Uddufune

Gita namisay koyro xeetu layttaa Kiristtaanetakka qohiis. Yelidaageeti bantta soo asawu qumaa waati demmanaakko hirggidoogee qoncce. Qassi bantta haggaazuwaa aassanawu qoppiya yelagati shin? Eti namisaa wodee aadhdhana gakkanaashin naagana koshshiyaabadan qoppidonaa? Eta hanotay ayba gidikkonne, he Kiristtaaneti meezetidosona. Eti banttawu danddayettida keenan aggennan sabbakidosona, qassi banttawu deꞌiyaabaappe Yihudan deꞌiya bantta mala Kiristtaanetussi ufayssan immidosona. (Oos. 11:29, 30) Koshshiyaaban maaduwaa demmidaageeti Yihooway eta maaddiiddi deꞌiyoogaa akeekidosona. (Maa. 6:31-33) Eti banttana maaddida ishanttuuranne michchonttuura dabbotaa minttidoogee qoncce. Qassi qohettidaageeta maaddanawu miishshaa immidaageeti woy hara ogiyan maaddidaageeti immiyoogan ufayttidosona.—Oos. 20:35. w23.04 16 ¶12-13

Issi issitoo, Yihooway bawu goynnennaageeti ba asaa maaddanaadan denttettiyoogan ba asaa woosaa zaarees. Leemisuwawu, I Nahimee katamaa zaarettidi keexxanawu Yerusalaame simmanaadan Kawuwaa Arxxekssiisi paqqadana mala oottiis. (Nah. 2:3-6) Ha wodiyankka, nuussi maadoy koshshiyo wode Yihooway bawu goynnennaageetikka nuna maaddanaadan oottana danddayees. Nuuni darotoo nu woosawu maalaalissiya hanotan zaaruwaa demmennan aggana danddayoos. Nu woosaa zaaroy saluwan deꞌiya nu Aawawu nuuni ammanettidi deꞌanawu koshshiyaaba. Yaatiyo gishshawu, Yihooway ne woosaa waati zaaridaakko loytta akeeka. Yihooway ne woosaa waati zaariyaakko ubbatoo loytta qoppa. (Maz. 66:19, 20) Yihoowa woossiyoogaa xalla gidennan, I zaariyoobay ayba gidikkonne, nu woosaa zaaruwan maayettiyoogan ammanuwaa bessana koshshees.—Ibr. 11:6. w23.05 11 ¶13; 12 ¶15-16

Nuuni nuna Yihoowawu sheedhdhiyo wode, awu goynnanawunne I koyiyoobaa oottanawu qaalaa gelida. Nu he qaalaa naagana koshshees. Nuuni Yihoowawu qaalaa gelidobaa poliyoogee keehi deexxiyaaba gidenna. Ayssi giikko, Yihooway nuna medhdhidoy A sheniyaa polanaadaana. (Ajj. 4:11) I nuuni A eranaadaaninne awu goynnanaadan oottidi ba leemisuwan medhdhiis. Yaatiyo gishshawu, nuuni akko shiiqananne I koyiyoobaa oottiyoogan ufayttana danddayoos. Qassi, nuuni Xoossay koyiyoobaa oottiyoonne A Naꞌaa kaalliyo wode, nuuyyo “shemppo demmana.” (Maa. 11:28-30) Yaatiyo gishshawu, Yihooway neeyyo oottidonne sinttappe oottana loꞌꞌoba ubbaa wotta dentta qoppiyoogan A loytta siiqa. Neeni Xoossaa kaseegaappe aaruwan loytta siiqiyo wode, awu azazettanawu metootakka. (1 Yoh. 5:3) Yesuusi maaduwaa demmanawu Yihoowa woossidonne demmana woytuwaa muletoo qoppido gishshawu, Xoossay koyiyoobaa ubbatoo oottiis. (Ibr. 5:7; 12:2) Neenikka, Yesuusaagaadan minotettaa demmanawu Yihoowa woossa, qassi merinaa deꞌuwaa hidootaa ubbatoo qoppa. w23.08 27-28 ¶4-5

Nuuni ubbay danddayanchcha asaa nashshoos. Unꞌꞌettennan issibaa naagana danddayiyaageeta bonchchoos. Nuuni balabaa oottishin harati nubaa danddayiyoogaa nuuni nashshoos. Qassi nuna Geeshsha Maxaafaa xannaꞌissiya uri issi Geeshsha Maxaafaa timirttiyaa nuuni eranawu, ammananawu woy oosuwan peeshshanawu metootiyo wode nubaa danddayido gishshawu galatoos. Ubbaappe aaruwan, Xoossaa Yihooway nubaa danddayiyo gishshawu A keehi galatoos! Harati nubaa danddayiyoogaa nashshiyaaba gidikkonne, nuuni danddayanchcha gidanawu issi issitoo metootana danddayoos. Leemisuwawu, nuuni issibaa oottanawu nuuyyo saꞌay pooꞌidaashin kattaa gaacissanawu baabure keettan taraa naagiyo wode, woppu giidi naaganawu metootana danddayoos. Harati nuna yiilloyiyo wode nuuni keehi hanqqettana danddayoos. Qassi Yihooway qaalaa gelido ooratta alamiyaa naagiyoogee issi issitoo deexxiyaaba gidana danddayees. Gidikkokka, ha ubba hanotatun nuuni kaseegaappe aaruwan danddayanchcha gidana koshshees. w23.08 20 ¶1-2

Yihooway yootin, Geedoonawu guutta wotaaddarati attin hara daroti bantta soo soo simmanaadan oottiis. I hagaadan qoppana danddayees: ‘Hagaadan oottiyoogee tumuppe koshshiyaabee? Hegee hanana danddayiyaabee?’ Gidikkonne Geedooni azazettiis. Ha wodiyan Yihoowa dirijjitee cimati dummabaa oottanaadan yootiyo wode azazettiyoogan Geedoona leemisuwaa kaalloosona. (Ibr. 13:17) Geedooni yayyidonne awu imettida oosoy A daafan yeggiyaaba gidiyo wodekka Yihoowawu azazettiis. (Daan. 9:17) Yihooway Geedoona minttetti simmin, I Xoossaa asaa naaganaadan Xoossay A maaddanaagaa aynne siribeenna. Nu oosoy muleera teqettido heeran deꞌiya cimati Geedoona leemisuwaa kaalloosona. Eta qachchanawu, qoranawu, oosuwaappe yedettanawu woy qohanawu yashissikkokka, eti shiiqotanne haggaazuwaa xalatettan kaalettoosona. Gita waayiyaa wode cimatussi imettiya kaaletoy qohiyaaba gidin woy gidana xayin, eti hegaa azazettanawu xala gidana koshshees. w23.06 5-6 ¶12-13

Yihooway Gita Kahinee Yoodaahe oottido loꞌꞌo oosoy xaafettanaadan oottiis. (Roo. 15:4) Qassi Yoodaahe hayqqido wode, “Israa7eelan Xoossaayyoonne Xoossaa Beeta Maqidasiyaayyo lo77obaa oottido gishshau, Daawita Kataman kawotu makkaanan” moogettiyoogan keehi bonchchettiis. (2 Odi. 24:15, 16) Yoodaahebaa yootiya taarikee nuuni ubbay Xoossawu yayyiyaageeta gidanaadan maaddana danddayees. Cimati gubaaꞌiyaa naaganawu baaxetiyoogan Yoodaahee leemisuwaa kaallana danddayoosona. (Oos. 20:28) Layttan cimidaageeti Yihoowawu yayyiyo wodenne awu ammanettidi deꞌiyo wode, I ba halchchuwaa polanawu etan goꞌettana danddayiyoogaa Yoodaaheppe tamaarana danddayoosona. I eta aggibayenna. Yelagati Yihooway Yoodaaha waati oyqqidaakko akeekana danddayoosona; layttan cimida ishanttanne michchontta, ubba qassi Yihoowawu daro layttaa haggaazidaageeta bonchchiyoogan A milatana danddayoosona. (Lee. 16:31) ‘Kaaletuwaa immiyaageetuyyo azazettiyoogan’ ammanettidi eta kaafiyaageeta gidoos.—Ibr. 13:17. w23.06 17 ¶14-15

Shiiqotun qofaa yootanawu kushiyaa aapputoo denttanaakko kuuyiyo wode akeekanchcha gida. Nuuni darotoo kushiyaa denttikko, harati zaaribeennaba gidikkonne, kaalettiya ishay darotoo nuna oychchanaadan iisettana danddayoos. Hegee harati qofaa yootanawu kushiyaa denttennaadan oottana danddayees. (Era. 3:7) SHiiquwan daroti kushiyaa denttikko, nuuni koyidoogaa keenaa zaarennan aggana danddayoos. Issi issitoo kaalettiyaagee nuna mule oychchennan aggana danddayees. Hegee hidootaa qanxxissiyaaba gidana danddayees, shin kaalettiyaagee nuna oychchennan aggiyo wode nuuni yiillotennan agganawu baaxetana koshshees. (Era. 7:9) Neeni koyidoogaa keenaa zaarana xayikko, harati zaariyo wode loytta ezggada shiiquwaappe simmin eta galatana danddayaasa. Neeni shiiquwan qofaa yootiyoogee minttettiyoogaadan galatiyoogeekka ne ishanttanne michchontta minttettana danddayees. w23.04 23-24 ¶14-16

Xoossaa Qaalaa xannaꞌanne hegaa wotta dentta qoppa. Mittay xaphuwaa loytti yeddikko minni eqqana danddayiyoogaadan, nuuni Yihoowa mintti ammanikko qaaxxennan minni eqqana danddayoos. Issi mittay dicciyo wode xaphuwaa duge loytti yeddeesinne daro sohuwaa yeddees. Nuuni xannaꞌiyo wodenne wotti dentti qoppiyo wode, nu ammanoy minneesinne Xoossaa ogee ubbaappe aadhdhiyoogaa mintti ammanoos. (Qol. 2:6, 7) Yihooway immido kaaletoy, zoreenne I naagidoogee beni wode deꞌida A ashkkarata waati maaddidaakko wotta dentta qoppa. Leemisuwawu, issi kiitanchchay beetamaqidasiyaa likkiyo wode Hizqqeeli ajjuutan loytti beꞌiis. He ajjuutan Hizqqeeli minettiis, qassi hegee Yihooway geeshsha goynuwawu kessido maarata nuuni waati azazettana danddayiyaakko eranaadan maaddiyaabaa yootees. (Hiz. 40:1-4; 43:10-12) Nuunikka Xoossaa Qaalan deꞌiya alꞌꞌobata wodiyaa bazzidi xannaꞌiyoonne wotti dentti qoppiyo wode goꞌettoos. Nuussikka Yihoowan mintti ammanettiya mino wozanay deꞌana danddayees.—Maz. 112:7. w23.07 18 ¶15-16

Yelaga attumaageeti kaallana bessiyo, loꞌꞌo leemiso gidiya daro asatubaa Geeshsha Maxaafay yootees. Beni deꞌida he asati Xoossaa siiqidosonanne A asaara gayttida dumma dumma aawatettaa polidosona. Leemiso gidiya kayma ishantta intte sooninne galchchan demmana danddayeeta. (Ibr. 13:7) Qassi intte wottiyobi baynna Yesuusi Kiristtoosa leemisuwa kaallana danddayeeta. (1 PHe. 2:21) Intte he asatu taarikiya pilggiyo wode etayyo deꞌiya loꞌꞌo eeshshata qoppite. (Ibr. 12:1, 2) Yaatidi intte he asatu leemisuwa waati kaallanaakko kuuyite. Adussi qoppiya uri issibaa oottanawu kuuyanaappe kasetidi loytti qoppeesippe attin eesotenna. Yaatiyo gishshawu adussi qoppiyageeta gidanawu ubbatoo baaxetite. Geeshsha Maxaafay yootiyo maarata tamaaritenne he maarati waani goꞌꞌiyakko qoppite. He maarata goꞌettidi Yihoowa ufayssiyabaa kuuyite. (Maz. 119:9) Hegee kayma Kiristtaane gidanaadan hegee inttena keehi maaddana.—Lee. 2:11, 12; Ibr. 5:14. w23.12 24-25 ¶4-5

Naati bantta ammanuwaa xeelliyaagan issi uri palamettanawu koyiyo wode ashkketettan waati zaaranaakko yelidaageeti loytti tamaarissana danddayoosona. (Yaaq. 3:13) Yelida amaridaageeti so asaa goynuwaa wode issippe meezetoosona. Eti timirtte keettan harati oychchana danddayiyo oyshata tobboosonanne waati zaaranaakko meezetoosona, qassi bantta naati ashkketettaaninne ufayssiya ogiyan waati haasayanaakko tamaarissoosona. Issippe meezetiyoogee yelagati bantta ammanuwaa minttanaadaaninne bantta ammanuwaabaa haraatuyyo yootanaadan maaddees. “Yelagati Oychchiyo Oyshaa” giya jw.org saytiyan kaalli kaalli kiyiyaabay yelagati bantta ammanuwaa minttana mala maaddanaassi giigiis. So asaara issippe hegeeta xannaꞌiyoogan nuuni ubbay ashkketettaaninne ufayssiya ogiyan nu ammanuwawu waati exatanaakko tamaarana danddayoos. w23.09 17 ¶10; 18 ¶15-16

Neeni ayyaanaabaa halchchuwaa kessada hegaa polanawu metoota eray? Yaatikko, hegaadan metootiyay ne xalla gidakka. Leemisuwawu, Pilipi kaseegaappe loytti woossanawunne darotoo woossanawu koyikkonne, woosawu wodiyaa demmanawu metootiis. Eriika haggaazo shiiqotun pooꞌissennan agganawu halchchikkonne, A ubba shiiqota pooꞌissada gakkawusu gaana danddayettees. Neeni haꞌꞌi polaychchabeenna halchchoy deꞌikko hayyanaa hidootaa qanxxoppa. Guutta halchchuwaakka polanawu darotoo wodeenne baaxee koshshees. Neeni ne halchchuwaa polanawu haꞌꞌikka koyiyoogee ne Yihoowaara dabbotido dabbotaa xoqqu ootta xeelliyoogaanne keehi loꞌꞌobaa awu immanawu koyiyoogaa bessees. Yihooway ne baaxiyaa nashshees. I ne danddayiyoobaappe aarobaa naagennaagee qoncce. (Maz. 103:14; Mik. 6:8) Hegaa gishshawu neeni halchchuwaa kessiyo wode, hegaa polana danddayiyaakkonne shaakka era. w23.05 26 ¶1-2

Xala asatikka yayyana danddayikkonne, hegee eti suurebaa oottiyoogaa agganaadan oottana mala paqqadokkona. Daaneeli keehi xala yelaga. I hananabaa yootiya Ermmaasi xaafidobaa gujjin, Xoossay kiittin hananabaa yootiyaageeti xaafidobaa xannaꞌiis. Ayhudati Baabiloonen omooduwan takkido adussa wodee wurana haniyoogaa Daaneeli hegaa xannaꞌidi guyyeppe akeekiis. (Dane. 9:2) Daaneeli Yihooway ba gelido qaalaa polidoogaa beꞌidoogee kaseegaappe aaruwan Yihoowan ammanettanaadan oottiis; qassi Xoossan mintti ammanettiyaageeti keehi xala gidanaadankka maaddiis. (Roome 8:32, 37-39​ra gatta xeella.) Ubbaappe aaruwan, Daaneeli saluwan deꞌiya ba Aawaa darotoo woossiis. (Dane. 6:10) I ba nagaraa Yihoowawu paaxiisinne bana qofissidabaa awu yootiis. Qassi Daaneeli maaduwaa demmanawu oychchiis. (Dane. 9:4, 5, 19) I nu mala asa gidiyo gishshawu, xala gididi yelettibeenna. SHin, I xannaꞌiyoogan, woossiyoogaaninne Yihoowan ammanettiyogan xala gidana danddayiis. w23.08 3 ¶4; 4 ¶7

Deriya haariyageetussi azazettiyogee nunakka haratakka goꞌꞌees. Waatidi? Issi ogee, higgiyawu azazettennan aggiyo gaasuwan gakkiya qixaatiyappe attiyogaa. (Roo. 13:1, 4) Nuuni deriya haariyageetussi azazettiyo wode, Yihoowa Markkati azazettiyageeta gidiyogaa eti akeekana. Leemisuwawu, daro layttappe kase Nayjeeriyan giiraa giiranawu ixxidi makkaliyageeta koyiiddi wotaaddarati gubaaꞌe shiiquwa wode Shiiquwa Addaraashaa gelidosona. Shin wotaaddaratu halaqay wotaaddarati Shiiquwa Addaraashaappe kiyanaadan yootidi, hagaadan giis: “Yihoowa Markkati ubbatoo giiraa giiroosona.” Neeni higgiyawu azazettiyo wode Yihoowa Markkatussi deꞌiya loꞌꞌo sunttay moorettennaadan maaddaasa. Qassi issi gallassi he loꞌꞌo sunttay ne ishanttanne michchontta qohuwappe naaganawu maaddana danddayees. w23.10 9 ¶13

Yihoowa ashkkaratuppe amaridaageeti daro wodiyawu ha iita alamiyaa wurssettaa naagiiddi takkidosona. Asa xeelan, Xoossay ba gelido qaalaa polanawu takkiyaaba milatana danddayees. Yihooway ba ashkkaratussi siyettiyaabaa akeekees. I hananabaa yootiya Imbbaaqoomawu hagaadan giis: “Ajjuutan beettidabai ba keerettida wodiyaa naagees. He ajjuutai polettiyo wodee eesuwan gakkana; worddo gididi attenna. Takkiyaabaa milatikkokka naaga; aissi giikko, i tumuppe yaana; gam77enna.” (Imb. 2:3) Yihooway hegaa yootidoy Imbbaaqooma xallaa maaddanaasseeyye, ha wodiyan nunakka maaddanaassee? Kiitettida PHawuloosi, ooratta alamiyaa yeemuwan naagiya Kiristtaanetussi he qofaa yootanaadan Yihooway azaziis. (Ibr. 10:37) Yaatiyo gishshawu, Yihooway nuna ashshanawu gelido qaalay polettanawu keehi takkees giidi nuuni qoppikkokka, ‘tumuppe polettanaagaanne gamꞌꞌennaagaa’ ammanettana danddayoos. w23.04 30 ¶16

Muusee Yihoowa gishshaa haasayiyogaa bessiya naqaashaa Israaꞌeelati sheneho giidoogee azzanttiyaba. (Qoo. 14:10, 11) Yihooway Muuse baggaara eta kaalettiyogaa eti darotoo ammanennan ixxidosona. Hegaappe denddidaagan, Hidootaa Biittaa gelennaadan Yihooway eta diggiis. (Qoo. 14:30) Gidikkonne, amarida Israaꞌeelati Yihoowa kaaletuwa kaallidosona. Leemisuwawu, Yihooway hagaadan giis: ‘Kaaleebi tana polo wozanaappe kaalliis.’ (Qoo. 14:24) Xoossay Kaaleeba woytiis, ubba qassi Hidootaa Biittan I deꞌanawu koyido sohuwa doori ekkanaadan paqqadiis. (Yaa. 14:12-14) Hidootaa Biittaa gelanaadan paqqadettido Israaꞌeelatikka Yihoowa kaaletuwa kaalliyogan nuussi loꞌꞌo leemiso. Israaꞌeelata kaalettanaadan Muuseppe simmin Yaasu sunttettido wode, eti Yaasa “a de7o laitta ubban bonchchidosona.” (Yaa. 4:14) Hegaa gishshawu, Yihooway I qaalaa gelido biittaa eti gelanaadan oottiyogan eta anjjiis.—Yaa. 21:43, 44. w24.02 21 ¶6-7

Issi dottoree nu wozanaa shochchaa hanotaa shaakki eriyo wode, nu wozanaa payyatettaabaa erana danddayees. Hegaadankka, nuuni harata ay keena mintti siiqiyakko nuna qoriyogan Xoossaa ay keena mintti siiqiyakko erana danddayoos. Kaseegaadan nuuni nu ishanttussi qarettennaagaanne siiquwa bessennaagaa akeekikko, hegee nuuni Xoossaa siiqiyo siiqoy shuggiiddi deꞌiyogaa bessiyaba gidana danddayees. Shin ubbatoo nu mala Kiristtaaneta siiqiyogee, nuuni Xoossaa siiqiyo siiqoy mino gidiyogaa bessiyaba. Nuuni nu ishanttanne michchontta siiqiyo siiqoy shuggikko hegee gita meto. Aybissi? Hegee nuuni Yihoowara dabbotido dabbotay shuggidoogaa bessiyo gishshataassa. Kiitettida Yohaannisi hagaadan giidi yootiyogan hegaa qonccissiis: “Be7ido ba ishaa siiqennaagee be7ibeenna Xoossaa siiqanau waani danddayii?” (1 Yoh. 4:20) Hagaappe nuuni ay tamaariyoo? Nuuni “issoi issuwaara” siiqettiyo wode xallan Yihoowa ufayssoos.—1 Yoh. 4:7-9, 11. w23.11 8 ¶3; 9 ¶5-6

Kawuwaa Yoꞌaashi yelagatettan loꞌꞌobaa kuuyiis. Awu aawi baynnaba gidikkonne, ammanettida Qeese Ubbatu Halaqaa Yoodaahe immiyo kaaletuwaa kaalliis. He qeesee Yoꞌaasha ba naꞌadan zoriis. Yoodaahe loꞌꞌo leemiso gidido gishshawu Yoꞌaashi Yihoowawu haggaazanawunne aagaadan Yihoowawu haggaaziya asata maaddanawu kuuyiis. Qassi Yoꞌaashi Yihoowa beeta maqidasiyaa kaseegaadan ooraxissiis. (2 Odi. 24:1, 2, 4, 13, 14) Intte Yihoowa siiqanaadaaninne I kessido maaraadan deꞌanawu tamaariyoogee inttessi imettida dumma imota. (Lee. 2:1, 10-12) Inttena yelidaageeti daro ogetun inttena loohissana danddayoosona. Inttena yelidaageeti Geeshsha Maxaafaappe yootiyo zoriyaa intte oosuwan peeshshiyo wode eti ufayttana. Ubbaappe aaruwan, Xoossay ufayttana, qassi intte aara kaseegaappe aaruwan dabbotana. (Lee. 22:6; 23:15, 24) Nuuni Yoꞌaashi yelagatettan oottidobaa kaalliyo loꞌꞌo gaasoy deꞌees. w23.09 8-9 ¶3-5

Yihooway nu woosaa siyanawu qaalaa geliis. Nu Xoossay ammanettidi awu goynniyageeta siiqiyo gishshawu eta woosaa ubbatoo siyees. (Maz. 10:17; 37:28) Shin hegaa giyogee I nu oychchido ubbabaa immees giyogaa gidenna. Nuuni woossidobaappe amaridabaa zaaruwa demmanawu ooratta alamiya gakkanawu naagiyogee koshshana danddayees. Yihooway nu woosay ba halchchuwara waani gayttiyakko qoppees. (Isi. 55:8, 9) A halchchuwappe issoy A haaruwan issuwa gidida ufayttiya asay ha saꞌaa kumiyogaa. Shin Seexaanay asay bana barkka haariyogee loꞌꞌo giidi yootees. (Doo. 3:1-5) Dabloosi giidobay worddo gidiyogaa qonccissanawu asay bana barkka haaranaadan Yihooway paqqadiis. Shin asaa haaroy ha wodiyan daro metoy nuna gakkanaadan oottiis. (Era. 8:9) Yihooway ha meto ubbaa haꞌꞌi xayssennaagaa eroos. w23.11 21 ¶4-5

Yihooway ‘daro kawotettati’ Abrahaama baggaara anjjettanaagaa yootiis. Shin Abrahaama layttay 100, qassi Saari layttay 90 gidido wodekka, eti naꞌaa yelibookkona. Asa qofan, Abrahaaminne Saara naꞌa yelana danddayennaba milatiis. Hegee Abrahaamawu gita paace. “Abrahaami ammanidinne sinttappe demmana giidi, ufaissan naagidi, daro zaretuyyo aawa gidiis.” (Roo. 4:18, 19) Abrahaami hidootan naagidobay guyyeppe polettiis. I yeemuwan naagido Yisaaqa yeliis. (Roo. 4:20-22) Nuunikka Abrahaamaagaadan Xoossaa ufayssana, xillo geetettananne Xoossaa dabbo gidana danddayoos. Phawuloosi hegaabaa hagaadan giidi loytti qonccissiis: “Ayyo xillotettan qoodiis giya qaalai [Abrahaama] xalaalau xaafettibeenna. He qaalai nu Godaa Yesuusa haiquwaappe denttida Xoossaa ammaniya nuuyyookka xillotettan qoodettana mala xaafettiis.” (Roo. 4:23, 24) Abrahaamaagaadan nuunikka Yihoowan ammanana, loꞌꞌobaa oottananne Yihooway qaalaa gelidobay polettanaagaa mintti ammanettana koshshees. w23.12 7 ¶16-17

Neeni yayyanaadan oottiya metoy nena gakkiyo wode Yihooway he metuwanne he metoy neeni waananaadan oottiyakko akeekiyogaa hassaya. Leemisuwawu, Yihooway Gibxxen deꞌiya Israaꞌeelati naaqettiyo naaquwa xalla gidennan, ‘eta waayiyakka’ akeekiis. (Kes. 3:7) Neeni yayyanaadan oottiya metoy gakkikko, Yihooway nena maaddiiddi deꞌiyogaa akeekennan aggana danddayaasa. Yaatin, ne waatana danddayay? I ne miyyiyan deꞌiyogaa akeekanaadan nena maaddana mala woossa. (2 Kaw. 6:15-17) Yaatada hagaa qoppa: Dere haasayay woy galchchan harati yootiyo qofay nena minttettidee? Issi xuufee, biidoy woy muuziqa biidoy ne minnanaadan oottidee? Issi uri neeyyo yootido qofay woy xiqisee nena minttettidee? Ishanttinne michchontti nuna siiqido siiqoynne Xoossaa Qaalaappe nuuni demmido minttettoy nuna maaddidoogaa dogana danddayoos. Gidikkonne, hageeti Yihooway nuussi immido dumma imota. (Isi. 65:13; Mar. 10:29, 30) Hageeti Yihooway neessi qoppiyogaa bessoosona. (Isi. 49:14-16) Qassi neeni an ammanettiyogee bessiyaba gidiyogaa qonccissoosona. w24.01 4-5 ¶9-10

Haggaazuwan xala gidanawu Yihoowa woossa. Yesuusi I erissiyo ashkkarati “Yerusalaameeninne Yihudaa biitta ubban, Samaariyaaninne sa7aa gaxaa [gakkanaashin]” abaa markkattanaagaa I saluwaa simmanaappe guuttaa kasetidi eta hassayissiis. (Oos. 1:8; Luq. 24:46-48) Amarida wodiyaappe simmin, Ayhuda haymaanootiyaa kaalettiyaageeti kiitettida PHeexiroosanne Yohaannisa oyqqidi Sanhedirina shilootaa sintti shiishshidosona; eti ha ammanettida asati sabbakiyoogaa agganaadan azazidosona, ubba eta yashissidosona. (Oos. 4:18, 21) PHeexiroosinne Yohaannisi hagaadan giidosona: “Xoossau azazettiyoogaa aggidi, intteyyo azazettiyoogee Xoossaa sinttan lo77okkonne ane intte pirddite. Aissi giikko, nuuni be7idobaanne siyidobaa yootennan agganau danddayokko.” (Oos. 4:19, 20) PHeexiroosinne Yohaannisi qashuwaappe birshshettido wode, erissiyo ashkkarati Yihoowa sheniyaa polanawu woossidosona. Yihooway eti wozanappe woossido woosaa siyiis.—Oos. 4:31. w23.05 5 ¶11-12

Yihoowaynne Yesuusi ooppenne aaruwan adussa wodiya issippe deꞌidosona. Eti saluwan keehi daro biiloone layttaa issippe deꞌido wode loytti dabbotidosonanne issoy issuwara loytti siiqettidosona. Hachchi gallassaa xiqisiyan odettidaagaadan, Yihooway Yesuusa siiqiyogaa qoncciyan yootiis. Yihooway ‘hagee tana ufayssiyagaa’ giyogaappe harabaa yootennan aggana danddayees. Shin I Yesuusa keehi siiqiyogaa nuuni eranaadan koyido gishshawu, ‘hagee ta Naꞌaa, taani siiqiyogaa’ yaagiis. Yihooway Yesuusaaninne I oottanaban ceeqettiis. (Efi. 1:7) Qassi Yesuusi A Aaway A siiqiyogaa mule siri erenna. Yihooway Yesuusa siiqiyo siiqoy qoncci beettiyogaa Yesuusi akeekiis. Yesuusi A Aaway A siiqiyogaa ammanettidi darotoo yootiis.—Yoh. 3:35; 10:17; 17:24. w24.01 28 ¶8

Ane hagaa qoppa: Neeni bonchchiyo issi uri nebaa iitabaa haasayiis. I haasayidobay worddo gidiyogaa ne eraasa; shin amaridaageeti hegaa ammanidosona. Ubba iitabay, eti he wordduwa aassidosona; qassi hara darotikka hegaa ammanidosona. Yaatin, neeyyo aybi siyettanee? He worddoy neeni azananaadan oottana danddayees. Yihooway ba sunttay moorettido wode waanidaakko akeekanaadan ha hanotay nuna maaddana danddayees. A kiitanchchatuppe issoy koyro maccaasee Hewaanissi abaa wordduwa yootiis. A he wordduwa ammanaasu. He worddoy Addaamenne Hewaana Yihoowa bolli makkalanaadan oottiis. Hegaappe denddidaagan nagaraynne hayqoy ubba asaa gakkiis. (Doo. 3:1-6; Roo. 5:12) Seexaanay wordduwa haasayido gishshawu ha wodiyan alamiyan hayquwa, olaanne tuggaa mala daro metoy deꞌees. Yihooway ba sunttay moorettido gishshawunne hegee kaalettidoban azzanidee? Ee azzaniis. Gidoppe attin, Yihooway yiillotibeenna woy lanccibeenna. Shin I ubbatoo “ufayttiya Xoossa.”—1 Xim. 1:11, NW. w24.02 8 ¶1-2

Nena paacee gakkiyo wode Yooseefaagaadan Xoossawu waana ammanettada deꞌana danddayay? Nena paacee gakkiyo wode waatanaakko haꞌꞌi kuuyana danddayaasa. Yihooway ixxiyobata sohuwara eqetta; qassi hegeetubaa qoppoppa. (Maz. 97:10; 119:165) Yaatikko paacee nena gakkiyo wode nagaraa oottakka. Neeni tumaa demmidoogaa eraasa, qassi kumetta wozanan Yihoowawu haggaazanawu koyaasa; shin nena Yihoowawu sheedhdhada haattan muukettanawu giigettabeennabadan qoppana danddayaasa. Neeni hagaadan giidi Yihoowa woossida Kawuwa Daawitaagaadan oottana danddayaasa: “Abeet Xoossau, tana qorada, ta wozanaa era; tana paaccada, ta qofaa era. Ane tanan iitabai de7ikko xeella; xeellada, merinaa ogiyan tana kaaletta.” (Maz. 139:23, 24) Yihooway ‘wozanappe bana koyiyageeta’ anjjees. Neeni nena Yihoowawu sheedhdhada haattan muukettanawu halchchuwa kessada baaxetiyogee yaatiyogaa bessees.—Ibr. 11:6. w24.03 6 ¶13-15

Qeese ubbatu halaqay asaa gishshaa Xoossaa sinttan shiiqees. Israaꞌeelan qeese ubbatu halaqa gidanaadan Yihooway koyro Aaroona sunttiis; hegee hanidoy Xoossaa dunkkaanee anjjettido wodiyaana. Shin kiitettida Phawuloosi yootidoogaadan, qeeseti merinawu haggaazennaadan ‘hayqoy eta diggiyo’ gishshawu, issoy haraa sohuwan oottanaadan daro qeeseti koshshidosona. (Ibr. 7:23-26) Hegaa bollikka, qeese ubbatu halaqati nagaranchcha gidiyo gishshawu eti bantta nagarawukka yarshshuwa shiishshana koshshiis. Hegee Israaꞌeelan qeese ubbatu halaqaa giddooninne gita Qeese Ubbatu Halaqaa Yesuus Kiristtoosa giddon deꞌiya dummatettaa loytti qonccissees. Qeese Ubbatu Halaqaa Yesuus Kiristtoosi he tumu dunkkaaniyan oottees, “he Dunkkaanee asi essidoogaa gidennan, Xoossai essidoogaa.” (Ibr. 8:1, 2) Hegaa Phawuloosi hagaadan qonccissiis: “Yesuusi merinau de7iyo gishshau, a qeesetettai laamettenna.” Phawuloosi gujjidikka, Yesuusi ‘borssoy baynnaagaanne nagaranchchatuura gayttennaagaa’ yootiis; qassi Israaꞌeelan qeese ubbatu halaqata gididi oottidaageetuppe dumma hanotan, I ba ‘nagarawu hachchi hachchi yarshshana koshshenna.’ w23.10 26 ¶8-9

‘Koiro saloy’ Seexaanaynne dayddanttati haariyo polotikaa kawotettata qonccissees. (Maa. 4:8, 9; 1 Yoh. 5:19) Geeshsha Maxaafan ‘saꞌaa’ giya qaalay saꞌan deꞌiyageeta qonccissana danddayees. (1 Odi. 16:31; Maz. 33:8) Yaatiyo gishshawu, “koiro sa7ai” ha wodiyan deꞌiya iita asaa qonccissees. Yihooway haꞌꞌi deꞌiya ‘saluwanne saꞌaa’ muleera xaysseesippe attin guuttaa giigissenna. I haꞌꞌi deꞌiya saluwanne saꞌaa xayssidi “ooratta saluwaanne ooratta sa7aa” ehaana; hegaa giyogee ooratta kawotettay xillo asaa haarana giyogaa. Yihooway saꞌaanne asaa wottiyobi baynnaagaa oottiyogan ooraxissana. Hananabaa yootiya Isiyasi kasetidi yootidoogaadan, Yihooway kumetta saꞌaa Edene gannatiyadan keehi loꞌꞌiya soho oottana. Qassi I nuna ubbaa muleera pattiyogan ooraxissana. Wobbeti, qooqetinne tulleti paxana, ubba qassi hayqqidaageetikka denddana.—Isi. 25:8; 35:1-7. w23.11 4 ¶9-10

‘Gita waayee’ qoppennan doommana. (Mat. 24:21) SHin gita waayee yaanaagaa nuuni eriyo gishshawu hegee hara daafabatuppe dummatees. Yesuusi 2,000 gidiya layttaappe kase, he gallassawu giigi uttanaadan bana kaalliyaageetuyyo mintti yootiis. Nuuni giigi uttikko, he waayissiya wodiyaa gencciyoogeenne harati yaatanaadan maaddiyoogee metennaba. (Luq. 21:36) Yihooway nuna ashshanaagaa ammanettidi awu azazettanawu genccana koshshees. Nu ishanttu aqoy amaridaagee woy ubbay xayikko nuuni waatanee? (Imb. 3:17, 18) Nuuni etassi qarettiyo gishshawu koshshiyaaban eta maaddoos. Issippe denddiya kawotettati qohuwaa gattin nuuni amarida wodiyawu daro ishanttuuranne michchonttuura issippe deꞌana koshshikko nu waatanee? (Hiz. 38:10-12) He waayissiya wodiyaa genccanaadan maaddanawu nuuni eta wozanappe siiqana koshshees. w23.07 2 ¶2-3

Beni deꞌida daro Kiristtaaneti siiqiyo, Aqiilanne PHirisqqilo giyo aqo laggetu hanotaappe azinatinne machchoti tamaarana danddayoosona. (Roo. 16:3, 4) Eti issippe oottidosona, sabbakidosonanne harata maaddidosona. (Oos. 18:2, 3, 24-26) Qassi Geeshsha Maxaafan Aqiilabaynne PHirisqqilibay ubbatoo issippe odettiis. Aqo laggeti eta leemisuwaa waati kaallana danddayiyoonaa? Inttenne intte aqo laggeti oottana danddayiyo darobaa qoppite. He oosotuppe amaridaageeta intterkka oottiyoogaappe issippe oottana danddayeetii? Leemisuwawu, Aqiilinne PHirisqqila issippe sabbakidosona. Intte ubbatoo hegaadan oottanawu halchchana danddayeetii? Qassi Aqiilinne PHirisqqila issippe oottidosona. Inttessinne intte aqo laggetussi issi mala oosoy deꞌennan aggana danddayees, shin so oosota issippe oottana danddayeetii? (Era. 4:9) Intte issi oosuwaa maadettidi oottiyo wode loyttidi hashetiyoogaa akeekeeta, qassi issippe haasayana danddayeeta. w23.05 22-23 ¶10-12

Issi issitoo ubba asay yayyees. Leemisuwawu, Kawuwa Saaꞌooli Daawita woranawu yedettido wode Gaate geetettiya Pilisxxeematu katama baqatiis. Gaate kawoy Akiishi, Daawiti ‘tammu shaꞌu’ Pilisxxeema asata worida olanchcha gidiyogaa eriis. Yaatiyo gishshawu Daawiti “keehippe yayyiis.” (1 Sam. 21:10-12) Akiishi tana waataneeshsha giidi Daawiti hirggiis. Daawiti yayyiyogaa waati aggidee? Daawiti Gaaten deꞌiyo wode awu siyettidabaa Mazamure 56y yootees. He mazamuriyan Daawiti yayyido gaasuwa yootikkonne, yayyiyogaa agganaadan maaddidabaakka qonccissiis. Daawiti yayyido wode Yihoowan ammanettiis. (Maz. 56:1-3, 11) Daawiti Yihoowan ammanettidoogee bessiyaba. Daawiti Yihoowa maaduwan hegaappe kase hani erennabaa hananawu kuuyiis: I gooyiya asa milatiis; qassi A halchchoy polettiis! Akiishi Daawita woranawu koyiyogaa aggidi harasaa yeddido gishshawu, Daawiti hayqqennan attiis.—1 Sam. 21:13–22:1. w24.01 2 ¶1-3

Hachchi gallassaa xiqisiyan odettidaageeti oonee? Hayquwappe denddida tiyettidaageeta! Hegaa gishshawu, gita waayiya wurssettaa heeran, tiyettidaageetuppe wurssettaageeti saluwa biyo wode eti koyruwan oottanabatuppe issoy olettiyogaa. Eti saluwa biidi, Kiristtoosaaranne A geeshsha kiitanchchatuura hashetidi Xoossaa morkketuura wurssetta olaa olettana. Ane hagaa qoppa! Tiyettida Kiristtaanetuppe amaridaageeti saꞌan deꞌiyo wode, cimidaageeta; ubba qassi, wolqqay wuridoogeeta. Eti hayquwappe denddidi saluwa biyo wode, wolqqaamanne hayqqenna ayyaana mereta gidoosona; qassi Olanchcha Kawuwa Yesuus Kiristtoosaara hashetidi olettanaadan sunttettoosona. Eti Armmageedoona olaa oletti simmidi, asay wottiyobi baynnaagaa gidanaadan Yesuusaara issippe oottana. Eti nagaranchcha gididi deꞌido wodiyagaappe aaruwan, saluwan deꞌiyo wode, ha saꞌan deꞌiya siiqiyo bantta ishanttanne michchontta loytti maaddanaagee qoncce! w24.02 6-7 ¶15-16

Banttana Yihoowawu sheedhdhidi haattan muukettanawu giigettiya amaridaageeti yaatanawu mammottoosona. Eti hagaadan qoppana danddayoosona, ‘Taani haattan muuketta simmada gita nagaraa oottada bohettikko shin?’ Neeni hegaadan yayyikko, Yihooway ‘I koyiyogaadan neeni deꞌanaadaaninne ubba wode A ufayssiyabaa oottanaadan’ neessi koshshiya ubbabaa kunttanaagaa ammanetta. (Qol. 1:10) Qassi I neeni suurebaa oottanaadan wolqqaa immana. Hara daroti suurebaa oottanaadan I maaddiis. (1 Qor. 10:13) Hegaa gishshawu Kiristtaane galchchaappe bohettiyageeti keehi guutta. Yihooway ba asay ammanetti deꞌanaadan maaddees. Nagaranchcha asay ubbay balabaa oottanawu paacettees. (Yaaq. 1:14) Shin neeni paacettiyo wode ay oottanaakko doorana koshshees. Neeni waana deꞌanaakko kuuyiyay nena. Nuussi siyettiyabaanne nuuni oottiyobaa teqqana danddayokko giidi issi issi asay yootees. w24.03 5 ¶11-12