Uddufune

Yelidaageeti bantta naati Yihoowa siiqiyoogaa tamaaranaadan maaddanawu oottana danddayiyo issi issibati aybee? Maanuhee oottidoogaadan inttena Yihoowa maaddana mala woossite. Leemiso gididi tamaarissite. Intte haasayiyoobay koshshiyaaba; shin intte oottiyoobay intte naata keehi maaddana danddayees. Yooseefinne Mayraama Yesuusa gujjin, bantta naatuyyo keehi loꞌꞌo leemiso gidiyoogaa nuuni ammanettana danddayoos. Ba soo asaa koshshiyaaban maaddanawu Yooseefi minnidi oottiis. Qassi, Yooseefi ba soo asay ayyaanaabaa nashshanaadan minttettiis. (Zaa. 4:9, 10) I “laittan laittan” Paasikaa Baalaa bonchchanawu ba soo asaa Yerusalaame efiis. (Luq. 2:41, 42) Yooseefa wode deꞌida amarida aawati so asa ubbaa efiyoogee keehi wayssiyaaba, daro wodiyaa wurssiyaabanne daro miishshaa kessanaadan oottiyaaba giidi qoppennan aggokkona. SHin, Yooseefi ayyaanaabaa keehi nashshidoogeenne A naatikka nashshanaadan tamaarissidoogee qoncce. Qassi, Mayraama Geeshsha Maxaafaa loyttada erawusu. A haasayiyoobaaninne oottiyooban, ba naati Xoossaa Qaalaa siiqanaadan tamaarissidoogee erettidaba. w19.12 24-25 ¶9-12

Yihooway baayyo Addaamee azazettennan ixxin oottidobaa nuuni qoppiyo wode, I nuna siiqiyoogaa akeekoos. Addaamee saluwan deꞌiya ba Aawawu azazettennan ixxido wode, ikka A zerettaykka Yihoowa so asaa yara gididi deꞌana danddayibookkona. (Roo. 5:12) SHin, Yihooway Addaame zerettata maaddanawu issibaa oottiis. Yihooway Addaama qaxxayiis; shin A zerettata maaddanawu qaalaa geliis. Azazettiya asay simmidi A so asaa yara gidanaagaa I sohuwaara qaalaa geliis. (Doo. 3:15; Roo. 8:20, 21) Yihooway ba siiqiyo Naꞌaa Yesuusa wozuwaa yarshshuwaa baggaara hegee polettanaadan oottiis. Ba Naꞌaa nu gishshawu immiyoogan Yihooway nuna keehi siiqiyoogaa bessiis. (Yoh. 3:16) I ooppenne aadhdhiya loꞌꞌo Aawa. I nu woosaa siyees; qassi asatettaaninne ayyaanaaban nuussi koshshiyaabaa kunttees. I nuna loohisseesinne maaddees. Qassi I sinttappe nuussi daro anjjota immana. Nu Aaway nuna siiqiyoogaanne nuussi qoppiyoogaa eriyoogee nuna keehi ufayssees! w20.02 6 ¶16-17; 7 ¶20

Neeni issibawu keehi unꞌꞌetta eray? Neeni unꞌꞌettidoy harati haasayidoban woy oottidoban, qassi ne haasayidoban woy oottidoban azzanennan aggakka. Leemisuwawu, neeni mooridobaa Yihooway mule atto geenna ga qoppada hirggana danddayaasa. Neeni issibawu keehi hirggido gishshawu, neessi ammanoy paccidabadaaninne iita asa gididabadan qoppana danddayaasa. Geeshsha Maxaafan etabay odettido amaridaageetu hanotaa qoppa. Hananabaa yootiya Sameela aayee Haannissi mino ammanoy deꞌees. SHin, son issi uri O iita ogiyan oyqqido gishshawu, A keehi unꞌꞌettaasu. (1 Sam. 1:7) Kiitettida PHawuloosa ammanoy mino; shin I gubaaꞌe ‘ubbawu hirggiis.’ (2 Qor. 11:28) Kawuwaa Daawita ammanoykka mino; qassi Yihooway A keehi siiqees. (Oos. 13:22) Gidikkokka, Daawiti moorido mooroy I keehi unꞌꞌettanaadan oottiis. (Maz. 38:4) Yihooway eta ubbaa minttettiisinne woppu oottiis. w20.02 20 ¶1-2

Neeni nena Yihoowawu sheedhdhiyo wode, akko wozanappe woossaasa; qassi merinawu ayyo haggaazanawu ne deꞌuwaa goꞌettanaagaa assi yootaasa. Neeni nena Xoossawu sheedhdhiyo wode nena ‘yegga bayaasa.’ Neeni haꞌꞌi Yihoowabaa, hegee gita maata. (Roo. 14:8) He gallassaappe doommidi neeyyo aybippenne aadhdhiyaabay nena ufayssiyoogaa gidennan, Yihoowawu haggaaziyoogaa gidiyoogaa ayyo yootaasa. Nena Xoossawu sheedhdhiyoogee ayyo qaalaa geliyo gitaba. Yihooway nuuni ayyo nuna sheedhdhanaadan wolqqanttenna. SHin nuuni nuna Yihoowawu sheedhdhiyo wode, gelido qaalaa polanaadan I nuuppe koyees. (Maz. 116:12, 14) Neeni nena Yihoowawu sheedhdhiyo wode ooninne erenna. Darotoo issi woradaa woy killiliyaa shiiquwan asaa sinttan xammaqettaasa. Neeni xammaqettiyo wode, Yihoowawu nena sheedhdhidoogaa harata bessaasa. Hegaa gishshawu, xammaqettiyoogee neeni ne Xoossaa Yihoowa ne kumetta wozanaappe, ne kumetta shemppuwaappe, ne kumetta qofaappenne ne kumetta wolqqaappe siiqiyoogaanne awu merinawu haggaazanawu murttidoogaa harati eranaadan oottees.—Mar. 12:30. w20.03 9 ¶4-5

Seexaanay Yihooway oonakko asay doganaadan oottees. Yesuusi kiittidoogeeti hayqqi simmin, kaddida amaridaageeti wordduwaa tamaarissiyoogaa doommidosona. (Oos. 20:29, 30) Ha kaddidaageeti asay tumu Xoossaa oonatettaa doganaadan oottiyoogaa doommidosona. Leemisuwawu, eti bantta Geeshsha Maxaafan Xoossaa sunttaa goꞌettiyoogaa aggidi “Godaa” giyaagaa mala qaalata goꞌettoosona. Eti Xoossaa buzo sunttaa kessidi A sohuwan “Godaa” giyaagaa gelissidoogee, Geeshsha Maxaafan ‘godata’ geetettida haratuppe Yihooway aybin dummatiyaakko Geeshsha Maxaafaa nabbabiya uri akeekanawu metootanaadan oottiis. (1 Qor. 8:5) Eti Yihoowakka Yesuusakka “Godaa” giidi xeegoosona. Hegee asay Yihoowaynne Yesuusi issi mala gidennaagaa akeekanawu metootanaadan oottiis. (Yoh. 17:3) Ha kirqqi giidabay Xoossaa Qaalan baynna Sillaasiyaa timirttee aakkanaadan maaddiis. Hegaappe denddidaagan, daro asay Xoossaa erana danddayennabadan qoppees. Hegee hanttaara worddo!—Oos. 17:27. w19.06 5 ¶11

Nu haggaazuwaa loytti poliyo issi ogee sabbakiyoogan kaseegaappe aaruwan qara gidiyoogaa. (Lee. 1:5; 1 Xim. 4:13, 15) Nuuni Yihoowaara ‘issippe oottiyaageeta’ gidanaadan I eeno giidoogee gita bonchcho! (1 Qor. 3:9) Neeni “lo77obai aibakko” woy keehi koshshiyaabay aybakko shaakkada eriyo wodenne sabbakiyoogan xeelaa wottiyo wode, ‘Yihoowayyo ufayssan goynnana.’ (Pili. 1:10; Maz. 100:2) Nena gakkiya metoy woy ne abbiyaa pacay ayba gidikkonne, neeni Xoossaa ashkkara gidiyoogaadan, ne haggaazuwaa loytta haggaazanawu neeyyo koshshiya wolqqaa I immanaagaa ammanettana danddayaasa. (2 Qor. 4:1, 7; 6:4) Ne hanotay neeni daro sabbakanaadan oottin woy guuttaa sabbakanaadan oottinkka, neeni kumetta shemppuwaappe haggaaziyaaba gidikko, ‘ceeqettana’ woy ufayttana danddayaasa. (Gal. 6:4) Neeni haggaazuwaa loyttada poliyo wode, Yihoowanne hara asaa siiqiyoogaa bessaasa. “Neeni hegaa oottikko nenanne neeni giyoogaa siyiyaageeta [ashshana].”—1 Xim. 4:16. w19.04 6 ¶15; 7 ¶17

Seexaanaynne daydanttati asaa cimmanawu baaxetiyo waanna ogee iita ayyaanaa oosuwaa. Asi erana woy oottana danddayennabaa iita ayyaanaa oosuwaa oottiyaageeti eroos woy oottoos goosona. Leemisuwawu, issoti issoti xoolinttiyaa qoodiyoogan woy shareechchiyoogan sinttanaabaa erana danddayoos goosona. Harati qassi, hayqqidaageeta haasayissiyaabadan hanana danddayoosona. Issoti issoti shareechchoosona woy kaayoosona, qassi eti hara ura bolli bitaa bitana danddayoosona. Tohossa Amarkkaaninne Karibiyaane haruuruwan 18 biittatun xinaatiyawu oychchido heezzu asaappe issoy kaayuwan woy bitan ammaniyoogaanne hegaa keena asay iita ayyaanatuura haasayana danddayettees giidi ammaniyoogaa bessees. Afirkkan 18 biittatun hara xinaatiyawu asay oyshettiis. He biittatun, oychchido asaappe baggaappe dariyaagee shareechchiyoogan ammanees. Nuuni awan deꞌikkonne iita ayyaanaa oosuwaappe naagettana bessiyoogee qoncce. w19.04 20-21 ¶3-4

Xoossaa Yihooway iitatetta ubbaa ixxees. (Maz. 5:4-6) Keehi daganttiyaanne sheneyiya iita danoba gidida, mattumaara gayttidaagan naꞌa qohiyoogaa I keehi ixxees! Nuuni Yihoowa Markka gidiyo gishshawu, mattumaara gayttidaagan naꞌa qohiyoogaa Yihoowa leemisuwaa kaalliyoogan ixxoos; qassi Kiristtaane gubaaꞌiyan hegaa eriiddi coꞌꞌu gi xeellokko. (Roo. 12:9) Mattumaara gayttidaagan naꞌa ayba ogiyankka qohiyoogee ‘Kiristtoosa higgiyaa’ phalqqiyaaba! (Gal. 6:2) Yesuusi haasayiyoobaaninne oottiyooban tamaarissidobawu ubbawu denddoy siiquwaanne tumu pirddaa. Tumu Kiristtaaneti ha higgiyawu azazettiyo gishshawu, naati woppu gaanaadaaninne eta tumuppe siiqiyoogaa naati akeekanaadan oottiya ogiyan naata oyqqoosona. SHin, mattumaara gayttidaagan naꞌa qohiyoogee ba xallaa siiqiyoobanne balaba. Hegee naꞌi bana ooninne naagenna woy siiqenna giidi qoppanaadan oottees. Azzanttiyaabay; he metoy tumu Kiristtaanetakka qohiis. Aybissi? “Iita asatinne balettiyaageeti” daridosona; qassi amaridaageeti gubaaꞌiyaa gelanawu malana danddayoosona. (2 Xim. 3:13) Issi wode Yihoowawu haggaazida amaridaageeti pokkobaa amottidi oottiyo nagaraynne muttumaara gayttidaagan naata qohiyoogee hegawu hara gaaso. w19.05 8 ¶1-3

Keehi unꞌꞌettida issi uri Yihoowa woossanawu taani bessikke giidi qoppana danddayees. Nuuni hegaa mala asa minttettanawu koyikko, A sunttaa woy I sunttaa xeesidi issippe woossana danddayoos. Unꞌꞌettida ura nuuninne gubaaꞌiyan deꞌiya ishanttinne michchontti keehi siiqiyoogaa he woosan Yihoowawu odana danddayoos. Yihooway xoqqu ootti xeelliyo ba ashkkaray woppu gaanaadaaninne minettanaadan maaddana mala oychchana danddayoos. Hegaa mala woosay keehi minttettana danddayees. Haasayanaappe kasetada qoppa. Akeekennan haasayiyo haasayay qohana danddayees. Keha qaalati pattana danddayoosona. (Lee. 12:18) Yaatiyo gishshawu, keha, minttettiyaanne woppissiya qaalata goꞌettanawu maaddana mala Yihoowa woossa. Nuuni Yihoowa Qaalaa gidida Geeshsha Maxaafaappe aybippenne aaruwan maaddiya qofaa demmiyoogaa hassaya. (Ibr. 4:12) Nuuni harata minttettiyo wode, Yihooway eta siiqiyoogaa eti hassayanaadan maaddoos. Qassi Yihooway tumu pirddaa Xoossaa gidiyoogaa nuuni mule dogana bessenna. Ooninne erana xayikkonne, mattumaara gayttidaagan qohettida ubba asaabaa Yihooway erees. Yihooway ubbabaa beꞌees, qassi gita nagaraa oottidi ba nagaraappe simmenna uraa qaxxayennan aggenna.—Qoo. 14:18. w19.05 18 ¶18; 19 ¶19, 21

Seexaanay nuuni Yihoowa siiqiyoogaa agganaadan koyees. I ba halchchuwaa polanawu nu qofaa laammanawu malees, hegee nu qofaa omooddanawunne nuuni aagaadan qoppanaadan oottanawu malees giyoogaa mala. I nuuni dosiyoobaa goꞌettidi nuna ammanttanawu woy cimmanawu malees. (Qol. 2:4.) Nuuni Seexaanan cimettiyo daafa hanotan deꞌiyoo? Ee, daafa hanotan deꞌoos! PHawuloosi Qolasiyaasa 2:8n deꞌiya akeekissuwaa xaafidoy ammanennaageetussi gidennaagaa hassaya. I hegaa geeshsha ayyaanan tiyettida Kiristtaanetussi xaafiis. (Qol. 1:2, 5) He wode Kiristtaaneti daafa hanotan deꞌikko, ha wodiyan nuuni hegaappe aadhdhiya daafa hanotan deꞌoos. (1 Qor. 10:12) Aybissi? Seexaanay saluwaappe saꞌaa duge olettido gishshawu, ammanettidi Xoossawu oottiyaageeta balettanawu keehi baaxetiiddi deꞌees. (Ajj. 12:9, 12, 17) Hegaa bollikka, iita asatinne balettiyaageeti ‘kaseppe iiti iiti biyo’ wodiyan deꞌoos.—2 Xim. 3:1, 13. w19.06 2 ¶1-2

Kawiyaa Elzzaabeela A woranawu naassido wode, Eelaasi yayyiis. Yaatiyo gishshawu, I Berssaabeha giyo sohuwaa baqatiis. I keehi hidootaa qanxxidi “haiqqanau woossiis.” Awu hegaadan siyettanaadan oottidabay aybee? Eelaasi ‘nuugaadan siyettiyo’ nagaranchcha asa. (Yaaq. 5:17, NW) I keehi unꞌꞌettennaaninne daafurennan waayi aggana. Eelaasi asay Yihoowayyo goynnanaadan taani minttettidoogee hada, Israaꞌeelan laamettidabi aybinne baawa, qassi Yihoowassi haggaazaydda deꞌiyay ta xalla giidi qoppennan waayi aggana. (1 Kaw. 18:3, 4, 13; 19:10, 14) SHin Eelaasayyo siyettidabaa qassi Eelaasi baayyo siyettidabaa yootido gishshawu, Yihooway hegaa akeekiisippe attin A hanqqettibeenna. I Eelaasi minettanaadan maaddiis. (1 Kaw. 19:5-7) Guyyeppe, maalaalissiya ba wolqqaa bessiyoogan Eelaasi ba qofaa laammanaadan Yihooway kehatettan maaddiis. Israaꞌeelan Baꞌaalawu goynnibeenna 7,000 asati deꞌiyoogaa Yihooway he wode yootiis. (1 Kaw. 19:11-18) Yihooway Eelaasa siiqiyoogaa maaddiya ogiyan bessiis. w19.06 15-16 ¶5-6

Ubbatoo kaaletuwaa kaallite. Nuuni aawatettay deꞌiyo ammanettida ishantti immiyo kaaletuwaa kaallikko, metoy nuna gakkennaadan oottoos. Leemisuwawu, nu oosoy muleera teqettido biittan aassiyaageeti haggaazuwan xuufiyaa immennaadan aawatettay deꞌiyo ishantti azazidosona. SHin, hegaa heeran deꞌiya issi aqinyee he azazuwaa azazettennan ixxidi xuufiyaa immiis. Hegee ay kaalettidee? Inne hara amaridaageeti haggaazuwaa kiyennan haggaazi simmin takkennan, polisee eta qoriis. Issi uri eta kaallidi eti immido xuufeta asaappe guyye ekkidaba milatees. Ha hanotaappe nuuni ay tamaariyoo? Nuuni kaaletuwaa maayenna wodekka A kaallana koshshees. Nuuni Yihooway sunttido ishanttuura hashetiyo wode, I nuna ubbatoo anjjees.—Ibr. 13:7, 17. w19.07 12 ¶17

Nu Godaa Yesuusi hayqqanaappe kasetiya qammi, I erissiyo ashkkara gidanawu koyiya ubbaa, asay ixxanaagaa Yesuusi yootiis. (Yoh. 17:14) He wodeppe doommidi ha wodiyaa gakkanaashin, ammanettida Kiristtaaneta Yihoowayyo goynnenna asay yedettiiddi takkiis. Ha wodiyaa wurssettay mati mati biyo wode, nu morkketi nuna kaseegaappe aaruwan eqettana giidi qoppoos. (Maa. 24:9) Nuuni yedetaa genccanawu haꞌꞌi waani giigettana danddayiyoo? Nuna gakkana danddayiya ubbabaa nuuni qoppana koshshenna. Hegaa qoppikko, nuuni yashshaaninne hirggan maashana danddayoos. Nuuni nuna gakkana danddayiya iitaba ubbaa qoppikko, nuna ayba metoynne gakkanaappe kase Yihoowayyo haggaaziyoogaa agganawu qoppana danddayoos. (Lee. 12:25; 17:22) Nu “morkkee” Dabloosi wolqqaama miishsha gidida yashshaa goꞌettidi nuna qohanawu baaxetees. (1 PHe. 5:8, 9) Yaatiyo gishshawu, nuuni Yihoowaara dabbotido dabbotaa haꞌꞌi minttiyoogee keehi koshshiyaaba. w19.07 2 ¶1-3

Kiitettidaageeti Galiila deriyan shiiqido wode, keehi ufayttennan waayi aggana. Yesuusi hayquwaappe denddi simmidi, eti he sohuwan shiiqanaadan yootiis. (Maa. 28:16) Hegee I ‘ichchashu xeetaappe dariya ishatussi issitoo qonccido’ wodiyaa gidennan aggenna. (1 Qor. 15:6) Yesuusi he shiiquwawu ba erissiyo ashkkarata ayssi xeegidee? Etayyo ufayssiya oosuwaa immanaassa. I, “Intte biidi, asa ubbaa tana kaalliyaageeta oottite” yaagiis. (Maa. 28:18-20) Yesuusi yootiyoobaa siyida erissiyo ashkkarati guyyeppe koyro xeetu layttaa Kiristtaane gubaaꞌiyaa yame gididosona. Daro asay Kiristtoosi erissiyo ashkkara gidanaadan oottiyoogee he gubaaꞌiyawu imettida waanna ooso. Ha wodiyan, kumetta saꞌan tammu shaꞌan qoodettiya Kiristtaane gubaaꞌeti deꞌoosona; he gubaaꞌetu waanna oosoy koyro xeetu layttan deꞌiya gubaaꞌiyawu imettidaagaara issi mala. w19.07 14 ¶1-2

Xoossaabaa haasayanawu koyenna asay, darotoo alamiyaa hanotaa haasayanawu koyiyoogaa Norwe biittan yuuyidi xomoosiya issi ishay yootiis. I asaa saroti simmidi hagaadan gees: “Sinttappe keha wodee yaanaagaa xeelliyaagan ne qofay aybee? Nuussi kehabaa ehaanay polotikaa asatee, saynisiyaa eranchchatee woy hara uree?” Loytti ezggi simmidi, I keha wodee yaanaagaa qonccissiya xiqisiyaa nabbabees woy xiqisiyaa qofaa yootees. Geeshsha Maxaafay saꞌay merinawu deꞌanaagaanne loꞌꞌo asay an merinawu deꞌanaagaa yootiyooban issoti issoti maalaalettoosona. (Maz. 37:29) Nuuni demmiyo asaa dumma dumma ogetun haasayissana koshshees. Aybissi? Issi uri siyanawu dosiyoobaa haray ixxana danddayees. Issoti issoti Xoossaabaa woy Geeshsha Maxaafaabaa haasayanawu eeno goosona; harati qassi koyro harabaa haasayanawu eeno goosona. Hanotay ayba gidinkka, nuuni asa ubbawu sabbakanawu danddayettida ubbabaa oottana koshshees. (Roo. 1:14-16) Suurebaa siiqiyaageetu wozanan tumay diccanaadan oottiyay Yihoowa xalla.—1 Qor. 3:6, 7. w19.07 22-23 ¶10-11

Xoossay nuna keehi siiqiyoogee nuuni nu ishantta siiqanaadan denttettana. (1 Yoh. 4:20, 21) Nu ishanttanne nu michchontta siiqiyoogee metiyaaba gidenna giidi qoppana danddayoos. Ayssi giikko, nuuni Yihoowawu goynnoosinne A milatanawu baaxetoos. Nuna keehi siiqidi ba deꞌuwaa nu gishshawu immida, Yesuusa leemisuwaa nuuni kaalloos. SHin issoy issuwaa siiqanaadan immettida azazuwaa azazettiyoogee issi issitoo metana danddayees. Ewodanne Sinxxiika kiitettida PHawuloosaara minnidi ‘issippe oottida’ michchontta. SHin eti maayettibeennabay deꞌennan aggenna; yaatin eta laggetettay duuxxiis. He michchontti haggaazido gubaaꞌiyawu PHawuloosi xaafido dabddaabbiyan, I Ewodinne Sinxxiiki sunttaa denttidi, eti “naa77aikka issi qofan” deꞌanaadan zoriis. (Pili. 4:2, 3) PHawuloosi gubaaꞌiyan deꞌiya ubbay “zuuzummennan woikko [“palamettennan,” NW] ubbabaa” oottana mala etawu odana bessiyoogaakka qoppiis.—Pili. 2:14,15. w19.08 9 ¶6-7

Daro gubaaꞌeti, qassi daro ishanttinne michchontti ubba wode haggaaziyaageeti aggennan haggaazanaadan maaddiyoogee ufayssiyaaba. Bantta oosuwaa aggennan oottanaadan eta minttettiyoogan, etassi asatettaaban koshshiyaabaa immiyoogan woy eti banttappe haakkidi deꞌiya bantta soo asawu koshshiyaabaa kunttanaadan eta maaddiyoogan hegaadan oottoosona. Ubba wode haggaaziyaageeti intte gubaaꞌiyaa kiitettikko, etayyo aawatettay laamettidoogee eti iitabaa woy moorobaa oottidoogaana giidi qoppoppite. Etayyo hanotay metenna mala eta maaddite. Sahuwaa gaasuwan eti darobaa oottana xayikkonne, eta pashkki giidi mokki ekkite; qassi eti kase oottidobawu eta galatite. Etaara loytti erettite. Eta eraappe, loohissuwaappenne eta deꞌuwan hanidabaappe tamaarite. Ooratta maatay imettidoogeeti keettaa, issisaa baanawu koshshiyaabaa, oosuwaanne hara koshshiyaabata demmanawu koyro intte maadoy koshshana danddayees. w19.08 23-24 ¶12-13

Googi ba ‘asa wolqqan,’ hegeekka ba olanchchatun ammanettees. (2 Odi. 32:8) Nuuni nu Xoossan Yihoowan ammanettana; hegee kawotettatussi eeyyatetta milatiyaaba. Ayssi giikko, Gita Baabiloona wolqqaama gidikkonne, ‘doꞌaappenne’ A ‘tammu kacetuppe’ I xoossati O ashshibookkona! (Ajj. 17:16) Hegaa gishshawu, he kawotettati metootennan nuna xayssana giidi qoppana. “Biittaa kammiya shaaraadan,” eti Yihoowa asaa bolli denddana. SHin he kawotettati baqatana danddayennaagaa he wode akeekana. Paarooni Zoꞌo Abban eridoogaadan, Googi Yihoowaara olettiiddi deꞌiyoogaa erana. (Kes. 14:1-4; Hiz. 38:3, 4, 18, 21-23) Kiristtoosinne saluwan deꞌiya A olanchchati, kawotettatanne eta olanchchata muleera xayssana. (Ajj. 19:11, 14, 15) SHin, kawotettatussi worddotidi eti Armmageedoona olan Xoossaa asaa bolli denddanaadan oottida, Yihoowa gita morkkee Seexaanay waananee? Yesuusi anne A daydanttata eti shaꞌu layttawu aynne oottennaadan ciimma ollan duge yeggidi qulppana.—Ajj. 20:1-3. w19.09 11-12 ¶14-15

Nuuni Yihooway qaalaa gelido loꞌꞌobata demmanawu hidootiyoogee wottin deꞌiyaaba. SHin, nuuni naagidobay sohuwaara polettana xayikko, minnidi haggaaziyoogaa aggana danddayoos. Ubba qassi hidootaa qanxxana danddayoos. (Lee. 13:12) Amarida ishantti 1914 heeran hegaadan hanidosona. He wode, tiyettida daro Kiristtaaneti 1914n saluwaa baana giidi naagidosona. Eti naagidobay polettennan attido wode, ammanettidaageeti waanidonaa? Eti saluwaa biyoogan giddennan, ammanettidi Yihoowawu haggaaziyoogan xeelaa wottidosona. Eti wottaa genccidi woxxanawu murttidosona. Yihoowa sunttaa mooriyaabay xayin, A haaroy suure gidiyoogee qonccin, qassi I gelido qaalay ubbay polettin neeni beꞌanawu laamotiyoogee qoncce. Yihooway ba keerido wodiyan hegeeta polanaagaa neeni ammanettana danddayaasa. Hegaa gakkanaashin, nu naagidobay polettennan aggin hidootaa qanxxiyoogaappe, ubbatoo Xoossawu haggaaziyoogan oosoy daridoogeeta gidoos. w19.08 4-5 ¶9-10

Nena hagaadan oychcha: ‘Taani ashkke gidiyoogaadaaninne tana ziqqi oottiyaagaa gidiyoogaadan harati tana xeelliyoonaa? Taani haratuyyo haggaazanawu laafa ooso oottanawu eeno giyaanaa? Taani haratussi kehiyaanaa?’ Yesuusi banaara oottiyaageeti ufayttidi oottanaadan hanotaa injjeyiis; qassi harata loohissiyoogan I ufayttees. (Luq. 10:1, 19-21) I ba erissiyo ashkkarati oyshaa oychchanaadan minttettiis; qassi I eta qofaa siyanawu koyiis. (Maa. 16:13-16) Iita carkkuwaa hanotaappe naagiyo ataakilttiyaadan, erissiyo ashkkarati diccidosona. Eti Yesuusi tamaarissidobaa loytti siyidosona; qassi loꞌꞌo oosuwaa oottiyoogan ayfidosona. Neeyyo aawatettaa maati deꞌii? Deꞌikko, nena hagaadan oychcha: ‘Taani ooso sohuwan woy son harata waata oyqqiyaanaa? Taani sarotettay deꞌanaadan oottiyaanaa? Harati oyshaa oychchanaadan taani minttettiyaanaa? Eta qofaa siyanawu taani eeno giyaanaa?’ Banttana oychchiyaageetu bolli hanqqettiyaanne banttaagaappe dumma qofaa yootiyaageetu bolli yedetaa gattiya Parisaawetu mala gidanawu nuuni mule koyokko.—Mar. 3:1-6; Yoh. 9:29-34. w19.09 20 ¶1; 23 ¶9-11

Kawotettati kaseegaappe loꞌꞌo hanotan issoy issuwaara gayttiyoogaabaa alamiyaa haariyaageeti haasayiyo wode issi issitoo hegaa mala qofan qonccissoosona. SHin, Geeshsha Maxaafay qonccissiyo, “ubbabai saro; aibikka hanenna” giyo awaajjoy hegaappe dummatana. Aybissi? Hegee haniyo wode, asay alamiyaa haariyaageeti alamee woppu giidi deꞌiyo soho gidanaadan oottidosona giidi qoppana danddayees. Gidoppe attin, he wode “iita waayee” doommin, ‘bashshay qoppennan’ gakkana. (Maa. 24:21) Haariyaageeti he erissuwaa odanaadan gaaso gidanabay aybakko woy he awaajjoy ayba ogiyan awaajjettanaakko nuuni erokko. Qassi hegee issitoo awaajjettanaakko woy kaalli kaallidi odettanaakko nuuni erokko. Haniyaabay ayba gidikkonne, nuuni hagaa eroos: Alamiyaa haariyaageeti alamiyawu sarotettaa ehaana danddayenna gishshawu, eta awaajjuwan nuuni cimettana koshshenna. SHin hegee ‘Yihoowa gallassay’ doommana haniyoogawu malaata!—1 Tas. 5:2. w19.10 8-9 ¶3-4

Armmageedoona olay ha wurssetta gallassawu kuushsha gidana. SHin nuuni aynne yayyana koshshenna. Aybissi? Hegee Xoossay olettiyo olaa gidiyo gishshataassa. (Lee. 1:33; Hiz. 38:18-20; Zak. 14:3) Yihooway azaziyo wode, Yesuus Kiristtoosi Xoossaa wotaaddarata olawu kaalettana. Hayquwaappe denddida tiyettidaageetinne daro shaꞌu kiitanchchati Yesuusaara issippe gidana. Eti Seexaanaara, daydanttatuuranne saꞌan deꞌiya eta wotaaddaratuura olettana. (Ajj. 6:2; 17:14) Yihooway, “Nena qohanau oottido ai miishshinne nena qohidi kantti kiyenna” yaagidi qaalaa geliis. (Isi. 54:17) Ammanettidi Yihoowayyo goynniya ‘zaway baynna daro asay,’ ‘gita waayiyaa’ paxa kanttana. Yaatidi eti aggennan Yihoowawu haggaazana. (Ajj. 7:9, 13-17) Sinttappe nuuni attanaagaa ammanettanaadan oottiya daro naqaashaa Geeshsha Maxaafay yootees. Yihooway ‘ammanettiyaageeta naagiyoogaa’ nuuni eroos. (Maz. 31:23) Yihoowa siiqiyaanne A sabbiya ubbay A geeshsha sunttay bonchchettin beꞌidi ufayttana.—Hiz. 38:23. w19.10 18-19 ¶17-18

‘Wurssetta gallassay’ wuranawu mati mati biyo wode nuna wolqqaama metoti gakkana danddayoosona. (2 Xim. 3:1) Leemisuwawu, Arggo Afirkkan issi biittan kawoy dooretti simmin, daro asay olettiyoogaa doommiis. Nu ishanttunne michchonttu yuushuwan ubbasan asay olettiyo gishshawu, eti usuppun aginaappe dariya wodiyawu issisaappe harasaa bana danddayibookkona. Eti he metuwaa gencci aattanaadan eta aybi maaddidee? Amaridaageeti olay baynna heeran ishanttu son takkidosona. Issi ishay hagaadan giis: “Hegaa mala hanotan, taani laggetuura deꞌiyo gishshawu ufayttaas. Nuuni issoy issuwaa minttettana danddayida.” Nuna siiqiya loꞌꞌo laggeti ‘gita waayee’ doommiyo wode nunaara deꞌikko nuuni ufayttana. (Ajj. 7:14) Yaatiyo gishshawu, ha wodiyan dabbotaa minttiyoogee keehi koshshiyaaba. (1 PHe. 4:7, 8) Aybissi? Nu morkketi wordduwan nuna issuwaa issuwaappe shaakkanawu baaxetiyo gishshataassa. Eti nuuni nu ishantta ammanettiyoogaanne maaddiyoogaa agganaadan oottanawu baaxetana. SHin nu morkketussi injjetenna. Eti nuuni nu ishantta siiqiyoogaa agganaadan oottana danddayokkona. w19.11 2 ¶1-2; 7 ¶19

‘Wordduwaa aawa’ gidida Seexaanay Yihoowabaa qassi nu ishanttubaanne michchenttubaa wordduwaa aassanawu ba haariyo asata goꞌettees. (Yoh. 8:44) Leemisuwawu, kaddidaageeti websaytetun, televizhiiniyaaninne hara ogetun Yihoowa dirijjitiyaabaa worddobaanne tumaa geellayidi yootoosona. Hageeti Seexaanay ‘dafidi yeddiyo wonddafiyaa tamatuppe’ amaridaageeta. Hegaa mala wordduwaa issi uri nunaara haasayiyoogaa doommikko, nuuni waatana koshshii? Siyana koshshenna! Aybissi? Nuuni Yihoowa ammaniyoonne nu ishantta ammanettiyo gishshataassa. Nuuni kaddidaageetuura mule haasayokko. Nuuni eti yootiyoobaa coo eranawu koyidi gidikkokka, hegee nu ammanuwaa shugissiyo gishshawu, etaara aybanne woy ayba gaasuwankka mule haasayokko. Kaddidaageeti aassiyo wordduwaa siyennaaninne etaara palamettennan ixxadii? Hegee galatissiyaabaa. SHin, Seexaanay nuna qohanawu maliyo hara olaa miishshati deꞌiyo gishshawu nuuni beegottana koshshees. w19.11 15 ¶8; 16 ¶11

Neeni issibaa kuuyiyo wode, hegaa kuuyanawu nena denttettiyaabaa akeeka. Nuuni oottiyoobaa aybissi nu oottiyaakko Yihoowa qofissees. Nuuni ubbaban tumanchcha gidanaadan I koyees. Hegaa gishshawu, nuuni kuuyiyo wode issibaa kuuyanaadan nuna denttettiya gaasuwaa xeelliyaagan nuunikka nuussi gidin haratussi gidin tumanchcha gidanawu koyoos. Nuuni tumanchcha gidana xayikko, nu oottana giidobaa oottiyoogee nuussi metiyaaba gidana danddayees. Leemisuwawu, issi yelaga ishay ubba wode aqinye gidanawu kuuyana danddayees. SHin amarida wodiyaappe guyyiyan, haggaazuwan aqinyetuppe koyettiya saatiyaa kunttiyoogee A metiis. I haggaazuwan ufayttiyoogaa aggana danddayees. I aqinye gidanaadan A denttettida waannabay Yihoowa ufayssanawu koyiyoogaa giidi qoppana danddayees. SHin I aqinye gididi haggaaziyo waanna gaasoy bana yelidaageeta woy hara ura ufayssanawu koyiyoogaa gidennan aggenna. Sijaaraa uyiyoogaa agganawu kuuyida issi xinaatiyaabaa qoppa. I metootikkonne, issi woy naaꞌꞌu saaminttawu sijaaraa uyibeennaba. SHin simmidi haranttuwaa sijaaraa uyees. Gidikkonne, I wurssettan he amaliyaa xooniis! I Yihoowa siiqiyoogeenne A ufayssanawu koyiyoogee he amaliyaa xoonanaadan maaddiis.—Qol. 1:10; 3:23. w19.11 27 ¶9; 29 ¶10

PHawuloosi wottaa wurssanaagaanne halchchidosaa gakkanaagaa ammanettiis. I tiyettida Kiristtaane gidiyo gishshawu, “Xoossai bolla de7uwau xeesiyo woituwaa ekkanau” hidootiis. SHin, he halchchuwaa polanawu ubbatoo ‘horddofana’ woy baaxetana koshshiyoogaa I akeekiis. (Pili. 3:14) Piliphphisiyuusa Kiristtaaneti ubbatoo bantta halchchuwaa qoppanaadan maaddanawu PHawuloosi loꞌꞌo leemisuwaa goꞌettiis. PHawuloosi Piliphphisiyuusa Kiristtaaneti wurssettan saluwan deꞌanaagaa eta hassayissiis. (Pili. 3:20) Eti hegaa hassayana bessiyoy aybissee? He wode, Rooma biittaa asa gidiyoogee daro goꞌꞌaa demissiyo gishshawu, asay he biittaa asa gidanawu keehi koyees. SHin, tiyettida Kiristtaaneti keehi aadhdhiya kawotettaa biittaa asa, hegee etawu daro goꞌꞌaa demissana. Saluwaa kawotettaa asa gidiyoogaara geeddarssiyo wode, Rooma biittaa asa gidiyoogee keehi laafaba! Saluwan merinaa deꞌuwaa demmanawu baaxetiyoogan tiyettida Kiristtaaneti ha wodiyan nuuyyo loꞌꞌo leemiso. w19.08 6 ¶14-15

He laꞌatettay Israaꞌeelati Ishatamantto Layttaa Baalaa wode demmiyo laꞌatettaappe keehi aadhdhees! (Wog. 25:8-12) Leemisuwawu, issi uri Ishatamantto Layttaa Baalaa wode aylletettaappe kiyi simmidi zaarettidi aylle gidananne wurssettan hayqqana danddayees. PHenxxaqosxxe gallassi 33 M.Ln, kiitettidaageetanne hara ammanettida attuma asatanne macca asata Yihooway geeshsha ayyaanan tiyiis. Eti sinttappe hayquwaappe denddidi saluwan Yesuusaara haaranaadan I eta ba naatudan ootti ekkiis. (Roo. 8:2, 15-17) Hageeti Yesuusi Naazireete kataman deꞌiya Ayhuda woosa keettan awaajjido laꞌatettaappe goꞌettida koyroogeeta. (Luq. 4:16-19, 21) He attuma asatinne macca asati Ayhuda haymaanootiyaa kaalettiya asati tamaarissiyo worddo timirttiyawunne Geeshsha Maxaafan baynna eta wogawu hegaappe simmin aylle gidibookkona. Qassi eti hayquwaa kaalettiya nagaraappe laꞌa kiyidabadan Xoossay xeelliis. Leemiso ishatamantto layttay Kiristtoosa kaalliyaageeti 33 M.Ln. tiyettidoogan doommettidaagee Kiristtoosa SHaꞌu Layttaa Haaruwaa wurssettan polettana. w19.12 11 ¶11-12

Yelidaageetoo intte naati loꞌꞌo laggeta dooranaadan maaddite. Bantta naati oonaara laggetiyaakko, qassi eti ay oottiyaakko aayyiyaakka aawaykka erana koshshees. Hegaa giyoogee yelidaageeti bantta naati sooshal miidiyaaninne moobayliyan oonaara haasayiyaakko erana koshshees giyoogaa. Naati qoppiyoobaaninne oottiyooban he laggeta kaallana danddayoosona. Daro aawatinne aayeti bantta naati Xoossaassi haggaaziyoogan loꞌꞌo leemiso gidiyaageetuura wodiyaa aattanaadan maaddanawu baaxetoosona. Leemisuwawu, Kot divuwaare giyo biittan deꞌiya Nidananne Bomeno giyo aqo laggeti woradaa xomoosiya ishay bantta son takkanaadan darotoo shoobbidosona. Nidanee hagaadan giis: “Hegee nu naꞌaa keehi maaddiis. I aqinye gidiis; qassi haꞌꞌi woradaa xomoosiya ishaa gishshaa xomoosees.” Yelidaageeti bantta naata loohissiyoogaa naatettan doommiyoogee keehi loꞌꞌo. (Lee. 22:6) Guyyeppe misoonaawe gididi Kiitettida PHawuloosaara oottida Ximootiyoosabaa qoppite. Ximootiyoosa aayyiyaa, Euniiqanne A aayee aayyiyaa Loyda A ‘guutta naatettaasappe doommidi’ loohissidosona.—2 Xim. 1:5; 3:15. w19.12 25 ¶14; 26 ¶16-17

Ammanettiya lagge gida. Leemisuwawu, meto wodiyan nu ishanttanne michchontta maaddanawu yootiyoogaa xalla gidennan, koshshiyaaban nuuni eta maaddana bessees. (Maa. 5:37; Luq. 16:10) Maadoy koshshiyoogeeti nuuni eta maaddanaagaa eroosona; qassi eti hegan keehi minettoosona. Minettiyo gaasuwaa issi michchiyaa yootaasu. A hagaadan gaasu: “Maaddanawu qaalaa gelida uri hegaa koshshiya wodiyan oottanaagaa eriyo gishshawu neeni hirggakka.” Metuwaa woy azzanttiyaabaa gencciyaageeti ammanttiya laggiyaappe darotoo minttettuwaa koyoosona. Ammanttiya lagge gidanawu nuuni danddayanchcha gidana koshshees. ZHaano I azinay aggidi biido wode, mata laggetussi bawu siyettiyaabaa yootada minettaasu. A, “Taani issibaa zaara zaarada yootennan waayi aggana, shin eti danddayan ezggidosona” yaagaasu. Loytti ezggiyaagaa gidiyoogan neenikka loꞌꞌo lagge gidiyoogaa bessana danddayaasa. w20.01 10-11 ¶9-11

Geeshsha Maxaafay, ammanettida daro asati geeshsha ayyaanaa ekkidoogaa yootees; shin saluwan deꞌiyo hidootay etayyo baawa. Daawita geeshsha ayyaanay kaalettiis. (1 Sam. 16:13) Geeshsha ayyaanay, I Yihoowabaa ciimma qofaa akeekanaadaaninne Geeshsha Maxaafan deꞌiya amarida qofaa xaafanaadankka maaddiis. (Mar. 12:36) Gidikkokka, Daawiti ‘saluwaa kiyibeennaagaa’ kiitettida PHeexiroosi yootiis. (Oos. 2:34, 35) Xammaqiya Yohaannisi ‘geeshsha ayyaanan kumiis.’ (Luq. 1:13-16) Yesuusi Yohaannisappe aadhdhiya ooninne deꞌibeennaagaa yootiis; shin saluwaa Kawotettaa laattiyaageetu giddon I baynnaagaa odiis. (Maa. 11:10, 11) Ha asati maalaalissiyaabaa oottanaadan Yihooway ba geeshsha ayyaanaa goꞌettiis, shin I saluwaa deꞌuwawu eta dooranawu he ayyaanaa goꞌettibeenna. Hegaa giyoogee etawu ammanoy paca giyoogee? Gidenna. Hegee eti Gannate gidida saꞌan deꞌana mala Yihooway eta hayquwaappe denttana giyoogaa.—Yoh. 5:28, 29; Oos. 24:15. w20.01 25 ¶15

Yihooway awu goynniya keettaa asaa yara gidanaadan nuna shoobbiis. Hegee keehi maalaalissiya shoobe! He keettaa asaa yarati banttana Xoossawu sheedhdhidosona; qassi Yihoowa naꞌaa wozuwaa yarshshuwan ammanidosona. Nuuni ufayttiya so asa. Ha wodiyan nuuni ufayssiya deꞌuwaa deꞌoos; qassi saluwan gidin woy Gannate gidida saꞌan merinawu deꞌanawu hidootan naagiyo gishshawu, nuuni ufayttoos. Yihooway nuna siiqido gishshawu, keehi qohettidi A keettaa asaa yara gidanaadan nuuyyo hanotaa injjeyiis. (Yoh. 3:16) Nuuni ‘waagan shamettida.’ (1 Qor. 6:20) Yihooway wozuwaa baggaara nuuni aara dabbotanaadan oottiis. Saluwaaninne saꞌan ooppenne Aadhdhiyaagaa nuuni nu Aawaa giidi xeesoos. Yihooway ooppenne aadhdhiya loꞌꞌo Aawa. Geeshsha Maxaafaa xaafidaageetuppe issuwaagaadan, “I taassi kehido kehatettaa gishshaa taani GODAASSI ai qanxxanau danddayiyaanaa?” giidi oychchana danddayoos. (Maz. 116:12) Saluwan deꞌiya nu Aawawu nuuni aynne qanxxana danddayennaagee he oyshaa zaaro. SHin I nuna siiqido gishshawu nuunikka A siiqoos. w20.02 8 ¶1-3