Laappune

Dabboti woy laggeti loꞌꞌobaa qoppidi, hayqqida asaara gayttidaagan nuuni Geeshsha Maxaafan digettidabaa oottanaadan nuna giddiyo wodekka, Xoossaanne A Qaalaa nuuni siiqiyoogee Yihoowayyo azazettanaadan nuna minttettees. Eti intte hayqqida ura siiqekketa woy bonchchekketa giidi yootiyoogan nuna yeellayanawu baaxetana danddayoosona. Woy qassi eti nu eeshshay hayqqida uri paxa deꞌiyaageeta issi issiban qohanaadan oottees giidi yootana danddayoosona. Karibiyaane haruuruwan, issi uri hayqqi simmin, A “moytillee” heeran deꞌananne A naaqqida asaa qaxxayana danddayees giidi daro asay ammanees. He “moytillee” ubba qassi “heeraa asaa bolli metuwaa gattana” danddayiyoogaa issi xuufee yootees. Hayqqida ura son deꞌiya heregaa kammiyoonne godan deꞌiya pootota aatti yeggiyo meezee Afirkkan issi issi heeran deꞌees. Gaasoy aybee? Hayqqidaageeti banttana xeellana bessenna giidi issoti issoti yootoosona. Nuuni Yihoowa ashkkarata gidiyo gishshawu, Seexaanaa worddota minttiya ayba malaanne ammanokko woy ayba oosonne oottokko!—1 Qor. 10:21, 22. w19.04 16 ¶11-12

I bana kaalliyaageeti issoy issuwaa maara oyqqanawu maaddiya maarata tamaarissiis. Leemisuwawu, harati nuna maara oyqqanaadan koyikko, nuunikka eta maara oyqqana mala Yesuusi tamaarissiis. Nuuni hegaadan oottikko, eti nuna maara oyqqana danddayoosona. Nuuni naaqettikko shin? Yihooway “gallassinne qammi baakko waassiya doorettida asaassi” tumu pirddaa pirddanaagaa bana kaalliyaageeti ammanettanaadankka Yesuusi tamaarissiis. (Luq. 18:6, 7) Ha qofay qaalaa geliyooba: Suure pirddiya nu Xoossay ha wurssetta wodiyan nuna gakkiya metuwaa erees; qassi I ba keerido wodiyan tumu pirddaa nuussi pirddana.(2 Tas. 1:6.) Nuuni Yesuusi tamaarissido maarata kaalliyo wode, harata suure ogiyan oyqqana. Seexaanaa alamiyaappe gakkiya naaquwaa gaasuwan nuuni waayettikko, Yihooway tumu pirddaa ehaanaagaa eriyoogee nuna minttettana danddayees. w19.05 5 ¶18-19

Neeni tamaaraydda deꞌiya yelagee? Ne kifiliyaa tamaareti ubbay lodda laamiyan ammanana danddayoosona. Nuuni Geeshsha Maxaafay tamaarissiyoogaadan merettidoogaa neeni ammaniyo gaasuwaa yootanawu koyana danddayaasa; shin yaatanawu danddayennabadan neessi siyettennan waayi aggana. Yaatiyo gishshawu, neeni xannaꞌana koshshees! Neeni yaatiyo naaꞌꞌu gaasoy deꞌana danddayees: (1) Xoossay ubbabaa medhdhidoogaa neeni mintta ammananaassa, qassi (2) ne ammaniyoobaa waata loytta qonccissanaakko tamaaranaassa. (Roo. 1:20) Koyro, ‘Ta kifiliyaa tamaareti lodda laamiyan ammaniyoy aybissee?’ gaada nena oychchana danddayaasa. Yaatada, nu xuufeta goꞌettada he qofaa loytta pilgga. Ne ammaniyoobaa qonccissiyoogee neeni qoppidoogaadan metiyaaba gidennan aggana danddayees. Daro asay lodda laamiyan ammaniyoy eti bonchchiyo issi uri hegee tuma giidi etawu yootido gishshaa xallaassa. Neeni etawu yootana danddayiyo issibaa woy naaꞌꞌubaa demmikko, tumaa eranawu koyiya issi ura maaddana danddayaasa.—Qol. 4:6. w19.05 29 ¶13

Hananabaa yootiya Eelaasi bana woranawu koyiyaageetuppe baqatiyo wode, I keehi hidootaa qanxxidi hayqqanawu koyiis. Hidootaa qanxxida he bitaniyaa haasayissanaadan Yihooway issi wolqqaama kiitanchchaa kiittiis. He kiitanchchay Eelaasawu he wode koshshidabaa immiis. I Eelaasawu hoꞌꞌo qumaa immidi maanaadan A minttettiis. (1 Kaw. 19:5-8) He taarikee maaddiya issi tumaa qonccissees: Issi issitoo nuuni issi urawu oottiyo guuttabay keehi maaddiyaaba gidana danddayees. Qumaa shoobbiyoogaa, guutta imotaa immiyoogaanne biidi minttettiyoogaa malabaa waayettiya nu ishaassi woy nu michcheessi oottiyoogan nuuni A woy O siiqiyoogaa bessana danddayoos. Nuuni issi urawu siyettiyaabaa xeelliyaagan haasayanawu metootiyaaba gidikko, maaddiya amaridabaa hegaadan oottiyoogan nuuni etawu qoppiyoogaa bessana danddayoos. Hananabaa yootiyaagee Koreba Deriyaa gakkanaassi haahosaa baanawu koshshiya maaduwaa Yihooway maalaalissiya ogiyan ayyo immiis. Ha hanotaappe nuuni ay tamaarana danddayiyoo? Mattumaara gayttidaagan qohettidaageeta nuuni minttettanawu koyikko, eta son woy SHiiquwaa Addaarashan haasayissiyoogee woppu gaanaadan oottana danddayiyaakko nuuni koyro akeekana koshshees. w19.05 16 ¶11; 17 ¶13-14

Masiyaa hayquwaabaa kasetidi yootiya, Zakkaariyaasa shemppo 12 nabbabaydda deꞌiyaabadan qoppa. (Zak. 12:10) Neeni paydo 12 gakkiyo wode, Masiyaa hayquwan “Naataana zareti” yeekkanaagaa nabbabaasa. Neeni eesuwan nabbabada kanttiyoogaappe he darin koshshennaba milatiyaabatun takki gaada, nena hagaadan oychcha: ‘Naataana zaree Masiyaara waani gaytti? Neeni guuttabaa pilggana danddayaasa. Geeddarssanawu imettida 2 Sameela 5:13, 14 qofay, Naataani Kawuwaa Daawita naatuppe issuwaa gidiyoogaa neeni eranaadan maaddees. Geeddarssanawu imettida Luqaasa 3:23, 31, Yesuusi Mayraami baggaara Naataana zare gidiyoogaa qonccissees. Neeni sohuwaara hegaa dosa bayana! Yesuusi Daawita zare gidanaagee kasetidi odettidoogaa neeni eraasa. (Maa. 22:42) SHin Daawiti 20⁠ppe dariya naata yeliis. Naataana zareti Yesuusa hayquwan yeekkanaagaa Zakkaariyaasi dummayidi yootidoogee keehi maalaaliyaaba! w19.05 30 ¶17

Yaatin nuuni ay oottana koshshii? Nuuni ubbatoo xannaꞌikko, Geeshsha Maxaafaappe nuuni tamaaridobay tuma gidiyoogaa ammanettana danddayoos. Yaatikko, Yihooway kessido maarati likke gidiyoogaa nuuni ammanettoos. Yaatiyo wode, mino xaphoy deꞌiyo mittaadan, nuuni “ammanuwan” xaphuwaa yeddidi minnana. (Qol. 2:6, 7) Neeyyo ne ammanuwaa ooninne minttana danddayenna; yaatiyo gishshawu, ne wozanaanne qofaa aggennan ooraxissa. Yihoowa ayyaanay maaddanaadan ubbatoo minttada woossa. Loyttada wotta dentta qoppa; ne qofaanne ne issibaa oottiyo ogiyaa ubbatoo yuushsha qoppa. Neeni ne qofaa laammanaadan maaddiya loꞌꞌo laggeta doora. Neeni hegaadan oottiyo wode, Seexaanaa alamee gattiyo qohiyaabaappenne iitabaappe nena naagana; qassi “Xoossaa eratettaa bolli denddidi xubbiya otoro qofa ubbaa” laalana.—2 Qor. 10:5. w19.06 13 ¶17-18

Uruta amꞌꞌe Naaꞌoomippe shaahettabeennaagaadan, siiqiyo asi hayqqido ura aggennan nuuni maaddanawu koshshees. (Uru. 1:16, 17) Pawula hagaadan gaasu: “Ta keettaaway hayqqi simmin takkennan tana maaddanawunne minttettanawu daro asay yiis. SHin guutta wodiyaappe simmin, eti kase oottiyo oosuwaa oottiyoogaa doommidosona. Gidoppe attin, ta deꞌoy muleera laamettiis. Hayquwaappe simmin kayyottiya urawu daro aginawu, ubba qassi daro layttawu maadoy koshshiyoogaa harati akeekiyoogee keehi maaddees.” Ubba asaa hanotay issi mala gidennaagee qoncce. Issoti issoti ooratta hanotaa eesuwan meezetiyaaba milatoosona. SHin, harati kase bantta siiqiyo uraara oottidobaa oottiyo wode ubban, hegee eti hayqqida uraa hassayanaadan oottees. Asay kayyottiyo hanotay asappe asan dummatees. Eta aqo laggeti hayqqidoogeeta maaddiyo maataanne aawatettaa Yihooway nuussi immidoogaa simi hassayoos. w19.06 24 ¶16

Nu oosoy muleera teqettiyo wode, nuuni ‘coꞌꞌu gaana’ bessiya wodee awudekko akeekana koshshees. (Era. 3:7) Nuuni nu ishanttunne michchonttu sunttaa, nuuni shiiqiyo sohota, nuuni sabbakiyo ogiyaanne ayyaanaa qumaa demmiyo ogiyaa mala xuura gididabata hara asawu odana bessenna. Nuuni he yohota kawotettawu, nu biittan woy hara biittatun deꞌiya nu laggetuyyo woy nu dabbotuyyo yootana koshshenna. Nuuni yootikko, nu ishantti daafaban gelanaadan oottoos. Guutta metotu gaasuwan shaahettanawu eeno gooppite. SHaahettida keettay eqqana danddayennaagaa Seexaanay erees. (Mar. 3:24, 25) I nu giddon shaahotettay merettanaadan oottanawu ubbatoo baaxetees. Yaatiyoogan, I nuuni A eqettiyoogaa aggidi issoy issuwaa eqettiyoogaa doommanaadan oottanawu qoppees. He piriyan gelennaadan kayma Kiristtaanetikka naagettana koshshees. Nu ishanttuura hanqqetissidabaa agganawu nuuni baaxetikko, aybinne nuuni shaahettanaadan oottana mala paqqadokko.—Qol. 3:13, 14. w19.07 11-12 ¶14-16

Darotoo, asay nu yootiyoobaa loytti siyiyoy, nuuni yootidobaa gishshawu gidennan, nuuni hegaa yootido ogiyaa gishshataassa. Nuuni keha, hiillanchchanne wozanappe siiqiyaageeta gidiyo wode eti hegaa dosoosona. Nuuni yootiyoobaa siyanaadan, eta wolqqanttokko. SHin, eti bantta haymaanootiyaa qofaa yootiyoobaa akeekanawunne eta qofan qohennaadan naagettiyaageeta gidoos. Leemisuwawu, PHawuloosi Ayhudatuura haasayiyo wode Geeshsha Maxaafaappe yootiis. SHin, Ariyosppaagoosan Giriike biittaa eranchchatuura haasayido wode Geeshsha Maxaafaappe ekettidoogaa yootibeenna. (Oos. 17:2, 3, 22-31) PHawuloosa leemisuwaa waani kaallana danddayiyoo? Geeshsha Maxaafaa ammanenna uraara gayttikko, aara haasayiyo wode Geeshsha Maxaafaappe ekettidoogaa odennan aggiyaakko loꞌꞌo gidana danddayees. Issi uri nenaara Geeshsha Maxaafaa nabbabiyoogaa hara uri beꞌanaadan I koyennaagaa neeni akeekikko, harati erenna ogiyan, elektiroonike miishsha malaban xiqiseta bessanawu mala. w19.07 21 ¶5-6

Eeqawu goynnanaadan oottiyoogan Seexaanay Israaꞌeelata hiillan etayyo qumay koshshiyoogaa I eriyo gishshawu, eti I koyiyoobaa oottanaadan hegaa goꞌettanawu baaxetiyoogan paacciis. Israaꞌeelati Hidootaa Biittaa gelido wode, goshshaa oosuwaara gayttidaagan ooratta ogiyaa tamaarana koshshiis. Israaꞌeelati Gibxxen deꞌiyo wode, bantta goshsha gadiyaa ushshanawu Nayle shaafaa haattaa waaruwan goꞌettoosona. Gidoppe attin, Hidootaa Biittan gita shaafay baynna gishshawu, goshshaa oosuwawu etawu iraa haattaynne akkay koshshiis. (Zaa. 11:10-15; Isi. 18:4, 5) Hegaa gishshawu, Israaꞌeelati ooratta goshshaa hiillaa tamaarana koshshiis. Ooratta goshshaa hiillaa tamaariyoogaa xeelliyaagan Yihooway etawu yootido wode, worddo xoossatussi goynniyoogaabaa yootidoy aybissee? Israaꞌeelati bantta yuushuwan deꞌiya, eeqawu goynniya asaappe issi issi goshshaa hiillaa tamaaranawu eti paacettanaagaa Yihooway erees.—Qoo. 25:3, 5; Daan. 2:13; 1 Kaw. 18:18. w19.06 3 ¶4-6

Kiitettida PHawuloosi, Sillaasi, Luqaasinne Ximootiyoosi Piliphphisiyuusa katamaa gakkido wode, Kawotettaa mishiraachchuwaa siyanawu koyiya daro asaara gayttidosona. Ha oyddu minni oottiya ishantti gubaaꞌee eqqanaadan maaddidosona; qassi erissiyo ashkkarati ubbay imattaa mokkiya Liidiyo giyo issi michchee son issippe shiiqiyoogaa doommennan aggokkona. (Oos. 16:40) Mati eqqida he gubaaꞌiyaa paacee sohuwaara gakkiis. Seexaanay tumaa ixxiya asay PHawuloosinne A laggeti sabbakiyoogaa eqettanaadan eta denttettiis. PHawuloosanne Sillaasa oyqqidosona, gatiman shocidosona, qassi qasho keettan yeggidosona. Eti qasho keettaappe kiyi simmidi, mati erissiyo ashkkara gididaageetukko biidi eta minttettidosona. Hegaappe simmin, PHawuloosi, Sillaasinne Ximootiyoosi he katamaappe bin Luqaasi yan takkennan waayi aggana. Yaatin mati erissiyo ashkkara gidida ishanttinne michchontti waananee? Yihooway ba ayyaanaa baggaara eta maaddin, eti minnidi ayyo haggaaziyoogaa aggibookkona. (Pili. 2:12) PHawuloosi etan ceeqettiyo loꞌꞌo gaasoy deꞌees! w19.08 8 ¶1-2

Deꞌanawu hara sohuwaa mati baadii? Harasan daanawu biyoogee keehi alꞌꞌo gidana danddayees, qassi acuwan geliyoogee metennaba. Hegaa gishshawu, neessi tumuppe koshshennabaa shammanawu miishshaa talꞌꞌoppa. (Lee. 22:3) So asaappe issoy sahettin xeelliyo wodiyaagaa mala, unꞌꞌissiyaabay nuna gakkiyo wode, ay keena miishshaa talꞌꞌanaakko kuuyanawu metootana danddayoos. Hegaa mala hanotatun, mintta ‘woossiyoogee’ neeni loꞌꞌobaa kuuyanaadan maaddana danddayiyoogaa hassaya. Neeni woppu gaanaadan maaddiyoogan Yihooway ne woosaa zaarana danddayees, hegee neeni loꞌꞌobaa kuuyanaadan maaddees. (Pili. 4:6, 7; 1 PHe. 5:7) Neeyyo loꞌꞌo leemiso gidiya asatuura laggeta. Nena gakkidabaanne neeyyo siyettiyaabaa ne mata laggetussi yoota; qassi nena gakkidabay kase eta gakkidaba gidana danddayees. Neeni hegaadan oottikko, ufayttana danddayaasa. (Era. 4:9, 10) Neeni kase haggaaziyo heeran laggetidoogeeti neessi lagge gididi deꞌana. w19.08 22 ¶9-10

Yihooway wurssetta wolqqaama olaa Magiddoora gattidoy aybissee? Beni wode, Magiddooninne A matan deꞌiya Iziraaꞌeela wombban asay daro olaa olettiis. Issi wode, he olatun Yihooway kelttiyaa geliis. Leemisuwawu, Sisaara giyo gadaaway kaalettiyo Kanaane olanchchata “Magiddo pulttotu matan” Israaꞌeela Daannay Baaraaqi xoonanaadan Xoossay maaddiis. Baaraaqinne hananabaa yootiya Deboora eti xoonido maalaalissiya xoonuwawu Yihoowa galatidosona. Eti mazamuriyaa hagaadan yexxidosona: “Saluwan de7iya xolinttetikka . . . Sisaaraara olettidosona. . . .  Abeet GODAU, ne morkketi ubbai hegaadan haiqqona! SHin ne siiqoti maallado mokkiya awaadan phoolona.” (Daan. 5:19-21, 31) Armmageedoona olaa wode, Xoossaa morkketi hegaadan xayana; shin Xoossaa siiqiyaageeti attana. Gidoppe attin, he naaꞌꞌu olatu giddon gita dummatettay deꞌees. Armmageedoona olaa wode Xoossaa asay olettenna. Etassi olaa miishshikka baawa! ‘Coꞌꞌu giyoogee,’ qassi Yihoowaaninne saluwan deꞌiya A olanchchatun ‘ammanettiyoogee etayyo wolqqa gidana.’—Isi. 30:15; Ajj. 19:11-15. w19.09 9 ¶4-5

Nuuni Yesuusi yootidobaanne oottidobaa nuuyyo danddayettida keenan tamaariyoogee akko ‘yiyo’ issi oge. (Luq. 1:1-4) SHin, nuuni Geeshsha Maxaafay Yesuusabaa yootiyoobaa xannaꞌana bessees. Nuuni xammaqettanawunne Kiristtoosa ashkkara gidanawu kuuyiyo wodekka Yesuusakko ‘yoos.’ Nuuyyo maadoy koshshiyo wode gubaaꞌiyaa cimatukko biyoogee nuuni Yesuusakko ‘yiyo’ hara oge. Yesuusi ba dorssatussi koshshiyaabaa kunttanawu “imota” gidida ha attuma asata goꞌettees. (Efi. 4:7, 8, 11; Yoh. 21:16; 1 PHe. 5:1-3) Nuuni maaduwaa eta oychchanawu baaxetana koshshees. Nuuni cimati nu qofaa akeekidi nuussi koshshiyaabaa eroosona giidi naagana koshshenna. Juuliyaana giyo ishay hagaadan giis: “Taani maaduwaa oychchaas; he maadoy taani kase ekkido imota ubbaappe aadhdhees.” Juuliyaana oychchidi minttettida naaꞌꞌu cimatu mala ammanettida cimati nuuni ‘Kiristtoosa wozanaa woy qofaa’ eranaadan maaddana danddayoosona; hegee nuuni A qofaa akeekidi kaallanaadan oottees. (1 Qor. 2:16; 1 PHe. 2:21) Hegee eti nuuyyo immana danddayiyo imota ubbaappe aadhdhiya imota. w19.09 21 ¶4-5

Geeshsha ayyaanay kaalettido ammanettida attumaageetanne maccaageeta Geeshsha Maxaafay yootees; shin eti 144,000tu yame gidokkona. Xammaqiya Yohaannisi hegawu issi leemiso. (Maa. 11:11) Haray qassi Daawita. (Oos. 2:34) Etinne hara keehi daroti gannate saꞌan deꞌanawu hayquwaappe denddana. Eti ubbay zaway baynna daro asaara Yihoowayyoonne A haaruwaayyo ammanettiyoogaa bessiyo injjiyaa demmana. Xoossay bawu issippetettan goynnanaadan miilooniyan qoodettiya asaa biitta ubbaappe shiishshido hagaa mala wodee baawa. Nuuni deꞌanawu hidootiyoy saluwaana gidin saꞌaana gidin, ‘hara dorssatu’ bagga gidida zaway baynna daro asaa yara gidanaadan, nuussi danddayettida keenan cora asaa maaddana koshshees. Asaa bolli wolqqaama metuwaa gattiya kawotettatunne haymaanootetu bolli Yihooway kasetidi odettida iita waayiyaa mata wode ehaana. Zaway baynna daro asaa yame gidida ubbaa maalaalissiyaabay naagees. Eti saꞌan merinawu Yihoowayyo oottana!—Ajj. 7:14. w19.09 31 ¶18-19

Gita waayee keehi matido gishshawu, nuuni nu Xoossaassinne A Kawotettaassi ammanettiyoogee kaseegaappe aaruwan paacettanaagaa naagana danddayoos. Asay nuna ubbatoo toochchennan waayi aggana. Hegawu waanna gaasotuppe issoy, Seexaanaa alamiyaa bagga gidida awugaanne nuuni maaddennaagaa gidennan aggenna. Nuuni gita waayiyaa wode ammanettidi deꞌana mala ammanettiyaageeta gidiyoogan haꞌꞌi minnana bessees. Gita waayiyaa wode, saꞌan Xoossaa asaa kaalettiya ishantta xeelliyaagan hanotay laamettana. He wode, saꞌan attida tiyettidaageeti ubbay Armmageedoona olan olettanawu saluwan issippe shiiqana. (Maa. 24:31; Ajj. 2:26, 27) Hegaa giyoogee Bolla Gididi Heemmiyaagee saꞌan nunaara deꞌenna giyoogaa. SHin, zaway baynna daro asawu kaaletuwaa immanawu koyettiyaabaa kunttiya ishantti hara dorssatu giddoppe deꞌana. He ishantta maaddiyoogaaninne Xoossaappe eti ekkido kaaletuwaa kaalliyoogan nuuni Yihoowawu ammanettiyoogaa bessana koshshees. Nuuni attanawu koyikko, eti immiyo kaaletuwaa kaallana bessees! w19.10 17 ¶13-14

Naaꞌooma Yihoowa siiqiya ammanettida maccaasa. SHin I keettaawaynne naaꞌꞌu attuma naati hayqqi simmin, A Naaꞌoomo giyo ba sunttaa, camuwaa giyo birshshettay deꞌiyo Maaro gaada laammanawu koyaasu. (Uru. 1:3, 5, 20, 21) Naaꞌoomi naꞌaa machchiyaa Uruta I metuwaa wode ippe shaahettennan deꞌaasu. Uruta maaddiyaabaa oottiyoogaa xalla gidennan, Naaꞌoomo minttettiyaabaakka haasayaasu. Uruta Naaꞌoomo siiqiyoogaanne maaddiyoogaa geliya ogiyan, wozanappe haasayiyoogan qonccissaasu. Nuussi ayyaanaaban so asa gididaageetuppe issi urawu aqo laggee hayqqiyo wode, ayyo woy iyyo nu maadoy koshshees. Aqo laggeti miyyiyan miyyiyan issippe dicciya naaꞌꞌu mittan leemisettana danddayoosona. Daro layttawu, he mittatu xaphoti dadettoosona. Issi mittaa shoddin hegee hayqqiyo wode, hara mittay keehi qohettana danddayees. Hegaadankka, aqo laggiyaappe issoy morkke gidida hayquwan shaahettiyo wode, I woy A adussa wodiyawu keehi kayyottana danddayoosona. w19.06 23 ¶12-13

Wodiyaa aattiyo wode ay doorana koshshiyaakko nuuni naagettana bessees; qassi nuuni hegan ay keena wodiyaa aattiyaakkonne doorana bessees. Nuuni yaatana xayikko, Yihoowayyo haggaaziyoogaappe aaruwan allaxxiiddi daro wodiyaa aattana danddayoos. Koyro ogee allaxxiyoogan ay keena wodiyaa aattiyaakko eriyoogaa. Hegan ay keena wodiyaa aattiyaakko issi saaminttaagaa xaafa oyqqiyoogee loꞌꞌo. Televizhiiniyaa beꞌaydda, Intterneetiyaa xomoosayddanne moobayliyan biiduwaa kaassaa kaꞌaydda neeni ay keena saatiyaa aattiyaakko xaafa oyqqa. Neeni keehi daro wodiyaa aattiyaabadan neeyyo siyettikko, prograamiyaa kessanawu mala. Keehi koshshiyaabata kasetada oottanawu halchcha; qassi hegaappe simmin allaxxanawu wodiyaa bazza. Yaatada, ne prograamiyaa kaallanaadan Yihooway maaddana mala oychcha. Yaatiyoogan Geeshsha Maxaafaa buzo xannaꞌanawu, so asaa goynuwawu, gubaaꞌe shiiqotussinne Yihoowayyo haggaazanawu koshshiya wodeenne wolqqay neeyyo deꞌana. Neeni Yihoowabaa kaseyiyoogaa gaasuwan, allaxxiyooban aattiyo wodiyan ufayttana danddayaasa. w19.10 30 ¶14, 16; 31 ¶17

Qoronttoosan deꞌiyaageeti 55 M.Ln., issibaa kuuyidosona. Eti Yerusalaamenne Yihudan deꞌiya ishantti metuwaaninne hiyyeesatettan tuggatiiddi deꞌiyoogaa, qassi hara gubaaꞌeti eta maaddanawu miishshaa shiishshiiddi deꞌiyoogaa eridi eta maaddanawu kuuyidosona. (1 Qor. 16:1; 2 Qor. 8:6) SHin amarida aginaappe guyyiyan, Qoronttoosan deꞌiyaageeti shiishshana giido miishshaa shiishshibeennaagaa PHawuloosi eriis. Hegaappe denddidaagan, eta imotay hara gubaaꞌeti immiyo miishshaara issippe koshshiya wodiyan Yerusalaame kiitettanawu waayi giigettana. (2 Qor. 9:4, 5) Qoronttoosan deꞌiyaageeti loꞌꞌobaa kuuyidosona, qassi eta ammanuwaa gishshawunne eti kehatettan immana koyido gishshawu PHawuloosi eta galatiis. SHin eti doommidoogaa wurssanaadankka eta minttettiis. (2 Qor. 8:7, 10, 11) Ammanettida Kiristtaanetikka, oottanawu eti kuuyidobaa oottiyoogee metiyaaba gidana danddayiyoogaa eta hanotay nuna tamaarissees. Aybissi? Nuuni nagaranchcha gidiyo gishshawu, kuuyidobaa oottana wodiyaa sinttawu sugana danddayoos. Woy qoppennabay merettidi nuuni oottanawu kuuyidobaa oottiyoogee nuussi metanaadan oottana danddayees.—Era. 9:11. w19.11 26-27 ¶3-5

Bollaappe dariya baggaa naagiya gonddalliyaadan, ne ammanoy ha alamiyan deꞌiya iitabaappe, hegeekka pokkobaappe, makkalabaappe, qassi Xoossay kessido maaraara maayettenna hara ubbabaappekka nena naagees. Nuuni Kiristtaaneti iita ayyaanatuura olettoos. (Efi. 6:10-12) Ne ammanoy neeni paacettiyo wodekka minokkonne waata erana danddayay? Koyruwan, Xoossay maaddanaadan woossana bessees. Yaata simmada, ne ammanoy Xoossaa sheniyaara maayiyaakkonne, Xoossaa Qaalan qorana koshshees. (Ibr. 4:12) Geeshsha Maxaafay hagaadan gees: “Ne polo wozanan GODAA ammanetta; ne akeekan zemppoppa.” (Lee. 3:5, 6) Ne deꞌuwan mata wode hanidabaanne hegaa xeelliyaagan neeni oottidobaa qoppa. Leemisuwawu, miishshay nena keehi metidee? Neeni he metuwaa xoonanawu baaxetido wode Ibraawe 13:5n, “Taani nena mulekka yeggikke woikko aggikke” giidi Yihooway qaalaa gelidobaa qoppadii? Yihooway gelido qaalay I nena maaddanaagaa neeni ammanettanaadan oottidee? Yaatikko, hegee gonddalle mala gidida ne ammanoy loꞌꞌo hanotan deꞌiyoogaa bessees. w19.11 14 ¶1, 4

Issi naꞌi aawaappekka aayeeppekka daro wodiyaanne wolqqaa koyiyoogee bessiyaaba. Hegaa gishshawu, issi azinaynne machchiyaa naata bolli bollan yelikko, eti ubba naata koshshiyaaban maaddanawu metootana danddayoosona. Cora guutta naati deꞌiyo amarida azinatinne machchoti keehi unꞌꞌettiyoogaa yootidosona. Issi aayyiyaa ubbatoo daafurana danddayawusu. Xannaꞌanawu, woossanawunne ubbatoo sabbakanawu iyyo wolqqay baynna gishshawu A keehi daafurana danddayawusu. Qassi A gubaaꞌe shiiqotun loytta kaallanawunne hegaappe goꞌettanawu metootana danddayawusu. Siiqiya azinay shiiquwankka sonkka naata xeellana bessiyo wode, ba machchiyo maaddanawu bawu danddayettidabaa oottiyoogee qoncce. Leemisuwawu, I ba machchiyo son oottiyooban maaddana danddayees. Ubbatoo goynniyo So Asaa Goynuwaa prograamiyan ubbay goꞌettanaadan I minni oottana. Qassi I ba soo asaara ubbatoo haggaazana. w19.12 24 ¶8

Israaꞌeelati Ishatamantto Layttaa Baalaappe waani goꞌettidonaa? Issi Israaꞌeela asawu acoy deꞌees gaada qoppa; qassi hegaappe denddidaagan acuwaa qanxxanawu ba gadiyaa wolqqan bayzzana koshshiis. Ishatamantto Layttaa Baalaa wode, he gadee ayyo simmees. Hegaa gishshawu, he bitanee ‘ba gadiyawu simmees;’ qassi wodeppe A naati he gadiyaa laattana. Woy he bitaniyaassi daro acoy deꞌiyo gishshawu, I he acuwaa qanxxanawu bana bayzzana woy ba naatuppe issoy aylle gidanaadan oottana danddayees. Ishatamantto Layttaa Baalaa wode, he ayllee ‘ba yarawu simmees.’ (Wog. 25:10) Hegaa gishshawu, hidooti xayin merinawu aylle gidiya asi mule baawa! Gujjidikka Yihooway hagaadan giis: “Intte giddon issi asinne hiyyeesenna. Aissi giikko, intte laattanaadan GODAI intte Xoossai inttessi aqo oottidi immiyo biittan GODAI inttena anjjana” yaagiis. (Zaa. 15:4) Hegee ha wodiyan haniiddi deꞌiyaabaappe keehi dumma! Nuuni darotoo dureti yaa duretishin, qassi hiyyeesati yaa hiyyeesishin beꞌoos. w19.12 8-9 ¶3-4

Yesuusi bana paacee gakkido wode, “keehi yeekkidinne afuxxidi” woossiis. (Ibr. 5:7) I wozanappe woossidoogee I Yihoowawu ammanettidoogaa bessiis, qassi kaseegaappe aaruwan awu azazettanawu murttanaadan oottiis. Yesuusa woosay, Yihoowayyo sawuwaa tonggu giya ixaanaa mala. Yesuusa kumetta deꞌoy A Aawaa ufayssiisinne I ubbabaa haariyo ogee suure gidiyoogaa bessiis. Yihoowawu azazettanawunne awu ammanettanawu nuuyyo danddayettida ubbabaa oottiyoogan Yesuusa leemisuwaa kaallana danddayoos. Nuuni Yihoowa ufayssanawu koyiyo gishshawu, paacee gakkiyo wode I maaddanaadan minttidi woossoos. Yihooway ixxiyobata nuuni oottikko, I nu woosaa siyennaagaa eroos. SHin Yihooway dosiyoobata oottikko, nu woosay ayyo sawuwaa tonggu giya ixaanaa mala gidanaagaa ammanettoos. Qassi nu suuretettaynne ammanettidi azazettiyoogee saluwan deꞌiya nu Aawaa ufayssiyoogaa ammanettana danddayoos.—w19.11 21-22 ¶7-8

Yesuusi 1919n ayyaanan tiyettida amarida ishantta ‘ammanettida wozannaama ashkkara’ oottidi sunttiis. He ashkkaray sabbakiyo oosuwaa minni oottiiddi deꞌees; qassi Kiristtoosa kaalliyaageetussi “qumaa koshshiyo wodiyan” immees. Seexaanaynne aara hashetiyaageeti ammanettida ashkkaraa oosuwaa teqqanawu baaxetoosona. He ashkkaraa Yihooway maaddennaakko, ha oosuwaa oottana danddayettenna. Koyronne naaꞌꞌantto alamiyaa olay, zarbbenna yedetay, kumetta alamiyan miishshaa metoy, qassi naaqoy deꞌishinkka, ammanettida wozannaama ashkkaray saꞌan deꞌiya Kiristtoosa kaalliyaageetussi ayyaanaa qumaa aggennan immees. Ha wodiyan, miishshaa qanxxennan nuuni demmiyo, 900⁠ppe dariya qaalatun deꞌiya daro xuufeta ane qoppa! Hagee Xoossay ashkkaraa maaddiiddi deꞌiyoogaa bessiya naqaasha. Sabbakiyo oosoykka Yihooway anjjiiddi deꞌiyoogaa bessiyaaba. Mishiraachchoy “sa7a ubban” sabbakettiiddi deꞌees.”—Maa. 24:14. w19.11 24 ¶15-16

Layttan layttan Nagaraa Atto Giissiyo Gallassan qesee ubbatu halaqay yarshshanaappe kase ixaanaa cuwayees. Ixaanaa koyro cuwayiyoogan, Xoossay an ufayttiyoogaa shaakki erees. Yesuusi ba deꞌuwaa yarshsho oottidi immanaappe kase, asaa atotettaappe aaruwan koshshiya issibaa, I saꞌan deꞌiyo wode oottiis. Hegee aybee? Yihooway A yarshshuwaa ekkanaadan, I saꞌan deꞌido wode ubban Yihoowawu ammanettidi azazettiis. Yesuusi yaatiyoogan, issibaa Yihoowa ogiyan oottiyoogee deꞌanawu bessiya suure oge gidiyoogaa qonccissiis. Yesuusi ba Aaway ubbabaa haariyo woy ayssiyo ogee likke gidiyoogaa qonccissiis. Yesuusi saꞌan deꞌido wode ubban, wottiyoobi baynna hanotan Yihoowawu azazettiis. Paaceenne metoy Yesuusa gakkikkokka, I ba aaway haariyo ogee ubbaappe aadhdhiyoogaa bessanawu murttiis.—Pili. 2:8. w19.11 21 ¶6-7

Yesuusi sabbakido wode ubban, I kiittido ammanettidaageeti awu tumu lagge gidiyoogaa bessidosona. (Lee. 18:24) Yesuusi hegaa mala laggeta xoqqu ootti xeelliis. I saꞌan haggaaziyo wode, A ishatuppe issoynne aani ammanibeenna. (Yoh. 7:3-5) Issi wode, A dabboti haray atto I gooyidabadan qoppidosona. (Mar. 3:21) Gidoppe attin, I hayqqanaappe kase qammi, ba kiittido ammanettidaageetussi hachchi gallassaa xiqisiyaa yootiis. Yesuusi kiittidoogeeti issi issitoo A azzanttidosona; shin I eta balaa gidennan, eti an ammaniyoogaa qoppiis. (Maa. 26:40; Mar. 10:13, 14; Yoh. 6:66-69) Yesuusi hayqqanaappe kase etaara aattido qammi, ha ammanettida asatussi, “Taani inttena ta laggeta gaas. Aissi giikko, ta Aawaappe siyido ubbabaa taani intteyyo yootaas” yaagiis. (Yoh. 15:15) Yesuusa laggeti A keehi minttettidoogawu siree baa. w19.04 11 ¶11-12

Issi uri saluwaa baanawu doorettidoogaa waati erii? Hegaa zaaroy, Xoossay “geeshsha oottanau xeesido,” Roomen deꞌiya ayyaanan tiyettida Kiristtaanetuyyo kiitettida PHawuloosi yootidoban qoncciis. I gujjidi hachchi gallassaa xiqisiyan odettidaagaadan giidi etassi yootiis: “Nuuni nu qaalaa xoqqu oottidi, ‘Abbaa! Ta Aawau’ yaagidi xeesiyo nuna Xoossaa naata kessiya Geeshsha Ayyaanaa Xoossaappe ekkidoogaappe attin, naa77anttuwaa yayyanau aille kessiya ayyaanaa ekkibookko.” (Roo. 1:7; 8:15) Hegaa gishshawu, Xoossay ba geeshsha ayyaanaa baggaara tiyettidaageeti saluwaa baanawu xeesettidoogaa etawu qonccissees. (1 Tas. 2:12) Saluwaa baanaadan Yihooway shoobbido asati eti bantta qofaaninne wozanan hegaa ammanettanaadan I oottees. (1 Yoh. 2:20, 27) Tiyettida Kiristtaaneti ayyaanan tiyettidoogaa hara asi etawu yootana koshshenna. w20.01 22 ¶7-8

‘Kiristtoosa higgiyawu’ denddoy aybippenne aadhdhiya siiquwaa. (Gal. 6:2) Yesuusi oottido ubbabaa siiqoy denttettin oottiis. Qarettiyoogee siiquwaa bessiyaaba. Hegaa mala qaretay denttettin Yesuusi daro asaa tamaarissiis, harggidaageeta pattiis, namisettidaageeta miziisinne hayqqidaageeta denttiis. (Maa. 14:14; 15:32-38; Mar. 6:34; Luq. 7:11-15) Yesuusi ba koyiyoobaappe haratuugaa ba dosan kaseyiis. Qassi, I haratu gishshawu ba shemppuwaa aattidi immiyoogan gita siiquwaa bessiis. Nuuni koyiyoobaappe haratuugaa kaseyiyoogan Yesuusa leemisuwaa kaallana danddayoos. Nu moottan deꞌiya asaayyo kaseegaappe aaruwan qarettiyoogaa tamaariyoogankka Yesuusa leemisuwaa kaallana danddayoos. Mishiraachchuwaa sabbakanaadaaninne tamaarissanaadan hegaadan nuna qaretay denttettiyo wode, Kiristtoosa higgiyaa azazettoos. w19.05 4 ¶8-10

Yesuusi haymaanootiyaa kaalettiyaageeti tamaarissiyo worddo timirttiyaappe asay laꞌa kiyanaadan maaddiis. He wode deꞌiya daro Ayhudati asa wogawunne worddo ammanuwawu aylle gididosona. (Maa. 5:31-37; 15:1-11) Ayyaanaaban kaalettoos giyaageeti bantta huuphen qooqe mala. Eti Masiyaanne I pooꞌissido ayyaanaabaa pooꞌuwaa ixxiyoogan xumaaninne nagaran deꞌidosona. (Yoh. 9:1, 14-16, 35-41) Yesuusi tumaa tamaarissidoogaaninne loꞌꞌo leemiso gididoogan, ashkke asati worddo timirttiyaappe waani laꞌa kiyana danddayiyaakko bessiis. (Mar. 1:22; 2:23–3:5) Qassi, asay laattido nagaraa aylletettaappe Yesuusi laꞌa kessiis. Yesuusa yarshshuwaa baggaara, wozuwan ammaniyaanne hegaadan deꞌiya asatu nagaraa Xoossay atto gees.—Ibr. 10:12-18. w19.12 10 ¶8; 11 ¶10-11

Tiyettida Kiristtaaneta ubbaa Yihooway dooridoogaa erissanawu I ba geeshsha ayyaanaa goꞌettees. Yaatiyoogan, waase gidida geeshsha ayyaanay eti sinttappe saꞌan gidennan saluwan merinawu deꞌanaagaa etawu qonccissees. (2 Qor. 1:21, 22) Issi Kiristtaanee tiyettikko, I saluwaa biyoogee mule attennaba giyoogee? Gidenna. I saluwaa baanawu doorettidoogaa erees. SHin, I ha zoriyaa hassayana bessees: “Ta ishatoo, inttena Xoossai xeesidoogaanne dooridoogaa minttanau, kaseegaappe aadhdhi minnite; aissi giikko, intte hegaa oottiyaabaa gidikko, xubettekketa.” (2 PHe. 1:10) Hegaa gishshawu, tiyettida issi Kiristtaanee xeesettidaba gidikkokka, I ammanettidi deꞌiyoogaa xallan he woytuwaa demmana.—Pili. 3:12-14; Ibr. 3:1; Ajj. 2:10. w20.01 21-22 ¶5-6

Worddo minttetto minttettiya heezzati Iyyoobawu qarettibeenna issi gaasoy A tumuppe aybi gakkiiddi deꞌiyaakko akeekanawu malibeennaagaa. Hegaappe denddidaagan, eti balabaa kuuyidosona; qassi A bolli meqetti baynna hanotan pirddidosona. Nuuni hegaa mala balabaa oottennaadan waati naagettana danddayiyoo? Issi uraa hanotaa wurssidi eriyaagee Yihoowa xalla gidiyoogaa akeeka. Gakkida metuwaabaa izaawu yootiyoobaa loytta ezgga. I haasayiyoobaa ezggiyoogaappe aadhdhiyaabaa ootta; ayyo siyettiyaabaa akeekanawukka baaxeta. Neeni ne ishaayyo woy ne michcheeyyo tumuppe qarettiyoogaa bessana danddayiyoy hegaadan oottiyoogaa xallaana. Qaretay nuuni harata gakkiya metuwaa xeelliyaagan zigirenna mala naagettanaadan oottees. Zigirssanchcha uri gubaaꞌee shaahettanaadan ootteesippe attin, aynne minttettenna. (Lee. 20:19; Roo. 14:19) I haasayiyoobay kase waayettiiddi deꞌiya ura qohana danddayees. (Efi. 4:31, 32) Nuuni issi ura loꞌꞌo eeshshaa akeekiyoogeenne I metuwaa genccanaadan waati maaddana danddayiyaakko qoppiyoogee keehi loꞌꞌoba! w19.06 21-22 ¶8-9