Xiqimita

Yihooway ba asaa ha wodiyan naagiyoogaa bessiya daro naqaashaa nuuni beꞌoos. Hagaa qoppa: Nuuni kumetta saꞌan tumaa sabbakoosinne tamaarissoos. (Maa. 28:19, 20) Hegaappe denddidaagan, Dabloosa iita oosoy qoncciya kiyanaadan oottoos. Danddayiyaaba gidiyaakko, Seexaanay nu oosuwaa diggana; shin I danddayenna. Yaatiyo gishshawu, nuuni iita ayyaanata yayyana koshshenna. Nuuni Yihoowawu ammanettikko, daydanttati nuna merinawu qohana danddayokkona. Gidikkokka, nuuni ubbay iita ayyaanata eqettananne Yihoowan ammanettana koshshees. Hegaadan oottikko, nuuni daro anjjota demmana, qassi Seexaanaa worddotun cimettennaadan naagettana. Hegaa bollikka, daydanttata yayyiyoogan Yihoowassi haggaaziyoogaa aggokko. Ubbaappe aaruwan, nuuni Yihoowaara dabbotido dabbotaa minttoos. Kiitettida Yaaqoobi, “Yaatidi xalahe halaqaa teqqite; i intteppe baqatana. Xoossaakko shiiqite; ikka inttekko shiiqana” yaagiis.—Yaaq. 4:7, 8. w19.04 24 ¶15; 25 ¶18

Intte naati Xoossaa Yihoowappe “imettiya imota.” Intte naata intte naagiyo aawatettaa Yihooway inttessi immiis. Mattumaara gayttidaagan qohoy gakkennaadan intte naata naaganawu waatana danddayeetii? Koyruwan, mattumaara gayttida qohuwaabaa intte erite. Mattumaara gayttidaagan naata qohiya asatubaanne eti naata cimmanawu goꞌettiyo hiillatubaa erite. Qohana danddayiya hanotata woy asata akeekite. (Lee. 22:3; 24:3) Dariya baggi, naꞌa qohiyaagee he naꞌi eriyoonne ammanettiyo ura gidiyoogaa hassayite. Naaꞌꞌanttuwan, intte naatuura qoncce gidida ogiyan haasayite. (Zaa. 6:6, 7; Yaaq. 1:19) Mattumaara gayttidaagan qohettida naati hegaabaa hara urawu yootanawu darotoo koyennaagaa hassayite. Eti hara asi banttana ammanenna giidi yayyana danddayoosona, woy qohidaagee eti hara urawu odikko eta bolli iitabaa gattana giido gishshawu eti yayyana danddayoosona. Intte naatu bolli iitabi gakkidabadan inttessi siyettikko, eta kehatettan oychchite; yaatidi eti yootiyo ubbabaa danddayan siyite. Heezzanttuwan, intte naata tamaarissite. Issi uri eta bessenna ogiyan bochchanawu malikko, eti woyganaakkonne waatanaakko eta tamaarissite. w19.05 13 ¶19-22

Yihooway otorettiya asa shenetiyoy aybissee? Bantta xallaa siiqiyaanne hegaa minttettiya asati Seexaanaagaadan otorettiyoogee hegawu issi gaaso. Xoossay ubbabaa Yesuusa baggaara medhdhiis. Seexaanay baayyo Yesuusi gulbbatidi goynnana giidi ammanidoogaa qoppa! (Maa. 4:8, 9; Qol. 1:15, 16) Hegaadan bantta xallaa siiqiyoogan banttana xoqqu oottiyaageeti ha saꞌaa aadhdhida eratettay Xoossaa sinttan eeyyatetta gidiyoogaa bessoosona. (1 Qor. 3:19) Nu oonatettaa bessiyaagaadan xeellanaadan Geeshsha Maxaafay nuna maaddees. Qassi amarida hanotan nuna siiqiyoogee bessiyaaba gidiyoogaa yootees. Yesuusi, ‘Ne shooruwaa ne huuphedan siiqa’ yaagiis; hegee nuuni amarida hanotan nuussi koshshiyaabawu qoppana bessiyoogaa qonccissees. (Maa. 19:19) Gidoppe attin, Geeshsha Maxaafay nuuni haratuppe gitatays giidi mule qoppana bessennaagaa tamaarissees. Geeshsha Maxaafay hagaadan gees: “Inttena siiqiyoogan woikko ceeqettanau koyiyo hada amuwan issibaanne oottoppite; shin issoi issuwaappe gitatais yaagidi qoppennan, issoi issuwaayyo intte huuphiyaa kaushshite.”—Pili. 2:3; Roo. 12:3. w19.05 24 ¶13-14

Tumuppe Geeshsha Maxaafay tamaarissiyoobaa neeni tamaarido wodenne Yihoowayyo haggaazanawu kuuyido wode neeni laammettidobaa ane qoppa. Yihoowayyo haggaazanawu, nuuppe daroti iitabaa oottiyoogaa aggana koshshiis. (1 Qor. 6:9-11) Yihooway maaddin ha iita oosota nuuni aggidoogan keehi ufayttoos! SHin, nuuni laamettana koshshiyo harabay deꞌenna giidi mule qoppana bessenna. Nuuni xammaqettanaappe kase oottiyo gita nagaraa aggidaba gidikkonne, he gita nagarata zaarettidi oottanaadan nuna paaccana danddayiya aybippenne naagettanawu aggennan loytti baaxetana koshshees. Nuuni naaꞌꞌubaa oottana koshshees. Koyro, nuuni ha alamiyaa ‘milatiyoogaa’ aggana koshshees. Naaꞌꞌantto, nuuni nu qofaa laammiyoogan ‘laamettana’ koshshees. PHawuloosi yootidobay beettiyaaban laamettiyoogaappe aadhdhiyaaba. Hegee nu hanota ubbaara gayttidaba. Nuuni nu qofaa, nu xeelaa, nuussi siyettiyaabaanne nu amottiyoobaa muleera laammana koshshees. w19.06 9 ¶4-6

Nuuni unꞌꞌettiyo wode, gubaaꞌiyaa shiiqota shiiqiyoogan minettana danddayoos. Nuuni shiiqota shiiqiyo wode, Yihooway nuna ‘maaddanaadaaninne minttettanaadan’ oottoos. I nuna yan ba geeshsha ayyaanaa baggaara, ba Qaalaa baggaaranne ba asaa baggaara minttettees. SHiiqotun nuuni issoy issuwan ‘minettiyoogan’ ufayttana danddayoos. (Roo. 1:11, 12) Soofiyo giyo michchiyaa hagaadan gaasu: “Yihoowaynne nu ishanttu maabaray taani genccanaadan maaddidosona. Nu Gubaaꞌe shiiqoti taassi keehi koshshiyaaba. Taani loyttada haggaaziyo wodenne gubaaꞌiyan loyttada oottiyo wode, tana unꞌꞌissiyaabaanne hirggissiyaabaa kaseegaappe aaruwan gencciyoogaa akeekaas.” Nuuni hidootaa qanxxiyo wode, Yihooway nuna unꞌꞌissiyaabaa sinttappe merinawu xayssana xallawu gidennan, unꞌꞌissiyaabaa nuuni ha wodiyan genccanaadan maaddanawukka qaalaa gelidoogaa hassayoos. Unꞌꞌissiyaabaanne hidootaa qanxxissiyaabaa xoonanaadan I nuuyyo “koshshaanne wolqqaa” immees.—Pili. 2:13, NW. w19.06 19 ¶17-18

Hagee Yesuusi hayquwaappe denddi simmidi etaara shiiqiyo koyro shiiqo gidiyo gishshawu, I etayyo yootiyo keehi koshshiya kaaletoy deꞌennan waayi aggana. Yesuusi giigissido shiiquwan, bana kaalliyaageeti koyro xeetu layttan oottana bessiyo keehi koshshiya oosuwaa etawu yootiis; hegee ha wodiyan nuuni oottiyo oosuwaara issi mala. Yesuusi hagaadan giis: “Hegaa gishshau, intte biidi, asa ubbaa tana kaalliyaageeta oottite; . . . taani inttena azazidobaa ubbaa eti naagana mala, eta tamaarissite.” (Maa. 28:19, 20) Yesuusi bana kaalliyaageeti ubbay sabbakanaadan koyees. I hagaa ammanettida 11 kiitettidaageetu xallay oottanaadan azazibeenna. Hegaa waati erana danddayiyoo? Yesuusi bana kaalliyaageeta oottanaadan azazido wode, Galiila deriyan deꞌiyaageeti kiitettidaageetu xalla gidokkona. Hegaa nuuni waati eriyoo? Kiitanchchay he maccaasatussi, “Intte a [Galiilan] be7ana” giidoogaa hassayite. (Maa. 28:7) Hegaa gishshawu, ammanettida maccaasatikka he sohuwan deꞌennan waayi aggana. SHin hegaa xalla gidenna. w20.01 2-3 ¶1-4

Nuuni asay nuna ixxanaagaa naagana koshshiyoy aybissakko Yesuusi yootiis. Nuuni alamiyaa bagga gidenna gishshawu, asay nuna ixxanaagaa I yootiis. Nuna yedetay gakkiyoogee Yihooway nuna anjjibeennaagaa bessiyaaba gidenna. Hegee nuuni likke gididabaa oottiiddi deꞌiyoogaa bessiyaaba! Ixxiya asati nuuni ubbaa danddayiya Xoossaa Yihoowassi goynniyo goynuwaa muleera teqqana danddayokkona. Daroti malidosona; shin etayyo hanibeenna. Naaꞌꞌantto Alamiyaa Olaa wode aybi hanidaakko qoppa. He wode, daro biittatun kawotettati Xoossaa asaa bolli wolqqaama yedetaa gattidosona. Yihoowa Markkatu oosoy Jarmane biittan Naaze haaruwaa xallan gidennan, Awusttiraaliyan, Kanaadaaninne hara biittatun muleera teqettiis. Yaatin, aybi hanidee? Olay 1939n doommiyo wode, kumetta saꞌan 72,475 aassiyaageeti deꞌoosona. He olay 1945n eqqido wode, Yihooway anjjin aassiyaageeti 156,299 gidiyoogaa iripportte qonccissiis. Aassiyaageetu qooday naaꞌꞌu kusheppe dariis! w19.07 9 ¶4-5

Neeni haꞌꞌi Geeshsha Maxaafaa xinaatiyaa xannaꞌissana xayikkonne, erissiyo ashkkara oottiyoogaa hara ogiyan maaddana danddayaasa. Leemisuwawu, oorattati SHiiquwaa Addaraashaa yiyo wode mokkananne etassi lagge gidana danddayaasa. Hegaadan oottiyoogan neeni siiquwaa bessikko, nuuni tumu Kiristtaane gidiyoogaa I akeekanaadan maaddana danddayaasa. SHiiqotun neeni zaariyo zaaroti qantta gidikko, oorattati bantta ammanuwaa wozanappe bonchchuwan waati qonccissanaakko tamaarissaasa. Aassiyoogaa mati doommida uraara issippe haggaazuwaa kiyada I Geeshsha Maxaafaa goꞌettidi asaa tamaarissanaadankka maaddana danddayaasa. Hegaadan oottiyoogan, Kiristtoosa leemisuwaa I kaallanaadan tamaarissaasa. (Luq. 10:25-28) Daro Kiristtaanetussi keehi koshshiya oosoy deꞌiyo gishshawu, etawu oosoy daro. SHin, darobaa oottiya Kiristtaanetikka Geeshsha Maxaafaa xannaꞌissanawu wodiyaa demmoosona; qassi eti yaatiyoogan keehi ufayttoosona. w19.07 17 ¶11, 13  

PHawuloosi kase oottido loꞌꞌobay woy iitabay A qofay Yihoowa haggaazuwaappe sherꞌꞌi gaanaadan oottibeenna. I “sinttan de7iyaagaa” oyqqanawu woy wottaa wurssanawu “guyyeera de7iyaagaa” dogi aggana koshshiyoogaa yootiis. PHawuloosa qofay shaahettanaadan oottana danddayiya amaridabati aybee? Koyroogee, PHawuloosi Kiristtaane gidanaappe kase, keehi injjetido asa. Gidikkonne, I hegaa “wora olidobaadan” qoodiis. (Pili. 3:3-9) Naaꞌꞌanttoogee, I Kiristtaaneta yedettidoogan bana mooranchchadan qoppidaba gidikkonne, hegee I Yihoowawu haggaaziyoogaa digganaadan oottibeenna. Heezzanttoogee, taani Yihoowawu oottidobay gidana giidi I qoppibeenna. PHawuloosi qashettidaba, shocettidaba, shuchchan cadettidaba, abban markkabee meꞌidaba, namisettidabanne kallottidaba gidikkonne haggaazuwan darobaa oottiis. (2 Qor. 11:23-27) SHin, PHawuloosi ay oottidabanne tuggatidaba gidikkonne, I aggennan Yihoowawu haggaazana koshshiyoogaa eriis. Nuunikka hegaadan oottana bessees. w19.08 3 ¶5

Nu ishanttuppenne nu michchenttuppe daroti sabbakiyo oosoy woy sooppe soo oottiyoogee teqettido biittatun deꞌiyo gishshawu, mishiraachchuwaa sabbakanawu hara ogiyaa koyoosona. (Maa. 10:17-20) Hegaa mala issi biittan, woradaa xomoosiyaagee aassiyaageeti ubbay dabbotuyyo, shoorotuyyo, banttanaara tamaariyaageetuyyo, banttanaara oottiyageetuyyoonne eriyo asaayyo sabbakana koshshiyoogaa yootiis. Naaꞌꞌu layttaa giddon, he woradan gubaaꞌetu qooday keehi gujjiis. Nuuni deꞌiyo biittan sabbakiyo oosoy waayi digettana. SHin, hiillan oottiya ishanttuppenne michchonttuppe ha keehi maaddiyaabaa tamaarana danddayoos: Neeni haratussi sabbakanawu neessi danddayettida ubbabaa oottikko, metiyo wodiyankka aggennan sabbakanaadan Yihooway neessi wolqqaa immana. (Pili. 2:13) Ha wodiyan, nuuni keehi koshshiyaabaa shaakki eriyaageeta, boree baynnaageeta, harata xubbennaadan naagettiyaageetanne xillotettaa ayfiyaa ayfiyaageeta gidana koshshees. Yaatiyo wode, nu siiqoy diccana, qassi nu siiqo Aawaa Yihoowa nuuni bonchchissana. w19.08 13 ¶17-18

Harati ubbatoo I koyiyoobaa oottanaadan koyiyaanne yootiyoobaa aybanne siyenna uraara takkanawu nuuni koyennaagee qoncce. SHin, nu ishanttinne nu michchontti ‘issoy issuwawu qarettiyaageeta, ishanttudan siiqettiyaageeta, qassi issoy issuwawu kehiyaageetanne’ banttana ziqqi oottiyaageeta gidiyo wode etaara deꞌiyoogee keehi ufayssiyaaba. (1 PHe. 3:8) Bana ziqqi oottiya uraaban nuussi hegaadan siyettees, qassi nuuni nuna ziqqi oottiyo wode, etikka nuukko shiiqanawu ufayttana. Nuna ziqqi oottiyoogee nuuni deꞌuwan metootennaadankka oottees. Nuuni likke gidenna giidi qoppiyoobaa issi issitoo beꞌana woy hegee nuna gakkana. Keehi eranchcha asati issi issitoo sabettokkona. Qassi daro eri baynna asati issi issitoo keehi sabettoosona. SHin nuuni deꞌuwaa hanotaadan eeno giidi ekkana koshshiyoogaanne deꞌuwan haniyaaban yiillotana koshshennaagaa Solomoni akeekiis. (Era. 6:9) Nuuni nuna ziqqi oottikko, deꞌuwan nu dosennabaakka eeno giidi ekkiyoogee metennaba gidana. w19.09 4-5 ¶9-10

Maatay deꞌiyoogeeti, hegeetikka cimatussinne aawatussi harata goꞌꞌiyaabaa oottiyo injjee deꞌees. Aaway so asawu huuphe gidanaadan Yihooway sunttiis; qassi aaway ba naata loohissanaadaaninne seeranaadan Xoossay koyees. (1 Qor. 11:3) SHin, hegaa giyoogee aawati bantta maataa koyido ogiyan goꞌettana danddayoosona giyoogaa gidenna. So asay deꞌanaadan oottiday Yihoowa gidiyo gishshawu, aawati bantta so asaa oyqqiyo ogiyan an oyshettoosona. (Efi. 3:14, 15) Aawati bantta maataa Xoossaa ufayssiya ogiyan goꞌettiyoogan Yihoowawu haarettiyoogaa bessoosona. Yihooway inttessi immido maataa bessenna ogiyan goꞌettoppite. Intte mooruwaa ammanite; qassi harati Geeshsha Maxaafaa goꞌettidi zoriyo zoriyaa siyite. Yaatikko, intte intte huuphiyaa ziqqi oottiyo gishshawu intte soo asay inttena bonchchana. Intte intte soo asaara woossiyo wode, inttessi siyettiyaaba ubbaa Yihoowawu yootite; yaatiyo wode intte Yihoowa maaduwaanne A kaaletuwaa ay keena koyiyaakko intte soo asay erana. Ubbaappe aaruwan, Yihoowa haggaazuwaa intte deꞌuwan aybippenne aadhdhiyaabadan xeellite. (Zaa. 6:6-9) Intte intte soo asawu immana danddayiyo aybippenne alꞌꞌo imotaappe issoy intte loꞌꞌo leemiso gidiyoogaa. w19.09 15 ¶8; 17 ¶14; 18 ¶16

Marqqoosi harata maaddiyoogan ufayttees. Marqqoosanttasoo asay dure gidennan aggenna; shin, Marqqoosi ba deꞌuwan miishshaanne aquwaa sinttayibeenna. Marqqoosi ba deꞌo laytta ubban Yihoowayyo ba dosan oottiis. Harata maaddiyoogan I ufayttees. Leemisuwawu, Marqqoosi kiitettida PHawuloosinne kiitettida PHeexiroosi eti bantta aawatettaa polanaadan etawu asatettan koshshiyaabaa kunttiyoogan darotoo eta maaddennan aggenna. (Oos. 13:2-5; 1 PHe. 5:13) PHawuloosi Marqqoosi ‘banaara Xoossaa kawotettaayyo oottidoogaanne bana daro maaddidoogaa’ woy minttettidoogaa yootiis. (Qol. 4:10, 11) Marqqoosi PHawuloosa mata laggetuppe issuwaa. Leemisuwawu, PHawuloosi 65 M.L. heeran, Roomen wurssettan qashettido wode, naaꞌꞌantto dabddaabbiyaa Ximootiyoosawu xaafiis. Ximootiyoosi Roome yaanaadaaninne banaara Marqqoosa ehaanaadan PHawuloosi he dabddaabbiyan oychchiis. (2 Xim. 4:11) Marqqoosi ammanettidi oottidobaa PHawuloosi nashshidabaa gidikkonne, he keehi koshshiya wodiyan Marqqoosi yaanaadan I oychchiis. Marqqoosi koshshiyaaban PHawuloosa maaddiis; hegee qumaa woy xaafanawu goꞌettiyo miishshata ehiyoogan gidana danddayees. PHawuloosi demmido maadoynne minttettoy I wurssettan hayqqana gakkanaashin genccanaadan maaddennan waayi aggana. w20.01 11 ¶12-13

Nuuni nu goꞌꞌaa aggi bayidi deꞌananne minnidi oottana koshshees. Yedetay nuna gakkanaagaa Yesuusi yootiis. Gidoppe attin, nuna gakkiya ay metuwaakka nuuni genccanaadan Yihooway minotettaa nuussi immana giidi naagana danddayoos. Nuuni loytti gencciyo wode, kaseegaappe aaruwan minnana. (Yaaq. 1:2-4) Nuuni Yihooway nuussi koshshiyaabaa immanaagaa, Yesuusi nuna heemmanaagaanne nu ishanttinne michchontti nuna minttettanaagaakka naagana danddayoos. (Maa. 6:31-33 Yoh. 10:14, 15; 1 Tas. 5:11) I bollaappe “suuttai goggiyo” maccaasiyaa Yesuusi pattido gallassi shemppo demmaasu. (Luq. 8:43-48) SHin A Kiristtoosa ashkkara gidada ammanettada deꞌikko, merinawu shemppo demmana danddayawusu. A waataasu gaada neeni qoppay? A Yesuusi erissiyo ashkkara gidikko, saluwan Yesuusaara demmana woytuwaa qoppa! A Kiristtoosa kaallanawu aggido ubbabay bessiyaaba. Hegaa gishshawu, nuuni merinawu deꞌanawu hidootiyoy saluwaana gidin saꞌaana gidin, Yesuusi “taakko haa yiite” giido shoobiyaa ekkidoogan keehi galatiyaageeta gidana danddayoos. w19.09 25 ¶21-22

Daawitinne A asati maaduwaa koyidi Israaꞌeela asa gidida Naabaala giyo duriyaa miyo guuttabaa oychchidosona. Eti bazzuwan Naabaala wudiyaa naagido gishshawu oychchanawu yayyibookkona. SHin uuzee Naabaali etawu aybanne immennan ixxiis. Daawiti hanqquwaa eexxi kiyidi, Naabaalanne A son deꞌiya attuma asa ubbaa woranawu halchchiis. (1 Sam. 25:3-13, 22) Gido shin, puulanchcha gidida Naabaala machchiyaa Abigaala keehi akeekanchcha. A xalan Daawita tohuwan wullada, I haluwaa kiyidi suuttan oyshshettennaadan minttada oychchaasu. Daawiti maaduwaa demmanawu Yihoowan ammanettanaadan kehatettan zoraasu. Abigaala haasayido liiqo qaalaynne A akeekan oottidobay Daawiti ba qofaa laammanaadan oottiis. Abigaalo kiittiday Yihoowa gidiyoogaa I akeekiis. (1 Sam. 25:23-28, 32-34) Yihooway Abigaalo goꞌettanaadan oottiya eeshshata A bessaasu. Hegaadan, hiillanchchanne akeekanchcha gidiyoogaa bessiya michchontti eti bantta soo asaanne gubaaꞌiyan deꞌiya harata minttanaadan Yihooway eta goꞌettana danddayees.—Tii. 2:3-5. w19.10 23 ¶10

Tumu Kiristtaaneti ubbay Gita Baabilooniira eta gattiyaabaa oottana koshshenna. Tumaa tamaaranaappe kase, Geeshsha Maxaafaa tamaaree worddo haymaanootiyaa yame gidana danddayees. I he haymaanootiyaa oosotanne meezeta kase kaalliyaagaa gidana danddayees. Woy qassi I he dirijjitiyawu miishshaa immidaagaa gidana danddayees. Geeshsha Maxaafaa xinaatee xammaqettennan aassiyaagaa gidanaappe kase, I kase worddo haymaanootiyaara gayttiyooba aybanne aggidoogaa akeekana bessees. I ba kase woosa keettawu woy worddo haymaanootiyaa bagga gidida dirijjitiyawu hegaappe simmin yame gidennaagaa yootanawu dabddaabbiyaa xaafana koshshees. Tumu Kiristtaanee ba oosoy worddo haymaanootiyaara ayba ogiyankka gayttennaagaa erana bessees. (2 Qor. 6:14-17) Nuuni hegaabaa mintti qoppiyoy aybissee? Nuuni Xoossay tuna giyo worddo haymaanootee tamaarissiyo worddo timirttetanne bala meezeta kaallana koyenna gishshataassa.—Isi. 52:11. w19.10 12 ¶16-17

Ermmaasi Geeshsha Maxaafaa shaahotuppe ba sunttan xeegettiya maxaafaa xaafiis; qassi Koyronne Naaꞌꞌantto Kawotu maxaafata I xaafennan aggenna. He oosoy Yihooway nagaranchcha asaa ay keena atto giyaakko I akeekanaadan maaddiis. Leemisuwawu, Kawuwaa Akaabi ba iita oosuwaappe simmin, I ba so asa ubbay xayiyoogaa ba deꞌuwan beꞌennaadan Yihooway oottidoogaa Ermmaasi erees. (1 Kaw. 21:27-29) Qassi, Minaasee Akaabaagaappe aaruwan Yihoowa hanqqetissiyaabaa oottidoogaakka Ermmaasi erees. SHin Minaasee ba nagaraappe simmido gishshawu Yihooway A maariis. (2 Kaw. 21:16, 17; 2 Odi. 33:10-13) He taariketi Ermmaasi danddayanchchanne maariyaagaa gidida Xoossaa leemisuwaa kaallanaadan A maaddennan aggokkona. Baaruka qofay guutta wodiyawu shaahettido wode Ermmaasi A waati maaddidaakko qoppa. Ermmaasi ba laggiyan hidootaa qanxxiyoogaappe, Xoossaa kiitaa kehatettan Baarukawu yootiyoogan A maaddiis.—Erm. 45:1-5. w19.11 6 ¶14-15

Wogaabaa maxaafan issi Israaꞌeela asi issippetettaa yarshshuwaa “galata yarshsho” oottidi shiishshana danddayiyoogaa akeekoos. (Wog. 7:11-13, 16-18) I yarshshana bessiyo gishshawu gidennan, koyiyo gishshawu yarshshees. Nuuni Yihoowawu haggaaziyoogee A xeelliyaagan nuussi siyettiyaabaa ayyo bessiyooba gidiyo gishshawu, hegee he issippetettaa yarshshuwaara issi mala. Nuussi deꞌiya keehi loꞌꞌobaa Yihoowayyo immoos; qassi nuuni A nu kumetta wozanaappe siiqiyo gishshawu hegaadan oottoos. Bantta dosan goynniya miilooniyan qoodettiya asay Yihoowanne A ogiyaa wozanappe siiqidi haggaaziyoogaa beꞌidi Yihooway ay keena ufayttaneeshsha! Yihooway nuuni oottiyoobaa xalla gidennan, nu hegaa aybissi oottiyaakko akeekeesinne xoqqu ootti xeellees. Hegee nuna keehi minttettees. Leemisuwawu, neeni cima gidikko, ne koyiyoogaadan oottana danddayennaagaa Yihooway akeekiyoogaa ammanettana danddayaasa. Yihoowawu darobaa oottana danddayennabadan neessi siyettennan waayi aggana; shin neeni oottana danddayiyoobaa oottanaadan nena denttettiyay Yihoowa wozanappe siiqiyoogaa gidiyoogaa I akeekees. Neeni immana danddayiyo, neessi deꞌiya loꞌꞌobaa I ufayttidi ekkees. w19.11 22 ¶9; 23 ¶11-12

Oosuwaa bessiyaagaadan xeelliyoogee keehi koshshiyaaba. Ayyaanay kaalettin Kawuwaa Solomoni, ‘oosettiyaabawu ubbawu wodee deꞌiyoogaa’ yootiis. I tokkiyoogaa, keexxiyoogaa, yeekkiyoogaa, miicciyoogaa, duriyoogaanne harabata qonccissiis. (Era. 3:1-8) Nu deꞌuwan keehi koshshiyaabatuppe naaꞌꞌati oosuwaanne shemppuwaa. Yesuusi oosuwaanne shemppuwaa bessiyaagaadan xeelliis. Issi wode, Yesuusi kiittidoogeeti daro sohuwaa biidi sabbaki simmidosona. “Qumaa maanaukka eta gattennan” ixxanaagaa keenaa eti minnidi oottidosona. Yesuusi hachchi gallassaa xiqisiyan deꞌiya qofaa etawu yootiis. (Mar. 6:30-34) Inne I erissiyo ashkkarati issi issitoo koyiyoogaa keenaa shemppana xayikkonne, Yesuusi eti ubbay shemppana koshshiyoogaa eriis. Issi issitoo, shemppana woy oosuwaa laammana koshshees. Xoossay beni ba asay saaminttan saaminttan Sambbataa gallassaa bonchchanaadan giigissido keehi koshshiyaabaappe hegaa akeekoos. Nuuni ha wodiyan Muuse Higgiyaa kaallana xayikkonne, I Sambbataa xeelliyaagan yootiyoobaappe tamaariyoogan goꞌettana danddayoos. w19.12 3 ¶6-7

Yihooway ammanettida ba ashkkarata naaganawu qaalaa geliis, qassi he qaalaa polana bessiyaagee A. (Maz. 31:1-3) Hegaa bollikka, Yihooway ba soo asaa yame gididaageetuyyo koshshiyaabaa kunttana xayikko, nuuni azzananaagaanne hidootaa qanxxanaagaa I erees. Nuussi asatettaaninne ayyaanaaban koshshiyaabaa immanawu I qaalaa geliis, qassi he qaalaa polennaadan aybinne A diggenna! (Maa. 6:30-33; 24:45) Yihooway ba gelido qaalaa poliyoy aybissakko nuuni hassayikko, nuussi gidiya miishshaa demmanawu metootiyo wodekka, I nuna maaddanaagaa ammanettana danddayoos. Koyro xeetu layttan deꞌiya Kiristtaaneta gakkidabaa qoppa. Yerusalaamen deꞌiya gubaaꞌiyaa wolqqaamaa yedetay gakkido wode, “Yesuusi kiittidoogeetuppe attin, ammaniyaageeti ubbati . . . laalettidosona.” (Oos. 8:1) Hegee woygiyoogaakko qoppa. Gidiya miishshaa demmanawu metootiyoogaa! Kiristtaaneti bantta keettaanne oosuwaa woy bantta zalꞌꞌiyaa xayennan waayi aggana. Yaatikkonne, Yihooway eta aggibeenna; eti bantta ufayssaa xayibookkona. (Oos. 8:4; Ibr. 13:5, 6; Yaaq. 1:2, 3) Yihooway ammanettida he Kiristtaaneta maaddiis; qassi I nunakka maaddana.—Maz. 37:18, 19. w20.01 17-18 ¶14-15

Daawiti issi gaammuwaappenne issi beeriyaappe ba aawaa dorssaa ashshido wode, he doꞌata woranaadan Yihooway A maaddidoogaa akeekiis. Wolqqaama olanchchaa Gooliyaada worido wode, Daawiti Yihooway bana kaalettiiddi deꞌiyoogaa akeekiis. (1 Sam. 17:37) Qassi qanaatiya Kawuwaa Saaꞌoolappe I baqatido wode, Yihooway bana ashshidoogaa I akeekiis. (Maz. 18, huuphessa qofaa) Daawiti otorettiya asa gidiyaakko, he ubbabaa ba wolqqan oottidabadan qoppana danddayees. SHin, Daawiti ba huuphiyaa ziqqi oottiyo gishshawu, ba deꞌuwan Yihoowa maaduwaa akeekiis. Nuuni tamaariyoobay aybee? Yihooway nuna maaddanaadan oychchiyoogaappe harabaakka nuuni oottana koshshees. I nuna awude, qassi waati maaddiyaakko nuuni akeekanawukka baaxetana bessees. Nuuni nu huuphiyaa ziqqi oottiyaageeta gidikko, nuuni ubbabaa oottana danddayennaagaanne nu danddayennabaa oottanaadan Yihooway maaddiyoogaa akeekoos. Qassi galla galla Yihooway nuna maaddiyoogaa akeekiyo wode, aara dabbotido dabbotay minnees. w19.12 20 ¶18-19

Yihooway nuna xoqqu ootti xeelliyoogaa nuuni ammananaadan oottiya daro gaasoy deꞌees. I nuna baakko ehees; qassi nuuni mishiraachchuwawu immiyo zaaruwaa akeekees. (Yoh. 6:44) Nuuni Yihoowakko shiiqiyo wode, I nuukko shiiqees. (Yaaq. 4:8) Yihooway nuuni ayyo alꞌꞌo gidiyoogaa bessanawu, nuna tamaarissanawu wodiyaa bazzeesinne baaxetees. I nuuni haꞌꞌi ay mala asakko, qassi sinttappe ay mala asa gidanaakko erees. I nuna siiqiyo gishshawu seerees. Hagee Yihooway nuna xoqqu ootti xeelliyoogaa loyttidi bessiyaaba! Amarida asati Kawuwaa Daawita pattenna asadan xeellidosona; shin I Yihooway bana siiqiyoogaanne maaddiyoogaa erees. Daawiti hegaa eridoogee, I ba hanotaa maara qoppidi genccanaadan A maaddiis. (2 Sam. 16:5-7) Nuuni unꞌꞌettiyo wode woy nuna metoy gakkiyo wode, Yihooway nuuni issibaa dumma ginan xeellanaadan maaddana danddayees; qassi nuuni ayba metonne xoonanaadan I maaddan danddayees. (Maz. 18:27-29) Yihooway nuna maaddiyo gishshawu, nuuni ayyo ufayssan haggaazennaadan nuna aybinne teqqana danddayenna.—Roo. 8:31. w20.01 15 ¶7-8

Issi asa Geeshsha Maxaafaa xannaꞌissiyo wode, woosan doomma. Geeshsha Maxaafaa ubbatoo xannaꞌissiyoogaa doommoogaappe guyyiyan, danddayettida ubban xinaatiyaa woossidi doommiyoogee loꞌꞌo. Nuuni Xoossaa Qaalaa akeekana danddayiyoy Xoossaa ayyaanaa maado xallaana gidiyoogaa tamaaree eranaadan maaddana koshshees. Geeshsha Maxaafaa xannaꞌissiya issoti issoti xannaꞌissiyo wode woossiyoy aybissakko qonccissanawu Yaaqooba 1:5 nabbaboosona: “Intteppe ooninne baayyo aadhdhida eratettai xayikko, . . . Xoossaa woosso.” Yaatidi xannaꞌissiyaagee ba xinaatiyaa, “Aadhdhida eratettaa immanaadan nuuni Xoossaa waati oychchana danddayiyoo?” yaagidi oychchees. Nuuni Xoossaa woossana koshshiyoogaa xinaatee maayana danddayees. Waati woossanaakko ne xinaatiyaa tamaarissa. I wozanappe woossiyoogaa Yihooway siyana koyiyoogaa qonccissa. Nuuni buzo woosan, nuuyyo siyettiyaabaanne hara oossinne odanawu koyennabaa ubbaa Yihoowassi yootana danddayiyoogaa qonccissa. Yihooway nu wozanaa qofaa ubbaa eriyoogaa hassaya.—Maz. 139:2-4. w20.01 2 ¶3; 5 ¶11-12

Yihooway tiyettidaageeta awude dooranaakko kuuyees. (Roo. 8:28-30) Yesuusi hayquwaappe denddi simmin, Yihooway tiyettidaageeta dooriyoogaa doommiis. Koyro xeetu layttan deꞌiya tumu Kiristtaaneti ubbay ayyaanan tiyettidaageeta gidennan aggokkona. Hegaappe haa simmin deꞌiya layttatun, banttana Kiristtaane giyaageetuppe daroti tumuppe Kiristtoosa kaalliyaageeta gidokkona. Yihooway he layttatunkka tumu Kiristtaane gidida amarida asata tiyiyoogaa aggibeenna. He asati Yesuusi yootidoogaadan zardduwaa giddon diccida gistte mala. (Maa. 13:24-30) Wurssetta gallassatunkka, Yihooway 144,000tu yarata dooriiddi deꞌees. Wurssettay wuranaappe guuttaa kasetidi Xoossay amaridaageeta tiyanawu dooriyaaba gidikko, I suurebaa oottiyoogaa nuuni ammanettana koshshees. (Roo. 9:11) Yesuusi issi leemisuwan odido oosanchchatu mala nuuni gidennaadan naagettana bessees. He oosanchchati wurssetta saatiyan oosuwaa gelidaageeta eta goday oyqqido hanotan zuuzummidosona.—Maa. 20:8-15. w20.01 30 ¶14

Yihooway ba soo asay ufayttanaadan koyees. Ha wodiyan daro metoy nuna gakkana danddayikkokka, nuuni ufayttanaadan oottiya daro gaasoti deꞌoosona. Leemisuwawu, saluwan deꞌiya nu Aaway nuna keehi siiqiyoogaa ammanettoos. Xoossaa Qaalaa, Geeshsha Maxaafaa eray nuussi deꞌees. (Erm. 15:16) Qassi, nuuni Yihoowa siiqiya, I kessido maarata siiqiyaanne issoy issuwaara siiqettiya dumma keettaa asaa yara. (Maz. 106:4, 5) Nuuni sinttappe deꞌoy yaa giiganaagaa ammanettiyo gishshawu ufayttiiddi deꞌana danddayoos. Yihooway mata wode iitatetaa ubbaa xayssanaagaanne ba Kawotettaa baggaara saꞌaa Gannate oottanaagaa eroos. Qassi, hayqqidaageeti denddidi zaarettidi nunaara gayttiyo ufayssiya hidootay nuussi deꞌees. (Yoh. 5:28, 29) Hegee keehi ufayssiyaaba gidana! Ubbaappe aaruwan, mata wode saluwaaninne saꞌan deꞌiya ubbay nu siiqiyo Aawaa bonchchana, sabbananne ayyo goynnana; hegee awu bessiyaaba. w20.02 13 ¶15-16

Neeni gita nagaraa oottikko, hegaa genttanawu maloppa. Yaatiyoogaappe, Yihoowakko woossa, qassi ne oottido ubbabaa ayyo yoota. He wode neeni woppu gaananne hegaappe simmin ne kahay geeyana. SHin neeyyo Yihoowaara dabbotay kaseegaa mala gidanaadan koyikko, woosaappe harabaakka oottana koshshees. Neeni seeraa ekkana koshshees. Kawuwaa Daawiti Berssaabehiira oottido nagaraabaa hananabaa yootiya Naataani Daawitawu yootanaadan Yihooway kiittido wode, Daawiti gaasoyibeenna woy ba nagaraa xaasayi xeellibeenna. I Berssaabi azinaa bolli xalla gidennan, ubbaappe aaruwan Yihoowa bolli nagaraa oottidoogaa sohuwaara ammaniis. Daawiti Yihoowappe yiida seeraa ekkiis; qassi Yihooway ayyo atto giis. (2 Sam. 12:10-14) Nuuni gita nagaraa oottikko, Yihooway nuna heemmanaadan sunttidoogeetussi yootana koshshees. (Yaaq. 5:14, 15) Qassi nuuni gaasoyana koshshenna. Nuuyyo ayba seeray imettikkokka, nuuni hegaa eesuwan ekkidi oosuwan peeshshiyo wode sarotettaanne ufayssaa demmana. w20.02 24-25 ¶17-18

“Tammu asati” saꞌan merinawu deꞌanawu hidootan naagiyaageeta qonccissoosona. “Aihuda” asa kalꞌꞌatiya tiyettidaageetu citaa Yihooway anjjidoogaa eti eroosona, qassi etaara issippe awu goynniyoogaa bonchchobadan qoppoosona. Saꞌan ha wodiyan deꞌiya tiyettida ubbaa sunttaa erana xayikko, saꞌan deꞌanawu hidootiyaageeti waanidi ‘etaara baana’ danddayiyoonaa? Geeshsha Maxaafay “tammu asati” ‘issi Ayhuda bitaniyaa maayuwaa macaraa oyqqidi, “Xoossai inttenaara de7iyoogaa nuuni siyido gishshau, ane nuunikka nenaara boos” yaaganaagaa’ yootees. Geeshsha Maxaafaa xiqisee issi Ayhuda bitaniyaabaa yootees. SHin, ‘nenanne’ ‘inttena’ giya qofay issi asappe daruwaabaa yootees. Hegaa giyoogee ha Ayhuda bitanee issi asa xalla gidennan, tiyettidaageetu citaa kumettaa qonccissees giyoogaa. Ayyaanan tiyettibeennaageeti tiyettidaageetuura issippe Yihoowawu oottoosona. Gidoppe attin, eti Yesuusi Kaalettiyaagaa gidiyoogaa eriyo gishshawu, tiyettidaageeta banttana kaalettiyaabadan xeellokkona.—Maa. 23:10. w20.01 26 ¶1-2

Yesuusi erissiyo ashkkarati I eta siiqidoogaadan eti asaa siiqikko, A erissiyo ashkkarata gidiyoogaa asa ubbay eranaagaa Yesuusi yootiis. He qofay koyro xeetu layttankka ha wodiyankka tuma. Issoy issuwaara siiqettiyoogee metiyo wodiyankka, nuuni issoy issuwaara siiqettiyoogee keehi koshshiyoy hegaassa. Nena hagaadan oychcha: ‘Metoy deꞌishinkka, issoy issuwaa aggennan siiqida ishanttuppenne michchonttuppe taani ay tamaarana danddayiyaanaa?’ Nuuni nagaranchcha gidiyoogee issoy issuwaassi siiquwaa bessiyoogee metanaadan oottees. Gidikkonne, nuuni Kirsttoosa leemisuwaa kaallanawu baaxetana koshshees. Nu bolli lanccida ishaara sarotettaa medhdhiyoogee keehi koshshiyoogaa Yesuusi nuna tamaarissiis. (Maa. 5:23, 24) Nuuni Xoossaa ufayssanawu koyikko, nuuyyo haratuura loꞌꞌo gaytotettay deꞌana koshshiyoogaa I yootiis. Nuuni nu ishanttuura sarotettaa medhdhanawu nuuyyo danddayettida ubbabaa oottiyo wode Yihooway ufayttees. Nuuni lancciyaa uluwan oyqqidi sarotettaa medhdhanawu baaxetana xayikko, I nu goynuwaa ekkenna.—1 Yoh. 4:20. w20.03 24 ¶1-4

Seexaanay, ‘wordduwawu aaway,’ Addaamenne Hewaani wodiyaappe doommidi asaa cimmiis. (Yoh. 8:44) Seexaanaa wordduwaappe amaridaagee hayquwaabaanne hayquwaappe simmin deꞌiya hanotaabaa tamaarissiyo wordduwaa. He timirtteti daro asay dosiyo meezetussinne wogatussi denddo. Keehi daro asay cimettidoy aybissee? Hayquwaa xeelliyaagan asawu aybi siyettiyaakko Seexaanay eriyo gishshawu, asaa cimmanawu hegaa goꞌettees. Nuuni merinawu deꞌanawu merettido gishshawu, hayqqanawu koyokko. (Era. 3:11) Hayquwaa nuuni morkkedan xeelloos. (1 Qor. 15:26) Seexaanay baaxetikkonne, hayquwaa xeelliyaagan tumay geemmi attibeenna. Hayqqidaageetu hanotaanne dendduwaa hidootaa xeelliyaagan awudeegaappenne aaruwan daro asay Geeshsha Maxaafay tamaarissiyoobaa ha wodiyan ereesinne yootees. (Era. 9:5, 10; Oos. 24:15) ‘Asay hayqqiyo wode waanii?’ giidi nuuni sirennaadaaninne yayyennaadan ha tumay nuna minttetteesinne maaddees. w19.04 14 ¶1; 15 ¶5-6

Xoossaa Yihooway baassi goynniyaageeta siiqees. I muletoo siiqees, qassi I muletoo siiqana. I tumu pirddaakka siiqees. (Maz. 33:5) Yaatiyo gishshawu nuuni naaꞌꞌubaa ammanettana danddayoos: (1) Yihooway ba ashkkarati naaqettiyo wode seelettees. (2) I tumu pirdday deꞌanaadan oottana. Xoossay Muuse baggaara Israaꞌeelatussi immido Higgiyawu denddoy siiqo. He higgee ubba asay, ubba qassi banttana qohuwaappe naagana danddayennaageeti tumu pirddaa demmanaadan minttettees. (Zaa. 10:18) He Higgee Yihooway awu goynniyaageetussi keehi qoppiyoogaa qonccissees. Kiristtaane gubaaꞌee 33 M.Ln eqqido wode Muuse Higgee polettiis. Siiqoy denddo gididonne tumu pirddaa minttettiya higgiyaa goꞌꞌay Kiristtaanetuppe attiichchiis giyoogee? CHii! Kiristtaanetussi ooratta higgee deꞌees. He Higgee ‘Kiristtoosa higgiyaa.’ Yesuusi ba erissiyo ashkkaratussi issi higgiyaa xaafi immana xayikkonne, eti kaallana mala azazota, higgetanne maarata immiis. ‘Kiristtoosa higgee’ I tamaarissido ubbabaa xaaxi waaxees. w19.05 2 ¶1-3

Asay minttettoy koshshiyoogaa gididi yelettees; qassi harata minttettiyo maalaalissiya eeshshay asawu deꞌees. Leemisuwawu, issi guutta naꞌay kaaꞌiiddi kunddidi gulbbataa qohettiyo wode, ba aayeekko woy ba aawaakko yeekkiiddi baana danddayees. A yelidaageeti he masunttaa pattana xayikkonne, eti naꞌaa minttettana danddayoosona. Eti naꞌay waanidaakko oychchana, A afuttaa quccana, taassa tana mo gaananne geella amarida xaliyaa masunttan tiyana woy masunttaa issiban qachchana danddayoosona. Takkennan, naꞌay yeekkiyoogaa aggees; qassi kaaꞌiyoogaa zaarettidi doommana danddayees. Guyyeppe, he masunttay paxana. SHin, issi issitoo naati keehi iita hanotan qohettoosona. Amaridaageeti mattumaara gayttidaagan qohettoosona. Naati mattumaara gayttidaagan issitoo woy daro layttan darotoo qohettidaageeta gidana danddayoosona. Naaꞌꞌu hanotankka, mattumaara gayttida qohoy wolqqaama, qassi dogettenna. Issi issi hanotan, mattumaara gayttidaagan naata qohidaagaa oyqqidi qaxxayoosona. Hara hanotan qassi, qohidaagee mule qaxxayettennan attiyaaba milatana danddayees. SHin, qohidaagee sohuwaara qaxxayettikkokka, qohettida naati gitaa gididikka waayettana danddayoosona. w19.05 14 ¶1-2