Laappune

Xillo asay guyyeppe xillo gidennan aggidoogaa yootiya Geeshsha Maxaafaa taariketi deꞌoosona. Hegeetuppe issoy Kawuwa Solomona. I Yihoowi oonakko, qassi Awu waati goynnana koshshiyakko erees; qassi Yihoowi A keehi anjjiis. Shin Solomoni guyyeppe eeqa xoossatussi goynniis. Hegee Yihoowa keehi hanqqetissiis; qassi Solomoni nagaraa oottido gishshawu Israaꞌeela asa ubbay daro xeetu layttawu tuggatiis. Solomoni hayqqido wode, ammanettida asa gidida Kawuwa Daawitaagaadan, ‘ba mayzzan gayttidoogaa’ Geeshsha Maxaafay yootees. (1 Kaw. 11:5-9, 43; 2 Kaw. 23:13) Shin I hegaadan moogettidogee I hayquwappe denddanaagaa bessiyabee? Geeshsha Maxaafay hegaabaa yootenna. Denddoy nu siiqo Xoossaa imota. Yihoowi bawu merinawu haggaazanaadan koyiyogeeta hayquwappe denttana. (Iyy. 14:13, 14; Yoh. 6:44) Solomonayyo he imotay imettanee? Yihoowi erees; nuuni erokko. Shin Yihoowi suurebaa oottanaagaa nuuni eroos. w24.05 4 ¶9

Nuuni nuna Yihoowawu sheedhdhiyo wode, A dunkkaaniyan imatta gidoos. Nuuni kumi palahiya ayyaanaa qumaa demmoosinne Yihoowa imatta gidida haratuura dabbotoos. A dunkkaanee issi heera xalaalan deꞌenna. Nuuni awan deꞌikkokka, Yihoowawu ammanettidi haggaazikko, A dunkkaaniyan deꞌiya imattata gidana danddayoos. (Ajj. 21:3) Ammanettidi hayqqidaageeti shin? Eti haꞌꞌikka Yihoowa dunkkaaniyan shoobettida imattee? Ee! Nuuni hegaadan giyoy aybissee? Yihoowa xeelan eti paxa deꞌiyo gishshataassa. Yesuusi hagaadan giis: “Muusee daran hanidabaa xaafidoban Yihoowa, ‘Abrahaama Xoossaa, Yisaaqa Xoossaa, qassi Yaaqooba Xoossaa’ giido wode, hayqqida asay denddanaagaa erissiis. Eti ubbay ayyo paxa deꞌiyo gishshawu, I paxa deꞌiyageetu Xoossaappe attin, hayqqidaageetu Xoossaa gidenna.”—Luq. 20:37, 38. w24.06 3 ¶6-7

Xaadooqi olaa miishshaa gixxidi olettanawu giigi uttiis. (1 Odi. 12:38) Olan Daawita maaddanawunne Israaꞌeela morkketa xoonanawu I keehi koyiis. Wotaaddara gididi olettiyo meezee Xaadooqawu waayi deꞌana. Shin I keehi xala asa. Kahine gidida Xaadooqi keehi xala gidiyogaa awuppe tamaaridee? I xalanne mino gidida daro attumaageeta erees. I etappe tamaaridoogee qoncce. Leemisuwawu, Daawiti xalatettan ‘Israaꞌeela asaa olawu kaalettidoogee’ Israaꞌeelati ubbay A wozanappe kaafanaadan denttettiis. (1 Odi. 11:1, 2) Daawiti ba morkketuura olettiyo wode Yihoowa maaduwan ubbatoo ammanettiis. (Maz. 138:3) Leemisuwawu, Xaadooqi Yoodaaheppenne olanchcha gidida A naꞌaa Banaayappe, qassi Daawita maaddida hara 22 halaqatuppe xala gidiyogaa tamaariis.—1 Odi. 11:22-25; 12:26-28. w24.07 3 ¶5-6

Phawuloosi Kiristtoosa kaalliyageeta daro barchchiya bessiis. Daro Kiristtaaneti I mule laamettana danddayenna giidi qoppennan aggokkona. Shin Phawuloosi zilꞌꞌettidi laamettana danddayiyogaa Yesuusi eriis. Inne A Aaway Phawuloosawu deꞌiya loꞌꞌo eeshshaa xeellidosona. Yesuusi, “Ha bitanee . . . taani doorido miishsha” yaagiis. (Oos. 9:15) Zilꞌꞌettidi laamettanaadan Phawuloosa maaddanawu Yesuusi maalaalissiyabaa oottiis. (Oos. 7:58–8:3; 9:1-9, 17-20) Phawuloosi zilꞌꞌetti laamettidi Kiristtaane gidiis. Kiitettidaagaa gididi oottiyo aawatettaa Yesuusi awu immiis. Phawuloosi Yihoowinne Yesuusi awu bessido kehatettaanne maarotaa keehi nashshiyogaa darotoo yootiis. (1 Xim. 1:12-15) Qoronttoosa galchchan deꞌiyageeti shaaramuxiya issi uri bantta galchchan deꞌanaadan eeno giidoogaa Phawuloosi issi wode siyiis. Phawuloosi eti waatanaadan yootidee? Yihoowi ba ashkkarata seeriyo wode siiquwa waati bessiyakko, qassi eti zilꞌꞌettidi laamettiyo wode maarotaa eta waati bessiyakko Phawuloosi giidobaappe akeekana danddayoos. w24.08 13 ¶15-16

Yihoowi nagaranchcha asay banaara dabbotana danddayiyo ogiya leddan leddan loytti qonccissiis. Edenen makkalay denddi simmin Yihoowan ammaniyogaa bessida koyro asi Addaamessinne Hewanissi naaꞌꞌantto naꞌa gidida Aabeela. Aabeeli Yihoowa siiqidi A ufayssanawunne aara dabbotanawu koyido gishshawu yarshshuwa shiishshiis. Aabeeli henttanchcha gidiyo gishshawu ba dorssa wudiya giddon bayra yelettida maratuppe amaridaagaa shukkidi Yihoowawu yarshsho oottidi shiishshiis. Yihoowi waatidee? I, “Aabeelanne a yarshshuwaa ekkiis.” (Doo. 4:4) Yihoowi A siiqiyanne an ammanettiya harati, hegeekka Nohe mala asati shiishshido yarshshuwa ufayttidi ekkiis. (Doo. 8:20, 21) Yihoowi hegaa mala yarshshota ekkiyogan, nagaranchcha asay an sabettananne aara dabbotana danddayiyogaa bessiis. w24.08 3 ¶5-6

Naaqoy gakkiyo wode nuuni keehi azzanananne unꞌꞌettana danddayoos. (Era. 7:7) Iyyoobanne Imbbaqooma mala ammanettida ashkkaratuyyokka hegaadan siyettiis. (Iyy. 6:2, 3; Imb. 1:1-3) Hegaadan siyettiyogee wottin deꞌiyaba gidikkokka, nuuni eeyyabaa oottennaadaaninne hanotay yaa iitennaadan naagettana koshshees. Harata naaqqiyageeti qaxxayettennaba milatiyo wode, nuuni likkebaa oottiyogee aynne maaddenna giidi qoppana danddayoos. Iitati loꞌꞌo asata naaqqiiddi injje deꞌuwa deꞌiyaba milatiyogaa beꞌida mazamuraawiya hanotaa qoppa. I hagaadan giis: “Iitati hagaa mala; eti ubbatonkka injjetin de7oosona.” (Maz. 73:12) Naaquwan I keehi azzaniisinne Yihoowawu haggaaziyogee aynne maaddennabadan qoppiis. I hagaadan giis: “Taani ha ubba yohuwaa eranau qoppiyo wode, taayyo erettenna deexobaa gidiis.”—Maz. 73:14, 16. w24.11 3 ¶5-7

Yihoowi malaalissiya Xoossaa gidiyo gishshawu A bonchchoos. Yihoowi ubbaa danddayiyagaa; A wolqqawu zawi baawa. (Maz. 96:4-7) A gita hayyoy I oottidobatun qoncci beettees. I nu deꞌuwawu Pultto, qassi nu deꞌuwawu koshshiyabaa kunttiyay A. (Ajj. 4:11) I ammanettiyagaa. (2 Sam. 22:26) Ubbabay awu hanees; I ba gelido qaalaa naagees. (Yaa. 23:14) Xoossay erissidobaa yootiya Ermmaasi, “aadhdhida eranchcha asaa giddooninne eta kawotettaa ubbaa giddon ne mali baawa” yaagidoy hegaassa. (Erm. 10:6, 7) Nuunikka saluwan deꞌiya nu Aawaa bonchchiyo loꞌꞌo gaasoy deꞌees. Shin nuuni Yihoowa bochchiyogaa xalla gidennan, A siiqoos. Nuuni A wozanappe siiqanaadan oottiya loꞌꞌo eeshshati awu deꞌoosona. Qassi nuuni ubbay Yihoowa wozanappe siiqiyo gishshawu A bonchchoos. w25.01 3 ¶5-6

Xoossaa morkketi Yihoowa dirijjitee oottiyo loꞌꞌobaa iita milatissanawu baaxetoosona. Leemisuwawu, Yihoowi nu bollaynne nu kanddoy geeshsha gidanaadan, qassi A ufayssiya ogiyan awu goynnanaadan koyiyogaa nuuni Geeshsha Maxaafaappe tamaarida. Iitabaa oottiyanne ba eeshshaa laammana koyenna ooninne galchchaa yame gididi deꞌana danddayennaagaa I yootiis. (1 Qor. 5:11-12; 6:9, 10) Nuuni Geeshsha Maxaafay yootiyo he azazuwa azazettoos. Shin nu he azazuwa azazettiyo gishshawu, nuuni asaa dosennabadan, boriyabadan, qassi nuuppe dummatiyageeta ixxiyabadan nu morkketi yootoosona. Nuuni nu dirijjitiya qohiyay oonakkonne akeekana bessees. Nu dirijjitiya xeelliyagan Dabloosi worddobaa yootees. I ‘wordduwawu aawa.’ (Yoh. 8:44; Doo. 3:1-5) Yaatiyo gishshawu, Seexaanay amarida asaa baggaara Yihoowa dirijjitiyabaa wordduwa aassanaagaa nuuni naagana koshshees. w24.04 10-11 ¶13-14

Gita waayee doommi simminkka, ‘Gita Baabilooni’ xayuwa beꞌiya amaridaageeti Yihoowa Markkati hegee hananaagaa daro layttawu yootiiddi takkidoogaa hassayana danddayoosona. Gita waayiya wode, ‘Gita Baabilooni’ xayuwa beꞌiya amaridaageeti Yihoowa ammananee? (Ajj. 17:5) Hegaadan gidikko, Muuse wode Gibxxen hanidabaara hegee issi mala gidana. Israaꞌeelati Gibxxeppe kiyiyo wode “hara daro asai” etaara kiyidoogaa hassaya. Muusee yootido Tammu Boshay polettidoogaa eti beꞌido wode etappe amaridaageeti Yihoowa ammaniyogaa doommennan aggokkona. (Kes. 12:38) Gita Baabloona xaya simmin hegaa malabay hanikko, Armmageedoona olay doommanaappe guuttaa kasetidi asay nunaara walahettiyogee likke gidenna giidi nuuni qoppanee? Qoppennaagee qoncce! ‘Qaretaynne maarotay kumido, danddayanchchaa, aggenna siiqoy daridonne daro ammanettiya’ Xoossaa gidida saluwan deꞌiya nu Aawaa milatanawu koyoos.—Kes. 34:6. w24.05 11 ¶12-13

Nuuni ‘tumu qaalaa leemisuwa’ kaalliyogaa aggikko, nuna gakkanabay aybee? Issi hanotaa beꞌa. Koyro xeetu layttan, issi issi Kiristtaaneti Yihoowa gallassay gakkidoogaa xeelliyagan worddo oduwa aassidosona. Issi dabddaabbee gakkin, hagaadan giidi xaafiday kiitettida Phawuloosa giidi asay qoppiis. Tasalonqqen deꞌiya issi issi Kiristtaaneti hegaabaa shaakkidi eranawu wodiya bazzennan he wordduwa ammanidosonanne hegaabaa haratussi yootidosona. Phawuloosi etaara deꞌiyo wode tamaarissidobaa hassayiyakko eti cimettokkona. (2 Tas. 2:1-5) Phawuloosi ba ishantti siyido ubbabaa ammanennaadan zoriis. Qassi Phawuloosi sinttanawu eti naagettanaadan maaddanawu Tasalonqqen deꞌiyageetuyyo xaafido naaꞌꞌantto dabddaabbiyan hagaadan giidi kuuyiis: “Taani PHauloosi, ha kiitaa ta kushiyan xaafaas; ta kiita ubbau malaatai hagaa. Taani hagaadan xaafais.”—2 Tas. 3:17. w24.07 12 ¶13-14

Yihudan deꞌiya Kiristtaaneti matan eta waayee gakkiyo gishshawu eti Yihoowawu ammanettidi haggaazana koshshiis. Etappe darota wolqqaama yedetay gakkikkokka, guyyeppe sarotettay deꞌiyo wodiyan daroti Kiristtaane gididosona. Hegaa ishshawu, hegaappe aadhdhiya yedetawu giigettanaadaaninne Yesuusaagaadan hayqqana gakkanaashin ammanettanawu giigettana mala kiitettida Phawuloosi eta hassayissiis. (Ibr. 12:4) Shin Kiristtaane haymaanootee aakkido gishshawu daro Ayhudati eta bolli hanqqettidosonanne meqettaa iitidosona. Amarida layttaappe kase, Ayhuda gidida 40ppe dariya asati “Phawuloosa worennan aybanne mookko woy uyokko giidi massammidosonanne caaqqidosona.” (Oos. 22:22; 23:12-14) Kiristtaaneta harati ixxiyabanne yedettiyaba gidikkokka eti goynnanawu issippe shiiqana, mishiraachchuwa sabbakananne bantta ammanuwa ubbatoo minttana koshshiis. w24.09 12 ¶15

Yohaannisi Yesuus Kiristtoosawu mata laggenne kiitettidaagaa. (Mat. 10:2) Yohaannisi Yesuusaara daro wodiyawu sabbakiisinne malaalissiyabata Yesuusi oottiyo wode beꞌiis. Qassi waayissiya wodetun Yesuusawu ammanettiis. Asay Yesuusa woriyo wodekka, qassi Yesuusi hayquwappe denddi simminkka I beꞌiis. Kiristtaane galchchay aakki aakki biyo wodekka beꞌiis. Qassi I mishiraachchoy ‘saꞌan deꞌiya mereta ubbawu odettiyogaa’ beꞌiis. (Qol. 1:23) Yohaannisi keehi cimido wodiyan ayyaanay kaalettin Xoossaa Qaalaa xaafiyo maataa demmiis. ‘Yesuus Kiristtoosi qonccissido malaalissiya ajjuutaa’ xaafiis. (Ajj. 1:1) Yohaannisi ba sunttan xeesettiya Wonggeliyakka xaafiis. Qassi I, ayyaanay denttettin heezzu dabddaabbeta xaafiis. Yohaannisi ba heezzantto dabddaabbiya ba naꞌadan siiqiyo, ammanettida Kiristtaane gidida Gaayosassi xaafiis. (3 Yoh. 1) Cimida, ha ammanettida izaawu xaafidobay Yesuusa kaalliyageeta ubbaa nu wodiyankka minttettees. w24.11 12 ¶15-16

Siiqiya azinay ba machchiyo xoqqu ootti xeelleesinne nashshees. I Yihoowappe imettida alꞌꞌo imotadan O xeellees. (Lee. 18:22; 31:10) Hegaa gishshawu, mattumaa gayttiyo wodiyankka iyyo keheesinne O bonchchees. Eti mattumaa gayttiyo wode O ufayssennabaa, yeellayiyabaa woy I kahaa qumꞌꞌiya aybanne oottanaadan iisettenna. Yihoowa sinttan awukka geeshsha kahay deꞌanaadan I baaxetees. (Oos. 24:16) Azinatoo, intte haasayiyonne oottiyo ubbaban intte machchota siiqanawunne bonchchanawu baaxetiyogaa Yihoowi beꞌidi ufayttiyogaa ammanettana danddayeeta. Intte machchota qohiya aybanne oottennan aggiyogan, etawu kehiyogan, qoppiyogaaninne eta keehi dosiyogan eta bonchchanawu murttidaageeta gidite. Yaatiyogan, eta siiqiyogaanne nashshiyogaa besseeta. Intte machchota bonchchitenne siiqite; qassi intte Yihoowara dabbotido aybippenne aadhdhiya intte dabbotaa naagite.—Maz. 25:14. w25.01 13 ¶17-18

Banttana Kiristtaane giyageetuppe Yihoowa ashkkarata dumma oottiya issibay yeemuwan sabbakiyogaa. Sabbakiyo oosuwan yeemottiyogaa aggennaadan, ubba qassi hegaa yaa gujjanaadan nuna aybi maaddana danddayii? Sabbakiyo oosuwa waani yeemuwan oottanaakko Yesuusappe tamaarana danddayoos. Yesuusi saꞌan deꞌiyo wode asawu minnidi sabbakiyogaa aggibeenna. I saꞌan haggaazido wurssetta heeran keehi minni oottiis. Balasiya mittaa dichchanawu heezzu layttaa baaxetikkonne ayba ayfenne demmibeenna woyne gadiyan oottiya bitaniyagaadan Yesuusikka Ayhudatussi heezzu layttaa gidiyagawu sabbakikkokka, etappe daroti A kaalliyageeta gidibookkona. Gidikkonne, woyne gadiyan oottiya bitanee balasiyan hidootaa qanxxibeennaagadan Yesuusikka asan hidootaa qanxxibeenna woy yeemottidi haggaaziyogaa aggibeenna. (Luq. 13:6-9) Yesuusi tamaarissidobaappenne I oottidobaappe tamaariyaba gidikko, ubbatoo yeemuwan sabbakana danddayoos. w25.03 14-15 ¶1-4

Issi uri neeyyo loꞌꞌo aqo lagge gidiyabadan neeni qoppikko shin? Neeni A siiqiyogaa sohuwara yootana koshshii? Geeshsha Maxaafay yootiyogaadan, akeekanchcha uri issibaa oottanaappe kase hegaabaa erees. Yaaniyo gishshawu neeni A siiqiyogaa yootanaappe kase, amarida wodiyawu he uraabaa eranawu baaxetiyogee loꞌꞌo. Neeni issi uraa siiqiyogaa awu yootennan abaa waata erana danddayay? Galchchaa shiiqotun woy issippe wodiya aattiyosan he uri ayyaanaaban, eeshshaaninne kandduwan ay malakko akeekana danddayaasa. A laggeti oonee, qassi I haasayanawu dosiyobay aybee? (Luq. 6:45) A halchchoy neegaara issi malee? A loytti eriya A galchchaa cimata woy hara kayma Kiristtaaneta abaa oychchana danddayaasa. (Lee. 20:18) Ayyo ay mala sunttaynne eeshshay deꞌiyakko oychchana danddayaasa. (Uru. 2:11) Neeni abaa eranawu baaxetiyo wode A yeellayennaadan naagetta. A qofaa bonchcha; qassi abaa ubbabaa eranawu baaxetoppa. w24.05 22 ¶7-8

Cimati nagaraa oottida uri ba qofaanne ba oosuwa laammanawu koyenna giidi sohuwara kuuyokkona. Issoti issoti cimatuura koyro gayttiyo wode bantta nagaran zilꞌꞌettidi laamettana danddayoosona; shin haratussi daro wodee koshshana danddayees. Hegaa gishshawu cimati nagaraa oottida uraara darotoo gayttanawu hanotaa giigissana danddayoosona. Nagaraa oottida issi Kiristtaanee cimatuura koyro gaytti simmidi eti awu yootidobata loytti qoppana danddayees. I bana ziqqi oottidi Yihoowi A nagaraa atto gaanaadan oychchana danddayees. (Maz. 38:18) Hegaa gishshawu, nagaraa oottida uray koyro gayttiyo wode bessido eeshshaappe dummatiya eeshshaa naaꞌꞌantto gayttiyo wode bessana danddayees. Cimati nagaraa oottida uri ba nagaran zilꞌꞌettidi laamettana mala maaddanawu he urawu qarettananne kehana koshshees. Cimati Yihoowi eta baaxiya anjjanaadan woossoosona; qassi bantta ishay ba balaa akeekidi ba nagaran zilꞌꞌettidi laamettanaagaa hidootoosona.—2 Xim. 2:25, 26. w24.08 22-23 ¶12-13

Yihoowi ooninne xayanaadan koyenna! I nagaranchchati aara sigettanaadan koyees. (2 Qor. 5:20) Yihoowi baayyo haggaaziyogaa aggida ba ashkkarati bantta nagaran zilꞌꞌettidi laamettanaadaaninne baakko simmanaadan ubbatoo minttettiyoy hegaassa. Cimati gita nagaraa oottidaageeti bantta nagaran zilꞌꞌettidi laamettanaadan maaddiyogan Yihoowara oottoosona. (Roo. 2:4; 1 Qor. 3:9) Nagaraa oottidaageeti bantta nagaran zilꞌꞌettidi laamettiyo wode, saluwan deꞌiyageeti ay keena ufayttiyakko qoppa! Saluwan deꞌiya nu Aaway bayida dorssay galchchawu simmiyo wode ubban keehi ufayttees. Nuuni Yihoowa qaretaa, A maarotaanne laggetiyabi baynna A kehatettaa wotti dentti qoppiyogee nuuni kaseegaappe aaruwan A siiqanaadan oottees.—Luq. 1:78. w24.08 31 ¶16-17

Yesuusi asay A kowyanaadan eeno giidaba gidiiyakko, he wode Roomati haariyo Ayhudatuyyo exatana. I sohuwara ‘deriyakko’ baqatiis. Harati A minttettikkonne, I polotikaaban oossinne exatibeenna. Nuuni hagaappe gitabaa tamaaroos! Malaalissiya ogiyan daro qumaa giigissanaadan, sahettidaageeta pattanaadan woy kawo gidanaadan asay nuna oychchennan aggana danddayees. Shin eti loꞌꞌo kawo gidana giidi qoppiyo ura nuuni dooranaadan woy kaafanaadan ammanttanawu malana danddayoosona. Shin, Yesuusi nuussi loꞌꞌo leemiso. I polotikaa allaalletun gelibeenna; ubba guyyeppe hagaadan giis: “Ta Kawotettay ha saꞌaa kawotettatu mala gidenna.” (Yoh. 17:14; 18:36) Nuuni Kiristtaane gidiyo gishshawu nu qoppiyobaynne nu oottiyobay Yesuusaagaa mala gidana koshshees. Nuuni Xoossaa Kawotettawu exatoos, abaa markkattoosinne he Kawotettay yaanaadan woossoos.—Mat. 6:10. w24.12 4 ¶5-6

Neeni xannaꞌiyo wode, eridobata waata oosuwan peeshshana danddayiyakko qoppa. Leemisuwawu, neeni asa ubbaa issi ayfiyan xeelliyogan suure pirddiya Yihoowa milata. Keehi waayissiya wodetunkka Yihoowi koyiyobaa oottanawunne harata maaddanawu eeno giyogan ba Aawaanne harata siiqiya Yesuusa leemisuwa kaalla. Qassi alꞌꞌo gidida Yihoowa imotaa haratikka eriyo injjiya demmanaadan sabbakiyogan Yesuusa leemisuwa kaalla. Nuuni wozuwabaa aggennan tamaariyo wode Yihoowanne A Naꞌaa kaseegaappe aaruwan siiqana. Qassi etikka nuna loytti siiqana. (Yaaq. 4:8) Simi yaakko, Geeshsha Maxaafaanne nu dirijjitee giigissiyo xuufeta goꞌettiyogan wozuwabaa aggennan tamaariyageeta gidoos. w25.01 25 ¶16-17

Hachchi xiqisee zilꞌꞌettidi laamettidaageetu nagaraa Yihoowi haassidi oleesinne hegaa zaarettidi beꞌenna geetettana danddayees. Ha qofay hagaadankka geetettana danddayees: “Taani [nagaraa] mule oottabeennabadan neeni xeelladasa.” Nuuni Geeshsha Maxaafan Mikiyaasa 7:18, 19n odettida hara leemisuwankka hegaa mala qofaa demmana danddayoos. Ha xiqisee Yihoowi nu nagaraa abbaa ciimman oliyogaa yootees. Beni wode abbaa ciimman olettidabay zaarettidi beettenna. Yihoowi nuussi atto giyo wode nu nagaraa toohuwappe nuna shemppissiyogaa he leemisotuppe akeekida. Daawiti giidobay tuma, “Eti oottido iitabay atto geetettidonne eta nagaray kamettido asati ufayttoosona.” (Roo. 4:7) Tumuppe atto giyogee hagaa! w25.02 9 ¶7-8

Ha wodiyan loꞌꞌobaa ubbatoo oottiya asan kumida leemiso gannatee ha saꞌan deꞌees. Hegan daro miiloone asay tumu sarotettan deꞌees. He gannatiyan deꞌiyageeti yaappe mule kiyennan agganawu murttidosona. Qassi eti daro asay hegawu yaanaadan koyoosona. Hegee aybee? Ayyaanaa gannatiya! Asay issoy issuwa ixxiyo, iitabaynne qohiyabay kumido Seexaana alamiyan Yihoowa asay deꞌikkokka, sarotettaaninne issippetettan deꞌiyo sohuwa Yihoowi leemiso hanotan giigissidoogee malaalissiyaba. (1 Yoh. 5:19; Ajj. 12:12) Nu siiqo Xoossay ha alamee asaa keehi qohiyogaa akeekeesinne ba ashkkarati baassi ufayssan ubbatoo haggaazana mala eti woppu gaanaadan oottees. Ayyaanaa gannatee ‘baqati attiyo sohonne’ “haattaa ushshiyo gannatiyaa” mala gidiyogaa A Qaalay yootees. (Isi. 4:6; 58:11) Ha gannatiyan deꞌiyageeta Yihoowi anjjiyo gishshawu, eti ha waayissiya gallassatun ufayssan woppu giidi deꞌoosona.—Isi. 54:14; 2 Xim. 3:1. w24.04 20 ¶1-2

Neeni aqo oyqqanawu koyikko, hegaa xeelliyagan Yihoowa woossidoogee qoncce. Yihoowi ba ashkkarati aqo lagge demmanaagaa qaalaa gelibeennaagee tuma. Shin I neessi koshshiyabaa kuntteesinne neeyyo siyettiyabaa akeekees; qassi neeni aqo lagge demmanawu koyiyo wode nena maaddana danddayees. Yaatiyo gishshawu neeni koyiyobaanne neeyyo siyettiyabaa ubbatoo awu yoota. (Maz. 62:8) Danddayanchcha gidanawunne aadhdhida eratettaa demmanawu woossa. (Yaaq. 1:5) Neeni loꞌꞌo aqo laggiya sohuwara demmana xayikkokka, Yihoowi nena maaddanawu qaalaa geliis; qassi I nena siiqeesinne neessi qoppees. (Maz. 55:22) Shin aqo laggiya koyiyogee ne deꞌuwan aybippenne aaruwan keehi koshshiyaba gidenna mala naagetta. (Pili. 1:10) Tumuppe ufayttanaadan oottiyabay Yihoowara neeni dabbotiyogaappe attin, aqo oyqqiyogaa woy oyqqennan aggiyogaa gidenna. (Mat. 5:3) Qassi neeni aqo oyqqennan takkiyo wodiyan ne haggaazuwa aassanawu injjiya demmaasa. (1 Qor. 7:32, 33) He wodiya akeekan goꞌetta. w24.05 21 ¶4; 22 ¶6

Aqo oyqqanawu qoppidi aattiyo wodee ay keena gidana koshshii? Eesuwan kuuyiyobay iitabaa kaalettana danddayees. (Lee. 21:5) Yaaniyo gishshawu intte issoy issuwa loytti eranawu adussa wodiya issippe aattana koshshees. Shin intte bessiyagaappe aaro wodiya takkana koshshenna. Geeshsha Maxaafay hagaadan gees: “Koyiyoobai polettennan gam77iyoogee azzanissees.” (Lee. 13:12) Aqo oyqqanawu qoppidi wodiya aattiyageeta harati waati maaddana danddayiyonaa? Nuuni etaara qumaa maanawu, so asaa goynuwawu, woy allaxxanawu shoobbana danddayoos. (Roo. 12:13) Issisaa etaara biyogan, kaamiyan eta efiyogan, woy eti issoy issuwara haasayanaadan eta intte soo efiyogan maaddana danddayeta. (Gal. 6:10) Aqo oyqqanawu qoppidi wodiya aattiyageeti neeni etaara gidanaadan oychchikko, ne hegaa ne laggeta maaddiyo maatadan qoppana danddayaasa. Asi baynna sohuwan eti banttarkka takkanaadan neeni mule oottana koshshenna; shin eti bantta buzo allaalliyabaa haasayanaadan hanotaa injjeya. w24.05 30 ¶13-14

Cimati issi uri nagaran gelanaappe kase oottidobata eranawu baaxetoosona. Leemisuwawu, Yihoowara dabbotido dabbotay shugganaadan oottidabay aybee? I ubbatoo Geeshsha Maxaafaa xannaꞌiyogaa, woy haggaaziyogaa aggidee? I ubbatoo Yihoowa woossiyogaa aggidee? I iita amota eqettanawu baaxetiyogaa aggidee? I oonaara wodiya aattii, woy allaxxanawu dooriyobay aybee? I dooriyobati I ay qoppanaadaaninne koyanaadan oottidonaa? Mata wode I kuuyidobaaninne oottidoban A Aaway Yihoowi ay keena azzanidaakko akeekii? He uri Yihoowara dabbotido dabbotay shugganaadan oottidabatanne nagaraa oottanaadan gaaso gididabata qoppanaadan maaddanawu cimati oyshata oychchana danddayoosona. Cimati kehatettan hegaadan oottoosona; qassi eti erana koshshenna buzo allaalliya oychchokkona. (Lee. 20:5) Hegaa bollikka, cimati he uri oottidobay bala gidiyogaa I qoppanaadaaninne akeekanaadan maaddanawu eti leemisuwa goꞌettana danddayoosona. Eti nagaraa oottida uraara koyro gayttiyo wode, I ba oottidoban keehi azzanana danddayees. I ba nagaran zilꞌꞌettidi laamettana danddayees. w24.08 22 ¶9-11

“Kawotettaa mishiraachchuwa” Yesuusi yeemuwan sabbakiis; ayssi giikko, hegee I oottanaadan Xoossay koyiyoba gidiyogaa eriis. Yesuusi ba deꞌuwan aybippenne aaruwan haggaazuwa kaseyiis. Yesuusi saꞌan haggaazido wurssetta amarida aginatunkka “gita katamatunne guutta katamatu ubban” harata biidi tamaarissiis. (Luq. 13:22) Aagaadan mishiraachchuwa sabbakanaadan bana kaalliya haratakka I loohissiis. (Luq. 10:1) Ha wodiyankka, Yihoowinne Yesuusi nuuni oottanaadan koyiyo waannabay mishiraachchuwa sabbakiyogaa. (Mat. 24:14; 28:19, 20) Asaa Yihoowagaadan xeelliyogan kaseegaappe aaruwan yeemuwan haggaazana danddayoos. Yihoowi danddayettida keenan daro asay mishiraachchuwa siyidi ammananaadan koyees. (1 Xim. 2:3, 4) Hegaa gishshawu, ha shemppo ashshiya kiitaa yootiyogan nuuni kaseegaappe aaruwan qara gidanaadan I nuna loohissees. Asay haꞌꞌi Yihoowawu haggaaziyogaa doommana xayikkokka, gita waayiya wurssettappe kase eti Yihoowawu haggaaziyo injjiya demmana danddayoosona. w25.03 15-16 ¶5-7

Galchchaappe kessido uraa hanotaara gayttidaagan issi uri Geeshsha Maxaafaa maaran loohida ba kahaa goꞌettana bessees. Issoti issoti I shiiquwa yiyo wode sarotanawu woy hashshu saro yaadasa gaanawu koyana danddayoosona. Shin he uraara nuuni darobaa haasayana woy wodiya aattana koshshenna. Gita nagaraa oottida amaridaageeta nuuni sarotana koshshennaagaa Geeshsha Maxaafay yootees. Nuuni hegaa mala ura sarotikko A ‘iita oosuwan aara hashetoos.’ (2 Yoh. 9-11) Shin ha xiqisiya yuushuwan deꞌiya qofay he uri kaddidaagaa woy Geeshsha Maxaafay bala giidi yootiyobaa harati oottanaadan ammanttanawu baaxetiyagaa gidiyogaa qonccissees. (Ajj. 2:20) Hegaa gishshawu, issi uri kaddidaageetu timirttiya woy hara iita oosota aassiyagaa gidikko, cimati A oychchanawu bookkona. Gidikkonne, he uri ba nagaran zilꞌꞌettidi laamettana danddayees. Shin hegaa mala uri ba nagaran zilꞌꞌettidi laamettana gakkanaashin nuuni A sarotokko woy galchchaa shiiquwa yaanaadan shoobbokko. w24.08 30-31 ¶14-15

Yesuusi cora asaa mizi simmin I kiittidoogeeti wolwoluwan Qifirinaahooma simmidosona; qassi asay A kawo oottenna mala I deriya biis. (Yoh. 6:16-20) Kiitettidaageeti wolwoluwan biishin wolqqaama carkkoy carkkin abbay balbbuqettiis. He wode Yesuusi haattaa bollaara hemettiiddi etakko yiis. Qassi kiitettida Pheexiroosikka haattaa bollaara hemettanaadan I shoobbiis. (Mat. 14:22-31) Yesuusi wolwoluwan gelosaara carkkoy woppu giis. A kaalliyageeti malaalettidi, “Neeni tumuppe Xoossaa Naꞌaa” yaagidosona. (Mat. 14:33) Yesuusa kaalliyageeti I daabbuwa malaalissiya ogiyan giigissi simmin gidennan, I haattaa bollaara hemetti simmin hegaadan giidoogee garamissiyaba. Marqqoosi he taarikiyabaa yootiiddi hagaadan giis: “[Kiitettidaageeti] keehi malaalettidosona; ayssi giikko, eti Yesuusi daabbuwan oottidobay keehi koshshiyaba gidiyogaa eribookkona.” (Mar. 6:50-52) Daabbuwa giigissiyogaappe aadhdhiya wolqqaa Yihoowi Yesuusawu immidoogaa kiitettidaageeti akeekibookkona. w24.12 5 ¶7

Nuuni Yihoowa siiquwa nashshiyogaa bessana danddayiyo hara ogee, wozuwa gishshawu Yihoowa keehi galatiyogaa bessanawu Hassayuwa Baalaa bonchchanaappe kasenne bonchchi simmin deꞌiya saaminttatun nuussi danddayettida ubbabaa oottiyogaa. Nuuni Hassayuwa Baalaa bonchchanawu halchchiyogaa xalla gidennan, haratakka shoobbana danddayoos. Hassayuwa Baalan oosettiyabaa neeni shoobbiyogeetussi qonccissa. Yesuusi Hayqqidoy Aybissee? qassi Yesuusa Hayquwaa Hassaya giya biidota jw.org saytiyappe eta bessiyogee nena maaddana danddayees. Cimati ayyaanaaban shuggidaageeta shoobbiyogaa dogana bessenna. Bayida Yihoowa dorssatuppe amaridaageeti A wudiyakko simmikko saluwaninne saꞌan deꞌiyageeti ay keena ufayttanaakko qoppa! (Luq. 15:4-7) Hassayuwa Baalan nuuni issoy issuwa sarotiyogaa xalla gidennan, oorattata woy adussa wodiyawu nunaara shiiqiyogaa aggidaageetakka sarotanawu baaxetoos. Eti yiidoogan nuuni ufayttiyogaa bessanawu koyoos!—Roo. 12:13. w25.01 29 ¶15

Yesuusi nu gishshawu hayqqanaadan Yihoowi kiittanaadan denttettida hara waannatiya eeshshay I nuna siiqiyo siiquwa. (Yoh. 3:16; 1 Yoh. 4:9, 10) Yihoowi nuuni merinawu deꞌanaadan xalla gidennan, A soo asa gidanaadankka koyiyogaa wozuwappe akeekoos. Ane hagaa qoppa: Addaamee nagaraa oottido wode Yihoowi bawu goynniya ba soo asaa giddoppe A kessiis. Nuuni ubbaykka yelettiyo wode Xoossaa so asa gidokko. Shin wozoy qanxxettido gishshawu Xoossaa ammaniyanne awu azazettiya ubbay guyyeppe A soo asa gidana danddayees. Gidoppe attin, ha wodiyankka Yihoowa maarotaa demmana danddayoos; qassi aaranne nu ishanttuuranne michchonttuura loytti dabbotana danddayoos. Yihoowi nuna keehi siiqees!—Roo. 5:10, 11. w25.01 21 ¶6

Wozoy alꞌꞌo imota gidiyogaa neeni maayettiyogee qoncce! (2 Qor. 9:15) Yesuusi ba deꞌuwa aatti immido gishshawu neeni Yihoowara dabbotana danddayaasa. Qassi neeni merinawu deꞌanawu hidootana danddayaasa. Wozuwa giigissida Yihoowi nuna keehi siiqiyo gishshawu, nuuni A galatanaadan oottiya daro gaasoy deꞌees! (Roo. 5:8) Nuuni ubbatoo nashshanaadaaninne Yihoowinne Yesuusi nuuyyo oottidobaa nuuni mule dogennaadan layttan layttan Yesuusa hayquwa Hassayiyo Baalaa bonchchanaadan I nuna azaziis. (Luq. 22:19, 20) Ha laytti, Hassayuwa Baalay Hamuusa, Hosppune 2, 2026n bonchchettees. Nuuni ubbaykka he baalaa bonchchanawu halchchiyogee tuma. Hassayuwa Baalay bonchchettanaappe kasenne bonchchetti simmin deꞌiya saaminttatun nuuni wodiya bazzidi Yihoowinne Yesuusi nuussi oottidobaa wotti dentti qoppiyogee nuna loytti maaddana. w25.01 20 ¶1-2

Xoossaa Yihoowinne Yesuus Kiristtoosi nuussi oottidobaa neeni ubbatoo wotta dentta qoppikko, eti nuna siiqiyo siiquwabaa aggennan tamaarana danddayaasa. Ha laytti Hassayuwa Baalay bonchchettanaappe kasenne bonchchetti simmin deꞌiya saaminttatun Wonggeletuppe issuwa woy hegaappe daruwa loytta nabbabana danddayaasa. Issi kutti daro shemppota nabbabanawu baaxetoppa. Yaatiyogaappe, takki gaada nuuni Yihoowanne Yesuusa siiqana koshshiyo hara gaasota koya. Neeni tumaa keettan daro layttaa takkidaba gidikko, Xoossaa suure pirddaa, A siiquwanne wozuwa xeelliyagan tamaariyo oorattabay deꞌiishshaa gaada qoppana danddayaasa. Shin hegeeta xeelliyagan nuuni tamaariyo oorattabay ubbatookka deꞌiyogee qoncce. Yaatiyo gishshawu, nu xuufetun deꞌiya Geeshsha Maxaafay yootiyo malaalissiya qofata nabbabanne xannaꞌa. w25.01 24-25 ¶13-15