Tamme

Kiristtoosa wozuwa yarshshuwan nuuni goꞌettiiddi deꞌoos. Leemisuwawu, wozuwappe denddidaagan Yihoowi nu nagaraa atto gees. I nuussi atto gaanaadan A giddiyabi baa. Shin I nuussi atto gaanawu koyees. (Maz. 103:3, 10-13) Yihoowa maarotay nuussi bessenna giidi amaridaageeti qoppana danddayoosona. Yihoowa maarotay nu ubbawukka bessennaagee tuma. Kiitettida Phawuloosi I ‘kiitettidaagaa geetettanawukka bessennaagaa’ akeekiis. Shin I gujjidi hagaadan giis: “Laggetiyabi baynna Xoossaa kehatettaappe denddidaagan taani kiitettidaagaa.” (1 Qor. 15:9, 10) Nuuni nu nagaran zilꞌꞌettidi laamettiyo wode Yihoowi nuuyyo atto gees. Aybissi? Hegee nuuyyo bessiyo gishshawu gidennan, I nuna siiqiyo gishshawu hegaadan oottees. Yihoowa maarotay neessi bessennabadan qoppada neeni unꞌꞌettikko, I wozuwa giigissidoy wottiyobi baynna asaassa gidennan, bantta nagaran zilꞌꞌettidi laamettiya asaassa gidiyogaa hassaya.—Luq. 5:32; 1 Xim. 1:15. w25.01 26-27 ¶3-4

Harati haasayiyobaa woy oottiyobaa diggana danddayokko; shin nuuni zaariyo ogiya kuuyana danddayoos. Qassi darotoo nuuni oottana danddayiyo keehi loꞌꞌobay atto giyogaa. Aybissi? Nuuni Yihoowa siiqiyo gishshawunne atto gaanaadan I koyiyo gishshataassa. Nuuni lancciya oyqqidi atto geennaba gidikko, eeyyabaa oottana danddayoos; woy hegee nu payyatettaa qohana danddayees. (Lee. 14:17, 29, 30) Nuuni uluwan lancciya oyqqennan aggiyo wode hegee nuna keehi qohennaadan oottoos. Qassi nuna maaddiyabaa oottoos; hegeekka he allaalliyabaa qoppiyogaa aggidi zaarettidi nu deꞌuwan ufayttoos. Yiillotiyogaa woy hanqqettiyogaa waata aggana danddayay? Issi ogee amarida wodee aadhdhanaashin naagiyogaa. Keehi qohettida uri akkametti simmin paxanawu wodee koshshees. Hegaadankka, issi urawu wozanappe atto gaanaappe kase wodee koshshana danddayees. (Era. 3:3; 1 Phe. 1:22) Atto gaanawu nena maaddanaadan Yihoowa woossa. w25.02 16-17 ¶8-11

Nuuni tamaarido koyrobatuppe amaridaageeti nagaran zilꞌꞌettidi laamettiyogaa, ammanuwa, haattan muukettiyogaanne dendduwa. (Ibr. 6:1, 2) Hageeti ubba Kiristtaaneti ammaniyo koyro timirttetuppe amaridaageeta. Yaatiyo gishshawu, Pheexiroosi Phenxxaqosxxe gallassi asawu sabbakido wode hegeetubaa haasayiis. (Oos. 2:32-35, 38) Nuuni Kiristtoosa kaalliyageeta gidanawu ha koyro timirtteta ammanana koshshees. Leemisuwawu, nuuni dendduwa ammanennaba gidikko, Kiristtoosa kaalliyageeta gidana danddayennaagaa Phawuloosi yootiis. (1 Qor. 15:12-14) Nuuni kayma Kiristtaane gidanawu koyro timirttetu xalla gidennan, harabaakka tamaaranawu koyana bessees. Koyro timirttetuppe dumma hanotan ayyaanaaban mino qumay Yihoowa higgetu xalla gidennan, I kessido maaratakka bessiyaba; hegeeti nuuni A qofaa akeekanaadan maaddoosona. He ayyaanaa qumaappe goꞌettanawu nuuni Xoossaa Qaalaa xannaꞌana, wotti dentti qoppananne hegaa oosuwan peeshshana koshshees. Nuuni yaatiyo wode Yihoowa ufayssiyabaa kuuyanawu loohoos. w24.04 5 ¶12-13

Xoossay Nanawe asati “ushachchaanne haddirssaa shaakkidi [eribeennaagaa]” Yoonaasa hassayissiis. (Yona. 1:1, 2; 3:10; 4:9-11) Guyyeppe, Yesuusi he taarikiya goꞌettidi Yihoowa pirddaabaanne maarotaabaa tamaarissiis. Nanawe asati ‘pirddaa wode denddana’ giyogee woygiyogee? ‘Pirddettanawu denddanaageeti’ deꞌiyogaa Yesuusi tamaarissiis. (Yoh. 5:29) I ‘xillotikka xillo gidennaageetikka’ hayquwappe denddiyo ba Shaꞌu Layttaa Haaruwa wodiyabaa yootiis. (Oos. 24:15) ‘Xillo gidennaageeti’ pirddettanawu denddana. Hegaa giyogee eti hayquwappe denddi simmidi tamaaridobaa oosuwan peeshshiyakkonne Yihoowinne Yesuusi kaalloosona giyogaa. Hayquwappe denddida issi Nanawe asi Yihoowawu goynnennan ixxikko, Yihoowi I deꞌuwan deꞌanaadan paqqadenna. (Isi. 65:20) Shin Yihoowayyo ammanettidi goynnanawu dooriya ubbay merinawu deꞌiyo injjiya demmana!—Dane. 12:2. w24.05 5 ¶13-14

Yesuusikka ba Aawaagaadan maariyagaa. (Yoh. 14:9) I qarettiyanne maariya ba Aaway nagaranchcha asaa siiqiyogaanne maaddanawu koyiyogaa haasayiyobaaninne oottiyoban bessiis. Yesuusi nagaranchcha asati laamettanawunne A kaallanawu koyanaadan maaddiis. (Luq. 5:27, 28) Yesuusi sinttappe bana gakkanabaa eriis. Asay A kaddanaagaanne mittaa bolli kaqqidi woranaagaa bana kaalliyageetussi zaari zaari yootiis. (Mat. 17:22; 20:18, 19) A yarshshoy asaa nagaraa xayssiyogaa Yesuusi erees. Yesuusi hayqqi simmidi ‘ubba qommo asaa baakko shiishshanaagaa’ yootiis. (Yoh. 12:32) Nagaranchcha asati Yesuusa bantta Godaadan xeelliyogaaninne A kottiya kaalliyogan Yihoowa ufayssana danddayoosona. Eti hegaadan oottikko, ‘nagaraa aylletettaappe kiyana.’ (Roo. 6:14, 18, 22; Yoh. 8:32) Hegaa gishshawu, Yesuusi nuna ashshanawu xalatettaaninne ba dosan barchchetidi hayqqiis.—Yoh. 10:17, 18. w24.08 5 ¶11-12

Neeni Xoossaa Qaalaappe tumaa koyro tamaarido wode neeyyo siyettidabaa qoppa. Saluwan deꞌiya ne Aaway nena siiqiyogaa, neeni awu goynniya so asaa gidanaadan I koyiyogaa, waayiyanne metuwa xayssanawu qaalaa gelidoogaa, neeni siiqiyo hayqqidaageeti ooratta alamiyan denddin beꞌanawu hidootana danddayiyogaanne harabata eradasa. (Mar. 10:29, 30; Yoh. 5:28, 29; Roo. 8:38, 39; Ajj. 21:3, 4) Neeni eridobay nena keehi ufayssiis. (Luq. 24:32) Neeni tamaaridobaa dosada hegaa asa ubbawu yootanawu koyadasa! (Ermmaasa 20:9ra gatta xeella.) Nuuni Geeshsha Maxaafaappe tamaaridobaa dosiyo wode, hegaa ubba asawu yootoos. (Luq. 6:45) Nuuni Yesuusa kaalliyageetudan gaana danddayoos: “Nuuni be7idobaanne siyidobaa yootennan agganau danddayokko.” (Oos. 4:20) Nuuni tumaa keehi dosiyo gishshawu nuuyyo danddayettida keenan hegaa daro asawu yootanawu koyoos. w24.05 15 ¶5; 16 ¶7

Nuuni Yihoowa asa gidiyogaadan saluwan deꞌiya nu Aawaa siiqiyo gishshawunne asay A eranaadan maaddanawu koyiyo gishshawu sabbakoos. Shin harati sabbakiyo oosuwan ufayttanawu metootoosona. Aybissi? Issoti issoti dungguuxa gidiyo gishshataassanne eti gooba asttamaare gidana danddayokko giidi qoppiyo gishshataassa. Harati qassi shoobettennan asa soo biyogee ufayssennabadan qoppoosona. Amaridaageeti asay eta bolli hanqqettana giidi yayyoosona. Issoti issoti harati hanqqettanaadan oottokko giidi qoppana danddayoosona. He ishanttinne michchontti eti erenna asawu mishiraachchuwa yootanawu metootidosona. Hegaadan qoppiyo gishshawu haggaazuwan ufayttanawu issi issitoo metootay? Hegaadan gidikko hidootaa qanxxoppa. Taani gooba asttamaare gidikke gaada qoppiyogee neeni ne huuphiya ziqqi oottiyogaanne asay ne bolli xeelaa wottanaadan koyennaagaa bessiyaba gidana danddayees. Qassi hegee neeni asaara palamettanawu koyennaagaa bessees. Ooninne harata yiilloyanawu koyenna; ubba etassi loꞌꞌobaa oottanawu baaxetiyo wode yaatanawu mule koyenna. Saluwan deꞌiya ne Aaway neessi paace gididabaa loytti eriyo gishshawu nena maaddanawu koyees.—Isi. 41:13. w24.04 14 ¶1-2

Neeni Geeshsha Maxaafaa nabbabiyo wode, nabbabido ubbabaa issi kutti oosuwan peeshshanawu baaxetiyogaappe, neeni oottana danddayiyobaa halchcha. Hagaadan oottanawu mala: Neeni giigissana koshshiyabata xaafada, neeni koyroora oottiyo issibaa woy naaꞌꞌubaa doora; yaatada hinkkoota haroode oottana danddayaasa. Neeni awugaappe doommana koshshii? Polanawu wayssenna halchchuwan doommanawu neeni kuuyana danddayaasa. Woy neeni kasetada giigissana koshshiyabaa doorana danddayaasa. Neeni giigissana koyiyobaa doorikko nu xuufeta goꞌettada pilggana danddayaasa. ‘Nena eeno giissanaadaaninne ba koyiyobaa ootissanaadan’ Yihoowa woossa. (Pili. 2:13) Yaatada eridobaa oosuwan peeshshanawu baaxeta. Neeni koyro halchchidobaa poliyogee harabaakka giigissanaadan nena denttettana danddayees. Neeni Kiristtaanetuppe koyettiyagaadan deꞌikko, qassi Kiristtaanetuppe koyettiya eeshshaa bessikko, harabatunkka laamettanawu metootennan aggana danddayaasa. w24.09 6 ¶13-14

Neeni kase oottidoban harata qohidaba gidikko unꞌꞌettana danddayaasa. Nena aybi maaddana danddayii? Hanotaa giigissanawu neessi danddayettida ubbabaa ootta. Qassi wozanappe maarotaa oychcha. Ne oottidoban qohettidaageeta Yihoowi maaddanaadan woossa. Genccanaadaaninne sarotettaa demmanaadan I nenanne ne oottidoban qohettidaageeta maaddana danddayees. Kase neeni oottido balaappe tamaara, qassi Yihoowi ba koyiyo ogiyan nena goꞌettanaadan eeno ga. Xoossay erissidobaa yootiya Yoonaasabaa beꞌa. Yoonaasi Xoossay azazido sohuwa Nanawe biyogaa aggidi harasaa baqatiis. Yihoowi Yoonaasa seeriis; qassi I ba mooruwappe tamaariis. (Yona. 1:1-4, 15-17; 2:7-10) Yihoowi Yoonaasan hidootaa qanxxibeenna. Yoonaasi Nanawe baanaadan Xoossay zaarettidi yootiis; yaatin he wode Yoonaasi sohuwara azazettiis. Yoonaasi kase oottidoban zilꞌꞌettikkokka Yihoowi azazidobaa oottiis.—Yona. 3:1-3. w24.10 8-9 ¶10-11

Yihoowi nu acuwa woy nagaraa coo atto gi aggenna, hegaa quccees. Leemisuwawu, ne acoy attidoogaa bessiya malaatay acuwa mazggaban xaafettidabadan qoppana danddayaasa. Gidikkokka, he malaataappe garssaara xaafettida ne acuwa ooninne beꞌana danddayees. Shin qucciyogee hegaappe dummatees. Ha leemisuwa akeekanawu, beni wode deꞌiya asay goꞌettiyo qalamee haattan meecciyo wode sohuwara yeddiyaba gidiyogaa nuuni hassayana koshshees. Issi uri he qalamiyan xaafettidabaa irxxa ispponjjiyan quccana danddayees. Yaatiyo gishshawu, acoy ‘qucettiyo’ wode hegee muleera xayees. Qucettiichchidabaa asay beꞌana danddayenna. Hegee acoy mule xaafettibeennaagaa mala. Yihoowi nu nagaraa atto giyogaa xalla gidennan, hegaa muleera qucciyogaa eriyogee nuna keehi minttettees!—Maz. 51:9. w25.02 10 ¶11

Harati nu bolli pirddiyo wode woy nuna naaqqiyo wode hanotaa Yihoowi eriyogaa ammanettoos. Yihoowi wurssettan ha hanota ubbaa giigissanaagaa eriyogee naaquwa genccanaadan maaddees. Nuuni Yihoowan ammanettiyabanne metuwa I giigissanaashin naagiyaba gidikko, hanqqettiyogaa woy harata ixxiyogaa aggana. Nuuni haratu bolli hanqqettiyogaa aggennaba gidikko, hegee nuuni iitabaa oottanaadan, ufayttiyogaa agganaadaaninne qohettanaadan oottana danddayees. Nuuni Yesuusa leemisuwa wottiyobi baynna ogiyan mule kaallana danddayennaagee qoncce. Issi issitoo nuuni guyyeppe zilꞌꞌettanaadan oottiyabaa hanana woy haasayana danddayoos. (Yaaq. 3:2) Qassi issi issitoo harati nuna naaqqiyogee nuuni nu deꞌo laytta ubban azzananaadaaninne unꞌꞌettanaadan oottana danddayees. Nenakka hegaa malabay gakkikko, neeni gencciyobaa Yihoowi eriyogaa ammanetta. Qassi naaqoy gakkido Yesuusikka neeyyo siyettiyabaa akeekees. (Ibr. 4:15, 16) Yihoowi naaqoy gakkiyo wode nuna maaddiya zoriya ba Qaalaa baggaara immiyogaa eriyogee keehi ufayssiyaba. w24.11 6 ¶12-13

“Merinaa deꞌuwa” demmanawu Yesuusa ammanana koshshees. (Yoh. 3:16-18, 17:3) Daro Ayhudati Yesuusan ammanana koshshiyabadan qoppibookkona. Eti A, “Nuuni beꞌidi nena ammanana mala, ayba malaataa nuna bessuutee?” giidi oychchidosona. (Yoh. 6:30) Muuse wodiyan asay malaaliya ogiyan mannaa demmidoogaa eti yootidosona; hegee eti ubba galla miyo quma. (Nah. 9:15; Maz. 78:24, 25) He cora asay daabbuwa demmiyogaa xalaala qoppidoogee qoncce. Qassi Yesuusi kaallidi mannaappe dumma gidida merinaa deꞌuwa demissiya “tumu qumaa” saluwappe immanaagaa yootido wode I woygana koyidaakko eti oychchibookkona. (Yoh. 6:32) Eti asatettaaban banttawu koshshiyaban xeelaa wottido gishshawu, merinaa deꞌuwa demmanaadan oottiyabaa Yesuusi eta tamaarissiyobaa eti siyanawu koyibookkona. w24.12 5-6 ¶10-11

Issi mala hanotan dicci dicci biya hara meretatubaa intte naati timirtte keettan tamaarana danddayoosona. Leemisuwawu, daro mittati daayoosona. Ano mittay gita daashshata kessees. Hegeetuppe guutta daashshati kiyoosona. Qassi kaallidi hara daashshatikka kiyoosona. He hanotay Frakital geetettees. Hegee hara meretatunkka deꞌees. Shin hegaa makkisidi giigissiday oonee? Yihoowi medhdhido malaalissiyabata intte naati loytti qoppiyogee ubbabaa medhdhiday A gidiyogaa eti mintti ammanaadan maaddana danddayees. Intte naati dicci dicci biyo wode, Xoossaa higgetussi azazettiyogee keehi koshshiyo gaasuwa naati akeekanaadan intte maaddana bessees. Yaatanawu hagaadan oychchana danddayeeta: “Nuna medhdhiday Xoossaa gidikko, nuuni waani ufayttanaakko I nuussi kaaletuwa immiyogee bessiyaba gidennee?” Yaatidi keehi maaddiya kaaletoy Geeshsha Maxaafan deꞌiyogaa intte naatussi yootana danddayeeta. w24.12 16 ¶8

Ba nagaran zilꞌꞌettidi laamettibeenna bitaniya galchchaappe kessana koshshiyogaa Phawuloosi ayyaanay kaalettin xaafiis. (1 Qor. 5:13) Ammanettida Kiristtaaneti waatana koshshidee? Eti aara ‘zuppetiyogaa agganaadan’ Phawuloosi yootiis. Hegee woygiyogee? Phawuloosi “he bitaniyara haray atto qumaakka [meennaadan]” azaziis. (1 Qor. 5:11) Issi uraara qumaa miyogee aara laggetanaadan oottana danddayees. Hegaa gishshawu Phawuloosi he uraara galchchay wodiya aattana koshshennaagaa yootana koyidoogee qoncce. Hegee galchchay A iita oosuwappe naagettanaadan maaddees. (1 Qor. 5:5-7) Qassi hegee I Yihoowa ay keena qohidaakko akeekanaadan, ba oottidoban azzananaadaaninne ba nagaran zilꞌꞌettidi laamettanaadan maaddana danddayees. w24.08 15 ¶4-5

Israaꞌeelati nagaraa Atto Giissiyo Gallassaa layttan layttan bonchchoosona. He gallassan gita kahinee asaa nagaraa gishshawu mehiya yarshshees. Mehee asappe laafa gidiyo gishshawu, mehiya yarshshoy asa nagaraa muleera atto giissana danddayibeennaagee qoncce. Shin bantta nagaran zilꞌꞌetti laamettida Israaꞌeelati Yihoowi koyiyogaadan mehiya yarshshuwa yarshshido wode ubban I eta nagaraa atto giis. (Ibr. 10:1-4) He giigissoy Israaꞌeelati nagaranchcha gidiyogaa akeekanaadan maaddiis. Gidikkokka, Yihoowi asaa nagaraa atto gaanawu ay oottidee? I ba dumma Naꞌay “daro asaa nagaraa xaissanau issitoo” yarshshettanaadan oottiis. (Ibr. 9:28) Yesuusi “darota wozanawu qanxxiyoba oottidi ba shemppuwa” immiis.—Mat. 20:28. w25.02 4 ¶9-10

Yesuusi hagaadan giis: “Ayyaanay keehi koyiyogee tuma, shin ashoy shugo.” (Mat. 26:41b) Ha qofay nuuni nagaranchcha gidiyogaanne balana danddayiyogaa Yesuusi akeekidoogaa bessees. Shin I yootidobay likkiyappe aaruwan nunan ammanettana koshshennaagaakka hassayissees. Yesuusi hagaadan gaanaappe amarida saatiyappe kase A kaalliyageeti A mule aggidi beennaagaa yootidosona. (Mat. 26:35) Eti suurebaa oottanawu koyidosona. Shin, paacee gakkin eta ammanoy sohuwara shugganaagaa eti akeekibookkona. Yaatiyo gishshawu, Yesuusi hachchi gallassa xiqisiyan deꞌiya qofa etawu yootiyogan eti naagettanaadan zoriis. Shin, Yesuusa kaalliyageeti naagi uttibeennaagee azzanttiyaba. Yesuusi oyqettido wode eti aara takkidonaayye, yayyidi baqatidonaa? Yesuusa kaalliyageeti naagi uttibeenna gishshawu mule oottokko giidobaa oottidosona; eti Yesuusa aggidi baqatidosona.—Mat. 26:56. w24.07 14 ¶1-2

Addaamenne Hewana bantta Aawaa Yihoowara dabbotido dabbotay moorettiis. Addaamenne Hewana nagaraa oottanaappe kase Xoossaa so asa. (Luq. 3:38) Shin eti Yihoowawu azazettennan aggido wode, naata yelanaappe kasetidi Yihoowa so asaappe yedetettidosona. (Doo. 3:23, 24; 4:1) Nuuni eta naata gidiyo gishshawu Yihoowara sigettana koshshees. (Roo. 5:10, 11) Hegaa giyogee nuuni aara dabbotana koshshees giyogaa. Issi xuufee yootiyogaadan, “sigettite” giyagawu ha sohuwan goꞌettido Giriiketto qaalay “morkke gidiyogaa aggidi laggetiyogaa” qonccissana danddayees. Kasetidi hegaadan oottiday Yihoowa gidiyogee malaalissiyaba. Waanidi? Yihoowi nagaranchcha asay banaara dabbotanaadan ogiya giigissiis. Addaameppe halidabaara bixe gidiyabaa zaarettidi nu demmanaadan I ogiya giigissiis. w25.02 3-4 ¶7-8

Phawuloosi, “Intteppe dariya bagga asai he bitaniyaa mala asa hegaadan qaxxayikko, he qixaatee ayyo gidana” yaagiis. (2 Qor. 2:5-8) Hegaa giyogee kase ba aawaa machcheera pokkiya tuna nagaraa oottida uri zilꞌꞌettidi laamettana koshshiyogaa akeekiis giyogaa. (1 Qor. 5:1) Qassi I zilꞌꞌettidi laamettido gishshawu ubbatoo A seerana koshshenna. (Ibr. 12:11) He bitanee zilꞌꞌettidi laamettido gishshawu, I galchchawu simmanaadan paqqadana mala cimatussi Phawuloosi yootiis. Hegaa bollikka, eti ‘awu atto gaanaadaaninne A minttettanaadan,’ qassi eti ‘A mintti siiqana’ mala yootiis. Ishantti haasayiyobaaninne oottiyoban awu tumuppe atto giidoogaanne A siiqiyogaa bessanaadan Phawuloosi koyiis. Hegaappe denddidaagan, he ishay I galchchawu simmidoogan eti ufayttidoogaa ammanettana danddayees. w24.08 15 ¶4; 16-17 ¶6-8

Kiitettida Phawuloosi genccanawu aybi koshshiyakko loytti erees. Kiristtaaneti metuwa gencciyo wode banttanan gidennan, Yihoowan ammanettanaadan eta hassayissiis. I yaatido gishshawu xalatettan hagaadan giis: “Godai tana maaddiyaagaa; taani yayyikke.” (Ibr. 13:6) Nu ishanttuppe amaridaageeti ha wodiyan yedetaa gencciiddi deꞌoosona. Nuuni etawu woossiyogee eta siiqiyogaa bessana danddayiyo issi oge; qassi issi issitoo etawu koshshiyabaa immiyogan maaddana danddayoos. Gidikkokka, ‘Kiristtoos Yesuusan Xoossaa milatidi deꞌanawu dosiya ubbay yedetettanaagaa’ Geeshsha Maxaafay geeshshidi yootees. (2 Xim. 3:12) Hegaa gishshawu, sinttappe yaana waassiya wodiyawu nuuni ubbay giigettana koshshees. Nuuni ubbatoo kumetta wozanan Yihoowan ammanettana koshshees. Qassi sinttappe nuna ayba metoy gakkikkokka, genccanaadan I nuna maaddanaagaa ammanettoos. I baayyo ammanettidi goynniya ubbaa ba keerido wodiyan shemppissana.—2 Tas. 1:7, 8. w24.09 13 ¶17-18

Qoronttoosa asati haattan muukettanaadan maaddidabay aybee? (2 Qor. 10:4, 5) Xoossaa Qaalaynne wolqqaama gidida A geeshsha ayyaanay eti bantta deꞌuwan muleera laamettanaadan maaddiis. (Ibr. 4:12) Kiristtoosabaa yootiya mishiraachchuwa ammanida Qoronttoosan deꞌiya asay mattottiyogaa, wuuqqiyogaanne attuma asa gidiiddi attumaageetuura zinꞌꞌiyogaa mala iita oosota aggidosona. (1 Qor. 6:9-11) Qoronttoosa asatuppe amaridaageeti muleera laamettana koshshikkonne, Kiristtaane gidanawu yaatiyogee keehi deexxiyabadan qoppibookkona. Eti merinaa deꞌuwawu efiya xuntta ogiyara baanawu loytti baaxetana koshshiis. (Mat. 7:13, 14) Neeni haattan muukettanawu iita meeziya woy iitabaa oottiyogaa agganawu baaxetaydda deꞌay? Laamettanawu baaxetiyogaa aggoppa! Neeni iitabaa oottanawu amottiyogaa eqettanaadan maaddana mala Yihoowi ba geeshsha ayyaanaa immanaadan woossa. w25.03 6 ¶15-17

Issi allaalliya xeelliyagan Yihoowa qofaa akeekanawu I maaddanaadan woossa. Nuuni kuuyiyobay Yihoowa ufayssiya ufayssennaakko eranaadan I hayyuwa nuussi immanawu qaalaa geliis. I he hayyuwa “borennan ubbau kehatettan” immees. Kaaletuwa immanaadan Yihoowa woossa simmada A zaaruwa akeekanawu baaxeta. Leemisuwawu: Neeni issisaa biishin neeyyo ogee balettikko, he heeran deꞌiya issi asa maaduwa oychchaasa. Shin I zaariyobaa siyennan aggada buutee? Beennaagee qoncce. I yootiyo kaaletuwa loytta ezggaasa. Hegaadankka, Yihoowa hayyuwa demmanawu woossa simmada ne hanotaara gayttiya, Geeshsha Maxaafay yootiyo higgetanne maarata pilggiyogan A zaaruwa akeekanawu baaxeta. Leemisuwawu, issippe wodiya aattiyosaa neeni baanawu woy agganawu kuuyiyo wode, dajjetidi allaxxiyogaa, iita asatuura zuppetiyogaa, qassi ne koyiyobaappe aaruwan Xoossaa Kawotettaabaa kaseyana koshshiyogaa xeelliyagan Geeshsha Maxaafay yootiyobaa pilggana danddayaasa.—Mat. 6:33; Roo. 13:13; 1 Qor. 15:33. w25.01 16 ¶6-7

Ayyaanaa gannatiyan deꞌiyageetunne hegaappe kareera deꞌiyageetu deꞌoy ay malakkonne Isiyasa hiraagay loytti qonccissees. Yihoowi baayyo goynniyageetussi ayyaanaaban koshshiyabaa palahissidi immees. Nuuyyo A geeshsha ayyaanay, Geeshsha Maxaafaynne gidi palahiya ayyaanaabaa qumay deꞌiyo gishshawu, ‘maana, uyananne ufayttana danddayoos.’ (Ajjuutaa 22:17ra gatta xeella.) Shin ayyaanaa gannatiyappe kareera deꞌiyageeti ‘namisettoosona, saamettoosonanne yeellatoosona.’ Xoossaara etawu dabboti baawa. (Amo. 8:11) Yihoowi ba asawu ayyaanaabaa qumaa gujjin, koshshiyabaa darissidi immees. (Yuu. 2:21-24) Geeshsha Maxaafaanne Geeshsha Maxaafaa qofay deꞌiyo nu xuufetu baggaara, nu websaytiya baggaara, qassi galchchaa, woradaanne killiliya shiiqotu baggaara I hegaadan oottees. Nuuni hegeetuppe ubbatoo goꞌettana danddayiyo gishshawu payyanne gazddidaageeta. w24.04 21 ¶5-6

Neeni issi uraara aqo oyqqanawu qoppada issippe wodiya aattanawu qoppikko, neeni issisan gayttada woy silkkiyan he uraara haasayana danddayaasa. Neeni he ura siiqidoogaanne abaa erana koyiyoogaa qoncciyan yoota. (1 Qor. 14:9) Koshshikko, I loytti qoppidi zaaranaashin amarida wodiyawu naaga. (Lee. 15:28) Qassi he uri koyennaba gidikko A qofaa bonchcha. Issi uri nena siiqiyogaa neeyyo yootikko shin? He uri hegaa neeyyo yootanawu xala gidana koshshennan aggenna; yaatiyo gishshawu awu kehatettaanne bonchchuwa bessa. Neeni aqo oyqqanawu qoppada issippe wodiya aattiyoogaa doommanaakkonne kuuyanawu neessi wodee koshshikko hegaa yoota. Shin, danddayettida keenan sohuwara ne zaaruwa yoota. (Lee. 13:12) Neeni koyana xayikko kehatettaaninne qoncciyan yoota. Shin neenikka A siiqikko aqo oyqqanawu qoppidi intte issippe aattiyo wodiyan hanana danddayees gaada neeni qoppiyobata issippe tobbite. Ne qofay he uraagaappe dummatana danddayees. w24.05 23-24 ¶12-13

Daawiti Israaꞌeela olanchchati dunkkaanidosaa biis. He wodekka I naꞌa gidennan aggenna, wotaaddarati keehi yayyidoogaa I akeekiis; ayssi giikko, Gooliyada giyo adussa mino Pilisxxeema bitanee ‘Israaꞌeela olanchchata naassiis.’ (1 Sam. 17:10, 11) Wotaaddarati Gooliyadi keehi gita gidiyogaaninne I eta bolli haasayidoban xeelaa wottido gishshawu keehi yayyidosona. (1 Sam. 17:24, 25) Shin, Daawiti haraban xeelaa wottiis. Gooliyadi Israaꞌeela olanchchatu bolli qilliicciyo wode, “de7o Xoossaa” cayidoogaa Daawiti eriis. (1 Sam. 17:26) Daawiti Yihoowabaa qoppiis. I dorssaa heemmiyo wode maaddida Xoossay ha hanotankka maaddanaagaa ammanettiis. Daawiti Xoossaa maaduwan ammanettiyogan Gooliyadaara olettidi xooniis!—1 Sam. 17:45-51. w24.06 21 ¶7

Nuuni Yihoowawu haggaazennaakko nu deꞌoy ay mala gidanaakko qoppana danddayoos. Yihoowawu haggaaziyogee nuussi loꞌꞌo gidiyoy aybissakko hassayiyogee nuuni awu ammanetti deꞌanaadan maaddana. Nuuni mazamuraawiyagaadan, “Taassa gidikko, taani Xoossaa matan de7iyoogee taayyo lo77o” yaagana. (Maz. 73:28) Ha wurssetta gallassatun nuna ay metoy gakikkokka, nuuni “worddotenna de7o Xoossaayyo” oottiyageeta gidiyo gishshawu, genccana danddayoos. (1 Tas. 1:9) Xoossay nuussi qoppeesinne ubbatoo nuna maaddees. Yihoowi beni ba ashkkarata kaafidoogaadan ha wodiyan nunakka kaafees. Mata wode gita waayee saꞌan denddana. Shin nuuni nurkka deꞌokko, ayssi giikko Yihoowi nunaara deꞌees. Nuuni “xalidi, ‘Godai tana maaddiyaagaa; taani yayyikke’” gaana danddayoos.—Ibr. 13:5, 6. w24.06 25 ¶17-18

Israaꞌeelan kawo gididi haarida 40ppe dariya asatubaa Geeshsha Maxaafay yootees. Loꞌꞌo kawotikka iitabaa oottidosona. Loꞌꞌo kawo gidida Daawitabaa ane beꞌoos. Yihoowi hagaadan yaagiis: ‘Ta ashkkaray Daawiti ta sinttan suurebaa xalaalaa oottiiddi, ba kumetta wozanan tana kaalliis.’ (1 Kaw. 14:8) Shin, I asa machcheera zinꞌꞌiisinne I azinaa olan worissanawu maqettiis. (2 Sam. 11:4, 14, 15) Shin ammanettibeenna kawotuppe daroti issi issi loꞌꞌobata oottidosona. Robiꞌaamabaa ane beꞌoos. I Yihoowa sinttan “iitabaa oottiis.” (2 Odi. 12:14) Shin, Robiꞌaami ba kawotettaappe tammu Israaꞌeela zerettati shaahettanaadan Xoossay yootido azazuwa azazettiis. Qassi I katamatussi qatota gimbbidoogan asay goꞌettiis. (1 Kaw. 12:21-24; 2 Odi. 11:5-12) Yihoowi issi kawoy ammanettidaagaa woy ammanettennaagaa gaanaadan oottidabay aybee? Yihoowi A wozanaa hanotaa, I ba nagaran zilꞌꞌettidi laamettidoogaanne tumu goynuwa mintti kaalliyogaa akeekidoogaa gidiyogee qonccee. w24.07 20 ¶1-3

Layttay 18 kumibeenna issi naꞌi gita nagaraa oottikko cimati waatanee? Galchchaa cimatuppe naaꞌꞌati he naꞌaaranne Kiristtaane gidida A yelidaageetuura haasayanawu hanotaa giigissoosona. Yelidaageeti bantta naꞌi koshshiyaban laamettanaadaaninne ba nagaraappe simmanaadan maaddanawu ay oottidaakko cimati oychchoosona. He naꞌi yelidaageeti yootiyo zoriya siyidi ba qofaanne eeshshaa laammikko, he naaꞌꞌu cimati cimatu konttee he naꞌaaranne A yelidaageetuura gayttana koshshenna giidi kuuyana danddayoosona. Bantta naata siiquwan seeriyogee Yihoowi yelidaageetussi immido aawatetta gidiyogaa cimati eroosona. (Zaa. 6:6, 7; Lee. 6:20; 22:6; Efi. 6:2-4) Cimati he naꞌi koshshiya maaduwa demmiiddi deꞌiyakko shaakki eranawu yelidaageeta issi issitoo oychchoosona. Shin haattan muukettida naꞌi iitabaa oottiyogaa aggennaba gidikko cimati waatanee? Hegaadan gidikko heezzu cimati aaranne Kiristtaane gidida A yelidaageetuura gayttidi haasayoosona. w24.08 24 ¶18

Nuuni ubbay imotaa ekkiyo wode keehi ufayttoos. Shin nuuni imotaa immiyo wode hegaappe aaruwan ufayttoos. Yihoowi nuna hegaadan medhdhido gishshawu, nuuni loytti ufayttanaadan maaddiyabaa oottana danddayoos. Nuuni haratuyyo immana danddayiyo ogiya qoppidi hegaadan oottiyo wode kaseegaappe aaruwan ufayttana danddayoos. Yihoowi hegaadan nuna medhdhidoogee ufayssiyaba. (Maz. 139:14) Haratussi immiyageeti ufayttiyogaa Geeshsha Maxaafay yootiyo gishshawu, Yihoowi “ufayttiya Xoossaa” gidiyogaa metootennan akeekana danddayoos. (1 Xim. 1:11) Haratussi immiyogan koyroy Yihoowa; qassi immiyogan ooninne aara likketenna. Yihoowi nuussi deꞌuwa immiis; qassi nuuni ‘qaaxxiyoynne deꞌiyoy’ aana. (Oos. 17:28) “Lo77o imo ubbainne kumetta woito ubbai” Yihoowappe yees. (Yaaq. 1:17) Nuuni ubbaykka haratuyyo immiyogan kaseegaappe aaruwan ufayttana koyiyogee qoncce. Keha gidida Yihoowa leemisuwa kaalliyogan yaatana danddayoos.—Efi. 5:1. w24.09 26 ¶1-4

Galchchawu oottiya amaridaageeti cima gidanawu etappe koyettiya darobay deꞌiyo gishshawu, cima gidanawu mule danddayokko giidi qoppana danddayoosona. Shin Yihoowikka woy A dirijjiteekka intte wottiyobi baynnaageeta gidanaadan naagennaagaa hassayite. (Yaaq. 3:2) Qassi wolqqaama gidida Yihoowa ayyaanay intteppe koyettiyabata kunttanaadan inttena maaddana. (Pili. 2:13) Intte loytti bessana koyiyo issi eeshshay deꞌii? Hegaabaa Yihoowa woossite. He eeshshaabaa pilggite; qassi he eeshshaa loytti bessana danddayiyo ogiya yootanaadan issi cimaa oychchite. Yaanikko baaxetiyogaa aggoppite! Intte kaseegaappe aaruwan Yihoowawu haggaazanaadaaninne galchchaa maaddanaadan inttena loohissana mala A woossite. (Isi. 64:8) Intte cima gidanawu baaxetiyo baaxiya Yihoowi darissidi anjjanaadan amottoos. w24.11 25 ¶17-18

Nuuni Yihoowawu daro layttaa haggaazidoogawu I nuussi atto gaana bessees giidi nuuppe ooninne qoppana koshshenna. Nuuni ayyo oottido ubbabaa Yihoowi dogennaagee tuma. Wozoy I nuuyyo coo immdobappe attin, nuuni awu haggaazido gishshawu qanxxiyoba gidenna. Hegaa gishshawu, nuuni Yihoowawu darobaa oottidoogaappe denddidaagan A maarotay nuussi bessees giidi qoppiyogee bala. Hegee wozoy nuussi koshshenna giidi qoppiyogaa mala. (Galaatiya 2:21ra gatta xeella.) Kiitettida Phawuloosi Yihoowawu ay keena oottikkokka, Yihoowa maarotaa demissiyay hegaa gidennaagaa eriis. Yaatin I Yihoowawu minni oottidoy aybissee? Yihoowi awu bessido kehatettawunne maarotawu A nashshiyogaa bessanaassa. (Efi. 3:7) Phawuloosaagaadan nuuni ubbatoo minnidi haggaaziyoy Yihoowa maarotaa demmanawu gidennan, A maarotaa nashshiyogaa bessanaassa. w25.01 27 ¶5-6