Hosppune

Nuuni Yesuusa ashuwappenne suuttaappe goꞌettanawu wozuwan ammanana koshshees. (Efi. 1:7) Yesuusi ‘hara dorssata’ giidoogeeti Godaa Kahuwa wode oyttaappe mookkonanne woyniyappe uyokkona. (Yoh. 10:16) Gidikkokka, eti Yesuus Kiristtoosa ashuwappenne suuttaappe goꞌettoosona. Eti A wozuwa yarshshuwan ammaniyogan hegaadan oottoosona. (Yoh. 6:53) Shin oyttaappe miyageetinne woyniyappe uyiyageeti ooratta maachchan maacettidoogaanne Kawotettan haariyo hidootay banttawu deꞌiyogaa bessoosona. Hegaa gishshawu, nuuni tiyettidaageeta woy hara dorssata gidinkka, merinaa deꞌuwa demmanawu ammanoy nuussi keehi koshshiyogaa hegaappe akeekoos. w24.12 13 ¶14, 16

Yesuusi Godaa Kahuwa Baalaa wode ba kiittidoogeetuyyo oyttaa immiiddi hegee ba bollaa qonccissiyogaa yootiis. Yaatidi I wancca woyniya etawu immidi, hegee “maachchaara gayttida [ba] suuttaa” qonccissiyogaa yootiis. (Mar. 14:22-25; Luq. 22:20; 1 Qor. 11:24) Ooratta maachchay Yesuusaara Xoossaa Kawotettan haarana asatuura maacettiyo maachcha. (Ibr. 8:6, 10; 9:15) Yesuusi Godaa Kahuwa wode, ‘guutta wudiyan’ xeelaa wottiis. Koyro he citaa yara gididaageeti he wode aara issippe deꞌiya kiitettida ammanettidaageeta. Eti saluwan Yesuusaara kawotiyageetu cita gidana. w24.12 11 ¶9-10

Yesuusa A mata laggetuppe issoy kaddiis. Hegaappe simmin wordduwan A morkketi A qachchidosona, cayidosonanne mootidosona. Eti Yesuusi hayqqanaadan pirddidi A barchcheyidosona. Wurssettan, wotaaddarati mittaa bolli kaqqidi A woridosona. Yesuusi he ubba barchchiya ammanettidi gencciis. Shin Yihoowi ba Naꞌay Yesuusi waayettiyogaa beꞌidi aagaappe aaruwan waayettiis. Yihoowi ba Naꞌay waayettennaadan digganawu wolqqaynne abbe awu deꞌikkokka hegaadan oottibeenna. Aybissi? Nuna siiqiyo gishshataassa. Yesuusa yarshshoy Yihoowi nena keehi siiqiyogaa bessees. I nena nagaraappenne hayquwappe laꞌa kessanawu ba siiqiyo Naꞌaa yarshsho oottidi immiisinne daro waayiya gencciis. (1 Yoh. 4:9, 10) Nuuni ha wodiyan nagaranchcha gidikkonne bawu haggaazanaadan I maaddanawu koyees; qassi sinttappe nagaraa muleera xayssanawu koyees. w24.08 6 ¶13-14

Yihoowi ba Naꞌay keehi waayettiyogaa beꞌidi ay keena seelettidaakko qoppiyogee I nuna loytti siiqiyogaa nuuni akeekanaadan maaddees. Xoossaa ashkkaratuppe ooninne ammanettidi deꞌanawu metootiyo wodiyan ammanettenna giidi Seexaanay yootees. Yihoowi Seexaanay giidobay worddo gidiyogaa bessanawu Yesuusi waayettidi hayqqanaadan paqqadiis. (Iyy. 2:1-5) Asay Yesuusa bolli qilliicciyogaanne wotaaddarati A shocidi mittaa bolli misimaariyan xishiyogaa Yihoowi beꞌiis. Qassi Yihoowi ba siiqiyo Naꞌay waayettidi hayqqiyogaakka beꞌiis. (Mat. 27:28-31, 39) Yihoowi ha ubbabay hanennaadan diggana danddayiiddi aggiis. (Mat. 27:42, 43) I yaatiyakko Yesuusi wozuwa qanxxana danddayenna; qassi nuuyyokka hidootay deꞌana danddayenna. Hegaa gishshawu, Yihoowi ba Naꞌay hayqqana gakkanaashin waayettanaadan eeno giis. w25.01 22 ¶7

Wodee Niisaana 16, 33 M.L. Yesuusa kaalliyageeti keehi azzanidosonanne yayyidosona. Etappe naaꞌꞌati Yerusalaameppe kiyidi, Emaahuusa giyo qeeri katamaa boosona. Issi bitanee etakko yiidi etaara hemettiyogaa doommiis. Yesuusa kaalliyageeti Yesuusa bolli gakkida azzanttiyabata he bitaniyawu yootidosona. Yaatin he bitanee eti mule dogennabaa etayyo yootiyogaa doommiis. I Masee waayettananne hayqqana koshshidoy aybissakko qonccissanawu, “Muuseenne Xoossay erissidobaa yootiyageeti ubbay xafidobaappe doommidi” etawu yootiis. He heezzu asati Emaahuusa gakkido wode, he bitanee bana qonccissiis—I Xoossay hayquwappe denttido Yesuusa! (Luq. 24:13-35) Yesuusi saꞌan deꞌido wurssetta 40 gallassatun bana kaalliyageetussi darotoo qoncciis. He wode Yesuusi A kaalliya azzanidanne yayyidaageeta minttettiis. Hegaa gishshawu eti keehi ufayttidosonanne Xoossaa Kawotettaabaa yootiya mishiraachchuwa sabbakanawunne tamaarissanawu xala gididosona. w24.10 12 ¶1-3

Issi naꞌi wodiyappe wodiyan diccees; shin ooninne baaxetennan Yihoowara loytti dabbotenna. Leemisuwawu, Qoronttoosan deꞌiya ishanttinne michchontti mishiraachchuwa ammanidosona, haattan muukettidosona, geeshsha ayyaanaa ekkidosonanne Phawuloosi eta tamaarissidobaappe goꞌettidosona. (Oos. 18:8-11) Shin daroti haattan muukettin amarida layttay aadhdhikkonne eti kayma Kiristtaane gidibookkona. (1 Qor. 3:2) Nuuni kayma Kiristtaane gidanawu nuussi koyruwan koshshay deꞌana bessees. “Akeekaa pacaa” dosiyageetinne hegaadan deꞌanawu koyiyageeti mule kayma Kiristtaane gidokkona. (Lee. 1:22) Diccidi gastta gidikkonne etassi aawaynne aayyiya kuuyanaadan ubbatoo koyiya asatu mala gidanawu koyokko. Shin nuuni kayma Kiristtaane gidanawu koyoos. Neeni kayma Kiristtaane gidanawu hanno gakkanawu baaxetaydda deꞌikko, Yihoowi nena ‘eeno giissanaadaaninne ba koyiyobaa ootissanaadan’ woossa.—Pili. 2:13. w24.04 4 ¶9-10

Asaa bolli pirddiyogaa xeelliyagan Yihoowi ba qofaa nuussi yootees. (Hiz. 33:11) Yihoowi ammanttiya gaasoy baynnan issi uraa merinawu xayssennaagaa nuuni eroos. A maarotay daro; qassi I danddayettida wode ubban maarees. Hayquwappe denddenna asatubaa nuuni eriyobay aybee? Geeshsha Maxaafay amarida taariketu xalla yootees. Asqqorootu Yihuday hayquwappe denddennaagaa Yesuusi yootiis. (Mar. 14:21; Yoh. 17:12) Yihuday eriiddi oottidoban Yihoowanne A Naꞌaa eqettiis. (Mar. 3:29) Hegaadankka, Yesuusi haymaanootiya kaalettiya A eqettiya amaridaageeti hayquwappe denddennaagaa yootiis. (Mat. 23:33; Yoh. 19:11) Qassi bantta nagaran zilꞌꞌettidi laamettibeenna kaddidaageeti hayquwappe denddennaagaa kiitettida Phawuloosi yootiis.—Ibr. 6:4-8; 10:29. w24.05 4 ¶10-11

Nuuni Yihoowakko shiiqidi deꞌikko, Seexaanay nuna merinawu qohiyabaa oottana danddayenna. (1 Yoh. 3:8) Yihoowi ooratta alamiyan ammanettida ba dabbota ayyaanaabaa qohuwappe xalla gidennan, hayquwappekka ubbatoo naagana. (Ajj. 21:4) Yihoowa dunkkaaniyan imatta gidiyogee tumukka nuuyyo gita bonchcho. Nuuni merinawu aara mata dabbo gididi deꞌana danddayoos. (Hiz. 37:27) Nuuni A imatta gididi deꞌanawu koyikko, waatana koshshii? Neeni issi ura son imatta gidada shoobettikko, loꞌꞌo imatta gidanawu koyaasa. Hegaadankka, Yihoowi nuuppe koyiyobaa ubbatoo nu oottanawu koyiyogee qoncce. Nuuni Yihoowa siiqiyo siiqoy A loytti ‘ufayssanawu’ nuussi danddayettida ubbabaa oottanaadan denttettees. (Qol. 1:10) Nuuni hegaa mule dogana koshshenna, qassi nuuni ubbatoo A wozanappe bochchana bessees. Hegaadan bonchchiyogee A azzanttiyabaa oottennan agganaadan nuna maaddees. Nuuni ‘ashkketettan nu Xoossaara hemettanawu’ ubbatoo koyoos.—Mik. 6:8. w24.06 4 ¶8-9

Abrahaami ba naꞌaa Yisaaqa yarshshanaadan Yihoowi yootiis. Hegee Abrahaami keehi unꞌꞌettanaadan oottennan aggenna. Gidikkokka, I Yihoowawu azazettiis. Abrahaami ba naꞌaa yarshshana haniyo wode Xoossay A diggiis. Ha taarikee ha wodiyan Yihoowa ammaniya asa ubbaa keehi koshshiyabaa tamaarissees. Yihoowi ba siiqiyo naꞌaa ba dosan yarshsho oottidi immiis. Yihoowi asaa keehi siiqees. (Doo. 22:1-18) Yihoowi Israaꞌeelatuyyo Higgiya immido wode, eti bantta nagaray atto geetettanaadan mehiya yarshshanaadan yootiis. (Wog. 4:27-29; 17:11) He yarshshoti asaa nagaraappe muleera laꞌa kessiya gita yarshshuwassi eesho. Xoossay ba erissidobaa yootiyageeti yaana geetettida zerettaabaa xaafanaadan yootiis. Eti Xoossaa dumma Naꞌay nena gujjin, asa ubbaa nagaraappenne hayquwappe laꞌa kessanawu waayettidi hayqqanaagaa yootidosona!—Isi. 53:1-12. w24.08 4 ¶7-8

Neeni Geeshsha Maxaafaa nabbabiyo wode, hegaa waata oosuwan peeshshana danddayiyakko loytta qoppa. Neeni Xoossaa Qaalaappe amaridaagaa nabbabiyo wode, ‘Ha qofaa taani haꞌꞌi woy sinttappe waata oosuwan peeshshana danddayiyanaa?’ gaada nena oychcha. Leemisuwawu, neeni 1 Tasalonqqe 5:17, 18 nabbabaydda deꞌiyabadan qoppa. Neeni aapputoo woossiyakko, qassi wozanappe woossiyakko ha paydota nabbaba simmada takki gaada qoppana danddayaasa. Neeni galatanaadan oottiyabatakka wotta dentta qoppana danddayaasa. Neeni heezzubawu Yihoowa galatanawu kuuyana danddayaasa. Neeni Geeshsha Maxaafaappe eridobaa wotta dentta qoppanawu amarida daqiiqaa bazziyogeekka neeni Xoossaa Qaalaa akeekanaadaaninne oosuwan peeshshanaadan maaddana. Qassi neeni Geeshsha Maxaafaappe nabbabidobaa ubba galla oosuwan peeshshikko, leddan leddan Yihoowawu loꞌꞌo ashkkara gidaasa! w24.09 4-5 ¶9-10

Ekkiyogaappe aaruwan immiyogan ufayttanaadan oottidi Yihoowi nuna medhdhiis. Nuuni nu mala Kiristtaaneta maaddiyo wode keehi ufayttoos. Eti nuna nashshiyo wodekka nuuni ufayttoos. Shin nuuni kehatettaa bessido uri hegaa nashshin aggin nuuni suurebaa oottidoogan ufayttana danddayoos. Neeni haratuyyo immiyobay ayba gidikkokka, ‘Yihoowi neeyyo hegaappe aattidi immanawu danddayiyogaa’ mule dogoppa. (2 Odi. 25:9) Yaaniyo gishshawu Yihoowi ubbatookka nena darissidi woytana! Qassi Yihoowi nuna woytiyogaappe aaruwan ufayssiyabi baawa. Yaatikko, kehatettaa bessiyogan saluwan deꞌiya nu Aawaa leemisuwa ubbatoo kaallanawu murttidaageeta gidoos. w24.09 31 ¶20-21

Yihoowi maariyagaanne qarettiyagaa. (Maz. 103:13; Isi. 49:15) I nuuyyo qoppees; nuuni azzaniyo wode ikka azzanees. (Zak. 2:8) Nuuni akko shiiqanaadaaninne aara dabbotanaadan nuna maaddees. (Maz. 25:14; Oos. 17:27) I bana ziqqi oottiyagaa gidiyo gishshawu, “salotanne sa7aa xeellanau duge hokkees. I hiyyeesaa buhiyaappe xoqqu oottees.” (Maz. 113:6, 7) Ha ubba gaasotuppe denddidaagan, nu gita Xoossaa nuuni bonchchanawu koyiyogee bessiyaba. Nuuni harati Yihoowabaa eranaadan koyiyo gishshawu A bonchchoos. Daroti Yihoowabaa tumaa erokkona. Aybissi? Seexaanay Yihoowabaa iita oduwa aassiyogan eta kahaa dammissido gishshataassa. (2 Qor. 4:4) Yihoowi hanqqettiyagaa, nuussi qoppennaagaa, qassi ha alamiyan metuwa gattiyagaa giidi asay ammananaadan Seexaanay oottiis. Shin nuuni nu Xoossaabaa tumaa eroos! Nuuni Xoossaabaa haratussi yootiyonne etikka A sabbanaadan maaddiyo injjee nuussi deꞌees.—Isi. 43:10. w25.01 3 ¶6-7

Xoossaa Naꞌay Yesuusi wottiyobi baynnaagaanne malaaliyabaa oottidaagaa gidikkonne, Seexaanay amarida asaa goꞌettidi abaa worddobaa aassiis. Leemisuwawu, haymaanootiya kaalettiyageeti ‘daydanttata haariyagee’ Yesuusawu wolqqaa immin I daydanttata kessiis giidi asawu yootidosona. (Mar. 3:22) Yesuusi shilootaa sintti shiiqido wode haymaanootiya kaalettiyageeti I Xoossaa cayees giidi mootidosona; qassi Yesuusa woranawu asaa ammanttidosona. (Mat. 27:20) Guyyeppe, Kiristtoosa kaalliyageeti mishiraachchuwa sabbakiyo wode, eqettiyageeti he Kiristtaaneta yedettanawu asaa ‘wozanaa laammidosona’ woy denttettidosona. (Oos. 14:2, 19) Oosuwaa 14:2 xeelliyagan Tisaase 1, 1998n kiyida Wochchiyo Keelay, Seexaanay goꞌettiyo asati Kiristtaaneti sabbakiyo mishiraachchuwa eqettidoogaa, qassi eti yootiyobaa asay siyennaadaaninne ixxanaadan eta xeelliyagan daganttiyabaa yootidoogaakka qonccissiis. Seexaanay haꞌꞌikka ‘kumetta saꞌaa balettees.’ w24.04 11 ¶15-16

Issi uri merinaa deꞌuwa demmiyogee I hayqqiyo wodiyara gayttidaba gidenna. Yihoowi wottiyobi baynna Daanna; I ubbatoo suurebaanne tumubaa kuuyees. (Maz. 33:4, 5) ‘Saꞌaa ubbaa pirddiyagee’ suurebaa pirddiyogaa ammanettana danddayoos. Issi uri merinawu deꞌiyo hidootaa demmiyoy I deꞌiyo heeraara gayttidaban gidenna giidi qoppiyogeekka bessiyaba. Daro miiloone asay Kawotettaa mishiraachchuwa mule siyana danddayenna biittatun deꞌiyo gishshawu Yihoowi eta deeshshata giidi pirddennaagaa ammanettana danddayoos. (Mat. 25:46) Saꞌaa ubbaa xillotettan pirddiyagee nuuppe aaruwan etassi qoppees. Gita waayiya wode Yihoowi waatanaakko nuuni erokko. Yihoowi kawotettatu sinttan ba geeshshatettaa bessiyo wode, etappe amaridaageeti abaa tamaarana, A ammanananne awu exatana danddayoosona.—Hiz. 38:16. w24.05 12 ¶14-15

Yihoowa asay issoy issuwa maaddiyogaa dosees. (2 Qor. 8:4) Shin, yaatanawu issi issitoo xala gidana koshshees. Leemisuwawu, olay denddiyo wode cimati bantta ishanttussinne michchonttussi minttettoy, maadoy, qassi geella ayyaanaabay woykko asatettaabay koshshiyogaa akeekoosona. Cimati bantta ishanttanne michchontta siiqoosona. Eti ishanttussinne michchonttussi koshshiyabaa kunttiyogee keehi metana danddayikkokka yaatiyoy hegaassa. Hegaa mala iita wodetun issippetettan deꞌanawu azazettiyogee keehi koshshiyaba. Macara biiroy immiyo kaaletuwa kaalla. (Ibr. 13:17) Daafabawu waani giigettanaakko, qassi daafabay gakkiyo wode waatanaakko yootiya kaaletota cimati ubbatoo zaarettana koshshees. (1 Qor. 14:33, 40) Xala gidana koshshikkonne akeekanchcha gida. (Lee. 22:3) Issibaa oottanaappe kasetada qoppa. Danddayettido keena ubban nena qohoy gakkennaadan naagetta. Yihoowan ammanetta. Ne ishantti qohettennaadan neeni oottiyoban Yihoowi nena maaddana. w24.07 4 ¶8; 5 ¶11

Kawuwa Daawiti Yihoowa eriisinne an ammanettiis. Kawuwa Saaꞌoolinne harati Daawita woranawu yedettiyo wode, I maaduwa demmanawu Yihoowa woossiis. Yihoowi Daawita woosaa zaariisinne A ashshiis; yaatin I hagaadan giis: “GODAI de7ees!” (Maz. 18:46) Daawiti woyganawu koyidee? Issi xuufee qonccissiyogaadan, Daawiti yootidobay Yihoowi ba ashkkarata ubbatoo maaddiya tumu Xoossaa gidiyogaa bessees. Daawiti bana gakkiiddi deꞌiyabaa Yihoowi akeekiyogaanne A maaddanawu giigi uttidoogaa eriis. Hegee Daawiti ubbatoo Yihoowawu haggaazanaadaaninne A sabbanaadan minttettiis. (Maz. 18:28, 29, 49) Yihoowi deꞌo Xoossaa gidiyogaa nuuni mintti ammaniyogee wozanappe awu haggaazanaadan nuna maaddana danddayees. Qassi metuwa genccanawu wolqqaa demmanaadaaninne ubbatoo minnidi awu haggaazanaadan maaddana. Nuuni Yihoowara dabbotidi deꞌanawu murttanaadankka maaddees. w24.06 20-21 ¶3-4

Kiitettida Phawuloosi Tasalonqqen deꞌiyageetuyyo yootidobaappe nuuni ay tamaarana danddayiyoo? Nuuni Geeshsha Maxaafaappe tamaaridobaara maayettennabaa woy daganttiya taarikiya siyiyo wode akeekanchcha gidana koshshees. Kase Sooviyete kawotettan nu morkketi waanna biiruwappe yiidaba milatissidi issi dabddaabbiya nu ishanttussi immidosona. He dabddaabbee amarida ishantti shaahettidi hara dirijjitiya essanaadan minttettees. He dabddaabbee yootiyobay tuma milatees. Shin ammanettida ishantti cimettibookkona. Dabddaabbee yootiyobay eti tamaaridobaara maayettennaagaa akeekidosona. Ha wodiyan, tumaa morkketi issi issitoo zammaana tekinolojiya goꞌettidi nuussi kirqqi gaanaadaaninne nuuni issoy issuwappe shaahettanaadan baaxetoosona. Nuuni ‘wozanaa bayennan’ aggidi siyidobay woy nabbabidobay nu tamaarido tumaara maayettiyakkonne loytti qoppiyogan naagettana danddayoos.—2 Tas. 2:2; 1 Yoh. 4:1. w24.07 12 ¶14-15

Issi uri kuuyiyo aybippenne aadhdhiyabay bana Yihoowawu sheedhdhidi A soo asaa yara gidiyogaa. Yihoowi ubba asay hegaadan oottanaadan koyees. Aybissi? Eti aara dabbotanaadaaninne merinawu deꞌanaadan I koyees. (Zaa. 30:19, 20; Gal. 6:7, 8) Gidikkonne, bawu haggaazanaadan Yihoowi oonanne wolqqanttenna. I ubba asay ba koyiyobaa kuuyanaadan paqqadiis. Haattan muukettida issi Kiristtaanee gita nagaraa oottiyogan Xoossaa higgiya kanttikko shin? I ba nagaran zilꞌꞌettidi laamettana xayikko galchchaappe A kessana koshshees. (1 Qor. 5:13) Shin Yihoowi he uri galchchaappe kiyikkokka, ba nagaran zilꞌꞌetti laamettidi aara zaaretti dabbotanaadan koyees. Yihoowi wozuwa giigissido waanna gaasoy bantta nagaran zilꞌꞌettidi laamettiyageetussi atto gaanaassa. Yihoowi gita nagaraa oottidaageeti zilꞌꞌettidi laamettanaadan shoobbiya, siiqiya Xoossa.—Zak. 1:3; Roo. 2:4; Yaaq. 4:8. w24.08 14 ¶1-2

Kiitettida Yohaannisi heezzantto dabddaabbiya xaafiyo wode, amaridaageeti worddo timirtteta aassoosonanne galchchaa giddon shaahotettay deꞌanaadan oottoosona. Shin harati ‘tuman deꞌiyogaa’ aggibookkona. Eti Yihoowawu azazettidosonanne ‘A azazuwa naagidi deꞌidosona.’ (2 Yoh. 4, 6) Ha ammanettida Kiristtaaneti Yohaannisa xalaala gidennan, Yihoowakka keehi ufayssidosona. (Lee. 27:11) Nuuni hagaappe ay tamaariyoo? Ammanettiyogee ufayssaa demissees. (1 Yoh. 5:3) Leemisuwawu, nuuni Yihoowa ufayssiyogaa eriyogan ufayttoos. Nuuni iitabaappe haakkiyo wodenne A azazota naagiyo wode Yihoowi keehi ufayttees. Saluwan deꞌiya kiitanchchatikka ufayttoosona. (Luq. 15:10) Nu ishanttinne michchontti ammanettidi deꞌiyogaa beꞌiyo wode nuunikka ufayttoos. (2 Tas. 1:4) Qassi Seexaanaa alamee xayiyo wode nuuni Yihoowawu ammanettidi deꞌidoogan ufayttana. w24.11 12 ¶17-18

Neeni issi ura siiqiyogaa yootanaappe kase ay keena wodiyawu abaa erana koshshii? Neeni hegaa sohuwara yootiyaba gidikko, ne issibaa kuuyanaappe kase loytta yiggennabadan he uri qoppana danddayees. (Lee. 29:20) Shin, he uri neeni A siiqidoogaa akeekidashin neeni hegaa yootennan keehi takkikko, ne issibaa kuuyanaappe kase keehi mammottiyabadan I qoppana danddayees. (Era. 11:4) Neeni issi uraa haasayissanaappe kase, he uraara aqo oyqqiyogaa ammanettana koshshennaagaa hassaya. Shin neeni aqo oyqqanawu giigettidoogaanne neeni qoppido uri neeyyo loꞌꞌo aqo lagge gidana danddayiyogaa ammanettana koshshees. Issi uri nena siiqidoogaa neeni akeekikko waatana koshshii? Neeni he ura siiqennaba gidikko, ne oottiyoban hegaa bessa. Neeni issi ura siiqennan deꞌaydda neeni A koyiyabadan I qoppanaadan oottiyogee iitaba.—Efi. 4:25. w24.05 22-23 ¶9-10

Yesuusi ammanettida tiyettidaageeta xalla saluwa Kawotettaa efaana. Ayyaanan tiyettidaageetuppe giigi uttibeenna ooninne ‘doorettidaageetuura’ shiiqenna. (Mat. 24:31) Qassi saꞌan merinawu deꞌanawu hidootiyageeti ubbaykka naagi uttananne ammanettidi deꞌana koshshees. Nuuni Yihoowa loytti eriyo gishshawu A pirddan ammanettoos. Yaaniyo gishshawu, ha wodiyan Yihoowi ammanettidaageetuppe amaridaageeta ayyaanan tiyanawu doorikko, hegee nuna hirggissana koshshenna. Yesuusi woyne gadiyabaa yootido leemisuwan, 11 saate heeran qaxarettida oosanchchatubaa woygidaakko nuuni hassayoos. (Mat. 20:1-16) Woyniya gaden oottanaadan omarssi qaxarettidaageetikka, maalladoppe doommidi oottiiddi takkidaageetuura lagge miishshaa ekkidosona. Hegaadankka, Yihoowi ayyaanan tiyanaageeta dooriyoy awude gidikkokka, eti ammanettidi deꞌikko saluwan woytuwa ekkana. w24.09 24 ¶15-17

Naaquwa gencciyogan Yesuusi nuuyyo wottiyobi baynna leemiso. A dabbotuppenne hara daro asaappe naaqoy A gakkiis. A dabboti I wozanaa boshettees giidosona; haymaanootiya kaalettiyageeti I daydanttatu wolqqan oottees giidosona; qassi Rooma wotaaddarati A bolli qilliiccidosona, A barchcheyidosonanne woridosona. (Mar. 3:21, 22; 14: 55; 15:16-20, 35-37) Yesuusa ha ubba naaqoy gakkidaba gidikkokka, nagaraa I mule oottibeenna. Nuuni hagaappe ay tamaarana danddayiyoo? (1 Phe. 2:21-23) Nuna naaqoy gakkiyo wode wottiyobi baynna Yesuusa leemisuwa kaallana danddayoos. I awude coꞌꞌu gaanaakko, qassi awude haasayanaakko erees. (Mat. 26:62-64) Harati A wordduwan mootiyo wode issi issitoo aybanne haasayennan agganawu kuuyiis. (Mat. 11:19) I haasayido wodetunkka, ba bolli yedetaa gattiyageeta cayibeenna woy manddibeenna. w24.11 4-5 ¶9-10

Neeni siiqiyo urawu loꞌꞌiyanne maaddiya dumma imotaa immidabadan qoppa. He uri he imotaa saaxiniyan wottidi dogikko, neeni azzanana! Shin he uri imotaa loytti goꞌettiyagaanne nashshiyagaa gidikko, neeni ufayttanaagee qoncce. Ha leemisoy Yihoowi immido wozuwa imotaara waani gayttii? Yihoowi nu gishshawu ba Naꞌaa immiis. Hegaa gishshawu, he alꞌꞌo imotanne I nuussi wozuwa immanaadan denttettida A siiquwa nuuni nashshiyo wode, Yihoowi keehi ufayttanaagee qoncce! (Yoh. 3:16; Roo. 5:7, 8) Daro layttay aadhdhiyo wode, nuuni wozuwa xoqqu ootti xeelliyogaa aggana danddayoos. Nuuni wozuwa nashshiyogaa aggikko, hegee Xoossay nuussi immido ufayssiya imotaa nuuni beꞌennasan woy hassayennasan wottiyogaa mala. Hegaadan hanennaadan Xoossaynne Kiristtoosi nuussi oottidobaa nuuni ubbatoo qoppana koshshees. w25.01 26 ¶1-2

Cima gidiya ishay ooratta ammanida asa gidanau bessenna. Intte haattan muukettidosaappe daro layttay aadhdhana koshshees giyogaa gidana xayikkonne, intte kayma Kiristtaane gidanawu wodee koshshees. Intte cima gididi sunttettanaappe kase Yesuusaagaadan inttena ziqqi oottiyogaa bessananne intteyyo aawatettay imettana gakkanawu Yihoowa danddayan naagana koshshees. (Mat. 20:23; Pili. 2:5-8) Intte Yihoowi koyiyogaadan deꞌiyogaaninne A dirijjitee immiyo kaaletuwa kaalliyogan ubbatoo Yihoowawu ammanettikko, geeshsha gidiyogaa bessana danddayeeta. Cimati ‘tamaarissanawu danddayiyageeta’ gidana bessiyogaa Geeshsha Maxaafay qonccissidi yootees. Intte haasayaa haasayiyogan keehi gooba gidana koshshees giyogee? Chii. Cimati ubbay haasayaa haasayiyogan keehi gooba gidennan aggana danddayoosona. Shin eti sabbakiyo wodenne ishanttanne michchontta minttettiyo wode Geeshsha Maxaafaa loytti tamaarissiyageeta gidana koshshees. w24.11 23-24 ¶14-15

Neeni Geeshsha Maxaafaa xannaꞌaydda issibaa loytta akeekana xayikko hegaabaa loytta pilgga. Yaatada Yihoowa, A Naꞌaanne eti nena siiqiyo siiquwa xeelliyagan neeni xannaꞌidobaanne eridobaa kumetta gallassan wotta dentta qoppa. (Maz. 119:97) Neeni Geeshsha Maxaafaa nabbabiyo woy xannaꞌiyo wode ubban oorattabaa woy ufayssiyabaa demmana xayikko hidootaa qanxxoppa. Neeni worqqaa demmanawu baaxetiya ura mala. Worqqaa koyiya issi uri guuttaa demmanawukka daro saatiya woy gallassaa wurssana danddayees. Shin qii guutta worqqaykka alꞌꞌo gidiyo gishshawu I hidootaa qanxxennan danddayan koyees. Nuuni Geeshsha Maxaafaappe tamaariyo oorattabay ubbay worqqaappe keehi alꞌꞌo! (Lee. 8:10) Yaatiyo gishshawu Geeshsha Maxaafaa nabbabiyogaanne oorattabaa demmanawu koyiyogaa aggoppa.—Maz. 1:2. w25.01 25 ¶14-15

Yihoowi nuuni nuna naaqqiyageetuyyo atto gaanawu giigi uttanaadan I koyees. (Maz. 86:5; Luq. 17:4; Efi. 4:32) Issi uri haasayiyobay woy oottiyobay, ubba I nu mata lagge woy nu soo asa gidikko nuna keehi qohana danddayees. (Maz. 55:12-14) Issi issitoo, cube malaban cadettidabadan nuuyyo siyettin nuuni yiillotana woy hanqqettana danddayoos. (Lee. 12:18) Nuuni naaqettidobaa xaasayi xeellanawu baaxetana danddayoos. Shin yaatiyogee nuna mashshan caddin mashshaa he sohuwan aggiigiyogaa mala gidana danddayees. Hegaadankka, nuuni naaqettidobaa xaasayi xeellikko woppu goos giidi qoppana koshshenna. Issi uri nuna naaqqiyo wode sohuwara yiillotana danddayoos. Geeshsha Maxaafay nuuni hanqqettana danddayiyogaa yootees. Shin nuuni hanqqettidi takkennaadan zorees. (Maz. 4:4; Efi. 4:26) Aybissi? Asay yiillotidi oottiyobay darotoo loꞌꞌobaa demissenna gishshataassa. (Yaaq. 1:20) Hanqqettiyogee wottin deꞌiyaba; shin hanqqetti takkiyogee woy hanqqettiyogaa aggiyogee nu dooro gidiyogaa hassaya. w25.02 15 ¶4-6

“Xoossaa xeelan dure” gidennan, miishshaa shiishshanawu bichchaariya uri eeyya gidiyogaa Yesuusi yootiis. (Luq. 12:16-21) Wontto hananabaa ooninne erenna. (Lee. 23:4, 5; Yaaq. 4:13-15) Nuuni Kiristtoosa kaalliyageeta gidiyo gishshawu dumma paacee nuna gakkana. Yesuusi nuuni A kaalliyageeta gidanawu nuussi deꞌiya ubbabaa ‘aggi bayanawu’ giigettana koshshiyogaa yootiis. (Luq. 14:33) Yihudan deꞌiya koyro xeetu laytta Kiristtaaneti banttawu deꞌiyabay xayinkka ufayttidosona. (Ibr. 10:34) Ha wodiyan daro ishantti polotikaaban oossinne exatennan aggido gishshawu, banttawu deꞌiyabaa xayidosona. (Ajj. 13:16, 17) Eti hegaadan oottanaadan maaddidabay aybee? Eti, “Taani nena mulekka yeggikke woikko aggikke” giidi Yihoowi gelido qaalan wozanappe ammanettoosona. (Ibr. 13:5) Yaatiyo gishshawu, nuuni cimiyo wode nuussi koshshiyabaa demmanawu nuussi danddayettidaba oottoos. Shin nuuni qoppibeennabay merettikko Yihoowi nuna maaddanaagaa wozanappe ammanettoos. w25.03 29 ¶13-14

Nuuni kayma Kiristtaane gidanawu nuussi maadoy koshshiyogaa Yihoowi erees. Nuuni “Kiristtoosa polo dichchaa keenaa diccidi gastta asa gidana” mala maaddiya henttanchchatanne asttamaareta Yihoowi nuussi immiis. (Efi. 4:11-13) “Kiristtoosa wozanai” woy qofay nuussi deꞌanaadan maaddanawu Yihoowi geeshsha ayyaanaakka nuussi immees. (1 Qor. 2:14-16) Hegaa bollikka, Yesuusi saꞌan deꞌiyo wode qoppido, haasayidonne oottido ogiya qonccissiya oyddu Wonggeleta Xoossay nuussi immiis. Yesuusaagaadan qoppiyogaaninne oottiyogan kayma Kiristtaane gidanawu halchchido halchchuwa polana danddayaasa. Shin, nuuni kayma Kiristtaane gidanawu Kiristtoosabaa tamaarido koyro timirttetu xalla gidennan, harabaakka tamaarana koshshees. w24.04 4-5 ¶11-12

Nuuni ubba galla kuuyana koshshees. Qanꞌꞌiya ay maanaakko woy aappun saatiyan xiskkanaakko kuuyiyogaa mala amaridabati darin metokkona. Shin harabati kuuyanawu deexxoosona. Hegeeti nu payyatettaara, nu ufayssaara, nu siiqiyogeetuura woy nu goynuwara gayttiyabata gidana danddayoosona. Nu kuuyiyobati nunanne nu soo asaa goꞌꞌanaadan koyoos. Ubbaappe aaruwan, nu kuuyiyobay Yihoowa ufayssiyagaa gidanaadan koyoos. (Roo. 12:1, 2) Neeni loꞌꞌobaa kuuyanawu oottana bessiyabay hanotaa shaakka eriyogaa. Hegee keehi koshshiyoy aybissee? Keehi sahettidi dottoriyakko biida issi hargganchchaabaa qoppa. He dottoree kasetidi hargganchchaa hanotaa pilggennan woy oyshata oychchennan waati akkamanaakko kuuyii? Mule kuuyenna. Neenikka ne hanotaara gayttida ubbabaa kasetada qoppikko, loꞌꞌobaa kuuyaasa. w25.01 14 ¶1-3

Nuuni Yihoowa maarotaabaa eriyobay aybee? I ‘ooninne xayana mala koyennaagaa’ waati bessidee? (2 Phe. 3:9) Gita nagaraa oottida amaridaageetussi I maarotaa waati bessidaakko akeeka. Kawuwa Daawiti wodiraa laammiyogaanne shemppo woriyogaa gujjin, gita nagaraa oottiis. Shin Daawiti ba nagaran zilꞌꞌettidi laamettido gishshawu, Yihoowi awu atto giis. (2 Sam. 12:1-12) Kawuwa Minaasee ba deꞌo layttan darotoo keehi iitabaa oottiis. Shin I keehi iitabaa oottikkokka, ba nagaran zilꞌꞌettidi laamettido gishshawu Yihoowi A maariisinne awu atto giis. (2 Odi. 33:9-16) Yihoowi atto gaanaadan oottiya gaasoy deꞌiyogaa akeekiyo wode ubban maarotaa bessiyogaa ha taariketi nuna hassayissoosona. He asati gita nagaraa oottidoogaa akeekidi zilꞌꞌetti laamettido gishshawu I eta hayquwappe denttana. w24.05 4 ¶12