaagee qoncce. Geeshsha Maxaafay nuuni hanqqettennaadan, cayennaadaaninne waassennaadan zorees. (Efi. 4:31) He eeshshay darotoo ooshshay denddanaadan oottiyoogee azzanttiyaaba. Alamiyaa asay hanqquwaa meeze gididabadan xeellikkonne, hegee Medhidaagaa bonchissenna. Daroti ooratta asatettaa maayanaappe kase hegaa mala iita eeshshaa aggidosona. (Qol. 3:8-10) Worddotiyoogeekka ceega asatettaappe issuwaa. Leemisuwawu, asay qaraxaa qanxxiyo wode worddotiyoogee woy qassi oottido nagaran oyshettennaadan worddotiyoogee meeze gididaba. Gidoppe attin, Yihooway ‘tumaa Xoossaa.’ (Maz. 31:5) Hegaa gishshawu, i baayyo goynniya “ubbai” ‘ba ishawu tumaa haasayanaadan’ qassi ‘worddotennaadan’ koyees. (Efi. 4:25; Qol. 3:9) Yaatiyo gishshawu, yeellayiyaaba woy metiyaaba gidana danddayikkonne, nuuni tumaa haasayana bessees.—Lee. 6:16-19. w17.08 18 ¶3, 5; 20 ¶12-13, 15

Yihooway ha wodiyan ba Qaalaa Geeshsha Maxaafaa baggaara nuna kaalettees. Qassi nuussi koshshiya ayyaanaabaa kaaletoy ‘a qaalaa baggaara eesuwan gakkees.’ Geeshsha Maxaafaa nabbabiyoogee, ‘ammanettida wozannaama ashkkaray’ giigissido xuufeta pilggiyoogee, JW Brodkastingiyan kiyiyaabaa beꞌiyoogee, jw.org sayttiyaa xomoosiyoogee, cimatuura haasayiyoogeenne nu mala Kiristtaanetuura wodiyaa aattiyoogee nena waati goꞌꞌidaakko qoppa. (Maa. 24:45) Yihooway nena maaddanawu sohuwaara gakkiyoogaa akeekabeykkii? Xoossay beni wode deꞌida ba asaa ay keena nashshidaakko mazamurawee erees. Xoossay ‘ba qaalaa, ba awaajjuwaanne ba pirddaa’ eta xallawu immiis. (Maz. 147:19, 20) Ha wodiyan, Xoossaa sunttan xeegettiyay nu xallaa; hegee gita anjjo. Nuuni Yihoowa eriyo gishshawunne a Qaalay nuna kaalettiyo gishshawu, aara keehi dabbotida. Mazamure 147 xaafidaagaadan, neenikka haratikka ‘Yihoowa galatanaadan’ denttettiya daro gaasoti deꞌoosona. w17.07 20 ¶15-16; 21 ¶18

Kumetta wodiyaa haggaaziya issi miilooneppe dariya ishanttanne michontta gujjin, ha wodiyan Yesuusa kaalliyaageeti qommoora deꞌiya PHawuloosa zoriyaa oosuwan peeshshanawu banttawu danddayettida ubbabaa oottoosona. Ha yaaretiya alamiyan issibaa shammanaadan odettiya erissota eti eqettoosona, qassi “tal77i ekkidaagee tal77iyau immidaagau aille gidees” giya Geeshsha Maxaafaa maaraa hassayoosona. (Lee. 22:7) Nuuni nu wodiyaanne wolqqa ubbaa ha alamiyaaban wurssikko Seexaanay keehi ufayttees. Nuuni kuuyiyo issi issibay miishshaara gayttidaagan nuna daro layttawu acoyana danddayees. Issi issi asay keettaa keexxanawu, kaamiyaa shammanawu, xoqqa timirttiyaa tamaaranawu woy bullachaa bullachanawukka daro miishshaa talꞌꞌees. Daro aquwaa shiishshennan, qassi acotennaaninne daro miishshaa kessennan deꞌiyoogan, nuuni ha alamiyawu gidennan, Xoossawu haarettiyoogaa bessoos; hegee cinccatetta.—1 Xim. 6:10. w17.07 10 ¶13

Ubbabaa haariyo maatay Yihoowaagaa. I ba maataa goꞌettiyoy suure ogiyaana. I babaa hagaadan giis: “[Taani] aggenna siiquwaa, suure pirddaanne xillotettaa sa7aa bollan oottiya GODAA, . . . taani hageetan ufaittais.” (Erm. 9:24) I suure pirddaa pirddanawu nagarancha asi kessido higgiyaa kaallenna. Suurebay aybakko maaraa kessiyay a; i bali baynna suure pirddaa pirddiyo gishshawu asaassi higgiyaa immees. “Xillotettainne suure pirddai [a] kawotaa araataassi baaso” gidiyo gishshawu, a higgee, a maaraynne a pirdday ubbay suure gidiyoogaa ammanettana danddayoos. (Maz. 89:14) Seexaanay Yihooway suure haarenna giidi mootees. SHin i ba huuphe ha alamiyan suure pirdday deꞌanaadan oottana danddayenna. w17.06 28 ¶5

Yihooway nuussi immido heezzantto ayyaanaabaa aqoy nuuni tamaarido tumaa. (Maz. 31:5) I keha Aawa gidiyo gishshawu, baayyo yayyiyaageetussi ba tumaa yootiis. I keha Aawa gidiyo gishshawu, baayyo yayyiyaageetussi ba tumaa yootiis. Nuuni tumaa koyro siyido wodiyaappe doommidi, Geeshsha Maxaafaanne nu xuufeta nabbabiyoogan, qassi gita shiiqotuuninne saaminttaa shiiqotun shiiqiyoogan daro tumaa tamaarida. Daro wodiyaappe guyyiyan, Yesuusi ‘minjja soho’ giidobay nuuyyo deꞌana; hegee nuuni beni tamaarido tumaanne mati tamaarido tumaa. (Maa. 13:52) Qosido miishshaa asi koyiyoogaadan nuuni he tumaa koyikko, alꞌꞌo ooratta tumaa nuuni nu ‘minjjawu’ shiishshanaadan Yihooway maaddana. (Lee. 2:4-7) Nuuni hegaa waati oottiyoo? Nuuni buzo xinaatiyaa loytti xannaꞌiyaageeta, qassi Xoossaa Qaalaanne nu xuufeta akeekan pilggiyaageeta gidana bessees. Yaatiyoogee nuuni “ooratta” tumaa, hegeekka nuuni hagaappe kase erennabaa eranaadan maaddees. (Yaas. 1:8, 9; Maz. 1:2, 3) Nuuni hara daro tumaa ubbatoo koyanawu yeemottana bessees. w17.06 12 ¶13-14

Ediwardo giyo aqo oyqqibeenna yelagay, bana qofissidabaa Istiven giyo aqo oyqqida gastta gubaaꞌe cimaassi yootiis. Ediwardoy 1 Qoronttoosa 7:28n, “Hegaadan oottiyaageeti [aqo oyqqiyaageeti] bantta bolli waayiyaa ehaana” yaagiyaagaa qoppiiddi takkiis. I, “Ha ‘waayee’ aybee, qassi taani aqo oyqqikko, hegaa waata genccanee?” yaagidi oychiis. Istiveni he oyshaa zaaranaappe kase, Yihooway, ‘minttetto ubbaa Xoossay nu waaye ubban nuna minttettees’ yaagidi kiitettida PHawuloosi xaafido haarabaa Ediwardoy qoppanaadan yootiis. (2 Qor. 1:3, 4) Yihooway metoy gakkiyo wode nuna minttettees; qassi i nuna siiqiya Aawa. Nena gakkida metuwan Xoossay darotoo ba Qaalaa baggaara maaddidoogaanne kaalettidoogaa neeni beꞌennan waaya aggana. I beni wode deꞌida ba ashkkaratussi amottidoogaadan, nuuyyookka loꞌꞌobaa amottiyoogaa ammanettana danddayoos.—Erm. 29:11. w17.06 4 ¶1-2

Aquwaaban maaddiyoogaappe aaruwan bete gidida nu ishanttussi ayyaanaabaaninne eta qofissiyaaban maadoy koshshees. (Maa. 4:4) Cimati beteti bantta qaalan xuufiyaa demmanaadaaninne eta qaalaa haasayiya ishanttuura gayttanaadan maaddana danddayoosona. Betetuppe daroti siiqiya keetta asaappe, heeraa asaappenne gubaaꞌetuppe shaahettidosona. Yihooway eta siiqiyoogaanne etawu qarettiyoogaa eti bantta mala Kiristtaanetuppe akeekana koshshees. Hankkoode, eti ammanenna dabbotuura woy etaagaa mala wogaynne meezee deꞌiyo bantta biittaa asatuura laggetana danddayoosona. (1 Qor. 15:33) Gubaaꞌiyaa yame gididabadan etawu siyettanaadan oottiyoogan, ‘Yihoowaara issippe beteta naagiyo’ maataa demmoos.” Beteta huqquniyaageeti maataappe wodhana gakkanaassi, bantta biitti simmanawu waayi danddayana. Daroti eta gakkidaban yeellatana danddayoosona. Nena, ‘Tana etaagaa malabay gakkiyaakko, tana asi waatidi oyqqanaadan koyiyaanaa?’ gaada oycha.—Maa. 7:12. w17.05 6 ¶15-16

Nuuni hidootaa qanxxiyoogee nu ammanoy shugganaadaaninne nuuni Xoossaa siiqiyo siiqoy irxxanaadan oottana danddayees. Seexaanay hariyo ha iita alamiyan, nuna ubbaakka hidootaa qanxxanaadan oottiyaabi issi issitoo gakkees. (1 Yoh. 5:19) Cimatettay, sahoy caddiyoogee woy deꞌoy metiyoogee nuna ha wodiyan tuggayana danddayees. Woy nuuyyo danddayettennabadan qoppiyoogan, qoppidobay hanibeenna gishshawu, woy nuuni mooridobaa gaasuwan baaxetiiddi deꞌana danddayoos. SHin, hegaa mala hanotay woy qofay Yihooway nuna aggiis giidi nuuni qoppanaadan oottana koshshenna. Yihooway nuna aggennan siiqiyoogaa bessiya qofaa wotti dentti qoppana koshshees. Mazamure 136:23n hegaa mala qofay deꞌees. Xiqisee hagaadan gees: “I nuuni kauyyido wodekka nuna qoppiis; aggenna a siiqoi merinaagaa.” Aggenna Yihoowa siiqoy a ashkkaratussi merinawu deꞌiyaaba. Hegaa gishshawu, i nu ‘watiwatiyoogaa siyidi’ nuussi zaariyoogaa ammanettana danddayoos.—Maz. 116:1; 136:24-26. w17.05 18 ¶8

Galaatiyaa 2:11-14y qonccissiyoogaadan PHeexiroosi asawu yayyiis. (Lee. 29:25) Ayhuda gidenna asata xeelliyaagan Yihoowa qofay aybakko PHeexiroosi loytti eriyaaba gidikkokka, Yerusalaame gubaaꞌiyan deꞌiya qaxxarettida Ayhudatu woyganddiyaa yayyiis. Kiitettida PHawuloosi Sooriyaa Anxxookiyan PHeexiroosi bessennabaa oottido gishshawu a seeriis. (Oos. 15:12; Gal. 2:13) PHeexiroosi PHawuloosa seeraa siyidoogee qoncce. Geeshsha Maxaafay PHeexiroosi ba maataappe wodhidoogaa yootenna. Ubba guyyeppe, Geeshsha Maxaafaa shaaho gidida naaꞌꞌu dabddaabbeta xaafanaadan geeshsha ayyaanay PHeexiroosa denttettiis. Gubaaꞌiyawu huuphe gidida Yesuusi an goꞌettiyoogaa aggibeenna. (Efi. 1:22) Hegaa gishshawu, he gubaaꞌiyan deꞌiyaageeti atto giyoogan Yesuusanne a Aawaa leemisuwaa kaallana danddayoosona. Nagarancha uri oottido balan ooninne xubettibeennaagaa ammanettana danddayoos. w17.04 27 ¶16-18

Yihooway he heeraa ubbaa xayssidoy mooro oosuwaa he sohuwaappe xayssana xallaassa gidenna. Hegaa i “nagaranchcha gidiyaageeta gakkanabau leemiso oottiis.” Yihooway shori baynna ooso ubbaa he wode xayssidoogaadan, i ha alamiyan ba pirddaa ehiyo wodekka hegaa mala oosuwaa xayssana. Mooro oosuwaa sohuwan aybi oosettanee? Saꞌay gannate gidin yan ufayssiya oosoy kumana. Ha saꞌaa gannate oottiyo woykko nuussinne nuuni siiqiyoogeetussi keettaa keexxiyo ufayssiya oosuwaa qoppa. Miilooniyan qoodettiyaageeti hayquwaappe denddiyo wode mokkiyoogaa, qassi Yihoowa ogiyaabaanne i kase wodetun asawu oottidobaa eti tamaaranaadan maaddanaagaa qoppa. (Isi. 65:21, 22; Oos. 24:15) Nuna ufayssiyaanne Yihoowawu sabaa gujjiya ooso xalaalan nu deꞌoy kumana! w17.04 12 ¶11-12

Yofttaahee hegaadan geppiyo wode, bana mokkanawu sooppe koyro kiyanay a naꞌiyo gidana danddayiyoogaa erennan aggenna. Yofttaahee hegaa erin aggin, i Yihoowawu shiiqettidobaa poliyoogee ayyookka a naꞌeeyyokka keehi deexxiyaaba. Yofttaahee o beꞌido wode, “ba maayuwaa pooshshidi,” keehi azzanidoogaa yootiis. A naꞌiyaa ‘ba geelaꞌotettaassi yeekkaasu.’ Aybissi? Yofttaaheyyo attuma naꞌi baa; qassi awu deꞌiya issi naꞌiyaa mule azinaa gelananne naꞌa yelana danddayukku. Hegaappe denddidaagan, Yofttaahe babaa laatissiyo uri baawa. SHin eta qofissida waannabay hegaa gidenna. Yofttaahee, “Taani GODAASSI shiiqetta uttaas; hegaa shiiquwaa gattennan agganau danddayikke!” yaagiis. Qassi a naꞌiyaa, “Neeni shiiqettidobaa ta bolli pola” yaagaasu. (Daan. 11:35-39) Eti Ubbaappe Wolqqaama Xoossawu qaalaa gelido keehi deexxiyaabaa polennan agganawu mule qoppibookkona; hegee eti ammanettiya asa gidiyoogaa bessiyaaba.—Zaa. 23:21, 23; Maz. 15:4. w17.04 4 ¶5-6

Yooseefa keehi wolqqaama naaqoy gakkiis. Koyro, awu layttay 17 heera gidiyo wode a ishantti aylletettawu a bayzzidosona. Hegaappe simmin, ba godaa macheera wolqqan gayttanawu maliis giidi wordduwan mootin, i qasho keettan sanssalatan qashettiis. (Doo. 39:11-20; Maz. 105:17, 18) I ba xillo oosuwaa gishshawu woytuwaa ekkiyoogaappe qaxxayettidaba milatiis. SHin 13 layttaappe guyyiyan, ubbabay eesuwan laamettiis. I qashuwaappe birshshettidi Gibxxen kawuwaappe kaalliya xoqqa maatay deꞌiyoogaa gidiis. (Doo. 41:14, 37-43; Oos 7:9, 10) Yooseefi bana gakkida naaquwan yiillotidee? I ba Xoossaa Yihoowan ammanettiyoogaa aggidee? CHii. Yooseefi danddayan naaganaadan a maaddidabay aybee? I Yihoowa ammaniyoogaa. I Yihooway darobaa giigissidoogaa akeekiis. I ba ishatussi yootidoban hegee waanidi qonccidaakko akeeka: “Yayyoppite; tana intteyyo Xoossaa giidetiiyye? Intte taayyo iitanau oottideta; shin hachchiigaadan daro asai haiqqennan attana mala, Xoossai lo77otettau hagaa oottiis.” (Doo. 50:19, 20) Naagidoogee bessiyaaba gidiyoogaa Yooseefi wurssettan akeekiis. w17.08 4 ¶6; 6 ¶12-13