Usuppune

Kawuwa Hizqqiyasi keehi sahettido wode paxanawu Yihoowa mintti woossiis. Qassi Yihooway A pattiis. (2 Kaw. 20:1-6) Hara baggara qassi, Phawuloosi bana agunttaadan ‘caddi oyqqidabaa’ xayssanaadan Yihoowa mintti woossiis, shin Yihooway hegaa xayssibeenna. (2 Qor. 12:7-9) Kiitettida Yaaqoobanne Pheexiroosa naaꞌꞌaakka Kawuwa Heeroodisi woranawu koyiis. Kawoy Yaaqooba worissiis, shin Pheexiroosi maalaalissiya hanotan attiis. (Oos. 12:1-11) Nuuni hagaadan qoppana danddayoos, ‘Yihooway Yaaqooba aggidi Pheexiroosa ashshidoy aybissee?’ Hegaabaa Geeshsha Maxaafay yootenna. Yihooway ‘tumu pirddaa dosiyogaa’ ammanettana danddayoos. (Maz. 33:5) Yihooway issi issitoo nu woosaa nu qoppido ogiyan zaarennan aggana danddayees. Shin Yihooway awudekka loꞌꞌobaanne suurebaa oottiyogaa nuuni ammanettiyo gishshawu, I nu woosaa zaariyo ogiyan zuuzummokko.—Iyy. 33:13. w23.11 21 ¶6

Yaaqoobi ayyaanay denttettin xaafido dabddaabbiyan akeekanchcha uri “ero giyaagaa” gidiyogaa yootiis. Hegee woygiyogaakko qoppa. Yihooway maataa immidoogeetuyyo nuuni nu dosan azazettana koshshees. Shin Yihooway A azazota azazettennaadan nuna oychchiya urawu nuuni azazettanaadan koyenna. (Oos. 4:18-20) Asawu azazettiyogaappe Yihoowawu azazettiyogee metennabadan qoppana danddayoos. Qassi Yihooway awudekka wottiyobi baynna kaaletuwa immees. (Maz. 19:7) Shin maatay deꞌiyo asati nagaranchcha. Gidikkonne, saluwan deꞌiya nu Aaway yelidaageetuyyo, deriya haariyageetuyyonne cimatuyyo maataa immiis. (Lee. 6:20; 1 Tas. 5:12; 1 PHe. 2:13, 14) Nuuni etawu azazettiyo wode Yihoowawu azazettoos. w23.10 6 ¶2-3

Nuuni nu ammanuwaa minttana danddayiyo issi ogee, Yihoowa wolqqaabaa loytti qoppiyoogaa. I qaalaa gelido ubbabaa polanawu awu wolqqay deꞌees. I Ubbaa Danddayiya Xoossaa gidiyo gishshawu, hegaa oottana danddayees. (Iyy. 42:2; Mar. 10:27; Efi. 3:20) Abrahaaminne Saara cimatettaa layttan naꞌaa yelanaagaa Yihooway etawu yootiis. (Doo. 17:15-17) Qassi Yihooway Abrahaamawu, A zareti Kanaane biittaa laattanaagaa yootiis. Abrahaama zare gidida Israaꞌeelati daro layttawu Gibxxen aylle gididi deꞌido wode, Yihooway qaalaa gelidobay polettennaba milatana danddayees. SHin polettiis. Geelaꞌiyaa Mayraama Yihoowa naꞌaa yelanaagee iyyo odettiis. Hegee, daro layttaappe kase Yihooway Edene gannatiyan qaalaa gelidobay polettanaadan oottiis! (Doo. 3:15) Yihooway qaalaa gelido ubbabatanne I hegeeta waati polidaakko nuuni loytti qoppiyo wode, A gita wolqqaa akeekoos. Yaatiyo wode, Yihooway ooratta alamiyaa ehaanawu qaalaa gelidobaa mintti ammanoos.—Yaas. 23:14; Isi. 55:10, 11. w23.04 28 ¶10-12

Daawiti bana ashshanaadan woossido woosaa Yihooway zaariis. (1 Sam. 19:10, 18-20; 2 Sam. 5:17-25) Nuunikka hegaa ammanettana danddayoos. (Maz. 145:18) Yihooway nuuni qoppidoogaadan nu woosaa zaarennan aggana danddayees. PHawuloosi bana agunttaadan ‘caddi oyqqidabaa’ xayssanaadan Xoossaa oychchiis. Ha metuwaa xeelliyaagan PHawuloosi heezzutoo woossiis. Yihooway he woosaa zaaridee? PHawuloosi qoppidoogaadan gidana xayikkonne, ee zaariis. Yihooway he metuwaa xayssiyoogaappe, PHawuloosi ammanettidi awu haggaazanaadan koshshiya wolqqaa immiis. (2 Qor. 12:7-10) Nu woosaa zaaroykka nuuni qoppidoogaappe issi issitoo dummatana danddayees. Yihooway nuna maaddanawu keehi loꞌꞌo ogiyaa eriyoogaa ammanettana danddayoos. Haray atto I “nuuni woossiyoobaa woi qoppiyoobaa ubbaappe keehi darissi oottanau” danddayees. (Efi. 3:20) Hegaappe denddidaagan, I nuuni qoppibeenna wodiyan woy nu qoppibeenna ogiyan nu woosaa zaarana danddayees. w23.05 8-9 ¶4-6

Geeshsha Maxaafay yootiyo dendduwaa hidootaabaa loytti qoppiyoogee nuussi loꞌꞌo. Aybissi? Nuna wolqqaama harggee awude oyqqanaakko, woy nu siiqiyo uri qoppennan awude hayqqanaakko nuuni mule erenna gishshataassa. (Era. 9:11; Yaaq. 4:13, 14) Nuuni hegaa mala metota genccanaadan dendduwaa hidootay maaddees. (1 Tas. 4:13) Saluwan deꞌiya nu Aaway nuna loytti eriyoogaanne keehippe siiqiyoogaa Geeshsha Maxaafay yootees. (Luq. 12:7) Nu eeshshaaranne nu hassayiyoobaara zaarettidi denttanawu Xoossaa Yihooway nuna ay keena erana koshshiyaakko qoppite. Yihooway nuna keehi siiqiyo gishshawu merinaa deꞌuwaa hidootaa nuussi immiis; nuuni hayqqikkokka I nuna hayquwaappe denttana! Nuuni dendduwaa hidootan ammaniyoy aybissee? Qaalaa gelidaagaassi hegaa polanawu koshshaykka wolqqaykka deꞌiyoogaa mintti ammaniyo gishshataassa. w23.04 8-9 ¶2-4

Yooseefinne Mayraama Yihoowaara dabbotido bantta dabbotaa minttidi deꞌanawu hashetidi oottidosona. So asay issippe Yihoowawu goynniyoogee keehi koshshiyaaba gidiyoogaa eti akeekidosona. (Luq. 2:22-24; 4:16) Hegee ha wodiyan aqo oyqqidaageetussi keehi loꞌꞌo leemiso! Yooseefanne Mayraamiigaadan, inttessi naati deꞌikko shiiqota shiiqiyoogee woy so asaa goynuwawu wodiyaa demmiyoogee metiyaaba gidana danddayees. Aqo laggeti issippe xannaꞌanawu woy woossanawu wodiyaa demmiyoogeekka keehi deexxiyaaba gidana danddayees. SHin intte issippe Yihoowawu goynniyo wode akko kaseppe aaruwan shiiqanaagaanne intte loytti siiqettanaagaa hassayite. Yaatiyo gishshawu goynuwaa kaseyite. Intte aqo deꞌuwan metoy merettikko, so asaa goynuwawu issippe shiiqiyoogee ufayssennaba milatana danddayees. Yaatikko, qanttanne ufayssiyaabaa xannaꞌiyoogan doommite. Hegee intte issoy issuwaara loytti siiqettanaadaaninne issippe Yihoowawu goynnanawu koyanaadan maaddana danddayees. w23.05 22 ¶7-8

‘Obaadee wozanappe yayyidoogee A waati maaddidee? Hegee I tumanchchanne ammanettiyaagaa gidanaadan oottiis; hegaa gishshawu kawoy A kawo keettan sunttiis. (Nahimiyaa 7:2​ra gatta xeella.) Obaadee Xoossawu yayyidoogee assi tumuppe koshshiya eeshshaa, hegeekka maalaalissiya xalatettaa bessanaadan oottiis. I iita kawoy Akaabi haariyo wodiyan deꞌiis. (1 Kaw. 16:30) Qassi kawuwaa Akaaba machchiyaa, Baꞌaalawu goynniya Elzzaabeela Yihoowa keehi ixxiyo gishshawu huuphessa kawotettaappe tumu goynuwaa xayssanawu baaxetaasu. A Xoossay kiittin hananabaa yootiya darotakka worissaasu. (1 Kaw. 18:4) Elzzaabeela Xoossay kiittin hananabaa yootiyaageeta worissanawu koyido wode Obaadee etappe 100 ekkidi qumaa miziiddinne haattaa ushshiiddi ‘ishatamaa ishatamaa gonggoluwan qottiis.’ (1 Kaw. 18:13, 14) Obaadee oottidobaa Elzzaabeela eridaba gidiyaakko, akka worissanawu danddayawusu. Obaadee keehi yayyennan aggenna, qassi hayqqanawu koyenna. SHin, Obaadee baappe aaruwan Yihoowanne awu haggaaziyaageeta siiqiis. w23.06 16 ¶9-10

Yihooway beni wode oottidoogaadan ha wodiyankka ba asaa kaalettiyogaa haꞌꞌikka aggibeenna. I Geeshsha Maxaafaa baggaaranne galchchawu huuphe gidida ba Naꞌaa baggaara hegaadan oottees. Xoossay ha wodiyankka asan goꞌettiyogaa bessiya naqaashay deꞌii? Ee. Leemisuwawu, 1870​ppe simmin hanidabaa qoppa. Charles Tez Raasilinne A laggeti Xoossaa Kawotettay 1914n haariyogaa doommanaagaa akeekidosona. (Dane. 4:25, 26) Geeshsha Maxaafaa hiraagaa pilggidi eti hegaadan kuuyidosona. Eti Geeshsha Maxaafaa pilggiyo wode Yihooway eta kaalettidee? Ee, kaalettiis. Ha alamiyan 1914n hanidabati hegeetikka, Koyro Alamiya Olay, wurssiya harggee, biittaa qaattaynne koshay Xoossaa Kawotettay haariyogaa doommidoogaa bessoosona. (Luq. 21:10, 11) Yihooway suure wozanay deꞌiyo he asati ba asaa maaddanaadan goꞌettidoogee qoncce. w24.02 22 ¶11

Nuuni Yihoowa asa gidiyo gishshawu, I nuna siiqiyoogaanne nuuni loꞌꞌo deꞌo deꞌanaadan I koyiyoogaa eroos. (Roo. 8:35-39) Qassi nuuni Geeshsha Maxaafay yootiyo maarata oosuwan peeshshiyo wode ubbatoo goꞌettiyoogaa ammanettoos. (Isi. 48:17, 18) SHin qoppibeenna metoy nuna gakkiyo wode nuuni waatana koshshii? Leemisuwawu, so asaappe issoy nuna azzanttana danddayees. Yihoowa haggaazuwan nuuni koyidoogaa keenaa oottennaadan sahoy nuna diggana danddayees. Meretay gattiyo daafabaa gaasuwan nuuni keehi qohettana danddayoos. Woy nu ammanuwaa gaasuwan yedetay nuna gakkana danddayees. Hegaa mala metoti nuna gakkiyo wode hagaadan giidi qoppana danddayoos: ‘Hagee tana gakkiyoy aybissee? Taani mooridobi deꞌii? Hegee Yihooway tana anjjibeennaagaa bessiyaabee?’ Neeni hegaadan qoppa eray? Yaatikko, hidootaa qanxxoppa. Ammanettidi Yihoowawu haggaazidaageetuppe daroti hegaadan qoppidosona.—Maz. 22:1, 2; Imb. 1:2, 3. w23.04 14 ¶1-2

Nuuni iitabaa oottanaadan paacettiyo wode, Xoossaara dabbotido nu dabbotaa moorana danddayiya aybanne qoppiyoogaappe woy oottiyoogaappe naagettoos. Yihooway nuuni ‘kumetta wozanaappe azazettanaadan’ koyees. (Roo. 6:17) Nuuni oottanaadan I yootiyoobay ubbatookka nuussi loꞌꞌo, qassi A higgeta laammana danddayokko. (Isi. 48:17, 18; 1 Qor. 6:9, 10) Dabloosi nuuni minni eqqennaadan qohuwaa gatteesinne iisettees. A halchchoy nuna ‘mittiyoogaa,’ hegeekka nuuni Yihoowaara dabbotido dabbotaa mooriyoogaa. (1 PHe. 5:8) Koyro xeetu layttan deꞌida Kiristtaaneti minni eqqanawu murttido gishshawu, eqettiyaageeti eta yashissidosona, shocidosonanne woridosona. (Oos. 5:27, 28, 40; 7:54-60) Seexaanay ha wodiyankka yedetaa gattees. Eqettiyaageeti Ruusiyaaninne hara biittatun Yihoowa Markkatuyyo meqettaa iitiyoogee woy nu ishanttanne michchontta hara ogetun qohiyoogee hegaa bessees. Seexaanay yedetaa goꞌettiyoogaa bolli ‘iita cimuwaakka’ goꞌettees.—Efi. 6:11. w23.07 15-16 ¶6-9

Neeni Xoossaa Qaalaa loytta xannaꞌiyo wode Yihoowa loytta siiqana. He siiqoy neeni eriyobaa oosuwan peeshshanaadan denttettana. Geeshsha Maxaafay yootiyo maaraa goꞌettada loꞌꞌobaa kuuyaasa. Neeni Xoossaa ufayssanawu koyiyo gishshawu qoppiyoobaaninne oottiyooban laamettaasa. Issi naꞌi siiqiya ba aawaanne aayee leemisuwaa kaalliyoogaadan, neenikka saluwan deꞌiya ne Aawaa milatanawu baaxetaasa. (Efi. 5:1, 2) Nuna hagaadan oychchana danddayoos: ‘Taani Kiristtaane gidido wodiyaagaappe aaruwan haꞌꞌi Yihoowa siiqiyaanaa? Taani xammaqetta simmadakka ta ishanttussinne michchonttussi siiquwaa bessiyoogan kaseegaappe aaruwan Yihoowa milataydda deꞌiyaanaa?’ Nuuni Yihoowanne harata kaseegaadan siiqennaagaa akeekikko, hidootaa qanxxana koshshenna. Koyro xeetu layttan deꞌida Kiristtaanetuura gayttidaagan hegaa malabay haniis. Yesuusi etan hidootaa qanxxibeenna, qassi nunankka hidootaa qanxxenna. (Ajj. 2:4, 7) Nuuni tumaa koyro erido wode siiqiyoogaadan, zaaretti siiqana danddayiyoogaa I erees. w23.07 8 ¶2-3

Kiitettida Pheexiroosi daro balaa baliis. Koyruwan, Pheexiroosi kiitettida harati Yesuusa aggi bayikkokka, I aggi bayennaagaa otoruwan yootiyogan bessiyagaappe aaruwan banan ammanettiis. (Mar. 14:27-29) Hegaappe simmin, Pheexiroosi darotoo beegottidi takkana danddayibeenna. (Mar. 14:32, 37-41) Kaallidi, Yesuusa oyqqanawu deree denddidi yiido wode, Pheexiroosi A aggi bayidi baqatiis. (Mar. 14:50) Wurssettan, Pheexiroosi Yesuusa erikke giidi heezzutoo worddotiis, ubba qassi wordduwan caaqqiis. (Mar. 14:66-71) Pheexiroosi gita nagaraa oottidoogaa akeekido wode waanidee? I keehippe mishettidi yeekkiyogaa doommiis. (Mar. 14:72) Yesuusi ba laggiya Pheexiroosa A mooruwawu seeriyogaa aggidi, I gita aawatettaa ekkanaagaa awu yootiis. (Yoh. 21:15-17) Pheexiroosi gita nagaraa oottidoogaa erikkokka, suurebaa oottanawu baaxetiyogaa aggibeenna. Aybissi? A Goday, Yesuusi A siiqiyogaa aggibeennaagaa I ammanettido gishshataassa. Hegaappe ay tamaariyoo? Yihooway nuna siiqiyogaanne atto giyogaa nuuni ammanettanaadan koyees.—Roo. 8:38, 39. w24.03 18-19 ¶13-15

Bessenna inddaa gaytettay issi uri yeellatanaadan, pattenna asadan bana xeellanaadan, koyennan shahaaranaadaaninne so asay laalettanaadan oottana danddayees. Eeyya maccaasee shoobiyaa ekkennan aggiyoogee eratetta gidiyoogee qoncce. Pokkobaa oottiya daroti eti Yihoowaara dabbotido dabbotay moorettiyoogaa xalla gidennan, worana danddayiya harggiyan oyqettoosona. (Lee. 7:23) Leemiso shemppo 9 paydo 18y hagaadan giidi kuuyees: ‘I imattati duufo giddon deꞌoosona.’ Yaatin, azzanttiyaabaa kaalettiya I shoobiyaa daroti ekkiyoy aybissee? (Lee. 9:13-18) Nuuni naagettana koshshiya issibay pornograafiyaa. Amaridaageeti pornograafiyaa beꞌiyoogee qohenna giidi qoppoosona. SHin, pornograafee asa qohees, asay bananne harata bonchchennaadan oottees, qassi amale gidees. Pokkobaa bessiya misiliyaa beꞌikko, hegaa dogiyoogee keehi metees. Qassi pornograafee asay iitabaa amottiyoogaa agganaadan oottenna; ubba hegee yaa amottanaadan oottees. (Qol. 3:5; Yaaq. 1:14, 15) Ee, pornograafiyaa beꞌiya daroti pokkobaa oottoosona. w23.06 23 ¶10-11

Hara kawotettati Alamiyan Wolqqaama Gidida Inggilizenne Amarkkaa Waatta Kawotettaa issi issitoo eqettiyaaba gidikkonne xoonana danddayokkona. Ayssi giikko, Xoossaa Kawotettan leemisettida “shuchchai” Inggilizenne Amarkkaa Waatta Kawotettaa qonccissiya misiliyaa tohuwaa gaaccanaagaa nuuni eroos. (Dane. 2:34, 35, 44, 45) Birataappenne urqqaappe merettida tohuwaabaa yootiya Daaneela hiraagay tuma gidiyoogaa neeni ammanay? Yaatikko, hegee neeni deꞌiyo ogiyaa laammana koshshees. Ha iita alamee xayanaagaa neeni eriyo gishshawu, keehi daro miishshaa woy aquwaa demmanawu baaxetakka. (Luq. 12:16-21; 1 Yoh. 2:15-17) Qassi ha hiraagaa akeekiyoogee sabbakiyoonne tamaarissiyo oosoy keehi koshshiyaaba gidiyoogaa neeni akeekanaadan maaddana. (Maa. 6:33; 28:18-20) Ha hiraagaa xannaꞌa simmada nena hagaadan oychcha, ‘Taani kuuyiyoobay Xoossaa Kawotettay asaa kawotettaa ubbaa mata wode xayssanaagaa ta ammaniyoogaa bessii?’ w23.08 11 ¶13-14

Cimatettaa, sahuwaa woy harabaa gaasuwan neeni haꞌꞌi oottana koyiyoogaa keenaa oottana danddayennaagaa nena ziqqi oottada akeeka. Barzzillaayaagaadan, neeni sahuwaa woy cimatettaa gaasuwan issi aawatettaa polana danddayennaba gidikko, he aawatettaa ekkoppa. (2 Sam. 19:35, 36) Muuseegaadan haratu maaduwaa ekka, qassi koshshiyo wode haratuyyo aawatettaa imma. (Kes. 18:21, 22) Neeni nena ziqqi oottikko, daafurssana danddayiyaabaa oottanawu qoppakka. Harati iitabaa kuuyin gakkiyaabawu nuuni oyshettiyabadan qoppana bessenna. Nuuni haratuyyo kuuyana danddayokko; woy eti balabaa dooridoogaa gaasuwan gakkiyaabaappe ubbatoo eta ashshana danddayokko. Leemisuwawu, issi naꞌay woy naꞌiya Yihoowayyo haggaaziyoogaa agganawu kuuyana danddayoosona. He kuuyidobay yelidaageeti keehi azzananaadan oottana danddayees. SHin bantta naꞌi iitabaa kuuyido gishshawu banttana mooranchchadan xeelliya yelidaageeti deexo toohuwaa tookkoosona. Hegee Yihooway eti tookkanaadan koyiyo tooho gidenna. w23.08 29 ¶11-12

Samssooni nu mala nagaranchcha asa gidiyo gishshawu iitabaa kuuyido wodeti deꞌoosona. I kuuyido issibay keehi iitabaa kaalettiis. Samssooni amarida wodiyawu daanna gididi ootti simmidi, “Soreeqa giyo zanggaaran de7iya issi Daliilo giyo maccaasiyo siiqiis.” Koyro, Samssooni Pilisxxeema geelaꞌiyo ekkanawu koyiis. “Pilisxxeemata olanau GODAI gaasuwaa koyidi,” Samssooni O ekkanawu koyanaadan oottiis. Guyyeppe, Samssooni Gaaza giyo Pilisxxeematu kataman deꞌiya issi shaaramuxa maccaasee son takkiis. He wode Samssooni he katamaa geliyo penggeta shoddidi efaanaadan Xoossay awu wolqqaa immiis; hegee katamay qohettanaadan oottiis. (Daan. 14:1-4; 16:1-3) Gidoppe attin, Daliila Israaꞌeela asa gidennan aggukku, yaatiyo gishshawu I O ekkiyoogee Pilisxxeematuura olettanaadan oottenna. Daliila Samssoona aatta immanawu Pilisxxeematuppe keehi daro miishshaa ekkaasu. w23.09 5 ¶12-13

Akeekanchcha gidiyoogee nuuni ashkke gidanaadan maaddana danddayees. Akeekanchcha uri ba ammanuwaa xeelliyaagan issi asi aara palamettanawu koyiyo wode bana naagees. Darotoo asay nuna oyshaa oychchiyo wode hegaa oychchido gaasuwaa nuuyyo yootenna. Hegaa gishshawu eti oychchanaadan oottida gaasuwaa nuuni erana danddayennaagaa zaaruwaa yootanaappe kasetidi akeekiyoogee loꞌꞌo. (Lee. 16:23) Geedooni Efireema asatuyyo woygi zaaridaakko beꞌa. Israaꞌeela asaa morkketuura olettanawu biiddi kasetidi eta xeesibeennay aybissakko eti hanqqettidi A oychchidosona. SHin eti keehi hanqqettanaadan oottida gaasoy aybee? Otoruwaa gidana danddayees. Hanotay ayba gidikkonne, Geedooni akeekanchcha gidiyoogaa bessiis. I eti keehi hanqqettido gaasuwaa akeekiisinne etawu ashkketettan zaariis. ‘I hegaadan zaarin eti hanqquwaappe zarbbidoogaa’ Geeshsha Maxaafay yootees.—Daan. 8:1-3. w23.09 16 ¶8-9

Issi aawaynne naꞌay keehi siiqettiyogaadan, Yihoowaynne Yesuusi keehi siiqettoosona. Yihooway harati ba Naꞌaa naaqqidoogaa, ixxidoogaanne wayssidoogaa beꞌidi keehi seelettidoogee qoncce. Naꞌi hayqqido yelidaageeti hegee eti keehi kayyottanaadan oottiyogaa eroosona. Nuuni dendduwan mintti ammanikkonne, hegee nu siiqiyo uri hayqqiyo wode azzaniyogaa muleera agganaadan oottenna. Yihooway I siiqiyo Naꞌay 33 M.Ln keehi waayettidi hayqqiyo wode beꞌidi ay keena azzanidaakko akeekanaadan ha leemisoy nuna maaddees. (Mat. 3:17) Hassayuwa Baalay gakkanaashin buzo xinaatiyan woy so asaa goynuwan wozuwara gayttidabaa loytta pilgganawu baaxeta. Hegaa bollikka, Hassayuwa Baalaa gallassan Maallado Goynuwa dumma prograamiya beꞌiyogaa dogoppa. Nuuni Hassayuwa Baalawu nu wozanaa giigissiyo wode, haratikka hegaappe goꞌettanaadan maaddana danddayoos.—Izi. 7:10. w24.01 11 ¶10-12

Nuuni Yihooway immiyo wolqqaa demmana danddayiyo issi ogee A woossiyogaa. Yihooway ‘ubbaappe aadhdhiya wolqqaa’ nuussi immiyogan nu woosaa zaarees. (2 Qor. 4:7) Qassi A Qaalaa nabbabiyogaaninne wotti dentti qoppiyogan wolqqaa demmana danddayoos. (Maz. 86:11) Yihooway Geeshsha Maxaafaa baggaara nuussi yootiyobay wolqqaamabaa “oottees.” (Ibr. 4:12) Neeni Yihoowa woossikkonne, A Qaalaa nabbabikko genccanawu, ubbatoo ufayttanawu woy deexo aawatettaa polanawu koshshiya minotettaa demmana. Yihooway hananabaa yootiya Yoonaasi minnanaadan waati maaddidaakko beꞌa. Yoonaasi Yihooway awu immido deexo aawatettaa aggidi baqatiis. Hegaappe denddidaagan, inne markkabiyan aara deꞌiya asati wolqqaama gotee denddin hayqqichchi attidosona. Markkabiya laaggiyageeti abban A olin gita molee A mittiis. Yoonaasi keehi yashshiya moliya uluwan deꞌees. Yoonaasi moliya uluwan deꞌiiddi wolqqaa demmanawu waatidee? Yihoowa woossiis.—Yona. 2:1, 2, 7. w23.10 13 ¶4-6

Kiitettida Pheexiroosi ba dabddaabbeta koyro xeetu layttan deꞌiya Kiristtaanetuyyo xaafikkokka, Yihooway hegeeti Ba Qaalaa shaaho gidanaadan oottiis. Yaatiyo gishshawu nuuni ha wodiyan he dabddaabbetuppe goꞌettana danddayoos. (Roo. 15:4) Nuuni Geeshsha Maxaafaa hiraagan ammanenna asay kumido alamiyan deꞌoos. Nuuni wodiyaa wurssettay matidoogaa daro layttawu yootido gishshawu eqettiyaageeti nu bolli qilliiccana danddayoosona. Amarida asay hegee mule yeenna yaagees. (2 PHe. 3:3, 4) Nuuni sabbakiyo uraappe, nunaara oottiya asappe, woy nu soo asaa yaraappe hegaa mala qofaa siyiyo wode nu ammanoy shuggana danddayees. Pheexiroosi nuna maaddana danddayiyaabaa yootiis. Amaridaageetuyyo Yihooway ha iita alamiyaa xayssanawu gamꞌꞌiyaaba milatana danddayees. Pheexiroosi giidobay Yihooway wodiyaa xeelliyaagan qoppiyo ogee asaagaappe keehi dumma gidiyoogaa nuuni hassayanaadan oottiyo gishshawu, hegee nuna maaddana danddayees. (2 PHe. 3:8, 9) Yihoowa matan shaꞌu layttay issi gallassaa mala. Yihooway danddayanchcha, qassi oonikka xayana mala koyenna. Shin I keerido gallassay gakkiyo wode ha alamee xayana. w23.09 26-27 ¶2-5

Kiitettida Phawuloosi Yihudan deꞌiya Ibraawe Kiristtaanetussi dabddaabbiya xaafidoy aybissee? Naaꞌꞌu waanna gaasotun gidennan aggenna. Koyroogee, eta minttettanaassa. Etappe daroti Kiristtaane gidanaappe kase Ayhuda haymaanootiya kaalloosona. Eti Kiristtaane gidido gishshawu Ayhuda haymaanootiya kaalettiyageeti eta borennan aggokkona. Ayssi giikko, goynnanawu beeta maqidasee etawu baawa, Xoossawu yarshshiyosikka baawa, qassi etawu haggaaziya qeesetikka baawa. Hagee Kiristtoosi erissiyo ashkkarati hidootaa qanxxanaadaaninne eta ammanoy shugganaadan oottana danddayees. (Ibr. 3:12, 14) Etappe amaridaageeti Ayhuda haymaanootiyawu guyye simmanawu paacettennan aggokkona. Naaꞌꞌanttoogee, Phawuloosi Ibraawe Kiristtaaneti Xoossaa Qaalan deꞌiya ‘mino qumaa’ hegeekka, ooratta woy ciimma gidida timirtteta akeekanawu aynne baaxetiiddi deꞌennaagaa yootanaassa. (Ibr. 5:11-14) Etappe amaridaageeti haꞌꞌikka Muuse Higgiya kaallennan aggokkona. w23.10 24-25 ¶3-4

Issi issi maccaageeti aqo oyqqennan deꞌanawu dooridosona. (Mat. 19:10-12) Intte azina gelibeenna gishshawu, Yihoowaynne Yesuusi inttena pattenna asadan xeellennaagaa ammanettana danddayeeta. Kumetta saꞌan deꞌiya, azina gelibeenna michchontti galchchan deꞌiyageetussi loꞌꞌo leemiso. Eti harata siiqiyonne haratussi qoppiyo gishshawu, darotuyyo michchonne aayo mala gididosona. (Mar. 10:29, 30) Issoti issoti ubba wode haggaaziyageeta gididosona. Michchontti kumetta saꞌan sabbakiyo oosuwa loytti oottoosona. (Maz. 68:11) Ubba wode haggaazuwa doommanawu haꞌꞌi halchchana danddayeetii? Intte aqinye gidana, keexuwa oosuwa maaddana, woy Beeteelen haggaazana danddayeeta. Intte halchchuwabaa woossite. Hegaa halchchidi polidaageetuura haasayite, qassi ubba wode haggaazuwa haggaazanawu intteppe koyettiyabaa akeekite. Yaatidi intte halchchuwa polanawu maaddiyabaa oottite. Intte halchchuwa polikko Yihoowa haggaazuwan ufayssiya darobaa oottana danddayeeta. w23.12 22 ¶16-17

Gita waayee keehi matattido gishshawu, sabbakanaadan nuussi imettida azazuwa azazettiyogee awudeegaappenne aaruwan keehi koshshiyaba gidiyogaa akeekoos. Nuuni miishshaa metootiyo wode, woy sabbakuwa oosuwa harati eqettiyo wode nu deꞌuwan haggaazuwa kaseyiyogee deexxiyaba gidana danddayees. Yihooway koyiyobaa kaseyanaadan nuna aybi maaddana danddayii? “Ubbaappe Wolqqaama GODAI” Yihooway nunaara deꞌiyogaa ammanettana koshshees. Nuuni koyiyobaappe aaruwan Yihooway koyiyobaa kaseyikko, I nuna maaddana. Yaatiyo gishshawu, nu aybanne yayyokko. (Hag. 2:4) Yihooway nuuni erissiyo ashkkara oottiyo shemppo ashshiya oosuwa aggennan minni oottanaadan koyees. Haggee Xoossaa asay beeta maqidasiya keexxiyogaa zaaretti doommanaadan minttettiis. Eti hegaa oottikko, Yihooway eta ‘anjjanawu’ qaalaa geliis. (Hag. 2:18, 19) Nuunikka Yihooway nuussi immido oosuwa kaseyikko, I nu baaxiya anjjanaagaa ammanettana danddayoos. w23.11 16 ¶8; 17 ¶11

Kiitettida Phawuloosi Roomen deꞌiya Kiristtaanetuyyo xaafido dabddaabbiyan asay ubbay nagaranchcha gidiyogaa yootiis. Yaatin Xoossay nunan ufayttananne nuna xillo asa gaana danddayiyoy aybissee? Phawuloosi ashkke Kiristtaaneti ubbay ha oyshaa zaaruwa eranaadan maaddanawu, Abrahaamabaa yootiis. Yihooway Abrahaama xillo giidi xeesidoy I Kanaane biittan deꞌiyo wodiyana. Yihooway Abrahaama xillo giidi xeesidoy aybissa gidana danddayii? Abrahaami Muuse Higgiya wottiyobi baynna ogiyan azazettido gishshataassee? Chii gidenna. (Roo. 4:13) Xoossay Abrahaama xillo giidi xeesoosaappe 400​ppe dariya layttay aadhdhi simmin he higgiya Israaꞌeelatuyyo immiis. Yaatin Xoossay Abrahaama xillo giidoy aybissee? Yihooway Abrahaamawu aaro kehatettaa bessiis, qassi A ammanuwappe denddidaagan A xillo giidi xeegiis.—Roo. 4:2-4. w23.12 3 ¶4-5

Qommoora odettidaagaadan giidi hananabaa yootiya Naataani Kawuwa Daawitawu odido qammi, Beeta Maqidasiya keexxanay Daawita gidennaagaa Yihooway Naataanawu yootiis. (1 Odi. 17:3, 4, 11, 12) Hegaa siyido wode Daawiti waanidee? I ba naꞌay Solomoni keexxanawu koshshiya miishshatanne harabata immanawu qoppiis. (1 Odi. 29:1-5) Beeta maqidasiyaa keexxanay Daawita gidennaagaa Yihooway ayyo yooti simmidi, sohuwaara aara maachchaa maacettiis. Yihooway Daawita zerettaappe issoy merinawu kawotanaagaa qaalaa geliis. (2 Sam. 7:16) Ooratta alamiyan, SHaꞌu Layttaa Haaruwan Kawoy Yesuusi A zerettaappe issuwaa gidiyoogaa Daawiti eriyo wode keehi ufayttana. Nuuni Yihoowawu haggaazanawu qoppido ubbabaa oottana danddayennaba gidikkonne, nuuni mule qoppibeenna hara loꞌꞌobata Xoossay nuussi immana danddayiyoogaa akeekanaadan ha taarikee nuna maaddees. w23.04 16 ¶8-10

Neeni hirggiyo wode, Geeshsha Maxaafan deꞌiya amarida maxaafata nabbabiyogee nena minttettana danddayees. Leemisuwawu, Iyyooba, Mazamurenne Leemiso maxaafaappe, qassi Maatiyosa shemppo 6n Yesuusi yootidobaappe minttettuwa demmana danddayaasa. Neeni Yihoowa woossiyo wodenne A Qaalaa nabbabiyo wode appe minttettuwa demmaasa. Azzanttiyabay nuna gakkiyo wode Yihooway nuna ubbatoo maaddanaagaa ammanettana danddayoos. Nuuni mule nurkka deꞌokko. (Maz. 23:4) Yihooway nuna naaganawu, minttanawu, maaddanawunne minttettanawu qaalaa geliis. Isiyaasa 26:3y Yihoowabaa hagaadan gees: “Ba qofaa nenan wottida asa neeni polo sarotettan naagaasa; aissi giikko, i nenan ammanettees.” Simi yaakko, Yihoowan ammanetta; qassi A maado ubban goꞌettanawu neessi danddayettida ubbabaa ootta. Yaatikko, meto wodiyankka I nena minttana. w24.01 25 ¶16-17

Xoossaa ayyaanay deꞌiyo he xiqisee ha wodiyan polettiiddi deꞌees. Kaallidi deꞌiya minttettiya qofaykka ha wodiyan polettiiddi deꞌees: “Ne attuma naata ubbaa GODAI tamaarissana; ne naatu sarotettaikka darana. Neeni xillotettan minnada eqqana. . . . Neeni aibaassikka yayyakka; dagamaikka neekko shiiqenna.” (Isi. 54:13, 14) ‘Ha alamiya xoossay’ Seexaanaykka Yihoowa asay harata Yihoowabaa tamaarissiyo oosuwa diggana danddayenna. (2 Qor. 4:4) Geeshsha goynoy zaarettidi eqqiis; qassi Yihoowa asay I koyiyogaadan awu goynniyogaa zaarettidi aggenna. Geeshsha goynoy merinawu deꞌana. Nuna qohanawu oottido ay miishshinne nuna qohidi kantti kiyenna! w24.02 4 ¶10

Nuuni Kiristtaane gidiyo gishshawu Yihoowawu gelido qaalaa xoqqu ootti xeelloos. Hegee so asaa xeelliyagan nuuni kuuyiyobaaranne oottiyobaara gayttees. Nu soo asawu koshshiyabaa kunttanawu nuuni minni oottikkokka, Yihooway nuuppe koyiyobaappe nu soo asay koyiyobaa mule kaseyokko. (Mat. 10:35, 36; 1 Xim. 5:8) Issi issitoo, nu dabbota gidennan Yihoowa ufayssiyabaa kuuyiyogee koshshana danddayees. Yihooway so asaa deꞌuwa doomissiis; qassi I so asay ufayttanaadan koyees. (Efi. 3:14, 15) Nu tumuppe ufayttanawu koyikko, Yihooway nuuppe koyiyobaa nuuni oottana koshshees. Neeni so asawu koshshiyabaa kunttaydda, qassi eta siiqayddanne bonchchaydda Yihoowawu haggaazanawu oottiyobaa I nashshiyogaa ammanetta.—Roo. 12:10. w24.02 18 ¶11, 13