Hosppune

Yihoowa ashkkarata beni wode eti qoppibeenna metoy gakkiis. Ane Yaaqooba hanotaa beꞌa. I Xoossawu goynniya, Laabaana macca naatuppe issinniyo ekkanaadan A aaway A azaziis, qassi Yihooway A anjjanaagaakka yootiis. (Doo. 28:1-4) Hegaa gishshawu Yaaqoobi likke gididabaa oottiis. I Kanaaneppe kiyidi, Liyonne Raaheelo giyo naaꞌꞌu macca naati deꞌiyo Laabaana soo biis. Yaaqoobi Laabaana kaalo naꞌiyo Raaheelo siiqido gishshawu, O ekkanawu I aawaayyo laappun layttaa oottanawu eeno giis. (Doo. 29:18) SHin hanotay Yaaqoobi qoppidoogaadan hanibeenna. Laabaani ba bayra naꞌiyo Liyo immiyoogan A cimmiis. Issi saaminttappe guyyiyan Yaaqoobi Raaheelo ekkanaadan Laabaani eeno giikkonne, I hara laappun layttawu oottana koshshiis. (Doo. 29:26, 27) Oosuwaara gayttidaagankka Laabaani Yaaqooba naaqqiis. Laabaani 20 layttawu Yaaqooba naaqqiis!—Doo. 31:41, 42. w23.04 15 ¶5

Nuussi koshshiya minttettuwaanne kaaletuwaa oona oychchana danddayiyoo? Ha oyshaa zaaruwaa eroos. Nuuni Xoossaa Yihoowa oychchana danddayoos. Nuuni yaatanaadan Yihooway shoobbees. Nuuni ‘ubba wode Xoossaa woossanaadan’ Geeshsha Maxaafay yootiyo gishshawu darotoo woossanaadan I koyiyoogaa eroos. (1 Tas. 5:17) Nuuni laꞌatettan Yihoowa woossananne nu deꞌo macara ubban kaaletuwaa demmanawu A oychchana danddayoos. (Lee. 3:5, 6) Yihooway keha gidiyo gishshawu nuuni koyidoogaa keenaa darotoo A woossana danddayiyoogaa yootees. Yihooway woosaa nashshiyoogaa Yesuusi akeekiis. Yesuusi ha saꞌaa yaanaappe daro wodiyaappe kase, ammanettida asati woossido woosaa ba Aaway zaarishin beꞌiis. Leemisuwawu, Haanna, Daawiti, Eelaasinne ammanettida hara daroti wozanappe woossido woosaa ba Aaway zaarido wode Yesuusi A matan deꞌees. (1 Sam. 1:10, 11, 20; 1 Kaw. 19:4-6; Maz. 32:5) Yesuusi ba erissiyo ashkkarati ammanettidi darotoo woossanaadan tamaarissidoy hegaassa!—Maa. 7:7-11. w23.05 2 ¶1, 3

Qeese Ubbatu Halaqaa Yoodaahee Yihoowa yayyiis. Elzzaabeeli naꞌiyaa Ataala wolqqan Yihudan kawotido wode hegee qoncciis. A meqetta iita gidiyo gishshawunne kawiyo gidanawu keehi amottido gishshawu, kawotanaayyo ba naatu naata ubbaa worissanawu malaasu! (2 Odi. 22:10, 11) Yoodaahe machchiyaa Yihoshebaaꞌa qottido gishshawu he naatuppe Yoꞌaashi attiis. Yihoshebaaꞌanne I keettaaway he naꞌaa qottidi awu koshshiyaabaa kunttidosona. Yaatiyoogan Yoodaaheenne Yihoshebaaꞌa Daawita zerettaappe kawo gidana danddayiya issi uri xayennaadan oottidosona. Yoodaahee Yihoowawu ammanettido gishshawu, suurebaa oottiyoogaa Ataaliyyo yayyidi aggibeenna. Yoꞌaashawu layttay laappuna gidido wode, Yoodaahee Yihoowawu ammanettiyoogaa zaarettidikka bessiis. I issibaa halchchiis. He halchchoy polettikko, Daawita zare gidida Yoꞌaashi kawotana. SHin, he halchchoy polettennan aggikko, Yoodaahee ba shemppuwaa xayana danddayees. Yihooway maaddin, he halchchoy polettiis. w23.06 17 ¶12-13

Kawuwa Naabukadanaxoori Daaneela morkkedan qoppidi worissana danddayees. SHin, A gakkanabay ayba gidikkonne I he aymuwaa xalatettan birshshiis. Daaneeli ba deꞌo laytta ubban xala gidanaadan maaddidabay ayba gidana danddayii? Daaneeli naatettan deꞌiyo wode ba aayeeppenne aawaappe tamaaridoogee qoncce. (Zaa. 6:6-9) Daaneeli Tammu Azazotu xalla gidennan, hara daro Higgeta erees. Leemisuwawu, Israaꞌeelati maana danddayiyoobaanne maana danddayennabaa I erees. (Wog. 11:4-8; Dane. 1:8, 11-13) Daaneeli Xoossaa asaa taarikiyaanne eti Yihoowawu azazettennan aggido wode, eta bolli gakkidabaakka erees. (Dane. 9:10, 11) Daaneeli ba deꞌuwan beꞌidobati A aybi gakkikkokka Yihoowaynne wolqqaama kiitanchchati A maaddanaagaa I ammanettanaadan oottidosona.—Dane. 2:19-24; 10:12, 18, 19. w23.08 3 ¶5-6

Ribiqa ba deꞌo laytta ubban issibaa xalatettan kuuyiya, awude oottanaakko, qassi waata oottanaakko eriya akeekanchcha maccaasa. (Doo. 24:58; 27:5-17) Qassi A bonchchettida maccaasanne kaaletuwa kaalliya asa. (Doo. 24:17, 18, 65) Ribiqiigaadan inttena ziqqi oottikko, qassi kaalettanaadan Yihooway aawatettaa immidoogeetuura hashetikko, intte sooninne intte galchchan deꞌiya ubbawu loꞌꞌo leemiso gideeta. Ashkketettay ubba Kiristtaanetussi koshshiya eeshsha. Asttira ashkkenne Xoossawu yayyiya maccaasa. A ashkke gidiyo gishshawu, kawiyo gidiyo wode otorettabeykku. I aawa ishaa naꞌay Marddikiyosi zorido zoriya A siyada oosuwan peeshshaasu. (Ast. 2:10, 20, 22) Loꞌꞌo zoriya oychchiyogaaninne hegaa oosuwan peeshshiyogan iigaadan ashkke gidana danddayeeta. (Tii. 2:3-5) Asttira ashkke gidiyogaa hara ogiyankka bessaasu. A “merankka qottankka keehi puulanchcha” gidikkonne, harati ibaa xallaa qoppanaadan oottabeykku.—Ast. 2:7, 15. w23.12 19-20 ¶6-8

Ubbatoo nuna mooranchchadan xeelliyoogaa Yihooway koyenna. Nuuni nu nagaraa paaxikko, nu nagaraappe simmikko, qassi hegaa zaarettidi oottennan agganawu baaxetikko, Yihooway nuuyyo atto giyoogaa ammanettana danddayoos. (Oos. 3:19) Nuuni hegeeta ootti simmidi nuna ubbatoo mooranchchadan xeellanaadan Yihooway koyenna. Ubbatoo nuna mooranchchadan xeelliyoogee nuna keehi qohiyoogaa I erees. (Maz. 31:10) Nuuni keehi unꞌꞌettikko, nu deꞌuwaa wottan hidootaa qanxxana danddayoos. (2 Qor. 2:7) Nena ubbatoo mooranchchadan xeellikko Xoossay tumuppe ‘atto giyoogaa’ qoppa. (Maz. 130:4) Nagaraappe tumuppe simmiyaageetuyyo I atto giyo wode, “Taani . . . eta nagaraakka naa77antto hassayikke” yaagidi qaalaa geliis. (Erm. 31:34) Hegee Yihooway neeyyo atto giido nagaraa zaarettidi mule qoppennaagaa bessiyaaba. Gubaaꞌiyan deꞌiya issi issi aawatettay neeppe halido gishshawu yiillotoppa. Yihooway ubbatoo ne nagaraa qoppenna, qassi neenikka qoppana koshshenna. w23.08 30-31 ¶14-15

Koronaa harggiyaa wode Yihoowa dirijjitee immiyo kaaletuwaa siyida Yihoowa Markkati, worddo oduwaa siyidaageetuugaadan unꞌꞌettiyoogaappe naagettidosona. (Maa. 24:45) Nuuni ‘loꞌꞌobaa’ woy keehi koshshiyaabaa ubbatoo qoppana koshshees. (Pili. 1:9, 10) Nu qofay shaahettiyo wode nu wodiyaanne nu wolqqaa coo wurssoos. Miyoogaa, uyiyoogaa, allaxxiyoogaanne oosuwaa oottiyoogaa mala ubbatoo oottiyoobata nu deꞌuwan keehi koshshiyaabadan xeellikko nu qofay shaahettana danddayees. (Luq. 21:34, 35) Hegaa bollikka, nuuni ubba galla deretettaaranne polotikaara gayttida allaalliyaa siyoosinne nabbaboos. He allaalletun nu qofay shaahettennaadan naagettana koshshees. Naagettana xayikko, nu qofaaninne nu wozanan issi baggawu exatana danddayoos. Nuuni suurebaa oottanaayyo murttido murttiyaa agganaadan oottanawu Seexaanay dumma dumma hiillata goꞌettees. w23.07 16-17 ¶12-13

Yihoowa asawu Kiristtoosa hayquwa Hassayiyo Baalaa gallassay layttaa giddon keehi dumma gallassa. Yesuusi bana kaalliyageeti bonchchanaadan azazido baalay hagaa xaalaala. (Luq. 22:19, 20) Hegee nuuni Yesuusa yarshshuwa nashshiyogaa bessana danddayiyo ogiya nuna hassayissees. (2 Qor. 5:14, 15) Hegee ishanttinne michchontti issoy issuwa ‘minttettanaadan’ oottees. (Roo. 1:12) Qassi shoobetti yiida daroti beꞌidobaaninne siyidoban maalaalettidi Geeshsha Maxaafaa xannaꞌanawu koyidosona. Hassayuwa Baalay kumetta saꞌan deꞌiya ishanttu maabaray issuwa gidanaadan oottiyogaakka qoppa. Ha ubbabay Hassayuwa Baalay nuussi dumma gidanaadan oottees. w24.01 8 ¶1-3

Yihoowaynne Yesuusi nuuyyo qanxxidobaa loytti qoppiyo wode, eti nuna ubbaa ay keena siiqiyakko loytti akeekana danddayoos. (Gal. 2:20) Wozoy Yihooway siiquwan oottidoba. Yihooway ba alꞌꞌo Naꞌaa, Yesuusa wozo ootti immiyogan nuna siiqiyogaa bessiis. Yihooway ba Naꞌay nu gishshawu waayettanaadaaninne hayqqanaadan paqqadiis. Yihooway nuna siiqiyogaa yootiyogankka qonccissees. (Erm. 31:3) Yihooway nuna siiqidi baakko shiishshiis. (Zaarettido Wogaa 7:7, 8​ra gatta xeella.) He siiquwappe nuna ooninne woy aybinne shaakkana danddayenna. (Roo. 8:38, 39) Ha siiqoy neeni waananaadan oottii? w24.01 28 ¶10-11

Tiyettida Kiristtaaneti bantta saluwa hidootaa nashshoosona. Etappe issuwa gidida, Ishaa Frederik Franzzi, he hidootaabaa hagaadan giis: “Nu hidootay polettanaagee ammanttiyaba, qassi nuuni 144,000ti Xoossay nuussi qaalaa gelidobaa demmana. Nuuni demmana woytoy nuussi deꞌiya aybippekka keehi aadhdhees.” Ishaa Franzzi 1991 hagaadan giis: “[Nuuni] haꞌꞌikka nu hidootaa keehi nashshoos. . . . Nuuni hidootaa daro wodiyawu naagido paydo ubban keehi nashshoos. . . .nuuni hegaa naagiyogee bessiyaba. Awudeegaappenne aaruwan nu hidootaa keehi nashshays.” Nuuni merinawu deꞌanawu hidootiyoy saluwan woy saꞌan gidin, nu ufayttanaadan oottiya malaalissiya hidootay nuuyyo deꞌees. Qassi, nu hidootay polettanaagaa loytti ammanettana danddayoos. w23.12 9 ¶6; 10 ¶8

Beni Xoossaa dunkkaaniya geliyo penggiyappe kareera Yihoowawu mehiya yarshshota yarshshiyo, naasiya birataappe oosettida yarshshiyo sohoy deꞌees. (Kes. 27:1, 2; 40:29) Gidoppe attin, he yarshshoti asaa nagaraa muleera atto giissana danddayibookkona. (Ibr. 10:1-3) Xoossaa dunkkaaniyan ubbatoo mehiya yarshshiyogee asaa nagaraa muleera atto giissana yarshshoy deꞌiyogaa bessees. Yesuusi ba deꞌuwa wozo yarshsho oottidi asawu immanaadan Yihooway A saꞌaa kiittidoogaa I erees. (Maa. 20:28) Hegaa gishshawu, Yesuusi xammaqettido wode Yihooway koyiyobaa oottanawu murttidoogaa bessiis. (Yoh. 6:38; Gal. 1:4) Kiristtoosa ammaniya ubba asaa nagaray atto geetettanaadan woy muleera kamettanaadan “naa77anttennan issitoo” Yesuusi ba deꞌuwa yarshshiis.—Ibr. 10:5-7, 10. w23.10 26-27 ¶10-11

Nuuni nuna nagaraappenne hayquwappe laꞌa kessana danddayokko. (Maz. 49:7, 8) Hegaa gishshawu Yihooway nuna ashshanawu Yesuusi ba deꞌuwa immanaadan oottiis. Yihoowaynne Yesuusi gita waagaa qanxxidosona. Yihoowaynne Yesuusi nuussi oottidobaa nuuni loytti qoppiyo wode, wozuwa loytti nashshana. Addaame nagaraa oottido wode A xalaalaappe gidennan, A naatuppekka merinaa deꞌuwa hidootay haliis. Addaameppe halidabaa zaaranawu Yesuusi wottiyobi baynna ba deꞌuwa aatti immiis. Yesuusi saꞌan deꞌiyo wode “nagara . . . oottibeenna; ba doonankka worddo haasayibeenna.” (1 PHe. 2:22) Yesuusi hayqqido wode wottiyobi baynna A deꞌoy Addaameppe halida deꞌuwawu bixe.—1 Qor. 15:45; 1 Xim. 2:6. w24.01 10 ¶5-6

Yesuusi hayquwappe denddi simmidi ayyaana beeta maqidasiyan Ubbaappe Aadhdhiya Geeshsha Sohuwa geliis. Yihooway Yesuusa wozuwa yarshshuwa baggaaranne Kiristtoosi qeese ubbatu halaqa gididi oottiyoban goꞌettidi tumu goynuwawu giigissidobay keehi aadhdhiyogaa hagaappe akeekana danddayoos. Israaꞌeelan qeese ubbatu halaqay mehiya suuttaa ekkidi asi giigissido, Ubbaappe Aadhdhiya Geeshsha Sohuwa gelees; shin Yesuusi Yihoowa sinttan beettanawu ubbaappe aadhdhiya geeshsha sohuwa, “saluwaa” geliis. I “nagaraa xaissanau bana” nu gishshawu yarshshidi, wottiyobi baynna ba deꞌuwa waagaa yan shiishshiis. (Ibr. 9:24-26) Nu hidootay saluwan gidin woy saꞌan nuuni ubbay ayyaana beeta maqidasiyan Yihoowawu goynnana danddayoos. w23.10 28 ¶13-14

Nu Kawoynne qarettiya Qeese Ubbatu Halaqay Yesuusi saluwan uttidi nuussi oottiiddi deꞌiyobaakka qoppa. Nuuni A baggaara “aaro kehatettai de7iyoosaa Xoossaa araataakko” woosan shiiqidi “koshshiyo wode” maarotaanne maaduwa demmanawu oychchana danddayoos. (Ibr. 4:14, 15) Yihoowaynne Yesuusi nuussi oottidobaanne oottiiddi deꞌiyobaa ubba galla loytti qoppana koshshees. Eti nuna siiqiyo siiqoy nuuni Yihoowawu minnidi haggaazanaadan denttettana koshshees. (2 Qor. 5:14, 15) Harati Yihoowa Markkanne Yesuusi erissiyo ashkkara gidanaadan maaddanawu baaxetiyogee nuuni galatiyo ogetuppe issuwa. (Maa. 28:19, 20) Kiitettida Phawuloosi hegaadan oottiis. Yihoowa shenee “asai ubbai attanaadaaninne tumatettaa eranaadan” gidiyogaa I akeekiis.—1 Xim. 2:3, 4. w23.10 22-23 ¶13-14

Nuuppe daroti sabbakiyo wode asaa minttettanawunne Gannatiyan deꞌoy ay mala gidanaakko etassi yootanawu ha xiqisiya nabbaboos. Yaatin, Ajjuutaa 21:3, 4n odettida anjjoti polettanaagaa ammanettanaadan harata waati maaddana danddayiyoo? Qassi nuuni Yihoowaninne I qaalaa gelidobatun waani mintti ammanettana danddayiyoo? Yihooway I hegaa polanaagaa nuuni aynne sirennaadan ammanttiya gaasota yootiis. Hegaappe kaalliya paydotun odettida, Yihooway Gannatiya ehaanawu gelido qaalan nuuni ammanettanaadan oottiya gaasuwa akeekana danddayoos. Hagaadan gees: “Araatan uttidaagee, ‘Taani ubbabaa ooraxissais’ yaagiis. Qassikka zaarettidi tana, ‘Taani haasayiyoogee ammanettiyaagaanne tuma gidiyo gishshau xaafa’ yaagiis. Qassikka tana hagaadan yaagiis; ‘Polettiis. Taani Alifaanne omeegaa; doomettaanne poluwaa.’”—Ajj. 21:5, 6a. w23.11 3 ¶3-5

Maayiyobaanne puulattiyobaa akeekan dooriyogee issi yelaga ishay adussi qoppiyogaa bessiyo hara oge. Ooratta maayuwa giigissiyageetuppenne erissiyageetuppe daroti Yihoowa bonchchokkona. Qassi eti shori baynna deꞌuwa deꞌennan aggokkona. Yaatiyo gishshawu, eti giigissiyo maayoti bollaa baqqi oyqqiyageeta, woy attuma asaa maccaasaa milatissiyageeta gidana danddayoosona. Kayma gidanawu dicciiddi deꞌiya yelaga ishay maayiyobaa dooriyo wode, galchchan deꞌiya loꞌꞌo leemiso gidiyageeta kaallees. I hagaadan oychchana danddayees: ‘Ta dooriyobati taani suurebaa qoppiyogaanne harata bonchchiyogaa bessiyonaa? Ta maayiyobay taani Xoossaa ashkkara gidiyogaa harati metootennan akeekanaadan oottii?’ (1 Qor. 10:31-33) Adussi qoppiya yelagaa galchchan deꞌiyageetu xalla gidennan, saluwan deꞌiya A Aawaykka bonchchees. w23.12 26 ¶7

Beni wode, ‘tohossa kawoy’ Yihoowa asaa bolli yedetaa gattiis. (Dane. 11:40) Leemisuwawu, Koyronne Naaꞌꞌantto Alamiya Olaa wode, daro ishantti polotikaaban oossinne exatenna gishshawu qashettidosona, qassi Yihoowa Markka gidida amarida naata timirtte keettaappe yedettidosona. Mata layttatun, tohossa kawuwaa haaruwan deꞌiya Yihoowa asay ammanettiyoogaara gayttidaagan hara ogetun paacettiis. Leemisuwawu, dooruwawu asaa denttettiyo zamachchaa wode issi Kiristtaanee issi polotikaa dirijjitiyaa woy doorettiya uraa haraappe aatti xeellidi kaafanawu paacettana danddayees. I doorana xayikkonne ba qofaaninne ba wozanan issi baggawu exatana danddayees. SHin nuuni oossinne mule exatennan agganawu, nu oottiyoobaaninne qoppiyoobankka naagettana koshshees.—Yoh. 15:18, 19. w23.08 12 ¶17

Nuuni deꞌuwaa wottaa woxxiyo wode ‘woytuwaa ekkanawu woxxana’ bessees. (1 Qor. 9:24) ‘Muussay, ushshaynne aqossi hiriggiyoobay’ nuussi tooho gidana danddayiyoogaa Yesuusi yootiis. (Luq. 21:34) Hageenne hara xiqiseti neeni deꞌuwaa wottaa woxxiyo wode giigissana koshshiyaabaa akeekanaadan nena maaddana danddayoosona. Yihooway nuussi koshshiya wolqqaa immiyo gishshawu, nuuni deꞌuwaa wottan woytuwaa ekkanaagaa ammanettana danddayoos. (Isi. 40:29-31) Hegaa gishshawu, loytta woxxiyoogaa aggoppa. Sinttappe ekkana woytuwaa demmanawu minni woxxida, kiitettida PHawuloosa leemisuwaa kaalla. (Pili. 3:13, 14) Ne gishshaa ooninne woxxana danddayennaba gidikkonne, Yihooway maaddin neeni wottaa wurssana danddayaasa. Yihooway neeni ne toohuwaa tookkanaadaaninne koshshenna toohuwaa wottanaadan maaddana danddayees. Yihooway nena maaddin, neeni gencca woxxada woytuwaa ekkana danddayaasa! w23.08 31 ¶16-17

Yesuusawu layttay 12 gidido wode, A yelidaageeti soo simmiyo wode I Yerusalaamen attiis. (Luq. 2:46-52) Baalaappe simmin Yooseefinne Mayraama bantta naati ubbay banttanaara deꞌiyakkonne shaakki erana koshshiis. Yooseefinne Mayraama Yesuusa koyidi demmido wode I Yerusalaamen attido gishshawu Mayraama A hanqqettaasu! Yesuusi hegee bessennaba giidi yootana danddayees. Shin I bonchchiyogaa bessiya ogiyan bana yelidaageetuyyo zaariis. Shin Yooseefinne Mayraama, “i giidobaa . . . akeekibookkona.” Gidikkonne, Yesuusi “etassi azazettees.” Yelagatoo, inttena yelidaageeti baliyo woy intte qofaa bala ogiyan akeekiyo wode etawu azazettanawu metooti ereetii? Yaatikko, inttena aybi maaddana danddayii? Azazettiyogaa Yihooway waati xeelliyakko qoppite. Intte inttena yelidaageetussi ‘azazettiyogee Xoossaa daro ufayssiyogaa’ Geeshsha Maxaafay yootees. (Qol. 3:20) Inttena yelidaageeti issi issitoo intte hanotaa akeekennan aggiyogaa woy azazettanawu metana danddayiya higgeta kessiyogaa Yihooway erees. Shin hanotay ayba gidikkonne, intte etawu azazettiyo wode Yihooway ufayttees. w23.10 7 ¶5-6

Nenaara tamaariya issi uri Yihoowa Markkati attumay attumaara maccay maccaara mattumaa gayttiyoogaa xeelliyaagan qoppiyoobaa laammana koshshees giidi palamettana danddayees. Nuuni issi uri ba koyidobaa dooriyo maataa bonchchiyoogaa awu yootana koshshees. (1 PHe. 2:17) Nuuni Geeshsha Maxaafay yootiyoobaanne hegaa kaalliyoogee ufayssiya deꞌuwaa deꞌanaadan waati maaddidaakko yootana danddayoos. Issi uri nunaara palamettikko nuuni I ammaniyoobaa erida giidi eesuwan qoppana koshshenna. Leemisuwawu, nenaara tamaariya uri Xoossan ammaniyoogee eeyyatetta giidi yootiyaakko shin? I lodda laamiyaa loytti ammaneesinne hegaabaa loytti erees gaada qoppana koshshii? I hegaabaa loytti erennan aggana danddayees. Geella meretaabaa yootiya jw.org saytiyan deꞌiyaabata bessana danddayaasa. I guyyeppe, hegan deꞌiya xuufiyan woy biiduwan tobbanawu eeno gaana danddayees. Nuuni A bonchchuwan haasayissiyoogee Geeshsha Maxaafay yootiyoobaa kaseegaappe aaruwan tamaaranawu koyana mala oottana danddayees. w23.09 17 ¶12-13

Nuuni moorobaa oottikkokka, hegaa giigissanawu nuussi danddayettida ubbabaa oottikko, Yihoowan ubbatoo ammanettiyo wode I nunakka goꞌettanaagaanne anjjanaagaa ammanettana danddayoos. (Lee. 28:13) Samssooni nagaranchcha asa; shin Daliiliira gayttidaagan balabaa ootti simmidikka Yihoowawu haggaaziyoogaa aggibeenna. Qassi Yihooway Samssoona goꞌettiyoogaa aggibeenna. Xoossay maalaalissiya ogiyan Samssoona zaarettidi goꞌettiis. Yihooway ammanuwan mino gidida asadan Samssoona xeelliis, qassi Ibraawe shemppo 11n odettida ammanettida asatuura A sunttay xaafettanaadan oottiis. Nuuni daafuriyo wode nuna minttanawu keehi koyiya saluwan deꞌiya siiqo Aawawu nuuni haggaaziyoogaa eriyoogee keehi minttettiyaaba! Yaakko Samssoonaagaadan Yihoowa hagaadan woossoos: ‘Hay tana hassayarkkii! Hay tana minttarkkii!’—Daan. 16:28. w23.09 7 ¶18-19

Yihoowa gallassay keehi matidoogaa nuuni eriyo gishshawu, haratuyyo mishiraachchuwaa yootanawu nuussi danddayettida ubbabaa oottanawu koyoos. Shin issi issitoo markkattanawu yayyana danddayoos. Aybissi? Asay nubaa ay qoppanee woy nu bolli ay oottanee giidi nuuni yayyiyo gishshataassa. Pheexroosikka yayyiis. Yesuusi shilootan eqqido qammi, Pheexiroosi Yesuusi erissiyo ashkkaratuppe issuwaa gidiyoogaa yootanawu yayyiisinne A eriyoogaakka zaari zaari kaddiis. (Maa. 26:69-75) Gidoppe attin, Pheexiroosi asa yayyiyoogaa aggidi, guyyeppe xalatettan hagaadan giis: “Asau yayyoppitenne hirggoppite.” (1 Phe. 3:14) Pheexiroosi giidobay nuuni asa yayyiyoogaa aggana danddayiyoogaa ammanettanaadan oottees. Asa yayyiyoogaa agganaadan nuna aybi maaddana danddayii? Pheexiroosi hagaadan giis: “Kiristtoosa intte wozanan bonchchitenne a intte Goda oottite.” (1 Phe. 3:15) Yesuus Kiristtoosi nu Kawuwaa gidiyoogaanne awu gita wolqqay deꞌiyoogaa nuuni ubbatoo hassayana danddayoos. w23.09 27-28 ¶6-8

Nuuni “xuma oosuwaa” oottennaadan ubbatoo keehi naagettana koshshees. (Efi. 5:11) Issi uri tunabaa woy pokkobaa beꞌiyaba, siyiyaba woy haasayiyaba gidikko, balabaa oottanawu metootennaagee qoncce. (Doo. 3:6; Yaaq. 1:14, 15) Seexaanaa alamee Yihooway pokkobaanne tunabaa giidobaa nuuni oottiyogee mule bala gidenna giidi nuna ammanttanawunne cimmanawu malees. (2 PHe. 2:19) Dabloosi asay likkebaanne likke gidennabaa akeekenna mala eta jallissanawu ubbatoo baaxetees. (Isi. 5:20; 2 Qor. 4:4) Daro pilimeti, televizhiine prograametinne websayteti, Yihooway kessido xillotettaa maaratuura maayettennabaa aassiyogee qoncce! Seexaanay ha wodiyan alamiyan keehi meeze gidida tunabaynne pokkobay aynne qohennaba giidi nuuni qoppanaadan koyees.—Efi. 5:6. w24.03 22 ¶8-10

Xoossaa dunkkaanee Israaꞌeelati issisaappe harasaa biiddi efiyo, guutta dunkkaane mala. Yerusalaamen beeta maqidasee keexettana gakkanaashin, 500 gidiya layttawu eti hegaa goꞌettidosona. (Kes. 25:8, 9; Qoo. 9:22) He dunkkaanee Israaꞌeelati yarshshuwa shiishshanawu goꞌettiyo waanna soho. (Kes. 29:43-46) Gidikkonne, he dunkkaanee yaana keehi loꞌꞌobawukka leemiso. I ‘saluwan deꞌiyabawu eesho,’ qassi hegee gita gidida Yihoowa ayyaana beeta maqidasiyawu leemiso. Kiitettida Phawuloosi hagaadan giis: “He Dunkkaanee ha wodiyau leemiso.” (Ibr. 9:9) Yaatiyo gishshawu, I Ibraawe Kiristtaanetussi hegaabaa xaafiyo wode ayyaana beeta maqidasee deꞌees. Hegee 29 M.Ln eqqiis. He laytti Yesuusi xammaqettiis, qassi beeta maqidasiyan ‘qeese ubbatu gita halaqa’ gididi Yihoowawu haggaaziyogaa doommiis.—Ibr. 4:14; Oos. 10:37, 38. w23.10 25-26 ¶6-7

Yihoowawu ufayssan haggaazennaadan oottiya metoy nuna gakkiyo wode, nuunikka hanotaadan hanana koshshees. Waatidi? Nu hanotay laamettiyo wode hegaa meezetiyoogan, haratu qofaanne eti kuuyidobaa bonchchiyoogan nuuni hanotaadan hanana bessees. Nuuni Yihoowa ashkkarata gidiyo gishshawu hanotaadan haniyaageeta gidanawu koyoos. Nuuni ashkkenne keha gidanawukka koyoos. Yihooway qaaxxennan minni eqqiyo gishshawu ‘zaallaa’ geetettiis. (Zaa. 32:4) Gidikkonne, I hanotaadan hanees. Ha alamiyaa hanotay laamettiyo wode Yihooway hanotaadan haneesinne ba gelido qaala ubbay polettanaadan oottees. Yihooway nuna ba leemisuwan medhdhido gishshawu, nuunikka nu hanotay laamettiyo wode hegaa meezetana danddayoos. Nuna gakkana danddayiya metoy ayba gidikkokka, nuuni loꞌꞌobaa kuuyanaadan maaddiya maarata Geeshsha Maxaafay yootees. Yihooway oottidobaynne I nuussi immido maarati Yihooway ‘zaalla’ gidikkokka hanotaadan haniyoogaa nu eranaadan maaddoosona. w23.07 20 ¶1-3

Yihooway siiqiya aayen bana leemisidoogaa Geeshsha Maxaafay yootees. (Isi. 66:12, 13) Ba guutta naꞌaa keehi siiqiya, qassi ayyo koshshiyabaa kunttiya issi aayyiyo qoppa. Nuuni azzaniyo wode Yihooway nuna siiqiyogaa ammanettana danddayoos. Nuuni balabaa oottiyo wode I nuna siiqiyogaa aggenna. (Maz. 103:8) Israaꞌeelati Yihoowa zaari zaari azzanttidosona. Gidikkonne, bantta nagaran zilꞌꞌettidi laamettida ba asawu ba aggenna siiquwa hagaadan giidi qonccissiis: ‘Neeni ta sinttan alꞌꞌonne bonchcho gidiyo gishshawu taani nena siiqays.’ (Isi. 43:4, 5) Yihooway ha wodiyan nuussikka hegaa mala siiquwa bessees. Nuuni gita mooruwa moorikkokka, nuuni nu nagaran zilꞌꞌettidi laamettiyo wodenne Yihoowakko simmiyo wode I nuna siiqiyogaa aggibeennaagaa akeekoos. I nuussi ‘coo atto gaanawu’ qaalaa geliis. (Isi. 55:7) Hegee “Godaa matappe . . . minotettaa wodee” yaanaadan oottiyogaa Geeshsha Maxaafay yootees.—Oos. 3:19. w24.01 27 ¶4-5

Metoy nuna gakkiyo wode Yihooway nuna maaddana danddayees. Leemisuwawu, nuuni gita shiiquwa shiiqanawu nuna ootissiyagaa shemppuwa oychchiyo wode woy shiiqota ubba shiiqana mala nu ooso prograamiya giigissanaadan oychchiyo wode, nu deꞌuwan Yihoowa kushiya beꞌoos. Nu qoppibeenna loꞌꞌo ayfiya demmana danddayoos. He wode nuuni kaseegaappe aaruwan Yihoowan ammanettana. Iziri bana ziqqi oottidi maaduwa demmanawu Yihoowa woossiis. Iziri bawu imettida aawatettaa waati polanaakko hirggido wode, bana ziqqi oottidi Yihoowa woossiis. (Izi. 8:21-23; 9:3-5) Iziri Yihoowan ammanettidoogee haratikka A maaddanawunne aagaadan ammananawu koyanaadan oottiis. (Izi. 10:1-4) Nu deꞌuwawu koshshiyabaa waati kunttanaakko woy nu so asay qohettennaadan waatanaakko hirggiyo wode, Yihoowan ammanettidi woossana koshshees. w23.11 18 ¶15-17

Yihooway nuuni xillo geetettanawu koyikko, Abrahaami oottido ubbabaa oottana koshshees giidi yootibeenna. Nuuni nu ammanuwa oosuwan bessana danddayiyo daro ogeti deꞌiyogee qoncce. Galchchaa yiida oorattata mokkana, metootida nu ishanttanne michchontta maaddana, qassi nu so asawu loꞌꞌobaa oottana danddayoos; ha ubbabay nuuni Xoossan sabettanaadaaninne anjjettanaadan oottees. (Roo. 15:7; 1 Xim. 5:4, 8; 1 Yoh. 3:18) Nu ammanuwa oosuwan bessana danddayiyo keehi loꞌꞌo ogetuppe issoy mishiraachchuwa haraatussi minnidi yootiyogaa. (1 Xim. 4:16) Yihooway qaalaa gelidobay polettanaagaanne A ooso ubbay keehi loꞌꞌo gidiyogaa nuuni ammaniyogaa oosuwan bessana danddayoos. Qassi nuuni yaatikko Xoossay nuna xillo asadan xeellanaagaanne nuuni A dabbo gidanaagaa loytti ammanettana danddayoos. w23.12 2 ¶3; 6 ¶15

Kawuwa Daawiti hayqqanawu matido wode, Solomonawu qommoora deꞌiya qofaa yootiis. (1 Kaw. 2:1, 3) He zoree ha wodiyan deꞌiya Kiristtaane gidida attumaageeta ubbaa maaddees. Eti yaatanawu bantta deꞌo laytta ubban Xoossaa higgiya azazettananne Geeshsha Maxaafay yootiyo maarata kaallana bessees. (Luq. 2:52) Yelaga ishantti kayma Kiristtaane gidiyogee keehi koshshiyoy aybissee? Issi Kiristtaane ishawu so giddooninne galchchan keehi koshshiya daro aawatettay deꞌees. Yelaga ishanttoo, intte sinttappe demmana aawatettaabaa qoppiyogee qoncce. Intte aqinye, galchchawu oottiyageetanne guyyeppe cima gidanawu halchchennan aggekketa. Qassi intte aqo oyqqidi naata yelanawu koyennan aggekketa. (Efi. 6:4; 1 Xim. 3:1) Intte he halchchota polanawu kayma Kiristtaane gidana koshshees. w23.12 24 ¶1-2

Galchchaa cimatussi Yihoowa alꞌꞌo dorssata heemmiyo aawatettay imettiis. Ha ammanettida ishantti bantta mala Kiristtaaneta maaddiyo aawatettaa xoqqu ootti xeelloosona; qassi ‘loytti heemmiya henttanchcha’ gidanawu baaxetoosona. (Erm. 23:4; 1 PHe. 5:2) Nu galchchatun hegaa mala ishantti deꞌiyoogan nuuni keehi ufayttoos! Cimati Daannaa Geedoonappe tamaarana danddayoosona. (Ibr. 6:12) I Xoossaa asaa ashshiisinne heemmiis. (Daan. 2:16; 1 Odi. 17:6) Geedoonaagaadan, cimatikka waayissiya wodiyan Xoossaa asaa heemmanaadan sunttettidosona. (Isi. 32:2; 2 Xim. 3:1) Geedooni ashkke gididoogaappe, bana ziqqi oottidoogaappenne azazettidoogaappe tamaarana danddayoos. I ba aawatettaa poliyo wode A genccay paacettiis. Nuuni galchchaa cima gidin woy gidana xayin, cimata loytti nashshana danddayoos. Qassi nuna maaddanawu gubaaꞌiyan minnidi oottiya ishantta kaafana danddayoos.—Ibr. 13:17. w23.06 2 ¶1; 3 ¶3