Hosppune

Ha alꞌꞌo imotatun nuuni waani goꞌettana danddayiyoo? Issi ogee ammanuwan cimata milatiyoogaanne eta loꞌꞌo leemisuwaa kaalliyoogaa. Hara ogee qassi eti Geeshsha Maxaafaappe yootiyo zoriyaa siyiyoogaa. (Ibr. 13:7, 17) Cimati nuna siiqiyoogaanne nuuni ayyaanaaban diccanaadan koyiyoogaa hassaya. Leemisuwawu, nuuni gubaaꞌe shiiquwaa attiyoogaa woy kaseegaadan mishettennaagaa eti akeekikko, nuna sohuwaara maaddanaagee qoncce. Eti nuuni yootiyoobaa siyidi, nuna siiquwan minttettoosonanne Geeshsha Maxaafaappe bessiya zoriyaa nuuyyo immoosona. Eti maaddiyoogaa Yihooway nena siiqiyoogaa bessiyaabadan xeellay? Nuuyyo koshshiya zoriyaa immanawu cimata metana danddayiyoogaa hassaya. Yaatiyo gishshawu, neeni ne gubaaꞌiyan deꞌiya cimatussi oosoy darenna mala waatana danddayay? Ne huuphiyaa kawushshiyaagaa, pashkki giyaagaanne galatiyaagaa gida. Eti maaddiyoogaa Xoossay nena siiqiyoogaa bessiyaabadan xeella. Yaatiyoogan, neeni ufayttana; qassi cimatikka bantta oosuwaa oottiyoogan ufayttana. w18.03 31 ¶15-16

Naati ubbay dumma dumma gidiyoogee tuma; eti ubbay issi likke woy issi wodiyan wozannaamokkona. Amaridaageeti naatettan qofankka eeshshankka wozannaama gididi, xammaqettanawu koyiyoogaa yootoosona. Harati hegaappe guuttaa gasttana gakkanaashin xammaqettanawu giigettennan aggana danddayoosona. Hegaa gishshawu, yelida akeekanchchati bantta naati xammaqettanaadan iisettokkona. SHin eti naati ubbay bantta hanotaadan ayyaanaaban diccanaadan maaddoosona. Naꞌi aadhdhida eranchcha gidiyoogaa bessiyo wode yelidaageeti ufayttana danddayoosona. Gidoppe attin, eti bantta naata Kiristtaane erissiyo ashkkara oottanawu halchchidoogaa mule dogana koshshenna. Yelidaageeti hegaa hassayidi, ‘Ta naꞌay bana Xoossawu geppanawunne xammaqettanawu danddayiyo eraa demmidee?’ yaagidi banttana oychchana danddayoosona. w18.03 9 ¶6

Issi uri nuna shoobbin eeno giikko, pattennabaa gaasoyidi attana bessenna. Nuna shoobbida uri loytti giigettennan aggenna; qassi nuuni attikko, A daafuray ubbay hada gidees. (Maa. 5:37) Issi issi asay loꞌꞌuwaa dariyaaba milatiya shoobiyawu baanawu giidi koyro shoobettidosaa beennan aggees. Hegee siiqiyoogaanne bonchchiyoogaa bessiyaabee? Nuna shoobbiyaageeti giigissidobay aybanne gidin, he shoobiyaa nashshidi shoobettana koshshees. (Luq. 10:7) SHoobiyaasaa beennaadan diggiyaabay merettikko, shoobbida urawu sohuwaara yootiyoogee siiqiyoogaanne ayyo qoppiyoogaa bessiyaaba. Heeraa wogaa bonchchiyoogeekka keehi koshshiyaaba. Issi issi wogan imattay qoppennan yiikkokka asay mokkees; hara wogan qassi kaseti giigissiyoogee loꞌꞌo. Issi issi wogan, shoobettida asay issitoo woy naaꞌꞌutoo koyikke gaana bessiyaabadan qoppoosona; hara heeran hegaadan oottiyoogee nashshennaagaa bessiyaaba. Harati nuna imattiyo wode eta ufayssanawu nuuyyo danddayettida ubbabaa oottana koshshees. w18.03 18 ¶20-21

Ayyaanaabaa qoppiya asa gidanawu, Geeshsha Maxaafaa eraa xallay gidennaagaa hassaya. (1 Kaw. 4:29, 30; 11:4-6) Yaatin, Geeshsha Maxaafaa qofaa eriyoogaappe harabaa ay oottana koshshii? Nuuni ayyaanaaban ubbatoo diccana bessees. (Qol. 2:6, 7) Hegawu keehi maaddiya issibay ‘Xoossaa Siiquwan Deꞌa’ giyo maxaafaa xannaꞌiyoogaa. Neeni he maxaafaa xannaꞌada wurssiyoogee Geeshsha Maxaafaa maaraa oosuwan waata peeshshanaakko akeekanawu maaddees. He maxaafaa xannaꞌada wurssaychchidaba gidikko, ammanuwan minnada deꞌanawu neeni xannaꞌana danddayiyo hara xuufetikka deꞌoosona. (Qol. 1:23) Neeni xannaꞌiyoobaa waata oosuwan peeshshanaakko wotta dentta qoppay, qassi woossay? Nuuni Yihoowa ufayssanawunne A higgiyaa azazettanawu wozanappe koyiyo gishshawu xannaꞌananne wotti dentti qoppana koshshiyoogaa hassaya. (Maz. 40:8; 119:97) Hegaa bollikka, ayyaanaaban diccennaadan nuna diggiyaabaa eqettanawu minnidi baaxetoos.—Tii. 2:11, 12. w18.02 24-25 ¶7-9

Noheegaadan ammananawu Xoossaa Qaalaa minnidi xannaꞌiyoogee, tamaaridobaa wozanan wottiyoogeenne he eray nuna suurissanaadaaninne kaalettanaadan eeno giyoogee maaddees. (1 PHe. 1:13-15) Yaatiyo wode, ammanoynne Xoossaa aadhdhida eratettay Seexaanaa cimo hiillaappenne alamiyaa iita ayyaanaappe nuna naagees. (2 Qor. 2:11) Alamiyaa ayyaanay kobabaanne kandduwan shoraa xayiyoogaa dosanaadan denttettees. Qassi hegee asay asatettaabaa xallaa amottanaadan oottees. (1 Yoh. 2:15, 16) Ubba qassi, hegee ayyaanaaban shuggidaageeti Xoossaa gita gallassay matidoogaa bessiya naqaashaa akeekennaadan oottana danddayees. Yesuusi Nohe wodiyaa nu wodiyaara geeddarssiiddi, asay kobattiyoogaa woy kandduwan shoraa xayiyoogaa gidennan, ayyaanaabaa wudennaagaa qonccissidoogaa akeeka. (Maa. 24:36-39) Nena hagaadan oychcha: ‘Taani Yihoowa tumuppe eriyoogaa ta deꞌoy bessii? Ta ammanoy taani Xoossaa geeshshatettaa maaraa kaallada deꞌiyoogaa xalla gidennan, hegaa asawu yootanaadankka denttettii?’ Neeni he oyshatussi immiyo zaaroy ‘tumu Xoossaara hemettiyoogaa’ bessiyaaba gido.—Doo. 6:9. w18.02 9-10 ¶8-10

Nuuni iita eeshshay deꞌiyo asaappe muleera haakkana danddayennaagee qoncce. Nuuni etaara issippe oottiyaageeta, tamaariyaageeta, woy qassi deꞌiyaageeta gidana danddayoos. SHin nuuni etaagaadan qoppananne oottana bessenna. Nuna aybi maaddana danddayii? Nuuni Geeshsha Maxaafaa xannaꞌiyoogaaninne Yihoowa siiqiyaageetuura laggetiyoogan aara deꞌiya nu dabbotaa minttana danddayoos. Nuuni harata ayyaanaaban maaddanawukka baaxetana bessees. Markkattanawu injje wodiyaa koya; bessiya wodiyan bessiyaabaa haasayanaadan Yihooway maaddana mala woossa. Nuuni Yihoowa Markka gidiyoogaa harati eranaadan oottana bessees. Yaatiyoogan, nu loꞌꞌo eeshshay nuussi gidennan, Xoossaassi bonchchuwaa ehaana. “Nagara oosuwaanne ha sa7aa amuwaa nuuni agganaadaaninne nu huuphiyaa naagidi, ha sa7an Xoossaa milatidi, xillotettan de7anaadan” nuuni tamaarida. (Tii. 2:11-14) Nuuni Yihoowa milatidi I koyiyoogaadan oottikko, harati hegaa akeekana. Ubba issoti issoti hagaadan gaana danddayoosona: “Xoossai inttenaara de7iyoogaa nuuni siyido gishshau, ane nuunikka [inttenaara] boos.”—Zak. 8:23. w18.01 31 ¶17-18

Nuuni nuna siiqiyoogee balee? Bala gidenna, hegee wottin deꞌiyaaba; ubba bessiyaagaadan nu huuphiyaa siiqana koshshees. Yihooway nuna hegaadan medhdhiis. Yesuusi, “Neeni ne shooruwaa ne huuphedan siiqa” yaagiis. (Mar. 12:31) Nuuni nu huuphiyaa siiqana xayikko, nu shooruwaa siiqana danddayokko. Geeshsha Maxaafay hagaadan gees: “Azinai ba maccaasiyo ba bollaadan siiqanau bessees; ba machchiyo siiqiyaagee bana siiqees. Aissi giikko, ba bollaa ixxiya asi mulekka baawa; shin . . . ooninne ba bollaa mizeesinne naagees.” (Efi. 5:28, 29) Hegaa gishshawu bessiyaagaadan ba huuphiyaa siiqiyoogee koshshiyaaba. Naaꞌꞌantto Ximootiyoosa 3:2n odettida ba huuphiyaa siiqiyoogee bessenna siiqo. Hegee ba xallaa siiqiyo siiqo. Banttana likkiyaappe aattidi siiqiya asati banttabaa qoppana bessiyaagaappe aattidi qoppoosona. (Roo. 12:3) Eti banttabaa hara oogaappenne aattidi qoppoosona. Issibay moorettiyo wode, hegawu aawatettaa ekkiyoogaappe hara uran gaasoyoosona. Ba xallaa siiqiya asay ufayttenna. w18.01 23 ¶4-5

Geeshsha Maxaafaa xannaꞌiyoogee Yihooway yootiyoobaa siyiyo issi oge; qassi woosay Yihoowa haasayissiyo oge. Issi Kiristtaanee woosaa coo meezedan xeellana bessenna woy qassi hegee baaxetiyo issibay coo qaadadan yaa ushachanaadan oottiyaabadan qoppana bessenna. Woosay nuna Medhidaagaara haasayiyo oge. Yihooway ne woosaa siyanawu koyees. (Pili. 4:6.) Nena hirggissiya aybinne gakkiyo wode, Geeshsha Maxaafay “ne toohuwaa Xoossan” wottanaadan zorees. (Maz. 55:22) Neeni hegaa tumuppe ammanay? Miilooniyan qoodettiya ishanttinne michontti he zoree banttana maaddidoogaa neeyyo yootana. Hegee nenakka maaddana danddayees! Woosay Yihooway maaddanaadan oychiyoogaa xalla gidenna. Issi issitoo nu metuwaabaa xallaa qoppidi, nuuni demmido daro anjjuwaa akeekennan aggana danddayoos. Neeni Yihoowa galatana danddayiyo heezza gidiyaabaa galla galla qoppiyoogee loꞌꞌo. Yaatada, he anjjotu gishshawu woosan Yihoowa galata. w17.12 25-26 ¶10-11

Geeshsha Maxaafaa xannaꞌissiyo shaꞌan qoodettiyaageeti bantta huuphiyaa Yihoowawu geppidi xammaqettoosona. Etappe daroti tumaa tamaaridi diccida yelagata; eti ubbaappe aadhiya deꞌuwaa dooridosona. (Maz. 1:1-3) Neeni Kiristtaane aawa woy aayo gidikko, ne naꞌi xammaqettana gallassaa neeni yeemuwan naaganaagee erettidaagaa.(3 Yoh. 4⁠ra gatta xeella.) Kiristtaane aawatinne aayeti intte naꞌay geeshsha maxaafata eranaadan koyeeta; hegeeti ha wodiyan Ibraawettonne Giriiketto Geeshsha Maxaafata. Eti akeekana danddayiyo hanotaadan, keehi guutta naatikka Geeshsha Maxaafan odettida asatubaanne hanotatubaa tamaarana danddayoosona. Aawatinne aayeti bantta naata maaddanawu goꞌettana danddayiyo darobata Yihoowa dirijjitee giigissiis. Hegeetuppe intte qaalan giigida issota issota qoppana danddayeetii? Geeshsha Maxaafaa eray Yihoowaara dabbotaa minttanawu maaddiya waannaba gidiyoogaa hassayite. w17.12 18 ¶1; 19 ¶4

Neeni macho gidikko, Yihoowa Markka gidenna ne azinay nena qohikko shin? Neeni a eeshshaabaa denttada palamettiyoogee hanotay giiganaadan oottanee? I neeni koyiyoogaadan hanikkonne, Yihoowawu oottanawu koyanaadan neeni oottanee? Oottennan aggana danddayaasa. Giddoppe attin, ne azinay huuphe gidiyoogaa neeni bonchikko, intte son sarotettay deꞌanaadan oottana danddayaasa. Hegaa bollikka, neeni Yihoowa galatananne ubba qassi ne azinay Yihoowa Markka gidanawu koyanaadan oottana danddayaasa. Yaatin, intte naaꞌꞌaykka woytuwaa ekkana danddayeeta. (1 PHe. 3:1, 2) Neeni azina gidikko, Yihoowa Markka gidenna ne machiyaa nena bonchennabadan neeni qoppikko shin? Aawatettay oogaakko bessanawu neeni o hanqqettiyaakko, a nena bonchanaadan oottuutee? Mule oottakka! Neeni Yesuusa milatada siiquwan ayssanaadan Xoossay koyees. Yesuusi ba gubaaꞌiyaa siiquwaaninne danddayan ayssees. (Luq. 9:46-48) Azinay Yesuusa leemisuwaa kaalliyoogan, ba machiyaa Yihoowa Markka gidanaadan maaddana danddayees. w17.11 28-29 ¶13-14

Alamiyaa qofaa qoppiya asay Yihoowa maaraa shenehoo gees; qassi hegee loddan loddan nu ammanuwaa qohana danddayees. Ha wodiyan, nuuni ubbay alamiyaa qofaa siyoos. Televizhiiniyan, Interneettiyan, ooso sohuwan woy timirtte keettan hegaa malabay siyettees. Ha wodiyan daro biittan hegaa mala qofay meeze gididaba. Hegaadan qoppiya uri Xoossay deꞌiyaakkonne baynnaakko giidi loytti qoppennan aggana danddayees; shin coo ba koyidobaa oottana danddayiyaabadan qoppiyoogaa dosees. (Maz. 10:4) Harati, “Taani Xoossaa ammanana xayikkonne loꞌꞌo maaraa kaallana danddayays” giidi, banttana alamiyaa eranchadan xeellana danddayoosona. Xoossay baa giidi ammaniyoogee bessiyaabee? Issi issi asay saynisiyaappe hegaa zaaruwaa demmanawu malidi akeekanawu metootiis. SHin he yohoy akeekanawu metennaba. Keettaa keexxanawu asa koshshikko, deꞌuwan deꞌiyaabawu hegaappe aadhiyaabaa koshshees! w17.11 20-21 ¶2-4

Godaa Kahuwaa bonchchiyoogaa goꞌꞌaa wotta dentta qoppa. Gubaaꞌe shiiqoy nu goynuwaa shaaho gidiyoogaa hassaya. Layttaa giddon awugaappenne aadhdhiya he shiiquwaa shiiqanawu baaxetiya ura Yihoowaynne Yesuusi akeekiyoogee erettidaagaa. Nuuni danddayennaba gidana xayikko Godaa Kahuwaa mule attokko; hegaa Yihoowaynne Yesuusi beꞌanaadan koyoos. SHiiqoy nuuyyo keehi koshshiyaaba gidiyoogaa nuuni oottiyooban bessiyoogee, merinaa deꞌuwaa demmanaageetu sunttay xaafettido ba ‘hassayissiya maxaafan’ woy “de7o maxaafan” Yihooway nu sunttaa wotti bayanaadan oottiya hara gaaso. (Ajj. 20:15) Godaa Kahuwaappe kasetiya saaminttatun, nuuyyo Yihoowaara nu dabbotay ay malakko woosaaninne akeekan qoranawu wodiyaa bazzana danddayoos.—2 Qor. 13:5. w18.01 13 ¶4-5

Attiyo katamaa baqatidi biida uri yan hirggennan deꞌees. Yihooway ‘he katamati intte baqati biidi attiyo soho’ yaagiis. (Yaas. 20:2, 3) Yihooway erennan asa worida uri he yohuwan zaarettidi oyshettanaadan koyenna, woy qassi suuttaa achiyaagee he katamaa gelidi he ura worana danddayenna. Baqati biida uri asi halo kiyees giidi mule yayyenna. Yihooway a naagiyo gishshawu he kataman hirggennan deꞌees. He katamay baqati biida uri qashettiyoosa gidenna. I he kataman oottana, harata maaddananne sarotettan Yihoowawu haggaazana danddayees. Tumukka, i yan ufayttidi deꞌana danddayees! Xoossaa asatuppe issoti issoti gita nagaraa oottidi bantta nagaraappe simmidikka, keehi zilꞌꞌettoosona. Ubba issoti issoti eti oottidobaa Yihooway mule dogennabadan qoppoosona. Neeni hegaadan qoppiyaaba gidikko, Yihooway neeyyo atto giyo wode, a maarotay nena woppu oottana danddayiyoogaa hayyanaa ammanetta! w17.11 9 ¶6; 11 ¶13-14

Nu issippetettay minnanaadan nuuni oottana danddayiyo koyro ogee Godaa Kahuwaa wode goꞌettiyo oyttaynne woynee aybawu leemisokko wotti dentti qoppiyoogaa. Irshshoy baynna oyttaynne woynee ay qonccissiyaabakko, he qammaappe kasetidi, ubba qassi he qamman nuuni loytti qoppana koshshees. (1 Qor. 11:23-25) Oyttay yarshsho gidida, nagari baynna Yesuusa ashuwaa bessees; qassi woynee gukkida A suuttaa bessees. Kiristtoosa wozo yarshshoy Yihooway nu gishshawu ba naꞌaa immiyoogan bessidonne Yesuusi ba dosan nu gishshawu ba shemppuwaa atti immiyoogan bessido, laggetiyaabi baynna naaꞌꞌu gita siiquwaa bessiyaaba gidiyoogaa hassaya. Eta siiquwaa wotti dentti qoppiyoogee nuunikka eta siiqanaadan denttettana bessees. Qassi nuuninne nu mala ishantti Yihoowa siiqiyo siiqoy nu issippetettaa minttiya issippe gatti qachchiya wodoruwaa mala. w18.01 14 ¶11

Yihooway asaa keehi siiqeesinne xoqqu oottidi xeellees. I ba Naꞌaa suuttaa baggaara nuuni merinaa atotettaa demmanaadan oottiis. (Yoh. 3:16) Yihooway ba gelido qaalaa polana xayikko, Xoossay ba meretata loꞌꞌobaa diggiya worddanchaa, qassi suure gidenna ogiyan haariyaagaa giidi mootanawu Dabloosi gaaso demmana. Qassi qilliicciiddi, “I ‘Yaana’ yaagiis. Gibeennee? Yaatin awan de7ii? Aissi giikko, nu aawati haiqqiichchidosona; shin ubbabaikka sa7ai merettoosappe doommidi de7iyoogaadankka de7ees” yaagiya asaykka tumancha gidana. (2 PHe. 3:3, 4) Yihooway ba haaroy suure gidiyoogee erettanaadan oottiyo issibay azazettiya asaa ashshiyoogaa. (Isi. 55:10, 11) Hegaa bollikka, Yihooway ubbabaa haariyoy siiquwaana. Hegaa gishshawu, ammanettida ba ashkkarata i ubbato siiqiyoogaa, xoqqu oottidi xeelliyoogaanne nashshiyoogaa ammanettana danddayoos.—Kes. 34:6. w17.06 23 ¶7

Yihooway sinttappe Ashshiyaagee yaana giidi Doomettaabaa 3:15n, qaalaa gelido wodeppe doommidi he yarshshoy yarshshettidabadan qoppiis. Hegaappe simmin, 4,000 gidiya layttay aadhin, Yihooway asaa gishshawu ba mexi issi Naꞌaa immiis. (Yoh. 3:16) Yihooway ba goꞌꞌaa aggibayidi nuna siiqiyo gishshawu keehi galatoos! Nuuni Xoossaa leemisuwan merettido gishshawu nu goꞌꞌaa aggibayiyo siiquwaa bessana danddayoos. Aabeeli ba goꞌꞌaa aggibayidi bawu deꞌiyaabaappe keehi loꞌꞌo gididabaa immiyoogan Xoossaa siiqiyoogaa bessiis. (Doo. 4:3, 4) Nohee siyiya asa demmana xayikkokka, daro layttawu Xoossay yootidobaa sabbakiyoogan ba goꞌꞌaa aggibayidi asaa siiqiyoogaa bessiis. (2 PHe. 2:5) Abrahaami ba naꞌaa Yisaaqa yarshshanaadan azazettido wode, ba koyiyoogaappe Xoossaa siiqiyoogaa sinttayiis. (Yaaq. 2:21) He ammanettida asatudan, metoy deꞌishinkka nuuni siiquwaa bessana koyoos. w17.10 7-8 ¶3-4

Yesuusi nuuyyo Qeese Ubbatu Halaqa gidi oottiyoobay nuuni ‘koshshiyo wode maaddiya maarotettaa ekkanawunne aaro kehatettaa demmanawu’ maaddanaagaa ammanettanaadan oottees. (Ibr. 4:16) Yaatiyo gishshawu, Yesuusa yarshshuwan ammana. Wozoy nenakka maaddiyoogaa ammana. (Gal. 2:20, 21) Wozuwaa baggara ne nagaray atto geetettiyoogaakka ammana. Wozoy neeyyo merinaa deꞌuwaa hidootay deꞌanaadan oottiyoogaa ammana. Yesuusa yarshshoy Yihooway neessi immido imota. Yihooway nu nagaraa issitoo atto giichikko, zaarettidi he nagaraa denttees woy hegaa gishshawu nu bolla pirddees giidi yayyanawu bessenna. (Maz. 103:8-12) Ee, Yihooway atto giyoogaa nuuni muleera ammanettana danddayoos. w17.11 11-12 ¶14-17

Godaa Kahuwaa koyro doommido qammi, Yesuusi ba Aawaynne I issuwaa gididoogaadan A kaalliyaageeti ubbay issuwaa gidanaadan woossiis. Yihooway ba siiqiyo Naꞌay woossido he woosaa zaaridoogee qoncce; qassi ha wodiyan miilooniyan qoodettiyaageeti Yihooway ba Naꞌaa kiittidoogaa ammanoosona. Hara ayba shiiqoppenne aaruwan Godaa Kahoy Yihoowa Markkatu issippetettaa loytti qonccissees. Issi issi heeran, haymaanoote shiiquwawu dumma dumma zare asay shiiqiyoogee oorattaba woy qassi harati kariyooba. SHin hegaa mala issippetettay Yihoowanne Yesuusa keehi ufayssees! Hegaa mala issippetettay deꞌidoogee Yihoowa asaa garamissenna. Yihooway hegaa kaseti yootiis.—Hiz. 37:15-17; Zak. 8:23. w18.01 14 ¶7-9

“Gimbbiyaageeti” woykko Ayhuda haymaanootiyaa kaalettiyaageeti Masiyaa karidi ixxidosona. Eti a ixxidoy ayyo zokkuwaa zaariyoogaa woy i Kiristtoosa gidiyoogaa ekkenna ixxiyoogaa xallaana gidenna. Daro Ayhudati a keehi ixxido gishshawu, i hayqqanaadan koyidosona. (Luq. 23:18-23) Eti ubba Yesuusi hayqqanaadan oottidosona. Eti Yesuusa ixxidi woridaba gidikko, i waanidi “godaa xaphuwaa minttiya ubbaappe aadhdhiya shuchcha” gidana danddayii? Hegee polettana danddayiyoy i hayquwaappe denddiyoogaa xallaana. Kiitettida PHeexiroosi mittaa ‘bolli misimaariyan eti xishidi kaqqin, Xoossai haiquwaappe denttido Naazireeta Yesuus Kiristtoosabaa’ etawu yootiis. (1 PHe. 2:5-7) Hayquwaappe denddida he Naꞌaa xalaalay ‘nuuni attana mala asassi imettida’ sunttay deꞌiyoogaa gidiis.—Oos. 4:12; Efi. 1:20. w17.12 9-10 ¶6-9

Mati yaana gita waayiyaa xeelliyaagan Yesuusi hagaadan giis: “Taani, Asa Na7ai, wolqqaaranne gita bonchchuwaara saluwaa shaara giddoora yiishin, eti be7ana. [Yesuusi] ba kiitanchchata gita malkkataara kiittana; kiittin kiitanchchati . . . au doorettida asaa shiishshana.” (Maa. 24:29-31) ‘Doorettida asaa shiishshiyoogee’ he wode saꞌan deꞌiya tiyettidaageetuppe attidaageeti ubbay saluwan bantta woytuwaa ekkanaagaa bessiyaaba. Hegee gita waayiyaa doomettaa heerappe biidi Armmageedoona olay denddana gakkanaashin hanana. Yaatin 144,000 ubbati Yesuusaara issippe saꞌaa kawota xoonana. (Ajj. 17:12-14) Yesuusi tiyettidaageeta shiishshanawu ‘yaanaappe’ kase bonchchettana Godaa Kahoy wurssettaagaa. w18.01 16 ¶15

Yesuusi saluwan “meri merinaukka” deꞌees; a bollay mule musenna. (Ajj. 1:5, 18; Roo. 6:9; Qol. 1:18; 1 PHe. 3:18) Yesuusi i kiittido ammanettidaageeti saluwan aara haaranaagaa etawu yootiis. (Luq. 22:28-30) PHawuloosi “Kiristtoosi haiqqidaageetu dendduwaassi baira gididi, haiquwaappe” denddidoogaa yootiis. PHawuloosi haratikka saluwaa deꞌuwaa demmanawu denddanaagaa yootiiddi hagaadan giis: “Ubbaikka ba kayan kayan denddana. Kiristtoosi ubbaappe kasetidi denddiis; hegaappe guyyiyan, Kiristtoosaageeti Kiristtoosi yiyo wode denddana.” (1 Qor. 15:20, 23) Nuuni 1914⁠ppe doommidi Yesuusi “yiyo,” kasetidi odettida wodiyan deꞌoos. Ha iita alamee xayiyo wodee haꞌꞌi keehi matiis. w17.12 10 ¶11; 11 ¶14-16

Maarotettaa Aawaa gidida nu Xoossay i siiqiyo Abrahaami, Yisaaqi, Yaaqoobi, Muuseenne Kawuwaa Daawiti hayqqin keehi azzaniis. (Qoo. 12:6-8; Maa. 22:31, 32; Oos. 13:22) Xoossay hayquwaappe eta denttana wodiyaa yeemuwan naagiyoogaa Geeshsha Maxaafay yootees. (Iyy. 14:14, 15) Eti denddiyo wode ufayttananne payya gidana. Qassi i keehi siiqiyo, a ‘ufayssiya’ Naꞌaykka keehi waayettidi hayqqidoogaa hassaya. (Lee. 8:22, 30) Yihooway hegan ay keena azzanidaakko qonccissana danddayettenna. (Yoh. 5:20; 10:17) Yihooway nuna maaddanaagaa wozanappe ammanettana danddayoos. Yaatiyo gishshawu, nu azzanuwaabaa Yihoowawu loytti yootanawu yayyana bessenna. Yihooway nu waayiyaa akeekidi, nuuyyo keehi koshshiya minttettuwaa immanaagaa eriyoogee keehi ufayssees!—2 Qor. 1:3, 4. w17.07 13 ¶3-5

Ha wodiyan miilooniyan qoodettiyaageeti bantta “durettettan,” hegeekka bantta wodiyan, wolqqaaninne miishshan gita gidida Yihoowa ayyaana beeta maqidasiyaa keexxiyo oosuwaa wozanappe maaddoosona. (Lee. 3:9) Nuuni assi oottidobaanne a siiqido siiquwaa Yihooway mule dogenna. Tumu goynuwaara gayttidaagan ha wurssetta wodiyan polettiya ubbabay Yihooway anjjiiddi deꞌiyoogaanne Kiristtoosi kaalettiiddi deꞌiyoogaa bessiyaaba. Nuuni mule yeeqenna, ammanttiyaanne merinawu deꞌiya dirijjitiyaa yara. Yihoowa asaara issippe deꞌiyo maataa nashsha; qassi ‘Yihoowa ne Xoossaassi polo azazetta.’ (Zak. 6:15) Yaatikko, nu Kawoynne Qeese Ubbatu Halaqay nena naagana. Tumu goynuwawu maaddiyaabaa neeyyo danddayettidaagaa keenaa ootta. Neeni yaatikko, ha iita alamee xayiyo wode Yihooway nena ashshanaagaanne merinawukka naaganaagaa ammanettana danddayaasa! w17.10 30 ¶18-19

Matan wode, polotikaa, haymaanootiyaanne zalꞌꞌiyaa xaaxi waaxi oyqqida Seexaanaa alamee xayiyoogee attenna. Hananabaa yootiya Hizqqeelinne Sofonaasi asay daro xeetu layttawu zalꞌꞌiyawu goꞌettiiddi takkido worqqaynne biray waagi baynnaba gidanaagaa kasetidi yootidosona. (Hiz. 7:19; Sof. 1:18) Nuuni ha alamiyaa ‘worddo miishshaa’ demmanawu giidi tumu duretettaa sheneho giidoogaa nu deꞌo layttaa wurssettan akeekikko nuuyyo aybi siyettanee? Ba deꞌo laytta ubban oottidi daro miishshaa demmikkokka, hegee worddo miishsha gididoogaa wurssettan akeekida bitaniyaagaadan nuuyyo siyettana danddayees. (Lee. 18:11) Ee, hegaa mala duretettay xayiyoogee attenna; yaatiyo gishshawu, he miishshaa saluwan ‘laggeta demmanawu’ goꞌetta. Yihoowa Kawotettawu oottiyo ay oosoykka nuna ayyaanaaban dureyees. w17.07 11 ¶16

Issi issi Kiristtaaneti yeellatennaadaaninne harata azzanttennaadan giidi bantta oottido gita nagaraa genttanawu maloosona. (Lee. 28:13) SHin, hegaadan oottiyoogee nagaraa oottida uraa xallaa gidennan, haratakka qohiyo gishshawu siiqiyoogaa bessiyaaba gidenna. Hegee Xoossaa ayyaanay oottennaadaaninne kumetta gubaaꞌiyaa sarotettay moorettanaadan oottana danddayees. (Efi. 4:30) Gita nagaraa oottida issi Kiristtaanee cimati a maaddanaadan etawu yootana mala tumu siiqoy denttettees. (Yaaq. 5:14, 15) Siiqoy hara eeshsha ubbaappe aadhees. (1 Qor. 13:13) Hegee nuuni Yesuusa kaalliyaageetanne siiquwawu Pultto gidida Yihoowa milatiyaageeta gidiyoogaa shaakki erissiyaaba. PHawuloosi, “Siiqoi xayikko, taani aibanne gidikke” yaagiis. (1 Qor. 13:2) Nuuni “coo haasayan” gidennan, “oosuwaaninne tumatettan” ubbatoo siiqettiyaageeta gidoos.—1 Yoh. 3:18. w17.10 11 ¶17-18

Yooseefi PHoxiifaara machiyaa aara shaaramuxanawu a paaccido wode bessido xalatettaa qoppa. I iira shaaramuxanawu ixxis giikko, a bolli wolqqaama metoy gakkana danddayiyoogaa erennan aggenna. SHin i hegaa erikkokka, he paaciyan xoonettibeenna; qassi oottana bessiyaabaa xalidi sohuwaara oottiis. (Doo. 39:10, 12) Xala gidiyoogan leemiso gidiya haranniyaa Raꞌaabo. Biittaa xomoosiyaageeti Israaꞌeela biittaappe Yarkkon deꞌiya i soo biido wode a xalada he naaꞌꞌu asata qottaasunne eti saruwan baanaadan maaddaasu. (Yaas. 2:4, 5, 9, 12-16) Yesuusi kiittido ammanettidaageeti Yesuusa xalatettaa akeekidi Saaduqaaweti eqettishinkka Yesuusa sunttan tamaarissiyoogaa aggibookkona. (Oos. 5:17, 18, 27-29) Yooseefi, Raꞌaaba, Yesuusinne kiitettidaageeti loꞌꞌobaa oottanawu murttidosona. Eti xalidoy Yihoowan ammanettido gishshataassappe attin, likkiyaappe aattidi banttanan ammanettido gishshataassa gidenna. Xalatettaa bessana koshshiyo hanotay nunakka gakkees. Hegaa malabay gakkiyo wode nuunikka Yihoowan ammanettana bessees.—2 Xim. 1:7. w17.09 29 ¶6-9

Ceega asatettaa qaariyoogee issi uri ba wolqqan oottana danddayiyooba gidenna. Bantta ceega asatettaa qaari olidaageeti bantta iita meeziyaa agganawu keehi baaxetidosona. Xoossaa Qaalaynne geeshsha ayyaanay maaddin eti hegaa xoonidosona. (Luq. 11:13; Ibr. 4:12) Nuuni he wolqqan goꞌettanawu Geeshsha Maxaafaa ubba galla nabbabana, hegaa wotti denttidi qoppananne Geeshsha Maxaafaa zoriyaa oosuwan peeshshanawu eraanne wolqqaa demmanawu aggennan woossana bessees. (Yaas. 1:8; Maz. 119:97; 1 Tas. 5:17) Qassi gubaaꞌe shiiquwawu giigettidi shiiqiyo wode Xoossaa Qaalaappenne a geeshsha ayyaanaappe maaduwaa demmoos. (Ibr. 10:24, 25) Hegaa bollikka, ha wodiyan kumetta saꞌan deꞌiya Xoossaa asawu dumma dumma hanotan giigiya ayyaanaabaa qumaa loytti goꞌettanawu koyoos. (Luq. 12:42) Kiristtaaneti Xoossaa ufayssanawu ceega asatettaa qaaridi oliyoogaa xallay gidenna. Nuuni ooratta asatettaakka maayana bessees.—Qol. 3:10. w17.08 21 ¶16-17

Kawuwaa Daawitakka daro naaqoy gakkiis. Daawiti sinttappe Israaꞌeela kawo gidanaadan Yihooway a yelagatettan tiyikkonne, i Yihudaa asaa bolli kawo gidana gakkanaashin 15 gidiya layttaa naagiis. (2 Sam. 2:3, 4) He wodetun, ammanettenna Kawuwaa Saaꞌooli Daawita woranawu koyidi yedettiis. Hegaa gaasuwan, Daawiti baqatidi issitoo kare biittan, qassi haroode bazzon gonggoluwaa giddon deꞌiis. Wurssettan Saaꞌooli olan hayqqido wodekka, Daawiti Israaꞌeela haaroy kumettay baayyo imettana gakkanaashin hara laappun laytta gidiyaagaa naagiis. (2 Sam. 5:4, 5) Daawiti ba dosan danddayidi naagidoy aybissee? I aggenna Yihoowa siiquwan ammanettiis. I Yihooway ashshiyo wodiyaa ufayssan naagiis; qassi Yihooway baassi oottidobaa wotti denttidi qoppiis. (Maz. 13:6) Ee, naagidoogee bessiyaaba gidiyoogaadan Daawitawu siyettiis. w17.08 6 ¶14-15

Qaalay takkidi laamettees. Issi issi qaalatunne qofatu birshshettay kaseegaappe keehi dummatana danddayees. Geeshsha Maxaafan deꞌiya maxaafatuppe dariya baggay xaafettido Ibraawettonne Giriiketto qaalaara gayttidaagankka hanotay hegaa mala. Geeshsha Maxaafay beni xaafettido qaalaappe ha wodiyaa Ibraawettoynne Giriikettoy keehi dumma. Yaatiyo gishshawu, Xoossaa Qaalaa eranawu koyiya ooninne, haray atto ha wodiyaa Ibraawettuwaa woy Giriikettuwaa eriya asaykka birshshettidaagaa nabbabana koshshees. Issoti issoti koyro xaafettido qaalan Geeshsha Maxaafaa nabbabana mala, beni wode Ibraawettuwaanne Giriikettuwaa tamaarana koshshees gi qoppoosona. Gidoppe attin, hegee eti qoppiyoogaa keena maaddiyaaba gidenna. Kumetta Geeshsha Maxaafay woy a shaahoy 3,000 gidiya qaalatun birshshettidoogee ufayssiyaaba. Yihooway ‘asa ubbay, zare ubbay, dumma dumma biittaa qaala ubbay’ ba Qaalaappe goꞌettanaadan koyees. (Ajj. 14:6) Hegee neeni siiqiya, asa asappe shaakkenna nu Xoossaakko shiiqanaadan oottennee? w17.09 19 ¶4

Gubaaꞌiyaappe bohettida dabboy neeyyo deꞌikko, neeni aara coo gayttennaadan ne huuphiyaa naagana koshshees. Hegaa mala hanotan nu huuphiyaa naagiyoogee neeni Yihoowa leemisuwaa kaalliyoogaanne i azazidobaa oottiyoogaa hassayikko darin metenna. Kawuwaa Daawiti loꞌꞌo leemiso. I keehi wolqqaama gidikkokka, Saaꞌoolinne SHimeꞌꞌi a yiilloyiyaabaa oottido wode ba wolqqaa hanqquwan goꞌettibeenna. (1 Sam. 26:9-11; 2 Sam. 16:5-10) SHin Daawiti Berssaabiira oottido nagaraynne Naabaali yaaretidi hanidobaa gaasuwan i koyro oottidobaappe akeekiyoogaada i ba huuphiyaa naagibeenna wodeekka deꞌees. (1 Sam. 25:10-13; 2 Sam. 11:2-4) Gidikkokka, Daawita hanotaappe loꞌꞌobaa tamaaroos. Koyruwan, Xoossaa asaa heemmiya cimati bantta maataa bessenna ogiyan goꞌettennaadan bantta huuphiyaa naagana bessees. Naaꞌꞌanttuwan, ooninne paacee gakkenna giidi, banan ammanettana danddayenna.—1 Qor. 10:12. w17.09 5-6 ¶12-13