Uddufune

Seeray azzanttiyaaba gidana danddayikkonne, hegaappe aaruwan azzanttiyaabay deꞌees; hegee seeraa ekkennan ixxin gakkiya qohuwaa. (Ibr. 12:11) Qaayeeli oottido iitabaappe nuuni tamaarana danddayoos. Qaayeeli Aabeela ixxiyoogaanne woranawu koyiyoogaa Xoossay beꞌidi, Qaayeela hagaadan giis: “Aissi yiillotai? Ne som77oikka aissi xumidee? Neeni lo77obaa oottiyaabaa gidiyaakko, ne som77oi pashkkennee? SHin neeni lo77obaa oottana xayikko, nagarai do7adan ne penggen zuggees; i nena haarana koyees; shin neeni a xoonana bessees.” (Doo. 4:6, 7) Qaayeeli Yihoowa seeraa siyennan ixxidi, ba ishaa woriis; qassi hegaa gaasuwan ba deꞌo laytta ubban waayettidi deꞌiis. (Doo. 4:11, 12) Xoossay yootidobaa Qaayeeli siyidabaa gidiyaakko, A keehi daro waayee gakkenna shin. Yihooway nuuni hegaadan bessennaban waayettanaadan koyenna! (Isi. 48:17, 18) Yaatiyo gishshawu, nuuni ‘seeraa siyidi, aadhdhida eranchcha gidoos.’—Lee. 8:33. w18.03 32 ¶18-20

Daaneeli Yihoowa waatidi eridee? I Yihoowanne A Qaalaa siiqanaadan oottidi tamaarissida A aawaynne aayyiyaa Daaneela loytti loohissidoogee qoncce. Qassi, Daaneeli ba deꞌo ubban hegaadan siiqiiddi deꞌiis. Daaneeli cimidikka, Geeshsha Maxaafaa loytti xannaꞌees. (Dane. 9:1, 2) Daaneeli zilꞌꞌettidi wozanappe woossido, Daaneela 9:3-19n deꞌiya woosay Xoossay Israaꞌeelatussi oottidobaa gujjin, A loytti eriyoogaa bessees. He woosaa nabbabiyoogeenne wotti dentti qoppiyoogee nuna maaddees. Eeqawu goynniya Baabiloonen, ammanettida Ayhuda urawu deꞌoy keehi metiyaaba. Leemisuwawu, Yihooway Ayhudatussi, “Taani inttena omooduwau yeddido katamaassi saroi de7anaadan koyite” yaagiis. (Erm. 29:7) SHin I ba xalaalawu eti aqanaadan koyees. (Kes. 34:14) He naaꞌꞌubaa bessiyaagaadan polanawu Daaneela aybi maaddidee? Deriyaa haariyaageetuyyo amaridaban haarettiyo maaraa akeekanaadan Xoossaa aadhdhida eratettay A maaddiis. Daro wodiyaappe guyyiyan, Yesuusi he maaraa tamaarissiis.—Luq. 20:25. w18.02 10 ¶11-12

Sahuwaa, miishshaa metuwaa woy yedetaa mala paacee nena gakkiiddi deꞌii? Yihoowawu haggaaziyoogan ufayttanawu issi issitoo metootay? Yaanikko, Nohe, Daaneelanne Iyyooba leemisoy neeni minnanaadan maaddees. Etikka nunadan nagaranchcha, qassi shemppuwawu hirggissiyaabaa gujjin, nuna gakkiya metoti daroti eta gakkidosona. SHin eti Xoossaa xeelan ammanuwaaninne azazettiyoogan loꞌꞌo leemiso gididi, ammanettidi deꞌidosona. (Hiz. 14:12-14) Hizqqeeli ha qofay deꞌiyo xiqisiyaa Baabiloonen 612n K.K. xaafiis. (Hiz. 1:1; 8:1) Kaddida Yerusalaamee 607n K.K. xayido, kasetidi odettida xayoy he wode matiis. Noheegaa, Daaneelaagaanne Iyyoobaagaa mala eeshshay deꞌiyo, attanawu malaatay wodhdhido asati keehi guutta. (Hiz. 9:1-5) Hegaadan, ha wodiyankka ha alamee xayiyo wode, Yihooway Nohedan, Daaneeladaaninne Iyyoobadan boree baynnaageeta giidi xeelliyo asatu xallay attanaadan etan malaatay wodhdhana.—Ajj. 7:9, 14. w18.02 3-4 ¶1-3

Neeni yelaga gidikko, hagaadan nena oychcha: ‘Tana yelidaageeti koyiyooba gidiyo gishsha xallawu ayyaanaabaa oottiyaanaa? Xoossaara dabbotaa medhdhada akko shiiqaydda deꞌiyaanaa?’ Ayyaanaabaa halchchanaadan zoree imettiyoy yelagatu xallaassa gidennaagee tuma. Hegaadan halchchiyoogee Yihoowawu oottiya nuuni ubbay ayyaanaaban diccanaadan maaddees. (Era. 12:13) Nuuni kaseegaappe minnana koshshiyaabaa akeekikko, diccanawu maaddiyaabaa oottana bessees. Ayyaanaabaa qoppiya asa gidiyoogee nuuni deꞌanaakko woy hayqqanaakko erissiyaaba gidiyo gishshawu, keehi koshshiyaaba. (Roo. 8:6-8) SHin ayyaanaaban wozannaama gidiyo wode bali baynna asa gidokko. Nuuni koshshiyaagaa keenaa diccanaadan Yihoowa ayyaanay maaddees. Gidikkokka, nuuni baaxetana koshshees. Geeshsha Maxaafaa xannaꞌiyoogee ufayssiyaaba gidikkokka, nuuni ufayttana xallawu nabbabiyo maxaafadan A xeellana bessenna. Ayyaanaaban nuna maaddiya alꞌꞌobaa demmanawu baaxetana koshshees. w18.02 25 ¶10-11

Issi uri bana Xoossawu geppidi xammaqettanaappe kase Geeshsha Maxaafay tamaarissiyo ubbabaa erana koshshenna. Erissiyo ashkkarati ubbay xammaqetti simmidikka suure eran ubbatoo diccana koshshees. (Qol. 1:9, 10) Yaatin, kasetidi ay keenaa erana koshshii? Koyro xeetu layttan deꞌida issi keettaa asaa hanotay nuussi akeekaa gujjees. (Oos. 16:25-33) PHawuloosi 50 M.Ln, misoonaawetettan naaꞌꞌantto buussan Piliphphisiyuusa katamaakka biis. Inne A laggee Sillaasi yan deꞌishin eta wordduwan mootidi qasho keettan yeggidosona. Qammi denddida biittaa qaattay qasho keettawu xaphuwaa qaattidi, penggeta ubbaa dooyi aggiis. Qasho keettaa naagiyaagee qashuwaasay ubbay kessi ekkidi biichchiis gi hirggidi bana worana hanishin, PHawuloosi A xeesiis. PHawuloosinne Sillaasi qasho keettaa naagiyaagaassinne A keetta asawu loytti markkattidosona. He keettaa asay Yesuusabaa tamaarido tumaa loytti akeekidoogeenne nashshidoogee ay oottanaadan denttettidee? Eti sohuwaara xammaqettidosona. w18.03 10 ¶7-8

Yihooway ufayttiya Xoossaa gidiyo gishshawu, A asaykka he eeshshaa bessees. Hegaa bollikka, banttana siiqiyaageetuppenne ekkiyoogaa xallaa koyiyaageetuppe dumma hanotan, Yihoowa ashkkarati haratuyyo immiyo gishshawu ufayttoosona. (Oos. 20:35; 2 Xim. 3:2) Nuuni nu huuphiyaa siiqiyoogee Xoossaa siiqiyoogaappe aadhdhiyaakkonne waati erana danddayiyoo? Piliphphisiyuusa 2:3, 4n deꞌiya ha zoriyaa qoppa: “Inttena siiqiyoogan woikko ceeqettanau koyiyo hada amuwan issibaanne oottoppite; shin issoi issuwaappe gitatais yaagidi qoppennan, issoi issuwaayyo intte huuphiyaa kaushshite. Qassi issoi issuwaa go77iyaabaa koyanaappe attin, intte huuphe xalaalaa go77iyaabaa koyoppite.” Nuuni nuna hagaadan oychchana danddayoos: ‘Taani he zoriyaa oosuwan peeshiyaanaa? Taani gubaaꞌiyankka haggaazuwankka harata maaddanawu baaxetiyaanaa?’ Nu wodiyaanne wolqqaa goꞌettidi harata maaddiyoogee issi issitoo metana danddayees. Hegawu baaxetananne nu goꞌꞌaa aggi baynna koshshees. SHin, Ubbabaa Haariya Xoossay nuna nashshiyoogaa eriyoogaappe aaruwan ufayssana danddayiyaabay aybee? w18.01 23 ¶6-7

‘Nuuni ammanuwan deꞌiyaakkonne nuna qoriyoogaana.’ Yaatanawu, nuna hagaadan giidi oychchana koshshees: ‘Taani Yihooway ba sheniyaa polanaadan doorido mexi issi dirijjitiyaa yara gidiyoogaa ammaniyaanaa? Taani Kawotettaa mishiraachchuwaa sabbakanawunne tamaarissanawu tawu danddayettida ubbaa oottiyaanaa? Taani oottiyoobay ha wodee wurssetta gallassa gidiyoogaanne Seexaanaa haaroy xayanawu matidoogaa ammaniyoogaa bessiyaabee? Taani ta deꞌuwaa Xoossaa Yihoowawu geppido wodeegaadan haꞌꞌikka Yihoowaninne Yesuusan ammanettiyaanaa?’ (Maa. 24:14; 2 Xim. 3:1; Ibr. 3:14) Ha oyshatu zaaruwaa wotti dentti qoppiyoogee nu hanotay ay malakko shaakki eranaadan maaddana. Godaa Kahuwaa goꞌꞌaa qonccissiya huuphe yohota nabbabanne wotta dentta qoppa. (Yoh. 3:16; 17:3) Nuuni merinaa deꞌuwaa demmana danddayiyoy Yihoowa ‘eriyoogaananne’ A mexi issi Naꞌaa Yesuusa ‘ammaniyoogaa’ xallaana. Godaa Kahuwawu giigettanawu Yihoowakkonne Yesuusakko shiiqanaadan maaddiya amaridabaa xannaꞌiyoogee loꞌꞌo. w18.01 13 ¶5-6

Neeni Geeshsha Maxaafaanne nu xuufeta nabbabiyo wode, qassi gubaaꞌe shiiquwaa shiiqiyo wode, harati ammanettidi deꞌanaadan Xoossay waati maaddidaakko minttettiyaabaa siyaasa. Gidoppe attin, neeni Yihoowaara dabbotaa mintta mintta biyo wode, Yihooway nena waati maaddiyaakko neeni akeekana koshshees. Neeni Yihoowa kehatettaa ne deꞌuwan waata beꞌadii? Kiristtaaneti ubbay Yihoowa kehatettaa beꞌido issi ogee deꞌees. Xoossaakkonne a naꞌaakko shiiqanaadan shoobettiyoogan hegaa beꞌidosona. Issi yelagay, ‘Yihooway ta aawaanne ta aayyiyo baakko ehiis; qassi taani coo kaallays’ giidi qoppana danddayees. SHin neeni ne huuphiyaa Yihoowawu geppada xammaqettido wode, aara dumma dabbotaa medhadasa. Neeni haꞌꞌi tumuppe an erettadasa. Geeshsha Maxaafay, “Ooninne Xoossaa siiqikko, Xoossai a erees” yaagees. (1 Qor. 8:3) Yihoowa dirijjitiyan neeyyo deꞌiya sohuwaa ubbatoo nashsha. w17.12 26 ¶12-13

“Seeraa” giyo qaalaa neeni siyiyo wode qixaatiyaabaa qoppennan aggakka; shin hegaa xalla gidenna. Geeshsha Maxaafay seeray nuussi loꞌꞌo gidiyoogaa yootees; qassi hegaa issi issitoo eratettaara, aadhdhida eratettaara, siiquwaaranne deꞌuwaara issippe qonccissees. (Lee. 1:2-7; 4:11-13) Xoossaa seeray I nuna siiqiyoogaanne nuuni merinaa deꞌuwaa demmanaadan I koyiyoogaa qonccissiyaaba. (Ibr. 12:6) A seeran qixaatee gujettana danddayikkonne, hegee qohiyaaba woy meqettaa iita gidiyoogaa bessiyaaba mule gidenna. ‘Seerawu’ waanna birshshettay aaway woy aayyiyaa ba siiqiyo naꞌa tamaarissiyoogaa mala, tamaarissiyoogaara gayttidaba. Nuuni Kiristtaane gubaaꞌiyaa yara gidiyo gishshawu, Xoossaa keettaa asa. (1 Xim. 3:15) Nu Aawaa, Yihoowayyo likke gididabaanne likke gidennabaa kuuyiyo maataynne nuuni ayyo azazettenna wode nuna siiquwan seeriyo maatay deꞌiyoy hegaassa. Hegaa bollikka, nuuni oottidobay iitabaa kaalettikko, saluwan deꞌiya nu Aaway yootiyoobaa siyiyoogee keehi koshshiyoogaa A seeray nuna hassayissees.—Gal. 6:7. w18.03 23 ¶1; 24 ¶3

Neeni yelaga gidikko, nena yelidaageeti nebaa akeekennabadan woy laꞌatettaa diggiyaabadan neeyyo siyettikko shin? Hegee neeni keehi yiillotada, Yihoowawu haggaazanawu koyiyaakkonne siranaadan oottana danddayees. SHin, neeni yiillotada, Yihoowawu haggaaziyoogaa aggikko, Xoossawu yayyiya aawaappenne aayeeppe, qassi gubaaꞌiyaappe haray neessi tumuppe qoppennaagaa neeni akeekana. Ane hagaa qoppa: Nena yelidaageeti nena mule seerana xayikko, eti neessi tumuppe qoppiyoogaa waata eruutee? (Ibr. 12:8) SHin, nena yiilloyiday nena yelidaageeti seerido ogiyaa gidana danddayees. Eti nena seerido ogiyan unꞌꞌettiyoogaappe, hegaadan oottido gaasuwaa akeekanawu mala. Hegaa gishshawu, woppu ga; moorabeennabadan hanoppa. Zoriyaa woppu gi siyidi, zoree imettido ogiyaaban keehi unꞌꞌettennan hegan goꞌettiya kaymida asa gidanawu baaxeta.—Lee. 1:8. w17.11 29 ¶16-17

Issi issi yelagati xammaqetti simmidi, Xoossaa maaraadan deꞌiyoogee aadhida eratetta gidiyoogaa siriyoogaa akeekennan aggakka. Ubba issoti issoti tumaa aggidosona. Yaatiyo gishshawu, ne naꞌi tumaa ogiyan biyoogaa doommi simmidi, guyyeppe tumaa kaseegaadan siiqiyoogaa aggana gaada hirggana danddayaasa. Ne naꞌa siiqoy ubbatoo mino gidanaadaaninne i ‘diccidi attanaadan’ waata maaddana danddayay? (1 PHe. 2:2) Hegaa zaaruwaa PHawuloosi Ximootiyoosawu hagaadan giis: “Neeni he tumatettaa ooppe tamaaridaakkonne erada, neeni tamaaridoogaaninne eridoogan [mintta ammanidoogan] minnada de7a. Neeni guutta naatettaasappe doommada Kiristtoos Yesuusa ammanada, atotettai beettiyo aadhdhida eratettaa immanau danddayiya [Ibraawetto] geeshsha maxaafata eradasa.” (2 Xim. 3:14, 15) PHawuloosi (1) geeshsha maxaafata eriyoogaa, (2) tamaaridobaa mintti ammaniyoogaanne (3) Kiristtoos Yesuusa ammanidi, atotettaa demmiya aadhida erancha gidiyoogaa xeelliyaagan yootidoogaa akeeka. w17.12 18-19 ¶2-3

Daro haymaanooteti siꞌooliyaa tamaabaa tamaarissiyoogan, asirataa shiishshiyoogan woy polotikaabaa sabbakiyoogan asay Xoossaappe haakkanaadan oottoosona. Daro asay haymaanoote kaallana xayikkonne ufayttana danddayettees giidi qoppiyoogee garamissenna! Asi worddo haymaanoote kaallennan aggidikka ufayttana danddayees; shin i “ufayttiya Xoossaa” Yihoowaara dabbotana xayikko tumu ufayssaa demmana danddayenna. (1 Xim. 1:11, NW) Xoossay oottiyo ubbabay harata maaddees. A ashkkarati harata maaddanawu ubbatoo qoppiyo gishshawu ufayttoosona. (Oos. 20:35) Leemisuwawu, so asay ufayttidi deꞌanaadan tumu goynoy waati maaddiyaakko qoppa. Nu aqo laggiyaa bonchanaadan, aqo laggiyaara maacettidoogaa geeshsha ootti xeellanaadan, shaaramuxennaadan, asaa bonchiya naata dichanaadaaninne tumuppe siiqettanaadan tumu goynoy tamaarissees. Hegaappe denddidaagan, hegaa mala goynoy gubaaꞌiyaaninne kumetta saꞌan deꞌiya ishanttu maabaran asawu ufayssiya issippetettay deꞌanaadan oottees. w17.11 21 ¶6-7

Laattido nagaray nuna ubbaa metees; qassi nu oottiyoobay Yihoowa wozanappe ufayssanawu koyiyoogaa bessennaba gidiyo wode azzanoos. Wolqqaama nagaraa oottida issi issi Kiristtaaneti Xoossay banttawu atto geennabadan qoppoosona. SHin, Yihoowa banttayyo baqati attiyo soho oottiyaageeti bantta mooruwan keehi zilꞌꞌettana koshshennaagaa Geeshsha Maxaafay yootees. (Maz. 34:22) PHawuloosi Yihoowawu polo azazettana danddayibeenna gishshawu azzaniyoogaa yooti simmidi, “Nu Godaa Yesuus Kiristtoosa baggaara Xoossau galatai gido” yaagiis. (Roo. 7:25) Ee, nagaraynne i aggido kase mooroy PHawuloosa baaxeyikkonne, Yihooway Yesuusa baggara awu atto giidoogaa i ammanettiis. Nuna wozida Yesuusi nu kahaa geeshsha ootteesinne nuuyyo sarotettaa immees. Qeese Ubbatu Halaqa gidida i nu “gishshaa gaannatanau merinau de7iyo gishshau, Xoossaakko ba baggaara yiyaageeta muleera ashshanau danddayees.”—Ibr. 7:24, 25. w17.11 8 ¶1-2; 12 ¶15

Nuuni geppido gefaa waati polana danddayiyoo? “Gallassi gallassi” nuna gita paaceekka guutta paaceekka gakkees. He paaciyaa gencciyoogan Yihoowaara nu dabbotay keehi mino gidiyoogaa bessoos. (Maz. 61:8) Leemisuwawu, ooso sohuwan woy timirtte keettan issi uri nena lambbeechiyoogaa doommikko waatuutee? Neeni hegaa eqettada, Yihoowawu azazettana koyiyoogaa bessuutee? (Lee. 23:26) Nuuni deꞌiyoy ammanuwan shaahettida keettan gidikko, nunaara deꞌiya ooninne nuugaadan baaxetenna wodekka, Kiristtaanetuppe koyettiya eeshshay deꞌiyoogeeta gidanaadan maaddana mala Yihoowa oychiyoo? Nuuni deꞌiyo hanotay ayba gidinkka, Yihoowa siiquwaa gishshawunne a kaaletuwaa gishshawu a galla galla galatiyoo? Galla galla Geeshsha Maxaafaa nabbabanawu wodiyaa bazziyoo? Nuuni nu huuphiyaa Yihoowayyo geppiyo wode hegaadan oottanawu qaalaa gelida. Hegee azazettiyoogaara gayttidaba. Nu kumetta wozanaappe Yihoowawu goynniyoogee nuuni a siiqiyoogaanne tumuppe awu geppidoogaa bessees. Nuuni coo meezetido gishshawu gidennan, wozanappe goynnoos. w17.10 23 ¶11-12

Danttuwaa xaafiyoogan erettida uri issi wode hagaadan giis: “Qaalay neeni qoppanaadan oottees. Muuziqay neeyyo issibay siyettanaadan oottees. SHin mazamuree he qofay neeyyo siyettanaadan oottees.” Saluwan deꞌiya nu Aawaa Yihoowa sabbiyoogaappenne siiqiyoogaappe aaruwan nuuyyo ‘siyettana’ danddayiya loꞌꞌo qofi deꞌii? Nuuni yexxiyoy nurkka gidin woy Xoossaa asaara gubaaꞌiyan issippe gidin, yexxiyoogee tumu goynuwan keehippe koshshiyaaba gidiyoogee qoncce. SHin gubaaꞌiyan cenggurssaa xoqqissidi yexxiyoogaa xeelliyaagan neeyyo aybi siyettii? Hegee nena yeellayii? Issi issi wogan, asi deꞌiyoosan yexxiyoogee attuma asaa ufayssennan aggana danddayees. Gubaaꞌiyan deꞌiyaageeti yexxiyo wode cimati yexxanawu wudana xayikko woy harabaa oottiyaaba gidikko, hegee kumetta gubaaꞌiyaa qohana danddayees. (Maz. 30:12) Yexxiyoogee tumu goynuwan koshshiyaaba gidiyoogaa nuuni akeekikko, mazamuriyaa yexxiyo wode kare kiyana woy yexxennan aggana koyennaagee qoncce. w17.11 3 ¶1-3

Nuuni ubbay unꞌꞌettennan saruwan deꞌanawu koyoos. Nuna woppaa diggiya qofaa qoppennaadan teqqiya ‘Xoossaa sarotettaa’ Yihooway nuussi immido gishshawu a keehi galatoos! (Pili. 4:6, 7) Nuuni nu huuphiyaa Yihoowawu geppido gishshawu, nuuyyo “Xoossaara sarotettai” deꞌees; qassi nuuni ayyo mata dabbo. (Roo. 5:1) SHin, Xoossay kumetta sarotettaa ehiyo wodee biroona. Ha wayssiya wurssetta gallassay ooshshan kumiis; qassi keehi daro asay ooyettees. (2 Xim. 3:1-4) Nuuni Kiristtaane gidiyo gishshawu, Seexaanaanne i aassiyo worddo timirttiyaa eqettanawu ayyaanaa olaa olettana bessees. (2 Qor. 10:4, 5) Gidoppe attin, nuuni saro deꞌennaadan oottiya wolqqaamabay gakkiyoy ammanenna dabbotuppe gidana danddayees. Amaridaageeti nu ammanuwaa qilliiccana, so asay shaahettanaadan ootteeta giidi mootana woy nuuni ammanuwaa aggana xayikko nuna kaddana giidi yashissana danddayoosona. w17.10 12 ¶1-2

Geeshsha Maxaafay birshshettido qaalaykka wodiyaappe wodiyan laamettees. Birshshettido wode koyro heeran nabbabanawu wayssenna birshshettaa qofaykka guyyeppe qoncce gidennan aggana danddayees. Inggilizetto qaalawu birshshido Geeshsha Maxaafaara gayttida issi leemisuwaa beꞌa. King Jems Verzhin giyo birshshettay koyro 1611n kiyiis. Hegee Inggilizettuwan asay keehi dosiyo maxaafa gidiis; qassi Inglizetto qaalawu keehi maaddiis. Gidoppe attin, King Jems Verzhiniyan xaafettoosappe daro wodee aadhin, an deꞌiya daro qaalay ha wodiyan asay goꞌettennaba gidiis. Hara qaalan beni birshshettida hara Geeshsha Maxaafaa birshshettatikka hegaa mala. SHin Ooratta Alamiyaa Geeshsha Maxaafaa Birshshettay ha wodiyan asay goꞌettiyo qaalan giigido gishshawu keehi ufayttoos. Ha birshshettay kumettay woy appe amaridaagee 150⁠ppe dariya qaalan deꞌiyo gishshawu, ha wodiyan deꞌiya asaappe dariya baggay hegaa demmana danddayees. An deꞌiya qoncce qaalay Xoossaa Qaalay yootiyoobay nu wozanaa denttettanaadan oottees. w17.09 19 ¶5-6

Yelaga Kiristtaaneti kuuyana koshshiya gitabay deꞌees. Eti loꞌꞌo laggetanne wodiyaa aattiyo loꞌꞌobaa dooranawu, qassi kandduwan geeshsha gidanawunne xammaqettanawu xala gidana koshshees. Eti xalana koshshiyoy Xoossaa cayiya Seexaanay koyiyoobaappe dummatiyaabaa oottiyo gishshataassa. Yelagati kuuyana bessiya waannabatuppe issoy bantta deꞌuwan halchiyoobaa. Issi issi biittatun, yelagati xoqqa timirttiyaa tamaaranawunne daro miishshaa demissiya oosuwaa oottanawu halchanaadan asay eta denttettees. Issi issi hiyyeesa biittatun qassi yelagati bantta soo asaa miishshan maaddana koshshiyaabadan qoppoosona. Xalatettan ayyaanaabaa halchiyaanne bantta deꞌuwan Kawotettaabaa sinttayanawu baaxetiya yelagata Yihooway anjjana. Yihooway eti bantta soo asawu koshshiyaabaa kunttanaadan maaddana. Koyro xeetu layttan, yelaga Ximootiyoosi ubbatoo ayyaanaabaa halchiis; qassi neenikka halchana danddayaasa.—Pili. 2:19-22. w17.09 29-30 ¶10-12

Ubba wode Geeshsha Maxaafaa minnidi xannaꞌiyoogee Kiristtaaneti bantta huuphiyaa naaganaadan maaddana danddayees. Waatidi? Nuuni oottiyoobay goꞌꞌiyoobaanne qohiyoobaa loytti qonccissiya taariketi Geeshsha Maxaafan deꞌoosona. Yihooway halchuwan he taariketi xaafettanaadan oottiis. (Roo. 15:4) Hegaa nabbabiyoogee, wotti dentti qoppiyoogeenne xannaꞌiyoogee keehi maaddiyaaba! He nabbabidobaa neeninne ne soo asay waati oosuwan peeshshanaakko qoppite. A Qaalay yootiyoobaa oosuwan peeshshanawu maaddana mala Yihoowa woossa. Neeni issi issiban ne huuphiyaa naaganawu metootikko, hegaa akeeka. Qassi hegaa denttada woossa; giigissanawukka baaxeta. (Yaaq. 1:5) Koshshiya zoriyaa demmanawu nu xuufeta pilggiyoogee nena maaddana danddayees. w17.09 6 ¶15-16

Geeshsha Maxaafan “ooratta asatettaa” giya qofay deꞌees. (Efi. 4:24; Qol. 3:10) He qofay “Xoossaa leemisuwan merettida” eeshshaa qonccissiyaaba. Ooratta asatettaa maayiyoogee danddayettiyaaba. Ayssi giikko, Yihooway asaa ba leemisuwan medhidi nuuni a loꞌꞌo eeshshaa bessana danddayiyaageeta gidanaadan oottiis. (Doo. 1:26, 27; Efi. 5:1) PHawuloosi nuuni ooratta asatettaa maayanaadan zori simmidi, asa asappe shaakkennaagee ooratta asatettan keehi koshshiya eeshsha gidiyoogaa qonccissiis. I hagaadan giis: “Giriike asa woi Aihuda asa, qaxxarettidaagaa woi qaxxarettibeennaagaa, ammanoi bainnaageetanne ainne tamaaribeennaagaa, aille woi goqa giidi shaakkiyoobi baawa.” Zariyan, yelettido biittan woy deretettan deꞌiya sohuwan gubaaꞌiyan dummatetti deꞌana koshshennay aybissee? Tumuppe Kiristtoosa kaalliyaageeti ‘ubbay issi asa’ gidiyo gishshataassa. (Qol. 3:11; Gal. 3:28) Ooratta asatettaa maayidaageeti bantta mala Kiristtaanetussinne haratussi deretettan deꞌiya sohuwaa woy eta zariyaa xeellennan eta bonchoosona.—Roo. 2:11. w17.08 22 ¶1; 23 ¶3-4

Yihooway i oottanawu koyennabaa nu oottanaadan naagenna. Ba dosan naagiyoogan i ooppenne aadhiya leemiso. (2 PHe. 3:9) Edene ataakiltte sohuwan denddidabay wurssettan giigana gakkanaashin Yihooway shaꞌan qoodettiya layttawu danddayidi naagiiddi takkiis. I ba sunttay muleera geeyiyo wodiyaa danddayan ‘naagees.’ A yeemottidi naagiyaageetuyyo hegee gita anjjuwaa demissana. (Isi. 30:18.) Yesuusikka hegaadan ba dosan naagiis. I saꞌan ba suuretettaa paacciyaabaa xoonidi ba wozuwaa yarshshuwaa waagaa 33 M.Ln qanxxikkonne, 1914n haariyoogaa doommana gakkanaashin naagiis. (Oos. 2:33-35; Ibr. 10:12, 13) Yesuusa SHaꞌu Layttaa Haaroy wurana gakkanaassi a morkketi muleera xayokkona. (1 Qor. 15:25) SHin hegaadan naagiyoogee bessiyaaba. w17.08 7 ¶16-17

Suusa, “Nu naꞌay hayqqin issi laytta gidiya wodiyawu keehi kayyottida” yaagaasu. Hara ishay qassi ba machiyaa qoppennan hayqqido wode “qonccissanawu metiya waayiyaa” waayettidoogaa yootiis. Hara darotikka hegaadan kayyottiyoogee azzanttiyaaba. Daro Kiristtaaneti eti siiqiyo uri Armmageedoonaappe kase hayqqana giidi qoppennan aggana danddayoosona. Neeni siiqiyo asi hayqqido ura gidikko woy siiqiyo uri hayqqido ura eriyaaba gidikko, ‘Kayyottiyaageeti bantta azzanuwaappe minettanaadan aybi maaddana danddayii?’ gaada qoppana danddayaasa. Asay darotoo, ‘Azzanida uri amarida wodee aadhin minettana’ giyoogaa siyennan aggakka. SHin, wodee aadhiyoogaa xallay meqqida wozanaa pattanee? Issi amꞌꞌiyaa, “Issi uri minettanaadan maaddiyay, azzanttiyaabay gakki simmin he uri oottiyoobaa gidiyoogaa akeekaas” yaagaasu. Masunttay paxanaadan amarida wodiyawu hegawu maaddiyaabaa oottana bessees; kayyuwaappe minettanawukka amarida wodiyawu bessiyaabaa oottana koshshees. w17.07 12-13 ¶1-3

Yihooway neeni ay halchanaadan koyii? I asay a eriyoogaaninne ayyo ammanettidi haggaaziyoogan ufayttanaadan oottidi medhiis. (Maz. 128:1; Maa. 5:3) SHin i mehiyaa hegaadan medhibeenna; mehee mees, uyeesinne yeleesippe attin, harabaa erenna. SHin mehiyaappe dumma hanotan, neeni issibaa halchada ufayttanaadan Yihooway koyees. Nena medhidaagee ‘siiqo Xoossaa,’ ‘ufayttiya Xoossaa,’ qassi asaa ‘ba leemisuwan medhidaagaa.’ (2 Qor. 13:11; 1 Xim. 1:11, NW; Doo. 1:27) Neeni siiqiya nu Xoossaa milatiyo wode ufayttana. “Ekkiyaagaappe immiyaagee anjjettidaagaa,” woy ufayttiyaagaa gidiyoogaa ne deꞌuwan beꞌadii? (Oos. 20:35) Ay asinne immiyoogan ufayttana. Neenikka haratanne Xoossaa siiqiyoogaa bessiyaabaa halchanaadan Yihooway koyees.—Maa. 22:36-39. w17.07 23 ¶3

Xoossay bawu oottiya asata keehi bonchees. Nuuni nuuyyo qoppiyoogaappe aaruwan i nuussi qoppees. Yihooway ba asaa ubbaa siiqees. Yihooway ba asaa ubbaa siiqees. Qassi i ba asawu huuphiyan huuphiyan qoppees. Leemisuwawu, Yihooway Israaꞌeelata bantta morkketu kushiyaappe ashshanawu he deriyawu daannata sunttidonne etawu wolqqaa immido heezzu xeetu layttaabaa qoppa. He wayssiya wodiyan, ba goꞌꞌa aggada tumu goynuwaa goynniyoogaa doommida, Israaꞌeela biittaa asa gidenna Urutibaa i akeekiis. Yihooway loꞌꞌo azinaanne attuma naꞌaa immidi Uruto anjjiis. A harabankka anjjettaasu. Uruta hayquwaappe denddiyo wode, ba naꞌay Masiyaa mayzza aawatuppe issuwaa gidiyoogaa erana. Qassi a oottidobay Geeshsha Maxaafan i sunttan xeegettiya maxaafan xaafettidoogaa erada a ay keena ufayttanaakko qoppa!—Uru. 4:13; Maa. 1:5, 16. w17.06 28-29 ¶8-9

Pitera giyo ishay 1970n, ayyo layttay 19 gidin, Birttaaniyaa Beeteelen haggaaziyoogaa doommiis. I sooppe soo biidi sabbakiyo wode, layttay 50 heera gidido, buuchaa dichida issi bitaniyaara gayttiis. Piteri bitanee Geeshsha Maxaafaa eranawu koyiyaakkonne oychiis. Bitanee guuttaa dagammidi, hagee Ayhuda haymaanootiyaa asttamaaretu keettaa yaagiis. He Ayhuda haymaanootiyaa asttamaaree, Pitera paaccanawu, “Ta naꞌawu, Daaneela maxaafay ayba qaalan xaafettidee?” giidi oychiis. Piteri, “Amaridaagee Aramayke qaalan xaafettiis” yaagiis. Piteri hagaadan giis: “He asttamaaree taani zaaruwaa erido gishshawu garamettiis; shin taagaa keeni garamettibeenna! Taani zaaruwaa waata eridanaa? Taani soo yaada mati kiyida Wochiyo Keelaanne Beegottite! maxeetiyaa koyada, Daaneela maxaafay AraUddufuneke qaalan xaafettidoogaa yootiya huuphe yohuwaa demmaas.” (Dane. 2:4) Ee, geeshsha ayyaanay nuuni kase nabbabidobaa hassayanaadan oottana danddayees.—Luq. 12:11, 12; 21:13-15. w17.06 13 ¶17

SHahaaray attidoogaa machiyaa ba azinawu yootiyo wode darotoo unꞌꞌissiya harabay merettees. Eti naꞌa yelana haniyo gishshawu ufayttikkokka, eta hirggissiyaabaykka deꞌees. Aayyiyaa shahaarido wodiyan payya gidada deꞌanaagee qassi naꞌaa payyatettay eta qofissana. Sohuwaara gidin woy takkidi miishshi metana danddayiyoogeekka eta qofissees. Naꞌay yelettiyo wode giigissana koshshiyo harabaykka deꞌees. Ba koyro naꞌa yelida aayyiyaa darotoo ba yiira naꞌaa xeelliyoogaabaa qoppana danddayawusu. Hegaappe denddidaagan, azinay ba machiyaa bantta yiira naꞌabaa xalla qoppada a kaseegaadan siiqennabadan qoppana danddayees. Hara baggaara qassi, naꞌa yelida aawawu aawatettay kaseegaappe darees. I naꞌaassi koshshiyaabaa kunttana bessiyo gishshawu, i oottiyoobay kaseegaappe daro. Aqo oyqqida issota issota hara dumma paacee gakkees. Eti naata yelanawu keehi koyoosona shin yelana danddayokkona. Machiyaa shahaarennaba gidikko, keehi hirggana danddayaasu. w17.06 4¶1; 5 ¶5-6

Nuuni tumu Kiristtaaneti tumaa dosoosinne mintti oyqqoos. Tumawu pulttoy Xoossaa Qaalaa xalla. Yesuusi ba Aawaa woossiiddi, “Ne qaalaikka tumatettaa” yaagiis. (Yoh. 17:17) Hegaa gishshawu, Xoossaa Qaalaa suure eriyoogan tumaa siiqiyoogaa doommoos. (Qol. 1:10) SHin, eraa demmiyoogaappe aadhiyaabaa koshshees. Mazamure 119 ayyaanay denttettin xaafidaagee Geeshsha Maxaafaa tumaa siiqiyoogee woygiyoogaakko nuuni akeekanaadan waati maaddiyaakko beꞌa. (Maz. 119:97-100) Nuuni Geeshsha Maxaafaa qofaa gallassa kumettaa wotti denttidi qoppanawu wodiyaa bazziyoo? Nuuni nu deꞌuwan oosuwan peeshshidi goꞌettiyo ogiyan wotti dentti qoppiyo wode, Geeshsha Maxaafaa tumaa kaseegaappe loyttidi nashshoos. Qassi, Xoossaa dirijjitiyaappe nuuni demmiyo Geeshsha Maxaafaa qofay deꞌiyo malꞌꞌiya ayyaanaabaa quman nuuni ufayttana danddayoos. Leemiso hanotan nu manggaagan takkana mala nuuni “likke gidida qaalaa” tumaa hassayana danddayoos; qassi hara asaa maaddanawu hegaa goꞌettoos.—Era. 12:10. w17.05 19-20 ¶11-12

Yihoowa Markka gidennaageeta gujjin, waayettiyaageeta nuuni maaddanawu koyoos. (Luq. 10:33-37) Hegaadan oottiyo loꞌꞌo ogee etayyo mishiraachuwaa yootiyoogaa. Beti yiida darota maaddida issi cimay hagaadan giis: “Nuuni Yihoowa Markka gidiyoogaanne nu waanna halchoy aquwaaban gidennan, ayyaanaaban eta maaddiyoogaa gidiyoogaa sohuwaara etawu yootiyoogee keehi koshshiyaaba. Yaatana xayikko, amaridaageeti maaduwaa demmana xallawu nunaara gayttana danddayoosona.” “Beteta” siiqiyoogee ufayssiya ayfiyaa demissees. (Maz. 146:9) Issi michiyaa ba soo asay Erttira yedetaappe baqatidi harasaa biidoogaa yootaasu. I naatuppe oyddati bazzuwan hosppun gallassaa hemetti daafuridi, Suudane gakkidosona. A hagaadan gaasu: “Qumaa, maayuwaa, deꞌiyoosaanne kaamiyaa togganawu miishshaa immiyoogan, yan ishantti eta so asadan oyqqidosona. Yihoowa Markkatu xallappe attin, issi Xoossawu goynniyo gishshawu, erenna ura ba son mokkiyay oonee!”—Yoh. 13:35. w17.05 7 ¶17, 19-20

“Asi Xoossaa go77anau danddayii? Harai atto aadhdhida eranchcha gidiyaakkokka, i bana go77anaappe attin, Xoossaa go77enna. Neeni xillo gidikko, hegee Ubbaa Danddayiya Xoossaa ufaissii? Ne ogee boree bainnaagaa gidikko, hegan i aiba wore demmii?” (Iyy. 22:1-3) Hageetu mala oyshatu zaaroy aybeeshsha gaada qoppa eray? Temaana giyo biittaappe yiida Elifaazi he oyshata koyro Iyyooba oychiyo wode, i chii giidi zaarana gi qoppidoogee qoncce. SHuuhappe yiida a laggee Bilddaadi, haray atto Xoossaa sinttan suure gididi beettanakka danddayettenna giis. (Iyy. 25:4) Worddo minttetto minttettiya ha asati nuuni Yihoowayyo ammanettidi oottanawu baaxetiyoogee a aynne maaddennaagaa, nuuni Xoossawu goꞌꞌiyoobay bilꞌꞌaagaappe, uuꞌiyaagaappe woy guxuniyaagaappe aadhennaagaa yootidosona. (Iyy. 4:19; 25:6) Elifaazi, Bilddaadinne Xoofaari wordduwaa yootido gishshawu Yihooway eta seeridi, Iyyooba “ta ashkkaraa” yaagidi an ufayttido wode, ba qofaa qonccissiis. (Iyy. 42:7) Yaatiyo gishshawu, issi uri ‘Xoossawu goꞌꞌana’ danddayees. w17.04 28 ¶1-2

Nuuni ha ceeggida alamiyan keehi daro wodiyaa deꞌido gishshawu, alamiyaa hanotan ay keena unꞌꞌettiyaakko akeekennan aggana danddayoos. Hegaadankka, daro baaburee bolli bollan yiidi eqqiyoosaa matan deꞌiya asay hegaa cenggurssaa akeekennan aggana danddayees; qassi moorettidabaa oliyoosaa matan deꞌiya asay hegee xinqqiyoogaa shaakkennan aggana danddayees. SHin he iitabaa ubbaa heeraappe diggiichin ay keena woppu oottanddeeshsha! Haꞌꞌi nuuni unꞌꞌettanaadan oottiyaabaa gishshaa aybi hananee? Hachi gallassa xiqisiyan odettidabaa qoppa. He qaalati neeni wozanappe ufayttanaadan oottokkonaa? Yihooway neessi immanawu koyiyoobay hegaa. Yaatikko, ay gidinkka, unꞌꞌettanaadan oottiya ha wurssetta gallassi Xoossaa Yihoowakkonne a dirijjitiyaakko shiiqada deꞌanawu neeyyo danddayettida ubbabaa ootta! Ne hidootaa keehi nashsha, hegee ne wozanaaninne qofan neeyyo qoncci beetto; qassi haratussi kehatettan hegaa yoota! (1 Xim. 4:15, 16; 1 PHe. 3:15) Yaatiyoogan, ha xayanawu pirddettida alamiyaara neeni xayennaagaa ammanettana danddayaasa. Ubbakka neeni merinawu ufayttaydda deꞌana! w17.04 13 ¶16-17

Nuuni hegee tuma gidiyoogaa akeekoos; shin issi ishay nagarancha gididoogaa gaasuwan nuna qohiyo wode waaniyoo? Hegaa malabay gakkiyo wode, suure pirddiya Yihoowaagaadan nuuni qoppanee? Leemisuwawu, issi cimay harata coo ixxiyoogaa bessiyaabaa haasayikko waatuutee? Issi cimay qoppennan nena yiilloyiyaabaa woy qohiyaabaa haasayikko neeni xubettanee? He ishay hannippe guyye gubaaꞌe cima gidana bessenna gaada qoppiyoogaappe gubaaꞌiyawu huuphe gidida Yesuusa danddayan naaguutee? Ubbatoo he ishaa balaa qoppiyoogaappe i daro layttawu ammanettidi Yihoowayyo oottidoogaa qoppuutee? Nena naaqqida cimay haꞌꞌikka gubaaꞌe cima gididi oottiyaabanne hara maataykka awu imettiyaaba gidikko, neeni aara ufayttanee? Neeni atto giikko, suure pirddiya Yihoowaagaadan qoppiyoogaa bessaasa.—Maa. 6:14, 15. w17.04 27 ¶18