Masqqala

Minni oottiyoogan Yihoowaynne Yesuusi nuussi leemiso gidiyoogee nuuni shemppana koshshennaagaa bessiyaabee? CHii gidenna. Yihooway mule daafurenna gishshawu, I issibaa ootti simmidi shemppana koshshenna. SHin Yihooway saluwaanne saꞌaa medhdhi simmidi, ‘oosuwaa aggidi shemppidoogaa’ Geeshsha Maxaafay yootees. (Kes. 31:17) Gidoppe attin hegee, Yihooway medhdhiyoogaa aggidi takki giidi ba oottidoban ufayttiyoogaa bessiyaaba gidiyoogee qoncce. Qassi Yesuusi saꞌan deꞌiyo wode minni oottikkonne, I ba laggetuura shemppanawunne maanawu wodiyaa demmees. (Maa. 14:13; Luq. 7:34) Xoossaa asay oottiyoogaa dosanaadan Geeshsha Maxaafay minttettees. A ashkkarati minnidi oottiyaageeta gidana besseesippe attin, azallana bessenna. (Lee. 15:19) Ne so asawu koshshiyaabaa kunttanawu maaddana danddayiya oosoy neeyyo deꞌennan waayi aggana. Qassi Kiristtoosi erissiyo ashkkaratu ubbawu mishiraachchuwaa sabbakiyo aawatettay deꞌees. Gidikkonne, neeni gidiyaagaa keenaa shemppana koshshees. w19.12 2 ¶2; 3 ¶4-5

Daydanttatu taarikiyaa yootennaadan naagetta. Hegaa xeelliyaagan, nuuni Yesuusa leemisuwaa kaallana koshshees. Yesuusi saꞌaa yaanaappe kase saluwan deꞌido gishshawu, I Seexaanaabaanne daydanttatubaa darobaa erees. SHin I ha iita ayyaanati oottidobaa taarikiyaa yootibeenna. Yesuusi Seexaanaabaa gidennan, Yihoowabaa asaa tamaarissanawu koyiis. Daydanttatubaa taariketa nuuni yootennan aggiyoogan, Yesuusa leemisuwaa kaallana danddayoos. Nu ‘wozanay loꞌꞌo qofaa,’ hegeekka tumaa pulttiyoogaa nuuni haasayiyoobay bessees. (Maz. 45:1) Iita ayyaanata yayyoppa. Ha iita alamiyan, iitabay nu bolli gakkana danddayees. Qoppennan daafabay gakkana, harggee oyqqana woy hayqoy worana danddayees. SHin hegawu gaaso gidiyay ayyaana meretata giidi nu qoppana koshshenna. Geeshsha Maxaafay O bollinne ‘qaadaynne wodee oottiyoobay hanana’ danddayiyoogaa yootees. (Era. 9:11) Yihooway daydanttatuppe aadhdhiya wolqqay baayyo deꞌiyoogaa bessiis. w19.04 23-24 ¶13-14

Mattumaara gayttidaagan naata qohida ura mootuwaa kawotettaa sunttatuyyo odiyoogaa xeelliyaagan cimati kawuwaa higgiyaara maayiyaaba oottana bessii? Ee. Hegaa mala higgee deꞌiyo heeran, mattumaara gayttidaagan issi uri naꞌa qohennan aggenna giyoogaa siyida asi hegaa yootiyoogaa xeelliyaagan cimati kawotettaa higgiyaara maayiyaabaa oottanawu baaxetoosona. Hegaa mala higgeti Xoossaa higgiyaa kanttanaadan oottiyaageeta gidokkona. (Oos. 5:28, 29) Hegaa gishshawu, mattumaara gayttidaagan naꞌi qohettennan aggenna giyoobaa cimati siyiyo wode, hegaa yootiyoogaara gayttida higgeta waatidi azazettana danddayiyaakko macara biiruwaa sohuwaara oychchana koshshees. Cimati qohettidaageetuuranne eta yelidaageetuura woy mattumaara gayttidaagan naꞌi qohettidoogaa eriya hara uraara haasayiyo wode, sunttatuyyo hegaabaa yootiyo maatay etassi deꞌiyoogaa cimati kehatettan eta hassayissoosona. Intte yootiyoobay gubaaꞌiyan deꞌiya issi uraabaa, qassi hegee he wode heeran erettiyaaba gidikko shin? Hegaa yootiya Kiristtaanee Xoossaa sunttaa cayissiyaabadan qoppana koshshii? CHii. Xoossaa sunttay cayettanaadan oottidaagee naata qohidaagaa. w19.05 10 ¶13-14

Azinaynne machchiyaa issoy issuwaa bonchchanaadaaninne eti aqo oyqqiyo wode issoy issuwawu gelido qaalaa naaganaadan Geeshsha Maxaafay tamaarissees. Geeshsha Maxaafay azinaynne machchiyaa issippe deꞌanawu murttanaadan hagaadan giidi minttettees: “Asi ba aawaanne ba aayyiyo aggi bayidi, ba machcheera issippe de7ees; eti naa77ai issi asho gidoosona.” (Doo. 2:24) SHin, ha saꞌaa aadhdhida eratettaa kaalliyaageeti aqo laggeti bantta huuphessi koshshiyaabaa keehi qoppana bessees yaagiyoogan, hegaappe dummatiya qofaa yootoosona. Paraman shaahettiyoogaaban xaafettida issi maxaafay hagaadan gees: “Issi issi bullachchan, ‘naaꞌꞌaykka deꞌuwan deꞌido peeshshan’ aqo lagge gidanawu geliyo qaalay ‘naaꞌꞌaykka siiqettido peeshshan’ aqo lagge gidanawu geliyo qaalan laamettiis.” Asay aqo deꞌoy gamꞌꞌana koshshenna giidi qoppiyo gishshawu, so asay shaahettees; qassi daroti qohettoosona. Aqo deꞌuwaa ha saꞌay xeelliyo ogee eeyyatetta gidiyoogee qoncce. w19.05 23 ¶12

Seexaanay haariyo alamiyaa iita qofan amarida Kiristtaaneti qohettiyoogee PHawuloosa qofissiis. (Efi. 4:17-19) Nuuppe oonikka hegaadan qohettana danddayees. Ha alamiyaa xoossay Seexaanay nuna Yihoowappe haassanawu daro hiillata goꞌettees. Leemisuwawu, nuuni hayttatanawu koyikko, I nuna Yihoowappe haassanawu hegaa goꞌettees. Nuuni I koyiyoogaadan qoppana mala son, timirtte keettaaninne nu yuushuwan deꞌiya asaappe nuuni tamaaridobaakka goꞌettanawu baaxetana danddayees. Nu guuggiyan wolqqaama “qatuwaa” mala gididabata xayssana danddayiyoo? (2 Qor. 10:4) PHawuloosi woygi zaaridaakko akeeka: “Nuuni asa qofa xaissoos; qassi Xoossaa eratettaa bolli denddidi xubbiya otoro qofa ubbaa laaloos. He qofa ubbai Kiristtoosayyo azazettana mala omooddoos.” (2 Qor. 10:5) Ee, Yihoowa maaduwan iita qofata xayssana danddayoos. w19.06 8 ¶1-3

Haanna, Daawiti, qassi issi mazamuraaweekka keehi unꞌꞌettidaba gidikkokka maaduwaa demmanawu Yihoowan ammanettidosona. Eti banttana unꞌꞌissidabaa xeelliyaagan Yihoowa woossidosona. Eti keehi unꞌꞌettidoy aybissakko ayyo qoncce gidida ogiyan yootidosona. Eti Yihoowawu goynniyo sohuwaa ubbatoo biidosona. (1 Sam. 1:9, 10; Maz. 55:22; 73:17; 122:1) Eta ubbawukka Yihooway qaretan zaariis. Haanna sarotettaa demmaasu. (1 Sam. 1:18) Daawiti hagaadan giis: “Xillo asa metoi daro; shin GODAI a he ubbaappe ashshees.” (Maz. 34:19) He mazamuraawee Yihooway ‘ba ushachcha kushiyaa oyqqidi,’ bana siiquwan zoridi kaalettiyoogaa guyyeppe akeekiis. (Maz. 73:23, 24) Nuuni ha hanotatuppe ay tamaariyoo? Issi issitoo, nuuni unꞌꞌettanaadan oottiya wolqqaama metoti nuna gakkoosona. SHin, Yihooway harata waati maaddidaakko nuuni wotti dentti qoppikko, woosan an ammanettikkonne nuuni oottanaadan I oychchiyoobaa oottiyoogan ayyo azazettikko genccana danddayoos.—Maz. 143:1, 4-8. w19.06 17 ¶14-15

Asay haasayiyoobay woy oottiyoobay neeni Yihoowa Markka gidiyoogan yeellatanaadan oottana mala mule eeno gooppa. (Mik. 4:5) Kiitettidaageeti Yesuusi hayqqi simmin Yerusalaamen oottidobaa qoppiyoogan nuuni asaa yayyiyoogaa aggiyoogaa tamaarana danddayoos. Eti Ayhuda haymaanootiyaa kaalettiyaageeti banttana keehi ixxiyoogaa eroosona. (Oos. 5:17, 18, 27, 28) Gidikkokka, eti ubba gallassi beeta maqidasiyaa aggennan biidosona; qassi eti sabbakiyoogan Yesuusi erissiyo ashkkarata gidiyoogaa bessidosona. (Oos. 5:42) Eti sabbakiyoogaa yayyidi aggibookkona. Ooso sohuwan, timirtte keettan woy nuuni deꞌiyo heeran, nu Yihoowa Markka gidiyoogaa asay eranaadan oottiyoogan asaa yayyiyoogaa nuunikka aggana danddayoos. (Oos. 4:29; Roo. 1:16) Kiitettidaageeti ufayttidoy aybissee? Eti asay eta ayssi ixxidaakko eroosona; qassi eti Yihoowa sheniyaa oottiyoogaa gaasuwan asay eta qohidoogaa bonchchodan xeellidosona. (Luq. 6:23; Oos. 5:41;1 PHe. 2:19-21) Nuuni likke gididabaa oottiyoogaa gaasuwan asay nuna ixxiyoogaa akeekikko, nuuni Yihoowayyo haggaaziyoogaa asay nuna ixxiyo gishshawu yayyidi mule aggokko. w19.07 7 ¶19-20

Yesuusinne A kaalliya Ayhudati Muuse baggaara Israaꞌeelatuyyo imetida Higgiyaa azazettiyo gishshawu, eti Sambbata gallassan shemppidosona. SHin Sambbata gallassan haratuyyo kehabaanne maaddiyaabaa oottiyoogee bala gidennaagaa Yesuusi haasayidonne oottido daroban bessiis. (Maa. 12:9-11) I Sambbatan kehabaanne maaddiyaabaa oottiyoogee bala giidi qoppibeenna. Xoossay ba asay Sambbata gallassi shemppanaadan yootido waanna gaasuwaa Yesuusi akeekidoogaa I oottidoban bessiis. Ubba galla oottiyo oosuwaappe he gallassi Xoossaa asay shemppiyo gishshawu, eti bantta xeelaa ayyaanaaban wottana danddayoosona. Yesuusi Sambbata gallassaa Xoossawu goynnanawu goꞌettiya so asaara diccidoogee qoncce. “Haroodeegaadan [Yesuusi] Sambbata gallassan Aihuda woosa keettaa gelidi, nabbabanau denddiis” giya, Yesuusi ba diccido Naazireete kataman deꞌiyo wodiyaabaa nu nabbabiyoobay hegaa bessees. (Luq. 4:15-19) Erissiyo ashkkarati Sambbataa higgiyaa keehi bonchchiyo gishshawu, Sambbatay aadhdhana gakkanaashin Yesuusa anhaa tiyanawu shittuwaa giigissiyoogaa aggidosona.—Luq. 23:55, 56. w19.12 4 ¶10

Wozanaa suure asata demmanawu ubba Kiristtaanetu maadoy koshshiyaaba. Xayida naꞌa koyiyoogan nuuni hegaa leemisana danddayoos. Ayba ogiyan? Heezzu laytta naꞌay sooppe xayin aybi hanidaakko qoppa. A, 500 gidiya asay koyiis. Wurssettan, 20 saate gidiyaagaa koyi simmin, he guutta naꞌaa issi bitanee gadeppe demmiis. He bitanee naꞌaa demmido gishshawu asay A galatanaadan koyibeenna. I, “Xeetan qoodettiya asay A issippe demmiis” yaagiis. Daro asay he naꞌaa mala. Xayidabadan etawu siyettees. Etayyo hidootay baynna gishshawu, nuuni eta maaddana koshshees. Hosppun miilooneppe dariya asay he asata demmanawu issippe oottiiddi deꞌees. Geeshsha Maxaafaa nenaara xannaꞌanawu koyiya ura neeni demmennan aggana danddayaasa. SHin, hara aassiyaageeti he moottan haggaaziiddi Xoossaa Qaalan deꞌiya tumaa tamaaranawu koyiya ura demmana danddayoosona. Issi michchiyaa woy issi ishay Kiristtoosi erissiyo ashkkara gidiya uraara gayttiyo wode, he ura koyida ubbay ufayttiyo loꞌꞌo gaasoy deꞌees. w19.07 16-17 ¶9-10

Kiitettida PHawuloosi Piliphphisiyuusan deꞌiya Kiristtaaneta genccidi aggennan woxxiyoogee koshshiyoy aybissakko hassayissiis. Piliphphisiyuusan deꞌiya asay gubaaꞌee eqqosaappe doommidi ishantta yedettiis. PHawuloosinne Sillaasi 50 M.Ln, ‘Maqidooniyaa pinnanaadan’ Xoossay shoobbin azazettidosona. Hegaa gishshawu, mishiraachchuwaa sabbakanawu eti Piliphphisiyuusa biidosona. (Oos. 16:9) Mishiraachchuwaa “siyana mala Xoossai i wozanaa” dooyido, Lidiyo giyo issi maccaaseera eti yan gayttidosona. (Oos. 16:14) I keettan deꞌiyaageeti ubbay iira issippe sohuwaara xammaqettidosona. SHin, Dabloosi eta bolli metuwaa gattiyoogaa sohuwaara doommiis. Katamaa asay PHawuloosanne Sillaasa daannatu sintti goochchidi efiis; qassi wayssidoosona giidi wordduwan mootidosona. Hegaappe denddidaagan, PHawuloosanne Sillaasa shocidosona, qasho keettan yeggidosonanne guyyeppe katamappe kiyanaadan azazidosona. (Oos. 16:16-40) Eti hidootaa qanxxidonaa? CHiikka! Mati eqqida gubaaꞌiyan deꞌiya ishanttinne michchontti shin waanidonaa? Etikka genccido gishshawu, loꞌꞌo leemiso gididosona! PHawuloosinne Sillaasi etawu loꞌꞌo leemiso gididoogan eti keehi minettidoogee qoncce. w19.08 2 ¶1-2

Yihoowanne A asaa siiqiyoogee ha “xillotettaa aifiyaa” bessiyaaba gidiyoogee qoncce. Hegee nuuni Yesuusan ammaniyoogaanne ufayssiya nu hidootaa haratussi yootiyoogaakka xaaxi waaxees. Nuuni keehi koshshiya erissiyo ashkkara oottiyo oosuwaa oottanawu nuussi danddayettida ubbabaa oottiyo wode, “xillotettaa aifiyaa” ayfoos. (Maa. 28:18-20) Nu hanotay ayba gidikkonne, pooꞌuwaa pooꞌissiyaabadan nuunikka pooꞌissana danddayoos. Issi issitoo, sabbakennaadan diggiyaaba milatiyaabati nuuni sabbakanaadan oottana danddayoosona. Leemisuwawu, kiitettida PHawuloosi Piliphphisiyuusan deꞌiya Kiristtaanetussi dabddaabbiyaa xaafiyo wode, Rooma biittan ba son qashuwan deꞌees. SHin PHawuloosi qashuwan deꞌikkokka, naagiyaageetuyyoonne bana oychchanawu yiyaageetuyyo sabbakiyoogaa aggibeenna. PHawuloosi hegaa mala hanotan deꞌiiddi minni sabbakiis; qassi hegee ishantti kaseegaappe xalidi ‘Xoossaa qaalaa yashshi baynnan yootanaadan’ maaddiis.—Pili. 1:12-14; 4:22. w19.08 12 ¶15-16

Nuuni nuna ziqqi oottanawu baaxetana koshshiyo waanna gaasoy, yaatiyoogee Yihoowa ufayssiyo gishshataassa. Kiitettida PHeexiroosi hachchi gallassaa xiqisiyan deꞌiya qaalata xaafido wode hegaa qonccissiis. “Yaada Tana Kaalla” giya maxaafaa shemppo 3, mentto 23n PHeexiroosi giidobaa hagaadan qonccissiis: “Otoroy marzze mala. Hegee wolqqaama qohuwaa gattana danddayees. Otorettiya urawu daro eray deꞌikkonne, I Xoossawu aynne maaddenna. Qassi bana ziqqi oottiyoogee, laafa urikka Yihoowawu maaddiyaagaa gidanaadan oottana danddayees. . . . [I] . . . neeni nena ziqqi oottiyo gishshawu, nena anjjiyoogan ufayttees.” Nuuni Yihoowa ufayssiyoogee oottana danddayiyo aybippenne aadhdhiyaaba! (Lee. 23:15) Nuna ziqqi oottiyo wode Yihoowa nuuni ufayssiyoogaappekka hara daro goꞌꞌaa demmoos. Nuuni nuna ziqqi oottiyoogee harati nuukko shiiqanaadan oottees. Hegee aybissakko akeekanawu nena haratu sohuwan wotta.—Maa. 7:12. w19.09 4 ¶8-9

Cimati bantta ishanttanne michchontta maaddanawu minni oottoosona. Qassi maatay deꞌiyo gishshawu, haratuppe aadhdhiyaabadan qoppokkona. Eti gubaaꞌiyan deꞌiya ishanttanne michchontta siiquwan oyqqoosona. (1 Tas. 2:7, 8) Cimati banttana ziqqi oottiyo gishshawunne harata wozanappe siiqiyo gishshawu, siiquwan haasayissoosona. Daro layttawu cima gididi oottida ishaa Andru hagaadan giis: “Issi cimay kehanne pashkka asa gidiyo wode, hegee ishanttunne michchonttu wozanaa denttettiyoogaa taani akeekaas. Qassi hegee cimatuura hashetanaadan eta denttettees.” Daro layttawu cima gididi oottida Toona giyo hara ishay hagaadan giis: “Taani Piliphphisiyuusa 2:3n deꞌiya zoriyaa oosuwan peeshshanawu baaxetays; qassi harati taappe aadhdhiyaabadan xeellanawu ubbatoo baaxetays. Hegee harati taayyo azazettanaadan wolqqanttanawu malennaadan tana maaddees.” Yihooway bana ziqqi oottiyoogaadan, cimati banttana ziqqi oottana koshshees. Yihooway Ubbabaa Haariyaagaa gidikkonne, I “hiyyeesaa buhiyaappe” denttanawu “duge hokkees.” (Maz. 18:35; 113: 6, 7) Banttana ziqqi oottennaageeta Yihooway ixxiyoogaakka Geeshsha Maxaafay nuussi yootees. w19.09 16-17 ¶11-12

Yesuusa qambbaran waaxettidi shemppo demmanawu, nu xeelay ubbatoo suure gidana koshshees. Nuuni Yihoowa oosuwaa oottiyo gishshawu, hegee A ogiyan oosettana bessees. Nuuni oosanchchata, qassi oosuwaa Goday Yihoowa. (Luq. 17:10) Nuuni A oosuwaa nu ogiyan oottanawu baaxetikko, nuuyyo hanotay keehi deexxanaadan oottoos. SHin, nuuni Yihoowa oosuwaa I koyiyo ogiyan oottikko, nu oottana danddayokko giidi qoppiyoobaa oottananne xoonana danddayokko giidi qoppiyo metota xoonana danddayoos. A shenee polettennaadan ooninne diggana danddayennaagaa hassaya! (Roo. 8:31; 1 Yoh. 4:4) Nuuni nuna siiqiya Aawaa Yihooway bonchchettanaadan halchchoos. Yesuusa wode deꞌida, yaaretiyoogan woy bantta xallaa siiqiyoogan banttassi goꞌꞌaa demmanawu koyida asay ufayttiyoogaa sohuwaara aggiisinne Yesuusa qambbaraa yeggi bayiis. (Yoh. 6:25-27, 51, 60, 66; Pili. 3:18, 19) SHin, bantta goꞌꞌaa aggibayidi Xoossaanne shooruwaa siiqiyoogee denttettidoogeeti saꞌan deꞌido wode ubban, Kiristtoosaara saluwan oottanawu hidootiiddi, he qambbaraa ufayttidi tookkidosona. Etaagaadan, nuuni suurebaa qoppidi Yesuusa qambbaraa tookkidi deꞌiyoogan ufayttana. w19.09 20 ¶1; 24-25 ¶19-20

Worddo timirttiyaappe neeni laꞌa kiyido gishshawu demmido anjjotakka qoppa. Ha laꞌatettaa demmidoogan nuuni keehi ufayttoos! Hagaappe aadhdhiya laꞌatettay yaanaagaa neeni naagana danddayaasa. Mata wode, Yesuusi worddo haymaanootiyaanne iita haaruwaa xayssana. Xoossay baassi haggaaziya “zawai bainna daro asaa” naagana, qassi hegaappe simmin I gannate gidana saꞌan eti anjjota demmanaadan oottana. (Ajj. 7:9, 14) Daro asay hayquwaappe denddana, qassi Addaameppe laattido nagaray ehiyo ubbabaappe laꞌa kiyana. (Oos. 24:15) SHaꞌu Layttaa Haaruwaa wode, Yesuusinne aara haariyaageeti asay asatettaaninne ayyaanaaban payya gidanaadan oottana. He wodee Israaꞌeelati bonchchiyo Ishatamantto Layttaa Baalaa wode demmido laꞌatettaa mala gidana. Hegaa giyoogee Yihoowawu ammanettidi haggaaziya ubba asay wottiyoobi baynnaageeta gidana, qassi hegaappe simmin nagari deꞌenna giyoogaa. w19.12 12-13 ¶14-16

Koyro xeetu layttaa M.Ln, keha gidida Yooseefa giyo Barnnaabaasi Yihoowayyo oottanawu eeno giis. (Oos. 4:36, 37) Yesuusa ammaniyaageeta Saaꞌooli yedettido gishshawu, I Kiristtaane gidi simmin, ishanttuppe daroti akko shiiqanawu yayyidosona. SHin Barnnaabaasi Saaꞌoola minttettiisinne maaddiis; qassi Saaꞌooli hegawu A keehi nashshennan aggenna. (Oos. 9:21, 26-28) Guyyeppe, Yerusalaamen deꞌiya cimati Sooriyaa Anxxookiyan haakkidi deꞌiya ishantta minttettanawu koshshiyoogaa akeekidosona. Eti oona kiittidonaa? Barnnaabaasa! Eti likke dooridosona. Barnnaabaasi “eti ubbaikka Godan bantta kumetta wozanaappe minnidi de7anaadan eta” minttettidoogee odettiis. (Oos. 11:22-24) Ha wodiyankka hegaadan Yihooway nuuni nu ishanttanne michchontta minttettanaadan maaddana danddayees. Leemisuwawu, siiqiyo uri hayqqidoogeeta minttettanawu I nuna goꞌettana danddayees. Woy sahettida woykko unꞌꞌettida ura biidi oychchanaadan woy silkkiyan minttettanaadan I nuna denttettana danddayees. Yihooway Barnnaabaasa goꞌettidoogaadan nena goꞌettanaadan eeno guutee?—1 Tas. 5:14. w19.10 22 ¶8

Issi issitoo nuuni nu laggetukko shiiqidi etaara issippe oottiyo wode, eta loꞌꞌo eeshshaa xalla gidennan, eta balaakka eroos. Hegaa akeekiiddikka nu laggetuura siiqettanaadan nuna aybi maaddana danddayii? Nuuni nu ishanttinne michchontti wottiyoobi baynna asa gidana giidi naagana danddayokko. Yaanikko, nuuni issi uraara laggetikko, he laggetettaa naagidi deꞌanawu baaxetana bessees. Nu laggeti balabaa oottikko, nuuni kehatettan qoncce zoriyaa Xoossaa Qaalaappe zoriyoogee koshshana danddayees. (Maz. 141:5) Eti nuna qohikko, nuuni etawu atto gaana koshshees. Nuuni etawu atto gi simmidi, eti nuna qohidobaa etawu woy hara asawu yootennaadan naagettana bessees. Ha keehi wayssiya wodiyan nu ishanttunne nu michchonttu balan gidennan, eta loꞌꞌo eeshshan xeelaa wottiyoogee keehi koshshiyaaba! Yaatiyoogee etaara nuussi laggetettaa minttees; qassi gita waayiyaa wode nuuyyo mata laggeti koshshoosona. w19.11 6 ¶13, 16

Nuuni Geeshsha Maxaafaa xannaꞌissiyo wode, Yesuusi “azazidobaa ubbaa eti naagana mala” eta tamaarissiyoogan, ‘A kaalliyaageeta oottanawu’ nuussi danddayettida ubban baaxetana bessees. Yihoowassinne A Kawotettawu asay exatiyoogee keehi koshshiyaaba gidiyoogaa eti akeekanaadan nuuni maaddana koshshees. Hegaa giyoogee asay tamaariyoobaa oosuwan peeshshanaadan, bantta deꞌuwaa Yihoowawu sheedhdhanaadaaninne xammaqettanaadan denttettanawu nuuni baaxetana koshshees giyoogaa. Eti hegaadan oottiyoogaa xallan Yihoowa gallassaappe attana. (1 PHe. 3:21) Ha alamee xayana gakkanaashin deꞌiya wodee keehi guutta. Hegaa gishshawu, Kiristtoosi erissiyo ashkkara gidanawu aynne koyennaageeta Geeshsha Maxaafaa xannaꞌissiyo wodee nuussi baawa. (1 Qor. 9:26) Nu oosoy eesuwan oottana koshshiyaaba! Wodee wuriichchennan Kawotettaa mishiraachchuwaa siyana koshshiya daro asay deꞌees. w19.10 11-12 ¶14-15

Layttan layttan Nagaraa Atto Giissiyo Gallassan, Israaꞌeela deree issippe shiiqin qeese ubbatu halaqay mehiyaa yarshshees. He yarshshoy Israaꞌeelati nagaraappe geeyana koshshiyoogaa eti hassayanaadan maaddiis! SHin, koyro qeese ubbatu halaqay bonqquwaa bolli geeshsha ixaanaa yeggees, yaatin keettay sawuwaa tonggu gees. Nuuni hegaappe ay tamaarana danddayiyoo? Ammanettidi Yihoowawu goynniyaageeti woossiyo A ufayssiya woosay ixaanaa mala gidiyoogaa Geeshsha Maxaafay yootees. (Maz. 141:2; Ajj. 5:8) Qeese ubbatu halaqay ixaanaa Yihoowa sinttan gita bonchchuwan shiishshiyoogaa hassayite. Hegaadan, nuuni Yihoowa gita bonchchuwan woossoos. Nuna Medhdhidaagee, issi naꞌi ba aawaakko shiiqiyoogaadan nuuni akko shiiqanaadan paqqadiyoogawu keehi galatoos. (Yaaq. 4:8) I nuna ba dabbodan xeellees! (Yaaq. 2:23) Nuuni ha maataa keehi nashshiyo gishshawu A ufayssennabaa aybanne oottanawu koyokko. w19.11 20-21 ¶3-5

Neeni deꞌiyo heeran daro asay oosuwaa waati xeellii? Daro biittatun, asay awudeegaappenne aaruwan oottiiddi deꞌees. Daro oosuwaa oottiya asay shemppanawu, so asaara wodiyaa aattanawu woy ayyaanaaban banttawu koshshiyaabaa kunttanawu darotoo wode demmenna. (Era. 2:23) Hara baggaara qassi, amarida asay oottanawu mule dosenna, qassi ayssi oottennaakko gaasuwaa shiishshees. (Lee. 26:13, 14) Alamiyan daro asay bessiyaagaappe aaruwan oottees woy bessiyaagaa keenaa oottenna. SHin, Yihoowaynne Yesuusi oosuwaa waati xeelliyaakko qoppa. Yihooway oottanawu dosiyoogaa eroos. Yesuusi, “Ta Aawai ubba wode oottees; taanikka oottanau bessees” giidi hegaa geeshshidi yootiis. (Yoh. 5:17) Xoossay daro kiitanchchata, xoolintteta, qassi pilaaneeteta medhdhido wode I oottido ubbabaa qoppa. Nuuni Xoossay ha saꞌan medhdhido loꞌꞌiya darobatakka beꞌoos. w19.12 2 ¶1-2

Daawiti Yihoowakko waani keehi shiiqidee? Daawiti meretaappe Yihoowaabaa akeekiis. Daawiti yelagatettan, dembban ba aawaa dorssaa heemmiiddi daro wodiyaa aattiis. I Yihoowa meretatubaa wotti dentti qoppiyoogaa he wode doommennan aggenna. Leemisuwawu, Daawiti omarssi saluwaa pude xeelliyo wode, shaꞌan qoodettiya xoolintteta beꞌiyoogaa xalla gidennan, I eta medhdhida Xoossaa eeshshatakka akeekiis. (Maz. 19:1, 2) Daawiti asay merettido ogiyaa wotti dentti qoppido wode, Yihooway keehi aadhdhida eranchcha gidiyoogaa akeekiis. (Maz. 139:14) Daawiti Yihooway medhdhidobata wotti dentti qoppidi, Yihoowaara bana geeddarssiyo wode I keehi laafa gidiyoogaa akeekiis. (Maz. 139:6) Nuuni tamaariyoobay aybee? Yihoowabaa nena tamaarissiya meretatubaa, hegeekka mitatubaa, mehe doꞌatubaanne asatubaa galla galla wotta dentta qoppa. Yaatiyo wode, galla galla nena siiqiya Aawaabaa tamaaraasa. (Roo. 1:20) Qassi kaseegaappe aaruwan neeni A siiqiyoogaa galla galla akeekana. w19.12 19-20 ¶15-17

Muusee Xoossawu oottanawu dooriis. Muuseyyo layttay 40 heera gidido wode, I “Gibxxe kawuwaa naa7ee na7aa” geetettiyoogaappe Xoossaa asaa gidida Israaꞌeelatuura issippe gidanawu dooriis. Muusee gita maataa aggi bayiis. Muusee Israaꞌeelata maaddido wode, bana Gibxxe Kawoy hanqqettanaagaa eriis. Paarooni wolqqaama kawo, qassi Gibxxe asay A xoossaadan xeellees. Hagee Muusessi mino ammanoy deꞌiyoogaa bessees. Muusee Yihoowan ammanettiis. Muusee hegaadan ammanettidoogee I ba deꞌo laytta ubban Yihoowaara mata dabbotettan deꞌanaadan maaddiis. (Lee. 3:5) Nuuni tamaariyoobay aybee? Muuseegaadan, nuuni ubbay issi issibaa kuuyana koshshees: Nuuni Xoossawu oottanawunne A asaara issippe gidanawu dooranee? Nuuni Xoossawu oottanawu nu goꞌꞌaa aggibayiyoogee koshshana danddayees, qassi Yihoowa erennaageeti nuna eqettana danddayoosona. SHin nuuni saluwan deꞌiya nu Aawan ammanettikko, I nuna maaddanaagaa ammanettoos! w19.12 17 ¶5-6

Nuuni biittaa baanaappe merettikkonne, baanaappe keehi alꞌꞌo. Yihooway nuna xoqqu ootti xeelliyoy aybissakko amaridabaa ane beꞌoos. I baagaa mala eeshshati deꞌanaadan oottidi asaa medhdhiis. (Doo. 1:27) Yaatiyoogan, I saꞌan medhdhido aybippenne asay aadhdhanaadan oottiis; qassi nuuni saꞌaanne mehiyaa doꞌaa haaranaadankka oottiis. (Maz. 8:4-8) Addaame nagaraa ootti simminkka, Yihooway asaa xoqqu ootti xeelliyoogaa aggibeenna. I nuna keehi xoqqu oottidi xeelliyo gishshawu ba siiqiyo Naꞌaa Yesuusa nu nagarawu wozo oottidi immiis. (1 Yoh. 4:9, 10) Addaame nagaraa gaasuwan hayqqida ‘worddotakka xillotakka hayquwaappe’ denttanawu Yihooway wozuwaa yarshshuwaa goꞌettana. (Oos. 24:15) Nuuni hargganchcha, hiyyeesa, woy layttan cima gidikkonne, Yihoowayyo alꞌꞌo gidiyoogaa A Qaalay qonccissees.—Oos. 10:34, 35. w20.01 15 ¶5-6

Issi uri saluwaa biyo hidootay I bantta soo asaappe laattiyooba gidenna. Hegaa ayyo Xoossay immees. (1 Tas. 2:12) Harata qohana danddayiya oyshata oychchennaadankka nuuni naagettana bessees. Leemisuwawu, tiyettida ishaa machchiyo I baynnan sinttappe saꞌan deꞌanaagaa qoppiyo wode iyyo siyettiyaabaa nuuni oychchana koshshenna. ‘Paxa deꞌiyaageetu ubbaa amuwaa’ Yihooway ooratta alamiyan alanaagaa nuuni ammanettana danddayoos. (Maz. 145:16) Nuuni tiyettidaageeti haratuppe aadhdhoosona giidi qoppennan aggiyoogee, nuuni naagettanaadankka oottees. Waanidi? Tiyettida issoti issoti ammanettidaageeta gididi deꞌennaagaa Geeshsha Maxaafay yootees. (Maa. 25:10-12; 2 PHe. 2:20, 21) Nuuni ‘harata sabbennaadan’ naagettikko, tiyettidaageeta woy loytti erettiyaageeta woy daro layttawu Yihoowayyo haggaazidaageeta mule kaallokko. (Yih. 16) Yaatikko, eti ammanettennaageeta gidiyo wode woy gubaaꞌiyaa aggiyo wode, nuuni Yihoowawu ammanettiyoogaa woy ayyo haggaaziyoogaa aggokko. w20.01 29 ¶9-10

Nuuni Yihooway ‘siiqiyo naata’ gidiyo gishshawu, A milatanawu nuussi danddayettida ubbabaa oottoos. Nuuni siiqiyoonne kehiyo wode, qassi haratussi atto giyo wode, Yihoowa milatoos. Xoossaa erennaageeti nu loꞌꞌo eeshshaa akeekiyo wode, kaseegaappe aaruwan abaa eranawu koyana danddayoosona. (1 PHe. 2:12) Yihooway nuna oyqqiyo ogiyan yelidaageeti bantta naata oyqqanawu baaxetana koshshees. Eti yaatiyo wode, naati siiqiya nu Aawaara dabbotanawu koyana danddayoosona. Saluwan deꞌiya nu Aawaa Yihoowan nuuni ceeqettoos, qassi harati A eranaadan koyoos. Nuuni ubbay nu wozanan Kawuwaa Daawitaagaadan, “Taani GODAN ceeqettais” yaagoos. (Maz. 34:2) SHin, Yihoowaabaa yootanawu keehi yayyana danddayoos. Yaatin, nuuni waanidi xalana danddayiyoo? Nuuni Yihoowaabaa yootikko I ay keena ufayttanaakko, qassi harati abaa tamaariyoogan ay keena goꞌettanaakko qoppiyo wode, nuuni xala gidoos. Yihooway nuuyyo koshshiya xalatettaa immana. I koyro xeetu layttan deꞌida ishantti xala gidanaadan maaddiis; qassi I nunakka maaddana.—1 Tas. 2:2. w20.02 11 ¶12-13

Geeshsha Maxaafaa xannaꞌiya daroti ayyaanaaban diccidi xammaqettoosona. Gidikkonne, nunaara Geeshsha Maxaafaa xannaꞌiyaageetuppe amaridaageeti erissiyo ashkkara gidanawu yayyiyaaba milatoosona. Eti xannaꞌiyoogan ufayttiyaaba gidikkonne, ayyaanaaban diccidi xammaqettokkona. Neeni Geeshsha Maxaafaa xannaꞌissiyo uri deꞌikko, ne xinaatee tamaariyoobaa oosuwan peeshshanaadaaninne I Kiristtoosi erissiyo ashkkara gidanaadan maaddanawu neeni koyiyoogee qoncce. Asay siiqoy denttettin baayyo haggaazanaadan Yihooway koyees. Hegaa gishshawu, nu halchchoy nu xannaꞌissiyoogeeti Yihooway etawu huuphiyan huuphiyan qoppiyoogaanne eta keehi siiqiyoogaa akeekanaadan maaddiyoogaa gidana koshshees. Yihooway “aawi bainna naatussi aawa; qassi azinai haiqqido maccaasata naagiyaagaa” gidiyoogaa eti akeekanaadan maaddanawu koyoos. (Maz. 68:5) Neeni xannaꞌissiyoogeeti Xoossay eta keehi siiqiyoogaa akeekiyo wode, eti A siiqiyoogaa doommana danddayoosona. Neeni xannaꞌissiyoogeeti merinaa deꞌuwaa demmanaadan siiqiya Xoossay koyiyoogaanne eti hegaa demmanaadan maaddanawu I giigi uttidoogaa akeekanaadan eta maadda. w20.01 3 ¶7-8

Kiitettida PHawuloosi bana ziqqi oottiya asa gidiyo gishshawu haratu maadoy bawu koshshiyoogaa akeekiis. I laggeti bana metuwaa wodiyan minttettido gishshawu harati bana laafa asadan xeellana giidi hirggibeenna. (Qol. 4:7-11) Nuussi minttettoy koshshiyoogaa nuuni ammanikko, nu ishanttinne nu michchontti nuussi koshshiya maaduwaa ufayssan immana. PHawuloosi bana Geeshsha Maxaafay minttettanaagaa eriis. (Roo. 15:4) Qassi Geeshsha Maxaafay I ay metuwaakka genccanaadan aadhdhida eratettaa ayyo immana. (2 Xim. 3:15, 16) PHawuloosi Roomen naaꞌꞌanttuwaa qashettido wode, hayqqanawu matidabadan qoppiis. I baakko Ximootiyoosi eesuwan yaanaadaaninne “maxaafata” ehanaadan oychchiis. (2 Xim. 4:6, 7, 9, 13) Ayssi giikko, he maxaafay PHawuloosi Geeshsha Maxaafaa xannaꞌanawu goꞌettiyo Ibraawettuwan Xaafettida Geeshsha Maxaafaa shaaho gidana danddayees. Nuuni Xoossaa Qaalaa ubbatoo nabbabiyoogan PHawuloosa leemisuwaa kaalliyo wode, keehi metiya hanotankka nuna woppu oottanawu Yihooway Geeshsha Maxaafaa goꞌettana. w20.02 23-24 ¶14-15

Elifaazi, Bilddaadinne Xoofaari Iyyooba waati maaddana danddayiyaakko qoppanawu bantta wodiyaa bazzibookkona. Nuuni waatidi, qassi awude haasayanaakko Geeshsha Maxaafan deꞌiya Iyyooba maxaafaappe darobaa tamaarana danddayoos. Iyyoobi keehi azzananaadan oottiya daro metoy A gakki simmin, oyddu asati A minttettanawunne zoranawu yiidosona. He asati daro wodiyaa coꞌꞌu giidi aattidosona. He heezzu asati Elifaaza, Bilddaadanne Xoofaara geetettoosona. Eti he wodiyan Iyyooba waati maaddana danddayiyaakko qoppibeennaagaa guyyeppe eti haasayidobay bessees. Eti Iyyoobi oottido moorobaa waatidi awu qonccissana danddayiyaakko qoppiiddi takkidosona. Eti haasayidoban amaridabay likke gidikkonne, Iyyoobanne Yihoowa xeelliyaagan qareti baynnabaa woy tuma gidennabaa darobaa haasayidosona. (Iyy. 32:1-3) Eti Iyyoobi iita asa giidi A mootidosona. Hegaa xeelliyaagan Yihooway waatidee? I ha heezzu asatu bolli keehi hanqqettiis. I eta eeyyadan qoodiis, qassi etawu Iyyoobi woossana mala eti oychchanaadan oottiis. (Iyy. 42:7-9) Elifaazi, Bilddaadinne Xoofaari oottido iitabaappe nuuni darobaa tamaaroos. Koyruwan, nuuni nu ishanttu bolli pirddana koshshenna. (Maa. 7:2-5) Nuuni haasayanaappe kase etabaa loytti ezggana koshshees. Eti genccidobaa nuuni akeekana danddayiyoy yaatiyoogaa xallaana. (1 PHe. 3:8) Naaꞌꞌanttuwan, nuuni haasayiyo wode, nu haasayiyoobay kehanne likke gidiyoogaa akeekana bessees. (Efi. 4:25) Qassi heezzanttuwan, nuuni issoy issuwawu haasayiyoobay Yihoowa keehi qofissees. w20.03 22-23 ¶15-16

Nuuni darotoo, Yihoowaabaa harata tamaarissiyo wode, kaseegaappe aaruwan A eroos. Leemisuwawu, A dabbo gidanawu koyiyaageeta demmanaadan I nuna maaddiyo wode, Yihooway asawu qarettiyoogaa akeekoos. (Yoh. 6:44; Oos. 13:48) Nu xinaateti iita meeziyaa agganaadaaninne laamettidi ooratta asatettaa maayanaadan I maaddiyo gishshawu, Xoossaa Qaalaa, Geeshsha Maxaafawu wolqqay deꞌiyoogaa nuuni akeekoos. (Qol. 3:9, 10) Nu heeran deꞌiya asaa nuuni maaddanaadan Xoossay nuna etakko darotoo kiittiyo gishshawu, I asaa danddayiyoogaakka nuuni akeekoos. (Roo. 10:13-15) Gidoppe attin, nuuni daro layttawu Yihoowawu haggaazikkonne, aara dabbotido dabbotaa mule xaasayidi xeellana koshshenna. Nuuni Xoossaara dabbotido dabbotaa xoqqu ootti xeelliyoogaa bessiyo issi ogee woosan aara haasayiyoogaa. Neeni issi urawu mata lagge gidanawu koyikko, aara darotoo haasayana koshshees. Hegaa gishshawu, Xoossawu mata dabbo gidanawu, akko darotoo woossa, qassi ne qoppiyoobaanne neeyyo siyettiyaabaa awu yootanawu yayyoppa. w19.12 19 ¶11, 13-14  

Hegee nuna keehi woppissiyaaba! Xoossaa Kawotettaa Kawoy Yesuusi, Seexaanaynne A alamee nu bolli gattiyo qoho ubbaa xayssana. (Isi. 65:17; 1 Yoh. 3:8; Ajj. 21:3, 4) Hegee keehi ufayssiya hidoota! Qassi Yesuusi nuuyyo deexo oosuwaa immidaba gidikkonne, ha wurssetta gallassatun nuna maaddanawu I nunaara deꞌees. (Maa. 28:19, 20) Hegee nuna keehi xalissees! Woppay, hidootaynne xalatettay nuuni sarotettan deꞌanaadan keehi koshshiyaabata. Yaatin, nena wolqqaama metoy gakkin neeni unꞌꞌettiyo wode, waanada sarotettan deꞌana danddayay? Yesuusa leemisuwaa kaallada I oottidobata oottiyoogan sarotettan deꞌana danddayaasa. Koyruwan, woossanne woosan gencca. Naaꞌꞌanttuwan, Yihoowayyo azazettiyoogeenne minnada sabbakiyoogee deexxiyaaba gidiyo wodekka, hegaadan ootta. Heezzanttuwan, meto wodiyan ne laggeti nena maaddanaagaa ammanetta. Yaatiyo wode, Xoossaa sarotettay ne wozanaanne ne qofaa naagana. (Pili. 4:6, 7) Qassi, Yesuusaagaadan ay metuwaakka neeni xoonana.—Yoh. 16:33. w19.04 13 ¶16-17