Masqqala

Nuuni ayyaanaaban kayma gidana xallawu gidennan, ubbatoo hegaadan deꞌanawu baaxetana koshshees. Hegaa gishshawu, nuuni ayyaanaaban kayma gididabadaaninne Yihoowara ubbatoo dabbotaa minttidi deꞌana koshshennabadan qoppiyogaappe naagettana bessees. (1 Qor. 10:12) Nuuni ayyaanaaban ubbatoo dicciiddi deꞌiyakkonne aggennan nuna qorana koshshees. Kiitettida Phawuloosi Qolasiyasan deꞌiya Kiristtaanetussi xaafido dabddaabbiyan eti ayyaanaaban kayma gididi deꞌana koshshiyogaa zaarettidi yootiis. Qolasiyasan deꞌiya Kiristtaaneti ayyaanaaban kayma gidikkokka, eti alamiya qofan cimettenna mala naagettanaadan Phawuloosi etawu yootiis. (Qol. 2:6-10) He galchchan deꞌiyageeta loytti eriya Eppaafiri eti “poli ammananaadan,” woy kayma gidanaadan ubbatoo woossiis. (Qol. 4:12) Nuuni hegaappe ay tamaarana danddayiyoo? Ayyaanaaban kayma gididi deꞌanawu baaxeenne Xoossaa maadoy koshshiyogaa Phawuloosinne Eppaafiri akeekidosona. Qolasiyasan deꞌiya Kiristtaaneta ay paacee gakkikkokka eti ayyaanaaban kayma woy wozannaama gididi deꞌanaadan Phawuloosinne Eppaafiri koyidosona. w24.04 6-7 ¶16-17

Yihoowawu yayyiyogaa giyogee A siiqidi A azzanttiya aybanne oottennaagaa giyogaa. Nuuni Yihoowa ufayssanawu suurebaa suure gidennabaappe, qassi tumaa wordduwappe shaakkidi eranawu koyoos. (Lee. 2:3-6; Ibr. 5:14) Nuuni Xoossawu yayyiyogaappe aaruwan asawu yayyikko tumaappe haakkana danddayoos. Yihoowi Israaꞌeelatussi immanawu qaalaa gelido biittaa wochchida 12 halaqatubaa beꞌa. Wochchiya tammati Yihoowa siiqiyogaappe aaruwan Kanaane biittaa asawu yayyidosona. Eti Israaꞌeelatussi hagaadan giidosona: “He biittaa asai nuuppe minniyo gishshau, nuuni eta xoonanau danddayokko.” (Qoo. 13:27-31) Asa xeelan Kanaane asay mino gidiyogee tuma. Shin Israaꞌeelati bantta morkketa xoonana danddayokkona giya ooninne Yihoowabaa qoppibeenna. w24.07 9 ¶5-6

Yihoowi asaa bolli pirddiyo wode ubbatoo suurebaa oottanaagaa ammanettana danddayiyoo? Ee! Abrahaami loytti akeekidoogaadan, Yihoowi wottiyobi baynnaagaa, aadhdhida eranchchanne ‘ha saꞌaa ubbaa maarotettan pirddiyagaa.’ Yihoowi ba Naꞌaa loohissiisinne asa ubbaa bolli pirddanaadan aawatettaa immiis. (Yoh. 5:22) Yihoowinne Yesuusi asa ubbaa wozanan deꞌiyabaa eroosona. (Mat. 9:4) Hegaa gishshawu eti issuwa issuwa bolli pirddiyo wode ‘xillo pirddana!’ Yihoowaninne I kuuyiyo ubbaban ammanettanawu murttidaageeta gidoos. Pirddanawu nuussi maati baawa; shin Yihoowawu pirddiyo maatay deꞌiyogaa eroos! (Isi. 55:8, 9) Yihoowinne A Naꞌay pirddiyo ubbaban nuuni ammanettiyoy hegaassa. Qassi nu Kawoy Yesuusi ba Aawaagaadan suure pirddanaagaanne maaranaagaa eroos.—Isi. 11:3, 4. w24.05 7 ¶18-19

Tumanchcha gidiyogee nuussi keehi koshshiyogaa Yesuusi Naatinaaꞌeelaara koyro gayttido wode hanidabaappe tamaarana danddayoos. Piliphphoosi ba laggiya Naatinaaꞌeela Yesuusakko ehiido wode malaalissiyabay haniis. Yesuusi Naatinaaꞌeelaara kase gaytti erana xayikkokka hagaadan giis: “Hagee an malttee baynna tumu Israaꞌeela asa.” (Yoh. 1:47) Yesuusi Naatinaaꞌeela haratuppe aaruwan tumanchchadan xeelliis. Nuugaadan Naatinaaꞌeelikka nagaranchcha. Shin I ubbaban tumanchchappe attin, cimmiya asa gidenna. Yesuusi hegaa akeekidi Naatinaaꞌeela galatiis. Mazamure 15n odettida Yihoowa ufayssanawu maaddiyabatuppe daroti nuuni haratuyyo oottana koshshiyabata. Mazamure 15:3y Yihoowa dunkkaaniyan deꞌiya imattay “hara asa sunttaa moorennaagaa, ba lagge bolli iitabaa oottennaagaa, ba shooro zigirennaagaa” yootees. Nuuni haratu sunttaa moorikko, hegee eta keehi qohees.—Yaaq. 1:26. w24.06 10 ¶7, 9; 11 ¶10

Neeni haggaazuwawu loytta giigettikko, asaa haasayissanawu darin yayyakka. Yesuusi bana kaalliyageeta haggaazuwawu kiittanaappe kase eti giigettanaadan maaddiis. (Luq. 10:1-11) Eti Yesuusi tamaarissidobaa oosuwan peeshshido gishshawu, daro loꞌꞌobaa oottidosonanne keehi ufayttidosona. Nuuni haggaazuwawu waani giigettana danddayiyoo? Nuuni tumaa wozanappe waani loytti yootana danddayiyakko qoppana koshshees. Asay denttana danddayiyo qofatanne nuuni woygidi zaarana danddayiyakko qoppiyogeekka nuna maaddees. Qassi nuuni asaara haasayiyo wode woppu gaanawunne pashkki gaanawu baaxetana danddayoos. w24.04 16 ¶6-7

Nuuni mishiraachchuwa sabbakiyo waanna gaasoy Yihoowanne A sunttaa siiqiyo gishshataassa. Nuuni siiqiyo Xoossaa sabbiyo ogedan haggaazuwa xeelloos. Nu Xoossay Yihoowi, ammanettidi bawu goynniyageetuppe bonchchuwaa, sabaanne wolqqaa ekkanawu bessiyogaa nuuni kumetta wozanan maayettoos. Nuuni I ‘ubbabaa medhdhidoogaanne’ nuussi deꞌuwa immidoogaa bessiya ammanttiya naqaashaa haratussi yootiyo wode A bonchchoosinne sabboos. Nu wodiya, nu abbiyanne nuussi deꞌiya ubbabaa goꞌettidi nuussi danddayettida keenan sabbakiyo wode nu wolqqaa Yihoowawu immoos. (Mat. 6:33; Luq. 13:24; Qol. 3:23) Nuuni siiqiyo Xoossaabaa haratuyyo yootiyogaa dosoos. Qassi A sunttaabaanne I ay mala Xoossakko haratuyyo yootanawu keehi koyoos. w24.05 17 ¶11

Yihoowi bawu goynniyageeta ubbatoo woytees. I nuussi ha wodiyan sarotettaynne ufayssay deꞌanaadan oottees, qassi sinttappe merinaa deꞌuwa immana. Yihoowi nuna woytanawu koyiyogaanne yaatanawu awu wolqqay deꞌiyogaa nuuni wozanappe ammanettoos. Hegaa gishshawu, kase Yihoowa ashkkarati oottidoogaadan nuuni awu goynnanawu nuussi danddayettida ubbabaa aggennan oottoos. Ximootiyosikka hegaadan oottiis. (Ibr. 6:10-12) Ximootiyosi Xoossay A woytanaagaa mintti ammaniis. (1 Xim. 4:10) Yihoowassinne haratussi minnidi oottidoy hegaassa. I oottidobay aybee? I haggaazuwaninne galchchan gooba asttamaare gidanaadan kiitettida Phawuloosi minttettiis. Qassi Ximootiyosi yelagatussinne cimatussi loꞌꞌo leemiso gidanaadan minttettiis. Hegaa bollikka, zoree koshshiyogeeta siiquwan mintti zoriyogaa gujjin, gita aawatettati awu imettidosona. (1 Xim. 4:11-16; 2 Xim. 4:1-5) Yihoowi woytanaagaa Ximootiyosi ammanettiis.—Roo. 2:6, 7. w24.06 22-23 ¶10-11

Yihoowi ba asaa zoranawunne seeranawu ba erissidobaa yootiyageeta darotoo kiittiis. Leemisuwawu, Xoossay Ermmaasa baggaara hagaadan giis: “Bii, ammanoi bainna Israa7eelee, simma! Taani maarotai kumidoogaa gidiyo gishshau, taani nena iita aifiyan xeellikke. Merinau hanqqettikke. Gidikkonne, neeni, ‘Taani GODAA ta Xoossaa bolli makkalaas’ . . . gaada ne mooruwaa ammananau koshshees.” (Erm. 3:12, 13) Yihoowi Yuuꞌeela baggaara hagaadan giis: “Polo wozanaappe taakko simmite.” (Yuu. 2:12, 13) Isiyasi hagaadan giidi yootanaadan I azaziis: “Geeyite; intte iita oosuwaa ta sinttappe diggite. Iitaa oottiyoogaa aggite.” (Isi. 1:16-19) Qassi Yihoowi Hizqqeela baggaara hagaadan giis: “Nagaranchchai ba ogiyaappe simmidi, paxa de7iyoogan ufaittaisippe attin, . . . a haiquwan ufaittikke. Taani issi asa haiquwaaninne ufaittikke. Hegaa gishshau, intte nagaraa paaxi simmidi, paxa de7ite!” (Hiz. 18:23, 32) Yihoowi asay merinawu deꞌanaadan koyiyo gishshawu, eti bantta nagaran zilꞌꞌettidi laamettiyogaa beꞌiyo wode keehi ufayttees! w24.08 9 ¶5-6

Yihoowi ba ashkkaratussi ubbawu ayyaanaabaa qumaa immees, eta kaaletteesinne naagees. Kumetta saꞌan deꞌiya asay Geeshsha Maxaafaa demmanaadan oottiyogankka, Yihoowi asa asappe shaakkennaagaa bessiis. Geeshsha Maxaafay koyro heezzu doonatun xaafettiis; Ibraawettuwan, Aramayke doonaaninne Giriikettuwan xaafettiis. Geeshsha Maxaafay koyro xaafettido doonaa nabbabana danddayiyageeti danddayennaageetuppe aaruwan Yihoowara mata dabboo? Chii, gidokkona. (Mat. 11:25) Yihoowi nuuni A dabbo gidanaadan shoobbidoy nu loytti tamaarido woy Geeshsha Maxaafay koyro xaafettido doonaa eriyo gishshataassa gidenna. Yihoowi loytti tamaaridaageetuyyo xalla gidennan, kumetta saꞌan deꞌiya asa ubbawu ba aadhdhida eratettaa immees. A Qaalay Geeshsha Maxaafay daro shaꞌu doonatun birshshettiis; yaatiyo gishshawu, kumetta saꞌan deꞌiya asay A timirttiyappe goꞌettananne Yihoowa dabbo waani gidana danddayiyakko tamaarana danddayees.—2 Xim. 3:16, 17. w24.06 6-7 ¶13-15

Yesuusi kasetidi yootidoogaadan Yerusalaame bashshay matiis. Kiristtaaneti ammanuwanne genccaa mala eeshshati banttassi deꞌanaadan baaxetiyogan attida wodiyan giigettana danddayoosona. (Ibr. 10:25; 12:1, 2) Ibraawe Kiristtaaneta gakkida waayiyappe aadhdhiya gita waayee nuna gakkana. (Mat. 24:21; Ajj. 16:14, 16) Yihoowi he Kiristtaanetussi yootido zoree nunakka maaddana danddayees. Kiitettida Phawuloosi Ibraawe Kiristtaanetuyyo xaafido dabddaabbiyan ba mala Kiristtaaneti Xoossaa Qaalaa loytti xannaꞌanaadan minttettiis. (Ibr. 5:14–6:1) Phawuloosi Ibraawettuwan xaafettida Geeshsha Maxaafaappe ekkidi, Kiristtaaneti Yihoowawu goynniyo ogee Ayhudati goynniyo ogiyappe keehi aadhdhiyo gaasuwa qonccissiis. Kiristtaaneti worddo timirttiya shaakki eridi hegaa eqettana mala Geeshsha Maxaafaa tumaa loytti eranaadaaninne akeekanaadan Phawuloosi eta minttettiis. w24.09 8-9 ¶2-3; 10 ¶6

Yesuusa kaalliyageetussi minttettoy koshshiis. Aybissi? Amaridaageeti Yesuusa kaallanawu bantta keettaa, bantta so asaanne bantta oosuwa aggidosona. (Mat. 19:27) Harati qassi A kaalliyageeta gidido gishshawu wolqqaama naaqoy eta gakkiis. (Yoh. 9:22) Eti bantta goꞌꞌaa aggibayidoy Yesuusi yaana geetettida Mase gidiyogaa ammanido gishshataassa. (Mat. 16:16) Shin eti asay Yesuusa worido wode aybi hananaakko eribeenna gishshawu keehi azzanidosonanne hidootaa qanxxidosona. Yesuusi bana kaalliyageeti I hayqqido wode keehi azzanidoogee wottin deꞌiyaba gidiyogaa akeekiis. Qassi eti azzanidoy etawu ammanoy paccido gishshawu gidennaagaa I erees. Yaatiyo gishshawu, I hayquwappe denddido gallassi ba laggeta minttettiyogaa doommiis. Leemisuwawu, Yesuusa duufuwa matan yeekkaydda deꞌiya Magddala Mayraamissi I qoncciis. (Yoh. 20:11, 16) Emaahuusappe biiddi deꞌiya bana kaalliya naaꞌꞌatussikka I qoncciis. Qassi kiitettida Pheexiroosawu qoncciis. w24.10 13 ¶5-6

Intte naati Medhdhidaagan ammaniyo gaasuwa yootanawu giigettanaadan maaddite. Intte jw.org saytiyan meretaabaanne lodda laamiyabaa yootiya qofata pilggiyogee inttena maaddana danddayees. Medhdhidaagee deꞌiyogaa harati akeekanaadan maaddanawu intte naati yan deꞌiya issi qofaa doorana danddayoosona. He qofaa intte naatuura tobbite. Issi uri hegaabaa haasayanawu koyikko, intte naati hegaabaa akeekanawu metennanne ammanttiya ogiyan qonccissanaadan minttettite. Leemisuwawu, issippe tamaariyagee hagaadan gaana danddayees: “Taani ammaniyobay beꞌiyobaa xalaala, qassi Xoossaa beꞌa erikke.” Kiristtaane gidida issi yelagay hagaadan zaarana danddayees: “Neeni asi deꞌiyo heeraappe haakkidi deꞌiya woraa giddon hemettaydda shuchchan loytti keexettida keettaa beꞌidabadan qoppa. Ne hegaabaa woygay? Hegaa keexxida asi deꞌiyogee qoncce. Saꞌaanne deꞌuwan deꞌiya ubbabaa xeelliyagankka hanotay hegaa mala. Hegaa medhdhidaagee deꞌiyogee qoncce!” w24.12 18 ¶16

Nu deꞌuwan loꞌꞌobaa kuuyanawu nuussi ubbawu kaaletoy koshshees. Nuuni cimatuppe woy hara kayma Kiristtaanetuppe kaaletuwa demmana danddayoos. Eti nuuppe keehi bayratiyo gishshawu eti zoriyobay nu wodiyan maaddenna giidi karana koshshenna. Yihoowi nuuni cimidaageetuppe tamaaranaadan koyees. Eti nuugaappe daro wodiya deꞌido gishshawu meezee deꞌiyogeetanne aadhdhida eranchcha gididosona. Beni wode, Yihoowi ammanettida asatu baggaara ba asaa minttettiisinne kaalettiis. Leemisuwawu, Muusebaa, Daawitabaanne kiitettida Yohaannisabaa beꞌa. Eti dumma dumma wodiyan deꞌidosona; qassi eta hanotaykka issoy haraagaappe dummatees. Eti bantta deꞌuwa wurssettaa heeran, banttappe kaalotiyageeta loꞌꞌobaa zoridosona. Ammanettida ha cima asati Xoossawu azazettiyogee keehi maaddiyogaa qonccissidosona. Nuuni yelaga woy cima gidinkka, eta zoriya pilggiyogan goꞌettana danddayoos.—Roo. 15:4; 2 Xim. 3:16. w24.11 8 ¶1-2

Beni Nohe wode, asay suuttaa meennaadan Xoossay azaziis. (Doo. 9:3, 4) Guyyeppe, Yihoowi Israaꞌeelatikka suuttaa meennaadan azaziis. Suuttaa miya ay asinne “hayqqana bessees.” (Wog. 7:27, NW tohossa qofaa) Ayhudati Xoossay etawu immido higge ubbaa azazettanaadan Yesuusi eta tamaarissiis. (Mat. 5:17-19) Hegaa gishshawu, I Ayhudati tumu A ashuwa maanaadan woy A suuttaa uyanaadan azazibeenna. I Samaariya maccaasiyo haasayissido wodekka leemisuwa goꞌettiis: “Taani . . . immiyo haattay merinaa deꞌuwa demissiya . . . haatta gidana.” (Yoh. 4:7, 14) Yesuusi Samaariya maccaasiya ollaappe haattaa duuqqada uyiyogan merinawu deꞌana danddayiyogaa yootibeenna. Hegaadankka, Yesuusi Qifirinaahooman shiiqida asay A tumu ashuwa miyogaaninne suuttaa uyiyogan merinawu deꞌanaagaa yootibeenna. w24.12 9 ¶4-6

Kiristtaane gidida azinati macca asaa xeelliyagan balabaa qoppennaadan naagettana koshshees. Aybissi? Darotoo issi uri qoppiyobaa oottiyo gishshataassa. Kiitettida Phawuloosi Roomen deꞌiya tiyettida Kiristtaaneti ‘ha saꞌaa asaa qulliyogaa agganaadan’ zoriis. (Roo. 12:1, 2) Phawuloosi Roomen deꞌiya galchchawu dabddaabbiya xaafiyo wode, yan deꞌiyageeti Kiristtaane gidoosappe daro layttay aadhdhiis. Gidikkokka, Phawuloosi xaafidobay he galchchan deꞌiya amaridaageeti ha saꞌaa asaa meeziyanne qofaa qulliiddi deꞌiyogaa qonccissees. Bantta qofaanne eeshshaa eti laamanaadan I zoridoy hegaassa. He zoree ha wodiyan Kiristtaane gidida azinatussikka haniyogee qoncce. Etappe amaridaageeti ha saꞌaa asaa qofaa qullidi bantta machchota qohidoogee azzanttiyaba. w25.01 9 ¶4

Ha wodiyan cimati darobaa oottoosona. Eti mishiraachchuwa yootoosona. (2 Xim. 4:5) Minnidi sabbakiyogan nuuyyo leemiso gidoosona, bantta heeran sabbakuwa oosuwa darajjayoosona, qassi sabbakiyogaaninne tamaarissiyogan qara gidanaadan nuna loohissoosona. Eti asa asappe shaakkennan maariya daanna gididikka oottoosona. Issi Kiristtaanee gita nagaraa oottikko, cimati he uri Yihoowara zaaretti dabbotanaadan loytti maaddoosona. Qassi galchchaa geeshshatettaa naaganawukka baaxetoosona. (1 Qor. 5:12, 13; Gal. 6:1) Ubbaappe aaruwan, cimati henttanchcha gidiyogan erettoosona. (1 Phe. 5:1-3) Eti loytti giigettidi Geeshsha Maxaafaappe haasayata haasayoosona, qassi galchchan deꞌiyageeta ubbaa loytti eranawunne biidi eta minttettanawu baaxetoosona. Hegaa bollikka, amarida cimati hara aawatettata poliiddi Shiiquwa Addaraashaa keexxiyogaaninne bottokoniyogan, gita shiiqota darajjayiyogan maaddoosona; qassi Hosppitaaletuura Gattiya Konttetuuninne Sahettidaageeta Oychchiya Citatun oottoosona. Cimati nuna maaddanawu minni oottoosona! w24.10 20 ¶9

Geeshsha Maxaafan ‘wozuwa qanxxiyogaa’ geetettida qaalay nuuni nagaraappe laꞌa kiyidoogaa yootees. Hegaa kiitettida Pheexiroosi hagaadan qonccissiis: “Intte intte aawatuppe laattido pattenna de7uwaappe wozettidoogee, [laꞌa kiyidoogee] xayiya bira woi worqqa malaana gidennaagaa ereeta; borssoi woi qiti bainna dorssa suuttadan, al77o Kiristtoosa suuttan intte wozettideta.” (1 PHe. 1:18, 19) Wozuwa yarshshuwappe denddidaagan, nuuni keehi tuggatanaadan oottiya nagaraappenne hayquwappe laꞌa kiyana danddayoos. (Roo. 5:21) Nuuni Yesuusa alꞌꞌo suuttan wozettido gishshawu, Yihoowanne Yesuusa wozanappe galatoos. w25.02 5 ¶15-16

Nuuni nagaraappe waani naagettana danddayiyoo? Leemiso shemppo 7n odettida yelagaappe nuuni ay tamaarana danddayiyakko beꞌa. I shaaramuxa maccaaseera zinꞌꞌiis. Paydo 22y he yelagay “sohuwaarakka” O kaallidi biidoogaa yootees. Shin, qommoora deꞌiya paydoti yootiyogaadan, I yaatanaappe kase hara iitabata kuuyidoogee leddan leddan nagaraa oottanaadan denttettiis. He yelagay gita nagaraa oottanaappe kase I oottidobay aybee? Koyruwan, qamman I “shaaramuxa maccaasee keettaa mataara kanttiis.” Yaatidi, I soo efiya ogiyakko biis. (Lee. 7:8, 9) Kaallidi, I he maccaasiyo beꞌido wode baqatibeenna. Hegaa bollikka, A yeranaadan I eeno giis, qassi geella O loꞌꞌo asa giidi I qoppanaadan koyido gishshawu A yarshshuwa yarshshidoogaa yootido wode O ammaniis. (Lee. 7:13, 14, 21) He yelagay nagaraa oottanaadan denttettiya iitabatuppe naagettidaakko, I paaciyappenne nagaraappe naagettana danddayees shin. w24.07 16 ¶8-9; 19 ¶19

Yihoowi ba asay oottiyo gita nagaraa xaasayi xeellenna. Yihoowi maariyagaa gidiyo gishshawu nagaraa oottidi laamettibeenna issi uri galchchaa yara gididi deꞌanaadan paqqadees giidi issoti issoti qoppana danddayoosona; shin Yihoowi maarotaa bessiyo ogee hegaadaana gidenna. Yihoowi maariyagaa gidikkokka, ubba qommo eeshshan ufayttenna. Likkenne likke gidennabaa xeelliyagan I kessido maarata laammenna. (Yih. 4) Ba nagaran zilꞌꞌettidi laamettibeenna issi uri galchchaa yara gididi deꞌanaadan Yihoowi paqqadikko, hegee galchchay qohettanaadan oottana danddayiyo gishshawu maarotaa bessiyaba gidenna. (Lee. 13:20; 1 Qor. 15:33) Gidikkokka, Yihoowi ooninne xayanaadan koyennaagaa eroos. Danddayettiyo wode ubban asay attanaadan I koyees. I bantta qofaaninne oosuwan laamettida asata maareesinne eti aara zaaretti dabbotanaadan koyees. (Hiz. 33:11; 2 Phe. 3:9) Hegaa gishshawu Qoronttoosa galchchan deꞌiya bitanee zilꞌꞌetti laamettidi ba eeshshaa giigissido wode yan deꞌiyageeti awu atto gaanaadaaninne A mokki ekkanaadan Yihoowi azaziis. w24.08 17 ¶7; 18-19 ¶14-15

Yesuusi dorssatubaanne deeshshatubaa yootido leemisuwan tiyettida A ishantta kaafanawu injjiya demmida asatu bolli I pirddiyo pirddaabaa qonccissiis. (Mat. 25:31-46) ‘Gita waayiya’ wode, Armmageedoona olay doommanaappe guuttaa kasetidi eti dorssa woy deeshsha gidiyogaa I kuuyees. (Mat. 24:21) Henttanchchay dorssata deeshshatuppe shaakkiyogaadan, Yesuusikka A kaalliya tiyettidaageeta ammanettidi kaafida asata kaafibeennaageetuppe shaakkana. Yesuusi Yihoowi sunttido Daanna gidiyo gishshawu, ubbatoo suurebaa pirddanaagaa Geeshsha Maxaafaa hiraagay bessees. (Isi. 11:3, 4) I asay tiyettida ba ishantta oyqqiyo ogiya gujjin, asay oottiyobaa, qoppiyobaanne haasayiyobaa loytti kaallees. (Mat. 12:36, 37) Yesuusi tiyettida ba ishanttanne eta oosuwa kaafidaageeta erana. Dorssa mala gidida asati Kiristtoosa ishantta kaafiyo waannatiya ogetuppe issoy sabbakuwa oosuwan etaara hashetiyogaa. w24.09 20-21 ¶3-4

Nuuni ammaniyobay tumakkonne shaakki eranawu, hegaa Geeshsha Maxaafay yootiyobaara geeddarssana danddayoos. Yihoowi awu qoppiyogaa sirida yelagaa hanotaa qoppa. I he qofaa tuma giidi ammanana koshshii? Koshshenna; ayssi giikko, I he allaalliyara gayttidaagan Yihoowa qofaa eranawu ‘ubbabaakka paaccana’ koshshees. Nuuni Geeshsha Maxaafaa nabbabiyo wode Yihoowi yootiyobaa “siyoos” giyogaa mala. Shin nu oyshatussi Yihoowappe zaaruwa demmanawu koyikko Geeshsha Maxaafaa nabbabiyogaappe aarobaa oottana koshshees. Nu oyshatuyyo zaaruwa demmanaadan maaddiya xiqiseta koyidi hegeeta xannaꞌana koshshees. Nuuni xannaꞌanawu Yihoowa dirijjitee giigissido xuufeta goꞌettana danddayoos. (Lee. 2:3-6) Pilggiyo wode Yihoowi nuna kaalettanaadaaninne nu oyshawu zaaruwa demmana mala maaddanaadan A woossana danddayoos. Yaatidi nu hanotawu maaddiya Geeshsha Maxaafaa maaratanne qofata koyana danddayoos. w24.10 25 ¶4-5

Issi uri harati A xoqqu oottidi xeellanaadan baaxetiyo baaxiya Yihoowi anjjenna. (1 Qor. 10:24, 33; 13:4) Yesuusa mata laggetikka bessennabaa amottidi maataa demmanawu baaxetido wodee deꞌees. Kiitettida Yaaqoobinne Yohaannisi oottidobaa qoppite. Eti Yesuusi etawu ba Kawotettan gita sohuwa immanaadan oychchidosona. Eti hegaadan oychchido gishshawu Yesuusi eta nashshibeenna. Ubba I kiitettida 12tuyyo hagaadan giis: “Intte giddon gitatana koyiya ooninne inttessi haggaaziyagaa gidana bessees; qassi intte giddon sintta xeera gidana koyiya ooninne ubbaayyo aylle gidana bessees.” (Mar. 10:35-37, 43, 44) Loꞌꞌobaa qoppidi woy harata maaddanawu koyidi baaxetiya ishantti galchchawu anjjo.—1 Tas. 2:8. w24.11 15-16 ¶7-8

Siiqoy nuuni issibaa kuuyiyo wode ‘hara ura’ goꞌiyabaa koyanaadaaninne ashkke gidanaadan maaddana. (1 Qor. 10:23, 24; 1 Xim. 2:9, 10) Yaatiyo wode harata siiqiyogaanne bonchchiyogaa bessiyabaa kuuyoos. Neeni gitabaa kuuyiyaba gidikko, hegaa polanawu neeni ay oottana koshshiyakko loytta qoppa. Nuuni kasetidi ‘qoppanaadan’ Yesuusi tamaarissiis. (Luq. 14:28) Yaaniyo gishshawu, kuuyidobaa poliyogee ay keena wodiya, miishshaanne wolqqaa wurssiyakko qoppana koshshees. Issi issi hanotatun, kuuyidobaa polanawu intte so asay ubbay ay oottana koshshiyakko etaara haasayana danddayaasa. Hegaadan halchchiyogee maaddiyoy aybissee? Neeni kuuyidoban amaridabaa giigissana woy hegaappe kehiya harabaa akeekana danddayaasa. Hegaa bollikka, neeni kuuyiyo wode so asay hashetanaadan oottikko, qassi eti yootiyo qofaa siyikko, kuuyidobaa polanaadan eti nena loytti maaddana. w25.01 18-19 ¶14-15

Nuuni ayyaanaa gannatiyan ‘ufayttananne hashshu gaana’ koshshiyo gaasuwa Isiyasi qonccissiis. He sohuwa giigissiday Yihoowa. (Isi. 65:18, 19) Yaaniyo gishshawu, Xoossaabaa asaa tumaa tamaarissennanne leemiso hanotan gannate gidida sohuwa gelanaadan maaddenna ha alamiya dirijjitetuppe asay kiyanaadan Yihoowi nuna goꞌettiiddi deꞌiyogee maalaalissiyaba gidenna! Nuuni tumaa erido gishshawu demmido anjjotun keehi ufayttoosinne hegaa haratuyyo yootanawu keehi koyoos. (Erm. 31:12) Qassi nuuni ayyaanaa gannatiyan deꞌiyogan demmido hidootaa gishshawu galatoosinne ufayssan hombbocoos. Geeshsha Maxaafay nuuni “keettata keexxidi, etan de7ana; [qassi] woiniyaa turatakka tokkidi, eta aifiyaa maana” yaagees. Nuuni ‘coo daafurokko;’ ayssi giikko, nuna ‘Yihoowi anjjana.’ Nuuni ufayssiyanne woppissiya deꞌuwa deꞌanaagaa I nuussi qaalaa geliis. I ubba asawu koshshiyabaa erees, qassi ‘paxa deꞌiyageetu ubbaa amuwa alana.’—Isi. 65:20-24; Maz. 145:16. w24.04 22-23 ¶11-12

Nuuni Yihoowan loytti ammanettiyo wode I nu Zaallaa gidees. Metiya wodiyankka awu azazettiyogan an ammanettikko, nuuni goꞌettoos. (Isi. 48:17, 18) Yihoowi nuna maaddiyogaa nuuni nu deꞌuwan beꞌiyo wode kaseegaappe aaruwan an ammanettoos. Nuna gakkiya ay metuwakka genccanaadan nuna maaddana danddayiyay Yihoowa xalaala gidiyogaa ammanettoos. Wogga zaallaadan woy deriyadan Yihoowi ba sohuwappe qaaxxenna. A eeshshaynne halchchoy mule laamettenna. (Mil. 3:6) Addaamenne Hewaana Yihoowa bolli makkalido wode I asawu halchchidobaa laammibeenna. Kiitettida Phawuloosi yootidoogaadan Yihoowi “bana ba huuphen erikke gaanau danddayenna.” (2 Xim. 2:13) Hegaa giyogee aybi hanikkokka, woy harati ay oottikkokka, Yihoowi ba eeshshaa, ba halchchuwa woy ba kessido maaraa mule laammenna giyogaa. Yihoowi laamettenna gishshawu meto wodiyan nuna maaddanaagaanne sinttappe ehaanawu gelido qaalaa polanaagaa nuuni eroos.—Maz. 62:6, 7. w24.06 27-28 ¶7-8

Neeni aqo oyqqanawu qoppada issippe wodiya aattikko, aqo oyqqanawu woy agganawu kuuyanaadan aybi maaddanee? Issoy issuwa loytti eriyogee nena maaddana. Neeni issi uraara aqo oyqqanawu qoppada wodiya aattiyogaa doommanaappe kase he uraabaa amaridabaa erennan aggakka. Shin haꞌꞌi ‘wozanaa giddon deꞌiyabaa’ eriyo injjiya demmadasa. (1 Phe. 3:4) Neeni aqo oyqqanawu qoppada wodiya aattikko, he uri Yihoowara dabbotido dabbotaa, A eeshshaanne A qofaa loytta erana danddayaasa. Guyyeppe neeni hagaa mala oyshata zaarana koshshees: ‘Ha uri tawu loꞌꞌo aqo lagge gidanee?’ (Lee. 31:26, 27, 30; Efi. 5:33; 1 Xim. 5:8) ‘Nuuni issoy issuwara wozanappe siiqettana danddayiyoo? Nuuni issoy issuwa mooruwa aggi aadhdhanawu metootiyoo?’ (Roo. 3:23) Issoy issuwa loytti eriyo wode, keehi koshshiyabay intte issi mala gidiyogaa gidennan, intte maayettidi deꞌana danddayiyogaa woy aggiyogaa gidiyogaa hassaya. w24.05 27 ¶5

Kawuwa Daawiti gita nagaraa oottiis. Shin Daawiti oottidoban Yihoowawu aybi siyettidaakko Xoossay erissidobaa yootiya Naataani ayyo odido wode, I bana ziqqi oottidi ba nagaran zilꞌꞌettidi laamettiis. (Maz. 51:3, 4, 17, huuphessa qofaa) Kawuwa Hizqqiyasikka Yihoowa bolli nagaraa oottiis. (2 Odi. 32:25) Yaatin Hizqqiyasi Daawitaagaadan, bana ziqqi oottidi zilꞌꞌetti laamettiis. (2 Odi. 32:26) Hegaappe denddidaagan, Yihoowi Hizqqiyasa waati xeellidee? ‘Suurebaa oottida’ ammanettida kawodan A xeelliis. (2 Kaw. 18:3) Nuuni ay tamaariyoo? Nuuni nu nagaran zilꞌꞌettidi laamettananne hegaa zaarettidi oottennaadan naagettanawu nuussi danddayettida keenaa baaxetana koshshees. Guutta milatiya allaalletun galchchaa cimati nuussi zoriya immikko shin? Yihoowi nuna siiqennabadan woy cimati nuna ixxiyabadan nuuni qoppana koshshenna. Israaꞌeelan kawotida loꞌꞌo kawotussikka zoreenne seeray koshshiis. (Ibr. 12:6) Nuuyyo seeray imettiyo wode (1) nuna ziqqi oottidi seeraa ekkana, (2) koshshiyaban laamettana, qassi (3) kumetta wozanan Yihoowawu haggaazana bessees. Nuuni nu nagaran zilꞌꞌettidi laamettikko, Yihoowi nuussi atto gaana.—2 Qor. 7:9, 11. w24.07 21 ¶8; 22 ¶9, 11

Cimati maaddanawu darotoo baaxetikkokka, laamettennan ixxida ura eti galchchaappe kessoosona. (2 Kaw. 17:12-15) Yihoowa azazuwa azazettanawu koyennaagaa I ba oosuwan bessiis. (Zaa. 30:19, 20) Galchchaappe kessiyo wode, he uri hegaappe simmin Yihoowa Markka gidennaagee galchchawu odettees. Erissoy odettiyo halchchoy he uraa yeellayanaassa gidenna. Hegaa halchchoy ishanttinne michchontti he uraara ‘zuppetiyogaa agganaadan, haray atto qumaakka meennaadan’ yootiya Geeshsha Maxaafaa azazuwa azazettanaadaana. (1 Qor. 5:9-11) Yihoowi ha azazuwa nuussi immido loꞌꞌo gaasoy deꞌees. Kiitettida Phawuloosi hagaadan giis: ‘Guutta irshshoy munaqan ubbasaa gakkees.’ (1 Qor. 5:6) Ba nagaran zilꞌꞌetti laamettibeenna ura galchchaappe kessana xayikko, harati Yihoowa azazuwa azazettana koshshennabadan qoppana danddayoosona.—Lee. 13:20; 1 Qor. 15:33. w24.08 27 ¶3-4

Nuuni Yihoowagaadan, haratussi wolqqaa immana danddayokko. Shin nu wolqqan harata maaddiyogan A milatana danddayoos. Leemisuwawu, son oottiyogan woy suuqiyappe issi issibaa shammiyogan cimida woy sahettida ishanttanne michchontta maaddana danddayoos. Shiiquwa Addaraashaa geeshshiyogaaninne bottokoniyogan maaddana danddayoos. Neeni haasayiyobaykka harata minttettana danddayiyogaa hassaya. Neeni wozanappe galatiyogaa yootiyakko minettana ura qoppana danddayay? Minttettoy koshshiyo ura eray? Yaanikko, neeni he urawu qoppiyogaa yootana danddayaasa. Neeni he ura baada oychchana, awu silkkiya dawalana, woy geella karddiya, imeeliya, woy kiitaa xaafada kiittana danddayaasa. Neeni haasayiyobawu darin unꞌꞌettana koshshenna. Ne ishay woy michchiya ammanettidi deꞌanaadaaninne loꞌꞌobaa qoppanaadan koshshiyabay neeni siiquwan yootiyo amarida qofaa xalaala gidana danddayees.—Lee. 12:25; Efi. 4:29. w24.09 28 ¶8-10

Intte haꞌꞌi galchchawu oottiyageeta gidikko, cima gidanawu koshshiyabata oottanawu baaxetiiddi deꞌennan aggekketa. Intte cimati oottiyo ‘loꞌꞌobata’ oottanawu koyeetii? Issi cimay oottiyobati awugeetee? I galchchaara minnidi haggaazees, ishanttanne michchontta minttettanawunne tamaarissanawu baaxetees, qassi eti Yihoowa mintti ammananaadan haasayiyobaaninne oottiyoban maaddees. Geeshsha Maxaafay minni oottiya cimata “imota” gidida asata giyo daro gaasoy deꞌees. (Efi. 4:8) Intte cima gidanawu waatana danddayeetii? Issi uri cima gidanawu kunttana koshshiyabay oosuwa qaxarettanawu kunttana koshshiyabaappe dummatees. Ha alamiyan darotoo, oosuwa qaxariyagee koyiyo hiillati intteyyo deꞌikko, oosuwa demmana danddayeeta. Hegaappe dumma hanotan, intte cima gididi sunttettanawu koyikko, sabbakkiyonne tamaarissiyo hiillay intteyyo deꞌiyogaa xalaalay gidenna. Intte 1 Ximootiyoosa 3:1-7 ninne Tiitu 1:5-9n odettidaagaa mala asa gidanakka koshshees. w24.11 20 ¶1-3.