Naase

Yesuusi yedetay gakkido wodekka sarotettan deꞌiis; ayssi giikko, hegee ba Aawaa ufayssiyoogaa I erees. Azazettiyoogee awu deexxiyaaba gidiyo wodekka I azazettiis. I ba Aawaa siiqees, qassi I Yihoowawu haggaaziyoogee A deꞌuwan aybippenne aadhdhees. I saꞌaa yaanaappe kase, Xoossawu “waanna oosanchcha.” (Lee. 8: 30) Qassi I saꞌan deꞌiyo wode, haratussi ba Aawaabaa keehi minttidi tamaarissiis. (Maa. 6:9; Yoh. 5: 17) He oosoy Yesuusawu gita ufayssaa demissiis. (Yoh. 4:34-36) Nuuni Yihoowawu azazettiyoogaaninne ‘ubba wode Godaa oosoy’ daridoogeeta gidiyoogan Yesuusa leemisuwaa kaallana danddayoos. (1 Qor. 15:58) Nuuni sabbakiyo oosuwaa mintti oottiyo wode, nu metuwaa xeelliyaagan loꞌꞌobaa qoppana danddayoos. (Oos. 18:5) Leemisuwawu, nuuni haggaazuwan demmiyoogeeta darotoo nuugaappe aaro metoy gakkees. Gidikkokka, eti Yihoowa siiqiyoogaa tamaaridi A zoriyaa oosuwan peeshshiyo wode, eta deꞌoy kaseegaappe giiga gidees; qassi eti ufayttoosona. Nuuni darotoo hegaa malabaa beꞌiyoogee, Yihooway nuussi qoppiyoogaa kaseegaappe aaruwan ammanettanaadan oottees. w19.04 10-11 ¶8-9

He asati iita ayyaanatu oosuwaa eqettanawu danddayiyo ubbabaa oottidosona. SHareechchiyoogaara gayttida eta maxaafatu waagay keehi daro. Gidikkonne, eti he maxaafata haratussi immiyoogaappe woy bayzziyoogaappe eta xayssidosona. Eta keehi qofissiday ha maxaafata bayzzidi demmiyo miishshaa gidennan, Yihoowa ufayssiyoogaa. Koyro xeetu layttan deꞌida he Kiristtaanetu leemisuwaa waati kaallana danddayiyoo? Iita ayyaanaa oosuwaara gayttidabay deꞌikko xayssiyoogee loꞌꞌo. Asay bana iita ayyaanatuppe naaganawu qachchiyo kitaafati, yeleelloti woy harabati hegeetuppe amaridaageeta. (1 Qor. 10:21) Neeni allaxxiyoobaa loyttada qora. Nena hagagaadan oychcha: “Taani allaxxiyo iita ayyaanaa oosuwaara gayttida aybinne deꞌii? Yihooway ixxiyoobatuppe haakkada deꞌana mala maaddiyaabaa dooranawu murtta. Nuuni Xoossaa sinttan “pokkoi bainna zoriya wozanai” woy kahay deꞌiyoogeeta gidanawu nuussi danddayettida ubbabaa oottanawu koyoos.—Oos. 24:16. w19.04 22-23 ¶10-12

Cimati issi uri gita nagaraa oottidoogaa eriyo wode, darobaa akeekan qoppana bessees. Cimata qofissiya waannabay Xoossaa sunttaa geeshshatettaa naagiyoogaa. (Wog. 22:31, 32; Maa. 6:9) Gubaaꞌiyan deꞌiya ishanttinne michchontti ayyaanaaban payya gidiyoogeekka eta keehi qofissees; qassi eti nagaraa gaasuwan qohettida uraa maaddanawu koyoosona. Hegaa bollikka, cimati gita nagaraa oottida uri ba nagaraappe simmidoogaa akeekanawunne, I simmikko, Yihoowaara zaarettidi dabbotanaadan maaddanawu baaxetoosona. (Yaaq. 5:14, 15) Ba iita amuwaa polanawu gita nagaraa oottiya Kiristtaanee sahettida ura mala. Hegaa giyoogee Yihoowaara ayyo dabbotay loꞌꞌo gidenna giyoogaa. Nuuni cimata dottoretuura geeddarssana danddayoos. Eti ‘hargganchchaa [nagaraa oottidaagaa] pattanawu’ baaxetoosona. Eti Geeshsha Maxaafaappe zoriyo zoree I Xoossaara zaarettidi dabbotanaadan maaddana danddayees; shin hegaadan hanana danddayiyoy I wozanappe ba nagaraappe simmiyo wode xallaana.—Oos. 3:19; 2 Qor. 2:5-10. w19.05 10 ¶10-11

Yihooway inttena bawu eeno gaanaadan oottana danddayees. Nuuni nu gubaaꞌiyan woy harasan maadoy koshshiyo issi ura akeekana danddayoos. Hegee nuuni nuna hagaadan oychchanaadan oottees: ‘Taani maaddanawu ay oottana danddayiyaanaa?’ Woy issi wolqqaama oosoy nuussi imettana danddayees; qassi nuuni hegaa loytti oottiyoogaa erennan aggana danddayoos. Woy Geeshsha Maxaafaappe amarida xiqiseta nabbabi simmidi nuna hagaadan oychchana danddayoos: ‘Taani harata maaddanawu ha xiqisiyaa waata goꞌettana danddayiyaanaa?’ Issibaa oottanaadan Yihooway nuna wolqqanttenna. SHin nuuni ay oottanaakko qoppiyoogaa Yihooway beꞌiyo wode, I nuuni qoppidobaa oottanaadan nuna maaddanawu koyees. Oottanaadan nuussi Yihooway wolqqaakka immees. (Isi. 40:29) Nuussi deꞌiya wolqqaa bolli gujjidi I ba geeshshaa ayyaanaa nuussi immana danddayees. (Kes. 35:30-35) Issi oosuwaa waati oottana danddayiyaakko Yihooway ba dirijjitiyaa baggaara nuna tamaarissees. Neeni issi oosuwaa waata oottanaakko shaakka erennaba gidikko, I maaddanaadan oychcha. Qassi saluwan deꞌiya nu keha Aaway ‘ubbaappe aadhdhiya wolqqaa’ immanaadan awudenne oychchana danddayaasa.—2 Qor. 4:7; Luq. 11:13. w19.10 21 ¶3-4

Ha saꞌay ba xallaa siiqanaadan minttettees. Issi Insaykilopidee giiga deꞌuwawu maaddiya maxaafati 1970 heeran keehi daridoogaa yootees. Issi issi maxaafati “asay ba oonatettaa eranaadaaninne ba deꞌuwaa nashshanaadan mintti yootoosona.” Leemisuwawu, hegaa mala maxaafan deꞌiya issi qofaa beꞌa: “Neeni ha saꞌan deꞌida ooppenne loꞌꞌiyaanne ufayttiya asa gidiyo gishshawu ne huuphiyaa siiqa.” Issi asi waananaakko bawu kuuyana, qassi bawu likkenne giiga milatida aybanne oottana koshshiyoogaa he maxaafay yootees. Neeni hegaa kase siya eray? Seexaanay Hewaana hegaadan oottanaadan minttettiis. A “lo77uwaanne iitaa Xoossaadan” erana danddayiyoogaa I yootiis. (Doo. 3:5) Ha wodiyan, daroti banttana keehi xoqqu ootti xeelliyo gishshawu, ooninne, ubba qassi Xoossaykka banttassi hagee likke qassi hagee likke gidenna giidi yootana danddayenna giidi qoppoosona. Leemisuwawu, he qofay asay aqo deꞌuwaa xeelliyo ogiyan keehi qoncci beettiis. w19.05 23 ¶10-11

Kawuwaa Daawiti issi issitoo keehi unꞌꞌettiis. A gakkida metota ane qoppa. I ba oottido daro moorotu gaasuwan keehi zilꞌꞌettiis. (Maz. 40:12) I siiqiyo A naꞌay Abeseloomi A bolli denddiis; yaatidi guyyeppe Abeseloomi hayqqiis. (2 Sam. 15:13, 14; 18:33) Qassi Daawitassi mata laggetuppe issoy A kaddiis. (2 Sam. 16:23–17:2; Maz. 55:12-14) Daawiti xaafido daro mazamureti I azzanidobaa, qassi wozanappe Yihoowan ammanettiyoogaa qonccissoosona. (Maz. 38:5-10; 94:17-19) Guyyeppe issi mazamuraawee iita asatu deꞌuwaa amottiyoogaa doommiis. I ‘Xoossaa geeshsha sohuwan’ haggaazida Leewa zare gidida Asaafa yara gidennan waayi aggana. Ha mazamuraawee unꞌꞌettidoogee I azzananaadaaninne woppu geennaadan oottiis. I haray attoshin Xoossawu haggaaziyoogan demmiyo anjjuwaa siriyoogaa doommiis.—Maz. 73:2-5, 7, 12-14, 16, 17, 21. w19.06 17 ¶12-13

Seexaanay nu meretan koyiyoobaa amottanaadan oottees. Nuuyyoonne nu soo asawu deꞌuwaassi koshshiyaabaa kunttanawu nuuni ubbay koyiyoogee wottin deꞌiyaaba. (1 Xim. 5:8) Darotoo, nuuni timirtte keetti gelidi loytti xannaꞌiyo wode he hiillata tamaarana danddayoos. SHin nuuni akeekanchcha gidana bessees. Daro biittatun, timirtte keettan tamaareti maaddiya hiillata tamaaroosona; shin eti alamiyaa aadhdhida eratettaakka tamaaroosona. Leemisuwawu, timirtte keettati tamaareti Xoossay deꞌiyoogaa siranaadaaninne Geeshsha Maxaafaa karanaadan minttettoosona. Loytti akeekiya asa ubbay deꞌoy lodda laamiyan doommidoogaa ammananaadan tamaaretussi odettees. (Roo. 1:21-23) He timirtteti ‘Xoossaa aadhdhida eratettaa’ phalqqoosona. (1 Qor. 1:19-21; 3:18-20) Seexaanaa alamiyaappe “yiida eratettan, qassi mela cimuwan” mule omooddettennaadan murtta. (Qol. 2:8) Seexaanay nena cimmanaadan mule eeno gooppa. (1 Qor. 3:18) Neeni Yihooway oonakko doganaadaaninne awu ne waata goynnanaadan I koyiyaakko doganaadan Seexaanay oottana mala eeno gooppa. Yihooway kessido kandduwaa maarata kaalla. Yihoowa zoriyaa neeni xaasayanaadan Seexaanay nena cimmanaadan oottoppa. w19.06 5 ¶13; 7 ¶17

Neeni tobbiyo ay qofaakka dooriyo wode, haasayiyoobaa siyana asaabaa qoppa. Tumuppe Geeshsha Maxaafay tamaarissiyoobaa eriyoogee eta ay keena maaddanaakko qoppa. Neeni etaara haasayiyo wode, eti yootiyoobaa ezggiyoogeenne eta qofaa bonchchiyoogee keehi koshshiyaaba. Hegaadan oottiyoogan eta hanotaa loytta akeekaasa, qassi eti ne yootiyoobaa siyana danddayoosona. Issi uri Geeshsha Maxaafaa xinaatiyaa doommanaappe kase, neeni zaaretta oychchanawu wodiyaa bazziyoogaanne baaxetiyoogaa koshshana danddayees. Aybissi? Nuuni eta zaaretti oychchanawu biyo wode, son asaa demmennan aggana danddayiyo gishshataassa. Qassi, keettaaway Geeshsha Maxaafaa xannaꞌanawu eeno gaanaappe kase, neeni darotoo zaarettada oychchana koshshennan aggenna. Haattaa ubbatoo ushshikko, ataakilttee eesuwan diccana danddayiyoogaa hassaya. Hegaadan, nuuni koshshay deꞌiyo uraara ubbatoo Xoossaa Qaalaa tobbiyo wode, he uri Yihoowanne Kiristtoosa siiqiyo siiqoy kaseegaappe aaruwan diccana danddayees. w19.07 14 ¶1; 15-16 ¶7-8

Yesuusi woygana koyidee? Yesuusi Kiristtaaneti banttana asay ixxiyoogan ufayttana gibeenna. I nu bolli aybi gakkanaakko nuuyyo yootiis. Nuuni alamiyaa bagga gidokko. Nuuni Yesuusi tamaarissido timirttiyaadan deꞌoos; qassi I sabbakido mishiraachchuwaa sabbakoos. Hegaappe denddidaagan, alamee nuna ixxees. (Yoh. 15:18-21) Nuuni Yihoowa ufayssanawu koyoos. Nuuni Yihoowa siiqiyo gishshawu, nuna asay ixxikko, yiillotokko. Hara asay nuna bonchchiyo wode nuuni ufayttoos, shin asay nuna dosana xayikko nuuni nuna pattenna asadan xeellana koshshenna. Asay nuna yedettiyoogaa doommana wodiyaa woy kawotettati nu oosuwaa teqqana danddayiyo wodiyaa nuuni erokko. SHin, Yihoowaara dabbotido dabbotaa minttiyoogan, kaseegaappe aaruwan xala gidiyoogaaninne asay nuna ixxiyo wode gencciyoogaa tamaariyoogan nu haꞌꞌi giigettana danddayiyoogaa eroos. Nuuni ha wodiyan giigettiyoogee aggennan Yihoowayyo oottanaadan nuna maaddana. w19.07 6 ¶17-18; 7 ¶21

Nuuni haymaanootee baynna asaa Geeshsha Maxaafaa xannaꞌissiyo wode, Xoossay deꞌiyoogaa mintti ammananaadan eta ubbatoo maaddana koshshees. Qassi Geeshsha Maxaafaa loytti ammananaadan nuuni eta maaddana bessees. Hegawu issi issi timirtteta darotoo zaarettana koshshennan aggenna. Eta xannaꞌissiyo wode ubban, Geeshsha Maxaafaa hiraagati waani polettidaakko, Geeshsha Maxaafay saynisiyaabaanne taarikiyaabaa qonccissiyo wode ay keena tumakko, qassi Geeshsha Maxaafay nuna galla galla deꞌuwan waati maaddiyaakko qonccissiyoogan Geeshsha Maxaafay Xoossaa Qaalaa gidiyoogaa naqaashaa shiishshiyoogaa koshshana danddayees. Asawu haymaanootee deꞌin aggin, nuuni eta siiqiyoogan eti Kiristtoosi erissiyo ashkkara gidanaadan maaddoos. (1 Qor. 13:1) Nuuni eta tamaarissiyo wode, nu halchchoy Xoossay nuna siiqiyoogaanne nuunikka A siiqanaadan I koyiyoogaa bessanaassa. Layttan layttan haymaanootiyaa darin woy mule koyenna shaꞌan qoodettiyaageeti Xoossaa siiqiyoogaa tamaaridi xammaqettidosona. Yaatiyo gishshawu, loꞌꞌobaa qoppa, qassi asa ubbaa siiqa. Eti yootiyoobaa ezgga. Eti qoppiyoobaa akeekanawu baaxeta. Leemiso gidada, eti Kiristtoosi erissiyo ashkkara gidanaadan tamaarissa. w19.07 24 ¶16-17

Yerusalaame dirssaa gimbbiyaa zaarettidi gimbbanaadan Yihooway goꞌettido asatu qoodan SHaaluuma macca naati deꞌoosona. (Nah. 2:20; 3:12) Eta aaway biittaa haariyaagaa gidikkonne, wayssiyaanne bantta shemppuwaa daafaban yeggiya oosuwaa oottanawu bantta dosan eeno giidosona. (Nah. 4:15-18) Ha wodiyan, dumma geeshsha oosuwan, hegeekka Yihoowawu sheerettiya keettaa keexuwaaninne zaaretti giigissiyo oosuwan bantta dosan oottiya michchontti ufayssan maaddoosona. He gooba, minni oottiyaanne ammanettida michchontti he oosuwan nuussi koshshoosona. Xaabita ba deꞌido wode ubban ‘loꞌꞌobaa oottanaadaaninne hiyyeesata,’ ubba qassi amꞌꞌeta maaddanaadan Yihooway denttettiis. (Oos. 9:36) Xaabita wozanappe kehiyaanne loꞌꞌo asa gidiyo gishshawu, A hayqqido wode daroti yeekkidosona. SHin, kiitettida PHeexiroosi O hayquwaappe denttin eti keehi ufayttidosona. (Oos. 9:39-41) Xaabita oottidobaappe ay tamaariyoo? Nuuni yelaga gidin woy cima gidin, attuma gidin woy macca gidin, nu ubbay nu ishanttanne michchontta maaddanawu etawu koshshiyaaba oottana danddayoos. w19.10 23 ¶11-12

Nuuni issi ura waati xubbana danddayiyoo? Ha hanotaa qoppa. Issi Geeshsha Maxaafaa tamaaree ushshaa amaliyaa agganawu daro wodiyawu baaxetidi wurssettan aggiis. I ushshaa harantto mule uyana bessennaagaa akeekiis. I ba deꞌuwan daroban laamettidi xammaqettiis. Guyyeppe, issi ishay A gibiraa shoobbidi, awu ushshaa immiiddi hagaadan giis: “Neeni haꞌꞌi Kiristtaane; Yihoowa ayyaanay neessi deꞌees. Geeshsha ayyaanaa macaraappe issoy ba huuphiyaa naagiyoogaa. Neeni ne huuphiyaa naagikko, guutta ushshaa uyana koshshees.” Mati xammaqettida ishay he bala zoriyaa siyin, haranttuwaa ushshay ayyo amale gidikko, hegee keehi azanttiyaaba! Kiristtaane shiiqoti hachchi gallassaa xiqisiyan odettida zoriyaa oosuwan peeshshanaadan daro ogiyan nuna maaddoosona. SHiiqoti Yihooway xoqqu ootti xeelliyoobaa nuna hassayissoosona; qassi nuuni tamaaridobaa wottiyoobi baynna hanotan waati oosuwan peeshshanaakkokka nuna minttettoosona. Xoossaanne nu ishantta kumetta wozanaappe siiqiyo wode, nuuni nu ishantta xubbennaadan naagettanawu danddayettida ubbabaa oottana. w19.08 10 ¶9; 11 ¶13-14

Hara asati banttanan ammanettiyaageetanne bantta qoppiyoobaa haasayiyaageeta gidana danddayoosona, shin hegee eti otorettoosona giyoogaa gidenna. (Yoh. 1:46, 47) Nuuni dungguuxa gidin gidana xayin, ubbaykka tummuppe nuna ziqqi oottanawu baaxetana bessees. Kiitettida PHawuloosa hanotaa qoppa. Daro katamatun ooratta gubaaꞌeta essanawu Yihooway A keehi goꞌettiis. I Yesuus Kiristtoosi kiittido haratuugaappe aaruwan haggaazennan aggenna. SHin, PHawuloosi ba ishanttuppe aadhdhiyaabadan qoppibeenna. I dumma asa woy darobaa oottida asa gididoogan gidennan, Yihooway assi aaro kehatettaa bessido gishshawu Yihoowaara loꞌꞌo dabbotan deꞌidoogaa PHawuloosi geeshshidi yootiis. (1 Qor. 15:10) Bana ziqqi oottiyoogan PHawuloosi loꞌꞌo leemiso gidiis. Gubaaꞌiyan deꞌiya issoti issoti A borikkonne, Qoronttoosan deꞌiya Kiristtaanetuyyo dabddaabbiyaa xaafido wode, I babaa otoruwan haasayibeenna.—2 Qor. 10:10. w19.09 3 ¶5-6

Yihoowayyo haarettiyoogee metiyaaba gidanaadan oottiya issi gaasoy, nuuni ubbaykka nagaranchcha gidiyoogaa. Yaatiyo gishshawu, nuuni Xoossawu azazettanawu ubbatoo koyokko. Addaameenne Hewaana Xoossaa bolli makkalidi mittaa ayfiyaappe miyoogan aybi loꞌꞌokko aybi iitakko banttawu kuuyidosona. (Doo. 3:22) Ha wodiyan, daro asay Addaameegaadaaninne Hewaaniigaadan Xoossawu azazettanawu koyenna; qassi aybi loꞌꞌokko aybi iitakko bawu kuuyana koyees. Nuuni Yihoowa eriyoonne siiqiyo gishshawu, eta mala gidana xayikkonne, I koyiyo ogiyan ubbatoo oottiyoogee nuna metana danddayees. Kiitettida PHawuloosikka hegaadan metootiis. (Roo. 7:21-23) PHawuloosaagaadan, nuuni Yihoowa sinttan loꞌꞌobaa oottanawu koyoos. SHin iitabaa oottanawu koyiyoogaa nuuni ubbatoo eqettana bessees. Yihoowayyo haarettiyoogee metiyaaba gidana danddayiyo hara gaasoy, nuuni diccido heeraa asaa wogaanne eta qofaa kaalliyoogaa. Yihooway koyiyoobaappe dummatiyaabaa daro asay nuussi yootana. Hegaa gishshawu, nuuni he asatuugaadan qoppennaadan ubbatoo baaxetana koshshees. w19.09 15 ¶4-6

Nuussi ubbaayyo amarida wolqqa xallay deꞌiyoogaa nuuni erana bessees. Yaatiyo gishshawu, nuuni oottanawu baaxetiyoobaa xeelliyaagan akeekanchcha gidana bessees. Leemisuwawu, miishshaa shiishshanawu baaxetiyoogan nu wolqqaa coo xayssana danddayoos. “Merinaa de7uwaa laattanau taani ai oottoo?” yaagidi oychchida dure yelagawu Yesuusi yootidobaa akeeka. Marqqoosa Wonggelee ‘Yesuusi bitaniyaa dosidoogaa’ yootiyo gishshawu, he bitanee loꞌꞌo asa gidennan waayi aggana. Yesuusi biittaa haariya he yelagaa qommoora deꞌiyaagaadan shoobbiis. Bitanee Yesuusa kaallana koyiis. SHin, I ba aquwaa aggi bayanawu koyibeenna. (Mar. 10:17-22) Hegaa gaasuwan, ba qambbaran waaxettanaadan Yesuusi shoobbidoogaa I ixxiis; qassi “miishshaassi” ubbatoo haarettidi deꞌiis. (Maa. 6:24) Nena gidiyaakko waatuutee? Issi issitoo, nuuni nu deꞌuwan kaseyiyoobaa qoppiyoogee loꞌꞌo. Aybissi? Nu wolqqaa maara goꞌettiyoogaa erana koshshiyo gishshataassa. w19.09 24 ¶17-18

Kawotettaabaa sabbakiyo oosoy Yihooway gidana gaana gakkanaashin wurenna. Asay Xoossaa Yihoowanne Yesuus Kiristtoosa eranawu ay keena wodee attidee? (Yoh. 17:3) Nuuni erokko. SHin gita waayee gakkanaashin “merinaa de7uwaassi” suure koshshay deꞌiyoogeeti mishiraachchuwaa siyidi Yihoowassi haggaazana danddayiyoogaa eroos. (Oos. 13:48) Wodee wurennan deꞌishin he asata waati maaddana danddayiyoo? Asaa tumaa tamaarissanawu nuussi koshshiyaaba ubbaa Yihooway ba dirijjitiyaa baggaara immees. Leemisuwawu, saaminttawu gidduwan shiiqiyo shiiquwan ubbatoo loohoos. He shiiqoy koyro haasayissiyo wodenne zaaretti oychchiyo wode, nuuni woygi haasayissanaakko eranaadan maaddees. Siyanawu koyiya issi uraara ufayssiya hanotan haasayikko, neeni zaarettada aara gayttana gakkanaashin I gujjidi nabbabanaadan ayyo issi trakttiyaa woy maxeetiyaa imma. Aginan aginan Kawotettaabaa sabbakiyo oosuwaa aggennan minnidi oottiyoogee nu aawatetta. w19.10 9 ¶7; 10 ¶9-10

Yerusalaamen deꞌiya ammanettida cima bitanee Simooni Masiyaa beꞌennan hayqqennaagaa Yihooway yootiis. Simooni daro layttawu Masiyaa naagido gishshawu, I yootidobay Simoona keehi minttettennan aggenna. A ammanuwaa gishshawunne A genccaa gishshawu Yihooway Simoona anjjiis. Issi gallassi, Simooni “ayyaanai kaalettin” beeta maqidasiyaa geliis. I yan guutta naꞌaa Yesuusa beꞌiis; qassi Kiristtoosa gidana he naꞌaabaa hananabaa yootanaadan Yihooway Simoona goꞌettiis. (Luq. 2:25-35) Yesuusi haggaazuwaa doommanaappe kase Simooni hayqqikkonne, Yihooway A goꞌettido gishshawu nashshiis; qassi sinttappe I daro loꞌꞌobaa demmana! Ooratta alamiyan, Yesuusa haaroy saꞌan deꞌiya asay ubbay anjjettanaadan waati oottiyaakko he ammanettida bitanee akeekana. (Doo. 22:18) Ayba ogiyankka Yihoowawu haggaazanaadan I nuna goꞌettiyo gishshawu nuunikka nashshoos. w19.10 22 ¶7; 23 ¶12

Nuussi deꞌiya miishshay guutta gidin woy daro gidin, nu wozanaa naagana koshshees. Waatidi? Miishshaa siiqiyoogaa doommoppa. Qassi neeni Yihoowayyo haggaaziyo haggaazuwaappe ne oosuwaa xoqqu oottada xeelloppa. Ne hanotay hegaa mala gidiyoogaa waata erana danddayay? Kaallidi deꞌiya amarida oyshata nena oychchana danddayaasa: ‘Taani shiiquwan deꞌaydda woy haggaazaydda darotoo ta oosuwaabaa qoppiyaanaa? Taayyo sinttanawu gidiya miishshay deꞌanaadan muletoo hirggiyaanaa? Miishshaynne duretettay ta aqo deꞌuwan metoy merettanaadan oottiyoonaa? Yihoowayyo haggaaziyo daro wodiyaa demmana mala harati kariyo oosuwaa oottanawu eeno giyaanaa?’ (1 Xim. 6:9-12) Nuuni ha oyshata qoppikko, Yihooway nuna siiqiyoogaanne A xallawu oottanawu murttidaageetussi, “Taani nena mulekka yeggikke woikko aggikke” yaagidi gelido qaalaa nuuni hassayana bessees. Kiitettida PHawuloosi “miishsha siiqoppe inttena naagite” giidoy hegaassa.—Ibr. 13:5, 6. w19.10 29 ¶10

Nuuni nu ishanttuuranne michchonttuura issippe oottiyo wode, eta loꞌꞌo eeshshaa akeekoos, qassi etappe tamaaroosinne etakko shiiqoos. Leemisuwawu, ne laggee ba ammaniyoobawu naqaashaa xalatettan yootishin woy Yihoowabaanne A halchchuwaabaa wozanappe ammaniyoogaa qonccissishin neeni haggaazuwan siyiyo wode neeyyo aybi siyettii? Neeni A kaseegaappe aaruwan siiqennan waaya aggana. Layttay 23 gidido Adeliino giyo michchiyaa darin oosettibeenna moottan sabbakanawu, Kanddiiso giyo, I laggetuppe issinna banaara baanaadan oychchaasu. A hagaadan gaasu: “Nuuni minnidi haggaazanawunne haggaazuwan kaseegaappe aaruwan ufayttanawu koyida. Nuuni muletoo, danddayettida ubban Yihoowawu haggaazana mala, naaꞌꞌaykka minettana koshshiis.” Eti issippe haggaaziyoogan waani goꞌettidonaa? Adeliina hagaadan gaasu: “Nuuyyo siyettidabaa, nuuni haasayidobaappe nuna minttettidabaanne, haggaazuwan Yihooway nuna kaalettidoogaa nu waati akeekana danddayiyaakko ubba gallassi omarssan tobboos. Hegaadan tobbiyoogan naaꞌꞌaykka ufayttida, qassi issoy issuwaa kaseegaappe aaruwan erida.” w19.11 5 ¶10-11

Beni wode, issi wotaaddaray gonddallee baynnan soo simmikko, yeellatees. Beni Roomatu taarikiyaa xaafee Tasitesi, “Issi wotaaddaray ba gonddalliyaa aggidi yiikko, hegee keehi kawushshiyaaba” yaagiis. Wotaaddarati bantta gonddalliyaa mintti oyqqidaakkonne shaakki eriyo issi gaasoy hegaa. Ubbatoo shiiquwaa shiiqiyoogaaninne haratuyyo Yihoowa sunttaabaanne A Kawotettaabaa yootiyoogan gonddalle mala gidida nu ammanoy minnidi deꞌanaadan oottoos. (Ibr. 10:23-25) Qassi galla galla Xoossaa Qaalaa nabbaboosinne I yootiyo ubbabaa oosuwan peeshshanaadan maaddana mala Yihoowa woossoos. (2 Xim. 3:16, 17) Yaatiyo wode, Seexaanay nuna qohanawu goꞌettiyo ay miishshinne nuna qohiiddi deꞌenna. (Isi. 54:17) Nu ‘wogga gonddalliyaa mala gidida ammanoy’ nuna naagana. Nu ishanttuuranne michchonttuura issippe xalatettan oottana. Nu ammanoy mino gididi deꞌanaadan galla galla olettiyo olan nuuni xoonana. Qassi ubbabaappe aaruwan, Yesuusi Seexaanaanne I kaalettiyoogeeta xooniyo wode, aara hashetiyo bonchcho maataa nuuni demmana.—Ajj. 17:14; 20:10. w19.11 19 ¶18-19

Neeni oottanawu halchchidobaa xaafa wottikko, hegaa polanawu metootakka. (1 Qor. 14:40) Leemisuwawu, cimati oottanawu kuuyidobaa ooni oottanaakko, qassi awude oottidi wurssana bessiyaakko ubbabaa xaafanaadan issi cimaa doorana mala cimatussi kaaletoy imettiis. Cimati hegaadan xaafi oyqqikko, eti kuuyidobaa polanawu metootokkona. Neenikka ne galla galla deꞌuwan hegaadan oottana danddayaasa. Leemisuwawu, galla galla ne oottanawu koyiyoobaa xaafana danddayaasa, qassi koyro oottana koyiyoobaa kaseyada xaafa. Hegee neeni doommidobaa polana xallaassa gidennan, guutta wodiyan darobaa oottanawukka maaddana danddayees. SHin neeni wozanappe minna oottana koshshees. Ne halchchidobaa oottanawunne doommidoba polanawu baaxiyaa koshshees. (Roo. 12:11) Ximootiyoosi ‘minnanaadan,’ qassi gooba asttamaare gidanawu ‘aggennan oottanaadan’ kiitettida PHawuloosi zoriis. Ha zoree ayyaanaaban hara halchchuwaassikka hanees.—1 Xim. 4:13, 16. w19.11 29-30 ¶15-16

Muusee Israaꞌeelata Gibxxeppe kessanaadan Yihooway oychchido wode, I xala gidennaagaanne qassi danddayennaagaa zaari zaaridi Yihoowawu yootiis. Xoossay zaaridobay I Muuseyyo qarettiyoogaa woy awu siyettiyaabaa akeekiyoogaanne A maaddidoogaa bessees. (Kes. 4:10-16) Hegaappe denddidaagan, Muusee wolqqaama gidida pirdda kiitaa Paaroonawu yootiis. Hegaappe simmin, Israaꞌeelata ashshidi, Paaroonanne A olanchchata zoꞌo abban xayssiyoogan Yihooway ba wolqqaa goꞌettidoogaa Muusee beꞌiis. (Kes. 14:26-31; Maz. 136:15) Muusee Israaꞌeelata Gibxxeppe kaalettidi kessi simmin, eti ubbatoo zuuzummidosona. Gidikkokka, Yihooway aylletettaappe laꞌa kessido ba asaa ay keena danddayidaakko Muusee beꞌiis. (Maz. 78:40-43) Yihooway Israaꞌeelata xayssennaadan Muusee oychchin I xayssennan aggidoogee Yihooway ba huuphiyaa ziqqi oottiyoogaa bessiyaaba gidiyoogaakka Muusee akeekiis. (Kes. 32:9-14) Israaꞌeelati Gibxxeppe kiyi simmin, Muusee saluwan deꞌiya ba Aawaa beꞌiyoogaa keenaa Yihoowaara dabbotaa keehi minttiis.—Ibr. 11:27. w19.12 17 ¶7-9

Yesuusa kaalliyaageetuppe dariya baggati Galiila asata. Hegaa gishshawu, Yerusalaamen issi uraa son shiiqiyoogaappe Galiila deriyan daro asay shiiqiyoogee bessiyaaba. Yesuusi hayquwaappe denddi simmidi, Yerusalaamen issi uraa son 11 kiitettidaageetuura gayttiis. Kiitettidaageetu xallay sabbakanaadaaninne erissiyo ashkkara oottanaadan Yesuusi koyidaba gidiyaakko, kiitettidaageeta, maccaasatanne harata Galiila deriyan shiishshiyoogaappe Yerusalaamen etayyo yootana danddayees. (Luq. 24:33, 34, 36) Yesuusi bana kaalliyaageeta oottanaadan azazidoogeeti koyro xeetu layttan deꞌiya Kiristtaanetu xalla gidokkona. Nuuni hegaa waati eriyoo? Yesuusi bana kaalliyaageetussi immido azazuwaa wurssettan hagaadan giis: “Taani wodiyaa wurssettai gakkanaassikka ubba wode inttenaara de7iyoogaa akeekite.” (Maa. 28:19, 20) Ha wodiyan daroti erissiyo ashkkara oottiyo oosuwaa oottoosona. Layttan layttan 300,000 gidiyaageeti xammaqettidi Yesuus Kiristtoosi erissiyo ashkkarata gididi Yihoowa Markka gidoosona. Hagee maalaalissiyaaba! w20.01 2 ¶1; 3 ¶5-6

Yelaga, shin wolqqaama harggee oyqqiis. Qassi Yihoowa haggaazuwan oottana danddayiyoobawu wolqqay ixxi ixxi bees. Qommoora odettidaagaa mala hanotay nena gakkiyaakko, taani pattikke gaada neeni qoppana danddayaasa. He hanotati neeni ufayttennaadan, neeni nena karanaadaaninne haratuura deꞌiya ne dabbotay moorettanaadan oottana danddayoosona. Ha alamee deꞌuwaa Seexaanaagaadan xeellees. Asay bana pattennabadan xeellanaadan Seexaanay ubbatoo koyees. Xoossaayyo azazettennan ixxiyoogee hayqqanaadan oottiyoogaa Seexaanay erikkonne, Hewaana Xoossawu azazettennan ixxikko, laꞌa gidana giidi I Hewaaniyyo iitabaa odiis. Seexaanay ha alamiyaa zalꞌꞌiyaa, polotikaanne haymaanootiyaa ubbatoo kaalettees. Yaatiyo gishshawu, daro zalꞌꞌanchchati, polotikaa asatinne haymaanootiyaa kaalettiyaageeti Seexaanaagaadan asaa deꞌuwaa bonchchennaagaa bessiyaabaa oottiyoogee garamissenna. Qassi, Yihooway nuuni nubaa loꞌꞌobaa qoppanaadan koyees; nuuni nuna pattennabadan xeellanaadan oottiya hanotay merettiyo wode, I nuna maaddees.—Roo. 12:3. w20.01 14 ¶1-4

Ermmaasi 40 gidiya layttawu, A shoorotanne geella I diccido kataman Anatootan deꞌiya A dabbotuppe amaridaageeta gujjin, ammanettenna asaa giddon deꞌiis. (Erm. 12:6) Gidoppe attin, I asaappe shaahettibeenna. I baassi siyettidabaa ba ammanettida xaafiyawu Baarukassi yootiis; ayyo siyettidabay xaafetti utto gishshawu, nuunikka hegaa eroos. (Erm. 8:21; 9:1; 20:14-18; 45:1) Baaruki Ermmaasa gakkida ubbabaa xaafido wode, eti issoy issuwaa keehi siiqiyoogaanne bonchchiyoogaa tamaaridosona. (Erm. 20:1, 2; 26:7-11) Yerusalaame katamaa bolli gakkanabaa Israaꞌeelatussi Ermmaasi daro layttawu xalatettan yootiis. (Erm. 25:3) Yihooway asay nagaraappe simmanaadan zaaretti minttettidi, eti naagettanaadan akeekissanawu Ermmaasi xaatta maxaafan xaafanaadan I oychchiis. (Erm. 36:1-4) Xoossay immido he oosuwaa Ermmaasinne Baaruki geella daro aginawu issippe oottishin eta ammanoy minnanaadan oottiyaabaa eti haasayennan waayi aggana. w19.11 2-3 ¶3-4

Tiyettida ishanttanne michchontta nuuni waati xeellana koshshii? Ayyanan tiyettidi Kiristtoosa isha gidida uraakka, likkiyaappe aattidi nashshiyoogee bala. (Maa. 23:8-11) Gubaaꞌe cimata xeelliyaagan, Geeshsha Maxaafay nuuni ‘etaagaadan ammananaadan’ minttettees; shin nuuni ay asanne nuna kaalettiyaagaa ootti xeellennaadan zorees. (Ibr. 13:7) Geeshshaa Maxaafay “naa77u kushe bonchchuwaa ekkanau” bessiya amaridaageetubaa yootiyoogee tuma. SHin hegeeta bonchchana bessiyoy eti tiyettidaageeta gidiyo gishshataassa gidennan, eti “loitti heemmiya,” qassi “qaalaa yootiyoogaaninne tamaarissiyoogan” daafuriyaageeta gidiyo gishshataassa. (1 Xim. 5:17) Saluwaa hidootay deꞌiyoogeeta nuuni likkiyaappe aattidi sabbikko, eti yeellatanaadan oottoos. Qassi hegee eti seesanaadan oottana danddayees. (Roo. 12:3) Ayyanan tiyettidi Kiristtoosa isha gididaageetuppe issi uri wolqqaama moorobaa oottanaadan gaaso gidana danddayiya aybanne nuuppe ooninne oottana koyokko!—Luq. 17:2. w20.01 29 ¶8

Kiitettida PHawuloosi hirgganaadan oottida darobati deꞌoosona. Ishanttanne michchontta gakkiya metoti I keehi hirgganaadan oottiis. (2 Qor. 2:4) Eqettiya asati PHawuloosa darotoo shocidosonanne qashissidosona. ‘Metootidi deꞌiyoogaa’ mala, hirggissiya metotakka I genccana koshshiis. (Pili. 4:12) Qassi I markkabiyan biishin markkabee heezzutoo meꞌꞌido gishshawu, markkabiyan biyo wode I keehi hirggennan aggenna. (2 Qor. 11:23-27) PHawuloosi hirggido wode A maaddidabay aybee? PHawuloosi ba ishanttanne michchontta metoy gakkiyo wode hirggiis; shin I eta metuwaa ubbaa barkka giigissanawu baaxetibeenna. PHawuloosi ubbabaa barkka oottana danddayennaagaa eriis. Gubaaꞌiyawu koshshiyaabaa kunttiyoogan maaddanaadan I Ximootiyoosanne Tiitu mala ammanettida attuma asatussi aawatettaa immiis. He ishantti oottidobay PHawuloosi darin hirggennaadan maaddidoogee qoncce.—Pili. 2:19, 20; Tii. 1:1, 4, 5. w20.02 23 ¶11-12

Yihooway nuuni ayyo azazettanaadankka koyees. Yihooway nuna Medhidaagaa, nu deꞌuwawu koshshiyaabaa Immiyaagaanne yelida ay asappenne aadhdhida eranchcha gidiyo gishshawu awu azazettiyoogee bessiyaaba. SHin, nuuni Yihoowawu azazettiyo waanna gaasoy A siiqiyo gishshataassa. (1 Yoh. 5:3) Nuuni Yihoowawu azazettana koshshiyo daro gaasoti deꞌikkokka, azazettanaadan I nuna wolqqanttenna. Koyidobaa dooriyo maataa Yihooway nuuyyo immiis; yaatiyo gishshawu nuuni A siiqidi azazettiyo wode I ufayttees. Yelidaageeti naati qohiyaabaappe naagettidi deꞌanaadan koyoosona. Eti bantta naata naaganawu higgeta kessiyoy hegaassa. Naati he higgeta azazettiyo wode banttana yelidaageetun ammanettiyoogaanne eta bonchchiyoogaa bessoosona. Saluwan deꞌiya nu Aawaa higgeta eriyoogeenne hegaadan deꞌiyoogee hegaappe aaruwan koshshiyaaba. Nuuni yaatiyo wode, Yihoowa siiqiyoogaanne A bonchchiyoogaa bessoos; qassi goꞌettoos. (Isi. 48:17, 18) SHin Yihoowanne A maarata shenehoo giyaageeti banttana qohoosona.—Gal. 6:7, 8. w20.02 9-10 ¶8-9

Issi uri gita mooro mooranaadan gaaso gidiyaabaa oottiyoogaa nuuni akeekikko, Abigaaliigaadan xalidi yootana koshshees. (Maz. 141:5) Nuuni bonchchuwan yootiyaaba gidikkonne, xala gidana bessees. Nuuni issi uraa zorana bessiyaabaa siiquwan zoriyo wode, ayyo tumu lagge gidiyoogaa qonccissoos. (Lee. 27:17) Gubaaꞌiyaa yameti moorobaa oottiyo wode, etawu yootanawu cimati xala gidana bessees. (Gal. 6:1) Cimati etikka nagaranchcha gidiyoogaanne issi wode zoree etawu koshshana danddayiyoogaa akeekiyoogan banttana ziqqi oottoosona. Gidoppe attin, cimati seeray koshshiyoogeeta hegaa gaasuwan zorennan aggokkona. (2 Xim. 4:2; Tii. 1:9) Eti issi uraa hiillaaninne danddayan zoridi tamaarissanawu, haasayiyo imotaa goꞌettanawu baaxetoosona. Eti bantta ishaa siiqoosona, qassi hegee A maaddanaadan eta denttettees. (Lee. 13:24) SHin, eti keehi xoqqu ootti xeelliyoobay Yihooway kessido maarata kaalliyoogaaninne gubaaꞌiyaa qohuwaappe naagiyoogan Yihooway bonchchettanaadan oottiyoogaa.—Oos. 20:28. w20.03 20 ¶8-9

Muusee Israaꞌeelata ashshiyaagaa gidanaadan Yihooway oottiis. SHin Yihooway A awude goꞌettidee? Hegee “Muusee Gibxxetu aadhdhida eratettaa ubbaa [tamaari]” simmidi, danddayiyoogaadan awu siyettido wodiyaanee? (Oos. 7:22-25) CHii, I Muusee ba huuphiyaa ziqqi oottiyaagaanne ashkke gidanaadan maaddidoogaappe guyyiyan goꞌettiis. (Oos. 7:30, 34-36) Keehi wolqqaama gidida Gibxxe kawuwaa haasayissanaadan Yihooway Muuseyyo xalatettaa immiis. (Kes. 9:13-19) Yihooway baagaa mala eeshshaa bessanawu baaxetiya asatanne wolqqaa demmanawu an ammanettiya asata goꞌettiyoogaa hagaappe akeekoos. Asi deꞌido wode ubban, Yihooway ba ashkkarata daro ogiyan goꞌettiis. I neeni ay hananaadan oottanee? Hegee daro baggi neeni wozanappe minna oottanawu eeno giyoogaara gayttidaba. (Efi. 3:16, 17) Yihooway nena goꞌettanaadan neeni eeno giikko, neeni minnada mishiraachchuwaa yootiyaagaa, gooba asttamaare, loytta minttettiyaagaa, mino oosanchcha, maaddiya lagge, woy I ba sheniyaa polanawu koyiyo aybanne neeni hananaadan Yihooway oottana danddayees. w19.10 21 ¶5; 25 ¶14

Loꞌꞌo laggeti nuuni Yihoowawu ammanettidi deꞌanaadan nuna maaddana. Qassi loꞌꞌo laggeta demmanawu maaddiya ubbaappe aadhdhiya ogee haratussi loꞌꞌo lagge gidiyoogaa. (Maa. 7:12) Leemisuwawu, Geeshsha Maxaafay nu wodiyaanne nu wolqqaa harata, ubba qassi “hiyyeesata” maaddanawu goꞌettanaadan minttettees. (Efi. 4:28) Nuuni harata maaddanawu minnidi oottiyo wode, kaseegaappe aaruwan ufayttana danddayoos. (Oos. 20:35.) Nuna metoy gakkiyo wode, sarotettan deꞌanaadan laggeti nuna maaddana. Iyyoobi ba metuwaabaa yootiyo wode Eelihu ezggidoogaadan, nu laggeti nuna qofissidabaa nuuni yootiyo wode danddayan ezggiyoogan nuna maaddoosona. (Iyy. 32:4) Nu laggeti nu gishshaa kuuyanaadan naagana bessenna; shin eti Geeshsha Maxaafaappe immiyo zoriyaa loytti ezggikko, aadhdhida eranchcha gidoos. (Lee. 15:22) Qassi Kawuwaa Daawiti ba laggetu maaduwaa bana ziqqi oottidi ekkidoogaadan, nuuyyo maadoy koshshiyo wode nuna maaddanawu laggeti immiyo zoriyaa ekkanawu otorettana koshshenna. (2 Sam. 17:27-29) Hegaa mala loꞌꞌo laggeti Yihoowa imota.—Yaaq. 1:17. w19.04 11 ¶12; 12 ¶14-15