Yihooway nuna siiqiyo gishshawu, suurissees, tamaarisseesinne loohissees. Nuuni A dabbo gididi merinawu deꞌanaadan I koyees. Seeriyoogee issi issitoo zoriyoogaa xalla gidenna. Wolqqaama nagaraa oottikko, hegee gubaaꞌiyan deꞌiya maatay ekettanaadan oottana danddayees. Hanotay hegaadaana gidikko, he seeray Xoossay nuna siiqiyoogaa bessiyaaba. Leemisuwawu, maatay ekettiyoogee, issi uri kaseegaappe aaruwan Geeshsha Maxaafaa xannaꞌiyoogee, wotti dentti qoppiyoogeenne woossiyoogee keehippe koshshiyoogaa akeekanaadan maaddana danddayees. Yaatiyoogee, I ayyaanaaban minnanaadan oottana danddayees. (Maz. 19:7) Guyyeppe, I ba maataa zaarettidi demmana danddayees. Bohiyoogee Yihoowa siiquwaa bessiyaaba gidikkokka, hegee gubaaꞌiyaa iitabaappe naagees. (1 Qor. 5:6, 7, 11) Xoossay bessiyaagaadan seeriyo gishshawu, bohiyoogee balabaa oottida uray ba nagaray gita gidiyoogaa akeekanaadaaninne ba nagaraappe simmanaadan oottana danddayees.—Oos. 3:19. w18.03 24 ¶5-6

Qasho keettaa naagiyaagee Geeshsha Maxaafaa erenna. Yaatiyo gishshawu, Geeshsha Maxaafaappe baaso gidiya eraa demmanawu, I ayfettiya Geeshsha Maxaafaa timirtteta tamaarana, Xoossaa ashkkara gidiyoogee woygiyoogaakko akeekananne Yesuusi tamaarissidobaa azazettanawu murttana koshshees. I qantta wodiyan Geeshsha Maxaafaappe erido tumaynne hegaa nashshidoogee xammaqettanaadan A denttettiis. (Oos 16:25-33) I xammaqetti simmidi eraa gujji gujji biidoogee qoncce. He hanotaa hassayidi, intte naꞌi bana Yihoowawu geppiyoogeenne xammaqettiyoogee koshshiyoogaa gujjin, Geeshsha Maxaafaappe baaso gidiyaabaa tamaaridi hegaa nashshiyo wode intte ay oottana danddayeetii? Yelida Kiristtaanetoo, gubaaꞌe cimati xammaqettana danddayiyaakkonne kuuyana mala, I etawu yootana danddayiyoogaa intte kuuyennan aggekketa. Hara erissiyo ashkkaratudan, ikka ba deꞌo ubban, ubbakka merinawu Yihoowa halchchuwaa gujji gujji erana.—Roo. 11:33, 34. w18.03 10 ¶8-9

Nuuni ayyaanaaban minnanawu baaxetiyo wode, geeshsha ayyaanay nu qofay laamettanaadan maaddees. Geeshsha ayyaanay maaddin, nuuni loddan loddan Kiristtoosaagaadan qoppiyoogaa tamaarana danddayoos. Hegaa bollikka, nuuni asatettaa amuwaa agganaadaaninne Xoossaa ufayssiya eeshshaa bessanaadan geeshsha ayyaanay maaddees. Nu haasayan, ooso sohuwan woy timirtte keettan nuuni haniyoobaaninne galla galla kuuyiyooban Kiristtoosaagaadan qoppiyoogee maaddees. Nu kuuyiyoobay Kiristtoosa kaallanawu baaxetiyoogaa bessiyaaba gidana. Nuuni ayyaanaabaa qoppiya asa gidiyo gishshawu, saluwan deꞌiya nu Aawaara deꞌiya nu dabbotaa aybinne mooranaadan koyokko. Nuna paacee gakkiyo wode, Kiristtoosaagaadan qoppiyoogee hegaa eqettanaadan maaddees. Nuuni issibaa kuuyiyo wode, ha oyshata yuushshi qoppoos: ‘Kuuyanawu tana maaddana Geeshsha Maxaafaa maarati awugeetee? Hagaa mala hanotan Kiristtoosi waatanee? Taani ay kuuyiyaakko Yihooway ufayttanee?’ w18.02 25 ¶12; 26 ¶14

Nohe aawaayyo aawaa aawa gidida Heenooka wode asay Xoossaappe keehi haakkiis. Eti ubba Yihoowa bolli “iita haasaya” haasayidosona. (Yih. 14, 15) Kobay keehi dariis. Nohe wode, “sa7ai ubbai makkalan kumiis.” Iita kiitanchati asa ashuwaa maayidi, maccaasaa ekkidi biittaa goggiya iita naata yelidosona. (Doo. 6:2-4, 11, 12) SHin Nohee ubbaappe dumma. “I ba wodiyan de7ida asaa giddon suure asa; Nohee Xoossaara hemettiis.” (Doo. 6:8, 9) He qofay he xillo bitaniyaabaa ay qonccissiyaakko qoppa. Nohee Bashshaa Haattaappe kasetiya he iita alamiyan ha wodiyan deꞌiya daro asaa layttaa keenaa, 70 woy 80 laytta xallaa Xoossaara hemettibeenna. I he iita alamiyan 600 gidiya layttaa deꞌiis! (Doo. 7:11) Qassi I ayyaanaaban maaduwaa oychanawu ha wodiyan nuugaadan issippe goynniyaageetu gubaaꞌee, haray atto ishi michchakka ayyo baa. w18.02 4 ¶4-5

Miishshaa siiqiya asay ubbatoo hara gujjanawu koyiyoogeenne shiishshanawu baaxetiyoogee eta bollan ‘daro metuwaa’ ehees. (1 Xim. 6:9, 10; Era. 5:10) Nu ubbawu miishshi koshshiyoogee qoncce. Miishshay nuna darobaappe ashshees. (Era. 7:12) SHin, issi urawu koshshiyaaba xallawu gidiya miishshay deꞌikko, ufayttana danddayii? Ee, danddayees! (Era. 5:12) Yaaqe naꞌay Aguri, “Taayyo koshshiya keesa qumaa immappe attin, tana dure woikko manqqo kessoppa” yaagiis. I keehi hiyyeesa gidanawu koyibeennay aybissakko akeekanawu metootokko. I yootidoogaadan, kaysoy Xoossaa bonchchissenna gishshawu, I wuuqqanawu paacettana koyibeenna. SHin I dure gidennaadan woossidoy aybissee? I, “Hinna xayikko, dure gidada, ‘GODAI oonee?’ gaada nena kaddana” yaagiis. (Lee. 30:8, 9) Yesuusi hagaadan giis: “Naa77u godatuyyo haarettanau danddayiyai ooninne baawa; aissi giikko, woi issuwaa ixxidi, hinkkuwaa siiqana; woi issuwaa bonchchidi, hinkkuwaa karana; Xoossaassinne miishshaassi haarettanau danddayekketa.”—Maa. 6:24. w18.01 24 ¶9-11

Nu issippetettay minnanaadan nuuni oottana danddayiyo heezzantto ogee haratuyyo coo atto giyoogaa. Nuna naaqqida urawu atto giyo wode Yesuusa wozuwaa yarshshuwaa baggaara nu nagaray atto geetettidoogaa nashshiyoogaa bessoos. Yesuusi yootido leemisotuppe issoy Maatiyoosa 18:23-34n deꞌiyaagaa ane qoppa. Nena hagaadan oychcha: ‘Yesuusi tamaarissidobaa taani oosuwan peeshshiyaanaa? Ta ishanttunne michchonttu hanotaa akeekada eta danddayiyaanaa? Tana naaqqida urawu atto giyaanaa?’ Nagaranchcha asay atto gaanawu metootiyo issi issi gita naaqoy deꞌiyoogee qoncce. SHin, Yihooway nuuni ay oottanaadan koyiyaakko he leemisuwaappe akeekoos. Nuuni atto gaana bessishin nu ishanttussi atto geennaba gidikko, Yihooway nuuyyo atto geennaagaa Yesuusi geeshshidi yootiis. Hegee nuuni loytti qoppana bessiyaaba! Yesuusi nuna tamaarissidoogaadan haratuyyo atto giyo wode nu issippetettaa naagoosinne minttoos. w18.01 15 ¶12

Daaneeli ba shemppuwawu hirggissiyaaba gidikkonne, Xoossawu goynniyoogaa aggiis giidi asay qoppanaadan koyibeenna. Daaneela iita hayquwaappe ashshiyoogan, I akeekaaninne xalan oottidobaa Yihooway anjjiis. Hegaappe denddidaagan, Meedoonanne Parsse kawotettan ubbasan Yihooway keehi erettiis! (Dane. 6:25-27) Nuuni Daaneelaagaadan ammananawu waatana danddayiyoo? Mino ammanuwawu keehi koshshiyay Xoossaa Qaalaa nabbabiyoogaa xalla gidennan, nabbabidobaa ‘akeekiyoogaa.’ (Maa. 13:23) Nuuni Yihoowa qofaa akeekanawu koyoos; hegawu Geeshsha Maxaafaa maaraa akeekana koshshees. Yaatiyo gishshawu, nuuni nabbabidobaa wotti denttidi qoppana bessees. Woosay, ubba qassi paacee woy metiya harabay gakkiyo wode wozanappe woossiyoogeekka keehi koshshees. Nuuni aadhdhida eratettaanne wolqqaa demmanawu ammanuwan woossikko, Yihooway hegaa nuuyyo darissidi immana.—Yaaq. 1:5. w18.02 10-11 ¶13-15

Neeni xammaqettida yelaga Xoossaa ashkkarata gidiyoogaadan, haratuyyo ne ammaniyoobaa yootiyoode Yihooway maaddiyoogaa beꞌiyo wodekka a kehatettaa neeni xeella beꞌaasa. Neeni haggaazuwaaninne timirtte keettan hegaadan oottana danddayaasa. Issoti issoti banttanaara tamaariyaageetuyyo sabbakanawu metootoosona. Hegee aybissi metiyaakko akeekennan aggakka. Haasayissiyo uri woygidi zaaranaakko erana danddayettenna. Qassi nenaara tamaariya issi urawu yootiyoogaappe, darotussi yootiyoogee keehi metana danddayees. Yaatin, nena aybi maaddana danddayii? Koyruwan, ne ammaniyoobaa ayssi ammaniyaakko qoppa. Nu websaytiya jw.orgiyan xannaꞌanawu giigidabay ne qaalan deꞌikko, hegaa loytta goꞌetta. He qofay neeni ay ammaniyaakko, aybissi ammaniyaakko, qassi haratuyyo hegaa waata yootana danddayiyaakko qoppanaadan nena maaddees. Neeni mintta ammaniyoonne loytta giigettiyo wode, Yihoowabaa markkattanawu koyana.—Erm. 20:8, 9. w17.12 26 ¶12, 14-15

Naata ayyaanaabaa tamaarissanawu Geeshsha Maxaafan odettida asatubaanne hanotatubaa tamaarissiyoogaa xallay gidenna. Ximootiyoosi ‘eranaadan’ woykko mintti ammananaadan tamaaridoogaakka hassaya. Ximootiyoosi “guutta naatettaasappe” doommidi Ibraawetto Geeshsha Maxaafaa erees. SHin guyyeppe i Yesuusi Masiyaa gidiyoogaa ammaniis. Intte naati Ximootiyoosaagaadan mintti ammananaadan waati maaddana danddayeetii? Koyruwan, danddayite. Ammanoy issi galla beettiyaaba gidenna; woy qassi intte mintti ammaniyo gishsha xallawu intte naati laattiyooba gidenna. Geeshsha Maxaafaa tumabaa ammananawu naati ubbay ‘ubbabaa paaccana’ bessees. (1 Tas. 5:21) Aawatinne aayeti intte intte naatu ammanoy minnanaadan, ubba qassi eti oyshaa oychiyo wode eta maaddanawu darobaa oottana danddayeeta. w17.12 19 ¶3, 5-6

Yesuusa dabbiyaanne i erissiyo ashkkariyaa Martta kayyoottaasu. I ishay Alꞌꞌaazari hayqqiis. Kayyottennaadan o maaddanabi deꞌii? Ee, deꞌees. Yesuusi o, “Ne ishai haiquwaappe denddana” yaagiis. (Yoh. 11:20-23) Hegee sinttappe hananaagaa Martta ammanettawusu. He wode Yesuusi maalaalissiyaabaa oottiis. I he gallassi, Alꞌꞌaazara hayquwaappe denttiis. Yesuusi woy a Aaway hegaa mala maalaalissiyaabaa haꞌꞌi nuussi oottana giidi nuuni qoppanaadan oottiyaabi baa. SHin, neeni siiqiyo uri sinttappe hayquwaappe denddanaagaa Marttiigaadan ammanay? Izaawu ne aqo lagge, ne aayyiyo, ne aawaa, woy ne siiqiyo mata dabbuwaa gidana danddayees. Woy qassi ne naꞌi hayqqin kayyottennan aggakka. Neeni siiqiyo he izaawa qoommanawu, aara haasayanawunne miiccanawu laamotaasa. Marttiigaadan neenikka, ‘Ta siiqiyo uri hayquwaappe denddanaagaa taani erays’ gaana danddayiyoogee ufayssiyaaba. Hegaadan ammaniyoogee bessiyaaba gididoy aybissakko ubba Kiristtaanetikka wotti dentti qoppiyoogee maaddees. w17.12 3 ¶1-2

Yesuusi Muuse higgiyaa keehi dosees. Hegee garamissenna! He Higgiyaa immidaagee Yesuusi ba deꞌuwan ooppenne aatti xeelliyo a Aawaa Yihoowa. Yesuusi Xoossaa higgiyaa keehi dosiyoogaa hachi gallassa xiqisiyan odettiis. Xoossaa higgiyan wottiyoobi baynnaagaa, qassi hegee goꞌꞌiyoogaanne polettiyoogee attennaagaa Yesuusi haasayiyoobaaninne oottiyooban bessiis. (Maa. 5:17-19) Yesuusi higgiyaa tamaarissiyaageetinne Parisaaweti a Aawaa Higgiyaa bala ogiyan akeekiyoogaa beꞌidi keehi azzanenna aggenna! Eti issi issibaa guuttabakka ashshennan azazettiyo gishshawu Yesuusi, “Karetta sawuwaappe, katikallaappenne okashiyaappe asirataa intte immeeta” yaagiis. Yaatin balay aybee? I gujjidi, “Higgiyan de7iya keehi koshshiyaageeta aggi bayeeta; hegeeti pirddaa, maarotettaanne xillotettaa” yaagiis. (Maa. 23:23) Higgiyaa tamaarissiyaageetanne Parisaaweta qofissiyaabay wogaa kessiyoogaa xalla. Eti higgee yootiyoobaa akeekokkona; qassi haratuppe aadhoos giidi qoppoosona. SHin Yesuusi Higgee ubbay imettido gaasuwaanne hegee Yihoowabaa qonccissiyoobaa erees. w17.11 13 ¶1-2

Asay nuuyyo hagaadan gaana danddayees: “Asi ba deꞌuwan ufayttana bessees. Aqo oyqqennan attuma asi macca asaara zinꞌꞌin ayba nagari deꞌii?” SHaaramuxiyoogaa issi Kiristtaanee coꞌꞌu giidi xeellana bessees giyoogee bala. Ayssi giikko, Xoossaa Qaalay shaaramuxennaadan diggees. (1 Tas. 4:4-8) Yihooway nuna medhido gishshawu nuussi higgiyaa kessiyo maatay awu deꞌees. I aqo oyqqida attumanne macca asa xallay issippe zinꞌꞌana koshshiyoogaa yootiis. Xoossay nuna siiqiyo gishshawu nuuyyo higgiyaa immiis. Hegee nuna goꞌꞌees. He higgiyaa kaalliya so asay issoy issuwaa siiqidinne bonchidi, qassi woppu giidi deꞌees. Xoossay a higgiyaa eriiddi kanttiya uraa coꞌꞌu giidi xeellenna. (Ibr. 13:4) Xoossaa Qaalay shaaramuxennaadan nuuni waani naagettana danddayiyaakko tamaarissees. Hegaadan oottana danddayiyo issi ogee, nuuni xeelliyoobaappe naagettiyoogaa. (Maa. 5:28, 29) Hegaa gishshawu, issi Kiristtaanee pokkobaa beꞌana woy shori baynna yettaa siyana bessenna.—Efi. 5:3-5. w17.11 22 ¶9-10

Yihoowawu ammanettidi goynniyaageeti benippe doommidi mazamuriyan Yihoowa sabbidosona. Beni Israaꞌeelati ammanettidi Yihoowawu oottiyo wode, goynuwan mazamuriyaa yexxiyoogaa eti xoqqu oottidi xeellidoogee qoncce. Leemisuwawu, beeta maqidasiyaa oosuwawu giigettiyo wode, sabaa mazamuriyaa yexxanaadan 4,000 Leewata Kawuwaa Daawiti darajjayiis. Etappe, 288ti “yettan loohidaageeta.” (1 Odi. 23:5; 25:7) Beeta maqidasee anjjettiyo wode, asay oottido waannabaappe issoy mazamuriyaa yexxiyoogaanne muuziqaa. Geeshsha Maxaafay hagaadan gees: ‘Mazamuriyaa yexxiya ubbay xurumbbata punniiddi, daalata qaattiiddi, diittata diixxiiddinne hara kaaꞌiyo miishshatun kaaꞌiiddi Yihoowa sabbidosona. Yihoowa bonchoy Xoossaa beeta maqidasiyaa kumi uttiis.’ He hanotay Israaꞌeelatu ammanuwaa minttidoogee qoncce.—2 Odi. 5:13, 14; 7:6. w17.11 4 ¶4-5

Yesuusi i tamaarissiyoobay asay shaahettanaadan oottiyaaba gidiyoogaanne a kaalliyaageeti asay eqettishinkka a kaallanawu xalana koshshiyoogaa erees. Yesuusa halchoy Xoossaabaa tumaa asaa tamaarissanaassappe attin, so asaa shaakkanaassa gidenna. (Yoh. 18:37) SHin, mata laggeti woy so asay tumaa eqettikko, issi uri Kiristtoosa timirttiyawu ammanettidi deꞌiyoogee keehi metana. Kiristtoosi erissiyo ashkkarati a ufayssanawu, so asay eta qilliicciyoogaa woy ubba qassi zaggiyoogaa genccana koshshees. SHin, eti aggidobaappe keehi aadhiyaabaa demmidosona. (Mar. 10:29, 30) Nu dabboti nuuni Yihoowawu goynniyo gishshawu nuna eqettikkokka, eta ubbatoo siiqana bessees; shin nuuni Xoossaanne Kiristtoosa ooppenne aattidi siiqana bessiyoogaa hassayana koshshees. (Maa. 10:37) Nuuni Yihoowappe aattidi nu soo asaa siiqanaadaaninne awu ammanettiyoogaa agganaadan Seexaanay koyiyoogaa akeekanakka koshshees. w17.10 13 ¶3-6

Ha ajjuutay Yihooway ba asaa giddon ay iitatettaanne coꞌꞌu gi xeellennaagaa qonccissees. Yihooway iitatettaa beꞌiyo wode, hegaa sohuwaara xayssana. (1 Qor. 5:13) Kiitanchay keeshiyaa irssaasiyaa giyo birataappe oosettida qumꞌꞌuwan sohuwaara qumꞌꞌiyo wode hegaa bessiis. Yihooway tumu goynoy ubbatoo geeyanaadan oottiyoogaa ha ajjuutan qonccissidoogee keehi ufayssiyaaba! SHin, he ajjuutay Ayhudati bantta goynoy ubbatoo geeyanaadan oottiyo aawatettay etawu deꞌiyoogaakka hassayissiis. Yihoowa asaa giddon iitatettay gelanaadaaninne deꞌanaadan mule oottana bessenna. Ha wodiyan, Yihooway nuuni a siiquwaanne a naaguwaa demmiyo ba geeshsha dirijjitiyaakko nuna ehiis. He dirijjitee geeshsha gididi deꞌanaadan oottiyo aawatettay nu ubbaassi deꞌees. Iitatettay nu ayyaana gannatiyan ayba ogiyankka deꞌana bessenna. w17.10 24 ¶14-15; 25 ¶17-18   

Geeshsha Maxaafan koyro 39 maxaafata Ayhudati woy Israaꞌeelati xaafidosona. Eti “Xoossai ba kiitaa hadaraa” koyro immidoogeeta. (Roo. 3:1, 2) SHin, heezzantto xeetu layttan K.K., daro Ayhudati Ibraawettuwaa erokkona. Aybissi? Gita Iskkinddiri ba xoonido biittan Giriike haaruwaa aassido gishshataassa. (Dane. 8:5-7, 20, 21) He haaroy aakkido wode, Giriikettoy darosan laalettidi deꞌiya Ayhudata gujjin, daro asay haasayiyo qaala gidiis. Daro Ayhudati darotoo haasayiyoy Giriikettuwaa gidin, Ibraawetto Geeshsha Maxaafaa akeekanawu daroti metootidosona. Yaatin aybi maaddanee? Geeshsha Maxaafaa Ibraawettuwaappe Giriikettuwan naaꞌꞌantto xeetu layttan K.K. birshshettidi wuriis. He Geeshsha Maxaafaa birshshettay Giriiketto Septujenttiyaa geetettees. Septujenttee kumetta Ibraawetto Geeshsha Maxaafaa birshshetta gidida koyro maxaafa. w17.09 20 ¶7-9

Intte soo asaa goynuwawu, haggaazuwawunne shiiquwawu bazzido omarssan woy Qeeraanne Woggaa gallassan gujo saatiyaa oottanaadan inttena ootissiyaagee ubbatoo oychana danddayees. Intte hegaa ixxis giidi intte naatuyyo loꞌꞌo leemiso gidanawu xalana bessees. Qassi nu naati ayyaanaabaa halchanaadaaninne hegaa polanaadan maaddiyo wode xala gidiyoogaa bessoos. Leemisuwawu, issi issi aawatinne aayoti bantta naati aqinye gidanaadan, aassiyaageeti keehi koshshiyoosaa biidi haggaazanaadan, Beeteelen oottanaadan woy Xoossaa oosuwawu maaddiyaabaa keexxanaadan minttettennan aggana danddayoosona. He aawatinne aayoti cimiyo wode bantta naati etawu koshshiyaabaa kunttennan aggana giidi hirggana danddayoosona. SHin, erancha aawatinne aayoti Yihooway gelido qaalan ammanettiyoogan xala gidiyoogaa bessoosona. (Maz. 37:25) Qassi intte naati hegaadan oottanaadan maaddiyoogankka intte xalanne Yihoowan ammanettiyaageeta gidiyoogaa bessana danddayeeta.—1 Sam. 1:27, 28; 2 Xim. 3:14, 15. w17.09 30 ¶14-15

Intte naati bantta huuphiyaa naaganaadan waati maaddana danddayeetii? Yelidaageeti naati bantta huuphiyaa naagiyo eeshshay deꞌiyoogeeta gididi yelettibeennaagaa eroosona. Hara ubba eeshshaadan naati hegaa tamaarana bessees; yelidaageetikka leemiso gidana koshshees. (Efi. 6:4) Hegaa gishshawu, intte naati bantta huuphiyaa naaganawu metootikko, intte etawu loꞌꞌo leemisokkonne qoppite. Intte aggennan haggaaziyoogaa, gubaaꞌe shiiquwaa biyoogaanne so asaa goynuwaa kaalettiyoogaa goꞌꞌaa xaasayi xeelloppite. Koshshiyaaba gidikko, intte naati oychiyo issi issibaa chii gaanawu xalite! Addaameenne Hewaana a maataa bonchanaadan eta denttettana danddayiya zawaa Yihooway wottiis. Hegaadan, yelidaageeti seeriyoogeenne leemiso gidiyoogee naati bantta huuphiyaa naagiyaageeta gidanaadan maaddana danddayees. Intte naati meezetanaadan intte oottana bessiyo waannabaappe amaridaagee eti Xoossaa maataanne i kessido maaraa bonchanaadan tamaarissiyoogaa.—Lee. 1:5, 7, 8. w17.09 7 ¶17

Seexaanaa alamee xayana gakkanaassi nuna paacee gakkiyoogaa aggenna. Oosoy baynnaagee, wolqqaama harggee, yedetay, meretay gattiyo daafabay, danuwan aquwaa xayiyoogee woy hara metoy nuna qohees. Waayiyaa woy metuwaa wode issoy issuwaa maaddanawu nuuni wozanappe qarettana koshshees. Qarettiyoogee nuuni kehiyoogaa bessiyaabaa oottanaadan denttettees. (Efi. 4:32) Ooratta asatettaa qonccissiya ha eeshshati nuuni Xoossaa milatanaadaaninne harata minttettanaadan maaddoosona. (2 Qor. 1:3, 4) Nu gubaaꞌiyan deꞌiya hara biitta ishanttussi woy metootidaageetussi waatidi keehi qarettana danddayiyoo? Nuuni hegaa mala asaara laggetananne eti gubaaꞌiyan maaddiyoogaa akeekanaadan oottana koshshees. (1 Qor. 12:22) Qassi, asa biittappe yiidaageetussi qarettiyo gishshawu, daro Yihoowa Markkati ooratta qaalaa tamaaranawu baaxetoosona. (1 Qor. 9:23) Hegee daro anjjuwaa demissiis. w17.08 23-24 ¶7-9

Nuuni ubbay danddayana, woy nu dosan naagana koshshiyoogee qoncce. SHin yaatanawu nuna aybi maaddanee? Xoossay ayyaanaa immanaadan woossa. Danddayay ayyaanaa ayfiyaa macara gidiyoogaa hassaya. (Efi. 3:16; 6:18; 1 Tas. 5:17-19) Neeni danddayada genccanaadan Yihooway maaddana mala mintta woossa. Yihooway qaalaa gelidobay polettana gakkanaashin danddayidi naaganaadan Abrahaama, Yooseefanne Daawita aybi maaddidaakko hassaya. Eta maaddiday Yihoowa ammanidoogaanne i etassi oottiyooban eti ammanettidoogaa. Eti banttabaanne bantta koyiyoobaa xallaa qoppibookkona. Etayyo hanotay waani loꞌꞌidaakko nuuni wotti dentti qoppiyoogee, nuunikka naagiyaageeta gidanaadan maaddees. Hegaa gishshawu, nuna paaceenne waayee gakkikkokka, ‘naagishshanawu’ murttida. Ee, nuuni issi issitoo, “Abeet GODAU, . . . aude gakkanaashin?” giidi oychana danddayoos. (Isi. 6:11) SHin Xoossaa geeshsha ayyaanay immiyo wolqqan nuuni ubbay, hachi gallassa xiqisiyan Ermmaasi giidoogaadan nuuyyo siyettana danddayees. w17.08 7 ¶18-20

Yesuusi kaaꞌiiddi diccidoogee erettidaagaa. Xoossaa Qaalay, “Miiccanaukka wodee de7ees; . . . qassi ufaittidi yexxanaukka wodee de7ees” yaagees. (Era. 3:4) Yesuusi Xoossaa Qaalaa xannaꞌidoogee i Yihoowakko shiiqanaadan maaddiis. Ayyo layttay 12 gidiyo wode, ayyaanaabaara gayttidaagan “i immiyo era zaaruwan” beeta maqidasiyan tamaarissiyaageeti garamettidosona. (Luq. 2:42, 46, 47) Yesuusi gitatiyo wode, a ufayssiday Xoossay appe koyiyoobaa oottidoogaa. Leemisuwawu, Xoossay i ‘hiyyeesaassi loꞌꞌo mishiraachuwaa yootanaadaaninne qooqeta’ pattanaadan koyiis. (Luq. 4:18, 19) I ba Aawaabaa asaa tamaarissiyoogan ufayttiis. (Luq. 10:21) I issitoo, tumu goynuwaabaa issi maccaaseeyyo tamaarissi simmidi, ba erissiyo ashkkaratuyyo, “Ta qumai tana kiittidaagee koyiyoobaa oottanaagaanne a oosuwaa polanaagaa” yaagiis. (Yoh. 4:31-34) Yesuusi Xoossaanne asaa siiqiyo gishshawu ufayttiis. Hegee nenakka ufayssana danddayees. w17.07 23 ¶4-5

Yesuusi saꞌan deꞌiyo wode haasayidobaynne oottidobay a Aaway Yihooway qarettiyoogaa loytti qonccissees. (Yoh. 5:19) Yesuusi ‘wozanay meqqidoogeetanne’ “azzaniyaageeta ubbata” minttettanaadan kiitettiis. (Isi. 61:1, 2; Luq. 4:17-21) Yesuusi eta metuwaa akeekiyoogaanne eta maaddanawu wozanappe koyiyoogaa asay eriis. (Ibr. 2:17) Geeshsha Maxaafay, “Yesuus Kiristtoosi zinekka hachchikka merinaukka laamettenna” yaagees. (Ibr. 13:8) I nuuni merinaa deꞌuwaa demmanaadan maaddiyaabaa oottido gishshawu, “de7uwaa immiyaagaa” geetettiis; qassi i ba huuphe azzani eriyo gishshawu, “paacettiyaageeta maaddanau danddayees.” (Oos. 3:15; Ibr. 2:10, 18) Harati azzaniyo wode Yesuusi azzanees. I eta kayyuwaa akeekees, qassi “koshshiyo wode” i eta minttettana danddayees.—Ibr. 4:15, 16. w17.07 13 ¶6-7; 14 ¶10

Seexaanaynne ha alamee Yihooway nuussi immido aquwaa siiqiyoogaa agganaadan oottenna mala nuuni naagettana koshshees. Nuuni naagettana xayikko, daro miishshaa demissiya oosuwaa koyiyoogee, ishalo duussaa deꞌanawu qoppiyoogee woy nu aquwaa bessiyoogee nu qofaa wora zaarana danddayees. Kiitettida Yohaannisi ha alameenne ha alamiyaa asay amottiyo ubbabay mata wode xayanaaga yootiis. (1 Yoh. 2:15-17) Nu ayyaanaabaa aquwaa ubba wode nuuni nashshananne naagana koshshiyoy hegaassa. Neeni Xoossaa Kawotettaa ne kumetta wozanaappe siiqennaadan oottiya aybanne agganawu eeno ga. Nu haggaazoy shemppo ashshiyaaba gidiyoogaa muletoo qoppiyoogan ubbatoo mishettada sabbaka. Xoossaa tumaa wozanappe muletoo koya. Neeni yaatiyo wode, ‘kaysoy shiiqennasan, bilꞌꞌay bochennasan, saluwan wurenna miishshaa dagayana.—Luq. 12:33. w17.06 13 ¶19-20

Yihoowa haaroy huqqunniyaagaa gidenna. A haaroy laꞌa kesseesinne ufayssees. (2 Qor. 3:17) Daawiti hegaa xeelliyaagan hagaadan giis: “Bonchchoinne anggai a yuushuwan de7ees; minotettainne ufaissai a Beeta Maqidasiyan de7ees.” (1 Odi. 16:7, 27) Hegaadankka, mazamuraawee Etaani hagaadan giis: “Abeet GODAU, nena sabbi eriyaageetinne ne som77uwaa poo7uwan heemettiyaageeti anjjettidaageeta. Ne sunttan gallassa ubban ufaittoosona; ne xillotettaa gishshau, eti nena xoqqu xoqqu oottoosona.” (Maz. 89:15, 16.) Yihoowa loꞌꞌotettaabaa darotoo wotti dentti qoppiyoogee a haaroy ay haaroppenne aadhiyoogaa kaseegaappe aaruwan ammananaadan maaddana danddayees. Hegaappe aaruwan ufayssiyaabay baawa! Yihooway nuna Medhidaagaa gidiyo gishshawu, nuuni tumu ufayssaa demmanawu waatana koshshiyaakko erees; qassi i nuussi koshshiyaabaa darissidi immees. I nuuni oottanaadan koyiyoobay ubbay nuna goꞌꞌiyaabanne keehi ufayssiyaaba; ubba i giyoobaa oottanawu giidi issi issibaa aggi bayikkokka keehi ufayttoos.—Isi. 48:17. w17.06 29 ¶10-11

Naꞌa yelanawu keehi koyikkonne yelana danddayabeenna Inggilizen deꞌiya issi micheebaa qoppa. He wode i deꞌoy laamettiis. A amottiyoobay ha wodiyan polettennaagaa akeekido gishshawu, azzanaasu. Anne i azinay asa naꞌa dichanawu qofaa qachidosona. Gidikkokka, a hagaadan gaasu: “Taani haꞌꞌikka azzanays. Asa naꞌa dichiyoogee taani yeliyoogaa mala gidennaagaa erays.” Geeshsha Maxaafay Kiristtaane maccaasati, ‘naata yeliyoogan attanaagaa’ yootees. (1 Xim. 2:15) SHin hegee yeliyoogee woy naata dichiyoogee merinaa deꞌuwaa demissees giyoogaa gidenna. Issi maccaasiyaa naata yeliyoogeenne ba so asawu koshshiyaabaa oottiyoogee a zigirssancha gidennaadaaninne hara asaa allaalliyan gelennaadan o naagana danddayiyoogaa hegee bessees.—1 Xim. 5:13. w17.06 5-6 ¶6-8

Eelihu Xoossaa oosuwan nuuni daafuriyoobawu waagi baawa giidee? Akkay, gibeenna. I nuuni Yihoowayyo oottiyoobay ayyo zemppo gidenna yaagiis. Yihooway kumetta. I kaseegaappe duretanaadan woy minnanaadan nuuni aynne oottana danddayokko. Gidikkokka, nuussi deꞌiya loꞌꞌobay, eray woy wolqqay aybikka Xoossay immidobaa; qassi hegaa nuuni waati goꞌettiyaakko i akeekees. Nuuni aggenna siiquwaa bessiyaabaa a ashkkaratussi oottiyoogaa Yihooway baayyo oottiyoobadan xeellees. Leemiso 19:17y, “Hiyyeesaassi kehiya asi GODAASSI tal77ees; GODAI he lo77o oosuwaa acuwaa qanxxees” yaagees. Hiyyeesatussi nuuni kehiyo ubbabaa Yihooway xeelliyoogaa ha xiqisee yootii? Ubbabaa Medhidaagee asay kehatettaa bessiyaabaa oottiyo wode i etawu acotiyaabadan xeellidinne hegaa mala oosuwaa ayyo talꞌꞌidobadan qoodidi, eta nashshiyoogaaninne anjjiyoogan acuwaa qanxxees gaana danddayiyoo? Ee danddayoos, qassi Xoossaa Naꞌay hegee tuma gidiyoogaa qonccissiis.—Luq. 14:13, 14. w17.04 29 ¶3-4

Geeshsha Maxaafaanne Geeshsha Maxaafaa qofay deꞌiyo xuufeta nabbabiyoogee nuuni Geeshsha Maxaafaa tumaa loytti siiqanaadan maaddikkokka, maaddana danddayiya harabay aybee? Nuuni gubaaꞌe shiiqota aggennan shiiqiyoogan Geeshsha Maxaafaa tumaa loytti siiqana danddayoos. Wochiyo Keelaa goꞌettidi saaminttan saaminttan Geeshsha Maxaafaa xannaꞌiyoogee nuuni tamaariyo waanna oge. Xannaꞌiyo qofaa akeekanawu, Wochiyo Keelaa Xinaatiyawu nuuni loytti giigettana koshshees. Nuuni hegaadan oottana danddayiyo issi ogee hegan odettida Geeshsha Maxaafaa xiqiseta ubbaa kessidi nabbabiyoogaa. Ha wodiyan, Wochiyo Keelaa jw.org websaytiyaappe wottana woy JW Library applikeeshinee daro qaalan deꞌiyo gishshawu appe beꞌana danddayoos. Amarida elektiroonike miishshati xannaꞌiyo xuufiyan deꞌiya shempponne paydo xallay xaafettido xiqiseta nuuni sohuwaara kessanaadan maaddoosona. SHin nuuni goꞌettiyo ogee ayba gidikkonne, he xiqiseta akeekan nabbabiyoogeenne hegaa wotti denttidi qoppiyoogee nuuni Geeshsha Maxaafaa tumaa loytti siiqanaadan maaddees. w17.05 20 ¶14

Xammaqetti simmidi, nuuni ammanettidi Xoossawu oottiyoogan nu huuphiyaa geppiyo wode gelido qaalaa polana koyoos. Yihoowawu oottanawu issitoo qaalaa gelikko hegaa polana bessees. Issi uri Yihoowawu haggaazanawu woy Kiristtaanetuppe koyettiyaagaadan deꞌanawu azallikko, i koyrokka ba huuphiyaa Xoossawu geppidoogeenne xammaqettidoogee ekettiyaaba gidenna giidi qoppana danddayenna. Ba huuphiyaa Xoossawu geppida uri qoppiyoobankka halchiyoobankka kumetta hanotan bana Xoossawu immiis. I wolqqaama nagaraa oottikko, Yihoowaynne gubaaꞌee a oychana. Nuuni, ‘Kase intte siiquwaa aggideta’ geetettanawu mule koyokko. SHin Yesuusi nubaa hagaadan gaanaadan koyoos: “Taani ne oosuwaa, ne siiquwaa, ne ammanuwaa, ne maaduwaanne ne genccaa erais; neeni koiro oottiyoogaappe ha77i darissada oottiyoogaa taani erais.” (Ajj. 2:4, 19) Simi Yihoowa ufayssanawu nuuni nu huuphiyaa ayyo geppiyo wode gelido qaalaa ubbatoo mishshettidi poliyaageeta gidoos. w17.04 6-7 ¶12-13

“Ha Sa7aa ubbaa pirddiyaagee xillo pirddenneeyye?” (Doo. 18:25) Abrahaami hegaadan oychiyoogan, Sadoomanne Gamoora katamatubaa Yihooway wotoy baynna pirdda pirddanaagaa ammanettiyoogaa yootiis. Yihooway ‘xillota iitatuura woriyoogan’ suure gidennabaa mule oottennaagaa Abrahaami ammanettiis. I hegaa malabaa oottees giidi Abrahaami mule qoppenna. Yihooway ubbatoo suure pirddaa pirddiyoogaa Abrahaami ammanettays gaana danddayidoy aybissee? Suure pirddaaninne xillotettan Yihooway gita leemiso gidiyo gishshataassa. ‘Suurenne’ ‘tumancha’ woy xillo geetetti birshshettida Ibraawetto qaalati darotoo Ibraawetto Geeshsha Maxaafan issippe xaafettidosona. Suurebi xillobaappe dummatiyoobi baawa. Xillotettaa wurssetta xekkay Yihoowa gidiyo gishshawu, i ubbatoo yohuwaa suure xeellees. Hegaa bollikka a Qaalay, i “xillotettaanne tumu pirddaa” dosiyoogaa yootees.—Maz. 33:5. w17.04 18 ¶1-2

Aawatoonne aayetoo, intte naati merinaa deꞌuwaa ogiyan biyoogaa doommanawu intte leemiso gidiyoogee keehi koshshees. Intte naati intte ‘kasetidi Xoossaa kawotettaa koyiyoogaa’ beꞌiyo wode, eti banttawu galla galla koshshiyaabawu Yihoowan ammanettiyoogaa tamaaroosona. (Maa. 6:33, 34) Hegaa gishshawu, guuttabay gidana giidi deꞌite. Ayyaanaabaa gishshawu aquwaabaa aggibayiteppe attin, aquwaa demmana giidi ayyaanaabaa aggoppite. Acotennan deꞌanawu baaxetite. ‘Saluwan duretanawu’ woykko Yihoowan sabettanawu koyiteppe attin, duretettaa woy “asa sabaa” koyoppite. (Mar.10:21, 22; Yoh. 12:43) Intte naatussi wode xayana gakkanaashin oosuwan bichaaroppite. Eti woy intte hayttatanaadan woy duretanaadan koyiyoogaappe, eti Yihoowa sinttayiyo wode, intte etan ufayttiyoogaa yootite. Naati bantta aawaanne aayyiyo ishalissana koshshees giyo, Kiristtaanetussi bessenna qofaa aggite. “Aayyiyaanne aawai bantta naatuyyo miishsha minjjiyoogaappe attin, naati bantta aayeeyyoonne aawaayyo” minjjennaagaa hassayite.—2 Qor. 12:14. w17.05 8-9 ¶3-4