Naase

Danddayettida keenan daroti nuuni yootiyobaa siyanaadaaninne ha wodiyan nunaara geeshsha goynuwa goynnanaadan woossoos. Shin nuuni siiqiyo nu so asaa gujjin, ha wodiyan nuuni yootiyobaa siyennaageeti waananee? Gita Baabilooni xayuwa beꞌidi Yihoowa ammaniyogaa doommida asata I koyikko ashshana danddayees. Yaatikko, hegaabaa ha wodiyan etawu aggennan yootiyogee keehi koshshiyaba. Nuuni haꞌꞌi yootiyobaa eti he wode hassayana danddayoosona. (Hizqqeela 33:33ra gatta xeella.) Geella eti nuuppe siyidobaa hassayidi wodee wuriichchennan deꞌishin nunaara Yihoowawu goynnana danddayoosona. Piliphphisiyusan qasho keettaa naagiyagee biittay daro qaaxxi simmin Yihoowa ammanidoogaadan, Gita Baabilooni xayuwan alamee qaaxxi simmin, ha wodiyan siyennan ixxida amaridaageeti he wode Yihoowa ammanana danddayoosona.—Oos. 16:25-34. w24.05 17 ¶9-10

Kiitettida Phawuloosi Ibraawen deꞌiya Kiristtaanetussi xaafidobaappe nuuni keehi koshshiyabaa tamaarana danddayoos. Amaridaageeti ayyaanaaban dicciyogaa aggidosona; eti ‘ayyaanaaban mino qumaa miyogaa aggidi, zaarettidi maattaa uyanawu koyidosona.’ (Ibr. 5:12) Galchchaa baggaara Yihoowi eta tamaarissiyo oorattabaa eti ammanibookkona. (Lee. 4:18) Leemisuwawu, Kiristtoosa yarshshuwan 30 gidiya layttaappe kase Muuse Higgee shaarettikkokka, Ayhuda ammanuwa kaalliya daroti haꞌꞌikka Muuse Higgiya kaalloosona. (Tii. 1:10) Phawuloosi ayyaanay kaalettin Ibraawen deꞌiya Kiristtaanetuyyo xaafido dabddaabbiya nabbabiya ooninne he maxaafan ayyaanaaban mino qumay deꞌiyogaa akeekana danddayees. He dabddaabbee goynuwara gayttidaagan Yihoowi Yesuusa baggaara giigissido ooratta ogee keehi aadhdhiyogaa eti akeekanaadaaninne xala gididi aggennan sabbakanaadan maaddiis.—Ibr. 10:19-23. w24.04 6 ¶15

Addaamenne Hewaana Seexaanaara hashetiyogan Xoossaa Yihoowa bolli makkalido wodiyappe doommidi daro miiloone asay hayqqiis. Eti sinttappe waananee? Amaridaageeti, Kiristtoosa ammanettidi kaallida 144,000ti, saluwan hayqqenna deꞌuwa deꞌanawu denddana. (Ajj. 14:1) Yihoowa siiqiya ammanettida daro attuma asaynne macca asay ‘xillotuura hayquwappe denddana;’ qassi eti Kiristtoosa Shaꞌu Layttaa Haaruwaninne wurssetta paaciyan xillo gididi deꞌikko saꞌan merinawu deꞌana. (Dane. 12:13; Ibr. 12:1) Qassi Yihoowawu mule haggaazi erenna woy ‘iitabaa oottida’ ‘xillo gidenna asati’ Shaꞌu Layttaa Haaruwan bantta eeshshaa laammanawunne ammanettida Yihoowa ashkkara gidanawu injjiya demmana. (Yoh. 5:29; Luq. 23:42, 43) Shin keehi iitabaa oottida amaridaageeti hayquwappe denddennaadan I kuuyana.—Luq. 12:4, 5. w24.05 2 ¶3; 5 ¶15; 6 ¶17

Yihoowan nashettanawu koyiya uri ubbatoo, ‘ba wozanan tumaa haasayana’ koshshees. (Maz. 15:2) Hegee worddotennan aggiyogaa xalla gidenna. Yihoowi nuuni haasayiyonne oottiyo ubbaban ‘tumanchcha’ gidanaadan koyees. (Ibr. 13:18) Hegee keehi koshshiyaba; “Aissi giikko, GODAI iitaa oottiyaageeta ixxees; shin suuretuyyo i ulottees.” (Lee. 3:32) ‘Bantta wozanan tumaa haasayiyageeti’ hara asi eta beꞌiyo wode xalaalan gidennan, banttarkka deꞌiyo wodekka Xoossawu azazettoosona. Eti cimmiya asa gidokkona. Cimmiya uri Yihoowa higgetuppe amaridaageeti loꞌꞌo gidokkona giidi qoppiyogaa doommana danddayees. (Yaaq. 1:5-8) Keehi koshshennabata giidi I qoppiyo allaalletun Yihoowawu azazettennan aggana danddayees. I azazettennan ixxiyo wode iitabay A gakkennaba milatikko, hanttaaraba oottiyogaa doommana danddayees. I Xoossawu haggaaziiddi deꞌiyabadan qoppikkokka A goynuwa Yihoowi ekkenna. (Era. 8:11) Shin nuuni ubbaban tumanchcha gidanawu koyoos. w24.06 10 ¶7-8

Yihoowa asay Xoossaa Qaalan deꞌiya tumaa siiqees. Nu ammanuwawu denddoy hegaa. (Roo. 10:17) Yihoowi Kiristtaane galchchaa “tumatettau tuussanne tuuqe” oottidoogaa mintti ammanoos. (1 Xim. 3:15) Seexaanay nuuni Geeshsha Maxaafan woy Xoossaa dirijjitee immiyo kaaletuwan ammanettiyogaa agganaadan keehi koyees. (Efi. 4:14) Matan Dabloosi asay ubbay cimettidi Yihoowa eqettanaadan hanttaara wordduwa yootana. (Ajj. 16:13, 14) Seexaanay Yihoowa asaa balettanawu loytti baaxetanaagaakka nuuni eroos. (Ajj. 12:9) Tumaanne wordduwa shaakki eriyogeenne tumawu azazettiyogee keehi koshshiyoy hegaassa. (Roo. 6:17; 1 PHe. 1:22) Gita waayiya wode attanawu hegee keehi koshshees! w24.07 8 ¶1-3

Yihoowi Israaꞌeelatussi higgeta immido wode eti hegeeta naaganawu qaalaa gelidosona. Qassi eti he higgeta azazettikko, Yihoowi eta naaganawunne anjjanawu qaalaa geliis. Gidikkokka, eti A higgeta azazettennabanne hara xoossatussi goynniyaba gidikko, I eta naagiyogaa aggananne eti waayettana. Shin hegaa giyogee Yihoowi eta muleera aggi bayees giyogaa gidenna. Eti bantta ‘Xoossaa Yihoowakko simmananne A qaalawu azazettana’ danddayoosona. (Zaa. 30:1-3, 17-20) Eti zilꞌꞌettidi laamettana danddayoosona. Eti yaatikko, Yihoowi etakko shiiqananne eta zaarettidi anjjana. Israaꞌeelati Yihoowa bolli zaari zaari makkalidosona. Hegaa gaasuwan eti waayettidosona. Shin Yihoowi zaarettidi awu goynnanaadan ba asaa maaddiyogaa aggibeenna. Xoossay ba asay zilꞌꞌettidi laamettanaadaaninne baakko simmanaadan minttettanawu ba erissidobaa yootiyageeta zaari zaari kiittiis.—2 Kaw. 17:13, 14. w24.08 9 ¶4-5

Yesuusi 33 M.Ln, hayqqi simmin, Yerusalaameeninne Yihudan deꞌiya Ibraawe Kiristtaaneta daro metoy gakkiis. Kiristtaane galchchay eqqin darin takkennan, eta wolqqaama yedetay gakkiis. Eti 20 gidiya layttaappe simmin, namisaanne hiyyeesatettaa gaasuwan keehi tuggatidosona. (Oos. 11:27-30) Shin, Kiristtaaneta sinttappe gakkanabaara geeddarssiyo wode, 61 M.L. heeran amarida sarotettaa demmidosona. He wode, kiitettida Phawuloosi dabddaabbiya etawu xaafanaadan Yihoowi denttettiis. He dabddaabbiyan odettida zoree mata wode gakkanabawu eti giigettanaadan maaddiyabaa yootees. Ibraawe Kiristtaanetussi dabddaabbee koshshiya wodiyan xaafettiis; ayssi giikko he Kiristtaaneti demmido sarotettay daro takkibeenna. Phawuloosi mata wode he Kiristtaaneta gakkana gita waayiya genccanaadan maaddiyabaa zoriis. w24.09 8 ¶1-2

Metoy nuna gakkiyo wode nu mala Kiristtaaneti loytti ‘minttettoosona.’ Yihoowi nuna siiqiyogaa nu ishanttunne michchonttu baggaara qonccissees. Eti nunaara wodiya aattiyogaaninne nuussi siyettiyabaa nuuni yootiyo wode ezggiyogan nuna minttettana danddayoosona. Nu ishanttinne michchontti issi xiqisiya nuuyyo nabbabiyogan woy nunaara woossiyogan nuna minttettana danddayoosona. (Roo. 15:4) Issi issitoo issi ishay woy michchiya nuuni Yihoowagaadan qoppanaadan odana danddayoosona. Qassi hegee nuuni ubbatoo genccanaadan nuna maaddana danddayees. Nu ishanttinne michchontti hara ogetunkka nuna maaddoosona; leemisuwawu, nuuni unꞌꞌettiyo wode nuna qumaa shoobboosona. Harati nuna maaddanaadan oychchiyogee issi issitoo koshshana danddayees. (Lee. 17:17) Eti nuuyyo siyettiyabaa woy nuuyyo koshshiyabaa erennan aggana danddayoosona. (Lee. 14:10) Neeyyo siyettiyabaa kayma gidida ne laggetuyyo oda. Nena eti aybin maaddanaakko yoota. Neeni yayyennan haasayissiyo issi cimaara woy naaꞌꞌu cimatuura haasayana danddayaasa. Amarida michchontti kayma gidida hara michchonttuura haasayiyogan minttettuwa demmidosona. w24.10 10 ¶15-16

Daroti payya gididi deꞌanawu loꞌꞌo qumaa moosonanne bollaa minttiyabaa oottoosona. Shin hegee eti merinawu deꞌanaadan oottennaagaa eroosona. Geella eti merinawu deꞌiyogee danddayettennabadan qoppana danddayoosona. Shin Yohaannisa 3:16 ninne 5:24n odettidaagaadan, asay “merinaa deꞌuwa” demmana danddayiyogaa Yesuusi yootiis. Issi gallassi, Yesuusi malaalissiyabaa oottidi daro shaꞌu asaa daabbuwanne moliya miziis. Hegee malaalissiyaba gidikkokka, I wonttetta galla yootidobay hegaappe aaruwan malaalissiyaba. He cora asay A kaallidi Galiila Abbaa doonaa matan deꞌiya Qifirinaahooma yiis; qassi I asay hayquwappe denddananne merinawu deꞌana danddayiyogaa etawu yan yootiis. (Yoh. 6:39, 40) Yesuusi daroti hayquwappe denddana danddayiyogaa, qassi neeninne ne siiqiyogeeti merinawu deꞌana danddayiyogaa yootiis. w24.12 8 ¶1-2

Alamiya Payyatetta Dirijjitee mati kessido irpporttiyan qonccissidoogaadan, daro azinati bantta machchota wadhdhoosona, eta bolli meqetti baynnabaa haasayoosona woy hara ogiyan eta qohoosona. Hegaadan oottiya issi azinay asaa sinttan ba machchiyo bonchchikkonne son O naaqqiyagaa gidana danddayees. Amarida azinati bantta machchota naaqqiyoy aybissee? Geella eta makkalanchcha aaway dichchido gishshawu hegaa mala eeshshaa bessiyogee bala gidenna giidi qoppana danddayoosona. Harati qassi bantta wogan daro attumaageeti bantta machchota naaqqiyo gishshawu hegaadan oottoosona. He attumaageeti wolqqaama gididabadan banttawu siyettana mala bantta machchotuyyo meqettaa iitana bessiyabadan qoppoosona. Hara attumaageeti qassi bantta yiilluwa mittana koshshiyogaa tamaaribookkona. Amarida attumaageeti ubbatoo pornograafiya beꞌiyogee eti maccaasaabaanne mattumaa gaytettaabaa iitabaa qoppanaadan oottana danddayees. Hegaa bollikka, koronaa harggiya wodiyan unddenna azinati bantta machchota qohiyogaa doommidoogaa daro eranchchati akeekidosona. Gidikkonne, issi azinay ba machchiyo naaqqana bessiyo ay gaasoykka baawa. w25.01 8 ¶2-3

“Neeni ne Xoossaa Yihoowa ne kumetta wozanaaninne ne kumetta shemppuwan, qassi ne kumetta qofaaninne ne kumetta wolqqan siiqana bessees.” (Mar. 12:30) Yesuusi Muuse Higgiyan odettida ubbaappe aadhdhiya azazoy hagaa gidiyogaa yootiis. Nuuni Yihoowa siiqiyo siiqoy nu wozanaara hegeekka, nu koyiyobaaranne nuuyyo siyettiyabaara gayttidaba gidiyogaa hassaya. Hegaa bollikka, hegee nu kumetta shemppuwan awu aqiyogaara, qassi nu abbiyara hegeekka nu wolqqaara gayttidaba. Shin, Yihoowa siiqiyogee nu qofaara hegeekka, nu qoppiyo ogiyarakka gayttidaba. Nuuni Yihoowa qofaa muleera akeekana danddayennaagee tuma. Shin nuuni Yesuusa qofaa xannaꞌiyogan Xoossaa qofaa akeekana danddayoos; ayssi giikko, Yesuusi ba Aawaagaadan qoppees.—1 Qor. 2:16. w25.03 8 ¶1

Koyro bitanee Addaamee nagaraa oottanaappe kase wottiyobi baynna asa gidiyogaadan Yesuusikka wottiyobi baynna asa. (1 Qor. 15:45) Yesuusi nuuyyo hayqqido gishshawu, Addaameppe halidabaa zaarettidi demmanawu koshshiya waagaa qanxxiis. (Roo. 5:19) Yaatiyo gishshawu, Yesuusi ‘wurssetta Addaama’ geetettiis. Addaameppe halidabaa zaaretti demmanawu, wottiyobi baynna hara uri qanxxiyobay hegaappe simmin koshshenna. Yesuusi “naa77anttennan issitoo” hayqqiis. (Ibr. 7:27; 10:12) Nuuni Yihoowara dabbotanaadan oottiyabay aybee? Yihoowi nu nagaray atto geetettanaadan ogiya giigissiis. Yesuusi nu nagaraa waagaa qanxxanawu wottiyobi baynna ba deꞌuwa yarshshiis.—Ibr. 9:14. w25.02 5 ¶12-13

Nuna metoy gakkiyo wode keehi koshshiyaban xeelaa wottana bessees. Dabloosi metoy nuna gakkiyo wode nuuni Yihoowa aggana giidi yootees. Yaatiyo gishshawu, nuna metoy gakkin nuuni oottiyobay Yihoowa azzanttana woy ufayssana danddayees. (Iyy. 1:10, 11; Lee. 27:11) Nuna metoy gakkishinkka nuuni Yihoowawu ammanettidi deꞌikko A siiqiyogaanne Dabloosi worddanchcha gidiyogaa bessoos. Kawotettay naaqqiyogaa, miishshaa metuwa, asay mishiraachchuwa siyennaagaa woy hara metuwa neeni genccaydda deꞌay? Yaatikko, neeni Yihoowa ufayssana danddayiyo hanotan deꞌiyogaa hassaya. I ne danddayiyogaappe aaruwan paacettanaadan eeno geennaagaakka hassaya. I neeni genccanaadan neessi wolqqaa immana. w24.06 22 ¶9

Neeni neessi keehi paace gididabaa eray? Nuuni shugo gididobaa sheneho giyogeenne woy nuuni mino gidiyo gishshawu nagaraa oottokko giidi qoppiyogee bessennaba. (1 Yoh. 1:8) ‘Ayyaanaaban mino gididaageetikka’ naagettana xayikko, paacettana danddayiyogaa Phawuloosi yootidoogaa hassaya. (Gal. 6:1) Nuuni nuussi tumanchcha gidananne nu shugo miyyeta erana koshshees. (2 Qor. 13:5) Nuuni nuussi keehi paace gididabata erikko, waatana koshshii? He paaciya loytti eqettanawu baaxetana koshshees! Leemisuwawu, beni wode katamaa dirssawu keehi mino gidenna sohoy penggiya. Yaatiyo gishshawu katamaa penggiya loytti naagana koshshees. Hegaadankka, paaciya loytti eqettanawu nu shugo miyyiya xoonanawu baaxetana koshshees.—1 Qor. 9:27. w24.07 15 ¶5-7

Hachchi gallassaa xiqisiyan qonccidaagaadan, mishiraachchuwa sabbakiyogee loꞌꞌo oosotuppe issuwa. Yaatiyo gishshawu nuuni Xoossaa Qaalaa nabbabiyo wodenne wotti dentti qoppiyo wode Yihoowa ammaniyo ammanoy minnees; qassi A Kawotettaabaa markkattiyogee keehi koshshiyoy aybissakko loytti akeekoos. Nuuni Xoossaa Qaalan loytti goꞌettanawu eesuwan nabbabana, xannaꞌananne wotti dentti qoppana koshshenna. Wodiya bazzana koshshees. Neeni nabbabiyo xiqisiya akeekanawu metootikko, hegaa coo gaada kanttoppa. He xiqisiya qonccissuwa demmanawu Yihoowa Markkati Geeshsha Maxaafaa Xannaꞌanawu Maaddiya Xuufiya woy hara xuufeta pilgga. Neeni wodiya bazzada xannaꞌikko, Xoossaa Qaalay tuma gidiyogaa kaseegaappe aaruwan ammanettaasa. (1 Tas. 5:21) Neeni loytta ammanettiyo wode ne eridobaa haratussi yootiyogan loytta ufayttaasa. w24.04 15 ¶4-5

Yihoowi “kehanne atto giyaagaa” gidiyogaa Daawiti yootiis. (Maz. 86:5) Mikiyasi hagaadan giis: “Naaquwaa atto yaagiyaagee, . . . makkalaa qoodennaagee ne mala Xoossai oonee?” (Mik. 7:18) Qassi Isiyasi hagaadan giis: “Iitai ba oosuwaa, nagaranchchaikka ba qofaa aggo; GODAAKKO i simmo. Simmin i a maarana. I nu Xoossaakko simmo. Simmin i ayyo coo atto gaana.” (Isi. 55:7) Qoronttoosa galchchay Yihoowa leemisuwa kaallanawu he bitaniyawu atto gaananne A siiqiyogaa bessana koshshiis. Eti ba nagaran zilꞌꞌetti laamettida urawu atto giyogee, ‘ubbaban azazettiyogaa’ bessees. He bitanee galchchaappe kiyin amarida agina xalaalay aadhdhikkokka, zilꞌꞌettidi laamettiis. Hegaa gishshawu, cimati I galchchawu simmanaadan paqqadanawu takkana koshshenna. w24.08 17-18 ¶12-13

Nuuni wurssettay keehi matido wodiyan deꞌoos! Mata wode Yesuusi ubba asaa bolli pirddana. He pirddaappe kase ha saꞌaa bolli haniyabata Yesuusi qonccissiis. I beettenna hanotan qoncciyo wodiyawunne “wodiya wurssettawu malaatay” aybakko bana kaalliyageetuyyo yootiis. (Mat. 24:3) Ha hiraagay Maatiyosa shemppo 24ninne 25n, qassi Marqqoosa shemppo 13ninne Luqaasa shemppo 21n odettiis. Yesuusi nuuni giigettanaadan maaddanawu heezzu leemisota yootiis. He leemisoti nuuyyo zore mala. Hegeeti dorssaanne deeshshaabaa, cinccanne cincca gidenna geelaꞌotubaanne taalanttiyabaa yootiya leemisota. Ha leemisoti ubbay Yesuusi issi uray oottiyobaa beꞌidi pirddanaagaa nuuni akeekanaadan maaddoosona. w24.09 20 ¶1-2

Nuussi gita leemiso gidida Yesuusabaa qoppite. I ubbabaa oottidoy ba Aawaanne asaa siiqido gishshataassa. He siiqoy I minni oottanaadaaninne amaridaageeti kariyo oosota haratuyyo oottanaadan denttettiis. (Mat. 20:28; Yoh. 13:5, 14, 15) Inttena denttettiyabay siiqo gidikko, Yihoowi inttena anjjananne galchchawu oottiyageeta gidiyogaa mala, ayyaanaaban kessido halchchota gakkanaadan inttena maaddana. (1 Phe. 5:5) Banttana xoqqu ootti xeelliya asata ha alamee darotoo nashshees. Shin Yihoowa dirijjitee hegaa mala gidenna. Yesuusaagaadan, harata siiqiya issi ishay harata haaranawu woy harati A xoqqu ootti xeellanaadan koyenna. Harati A xoqqu ootti xeellanaadan koyiya issi uri galchchan sunttettikko asay kariyo oosota woy Yihoowa alꞌꞌo dorssatuyyo koshshiyabata oottennan aggana danddayees. I hegaa mala oosota oottana bessennabadan qoppana danddayees.—Yoh. 10:12. w24.11 15 ¶6-7

Kumetta saꞌan, “imota” gididi oottiya daro ishantti nuussi koshshoosona. (Efi. 4:8) Neeni haattan muukettida isha gidikko, aawatettaa ekkada maaddana danddayay? (Lee. 3:27) Neeni galchchawu oottiyagaa gidanawu baaxetaydda deꞌay? Neeni galchchawu oottiyagaa gidikko, cima gidada ne ishantta maaddanawu baaxetay? Kawotettaa Mishiraachchuwa Yootiyageetu Timirtte Keettan tamaaranawu ne hanotaa giigissana danddayay? Ha timirtte keettay nena darobaa loohissana; qassi Yesuusi nena loytti goꞌettanaadan maaddana. Neeni hegaadan oottana danddayennabadan neeyyo siyettikko Yihoowa woossa. Neessi imettiya aawatettaa neeni loytta polanaadan I ba geeshsha ayyaanaa baggaara nena maaddana mala woossa. (Luq. 11:13) Yesuusi ‘imota ootti’ sunttido ishantti oottiyobay ha wurssetta gallassatun I nuna kaalettiyogaa bessees. (Mat. 28:20) Siiqiyanne keha Kawoy nuussi deꞌiyo gishshawu A keehi galatoos; I nuussi koshshiyabaa ereesinne ishanttu baggaara nuna maaddees. w24.10 23 ¶16-17

Xoossaa asay waayettanaadaaninne azzananaadan oottiya ubbabay shin? Wurssettan, hegeeti ‘dogettananne Xoossaa ayfiya sinttaappe geemettana.’ (Isi. 65:16) Yihoowi nu metuwa xayssana; qassi wurssettan he metoy nuna ay keena qohidaakkokka nuuni hassayokko. Gidikkonne, shiiqota shiiqiyo wode nuuni woppu goosinne ha iita alamee gattiyo unꞌꞌissiyabaa qoppokko. Qassi nuuni Xoossaa ayyaanaa ayfiya macara gidida siiquwa, ufayssaa, sarotettaa, kehatettaanne ashkketettaa bessiyo wode nu ishanttinne michchontti woppu gaanaadan maaddoos. (Gal. 5:22, 23) Nuuni Xoossaa dirijjitiya yame gidiyo gishshawu, keehi galatoos! Ubbatoo ayyaanaa gannatiyan deꞌiyageeti Xoossay “ooratta saluwaanne ooratta sa7aa” ehaanawu gelido qaalay muleera polettishin beꞌana. w24.04 22 ¶9-10

Aqo oyqqanawu qoppidi issippe wodiya aattiyogee ufayssiyaba gidikkokka, hegee eti aqo oyqqanaadan oottana danddayiyo gishshawu keehi koshshiyaba. Aqo laggeti deꞌuwan deꞌido wode ubban issoy issuwa siiqanawunne bonchchanawu bantta bullachchaa gallassi Yihoowa sinttan qaalaa geloosona. Nuuni qaalaa geliyobay ayba gidikkokka, hegaabaa kasetidi loytti qoppana koshshees. Aqo oyqqanawu qaalaa geliyogawukka hegee hanees. Aqo oyqqanawu qoppidi wodiya aattiyogee issoy issuwa eranawunne loꞌꞌobaa kuuyanawu maaddees. Kuuyiyobay aqo oyqqanaagaa woy agganaagaa gidana danddayees. Eti shaahettikko, issippe aattido wodee hada attiis giyogaa gidenna. Hegee eti issoy issuwara aqo oyqqana woy aggana koshshiyakko eranaadan maaddiis giyogaa. Aqo oyqqanawu qoppidi wodiya aattiyogaa bessiyagaadan xeelliyogee keehi koshshiyoy aybissee? Aqo oyqqibeennaageeti bessiyagaadan qoppikko, ekkanawu woy gelanawu qoppennan issi uraara wodiya aattokkona. w24.05 26-27 ¶3-4

Yelaga gidida Kiristtaaneti bantta ammanuwawu exatanawu issi issitoo yayyana danddayoosona. Leemisuwawu, eti lodda laamiyan ammanenna gaasuwa haratussi qonccissana koshshiyo wode yayyana danddayoosona. Aybissi? Eta asttamaareti lodda laamee tuma giidi tamaarissana danddayoosona. Intte aawa woy aayo gidikko, intte naati bantta ammanuwawu loytti exatanaadan waati maaddana danddayeetii? I woy A Medhdhidaagan ammaniyo gishshawu yeellatana bessennaagaa ammanettanaadan yootite. Aybissi? Daro saynttisttetikka deꞌoy qoppennan issi kutti doommibeennaagaa woy qaadadan yibeennaagaa ammanoosona. He saynttistteti deꞌuwan deꞌiya muttumurettida ubbabaa medhdhida eranchchay deꞌiyogaa bessiya naqaashaa demmidosona. Hegaa gishshawu, eti lodda laamiya timirttiyan ammanokkona. Hara ishanttinne michchontti meretan ammanaadan oottida gaasuwa intte naati pilggiyogee bantta ammanuwa minttanaadaaninne xala gidanaadan maaddana danddayees. w24.12 18 ¶14-15

Mishiraachchuwa siyanawu koyiya asay deꞌanaagaa Yesuusi ammanettiis. Hegee I ubbatoo yeemuwan sabbakanaadan maaddiis. Leemisuwawu, Yesuusi 30 M.L., wurssetta heeran, daroti mishiraachchuwa siyana koyiyogaa akeekiis; qassi I eta cahawu gakkida kattan leemissiis. (Yoh. 4:35) I issi laytta gidiya wodiyappe simmin bana kaalliyageetussi hagaadan giis: “Cahawu gakkida kattay daro.” (Mat. 9:37, 38) I guyyeppe zaarettidikka hagaadan giis: “Cahawu gakkida kattay daro, . . . Kattaa cakkanawu oosanchchata kiittana mala, cahaa oosuwa Godaa woossite.” (Luq. 10:2) Yesuusi mishiraachchuwa siyanawu koyiya asay deꞌiyogaa ammanettiis; qassi I asay siyido wode ufayttiis. Yesuusi bana kaalliyageeti sabbakiyobay loꞌꞌo ayfiya demissanaagaa etawu yootiyogan bantta oosuwan yeemottiyageeta gidanaadan maaddiis. w25.03 18-19 ¶15-16

Yihoowi baqati attiyosa. Wolqqaama uushuwa wode issi uri gonggoluwan gelidi attana danddayees. Hegaadankka, waayissiyabay nuna gakkiyo wode Yihoowi nuna naagees. Nuuni aara dabbotido dabbotay moorettennaadan maaddeesinne merinawu nuna qohana danddayiyabaappe naagees. Qassi nuna unꞌꞌissiyabaa woy waayissiyabaa sinttappe muleera xayssanawu I qaalaa geliis. (Hiz. 34:25, 26) Nuuni nu metuwappe Yihoowakko baqatana danddayiyo issi ogee woossiyogaa. Nuuni woossiyo wode Yihoowi ‘Xoossaa sarotettaa’ nuussi immiyogan nu wozanaanne nu qofaa naagees. (Pili. 4:6, 7) Yihoowi ubbatoo nu miyyiyan deꞌees. I “merinaa Zaallaa” gidiyo gishshawu nuuni an ammanettoos. (Isi. 26:3, 4) I gelido qaalaa ubbatoo naagees, nu woosaa siyees, qassi koshshiyo wode nuna maaddees. Nuuni Yihoowan ammanettana danddayoos, ayssi giikko I bawu haggaaziyageetussi ammanettees. (2 Sam. 22:26) I nuuni oottidobaa mule dogenna, qassi ubbatoo nuna woytana.—Ibr. 6:10; 11:6. w24.06 27 ¶4-6

Nuuni allaxxiyo wode beꞌiyoban woy oottiyoban naagettana koshshees. Qassi nuuni duretiyogee nu deꞌuwan keehi koshshiyaba giidi qoppennaadan akeekanchchanne loꞌꞌo laggeta dooriyageeta gidana koshshees. Nuuni Yihoowa siiqiyo siiqoy irxxanaadan oottiyabaa akeekikko, hegee nuuni Yihoowa siiqiyogaa agganaadan oottenna mala nu qoppiyobaanne oottiyobaa sohuwara laammanawu baaxetana koshshees. (Mat. 5:29, 30) Nuuni nu wozanay shaahettanaadan oottana koshshenna. Yihoowawu minnidi haggaaziyo gishshawu iita qofay nuna qohenna giidi qoppana danddayoos. Leemisuwawu, neeni ne keettaa geeshshada penggiya dooya wottin buhee soo geliyogaa qoppa. Hegaa nuuni Yihoowara dabbotido dabbotaara geeddarssana danddayoos. Nuuni Yihoowakko kaseegaappe aaruwan shiiqanawu loꞌꞌobaa oottiyogaape aarobay koshshees. Nuuni buhee nu soo gelanaadan koyennaagaadan, Yihoowa siiqiyo siiqoy irxxanaadan oottiya aybinne nu wozanan gelennaadan naagettana koshshees.—Efi. 2:2. w24.07 21 ¶6-7

Yesuusa barchchiya bessidosona; qassi I waayiya gencciis. Yesuusi ay keena tuggatidaakko nuuni loytti akeekana danddayokko. I keehi tuggatikkokka Yihoowa siiqiyogaanne ayyo ammanettiyogaa aggibeenna. I bana kaqqida wotaaddarata qanggiyogaa aggidi hagaadan giidi woossiis: “Ta Aawawu, eti ay oottiyakko erenna gishshawu, etayyo atto ga.” (Luq. 23:34) Nuna naaqqiyageeta maaddanaadan Yihoowa woossiyogee, nuuni woppu gaanaadaaninne keehi hanqqettennaadan maaddees; qassi hegee nuuni etabaa qoppiyo ogiya laammanaadankka maaddana danddayees. Nuuni ha iita alamiyan deꞌiyo gishshawu, naaqoy nuna gakkana danddayees. Nuna gakkiyabay ayba gidikkokka, Yihoowi nuna maaddanaadan woossiyogaa mule aggokko. Qassi nuna naaqoy gakkiyo wode nuuni Yesuusa leemisuwa kaallana koshshees. Hegaa bollikka, Yihoowa Qaalay yootiyo zoriya nuuni ubbatoo oosuwan peeshshana bessees. Nuuni yaatikko, Yihoowi nuna anjjanaagaa ammanettana danddayoos.—1 Phe. 3:8, 9. w24.11 6 ¶16; 7 ¶17, 19

Yihoowi ubba qommo eeshshan ufayttenna. I nagaraa ixxees. (Maz. 5:4-6) Geeshsha Maxaafan deꞌiya azazota nuuni azazettanaadan Yihoowi koyees. Gidikkonne, nuuni nagaranchcha gidiyogaanne wottiyobi baynna ogiyan awu azazettana danddayennaagaa Yihoowi erees. (Maz. 130:3, 4) Qassi I ‘ba aaro kehatettaabaa yootiya kiitaa shaaramuxatettawu geellayidi tamaarissiya’ nagaranchchata xaasayi xeellenna. (Yih. 4) Armmageedoona olan, “Xoossau goinnenna asati” xayanaagaa Geeshsha Maxaafay yootees. (2 PHe. 3:7; Ajj. 16:16) Shin, Yihoowi ooninne xayanaadan koyenna. Geeshsha Maxaafay geeshshidi yootiyogaadan, I “ooninne ba nagaraappe simmanaadan [koyees.]” (2 Phe. 3:9) Cimati nagaraa oottida uri zilꞌꞌettidi laamettanaadaaninne zaarettidi Yihoowakko shiiqanaadan maaddiyo wode Yihoowagaadan danddayanchcha gidanawu baaxetoosona. w24.08 26 ¶1-2

Yihoowaagaadan, nuunikka harata siiqiyo gishshawu koshshiyaban eta maaddoos. Leemisuwawu, qumay woy maayoy koshshiyo ishaa woy michchiyo neeni eray? Yihoowi etassi koshshiyabaa kunttanawu nena goꞌettana danddayees. Qassi Yihoowa asay meto wodiyan harata sohuwara maaddees. Leemisuwawu, koronaa harggiya wode qumay, maayoynne harabay koshshidoogeeta ishanttinne michchontti maaddidosona. Daroti qassi kumetta saꞌan oosettiya oosuwa maaddanawu miishshaa immidosona. He miishshay kumetta saꞌan daafaban qohettidaageetussi koshshiyabaa kunttanawu maaddiis. Keha gidida he ishanttinne michchontti Ibraawe 13:16n deꞌiya qofaa oosuwan peeshshidosona: “Lo77obaa oottiyoogaanne issoi issuwaa maaddiyoogaa dogoppite. Aissi giikko, Xoossaa ufaissiyaagee hegaa mala yarshshuwaa.” w24.09 27 ¶6-7

Ha hanotaa ane qoppa. Neeni ne soo asawu koshshiyabaa kunttanawu oosuwa koyaydda deꞌaasa. Naaꞌꞌu oosuwa demmadasa. Oosuwa qommuwa, ooso prograamiya, yaa biyo wodiyanne hegaa mala ubbabaa loytta qoppaasa. He naaꞌꞌu oosotikka Kiristtaanetussi haniyageeta. Oosuwa qommuwa woy qanxxettiya miishshay daro gidiyogaa neeni dosido gishshawu hegaappe issuwa doorana danddayaasa. Shin neeni kuuyanaappe kase qoppana bessiya harabati deꞌoosona. Leemisuwawu, he oosotuppe issoy neeni galchchaa shiiqota issi issitoo shiiqennaadan digganee? He oosotuppe issoy ne so asay hirggennaadan, ufayttanaadaaninne Yihoowara dabbotanaadan neeni maaddiyo wodee neeyyo xayanaadan oottanee? Hegaa mala oyshata oychchiyogee neeni asatettaabaa gidennan, ‘loꞌꞌoba’ woy keehi koshshiyaba gidida ne goynuwanne ne so asawu koshshiyabaa kaseyanaadan maaddana. Yaatikko Yihoowa ufayssiyabaa kuuyana danddayaasa. w25.01 17 ¶11-13

Nena harati naaqqikkokka, Yihoowi nena siiqiyogaanne xoqqu oottidi xeelliyogaa ammanettana danddayaasa. Neeni nena pattenna asadan xeellikko, Yihoowi neeyyo deꞌiya loꞌꞌo eeshshata akeekiyogaanne nena baakko ehiidoogaa hassaya. (Yoh. 6:44) I nena xoqqu ootti xeelliyo gishshawu ubbatoo nena maaddanawu giigi uttiis. Yesuusabaa pilggiyogan Yihoowa qofaa erana danddayoos. Yesuusi ha saꞌan deꞌiyo wode harati naaqqidoogaa gaasuwan banttana pattenna asadan xeelliyageetuyyo kehatettaa bessiis. (Mat. 9:9-12) Issi maccaasiya wolqqaama harggiyappe paxanawu koyada Yesuusa maayuwa bochchido wode I O minttettiisinne I ammanuwa gishshawu O nashshiis. (Mar. 5:25-34) Yesuusi ba Aawaa eeshshaa wottiyobi baynna ogiyan bessiis. (Yoh. 14:9) Yaaniyo gishshawu, Yihoowi ne ammanuwanne neeni A siiqiyo siiquwa gujjin, neeyyo deꞌiya loꞌꞌo eeshshata akeekiyogaanne nena xoqqu ootti xeelliyogaa ammanettana danddayaasa. w24.10 7 ¶4-5

Daawiti yeekkanaadan oottiya daro metota genccana koshshiis. Issoti issoti A ixxidosona, ubba qassi I ammanettidoogeeti A kaddidosona. (1 Sam. 19:10, 11; 2 Sam. 15:10-14, 30) Issi wode I hagaadan giis: “Taani ooliyan daafuraas; qamma ubban taani yeekkaidda, ta hiixaa irxxissaas; ta borkkotaakka ta afuttan musissaas.” (Maz. 6:6) Metoy Daawita gakkikkokka, Yihoowi A siiqiyogaa I ammanettiis. I hagaadan giis: ‘Yihoowi taani yeekkiyo yeehuwa siyiis.’ (Maz. 6:8) Hachchi gallassaa xiqisee Yihoowi nuna keehi siiqiyogaanne I nuussi qoppiyogaa geeshshidi yootees. Daawiti Yihoowi A afutta ubbaa mazggabidabadan yootiis. Daawiti bana gakkida waayiya Yihoowi akeekiyogaanne hassayiyogaa ammanettiis. Daawita gakkiiddi deꞌiya metotu xalaala gidennan, he metoti A ay keena qohidaakkokka saluwan deꞌiya siiqiya A Aaway eriyogaa I ammanettiis. w24.12 22 ¶11-12