Isiine

Harati bessennabaa haasayiyo woy oottiyo wode nuuni azzanana danddayoos. Ubba qassi nu mata laggee woy dabboy nuna qohikko keehi azzanoos. I dawutteeppe daro qohoy gakkin keehi unꞌꞌettida, Geeshsha Maxaafan ibay odettido Haanni hanotaappe nuuni darobaa tamaarana danddayoos. (1 Sam. 1:12) Nuunikka Haannidan nuna hirggissiyaabatanne nuuni yayyiyoobata Yihoowayyo adussa saatiyawu yootana danddayoos. Nuuni ubbabaa bali baynnan woy tololayidi yootana koshshenna. Nuna unꞌꞌissidabaa Yihoowawu yootiyo wode issi issitoo yeekkanakka danddayoos. Gidikkokka, Yihooway nu yootiyoobaa siyanawu mule salettenna. Qassi nu metuwaabaa woossiiddi, Piliphphisiyuusa 4:6, 7n deꞌiya zoriyaa hassayana koshshees. Nuuni woosan Yihoowa galatana koshshiyoogaa kiitettida PHawuloosi yootiis. Nuuni Yihoowa galatiyo daro gaasoy deꞌees. Leemisuwawu, I nuussi immido deꞌuwawu, I medhdhido loꞌꞌiyaabawu, aggenna A siiquwawunne ufayssiya hidootawu nuuni A galatana danddayoos. w20.02 21 ¶3; 22 ¶6

Haasayiyoogee Yihooway immido imota. (Kes. 4:10, 11; Ajj. 4:11) I nuuni ha imotaa bessiyaagaadan waati goꞌettanaakko akeekanaadan nuna ba Qaalaa baggaara maaddees. Nuuni Yihoowabaanne A Kawotettaabaa haasayanawu ubbatoo giigettidaageeta gidana koshshees. (Maa. 24:14; Roo. 10:14) Nuuni hegaadan oottiyo wode, Yesuusa leemisuwaa kaalloos. Yesuusi saꞌaa yiido waanna gaasotuppe issoy ba Aawaabaa tumaa haratussi yootanaassa. (Yoh. 18:37) Gidoppe attin, nuuni haasayiyo ogee ay keena koshshiyaabakkokka hassayana bessees. Hegaa gishshawu, nuuni Yihoowabaa haratuyyo yootiyo wode, “ashkketettaaninne yashshatettan [“bonchchuwan,” NW]” yootana bessees, qassi haratuyyo siyettiyaabaanne eti ammaniyoobaa qoppana koshshees. (1 PHe. 3:15) He wode nuuni issi urawu yootiyoogaa xalla gidennan, A tamaarissoos, qassi A wozanaa denttettana danddayoos. Cimati issi ishaa woy issi michchiyo zorana koshshiyoogaa akeekikko, zoranawu mammottana koshshenna. Eti he uraa yeellayennaadan, haasayana bessiya wodiyaa dooroosona. w20.03 18-19 ¶2-4

Nuuni woossana danddayiyoobay aybee? Yihooway ‘nuussi ammanuwaa gujjanaadan’ woossana danddayoos. (Luq. 17:5; Yoh. 14:1) Nuussi ammanoy koshshees; ayssi giikko, Yesuusa kaalliyaageeta ubbaa Seexaanay paaccana. (Luq. 22:31) Metoy bolli bollan gakkiyo wodekka, sarotettan deꞌanaadan ammanoy nuna waati maaddii? Nuuni metuwaa xoonanawu nuuyyo danddayettida ubbabaa oottiyo wode, Yihooway nuna maaddanaagaa ammaniyoogee hirggennaadan oottees. I nuuni oottana danddayiyo aybippenne aadhdhiya loꞌꞌobaa ay oottanaakko eriyoogaa nuuni ammanettiyo gishshawu, sarotettan deꞌoos. (1 PHe. 5:6, 7) Nuna ayba metoy gakkikkonne, woosay nuuni sarotettan deꞌanaadan maaddees. Haꞌꞌi layttay 80⁠ppe aadhdhido ammanettida gubaaꞌe cima gidida ishaa Roberta hanotaa qoppa. I hagaadan giis: “Piliphphisiyuusa 4:6, 7n deꞌiya zoree ta deꞌuwan gakkida daro metuwaa taani genccanaadan maaddiis. Tana miishshay metiis. Qassi gubaaꞌe cima gidada oottiyo maataappe guutta wodiyawu wodhdhaas.” Roberti sarotettan deꞌanaadan A aybi maaddidee? I hagaadan giis: “Taani unꞌꞌettiyo wode sohuwaara woossays. Taani kaseegaappe aaruwan darotoonne wozanappe woossiyo wode aaro sarotettaa demmiyoogaa ammanays.” w19.04 9-10 ¶5-7

Mattumaara gayttidaagan naꞌa qohiyoogee Xoossaa bolli oottiyo nagara. Issi asi hara asa naaqqiyo wode, I Yihoowakka naaqqees. Xoossay Israaꞌeelatuyyo immido issi Higgiyaa ane qoppa. Ba shooruwaa bonqqiya woykko cimmiya uri ‘Yihoowa naaqqiyoogaa’ he Higgee yootees. (Wog. 6:2-4) Yaatiyo gishshawu, mattumaara gayttidaagan naꞌa qohiyoogan he naꞌi woppu geennaadan oottiya, gubaaꞌiyan deꞌiya issi uri Xoossaa naaqqees. Yihoowayyo goynniyaagaa gidiyoogan erettiya uri mattumaara gayttidaagan naata qohiyoogee Yihoowa sunttay keehi borettanaadan oottees. Mattumaara gayttidaagan naata qohiyoogee Xoossaa bolli oottiyo sheneyiya danoba gidiyo gishshawu nuuni hegaa ixxana bessees. Mattumaara gayttidaagan qohettidaageeti banttana gakkidabaa gaasuwan unꞌꞌettiyoogaara gayttidaagan waatanaakko, harati eta waati maaddananne minttettana danddayiyaakko, qassi yelidaageeti bantta naata waati naagana danddayiyaakko, Wochiyo Keelaanne Beegottite! maxeeteti qonccissidosona. Mattumaara gayttidaagan naꞌa qohiyoogaa xeelliyaagan dirijjitee gubaaꞌee he yohuwaa oyqqiyo ogiyaa ubbatoo zaarettees. w19.05 9 ¶8-9

Xoossaa Qaalay Seexaanay aassiyo worddota qanxxana danddayiya qara biso mala. (Efi. 6:17) Leemisuwawu, hayqqidaageeti paxa deꞌiyaageetuura haasayana danddayoosona giyoogee worddo gidiyoogaa Xoossaa Qaalay qonccissees. (Maz. 146:4) Sinttanaabaa xeelliyaagan ammanttiyaabaa kasetidi odana danddayiyay Yihoowa xalla gidiyoogaakka Geeshsha Maxaafay nuna hassayissees. (Isi. 45:21; 46:10) Nuuni Xoossaa Qaalaa ubbatoo nabbabiyaabanne hegaa wotti dentti qoppiyaaba gidikko, iita ayyaanati nuuni ammananaadan koyiyo worddota eqettanawunne ixxanawu giigi uttoos. Iita ayyaanaa oosuwaara gayttida aybanne eqetta. Nuuni tumu Kiristtaane gidiyo gishshawu, iita ayyaanaa ooso mule oottokko. Leemisuwawu, shareechcho oychchanawu bookko woy hayqqidaageeta hara ayba ogiyaaninne haasayissanawu malokko. Hayqqidaageeti harasan paxa deꞌoosona giyo ammanoy denddo gidido, baliyaara gayttida meezetuppe nuuni naagettoos. Nuuni sinttanaabaa eranawu xoolinttiyaa paydiyoogaa woy qaadaa odiyoogaa goꞌettokko. Hegaa mala oosoti ubbay keehi qohiyoogaanne eti nuna Seexaanaaranne daydanttatuura gattana danddayiyoogaa eroos. w19.04 21-22 ¶8-9

Ha saꞌaa aadhdhida eratettaa kaalliya asay Geeshsha Maxaafay yootiyo kandduwaa maaray bessennaba giidi yootiyoogan qilliiccees. Hegaa mala asay, ‘Xoossay mattumaa gaytettaa koshshay deꞌanaadan oottidi nuna medhdhidi, hegaa goꞌettennaadan yootiyoy aybissee?’ giidi oychchana danddayees. Asay issibaa oottanawu koyikko, hegaa oottana bessees giidi eti balan qoppiyo gishshawu, he oyshaa oychchoosona. SHin Geeshsha Maxaafay hegaappe dummatiyaabaa yootees. Geeshsha Maxaafay nuuni amottiyo ubbabawu azazettana koshshennaagaanne iitabaa oottennaadan nuuni eqettana danddayiyoogaa yootees. (Qol. 3:5) Hegaa bolli, aqo deꞌuwan mattumaa gaytettan nu ufayttanaadan oottidi Yihooway medhdhiis. (1 Qor. 7:8, 9) Ha saꞌaa aadhdhida eratettaappe dumma ogiyan, mattumaa gaytettaabaa suure xeelaa Geeshsha Maxaafay nuna tamaarissees. Geeshsha Maxaafay mattumaa gaytettay ufayssawu pultto gidana danddayiyoogaa yootees. (Lee. 5: 18, 19) Gidoppe attin, Geeshsha Maxaafay hagaadan gees: “Intte ubbai huuphen huuphen geeshshatettaaninne bonchchuwan machcho waati ekkiyaakko eranau besseesippe attin, Xoossaa erenna ammanenna asatudan, keehi amottiyoogan ekkanau bessenna.”—1 Tas. 4:4, 5. w19.05 22-23 ¶7-9

Xoossay kawotettati ba asaa xayssanaadan eeno geenna. Xoossaa asay A sunttan xeesettiyoogan ceeqettees, qassi Gita Baabiloonippe baqatanaadan I azazido azazuwaa eti azazettidosona. (Oos. 15:16, 17; Ajj. 18:4) Eti hara asaykka ippe baqatanaadan minnidi oottidosona. Yaatiyo gishshawu, Yihoowa ashkkarati ‘I nagaraa iira koxxokkona.’ Gidikkonne, eta ammanoy paacettana. (Hiz. 38:2, 8) Worddo haymaanoote dirijjite ubbay xayi simmin, Xoossaa asay wolqqaama gotiyaappe barkka attida mittaa mala gidana. Seexaanay hanqquwaa eexxi kiyanaagee qoncce. ‘Tuna ayyaanatuppe kiyiyaabaa,’ hegeekka issippe denddiya kawotettati Yihoowa ashkkaratu bolli denddanaadan daydanttati odiyo worddobaa goꞌettiyoogan I he hanqquwaa bessana. (Ajj. 16:13, 14) He issippe denddiya kawotettati ‘Maagooga biittan deꞌiya Googa’ geetettoosona. He kawotettati Yihoowa asaa bolli denddiyo wode, Armmageedoona olay doommana.—Ajj. 16:16. w19.09 11 ¶12-13

Beni Israaꞌeelan, pokkobay aakkanaadan Seexaanay worddo haymaanootiyaa goꞌettiis. Ha wodiyankka I hegaadan oottees. Worddo haymaanootee pokkobaa coꞌꞌu gi xeelleesinne likkeba milatissanawu malees. Hegaappe denddidaagan, Xoossawu oottays giya daroti I kessido kandduwaa maaraa azazettiyoogaa aggidosona. Kiitettida PHawuloosi Roome Kiristtaanetuyyo xaafido dabddaabbiyan hegee kaalettidobaa qonccissiis. (Roo. 1:28-31) “Bessennabaa” geetettidabay attumay attumaara maccay maccaara mattumaa gayttiyoogaa gujjin, ubba qommo pokkobaa xaaxi waaxees. (Roo. 1:24-27, 32; Ajj. 2:20) Geeshsha Maxaafan deꞌiya qoncce timirttiyaa nuuni azazettiyoogee keehi koshshiyaaba! Asa aadhdhida eratettay Yihooway kessido maarata xaasayi xeellees, woy he maarata phalqqees. Hegee Xoossaa ayyaanaa ayfiyaa gidennan, ‘asatettaa oosuwaa’ minttettees. (Gal. 5:19-23) Hegee asay otorettanaadan minttettees, qassi hegaappe denddidaagan asay ‘bana siiqiyaagaa’ gidees. (2 Xim. 3:2-4) Ha eeshshati Xoossay ba ashkkaratuyyo deꞌanaadan koyiyo bana ziqqi oottiyo eeshshaa phalqqiyaabata.—2 Sam. 22:28. w19.06 5-6 ¶12-14

Eelaasi wayssiya wodiyan Yihoowassi haggaaziis; qassi wolqqaama metoti A gakkidosona. Eelaasi keehi azzaniyo wode genccanaadan maaddana danddayiya loꞌꞌo laggiyaa Yihooway ayyo immiis. Hegaadan, nuuyyo siyettiyaabaa issi laggiyawu yootikko, I woy A nuna unꞌꞌissiyaaban genccanaadan maaddana danddayoosona. (2 Kaw. 2:2) Neeni ne metuwaanne neeyyo siyettiyaabaa yootana danddayiyo asi baynnabadan qoppikko, nena minttettana danddayiya kayma Kiristtaaniyaa neeni demmanaadan maaddana mala Yihoowa woossa. Eelaasi unꞌꞌissiyaabaa genccanaadaaninne ammanettidi daro layttawu haggaazanaadan Yihooway maaddiis. Eelaasa hanotay nuuyyo hidootay deꞌanaadan oottees. Issi issitoo nuuni asatettaaninne qofan keehi daafuranaadan oottiya unꞌꞌissiyaabay nuna gakkana danddayees. Gidoppe attin, nuuni Yihoowan ammanettikko, ayyo aggennan haggaazanaadan koshshiya wolqqaa I nuuyyo immana.—Isi. 40:28, 29. w19.06 15 ¶4; 16 ¶9-10

Nuuni Xoossaa Kawotettaa mishiraachchuwaa haratuyyo sabbakiyoogan haꞌꞌi kaseegaappe aaruwan xala gidana danddayoos. Aybissi? Sabbakiyoogee nuuni Yihoowan ammanettanaadan tamaarissees, qassi asaa yayyiyoogaa agganaadan oottees. Nuuni ispporttiyaa oottiyo wode nu dibbay minniyoogaadan, nuuni sooppe soo biidi, dabaaban, haggaazuwaa kiyennaaninne zalꞌꞌe heeratun sabbakiyo wode kaseegaappe aaruwan xala gidoos. Nuuni haꞌꞌi sabbakanawu xalikko, kawotettay nu oosuwaa teqqiyo wodekka ubbatoo sabbakanawu giigi uttidaageeta gidoos. (1 Tas. 2:1, 2) Keehi xalida ammanettida michcheeppe nuuni darobaa tamaarana danddayoos. Nansi Yuꞌaaniyyo geesay 1.5 meetire heera gidikkonne, A yayyukku. Xoossaa Kawotettaa mishiraachchuwaa sabbakiyoogaa A aggennan ixxaasu. Hegaappe denddidaagan, A CHayna biittan 20 layttaappe daruwaa qashettaasu. O oychchida sunttati A bantta biittan “ooppenne aaruwan zozza asa” gidiyoogaa yootidosona. w19.07 5 ¶13-14

Amarida asay Geeshsha Maxaafaa tumaa tamaaranawu koyees, shin nu demmiyo daroti koyro heeran koyokkona. Eti gujjidi tamaaranawu koyanaadan nuuni minttettiyoogee koshshana danddayees. Haggaazuwan muruta gidanawu, nuuni loytti giigettana koshshees. Neeni demmiyoogeeta ufayssana danddayiya qofaa doora. Yaatada neeni he qofaa waatada erissanaakko qoppa. Leemisuwawu, neeni keettaawaa hagaadan oychchana danddayaasa: “Issibaa xeelliyaagan ne qofay aybakko nena oychchoo? Nuna gakkiya daro metoti kumetta saꞌan deꞌiya asaa qohoosona. Alamiyan deꞌiya meto ubbaa xayssana issi kawotettay nuussi koshshees gaada qoppa eray?” Yaatada Daaneela 2:44 tobbana danddayaasa. Woy qassi issi urawu hagaadan gaana danddayaasa: “Naatuyyo loꞌꞌo eeshshay deꞌiyoogeeta gidanaadan tamaarissiyo loꞌꞌo ogee aybee? Hegaa xeelliyaagan ne qofaa yootuutee?” Yaatada Zaarettido Wogaa 6:6, 7 tobba. Asay Kiristtoosi erissiyo ashkkara gidanaadan maaddiyo wode, nuuni keehi ufayttiyoogee qoncce. w19.07 15 ¶4, 6-7

Taywaanen haymaanootee baynna asatussi daro wodiyawu sabbakida issi ishay hagaadan giis: “Darotoo, issi uri ‘taani Xoossaa ammanikke’ giyo wode, he uri eeqa xoossatussi goynnikke giyoogaa. Hegaa gishshawu, daro eeqa xoossati asi medhdhidobaanne tumubaa gidennaagaa taani darotoo maayays. Taani darotoo Ermmaasa 16:20 nabbabada hagaadan oychchays; ‘Tumu xoossay awugaakkonne asi medhdhidoogee awugaakko waati erana danddayiyoo?’ I yootiyoobaa siya simmada Isiyaasa 41:23n deꞌiya, ‘Intte xoossata gidiyoogaa nuuni erana mala, sinttappe yaanau de7iyaabaa nuussi yootite’ giya xiqisiyaa nabbabays. Yaatada, Yihooway sinttappe polettanabaa waati yootidaakko issi leemisuwaa bessays.” Hara ishay hagaadan gees: “Geeshsha Maxaafan aadhdhida eratettay deꞌiyoogaa bessiyaabata, polettida hiraagatanne saluwaanne saꞌaa ayssiya higgiyaa taani eta bessays. Yaatada, ha ubbabay paxa deꞌiyaanne eranchcha gidida Medhdhidaagee deꞌiyoogaa qonccissiyoogaa taani eta bessays. Issi uri Xoossay deꞌiyoogaa ammanana danddayettees giidi qoppiyo wode taani Geeshsha Maxaafay Yihoowabaa yootiyoobaa A bessays.” w19.07 23-24 ¶14-15

Yihoowa sunttaa bonchchissiyo ogeti, I gelido polettiya qaalati, qassi gubaaꞌiyaa sarotettaynne issippetettay ha keehi koshshiyaabatu leemisota. (Maa. 6:9, 10; Yoh. 13:35) Hageeti nu deꞌuwan keehi koshshiyaabata gidiyo wode, nuuni Yihoowa siiqiyoogaa bessoos. Kiitettida PHawuloosi nuuni “boree baynnaageeta” gidana koshshiyoogaakka yootiis. Hegaa giyoogee nuuni wottiyoobi baynna asa gidana bessees giyoogaa gidenna. Nuuni Xoossaa Yihoowagaara issi mala ogiyan boree baynnaageeta gidana danddayokko. SHin, nuuni nu siiquwaa gujjanawunne keehi koshshiyaabaa shaakki eranawu nuussi danddayettida ubbabaa oottikko, Yihooway nuna boree baynna asadan xeellana. Nuuni harata xubbennaadan naagettanawu nuussi danddayettida ubbabaa oottiyoogan nu siiquwaa bessana danddayoos. Harata xubbennaadan imettida azazoy keehi wolqqaamaba. Nuuni issi ura waati xubbana danddayiyoo? Nuuni allaxxiyoobaa, maayiyoobaanne oosuwaa dooriyo wode hegaadan oottana danddayoos. Nu oottiyoobay bala gidennan aggana danddayees. SHin nuuni dooriyoobay issi uraa kahaa qohin I woy A xubettikko, hegee wolqqaamaba.—Maa. 18:6 w19.08 10 ¶9-11

Yohaannisi ajjuutan beꞌido zaway baynna daro asati saꞌan merinawu deꞌanawu hidootiya ammanettida Kiristtaanetu cita gidiyoogaa Yihoowa Markkati 1935⁠ppe doommidi akeekidosona. (Ajj. 7:9, 10) Gita waayiyaappe paxa attanawu, zaway baynna daro asay SHaꞌu Layttaa Haaroy doommanaappe kase Yihoowa ogetubaa tamaarana koshshees. Eti Kiristtoosa SHaꞌu Layttaa Haaruwaappe kase ‘yaana he ubbaappe attanawu’ mino ammanoy deꞌiyoogeeta gidana koshshees. (Luq. 21:34-36) Zaway baynna daro asati bantta hidootan keehi ufayttoosona. Yihooway baayyo ammanettidi goynniyaageeti saluwaana gidin saꞌaana gidin, ayyo awan haggaazanaakko kuuyiyaagee A gidiyoogaa eti akeekidosona. Tiyettidaageetikka zaway baynna daro asatikka Yihooway Yesuus Kiristtoosa wozuwaa yarshshuwaa giigissidoogaa gaasuwaana xallappe attin, eti bantta oosuwan bantta woytuwaa demmennaagaa akeekoosona.—Roo. 3:24. w19.09 28 ¶10; 29 ¶12-13

Neessi ooratta maatay imettidee? Ne ooratta hanotan muruta ayfiyaa demmana danddayaasa. Kase haggaaziyo wode neeni loytta oottabeennabadan woy qassi haꞌꞌi neeni goꞌꞌennabadan qoppoppa. Haꞌꞌi nena Yihooway daro ogiyan maaddiiddi deꞌiyoogaa qoppa, qassi aggennan sabbaka. Koyro xeetu layttan deꞌida ammanettida Kiristtaanetu leemisuwaa kaalla. Eti “qaalaa yootiiddi, ubbasaa biidosona.” (Oos. 8:1, 4) Neeni ubbatoo sabbakikko loꞌꞌo ayfiyaa demmana danddayaasa. Leemisuwawu, issi biittaappe aqinyeta yedettin eta qaalan aassiyaageeti keehi koshshiyo shooro biitti eti biidosona. Amarida aginatu giddon, eesuwan dicciya citay yan eqqiis. Nuuni nu maataa siiqikkonne, maatan gidennan, nuuni Yihoowaara dabbotido dabbotan keehi ufayttana koshshees. Yaatiyo gishshawu, ufayttanawu koyikko, nuuni Yihoowaara matatti deꞌana, aadhdhida eratettaa, kaaletuwaanne maaduwaa appe demmanaagaa muletoo ammanettana koshshees. Intte kase haggaaziyo sohuwan deꞌiya asaa maaddanawu inttessi danddayettida ubbaa oottidoogan kase maataa intte dosidoogaa hassayite. Intte wozanaa intte ooratta maatan wottite, qassi intte hegaakka siiqanaadan Yihooway waati maaddiyaakko akeekite.—Era. 7:10. w19.08 24-25 ¶15-16

Yihooway nuna Medhdhidaagaa gidiyo gishshawu, nuuni ayyo haarettana koshshees. Hegaa gishshawu, nuuni ay oottana koshshiyaakko nuuyyo yootanawu awu maatay deꞌees. (Ajj. 4:11) SHin nuuni Yihoowayyo azazettiyo hara gaasoy, I haariyo ogee keehi loꞌꞌo gidiyo gishshataassa. Asi deꞌido wodetun daro asati harata haaridosona. SHin, eti haarido ogiyaa Yihooway haariyo ogiyaara geeddarssiyo wode, Yihooway eta ubbaappe aaro eran, siiquwan, maarotaaninne qaretan Haariyaagaa gidiyoogaa akeekoos. (Kes. 34:6; Roo. 16:27; 1 Yoh. 4:8) Nuuni ubbaban Yihoowayyo azazettanawu nuuyyo danddayettida ubbabaa oottiyoogaaninne nu akeekan zemppanawu koyiyoogaa eqettiyoogan Yihoowayyo haarettoos. (Lee. 3:5) Nuuni Yihoowa loꞌꞌo eeshshatubaa loytti tamaariyo wode, awu haarettanawu metootokko. Aybissi? I oottiyo ubbaban he eeshshati qoncciyo gishshataassa. (Maz. 145:9) Nuuni Yihoowabaa loytti tamaariyo wode, A loytti siiqana. Qassi nuuni Yihoowa siiqiyo wode, nu ay oottanaakkonne ay oottana koshshennaakko I nuussi daro higgeta yootanaadan koyokko. w19.09 14 ¶1, 3

Seexaanay asay hidootaa qanxxanaadan oottiya wordduwaa worddotiyoogan eti unꞌꞌettanaadan oottees. Leemisuwawu, Yihooway nu nagaraa atto geennanne nuna siiqenna giidi nuuni qoppanaadan I koyees. Hegee wolqqaama toohonne hanttaara worddo! (Yoh. 8:44) Nuuni Kiristtoosakko ‘yiyo’ wode, nu nagaray atto geetettees. (Maa. 11:28) Yihooway nuna ubbaa wozanappe siiqees. (Roo. 8:32, 38, 39) Nuuni tookkanaadan Yesuusi shoobbido toohoy nu tookkana bessiya hara toohotuppe dummatees. Leemisuwawu, daroti oosuwaappe simmiyo wode daafuriyoogaa xalla gidennan, ufayttokkona. SHin, Yihoowayyoonne Kiristtoosayyo haggaaziyoogan daro wodiyaa aatti simmidi, nuuni keehi ufayttoos. Nuuni daafurana danddayoos; qassi he wode gubaaꞌiyaa shiiquwaa shiiqanawu nuna giddennan waayi aggana. SHin, he shiiquwaappe soo simmiyo wode, nuuni shemppo demmoosinne minettoos. Nuuni sabbakiyo wodenne Geeshsha Maxaafaa buzo xannaꞌiyo wodekka, hanotay hegaa mala. Nuuni yaatanawu baaxetikko, shemppo demmoosinne minettoos. w19.09 20 ¶1; 23-24 ¶15-16

Yihoowa ‘gallassay’ doommanawu guutta wodee attido gishshawu, nuuni aggennan minnidi sabbakanaadan I koyees. Nuuni “Godaa oosuwaa azallennan” oottana koshshees. (1 Qor. 15:58) Yesuusi wurssetta wodiyan hanana gitabata xeelliyaagan ubbabaa yootiyo wode, I gujjidi, “Wonggeliyaa mishiraachchoi koiroora dere ubbau odettiichchanau bessees” yaagiis. (Mar. 13:4, 8, 10; Maa. 24:14) Hagaa qoppa: Neeni haggaaziyo wode ubban, Geeshsha Maxaafaa hiraagay polettanaadan maaddaasa! Kawotettaabaa sabbakiyo oosoy keehi aakkiis. Leemisuwawu, wurssetta gallassan kumetta saꞌan Kawotettaabaa aassiyaageetu qooday ay keena gujjidaakko qoppa. Eti 1914n, 43 biittatun 5,155. Ha wodiyan, 8.5 miiloone gidiya aassiyaageeti 240 biittatun deꞌoosona! Hegaa gidinkka, nu oosoy biron wuriichchibeenna. Asaa metuwaa ubbaa qaarana danddayiyay Xoossaa Kawotettaa xalla gidiyoogaa nuuni aggennan awaajjana bessees.—Maz. 145:11-13. w19.10 8 ¶3; 9-10 ¶7-8

Kawuwaa Daawita maaddanaadan Yihooway Barzzillaaya goꞌettiis. Daawitinne A asay Daawita naꞌaa Abeseloomappe baqatiyo wode asay “namisettiis, daafuriisinne saamettiis.” Barzzillaayi he wode cima; I haratuura issippe gididi Daawitayyoonne aara deꞌiyaageetuyyo koshshiyaabaa kunttanawu ba shemppuwaa daafaban yeggiichchi attiis. I cimido gishshawu Yihoowayyo aynne maaddikke giidi qoppibeenna. SHin I bawu deꞌiyaaban maadoy koshshiyo Xoossaa ashkkarata kehatettan maaddiis. (2 Sam. 17:27-29) Nuuni hegaappe ay tamaariyoo? Nu layttay ay keena gidikkonne, nu heeran gidin woy hara biittan gidin koshshiyaabaa demmanawu metootiya nu ishanttanne michchontta maaddanaadan Yihooway nuna goꞌettana danddayees. (Lee. 3:27, 28; 19:17) Nuuni biidi eta maaddennan aggana danddayoos; shin maadoy koshshiyo wodiyaaninne sohuwan ishanttanne michchontta maaddanawu kumetta alamiyan oosettiya oosuwawu miishshaa immana danddayoos.—2 Qor. 8:14, 15. w19.10 21 ¶6

Issi uri nuna kase qohidoogaa gaasuwan nuuyyo siyettiyaabaa haratuyyo qonccissi yootanawu nuuni metootana danddayoos. (Lee. 18:19) Woy qassi nuuni haratuura laggetettaa minttanawu nuuyyo wodeenne wolqqay baynnabadan siyettana danddayees. Gidoppe attin, nuuni hegee danddayettennaba giidi qoppana bessenna. Nu ishantti metuwan nuna maaddanaadan koyikko, nuuni etaara dabbotaa ha wodiyan minttana koshshees. Hegaadan oottiyo issi ogee nu qoppiyoobaanne nuuyyo siyettiyaabaa etawu yootiyoogaa. (1 PHe. 1:22) Yesuusi ba laggetuyyo issibaanne genttennan tumaa yootiyoogan etan ammanettiyoogaa bessiis. (Yoh. 15:15) Nuna ufayssiyaabaa, hirggissiyaabaanne yilloyiyaabaa nu laggetuyyo yootiyoogan A leemisuwaa kaallana danddayoos. Issi uri neeyyo yootiyo wode loytta ezggikko, ne qofay, neeyyo siyettiyaabaynne ne halchchoy aagaara issi mala gidiyoogaa akeekana danddayaasa. Haratuura ne qofaanne neessi siyettiyaabaa haasayikko, intte laggetettay minnana danddayees.—Lee. 27:9. w19.11 4 ¶8-9

Gita waayiyaa wode, nuuni sabbakiyoobay laamettennan waayi aggana. Ha wodiyan, nuuni Kawotettaa mishiraachchuwaa sabbakoosinne erissiyo ashkkara oottanawu baaxetoos. SHin nuuni he wode loytti sabbakiyoobay wolqqaama shachchaa mala gidana danddayees. (Ajj. 16:21) Nuuni sabbakanabay Seexaanaa alamee mata wode muleera xayiyoogaa gidana danddayees. Guyyeppe, nuuni yootiyoobay ay gidanaakko, qassi hegaa waati yootanaakko loytti erana. Xeetu layttappe dariya wodiyawu sabbakanawunne tamaarissanawu nuuni goꞌettido hiillaara issi mala gididaba goꞌettanee? Woy amarida hara hiillata goꞌettanee? Nuuni erokko. Nuuni sabbakiyo hiillay ayba gidikkokka, Yihoowa pirddaa kiitaa xalidi yootiyo maatay nuuyyo deꞌanaba milatees! (Hiz. 2:3-5) Nu yootiyo kiitay nuuni sabbakiyoogaa muleera digganawu kawotettati nuna wolqqanttanawu malanaadan oottanaagee qoncce. Ha wodiyan, Yihooway haggaazuwan maaddiyoogaa nuuni ammanettiyoogaadan, he wodekka I nuna maaddanaagaa ammanettana koshshees. Nuuni Xoossaa sheniyaa polanaadan I nuuyyo minotettaa immanaagaa ammanettana danddayoos.—Mik. 3:8. w19.10 16 ¶8-9

“Deshidosona” giya qofay koshshenna aquwaa demmanawu baaxetiyoogan qofay shaahettana danddayiyoogaa bessiyaaba. He wode nuuni “daro eeyyanne qohiya” amuwaa amottana danddayoos. (1 Xim. 6:9) SHin, Seexaanay nu ammanuwaa shugissanawu he amota ola miishshadan goꞌettiiddi deꞌiyoogaa nuuni hassayana koshshees. Nuuyyo darobaa shammanawu gidiya miishshay deꞌiyaabadan qoppa. Nuussi keehi koshshana xayikkonne, nu koyiyoobaa shammikko, hegee balee? Bala gidennan aggana danddayees. SHin ha oyshata qoppa: Nuuni issi issibaa shammana danddayikkonne, hegaa goꞌettanawunne moorettikko giigissanawu nuussi wodeenne wolqqay deꞌii? Qassi nu aquwaa keehi siiqiyoogaa doommana danddayiyoo? Miishshaa siiqiyoogee Xoossawu kaseegaappe aaruwan haggaazanaadan Yesuusi shoobbin ixxida yelaga bitaniyaadan nuna oottana danddayii? (Mar. 10:17-22) Sima deꞌuwaa deꞌiyoogaaninne Xoossaa sheniyaa poliyoogan nu alꞌꞌo wodiyaanne wolqqaa goꞌettiyoogee keehi loꞌꞌo! w19.11 17-18 ¶15-16

Neeni oottanaadaaninne ne kuuyidobaa polanaadan Xoossay neessi ‘wolqqaa’ immana danddayees. (Pili. 2:13, NW) Hegaa gishshawu, neessi koshshiya wolqqaa immanaadan woossa. Ne oyshawu zaaroy gamꞌꞌidaba milatikkokka woossiyoogaa aggoppa. Yesuusi yootidoogaadan: ‘Woossa, neeni geeshsha ayyaana ekkana.’ (Luq. 11:9, 13) Halchchuwaakka kessa. Neeni doommido ay oosuwaanne polanawu halchchuwaa koshshees. Yaatada he halchchidoogaadan oottana koshshees. Hegaadankka, neeni issibaa kuuyiyo wode, hegaa polanawu oottana koshshiya ooso ubbaa xaafa. Issibay oottanawu wayssiyo wode, guuttaa guuttaa oottanawu shaakka. He guutta oosotuppe issuwaa wurssiyo wode ubban neeni ay keena oottidaakko akeekana danddayaasa. Kiitettida PHawuloosi Qoronttoosan deꞌiyaageeta I yiyo wode miishshaa shiishshanawu baaxetiyoogaappe ‘saaminttan saaminttan koyro galla’ guutta miishshaa dagayanaadan minttettiis. (1 Qor. 16:2, NW) Wolqqaama oosuwaa guuttaa guuttaa shaakki oottiyoogee unꞌꞌettennaadan oottana danddayees. w19.11 29 ¶13-14

Nuuni Yihoowa sunttaa woy I haasayido woy oottido issi issibata eriyo gishshawu, A eroos giidi qoppana danddayoos. SHin hegaa giyoogee nuuni Yihoowa loytti eroos giyoogaa gidenna. Yihoowa eranawu harabaa oottana koshshees. Nuuni Yihoowabaanne A eeshshatubaa tamaaranawu wodiyaa bazzana bessees. Haasayanawunne oottanawu Yihoowa aybi denttettidaakko nuuni akeekana danddayiyoy yaatiyoogaa xallaana. Hegee nuuni qoppiyoobaanne oottiyoobaa Yihooway dosiyaakkonne dosennaakko eranaadan nuna maaddana. Nuuni ay oottanaadan Yihooway koyiyaakko erikko, hegaa oottana koshshees. Nuuni Yihoowayyo haggaazanawu koyiyo gishshawu issi issi asay nuna qilliiccana danddayees, ubba qassi nuuni shiiquwaa biyoogaa doommiyo wode eti kaseegaappe aaruwan nuna eqettana danddayoosona. SHin, nuuni Yihoowan ammanettikko, I nuna mule aggenna. Nuuni Xoossaara merinawu duuxxenna dabbotaa dabbotiyoogaa doommana. Nuuni Yihoowa hegaadan loyttidi erana danddayiyoo? Ee, danddayoos! w19.12 16-17 ¶3-4

Yelidaageeti bantta naata tamaarissiyoogee issi issitoo keehi deexxiyaabadan qoppana danddayoosona; shin naati Yihoowa imota. Yelidaageeta maaddanawu I ubbatoo giigi uttiis. Yelidaageetu woosaa siyanawu koyees. Qassi Geeshsha Maxaafaa baggaara, nu xuufetu baggaara, qassi gubaaꞌiyan deꞌiya leemiso gidiya kayma aawatinne aayoti immiyo zoriyaa baggaara Yihooway eta woosaa zaarees. Issi issi asay naꞌa dichchiyoogee 20 layttaa ekkiyoogaa yootees; shin yelidaageeti naata dichchiyoogaa mule aggokkona. Siiqoy, wodeenne Geeshsha Maxaafaa maaraadan loohissiyoogee, eti bantta naatussi immana danddayiyo keehi loꞌꞌobatuppe amaridaageeta. Naati ubbay imettiya loohissuwaa issi mala ogiyan oosuwan peeshshokkona. SHin Yihoowa siiqiya aawatinne aayoti dichchido naatuppe darotuyyo Isiyan deꞌiya Joꞌan Maꞌe giyo issi michcheegaadan siyettees. A hagaadan gaasu: “Tana seerido gishshawunne Yihoowa siiqanaadan tamaarissido gishshawu taani eta keehi galatays. Eti taani coo deꞌo deꞌanaadan gidennan, ufayttada deꞌanaadan oottidosona.” (Lee. 23:24, 25) Miilooniyan qoodettiya ishanttussinne michchotussikka hegaadan siyettees. w19.12 27 ¶21-22

Minttettoy koshshiyo ishanttanne michchontta demmanaagee metiyaaba gidenna. Nuuni yayyikkonne, harata maaddana danddayiyo ogeta koyana koshshees. Leemisuwawu, nuuni minttettoy koshshiyo urawu haasayiyoobaa woy oottiyoobaa erenna gishshawu yayyana danddayoos. SHin nuuni haratussi qoppiyoogaa bessiyaaba gidikko, keehi minttettiyaageeta gidana danddayoos. Ha alamiyaa wurssettay keehi matido gishshawu, ha alamee kaseegaappe yaa iiti iiti baananne deꞌoy keehi deexxiyaaba gidana. (2 Xim. 3:13) Qassi nuuni nagaranchcha gidiyo gishshawunne ubbatoo balabaa oottiyo gishshawu nuussi muletoo minttettoy koshshees. PHawuloosi hayqqana gakkanaashin ammanettidi genccana danddayido issi gaasoy A mala Kiristtaaneti A minttettido gishshataassa. Nuunikka eta leemisuwaa kaalliyoogan, nu ishanttinne michchontti ammanettidi Yihoowawu aggennan haggaazanaadan maaddana danddayoos.—1 Tas. 3:2, 3. w20.01 12-13 ¶17-19

Tiyettidaageeti harati banttana dumma ogiyan xeellanaadan naagokkona. (Pili. 2:2, 3) Yihooway eta tiyidoogaa eti erikkonne, I hara uri hegaa erana mala oottenna. Hegaa gishshawu, tiyettida issi uri I tiyettidoogaa hara asi sohuwaara ammanana xayikko, garamettenna. Issi uri Xoossay bana dummabawu dooridoogaa yootiyo wode he ura nuuni eesuwan ammanenna mala Geeshsha Maxaafay yootiyoogaa I akeekees. Tiyettida Kiristtaanee asay an xeelaa wottanaadan koyenna. Hegaa gishshawu, I asaara gayttiyo wode, I tiyettidoogaa asawu yootenna. Qassi I hegan ceeqettenna. (1 Qor. 4:7, 8) Tiyettida Kiristtaaneti ayyaanan tiyettida giya harata koyidi eti tiyettidoogaa xeelliyaagan haasayanawu woy Geeshsha Maxaafaa citan xannaꞌanawu malokkona. (Gal. 1:15-17) Tiyettidaageeti hegaadan oottikko, gubaaꞌiyaa giddon issippetettay deꞌenna. Eti Xoossaa asay sarotettaaninne issippetettan deꞌanaadan oottiya, geeshsha ayyaanaa oosuwaappe dummatiyaabaa oottoosona.—Roo. 16:17, 18. w20.01 28 ¶6-7

Issi wode, eta haymaanootee xayido asati Yihoowa Markkatu haymaanootee xayibeenna gishshawu keehi yiillotana danddayoosona. Eti keehi yiillotidoogaa harati Intterneetiyaa malaban eranaadan oottana. Xayibeennay mexi issi nu haymaanootiyaa xalla gidiyo gishshawu kawotettatinne eta haariya Seexaanay nuna ixxana. Eti haymaanootiyaa ubbaa saꞌaappe xayssanawu halchchido halchchuwaa polibookkona. Hegaa gishshawu, eti nuna xayssanawu qoppana. He wode, kawotettati Maagooga Googa gidana. Eti issuwaa gidana; qassi bantta wolqqa ubban Yihoowa asaa bolli denddana. (Hiz. 38:2, 14-16) Nuuni gita waayiyaa wode hananabaa, ubba qassi hegaabaa wurssi erenna gishshawu hirggiyoogaa doommana danddayoos. SHin, nuuni gita waayiyaa yayyana koshshennaagaa ammanettana danddayoos. Yihooway nuussi shemppo ashshiya kaaletuwaa immana.—Maz. 34:19. w19.10 16-17 ¶10-11

Nuuni saluwan deꞌiya nu Aawaakko shiiqidi deꞌanawu, ubbatoo A galatiyaageeta gidana koshshees. Nuuni nu wozanan galatiyoogaa xalla gidennan, haasayiyoobaaninne oottiyooban Yihoowa galatiyoogaa bessoos. Hegee ha wodiyan deꞌiya daro asaappe nuuni dummatiyoogaa bessees. Ha wodiyan daro asati Xoossay etawu oottido ubbabaa gishshawu galatokkona. Nuuni ‘wurssetta gallassatun’ deꞌiyoogaa bessiya issibay asay galatennaagaa gidiyoogaa. (2 Xim. 3:1, 2) Nuuni hegaa mala asa gidanawu koyokko! Yihooway awu goynniya ubbati issoy issuwaara lagge gidanaadan koyees. Nuuni issoy issuwaara siiqettiyoogee tumu Kiristtaane gidiyoogaa bessees. (Yoh. 13:35) Nuuni mazamuraawiyaagaadan, “Ishantti issippetettan de7iyoogee aiba lo77obeenne ufaissiyaabee!” yaagoos. (Maz. 133:1) Nuuni nu ishanttanne michchontta siiqiyo wode, Yihoowa siiqiyoogaa bessoos. (1 Yoh. 4:20) ‘Issoy issuwaayyo kehiyaanne qarettiya’ ishanttunne michchonttu so asaa yara gidiyoogee ayba ufayssiyaabee!—Efi. 4:32. w20.02 9 ¶6-7

Haanni metoy sohuwaara xayibeenna. A Piniiniira issi keettan deꞌaasu. Qassi Piniini xeelay laamettidaakkonne Geeshsha Maxaafay yootenna. Hegaa gishshawu, Piniina haasayiyo iita haasayaa Haanna genccada deꞌennan aggukku. SHin Haanna hegaappe simmin yiillotabeykku. Haanna ba woosaa Yihooway siyidoogaa ammanettido wode woppu gaasu. Yihooway O minttettiisinne woppu oottiis. Guyyeppe, Haanna naata yeliyoogankka anjjettaasu! (1 Sam. 2, 6, 7, 17-20) Nuna unꞌꞌissiyaabay deꞌishinkka, woppaa demmana danddayoos. Nuuni mintti woossiyaabanne ubbatoo shiiqota shiiqiyaaba gidikkokka amarida metoti xayennan aggana danddayoosona. SHin Yihooway nuna woppu oottennaadan diggana danddayiyaabi mule baynnaagaa Haanni hanotaappe tamaaroos. Yihooway nuna mule dogenna; qassi nuuni hidootaa qanxxibeenna gishshawu I nuna woytana.—Ibr. 11:6. w20.02 22 ¶9-10

Cimati harati loꞌꞌobaa oottanaadan maaddiya Geeshsha Maxaafaa maarata etawu yootoosona. Haasayana bessiyo wode eti haasayiyoogee keehi koshshiyoy aybissee? Eelabaa ane qoppa: Qeese Ubbatu Halaqaa Eelassi I keehi siiqiyo naaꞌꞌu attuma naati deꞌoosona. SHin, he naati Yihoowa bonchchokkona. Etayyo gita aawatettay deꞌees. Eti Xoossaa dunkkaaniyan qeese gididi oottoosona. Gidoppe attin, eti bantta maataa bessenna ogiyan goꞌettidosona, Yihoowayyo shiiqiya yarshshota keehi kariyoogaa bessidosona, qassi macca asaara zinꞌꞌidosona. (1 Sam. 2:12-17, 22) Muuse Higgiyaa maaran Eela naati hayqqana koshshees, shin Eeli eta mintti seeribeenna, qassi eti Xoossaa dunkkaaniyan oottiyoogaa agganaadan diggibeenna. (Zaa. 21:18-21) Eeli ha hanotan oottidoban Yihoowawu aybi siyettidee? I Eelawu hagaadan giis: “Neeni ne naata taappe aattada aissi bonchchadii?” He wode Yihooway he naaꞌꞌu iita asati hayqqanaadan kuuyiis.—1 Sam. 2:29, 34. w20.03 19 ¶4-5