Tamme

Hananabaa yootiya Saameela aayyiyo Haanno amarida deexo metoti gakkidosona. Daro layttawu A naꞌa yelana danddayabeykku. (1 Sam. 1:2) Daro Israaꞌeelati, issi maccaasiyaa naꞌa yelana xayikko, Xoossay O anjjibeenna giidi qoppoosona. Hegaa gishshawu, Haanna keehi yeellataasu. (Doo. 30:1, 2) Haanni azinay I dawuttiyo Piniino ekkidi ippe naata yelidoogee Haanniyyo hanotay yaa iitanaadan oottiis. Haanna bana gakkida metuwan keehi azzanaasu. A “yeekkana gakkanaassinne qumaa meettaa ixxana gakkanaassi” keehi yiillotaasu. Haanna ba wozanan ‘keehi mishettaasu.’ (1 Sam. 1:7, 10) Haanna waanada minettadee? Haanna bawu siyettiya ubbabaa Yihoowassi woosan yootaasu. A woossa simmada, ba hanotaa Qeese Ubbatu Halaqaa Eelayyo yootaasu. Yaatin I Haanno, “Sarotettan ba; neeni a woossidobaa Israa7eela Xoossai neeyyo immo” yaagiis. Hegaappe simmin hanidabay aybee? Haanna “ba ogiyaa baada, qumaa maasu; hegaappe simmin mulekka azzanabeikku.” (1 Sam. 1:17, 18) Woosay Haanna woppu gaanaadan maaddiis. w20.02 21 ¶4-5

Yihooway matan ha alamiyaa xayssana. Merinaa deꞌuwaassi “suure wozanaa koshshay deꞌiyo” asatu xallay attana. (Oos. 13:48, NW) Yaatiyo gishshawu, nu dabboti nunaara Yihoowawu haggaazanaadan nuuni markkattiyoogee bessiyaaba. Nuna siiqiya Aaway Yihooway, “ooninne ba nagaraappe simmanaadan koyeesippe attin, ooninne xayana mala koyenna.” (2 PHe. 3:9) Atotettaabaa suure ogiyaaninne suure gidenna ogiyan yootana danddayiyoogaa nuuni qoppana koshshees. Leemisuwawu, nuuni erenna asatussi ashkketettan markkattana danddayikkonne, nu dabbotussi hegaadan waayi oottana. Nuuppe daroti tumaa siyido wode, nu dabbotussi markkattido hanotaa hassayikko, hegaappe kehiya ogiyan yootidaba gidiyaakko ixxokko. Nu dabbotussi markkattiyo wode Kiitettida PHawuloosi hachchi gallassaa xiqisiyan yootido zoriyaa hassayiyoogee keehi koshshees. Yaatana xayikko, eti siyanaadan oottiyoogaappe, eta hanqqetissana danddayoos. w19.08 14-15 ¶3-5

Neeni Yesuusabaa kaallidi deꞌiya tumaa tamaarido wode neeyyo aybi siyettidee? Yesuusi Yihoowappe kaallidi saluwaaninne saꞌan ubbaappe xoqqiyaagaa. I nuna woziis. I nu gishshawu ba deꞌuwaa immiis. Wozuwan ammaniyoogaa nuuni oosuwan bessiyo wode nu nagaray atto geetettees, Xoossaara dabbotay nuussi minnees, qassi merinaa deꞌuwaa demmoos. (Yoh. 3:16) Yesuusi Qeese Ubbatu Halaqa. Wozuwaappe goꞌettanaadaaninne Xoossaara dabbotidi deꞌanaadan nuna maaddanawu I koyees. (Ibr. 4:15; 7:24, 25) Yesuusi Xoossaa Kawotettaa Kawo gidiyo gishshawu, Yihooway A baggaara ba sunttaa geeshshana, iitatettaa xayssananne Gannatiyan merinawu anjjuwaa ehaana. (Maa. 6:9, 10; Ajj. 11:15) Yesuusi nuuyyo leemiso. Xoossaa sheniyaa polanawu minni oottiyoogan I nuuyyo leemiso gidiis. (Yoh. 4:34) Yesuusabaa Geeshsha Maxaafay tamaarissiyoobaa neeni ammaniyo wode, Xoossaa alꞌꞌo Naꞌaa siiqaasa. Yesuusi oottidoogaadan, he siiqoy neeni ne deꞌuwan Xoossaa sheniyaa polanaadan denttettees. w20.03 10 ¶12-13

Yesuusi saꞌan deꞌido wurssetta gallassan darotoo woossiis. Yesuusi I erissiyo ashkkarati A hayquwaa waati bonchchanakko bessido wode, I oyttaanne woyniyaa xeelliyaagan woossiis. (1 Qor. 11:23-25) Eti Paasikaa Baalaa bonchchido sohuwaappe beennan deꞌishin, I ba erissiyo ashkkaratuura woossiis. (Yoh. 17:1-26) Yesuusinne I erissiyo ashkkarati he galla qammi Dabira Zayte giyo deriyaa gakkido wode, I zaari zaaridi woossiis. (Maa. 26:36-39, 42, 44) I hayqqana haniiddi wurssettan haasayido qaalaykka woosa. (Luq. 23:46) Yesuusi ba deꞌuwan he wurssetta gallassi hanida ubbabaa xeelliyaagan Yihoowakko woossiis. Yesuusi bana gakkida metuwaa gencci aattanaadan maaddida issibay, I ba Aawaakko darotoo woossidoogaa. Hara baggaara qassi, he galla qammi Yesuusi kiittidoogeeti woosan genccibookkona. Hegaappe denddidaagan, eta waayee gakkido wode eta xalatettay shuggiis. (Maa. 26:40, 41, 43, 45, 56) Nuna paacee gakkiyo wode, nuuni ammanettidi deꞌana danddayiyoy Yesuusa leemisuwaa kaalliyoogaanne ‘aggennan woossiyoogaa’ xallaana. w19.04 9 ¶4-5

Yihooway iita ayyaanaa oosuwaa ixxiyoogaa Israaꞌeelatussi yootiis: “Ba attuma na7a woikko macca na7a yarshshossi giidi, taman xuuggiya ai asinne intte giddon beettoppo. Bitiyaabi, maracce xeelliyaabi, murunniyaabinne qaadaa odiyaabi qassi intte giddon de7oppo. Daggamiyaagee, ayyaanata xeegiyaagee, shareechchiyaageenne haiqqida asaa ayyaanaa xeegiyaagee intte giddon de7oppo. Hegaa malabaa oottiya ai asinne GODAA matan ixettida asa.” (Zaa. 18:10-12) Kiristtaaneti Yihooway Israaꞌeelatuyyo immido Higgiyaa garssan deꞌokkona. Gidoppe attin, iita ayyaanaa oosuwaa xeelliyaagan Yihoowa xeelay laamettibeennaagaa nuuni eroos. Seexaanay asaa qohanawu iita ayyaanaa oosuwaa goꞌettiyoogaa Yihooway eriyo gishshawu, I nuuni hegaappe naagettanaadan yootees. Hayqqidaageeti harasan paxa deꞌoosona giyo wordduwaa mala worddota aassanawu Seexaanay iita ayyaanaa oosuwaa goꞌettees. (Era. 9:5) Asay yayyanaadan oottanawunne eta Yihoowappe haassanawukka Seexaanay iita ayyaanaa oosuwaa goꞌettees. I iita ayyaanaa oosuwaa oottiya asay Yihoowan ammanettiyoogaappe iita ayyaanatun ammanettanaadan oottanawu halchchiis. w19.04 21 ¶5-6

Mattumaara gayttidaagan naꞌa qohiyoogee gita nagara. Mattumaara gayttidaagan naꞌa qohiya uri keehi wolqqaama ogiyan eta qohees. Naꞌi A ammanikkonne, I naꞌi woppu geennaadan oottiyoogaaninne gakkana koshshennabay naꞌa bolli gakkanaadan wolqqanttiyoogan eriiddi A qohees. Hegaa mala iita oosuwaappe nuuni naata naagana bessees; qassi qohettida naata minttettananne maaddana koshshees. (1 Tas. 5:14) Mattumaara gayttidaagan naꞌa qohiya uri gubaaꞌee borettanaadan oottees. (Maa. 5:16; 1 PHe. 2:12) Nagaraa oottidi hegaappe simmenna uranne gubaaꞌiyaa sunttay borettanaadan oottiya ura nuuni coꞌꞌu gi xeellokko. Gubaaꞌiyan issi uri higgiyaa kanttikko, leemisuwawu, mattumaara gayttidaagan naꞌa qohikko, I kawotettaa sunttata naaqqiyoobaa oottees. (Oos. 25:8⁠ra gatta xeella.) Cimati kawotettaa higgiyaa polissiyaageeta gidana xayikkonne, mattumaara gayttidaagan naꞌa qohida uri qixaatiyaappe attanaadan teqqokkona. w19.05 9 ¶4-7

Yihooway nu Gita Asttamaariyaa gidiyo gishshawu nuna gakkiya ay metuwaaninne genccana danddayoos. (Isi. 30:20, 21) A Qaalay nuuni ‘kumettanne loꞌꞌo ooso ubbawu giigidaageeta’ gidana mala nuussi koshshiya ubbabaa tamaarissees. (2 Xim. 3:16,17) Nuuni Geeshsha Maxaafay tamaarissiyoogaadan deꞌiyo wode, ‘ha saꞌaa aadhdhida eratettan’ deꞌana bessees giya asatuppe aaruwan aadhdhida eranchcha gidana. (Maz. 119:97-100) Azzanttiyaabay ha saꞌaa aadhdhida eratettay nuuni darotoo nu xallaa siiqanaadan oottees. Hegaa gishshawu, nuuni ha saꞌaa bagga gidida asatuugaadan qoppennaadaaninne oottennaadan eqettanawu metootana danddayoos. Geeshsha Maxaafay, “Asappe yiida eratettan, qassi mela cimuwan inttena ooninne omooddenna mala naagettite” yaagiyoogee bessiyaaba. (Qol. 2:8) Wurssettaa gallassabaa Geeshsha Maxaafay kasetidi yootidoogaadan, asati “ufaittiyoobaa dosiyaageeta” gidana. (2 Xim. 3:4.) Mattumaa gaytettan asappe asa oyqqiya EEDISE mala harggee keehi daridoogee ha saꞌaa aadhdhida eratettay eeyyatetta gidiyoogaa bessiyaabaappe issuwaa.—2 PHe. 2:19. w19.05 21 ¶1-2; 22 ¶4-5

Seexaanay Israaꞌeelati duretanawu eeqawu goynniya bantta yuushuwan deꞌiya asaa meeziyaa kaallanawu qoppanaadan oottiyoogan eta cimmiis. Eta yuushuwan deꞌiya asati eti bantta haymaanootiyaa meezetuppe amaridaagaa kaallana xayikko, bantta xoossati iray bukkanaadan oottokkona giidi ammanoosona. Yihoowan ammanennaageeti iray bukkennan daro wodiyaa takkiyoogaa teqqiyo issi ogee hegaa giidi ammanidosona; yaatiyo gishshawu worddo xoossaa Baꞌaala bonchchanawu eti eeqaa goynuwaa meezeta kaallidosona. Seexaanay Israaꞌeelati Pokkobaa amottanaadan oottiis. Eeqawu goynniya asati pokkobaa oottiyoogan bantta xoossatussi goynnoosona. Ha pokko goynuwaa giddon maccaageetinne attumaageeti beeta maqidasiyan shaaramuxiyoogee deꞌees. Attumay attumaara maccay maccaara mattumaa gayttiyoogaanne hara pokkobaa paqqadiyoogaa xalla gidennan, eti hegaa ufayssiyaabadan xeelloosona. (Zaa. 23:17, 18; 1 Kaw. 14:24) Bantta xoossati biittaa araddissanaadan he meezeti oottoosona giidi eeqawu goynniyaageeti ammanoosona. Allagati oottiyo pokkobaara gayttida meezetun daro Israaꞌeelati omooddettidosona; hegaa gaasuwan, eti worddo xoossatussi goynnidosona. w19.06 2 ¶3; 4 ¶7-8

Beeteelen haggaaziyaageeta gujjin, ubba wode haggaaziya darotussi ooratta maatay imettiis. Ha alꞌꞌo ishanttinne michchontti keehi xoqqu ootti xeelliyo maataa aggiyoogee etayyo keehi deexxiyaaba gidana danddayees. Neeni hegeetuppe issuwaa gidikko, laamettidabaa genccanaadan nena aybi maaddana danddayii? Yihoowakko shiiqidi deꞌanawu, galla galla Geeshsha Maxaafaa nabbabananne nabbabidobaa wotti dentti qoppana koshshees. Qassi, intte ooratta gubaaꞌiyan mishiraachchuwaa sabbakanawu inttessi danddayettida ubbabaa oottite. Eti kaseegaadan ubbabaa oottana danddayennaba gidikkonne, aggennan baayyo ammanettidi oottiyaageeta Yihooway hassayees. Ne deꞌuwaa sima ootta. Seexaanaa alamiyaa hirggay Yihoowawu haggaaziyoogaa nena agissanaadan oottoppa. (Maa. 13:22) Yihoowayyo haggaazenna asay woy neeni daro miishshaa demmanaadan maaddanawu maliya laggeti woy dabboti yootiyoobaa siyoppa. (1 Yoh. 2:15-17) Nuuyyo koshshiyaabaa ‘koshshiya wodiyan’ immanawu qaalaa gelida Yihoowan ammanetta. I nu ammanoy kaseegaappe aaruwan minnanaadaaninne nuuni woppu gaanaadan maaddana, qassi aquwaaban nuussi koshshiyaabaa I nuuyyo immana.—Ibr. 4:16; 13:5, 6. w19.08 20 ¶4; 21-22 ¶7-8

Unꞌꞌettanaadan oottiyaabay nena gakkiiddi deꞌii? Yihooway nuuyyo siyettiyaabaa akeekiyoogaa eriyoogee keehi minttettees. I nuuni oottana danddayiyoobaanne oottana danddayennabaa erees; I haray attoshin nu qofaanne nuuyyo siyettiyaabaakka erees. (Maz. 103:14; 139:3, 4) Yihoowan ammanettiyoogee nuuni unꞌꞌissiyaabaa genccanaadan nuna maaddana. Unꞌꞌettiyoogee neeni ta hanotay mule laamettenna ga qoppada hidootaa qanxxanaadan oottana danddayees. Hegaadaana gidikko, unꞌꞌissiyaabaa genccanaadan Yihooway nena maaddanaagaa hassaya. I nena waati maaddanee? Ne metuwaanne hegan neeyyo siyettiyaabaa neeni ayyo yootanaadan I shoobbees. Neeni maaduwaa demmanawu woossiyoobaa I zaarana. (Maz. 5:3; 1 PHe. 5:7) Hegaa gishshawu, ne metuwaa xeelliyaagan ubbatoo Yihoowa woossa. I nena haasayissanna xayikkonne, ba Qaalaa, Geeshsha Maxaafaa baggaaranne ba dirijjitiyaa baggaara nena haasayissana. Geeshsha Maxaafaappe neeni nabbabiyo taariketi nena minttettananne neessi hidootay deꞌanaadan oottana danddayoosona. Ne ishanttinne michchonttikka nena minttettana danddayoosona.—Roo. 15:4; Ibr. 10:24, 25. w19.06 16 ¶7-8

Yedetay gakkin, Yihoowakko woossiyo wode, “ne wozanaa haattaadan gussa;” qassi nena yashshiyaanne hirggissiya ubbabaa nena siiqiya Aawawu yoota. (Zil. 2:19) Neeni hegaadan loytta woossikko, Yihoowakko shiiqidabadan neeyyo siyettana. (Roo. 8:38, 39) Xoossaa Kawotettay anjjuwaa ehaanaagaa ammanetta. (Qoo. 23:19) Xoossay qaalaa gelidobay polettanaagaa neeni tumuppe ammanennaba gidikko, Seexaanaynne ayyo haarettiyaageeti nena yashissanaagee metenna. (Lee. 24:10; Ibr. 2:15) Xoossay ba Kawotettaa xeelliyaagan qaalaa gelidobaanne hegee polettanaagaa neeni aybissi ammanettana danddayiyaakko gaasuwaa wodiyaa bazzada xannaꞌa. Hegee nena waati maaddanee? Ba ammanuwaa gaasuwan laappun layttawu qasho keettan qashettida Istenili Jonza hanotaa qoppa. I ammanettidi genccanaadan aybi maaddidee? I hagaadan giis: “Taani Xoossaa Kawotettaabaanne he Kawotettay oottanabaa eriyo gishshawu, qassi A mule sirenna gishshawu, ta ammanoy mino. Ubba qassi ooninne taani Yihoowa agganaadan oottana danddayenna.” Neeni Xoossay qaalaa gelidobaa mintta ammanikko, Yihoowakko shiiqana, qassi neeni ayyo haggaaziyoogaa yashshay digganaadan oottakka.—Lee. 3:25, 26. w19.07 2 ¶1; 3 ¶6-7

Erissiyo ashkkara oottiyo oosoy keehi koshshiyoy aybissee? Xoossaa dabbo gidana danddayiyay Kiristtoosi erissiyo ashkkaratu xalla gidiyo gishshataassa. Hegaa bollikka, Yesuusa kaalliyaageeti ha wodiyan loꞌꞌo deꞌuwaa deꞌoosona; qassi sinttappe merinawu deꞌiyo hidootay etawu deꞌees. (Yoh. 14:6; 17:3) Yesuusi nuuyyo keehi gita aawatettaa immidoogee qoncce; shin nuuni he oosuwaa nurkka oottokko. Kiitettida PHawuloosi babaanne baassi mata lagge gidida amaridaageetubaa hagaadan giis: ‘Nuuni Xoossaara issippe oottiyaageeta.’ (1 Qor. 3:9) Yihoowaynne Yesuusi nagaranchcha asawu keehi gita maataa immidosona! Qassi nuuni asay Kiristtoosi erissiyo ashkkara gidanaadan maaddiyo wode keehi ufayttoos. Erissiyo ashkkara oottanawu nuuni koyro oottana koshshiyaabay Yihoowabaa tamaaranawu eeno giya asaa koyiyoogaa. Nuuni nunaara gayttiya ubbawu Yihoowabaa yootiyo wode, nu Yihoowa Markkata gidiyoogaa qonccissoos. Sabbakanaadan Kiristtoosi nuussi immido azazuwaa azazettiyo wode, nuuni tumu Kiristtaane gidiyoogaa bessoos. w19.07 15 ¶3-5

Geeshsha Maxaafay yootiyo aadhdhida eratettay koyro daro asaa ufayssees. Niwu York Siiti giyo kataman, issi michchiyaa Mandirine qaalaa haasayiya asawu hagaadan gawusu: “Taani eta ufayssiyaabaa eranawunne eti yootiyoobaa siyanawu baaxetays. Eti mata wode hara biittaappe yiidoogaa taani akeekikko, hagaadan oychchays: ‘Heeraa meezetaydda deꞌay? Ooso demmadii? Heeraa asay loytti oyqqii?’” Yaatiyoogee Geeshsha Maxaafay tamaarissiyoobaa erissanaadan issi issitoo O maaddees. Koshshiyaaba gidikko, michchiyaa gujjada hagaadan gawusu: “Asaara loꞌꞌo dabbotay deꞌanaadan nuuni oottana bessiya keehi koshshiyaabay ayba gaada qoppay? Geeshsha Maxaafaappe issi leemisuwaa taani nena bessoo? Xiqisee hagaadan gees: ‘Ooshshai doommiiddi, zeeruwaa xuussiya haattaa mala; hegaa gishshau, ooshshaappe kasetada palamaa aggaaga.’ Ha zoree haratuura dabbotanaadan nuna maaddees gaada qoppay?” (Lee. 17:14) Hegaadan haasayiyoogee gujjidi tamaaranawu koyiya asaa shaakkidi eranawu nuna maaddees. w19.07 23 ¶13

Ooratta haggaazo maatay imettidoogeetussi koshshiyaagee qaretaa gidennan etawu koshshiyaabaa akeekiyoogaa. Eti woy eta son issi uri sahettennan waayi aggana. Eti siiqiyo uri hayqqidoogaa gaasuwan azzaniyaageeta gidana danddayoosona. Qassi eti haasayana xayikkonne, kase eti haggaazido heeran deꞌiya bantta laggeta laamotiyoogaa gaasuwan azzanana danddayoosona. Etawu kirqqi gaanaadan oottiya ha hanotata genccanawu etassi wodiyaa koshshees. Neeni loꞌꞌo leemiso gidada etaara sabbakiyo wodenne eta minttettiyo wode, eti meezetanaadan maaddana danddayaasa. Kare biittan daro layttawu haggaazida issi michchiyaa hagaadan gaasu: “Taani kase haggaaziyo sohuwan, galla galla Geeshsha Maxaafaa xinaateta xannaꞌissays. Ooratti maddabettido sohuwan, issi xiqisiyaa nabbabanawu woy haggaazuwan issi biiduwaa bessanawukka metootays. SHin taani ooratti biido gubaaꞌiyaa ishanttinne michchontti eti zaarettidi oychchiyoogeetukkonne xannaꞌissiyoogeetukko etaara baanaadan tana oychchoosona. Ammanettidi minnidi oottiya he ishanttinne michchontti Geeshsha Maxaafaa xinaateta xannaꞌissiyoogaa beꞌiyoogee taani moottaa dosanaadan oottiis. Taani ooratta haggaazo moottan asaa haasayissiyoogaa waata doommanaakko tamaaraas. Ha ubbabay taani zaarettada ufayttanaadan oottiis.” w19.08 22 ¶10; 24 ¶13-14

Nuuni issi issitoo Ewodeegaadaaninne Sinxxiikeegaadan nu ishanttu balaa xallaa qoppiyo gishshawu, eta siiqiyoogee keehi metees. Nuuni ubbaykka galla galla balabaa oottoos. Nuuni haratu balaa ubbatoo qoppikko, nu eta siiqiyo siiqoy irxxana. Leemisuwawu, issi ishay SHiiquwaa Addaraashaa geeshshiyoogan maaddiyoogaa dogikko, nuuni yiillotana danddayoos. Nu ishay oottido hara balaa ubbaa nuuni qoppiyoogaa doommikko, A bolli keehi yiillotananne A darin siiqennan aggana. Ne gubaaꞌiyan deꞌiya issi uraara hegaa mala metoy neeyyo deꞌikko, Yihooway nu balaanne nu ishaa balaa beꞌiyoogaa neeni wotta dentta qoppiyoogee loꞌꞌo. SHin he balay deꞌishinkka, I nu ishaakka nunakka siiqees. Hegaa gishshawu, nuuni nu ishantta siiqiyoogaaninne ubbatoo eta loꞌꞌo eeshshaa qoppiyoogan Yihoowa leemisuwaa kaallana koshshees. Nuuni nu ishantta siiqanawu baaxetiyo wode, etaara kaseegaappe aaruwan issuwaa gidana.—Pili. 2:1, 2. w19.08 9-10 ¶7-8

Bana ziqqi oottiya asaa Yihooway siiqees. Aara siiqettiya mata dabbo gidana danddayiyaageeti tumuppe banttana ziqqi oottiya asatu xalla. SHin, “otoranchchata i haahuwan erees.” Nuuni ubbay Yihoowa ufayssanawunne I nuukko shiiqanaadan koyoos. Hegaa gishshawu, nuna ziqqi oottiyoogaa tamaariyo loꞌꞌo gaasoy deꞌees. Bana ziqqi oottiya uri I haratuppe aadhdhiyaabadan qoppenna. Qassi I otorettenna. Bana ziqqi oottiya uri Yihooway baappe keehi aadhdhiyoogaa eriyoogaanne hara asatu hanotaa I akeekiyoogaa Geeshsha Maxaafay yootees. Bana ziqqi oottiya uri harati baappe issi issiban dariyoogaakka akeekees. (Pili. 2:3, 4) Issi issi asati banttana ziqqi oottiyaaba milatoosona; shin eti tumuppe banttana ziqqi oottokkona. Eti dungguuxa gidana danddayoosona. Woy qassi eta yelidaageeti tamaarissidoogaa gaasuwan eti harata bonchchiyaageetanne ashkke gidana danddayoosona. Gidoppe attin, eti wozanan keehi otorettiyaageeta gidana danddayoosona. Guyyeppe, eti bantta wozanan deꞌiyaabaa qonccissana.—Luq. 6:45. w19.09 2 ¶1, 3-4

‘Nu Godaa Yesuus Kiristtoosa wonggeliyaa mishiraachchoy,’ Yesuusi tamaarissido tuma ubbaa xaaxi waaxees. Nuuni nu deꞌuwan mishiraachchuwaa oosuwan peeshshiyo wode A azazettoos. Hegaadan azazettiyoogee Kawotettaabaa kaseyiyoogaa, Xoossay kessido xillotettaa maaraa kaalliyoogaanne Xoossaa Kawotettaabaa sabbakiyoogaa xaaxi waaxees. (Maa. 6:33; 24:14) Hegee ayyaanan tiyettida Kiristtoosa ishantti bantta wolqqaama aawatettaa poliyo wode maaddiyoogaarakka gayttidaba. (Maa. 25:31-40) Banttana maaddido ubbabaa gishshawu mata wode eti ‘hara dorssata’ woytana. (Yoh. 10:16) Waatidi? Armmageedoona olay doommanaappe kasetidi, 144,000ti hayqqenna ayyaana mereta gididi saluwan deꞌanawu denddana. Eti he wode Googa xayssana saluwaa olanchchatu yame gidana, qassi “zawai bainna daro asaa” hegeekka Xoossaa asaa ashshana. (Ajj. 2:26, 27; 7:9, 10) Ee, zaway baynna asati ayyaanan tiyettida Yihoowa ashkkarati saꞌan deꞌiyo wode maaddidoogan eti keehi ufayttana! w19.09 12-13 ¶16-18

Yesuusi nuuyyo immido oosuwaa oottiyoogee nuna shemppissiyoy aybissee? Nuuyyo ooppenne aadhdhiya xomoosiyaagee deꞌees. Ubbaappe Aadhdhiya, Xomoosiya Yihooway ba ashkkarata galatenna meqettaa iita goda gidenna. Nuuni oottiyo oosuwaa I xoqqu ootti xeellees. (Ibr. 6:10) I nuuyyo immido oosuwaa nuuni oottanawu koshshiya wolqqaa I nuussi immees. (2 Qor. 4:7; Gal. 6:5) Nu Kawoy Yesuusi harata wottiyoobi baynna ogiyan oyqqiyoogan nuuyyo loꞌꞌo leemiso. (Yoh. 13:15) Qassi nuna heemmiya cimati “dorssaa heemmiya gitaa,” Yesuusa leemisuwaa kaallanawu baaxetoosona. (Ibr. 13:20; 1 PHe. 5:2) Eti keha, minttettiyaageeta, qassi nuna tamaarissiyaageetanne naagiyaageeta gidanawu baaxetoosona. Qassi nuuyyo keehi loꞌꞌo laggeti deꞌoosona. Siiqiya laggetinne ufayssiya oosoy deꞌiyo nuuppe hara ooninne baawa. Ane hagaa qoppa: Nuuni keehi loꞌꞌo eeshshay deꞌiyo ishanttuuranne michchonttuura oottoos; shin eti haratuppe aadhdhiyaabadan qoppokkona. Etayyo eray deꞌikkonne, eti hegan ceeqettokkona; qassi eti harati banttappe aadhdhiyaabadan qoppoosona. Eti nuna banttanaara issippe oottiyaageetu xalladan gidennan, bantta laggedankka xeelloosona. Eti nuna keehi siiqiyo gishshawu bantta shemppuwaa nu gishshawu aattidi immanawu eeno goosona! w19.09 20 ¶1; 23 ¶12-14

Nuuni ‘Yihoowa gallassawu’ giigetti uttanawu waatana koshshiyaakko PHawuloosi zoriis. (1 Tas. 5:1-6) Ha xiqisee alamiyaa worddo haymaanoote ubbaa xaaxa waaxiya ‘Gita Baabilooni’ bolli gakkiya qohuwan doommidi, Armmageedoona olan wuriya wodiyaabaa qonccissees. (Ajj. 16:14, 16; 17:5) Nuuni ‘Yihoowa gallassawu’ giigetti uttanawu waatana koshshiyaakkokka kiitettida PHawuloosi zoridobay yootees. “Nuuni harati xiskkiyoogaadan xiskkanau bessenna.” ‘Nuuni beegottidi’ deꞌana, qassi alamiyaaban oossinne exatennaadaaninne polotikaaban gelennaadan naagettana koshshees. Nuuni hegaa malaban gelikko, “sa7aabaa” gidoos. (Yoh. 15:19) Xoossaa Kawotettaa xallay alamiyawu sarotettaa ehaanaagaa nuuni eroos. Nuuni Geeshsha Maxaafay kasetidi yootidobay alamiyan hananaagaa harati eranaadankka eta maaddanawu koyoos. Nuuni hegaa haꞌꞌi oottana koshshees; ayssi giikko, iita waayee doommiyo wode asay Yihoowakko simmanawu wodee aadhdhiichchana. Nu sabbakuwaa oosoy keehi koshshiyoy hegaassa! w19.10 8 ¶3; 9 ¶5-6

Xaatta maxaafay xaafetti wuri simmin, Ermmaasi ba laggee Baaruki asaayyo he kiitaa yootanaagaa ammanettana koshshiis. (Erm. 36:5, 6) He oosuwaa oottiyoogee Baaruka daafaban yeggana danddayikkokka xalatettan poliis. Baaruki beeta maqidasiyaa biidi asaayyo xaatta maxaafaa nabbabiyo wode, Ermmaasi keehi ufayttidoogaa qoppana danddayaasa. (Erm. 36:8-10) Yihudaa halaqati Baaruki oottidobaa siyidi, I cenggurssaa xoqqu oottidi xaatta maxaafaappe banttassi nabbabanaadan azazidosona! (Erm. 36:14, 15) Halaqati Ermmaasi yootidobaa Kawuwaa Yoꞌaqeemawu yootanawu kuuyidosona. Kawuwaa Yoꞌaqeemi Ermmaasi xaafissido xaatta maxaafan xaafettidabaa siyido wode, keehi hanqqettidi he maxaafaa xuugissiisinne Ermmaasinne Baaruki qashettanaadan azaziis. Gidoppe attin, Ermmaasi hara xaatta maxaafaa ekkidi, Baarukawu immiis; qassi Ermmaasi Yihoowa kiitaa awu yootishin Baaruki, “Yihudaa Kawoi Yo7aqeemi kase xuuggido xaatta maxaafaa giddon de7iya qaalaa ubbaa” xaafiis.—Erm. 36:26-28, 32. w19.11 3-4 ¶4-6

Yihooway ba halchchuwaa polanawu koshshiya aybanne hanees. Leemisuwawu, Yihooway tamaarissiyaagaa, minttettiyaagaa, wonggeliyaa mishiraachchuwaa yootiyaagaa gidiis. I haniyo darobaappe hageeti amaridaageeta. (Isi. 48:17; 2 Qor. 7:6; Gal. 3:8) Gidoppe attin, Yihooway ba halchchuwaa polanawu darotoo asaa goꞌettees. (Maa. 24:14; 28:19, 20; 2 Qor. 1:3, 4) Qassi Yihooway ba sheniyaa polanawu koshshiya aybanne hananawu nuussi ubbawu koshshiya aadhdhida eratettaanne wolqqaa immees. Daro eranchchati yootidoogaadan, hagee Yihoowa sunttawu deꞌiya daro birshshettatuppe issuwaa. Nuuppe daroti Yihooway ba sheniyaa oottanaadan I nuna goꞌettanaadan koyoos; shin issoti issoti Yihooway eta goꞌettiyoogaa sirana danddayoosona. Aybissi? Eta layttaa, eta hanotaa, woy eta wolqqaa gaasuwan eti koyiyoogaa keenaa oottana danddayennabadan etawu siyettiyo gishshataassa. Harati qassi oottiiddi deꞌiyoogee gidana, qassi loytti oottana koshshenna giidi qoppana danddayoosona. w19.10 20 ¶1-2

Miishshaa siiqiyoogee nu qofay shaahettanaadaaninne gonddalle mala gidida nu ammanuwa shenehoo gaanaadan oottana danddayees. Kiitettida PHawuloosi hagaadan giis: “Olaa biya wotaaddarai ba halaqaa ufaissanau, wotaaddara gidenna asai oottiyo oosuwan walahettenna.” (2 Xim. 2:4) Rooma wotaaddarati hara oosuwaa oottokkona. Nuuni gooba wotaaddaratudan, hegeekka nu olaa gadaawata gidida Yihoowaninne Kiristtoosan sabettanaadan oottiya waanna halchchuwaappe nu qofay shaahettanaadan oottokko. Nuuni Seexaana alamiyan demmana danddayiyo aybippenne hegee keehi aadhdhees. Yihoowawu haggaazanawunne gonddalle mala gidida nu ammanuwaanne nu ayyaana ola miishshata harata loꞌꞌo hanotan naaganawu koshshiya wodeenne wolqqay nuussi deꞌiyaakkonne, nuuni shaakki erana bessees. Nuuni ubbatoo beegottidaageeta gidana koshshees! Aybissi? Kiitettida PHawuloosi “duretanau koyiyaageeti . . . ammanuwaappe balettidi” kiyanaagaa yootiis.—1 Xim. 6:9, 10. w19.11 17 ¶12, 14-15

“Godaa gallassai” yaanaappe kase “ubbabai saro; aibikka hanenna” geetetti awaajjettana. (1 Tas. 5:1-6) Koyro Tasalonqqe 5:2n odettida “Godaa gallassai” “daro waayiyaa” qonccissees. (Ajj. 7:14) He daro waayee doommana haniyo wodiyaa nuuni waati eranee? Geeshsha Maxaafay issi oorattabay awaajjettanaagaa yootees. He awaajjoy daro waayee doommanaagawu malaata gidana. Hegee “ubbabai saro; aibikka hanenna” geetettidi kasetidi odettida awaajjo. Haymaanootiyaa kaalettiyaageeti etaara hashetanee? Hashetana danddayoosona. Alamiyaa haariyaageeti “ubbabai saro; aybikka hanenna” giyo wode, hegee daydanttati odiyo worddo gidiyoogaa nuuni eroos. Qassi hegee asi deꞌido wodiyan awudeegaappenne aadhdhiya waayee doommana hanishin, asay hirggissiyaabi baynnabadan qoppanaadan oottiyo gishshawu, he worddoy keehi qohiyaaba gidana. Ee, “maccaasaa maaretai oiqqiyoogaadan, bashshai eti qoppennan eta bolli yaana.” Yihoowayyo ammanettidi oottiyaageeti shin? Yihoowa gallassay eti qoppennan doommiyoogan eti maalaalettana danddayikkonne, he gallassawu eti giigetti uttana. w19.09 9 ¶7-8

Issibaa kuuyiyo wode, dummayada xaafa. Neeni dummayada halchchikko, hegaa polanawu metootakka. Leemisuwawu, neeni Geeshsha Maxaafaa ubba wode nabbabanawu kuuyana danddayaasa. SHin neeni dummayada halchchana xayikko, ne oottanawu halchchidobaa oottana danddayakka. Woy gubaaꞌiyaa cimati ishanttanne michchontta ubbatoo soo biidi oychchanawu kuuyana danddayoosona, shin amarida wodiyaappe guyyiyan halchchidobaa oottibookkona. Halchchidobaa polanawu kaallidi deꞌiya oyshatu mala banttana oychchana danddayoosona: “Nuuni biidi oychchiyo ishanttuppenne michchonttuppe goꞌettanaageeti awugeetakko xaafi oyqqidoo? Biidi eta oychchanawu wodiyaa keeridoo?” Hanana danddayiyaabaakka qoppa. Oottanawu koyiyo ubbabaa oottanawu wodee, miishshay woy wolqqay deꞌiyo uri nu giddon ooninne baawa. Hegaa gishshawu hanana danddayiyaabaanne bessiyaagaadan qoppa. Koshshikko, neeni polana danddayennaagaa akeekikko, ne kuuyidobaa laammana koshshennan aggenna. w19.11 29 ¶11-12

Sinttappe saꞌan deꞌoy ay mala gidanaakko Isiyaasa 65:21-23y yootees. Nuuni azallanne aybanne oottenna asa gidokko. SHin, he wode Xoossaa asay goꞌꞌiyaanne ufayssiya oosuwaa oottanaagaa Geeshsha Maxaafay yootees. SHaꞌu Layttaa Haaruwaa wode, “Mereta ubbai ba huuphen bashshaa ailletettaappe . . . kiyana; qassi he meretati Xoossaa naati ailletettaappe kiyido bonchcho kessaa” kiyanaagaa ammanettana danddayoos. (Roo. 8:21) Yihooway Israaꞌeelati oottanaadaaninne shemppanaadan oottidoogaadan, matida Kirsttoosa SHaꞌu Layttaa Haaruwaa wode, I ba asawu hegaara issi malabaa oottana. Nuuni Xoossawu goynniyo wodee deꞌanaagee qoncce. Xoossawu goynniyoogee ha wodiyan ufayttanawu keehi koshshiyaaba, qassi hegawu nuuni ooratta alamiyan wodiyaa demmana. Kirsttoosa SHaꞌu Layttaa Haaruwaa wode ammanettida asa ubbay ufayttana; ayssi giikko, nu ubbawu ufayssiya oosoy deꞌananne nuuni ubbay Xoossawu haggaazana. w19.12 12 ¶15; 13 ¶17-18

Zaarettido Wogaa 6:6, 7n “tamaarissa” geetettida Ibraawetto qaalay “darotoo zaarettiyoogan hassayissiyoogaa” giyoogaa. Yaatanawu, yelidaageeti bantta naatuura ubbatoo wodiyaa aattana koshshees. Yelidaageeti bantta naata zaari zaaridi tamaarissiyo gishshawu, issi issitoo hidootaa qanxxana danddayoosona. SHin, yelidaageeti he injjiyan bantta naati Xoossaa Qaalaa akeekanaadaaninne hegaa oosuwan peeshshanaadan maaddanawu baaxetana danddayoosona. Yaatiyo gishshawu intte naata loytti erite. Mazamure 127y naata tooraara woy wonddafiyaara geeddarssees. (Maz. 127: 4) Wonddafee dumma dummabaappe giigana danddayiyoogaadaaninne yesuwan dummatana danddayiyoogaadan, naati ubbay dumma dumma. Yaatiyo gishshawu, yelidaageeti bantta naata issuwaa issuwaa waati loohissanaakko kuuyana koshshees. Ha wodiyan Israaꞌeela biittan bantta naaꞌꞌu naati Yihoowawu haggaazanaadan loohissidi dichchida azinaynne machchiyaa banttana maaddidabaa hagaadan giidosona: “Nuuni nu naata Geeshsha Maxaafaa dumma dumma xannaꞌissida.” Hegaadan xannaꞌissiyoogee koshshiyaakko koshshennaakko so asawu huuphe gidida uri kuuyiyoogee qoncce. w19.12 26-27 ¶18-20

Nuna metoy gakkiyo wode, koshshiyaaban nuna maaddiyaageeta keehi galatoos! Qoppennan daafabay gakkin keehi azzanttiya hanotan aaway hayqqido Rayani hagaadan giis: “Neeni waayettiyo wode oottana danddayennaba milatiya nuuni galla galla oottiyo darobay deꞌees. Keehi guuttaba gidikkonne, issi uri maaddiyaabaa oottiyoogee keehi minttettiyaaba.” Neeni harata maaddanawu oottiyoobay guuttaba gidikkonne, hegee eta keehi minttettana danddayiyoogaa ubbatoo hassaya. Kiitettida PHawuloosaara oottida Marqqoosi oosoy darido Kiristtaane. Qassi, Marqqoosi kiitettida PHawuloosa minttettanawu wodiyaa bazzido gishshawu, PHawuloosi Marqqoosa maaduwaa oychchanawu mammottibeenna. Aayee aayyiyo asi worin azzanida Anjeela, harati O bantta dosan minttettidoogawu galataasu. A hagaadan gaasu: “Laggeti wozanappe maaddanawu koyiyo wode, eti haasayissanawu deexxokkona. Hegee eti tana maaddanawunne taani yayyennaadan oottanawu koyiyoogaa bessiyaaba milatees.” Hagaadan nuna oychchana danddayoos: ‘Taani maadoy koshshiyo wode ta mala Kiristtaaneta minttettanawu eeno giyoogan erettiyaanaa?’ w20.01 11-12 ¶14-16

Tiyettida issi uri Godaa Kahuwaa bonchchiyo wode ‘bessennan’ waatidi oyttaa maananne woyniyaa uyana danddayii? I Yihoowa higgiyawu azazettennan, oyttaa miyaabanne woyniyaa uyiyaaba gidikko, bessennabaa oottees. (Ibr. 6:4-6; 10:26-29) Tiyettidaageeti “Xoossai Kiristtoos Yesuusa baggaara bolla de7uwau xeesiyo woituwaa ekkanau” koyikko, eti ammanettidi deꞌana bessiyoogaa akeekoosona. (Pili. 3:13-16) Yihoowa ayyaanay A ashkkarati otorettanaadan gidennan, bantta huuphiyaa ziqqi oottanaadan maaddees. (Efi. 4:1-3; Qol. 3:10, 12) Yaatiyo gishshawu, tiyettidaageeti eti haratuppe aadhdhiyaabadan qoppokkona. Tiyettidaageeti Yihooway banttassi hara ba ashkkaratussi immiyoogaappe aadhdhiya geeshsha ayyaanaa immennaagaa eroosona. Eti Geeshsha Maxaafaa haratuugaappe aaruwan akeekoos giidi qoppokkona. Eti issi uri ayyaanan tiyettiis gi qoppidi, Godaa Kahuwaa bonchchiyo wode oyttaa maanaadaaninne woyniyaa uyanaadan mule yootokkona. Eti saluwaa biya asata dooriyaagee Yihoowa xalla gidiyoogaa banttana ziqqi oottidi ekkoosona. w20.01 27-28 ¶4-5

Yihooway nuuni akko shiiqanaadaaninne aara haasayanaadan koyees. Nuuni ‘ubba wode woossanaadan’ I nuna minttettees; qassi ubbatoo nu woosaa siyees. (Roo. 12:12) I nu woosaa siyanawu mule wode xayenna woy I mule salettenna. Qassi, nuuni A Qaalaa, Geeshsha Maxaafaanne hegaa akeekanaadan maaddiya xuufeta nabbabiyoogan I yootiyoobaa siyoos. Gubaaꞌe shiiqotun loytti ezggiyoogankka I yootiyoobaa siyoos. Naati yelidaageetuura ubbatoo haasayiyoogee etakko shiiqidi deꞌanaadan maaddiyoogaadan, ubbatoo Yihoowaara haasayiyoogee akko shiiqidi deꞌanaadan nuna maaddees. Neeni Yihoowakko woossiyo woosay ay malakko qoppa. Yihooway nuuni woosan nu wozanaabaa awu yootanaadan koyees. (Maz. 62:8) ‘Taani xaafettidabaa nabbabiya uraadan ubbatoo issi malabaa woossiyaanaayye wozanappe woossiyaanaa?’ giidi nuna oychchana koshshees. Neeni Yihoowa keehi siiqiyoogeenne aara dabbotaa minttada deꞌanawu koyiyoogee qoncce. Yaatanawu, neeni aara ubbatoo haasayana koshshees. Neessi siyettiyaabaa ubbaa ayyo yoota. Nena ufayssidabaanne nena azzanttidabaa ayyo yoota. I maaddanaadan oychchana danddayiyoogaa ammanetta. w20.02 9 ¶4-5

Yihooway ba asaa heemmiyo gita aawatettaa cimatuyyo immiis. Nahimee Yihoowa asaa oyqqido ogiyaappe cimati darobaa tamaarana danddayoosona. Nahimee Yihudaa biittaa haariyo gishshawu awu daro aawatettay deꞌees. (Nah. 1:11; 2:7, 8; 5:14) Nahimiyaa gakkida amarida paaceta qoppa. Ayhudati Yihoowa goynuwaa bonchchiyoogaa bessenna ogiyan beeta maqidasiyaa goꞌettiyoogaa I akeekiis. Qassi eti oottanaadan Yihoowa Higgee yootiyoogaadan, Leewatuyyo miishshaa immibookkona. Yihooway kessido Sambbata higgiyawu eti azazettibookkona; qassi amarida attumaageeti Yihoowawu goynnenna biittatuppe machcho ekkidosona. Biittaa haariya Nahimee ha metiya hanotaa giigissana koshshees. (Nah. 13:4-30) Nahimee asay ba qofaa kaallanaadan wolqqanttanawu ba maataa goꞌettibeenna. SHin, I Yihooway maaddanaadan minttidi woossiis; qassi Yihoowa Higgiyaa asaa tamaarissiis. (Nah. 1:4-10; 13:1-3) Ubba qassi asay Yerusalaame dirssaa gimbbiyaa zaaretti gimbbanaadan eta maaddiyoogan Nahimee bana ziqqi oottidi asaara issippe oottiis.—Nah. 4:15. w19.09 16 ¶9-10