Usuppune

Xoossaa ufayssiya eeshshati deꞌiyo ishantti galchchaa keehi maaddoosona. Ashkke uri sarotettay deꞌanaadan oottees. Qassi ashkke asi harati yootiyobaa ezggeesinne etayyo siyettiyabaa akeekanawu baaxetees. Intte cima gididabadan qoppite. Cimatu shiiquwan, Geeshsha Maxaafay yootiyo higgiyara woy maaraara phalqqettennabaa cimatuppe daroti kuuyiyo wode, hegaa kaafeetii? Harati intte koyiyogaadan oottanaadan iisettekketa. Haratu qofaa siyiyogee keehi koshshiyogaa ereeta. (Doo. 13:8, 9; Lee. 5:22) Hegee intte harata karekketa woy etaara ooyettekketa giyogaa; ubba intte etawu keheeta. Waayissiya hanotatunkka haratuura sarotettaa medhdhanawu baaxeteeta. (Yaaq. 3:17, 18) Intte kehatettan haasayiyobay inttena eqettiyageeta gujjin, haratikka woppu gaanaadan maaddees.—Daan. 8:1-3; Lee. 25:15; Mat. 5:23, 24. w24.11 23 ¶13

Yesuusi “haranttuwa hayqqana koshshennan issitoo xallaa” hayqqidaba gidikkonne I haꞌꞌikka nuuyyo darobaa oottiiddi deꞌees. (Roo. 6:10) I nuussi ay oottiiddi deꞌii? Wozuwa baggaara nuuni ha wodiyan daro loꞌꞌobaa demmanaadan oottiiddi deꞌees. I oottiyo darobata qoppa. I nuussi Kawo, Gita Kahinenne galchchaa huuphe gididi oottiiddi deꞌees. (1 Qor. 15:25; Efi. 5:23; Ibr. 2:17) Gita waayee wuranaappe kase tiyettidaageetanne zawi baynna asaa shiishshiyo aawatettay awu imettiis. (Mat. 25:32) Ha wurssetta gallassatun ammanettida aylliya baggaara nuuni Yihoowawu ammanettidi haggaazanaadan koshshiyabatakka I nuussi immees. (Mat. 24:45) Qassi I ba Shaꞌu Layttaa Haaruwa wodekka nu gishshawu oottiyogaa aggenna. Yihoowi ba Naꞌaa nuussi immidoy I nu gishshawu hayqqanaadan xalaala gidennan, hegaappe aadhdhiya darobata nuuyyo oottanaadaana! w25.01 24 ¶12

Yihoowi nuuyyo atto giyo wode nuuyyo muleera atto geesinne hegaa gaasuwan nuna qaxxayenna. Yaaniyo gishshawu, saluwan deꞌiya nu Aawaara nuuni loytti dabbotana danddayoos. Shin Yihoowi nuussi atto giyogee nuuyyo imota mala gidiyogaa eroos. Hegee nuuyyo bessiyo gishshawu gidennan, I nuna siiqiyonne nuussi kehiyo gishshawu oottiyoba. Yihoowi nuuyyo atto giyo gishshawu nuuni A keehi galatoos! (Maz. 130:4; Roo. 4:8) Shin Yihoowi nuuyyo atto gaanaadan koyikko nuuni issibaa oottana koshshees. Yesuusi giidobaa akeeka: “Inttena naaqqidaageetuyyo intte atto gaana xayikko, intte Aawaykka intte nagaraa atto geenna.” (Mat. 6:14, 15) Yaaniyo gishshawu, nuuni Yihoowa leemisuwa kaallidi haratuyyo atto gaana koshshees. w25.02 13 ¶18-19

Sadoomanne Gamoora asaabaa qoppa. Xillo bitanee Looxee Sadooman deꞌiya asatuppe issuwa. Shin Looxee yan deꞌiya ubbawu sabbakidoogaa nuuni eriyoo? Erokko. Eti iita asa gidiyogee qoncce; shin eti likkebaanne likke gidennabaa shaakki eridonaa? He kataman deꞌiya attuma asa ubbay Looxe imattatuura wolqqan zinꞌꞌanawu koyidoogaa hassaya. Eta giddon guutta attuma naatikka deꞌiyogaa Geeshsha Maxaafay yootees. (Doo. 19:4; 2 PHe. 2:7) Maariya Xoossaa Yihoowi he asatuppe ooninne hayquwappe denddenna giidi kuuyidoogaa nuuni erana danddayiyoo? Chii, erana danddayokko. He kataman tammu xillotikka baynnaagaa Yihoowi Abrahaamawu yootiis. (Doo. 18:32) Yaatiyo gishshawu, eti xillo gidokkona; qassi eta oosuwa gishshawu Yihoowi eta xayssiyogan suurebaa oottiis. Shin nuuni etappe ooninne ‘xillo gidenna asatuura denddenna’ giidi ammanettidi yootana danddayiyoo? Chii, ammanettidi yootana danddayokko! w24.05 2 ¶3; 3 ¶8

Deꞌuwa hanotay laamettido gishshawu, amaridaageeti bantta soo asaappe haakkidi baanaadan oottiya oosuwa dooridosona; shin daroti hegee iita kuusha gidiyogaa guyyeppe akeekidosona. Ooratta oosuwa doommanaappe kase, miishshaa demmiyogaa xalaala gidennan, hegee neeninne ne soo asay Yihoowakko shiiqanaadan maaddiyakkonne qoppa. (Luq. 14:28) Nena hagaadan oychcha: ‘Taani so asaappe haakkada biikko, ta aqo deꞌoy waanana danddayii? Taani ubba shiiqota shiiqana, haggaazana, qassi ishanttuuranne michchonttuura wodiya aattana danddayiyanaa?’ Neessi naati deꞌikko, ha keehi koshshiya oyshaakka nena oychchana koshshees: “Taani etaara deꞌennan, ‘Yihoowi yootiyo seeraaninne zoriyan’ ta naata dichchana danddayiyanaa?” (Efi. 6:4) Neeni issibaa kuuyiyo wode Geeshsha Maxaafay yootiyobaa kaallenna ne dabbotinne laggeti yootiyobaa gidennan, Yihoowa qofaa kaalla. w25.03 29 ¶12

Kayma gidenna issi Kiristtaanee elle ‘cimettananne bala ogiya’ kaallana danddayees. I naqaashi baynna worddo oduwa ammanana danddayees; woy kaddidaageetun cimettana danddayees. I harata qanaatana, etaara ooyettana woy elle yiillotana danddayees. Qassi I paacettiyo wode darotoo iitabaa oottana danddayees. (1 Qor. 3:3) Geeshsha Maxaafay ayyaanaaban kayma gidiyogaa issi uri gastta asa gidiyogaara geeddarssees. (Efi. 4:15) Guutta naꞌi yuushshi qoppenna, qassi A kaalettana koshshees. Leemisuwawu, issi aayyiya ogiya kanttaydda ba naꞌiya I kushiya oyqqanaadan oychchana danddayawusu. He naꞌiya dicciyo wode, A ogiya barkka kanttanaadan aayyiya paqqadana danddayikkonne, A ogiya kanttiyo wode kaamee deꞌiyakkonne baynnaakko shaakkanaadan hassayissawusu. A gastta gidiyo wode qohiya hegaa malabaappe waata naagettanaakko erawusu. Hegaadan, ayyaanaaban kayma gidida Kiristtaaneti Yihoowa qofaa akeekanawu Geeshsha Maxaafay yootiyobaa loytti qoppoosona; yaatidi suurebaa kuuyoosona. w24.04 3 ¶5-6

Daro layttawu Xoossaa dabboti aara saluwan deꞌiyageetu xalaala. Guyyeeppe, I asaa medhdhiis; qassi eti A dabbo gidana danddayidosona. A dabbotuppe amaridaageeti Heenooka, Noha, Abrahaamanne Iyyooba. Eti Yihoowawu azazettido gishshawu, A dabbo gididoogaa Geeshsha Maxaafay yootees. (Doo. 5:24; 6:9; Iyy. 29:4; Isi. 41:8) Aadhdhida daro layttatun, Yihoowi ba dabboti ba imattata gidanaadan shoobbiyogaa aggibeenna. (Hiz. 37:26, 27) Leemisuwawu, Hizqqeela hiraagaappe nuuni akeekiyogaadan, Xoossay baassi ammanettidi goynniyageeti ba mata dabbo gidanaadan tumuppe koyees. I etaara ‘sarotettaa maachchaa maacettanaagaa’ yootiis. He hiraagay saluwa biyo hidootaynne saꞌaa laattiyo hidootay deꞌiyogeeti Yihoowa dunkkaaniyan ‘issi wude’ gidiyo wodiya qonccissees. (Yoh. 10:16) Haꞌꞌi hegaadan haniiddi deꞌees! w24.06 2 ¶2, 4; 3 ¶5

Nuuni Yihoowa asa gidiyo gishshawu Xoossaa Kawotettawu wozanappe exatoos, shin yaatanawu darotoo xala gidana koshshees. (Mat. 6:33) Leemisuwawu, ha iita alamiyan Yihoowi kessido maaraadan deꞌanawunne Kawotettaa mishiraachchuwa sabbakanawu nuuni xala gidana koshshees. Qassi kaseegaappe aaruwan shaahotettay darido ha alamiyan nuuni polotikaaban oossinne exatennan deꞌanawu darotoo nuussi xalatettay koshshees. (Yoh. 18:36) Yihoowa asaappe daroti polotikaaban oossinne exatenna gishshawu woy wotaaddara gidenna gishshawu deꞌuwawu koshshiyabaa kunttanawu metootoosona, woy harati eta shocoosona woykko qachchoosona. Yihoowawunne A kawotettawu ammanettidi deꞌanawu xalatettaa bessida haratubaa nuuni wotti dentti qoppiyogee nuunikka xala gidanaadan denttettees. Nu Kawoy Kiristtoos Yesuusi saꞌan deꞌiyo wode Seexaanaa alamiya polotikan gelanawu mule koyibeenna. (Mat. 4:8-11; Yoh. 6:14, 15) I wolqqaa demmanawu ubbatoo Yihoowan ammanettiis. w24.07 3 ¶4; 4 ¶7

Yihoowi ha taarikiya nu goꞌꞌawu xaafissiis. Hegee I nagaraa keehi ixxiyoy aybissakko nuuni akeekanaadan maaddees. Nagaray nuuni Yihoowara dabbotido dabbotaa mooreesinne hayquwa kaalettees. (Isi. 59:2) Seexaanay Yihoowakka asaakka ixxees. Addaamenne Hewaana nagaraa oottanaadan I paaccidoynne ha wodiyankka asaa paacciyogaa aggibeennay hegaassa. Addaamenne Hewaana nagaraa oottido wode Yihoowi asawu halchchidobay halanaadan oottaas giidi Seexaanay qoppennan aggenna. Shin, I Yihoowi siiqiya Xoossaa gidiyogaa akeekibeenna. Xoossay Addaamenne Hewaani zerettawu halchchidobaa mule laammibeenna. I asaa siiqiyo gishshawu ubba asaa maaddiya hidootaa sohuwara immiis. (Roo. 8:20, 21) Yihoowi eta zerettatuppe amaridaageeti A siiqanawunne awu azazettanawu dooranaagaa erees. Yihoowi eti akko shiiqananne nagaraanne hayquwa aylletettaappe laꞌa kiyana danddayiyo ogiya giigissiis. w24.08 3 ¶3-4

Yihoowa asaappe darotuyyo oosoy darees. Nuuppe daroti nuussinne nu soo asawu koshshiyabaa kunttanawu oosuwa oottoos. (1 Xim. 5:8) Daro Kiristtaaneti sahettiya bantta dabbota maaddoosona, woy cimidaageeta heemmoosona. Nuuppe daroti nu payyatettaa naagana koshshees; qassi hegee wode ekkiyaba. Hegaa bollikka, galchchan nuuni oottana koshshiyabati deꞌoosona. Nuuni oottana koshshiyabatuppe waannatiyagee minnidi sabbakiyogaa. Nuuni Kiristtaane gidiyogaadan, Geeshsha Maxaafaa nabbabiyogee ‘loꞌꞌobatuppe’ woy keehi koshshiyabatuppe issuwa gidiyo gishshawu nuuni ubbatoo nabbabana bessees. Koyro mazamuree ufayttiya uraabaa yootiiddi hagaadan gees: “GODAA higgiyan i ufaittees; a higgiyaa gallassinne qammi qoppees.” (Maz. 1:1, 2) Hegee nuuni wodiya bazzidi Geeshsha Maxaafaa nabbabana koshshiyogaa yootiyogee qoncce. Geeshsha Maxaafaa nabbabanawu keehi loꞌꞌo wodee awudee? Nuuni ubbay issi gallassaa giddon keehi loꞌꞌo wodiya doorana danddayoos. Shin nuuni ubbatoo Geeshsha Maxaafaa nabbabanawu injjetiya wodiya dooriyogee keehi koshshiyaba. w24.09 3 ¶5-6

Kayma Kiristtaaniyawu haratu maadoy koshshii? Ee. Kayma Kiristtaanetikka issi issitoo maaduwa oychchana danddayosona. Kayma gidenna issi uri I waatanaakko harati yootanaadan, woy I kuuyana koshshiyabaa harati kuuyanaadan koyana danddayees. Issi kayma Kiristtaanee eraaninne meeziyan baappe dariya harata maaduwa oychchiyo wode I ba kuuyiyoban oyshettiyogaanne ‘ba toohuwa tookkana’ bessiyogaa erees. Gastta asa ubbay issi mala gidennaagaadan, kayma Kiristtaane ubbawu issi mala eeshshay deꞌenna. Leemisuwawu, issoti issoti akeekanchcha gidana danddayoosona; harati qassi keehi xala gidana danddayoosona; amaridaageeti kehiyageeta, harati qassi keehi qarettiyageeta gidana danddayoosona. Hegaa bollikka, naaꞌꞌu kayma Kiristtaaneta issi mala paacee gakkiyo wode, eti kuuyiyobay dummatana danddayees; shin eta kuushshay Geeshsha Maxaafay yootiyo maaraara maayettiyaba gidana danddayees. Hegee kahaara gayttidaba. Hegaa gishshawu, eti kuuyiyobay dummatikkonne issoy issuwa bolli pirddokkona. Eti issippetettan deꞌoosona.—Roo. 14:10; 1 Qor. 1:10. w24.04 4 ¶7-8

Neeni nena ubbatoo pattenna asadan xeelliyaba gidikko waatana danddayay? Yihoowi nena xoqqu ootti xeelliyogaa yootiya xiqiseta nabbaba; yaatada wotta dentta qoppa. Nena haratuura geeddarssoppa; qassi neeni oottana danddayennabaa qoppoppa. Yihoowi neeni danddayiyogaappe aarobaa oottanaadan koyenna. (Maz. 103:13, 14) Issi uri nena qohikko hegee ne mooro gidenna. Yihoowa sinttan oyshettiyay mooranchchatappe attin, qohettidaageeta gidennaagaa hassaya. (1 Phe. 3:12) Yihoowi harata maaddanawu nena goꞌettana danddayiyogaa mule siroppa. Sabbakuwa oosuwan aara oottiyo gita maataa I neeyyo immiis. (1 Qor. 3:9) Ne deꞌuwan nena gakkidabay neeni haratuyyo qarettanaadaaninne etawu siyettiyabaa akeekanaadan maaddana danddayees. Neeni eta loytta maaddana danddayaasa. w24.10 7-8 ¶6-7

Yihoowi harati nuna suure oyqqanaadan koyees; qassi nuna harati naaqqiyo wode I hegaa akeekees. Ayssi giikko, I ‘likke pirddaa dosees.’ (Maz. 99:4) Bessiya wodiyan, Yihoowi nuuyyo ‘eesuwan suure pirddanaagaa’ Yesuusi yootiis. Qassi Yihoowi nuna waayissiya ubbabaa mata wode xayssidi, naaqoy haranttuwa nuna gakkennaadan oottana. (Maz. 72:1, 2) Yihoowi meto ubbaa xayssiyo wodiya nuuni naagana koshshees. Shin I ha wodiyankka harati naaqqiyo wode nuna maaddees. (2 Phe. 3:13) Harati nuna naaqqiyo wode nuuni eeyyabaa oottiyogaappe naagettanaadan I nuna tamaarissees. Naaqoy gakkido wode ba Naꞌay oottidobaa Geeshsha Maxaafan xaafissidoogee I yaatiyo issi oge. Qassi naaqoy nuna gakkiyo wode nuuni oottana danddayiyobaa xeelliyagan Geeshsha Maxaafaa baggaara nuna zorees. w24.11 2-3 ¶3-4

Asawu miyobaa immanaadan Yesuusi yootidoogee metiyaba; ayssi giikko, yan 5,000 gidiya attuma asay deꞌees. Hegaa bolli, macca asaanne naata gujjikko qumay koshshiyo asay 15,000 gidana danddayees. (Mat. 14:21) Inddiraasi hagaadan giis: “Banggaa komppota ichchashatanne qeeri moleta naaꞌꞌata oyqqida issi naꞌay hagan deꞌees. Shin ha cora asawu hagee waanidi gidanee?” (Yoh. 6:9) Banggaa komppoti hiyyeesatinne harati miyogeeta, qassi qeeri moleti maxiniyan gorppidi melissidoogeeta gidana danddayoosona. Gidikkonne, he naꞌawu deꞌiyabay daro asaa mule gakkenna! Yesuusi asawu kehatettaa bessanawu koyido gishshawu, eti citan citan maatan uttanaadan yootiis. (Mar. 6:39, 40; Yoh. 6:11-13) Yaatidi Yesuusi daabbuwanne moliya gishshawu ba Aawaa galatiis. Yaatiyogan I qumaa immiday Xoossaa gidiyogaanne hegawu A galatiyogaa bessiis. Nuuni qumaa maanaappe kase woossiyogan Yesuusa leemisuwa kaalliyogee keehi koshshiyaba. Hegaappe simmin Yesuusi qumaa gishiis; qassi asay miidi kalliis. w24.12 2-3 ¶3-4

Yesuusi saꞌan deꞌiyo wode, malaalissiya ba ooso ubbawu Pulttoy Yihoowa gidiyogaa yootiyogan ba Aawaa bonchchiis. (Mar. 5:18-20) Yesuusi ba Aawaabaa haasayidobaaninne harata oyqqido ogiyankka Yihoowa bonchchissiis. Issi wode, Yesuusi shiiqo keettan tamaarissishin, hegaa siyiya asatu giddon iita ayyaanay oyqqin 18 layttawu harggida issi maccaasiya deꞌawusu. He iita ayyaanay O quunissido gishshawu A mule sitti gaana danddayukku. Hegee keehi azzanttiyaba! Yesuusi he maccaaseessi qarettidi ikko shiiqidi keha qaalan iyyo, “Maccaasee ne harggiyappe paxadasa” yaagiis. Qassi I ba kushiya maccaasee bolli wottin A sohuwara sitti gaada “Xoossaa sabbiyogaa doommaasu.” A ba harggiyappe paxido gishshawu Yihoowa keehi galataasu! (Luq. 13:10-13) He maccaasiya Yihoowa bonchchidoogaadan, nuunikka Yihoowa bonchchiyo loꞌꞌo gaasoy deꞌees. w25.01 2-3 ¶3-4

Addaameppenne Hewanippe halida ubbabaa nuuni demmana danddayiyoo? Nu wolqqan demmana danddayokko. (Maz. 49:7-9) Maaddiyabi baynnan merinaa deꞌuwa demmiyo woy hayquwappe denddiyo hidooti nuussi baawa. Qassi nu hayqqoy mehiya doꞌaagaa mala gidana. (Era. 3:19; 2 PHe. 2:12) Nu siiqo Aaway Yihoowi nuuni Addaameppe laattido nagaraa acuwa qanxxanawu nuussi imotaa immiis. Hegaa Yesuusi hagaadan qonccissiis: “Xoossay saꞌan deꞌiya asaa keehi siiqido gishshawu, ba dumma Naꞌaa immiis; A Naꞌaa ammaniya ubbay merinaa deꞌuwa demmanaappe attin, xayenna mala I hegaadan oottiis.” (Yoh. 3:16) Ha imotay nuuni Yihoowara loytti dabbotanaadankka oottiis. Nuuni ha maalaaliya imotaappenne nu nagaray woy ‘acoy’ atto geetettiyogaappe goꞌettoos. w25.02 3 ¶3-6

Saaꞌooli haattan muukettanaadan maaddidabay aybee? Yesuusi saluwappe Saaꞌoola haasayissido wode pozhzhattiya pooꞌoy Saaꞌoola ayfiya qooqissiis. (Oos. 9:3-9) I heezzu gallassawu aynne mibeenna, woy uyibeenna; qassi I bana gakkidabaa wotti dentti qoppidoogee qoncce. Yaatidi Yesuusi Mase gidiyogaanne A kaalliyageeti tumu ammanuwa kaalliyogaa Saaꞌooli ammaniis. Nuuni Saaꞌoolappe tamaarana danddayiyo darobay deꞌees. Otoroy woy asawu yayyiyogee I haattan muukettennaadan diggana danddayees. Shin I hegee hananaadan eeno gibeenna. Saaꞌooli bana naaqoy gakkanaagaa erikkokka, Kiristtaane gidanawu eeno giis. (Oos. 9:15, 16; 20:22, 23) I haattan muuketti simmidikka, dumma dumma metuwa genccanaadan Yihoowi A maaddanaagaa ubbatoo ammanettiis. (2 Qor. 4:7-10) Neeni Yihoowa Markka gidanawu haattan muukettiyogee ammanuwa paaciya woy waayiya kaalettana danddayees; shin neeni maaduwa demmana. Xoossaynne Kiristtoosi aggennan nena maaddanaagaa ammanettana danddayaasa.—Pili. 4:13. w25.03 4 ¶8-9

Geeshsha Maxaafaa nabbabanawu halchchiyogee loꞌꞌoba. Shin nuuni Geeshsha Maxaafaa nabbabiyogan loytti goꞌettanawu koyikko, nabbabiyogaappe aarobaa oottana koshshees. Ha leemisuwa qoppa: Mittawu maatawu iray koshshees. Gidikkokka amarida wodiya giddon keehi wolqqaama iray bukkikko, biittay urqqatees. Hegaa mala wodiyan iray gujjidi bukkikko biittaa giddo gelenna gishshawu mokkiya doliyabawu maaddenna. Haattay biittaa giddo gelin mittay maatay loytti diccanaadan leddi giidi bukkiya iray loꞌꞌo. Hegaadankka, nuuni wotti dentti qoppana, hassayananne goꞌettana danddayenna hanotan Geeshsha Maxaafaa eesuwan nabbabana koshshenna. (Yaaq. 1:24) Neeni issi issitoo Geeshsha Maxaafaa eesuwan nabbabiyogaa akeekadii? Yaatikko neeni waatana koshshii? Leddi ga. Neeni nabbabaydda deꞌiyobaa woy nabbabaychchidobaa wotta dentta qoppanawu baaxeta. Neeni kaseegaappe aaruwan nabbabanawu wodiya bazzanawu kuuyikko, wotta dentta qoppanawukka goꞌettana danddayaasa. w24.09 4 ¶7-9

Dirijjitee cimatussi kaaletuwa immiyo wode eti hegaa loytti nabbabanawunne kaallanawu banttawu danddayettida ubbabaa oottana koshshees. Eti shiiqotun kifileta waati shiishshanaakko, qassi galchchawu waati woossanaakko xalla gidennan, Kiristtoosa dorssata waati heemmanaakkokka kaaletoy etawu imettees. Cimati dirijjitee immiyo kaaleto ubbaa kaalliyo wode, ishanttinne michchontti Yihoowi eta siiqiyogaanne etawu qoppiyogaa akeekoosona. Cimati nuuyyo kaaletuwa immiyo wode, nuuni hegaa eeno giidi kaallana koshshees. Yaatiyogan, aawatettay deꞌiyogeeti bantta oosuwa metootennan oottanaadan maaddoos. Nuuni aawatettay deꞌiyogeetussi azazettanaadaaninne haarettanaadan Geeshsha Maxaafay minttettees. (Ibr. 13:7, 17) Hegee issi issitoo metiyaba gidana danddayees. Aybissi? Eti nagaranchcha gidiyo gishshataassa. Gidikkonne, nuuni etawu deꞌiya loꞌꞌo eeshshan gidennan, ubbatoo eta iita eeshshan xeelaa wottikko, nu morkketa maaddoos. Nuuni hegaadan giyoy aybissee? Xoossay nuna ba dirijjitiya baggaara kaalettiyogaa siroos. w24.04 10 ¶11-12

Gita waayiya wode hayqqida asa ubbay dendduwa hidootay baynnan merinawu xayanee? Yihoowa eqettiya, qassi Armmageedoona olan Yihoowinne A olanchchati xayssido asati hayquwappe denddennaagaa Geeshsha Maxaafay geeshshidi yootees. (2 Tas. 1:6-10) Leemisuwawu, gita waayiya wode, sahuwa, woy cimatettaa gaasuwan, woy daafabay gakkin, woykko asi worin hayqqida harati waananee? (Era. 9:11; Zak. 14:13) Etappe amaridaageeti ooratta alamiyan hayquwappe denddiya ‘xillo gidenna asatuura’ denddanee? (Oos. 24:15) Nuuni erokko. Shin sinttanaabaa nuuni darobaa eroos. Leemisuwawu, Armmageedoona olaa wode asay Kiristtoosa ishanttussi oottidoban eta bolli pirddettanaagaa nuuni eroos. (Mat. 25:40) Tiyettidaageetuyyonne Kiristtoosawu exatiyogaa bessidaageeti dorssata geetettidi pirddettana.—Ajj. 12:17. w24.05 10-11 ¶9-11

Nuuni ‘keehi waayissiya wodiyan’ deꞌiyogaa Geeshsha Maxaafay yootees. (2 Xim. 3:1) Seexaanaa alamiyan deꞌiya ubba asaa gakkiya metoy nunakka gakkees. Qassi nuuni Yihoowawu haggaaziyo gishshawu yedetay nuna gakkees. Ha metoti deꞌishinkka nuuni Yihoowawu aggennan goynnanawu nuna aybi maaddanee? Hegawu maaddiya waannabay Yihoowi ‘deꞌo Xoossaa’ gidiyogaa eriyogaa. (Erm. 10:10; 2 Xim. 1:12) Yihoowi nuna gakkiya meto ubbaa beꞌees; qassi I ubbatoo nuna maaddanawu koyees. (2 Odi. 16:9; Maz. 23:4) Xoossay nuna siiqiyogaanne nuna maaddanawu ubbatoo giigi uttidoogaa hassayiyo wode nuna gakkiya ay metuwanne genccanawu wolqqaa demmana danddayoos. w24.06 20 ¶1-2

Nuuni Yihoowa dirijjitiyan ubbatoo ammanettana danddayoos. Kase nuuni akeekido issi Geeshsha Maxaafaa tumay woy nuuni Yihoowawu haggaaziyo ogiyara gayttidaagan issibay laamettana koshshiyogee qoncciyo wode, aawatettay deꞌiyogeeti giigissana koshshiyabaa laammanawu mammottokkona. Eti aybippenne aaruwan Yihoowa ufayssanawu koyiyo gishshawu hegaadan oottoosona. Qassi eti Yihoowa asa ubbay mintti kaallana koshshiyo, leemiso gidida Xoossaa Qaalaadan issibaa kuuyanawu banttawu danddayettida ubbabaa oottoosona. Kiitettida Phawuloosi, ‘Tumu qaalaa leemiso ootti oyqqite’ yaagidi zoriis. (2 Xim. 1:13) ‘Tumu qaalaa leemisoy’ Geeshsha Maxaafan odettida Kiristtaanetu timirttiya qonccissees. (Yoh. 17:17) Nu ammaniyo ubbabay he timirttiyara gayttidaba. Yihoowa dirijjitee he leemisuwa mintti kaallanaadan nuna tamaarissees. Nuunikka yaatiyo wode ubban ayyaanaaban naagettidi deꞌoos. w24.07 11-12 ¶12-13

Nagaran zilꞌꞌettidi laamettiyogeenne maarotaa demmiyogee aybi siyettanaadan oottiyakko Pheexiroosi akeekiis. Hegaa gishshawu, I hegaabaa harata tamaarissiis. Phenxxaqosxxe baalaappe amarida wodiyappe simmin, Pheexiroosi yan shiiqida daro Ayhudati Masee hayqqanaadan oottidoogaa qonccissiis. I eta hagaadan giidi minttettiis: “Xoossay intte nagaraa quccana mala, Yihoowi inttena gazddissiyo wodiya ehaanaadan zilꞌꞌettidi laamettite, qassi Xoossaakko simmite.” (Oos. 3:14, 15, 17, 19) Nagaranchcha asi zilꞌꞌettidi laamettiyogee I Xoossakko simmanaadan oottiyogaa Pheexiroosi tamaarissiis. Hegaa giyogee I iitabaa qoppiyogaanne oottiyogaa aggidi Xoossaa ufayssiyabaa oottiyogaa doommees giyogaa. Qassi Pheexiroosi Yihoowi eta nagaraa quccanaagaa woy xayssanaagaa yootiis. Nuuni nagaraa oottikko, ubba hegee gita nagara gidikkokka, nuuni zilꞌꞌettidi laamettiyo wode, Yihoowi nuuyyo muleera atto giyogaa eriyogee nuuni woppu gaanaadan oottees! w24.08 12 ¶14

Yihoowi mata wode ha iita alamiya xayssiyogaa nuuni mintti ammanikko daro miishshay woy aqoy keehi koshshiyabadan qoppokko. Gita waayiya wode, miishshay aynne maaddenna. Asati “GODAA hanqquwaa gallassi eta birainne eta worqqai eta ashshanau” danddayennaagaa eriyo gishshawu, eti bantta biraa ogiyan olanaagaa Geeshsha Maxaafay yootees. (Hiz. 7:19) Nuussi danddayettida keenan daro miishshaa shiishshanawu bichchaariyogaappe nuussinne nu soo asawu koshshiyabaa kunttanawunne Yihoowawu haggaazanawu maaddiyabaa kuuyana koshshees. Nuussi deꞌiya miishshaappe aaruwa kessiyogee woy nuussi deꞌiyabaa loyttiyogan daro wodiya wurssiyogee eeyyatetta. Nuuni aquwa xoqqu ootti xeellennaadankka naagettana koshshees. (Mat. 6:19, 24) Wodiya wurssettay mati mati biyo wode nuuni Yihoowan woy nu aquwan ammanettanawu doorana koshshees. w24.09 11 ¶13-14

Nuuni nu shugo miyyetuppe amaridaageeta muleera xoonana danddayoos. Shin, nuuni shugo gidido harabata xoonanawu adussa wodiyawu aggennan baaxetiyogee koshshana danddayees. Ane kiitettida Pheexiroosabaa beꞌoos. I asawu yayyidi heezzutoo Yesuusa kaddiis. (Mat. 26:69-75) Guyyeppe Pheexiroosi hegaadan yayyiyogaa aggidaba milatees; ayssi giikko, I Sanhediriniya sinttan Yesuusabaa xalatettan sabbakiis. (Oos. 5:27-29) Shin I amarida layttappe simmin, ‘qaxxarettidaageetuyyo yayyidi’ Ayhuda gidenna Kiristtaanetuura qumaa miyogaa aggiis. (Gal. 2:11, 12) Pheexiroosi zaarettidi asawu yayyiis. I asawu yayyiyogaa muleera aggibeennaba milatees. Hegaa malabay nunakka gakkana danddayees. Shin, Yesuusi “naagi uttite” giidi zorido zoriya kaalliyogan nuuni hanno gakkanawu xoonibeenna nu shugo miyyiya xoonana danddayoos. (Mat. 26:41) Nuuni mino gididabadan qoppiyo wodetunkka paacettanaadan oottiya hanotatuppe ubbatoo naagettana bessees. Nu shugo miyyiya xoonanaadan maaddidabata oottiyogaa aggana koshshenna.—2 Phe. 3:14. w24.07 18-19 ¶17-19

Harata maaddiyogan Yesuusaara likketiya asi baawa. I saꞌan deꞌiyo wode maalaalissiyabata oottiyogan harata maaddiis. (Luq. 9:12-17) I ba shemppuwa nu gishshawu aatti immiyogan ubbaappe aadhdhiya imotaa immiis. (Yoh. 15:13) Yesuusi hayquwappe denddi simmidikka nuna maaddiyogaa aggibeenna. I qaalaa gelidoogaadan, nuna tamaarissiyanne minttettiya geeshsha ayyaanaa immanaadan Yihoowa woossiis. (Yoh. 14:16, 17; 16:13) Yesuusi kumetta saꞌan deꞌiya asati A kaalliyageeta gidanaadan nuuni oottana mala galchchaa shiiqotu baggaara ubbatoo nuna maaddees. (Mat. 28:18-20) Yesuusi saluwa bi simmidi ‘attuma asata imota ootti immidoogaa’ Phawuloosi yootiis. (Efi. 4:7, 8, 11) Galchchaa dumma dumma ogetun maaddanaadan Yesuusi he asata immidoogaa Phawuloosi qonccissiis. (Efi. 1:22, 23; 4:11-13) He asati nagaranchcha gidiyo gishshawu baliyogee qoncce. (Yaaq. 3:2) Shin nu Goday Yesuus Kiristtoosi nuna maaddanawu eta imotadan immiis. w24.10 18 ¶1-2

Daawiti ba naꞌaa Solomonawu ubbabay injjetanay I Xoossaa Yihoowawu azazettiyo wode xalaala gidiyogaa yootiis. Shin Solomoni cimido wode worddo xoossatuyyo goynnidoogee azzanttiyaba. Yihoowi hegan azzaniis; qassi Solomoni asaa xillotettaaninne suure ogiyan haariyo aadhdhida eratettaa xayiis. (1 Kaw. 11:9, 10; 12:4) Nuuni hagaappe ay tamaariyoo? Azazettiyogee anjjuwa demissees. (Maz. 1:1-3) Yihoowi Solomonaagaa mala duretettaanne bonchchuwa immanawu nuussi qaalaa gelibeenna. Shin nuuni nu Xoossawu azazettikko, I nuna kaalettananne loꞌꞌobaa kuuyanaadan nuussi aadhdhida eratettaa immana. (Lee. 2:6, 7; Yaaq. 1:5) Yihoowi yootiyo zoree nuuni oosuwara, timirttiyara, miishshaaranne allaxxiyobaara gayttidaagan kuuyiyo wode nuna maaddana danddayees. Nuuni A zoriya kaallikko, aara dabbotido dabbotay moorettennaadan naagoos; qassi merinaa deꞌuwa demmana. (Lee. 2:10, 11) Nuuyyo loꞌꞌo laggeti deꞌana. Qassi nu soo asay ufayttana. w24.11 10-11 ¶11-12

Yelidaageeti Geeshsha Maxaafaabaa woy Xoossan ammaniyogaabaa ufayssiya ogiyan bantta naatuura haasayiyo daro injjeti deꞌoosona. Leemisuwawu, intte muuzemiya xomoosiyo wode, beni miishshati woy hanotati Geeshsha Maxaafaara waani gayttiyakko intte naata tamaarissana danddayeeta. Mooꞌaabetu Shuchchaa geetettiya 3,000 layttaa deꞌida shuchchaa bolli Xoossaa buzo sunttay deꞌiyogaa intte naati eriyonaa? Niwu Yorken, Warwiken Yihoowa Markkatu waanna biiruwan deꞌiya muuzemiyan “Geeshsha Maxaafaanne Xoossaa Sunttaa” giyo sohuwan Mooꞌaabetu Shuchchaa milatissidi giigissidobay deꞌees. Mooꞌaaba Kawoy Meeshi Israaꞌeela bolli makkalidoogee Mooꞌaabatu Shuchchan xaafettiis. Hegee Geeshsha Maxaafankka odettiis. (2 Kaw. 3:4, 5) Geeshsha Maxaafay yootiyobay tuma gidiyogaa bessiya naqaashaa intte naati akeekiyo wode eta ammanoy minnana. w24.12 14 ¶4; 15 ¶6