Xiqimita

Nuuni Yihoowawu haggaazanaadan maaddiya kaaletuwa darotoo nuussi woradaa xomoosiya ishay, macara biiroynne Oosuwa Kaalettiya Citay immees; qassi cimatikka immoosona. Issi kaaletoy nuussi imettanaadan oottida gaasuwa nuuni issi issitoo akeekana xayikko shin? He kaaletoy loꞌꞌo gidiyogaa nuuni siriyogaa doommana danddayoos. Ubba nuuni kaaletuwa immida ishanttu balan xeelaa wottana danddayoos. Yihoowi ba dirijjitiya kaalettiyogaanne nuussi keehi loꞌꞌobay aybakko Yihoowi eriyogaa nuuni ammanoos. Hegaa gishshawu, nuuni ufayttiiddi sohuwara azazettoos. (Ibr. 13:17) Nu azazettiyogee galchchaa issippetettaa naagiyogaa eroos. (Efi. 4:2, 3) Aawatettay deꞌiyo ishantti nagaranchcha gidikkokka, nuuni etawu azazettikko Yihoowi nuna anjjanaagaa ammanettoos. (1 Sam. 15:22) Giigana koshshiyabaa I ba keerido wodiyan giigissana. w25.03 23-24 ¶13-14

Nuuni keehi ufayssiya wodiyan deꞌoos! Geeshsha Maxaafay kasetidi odidobay polettiiddi deꞌiyogaa nuuni ubba galla beꞌoos. Leemisuwawu, ‘huuphessa kawoynne tohossa kawoy’ alamiya haaranawu koyiyo gishshawu, issoy issuwara olettiyogaa nuuni beꞌoos. (Dane. 11:40) Xoossaa Kawotettaa mishiraachoy saꞌaa ubban sabbakettiiddi deꞌiyogaa nuuni eroos. Qassi daro miiloone asay Yihoowawu haggaazanawu dooriis. (Isi. 60:22; Mat. 24:14) Hegaa bollikka, kumi palahida ayyaanaabaa qumaa “koshshiyo wodiyan” demmoos. (Mat. 24:45-47) Mata wode hanana gitabata nuuni loytti akeekanaadan Yihoowi nuna ubbatoo maaddees. (Lee. 4:18) Gita waayee doommiyo wode, nuuni ammanettidi deꞌanaadan erana koshshiya ubbabaa eranaagaanne he keehi wayssiya wodiyan issippetettan deꞌanaagaa ammanettana danddayoos. Shin sinttanaabaa xeelliyagan nuuni erenna issi issibati deꞌiyogaa akeekana koshshees.” w24.05 8 ¶1-2

Mazamurawee sunttaa mooriyogaabaa qoncciyan yootiis. Sunttaa mooriyogaa giyogee woygiyogee? Hegee issi ura sunttaa moorana danddayiya worddo haasayaa. Mazamure 15:3y Yihoowa imattati bantta shoorotu bolli iitabaa oottennaagaanne bantta laggeta zigirennaagaakka nuna hassayissees. (Maz. 15:1) Zigiriyogaa giyogee woygiyogee? Nuuni issi uraabaa iitabaa hara asawu yootiyogan erennan he uraa zigirana danddayoos. Leemisuwawu: (1) issi michchiya ubba wode haggaazuwa aggaasu, (2) issi azinaynne machchiya Beeteeleppe kiyidosona, woy qassi (3) issi ishay cima woy galchchawu oottiyagaa gidiyogaa aggiis. He ishanttinne michchontti mooridobay deꞌennan aggenna, qassi hegaa gaasuwan eta hanotay laamettiis giidi etabaa haasayiyogee qohiyaba. Eta hanotay laamettanaadan oottida nuuni erenna daro gaasoy deꞌana danddayees. Hegaa bollikka, Yihoowa dunkkaaniyan deꞌiya imattay ‘ba laggiya bolli iitabaa oottennanne ba shooruwa zigirenna.’ w24.06 11 ¶11-13

Nuuni kaseegaappe aaruwan Yihoowawu yayyanawu nu kuuyiyo ubbaban A ufayssana koshshees. Neeni Geeshsha Maxaafaa taariketa nabbabiyo wode nena hagaadan oychcha, ‘Tana gidiyakko kuuyanabay aybee?’ Leemisuwawu, Yihoowi Israaꞌeelatussi immanawu qaalaa gelido biittaa wochchida tammu Israaꞌeela halaqati Israaꞌeela asay Kanaaneta xoonana danddayenna giyogaa siyaydda deꞌiyabadan qoppa. Neeni eti yootiyobaa ammanada asawu yayyuuteeyye, yayyiyogaa aggada Yihoowa siiqiyogaanne A ufayssanawu koyiyogaa bessuutee? Kumetta Israaꞌeela deree Yaasunne Kaaleebi yootiyo tumaa ammanibeenna. Hegaappe denddidaagan Israaꞌeelati Hidootaa Biittaa gelennaadan Yihoowi diggiis.—Qoo. 14:10, 22, 23. w24.07 10 ¶7

Xoossay erissidobaa yootiya Hooseꞌa machchee Goomeera shaaramuxa simmada Hooseꞌa aggada hara uraakko baasu. A laamettana danddayekkee? Asa wozanaa eriya Yihoowi Hooseꞌawu hagaadan giis: ‘Israaꞌeela asay hara xoossatukko simminkka, Yihoowi eta siiqiyogaadan, ba; baada laggettuwa siiqada, shaaramuxaydda deꞌiya beni ne machchiyo neenikka zaarettada siiqa.’ (Hoo. 3:1; Lee. 16:2) Hooseꞌa machchiya he wodekka gita nagaraa oottiyogaa aggabeennaagaa beꞌa. Gidikkokka Hooseꞌi iyyo atto gaanaadaaninne ba machchodan O zaarettidi ekkanaadan Yihoowi azaziis. Hegaadankka, Yihoowi zoriya siyennan ixxida ba asan hidootaa qanxxibeenna. Eti keehi iitabaa oottiyogaa aggana xayikkokka I eta siiqiis. Eti bantta nagaran zilꞌꞌettidi bantta ogiya giigissanaadan maaddanawu ba erissidobaa yootiyageeta zaari zaari kiittiis. Ha taarikee Yihoowi asa wozanan deꞌiya ubbabaa eriyogaanne gita nagaraa oottiiddi deꞌiya uri zilꞌꞌettidi laamettanaadan maaddiyogaa aggennaagaa bessees. w24.08 10 ¶7

Ayhuda gidida Kiristtaaneti gitaban laamettana koshshiis; qassi hegee metiyaba gidana danddayees. Ayhudati issi wode Yihoowi doorido asata. Daro layttawu Yerusalaamee keehi dumma soho. Yihoowa kalꞌꞌatidi haariya kawoy yan uttidi haarees. Qassi Yihoowawu goynnanawu koyiya asay Yerusalaamen Xoossaa garuwan goynnees. Ammanettida ubba Ayhudati Muuse Higgiyanne haymaanootiya kaalettiyageeti tamaarissido higgeta kaallidosona. Qumaabaa, qaxxaraabaanne Ayhuda gidennaageeta oyqqiyo ogiyabaa qonccissiya higgeti deꞌoosona. Shin, Yesuusi hayqqi simmin, Ayhudati Xoossaa garuwan yarshshiyo yarshshuwan Yihoowi ufayttibeenna. Hegaa gishshawu, Kiristtaane gidida Ayhudati goynniyo ogiya laammiyogee metiyaba gidana danddayees. (Ibr. 10:1, 4, 10) Kiitettida Pheexiroosaagaadan, mino ammanoy deꞌiyo Kiristtaanetikka laamettanawu metootidosona. (Oos. 10:9-14; Gal. 2:11-14) He Kiristtaaneti kase ammaniyobaa aggido gishshawu, Ayhuda haymaanootiya kaalettiyageeti eta yedettidosona. w24.09 9 ¶4

Yihoowi ba asaassi aawatettaa immiyo wode ubban eti hegaa darajjayettida ogiyan polanaadan koyees. (1 Qor. 14:33) Leemisuwawu, Xoossay saꞌa ubban mishiraachchoy odettanaadan koyees. (Mat. 24:14) Yesuusi he oosuwa kaalettanaadan Yihoowi aawatettaa ayyo immiis. Yesuusi hegee darajjayettida ogiyan oosettiyakkonne kaallees. Koyro xeetu layttan, dumma dumma sohotun galchchati eqqido wode kaaletuwa immanaadan cimati sunttettidosona. (Oos. 14:23) Yerusalaamen deꞌiya kiitettidaageetinne cimati ubba galchchati kaallana kaaletota immidosona. (Oos. 15:2; 16:4) Ishanttinne michchontti he kaaletota kaallido gishshawu galchchati “ammanuwan minnidi, qoodankka . . . dari dari biidosona.”—Oos. 16:5. w24.04 8 ¶1

Niisaana 16 guuran, amarida maccaasati Yesuusi moogettido duufuwakko biidosona. (Luq. 24:1, 10) Etappe issinniyo gidida Magddala Mayraamibaa ane beꞌoos. Eti duufuwakko gakkido wode Yesuusa anhaa demmibookkona. Yaaniyo gishshawu A Pheexiroosawunne Yohaannisawu yootanawu woxxaydda baasu. He attumaasati duufuwakko woxxiiddi biidosona; qassi Mayraamakka eta geeduwa kaallaasu. Eti duufuwan Yesuusa anhay baynnaagaa beꞌidi soo simmidosona. Shin Mayraama simmabeykku. A yeekkaydda yan takkaasu. A akeekana xayikkokka Yesuusi yan deꞌees. I ha ammanettida maccaasiya yeekkiyogaa beꞌidi O minttettanawu koyiis. Yaaniyo gishshawu I Mayraamiyyo qonccidi O keehi minttettiyabaa oottiis. Yesuusi O haasayissiisinne I hayquwappe denddidoogaa A ishanttussi yootiyo gita aawatettaa iyyo immiis.—Yoh. 20:17, 18. w24.10 13 ¶7

Muusee Xoossay erissidobaa yootiyagaa, daanna, halaqanne xaafe gididi oottiis. I Gibxxe aylletettaappe Israaꞌeela asaa kaalettidi kessiisinne Yihoowi malaalissiya darobaa oottishin beꞌiis. Geeshsha Maxaafan koyro ichchashu maxaafatanne Mazamure 90 xaafiis; qassi Mazamure 91 xaafennan aggenna. Iyyooba maxaafaakka I xaafennan waayi aggana. Muusee hayqqanaappe guuttaa kasetidi, awu layttay 120 gidido wode, Israaꞌeelata ubbaa shiishshidi Yihoowi etawu oottin eti beꞌidobata eta hassayissiis. Eti Yihoowi bessido malaatatanne malaalissiyabata, qassi Gibxxetu bolli oottidobata beꞌidosona. (Kes. 7:4) Eti Zoꞌo Abbay shaahettin gidduwara hemettidi pinnidosonanne Yihoowi Paaroonanne A olanchchata xayssin beꞌidosona. (Kes. 14:29-31) Eti bazzuwan deꞌiyo wode Yihoowi eta naagiisinne koshshiyabaa etawu kunttiis. (Zaa. 8:3, 4) Israaꞌeelati Hidootaa Biitti gelanawu maati uttidosona. Yaaniyo gishshawu, Muusee hayqqanaappe kasetidi eta minttettanawu koyiis. w24.11 8-9 ¶3-4

Godaa Kahuwa Baalaa wode Yesuusi ba kiittidoogeetuyyo yootidobay Galiilan keehi daro asawu yootidobaappe dummatees. Yesuusi Galiilan haasayido wode, yan deꞌiya asatuppe daroti appe koyidobay quma xalaala. Shin Yesuusi qumaappe aaruwan keehi koshshiyabay deꞌiyogaa eti akeekanaadan maaddanawu baaxetiis. I etawu merinaa deꞌuwa demissana danddayiyabaa qonccissiis. Qassi Yesuusi hayqqidaageeti wurssettaa gallassi hayquwappe denddidi merinawu deꞌana danddayiyogaakka yootiis. I guyyeppe Godaa Kahuwa Baalaa wode yootidoogaadan, amarida asatu xalaalaa xeelliyabaa ha sohuwan yootibeenna. I ubba asay demmana danddayiyo anjjuwabaa Galiilan yootiis. w24.12 11 ¶10-11

Yihoowi hanttaarabaa oottiyageeta ixxees. (Maz. 11:5) Bantta machchota wadhdhiya azinata Yihoowi keehi ixxees. (Mil. 2:16) Issi azinay ba machchiyo maara oyqqennaba gidikko I Xoossaara dabbotido dabbotay moorettees. Haray atto Yihoowi A woosaa siyennan aggana danddayees. (1 Phe. 3:7) Issi issi azinati bantta machchota keehi hanqqettoosonanne eta keehi qohiyabaa haasayoosona. Shin Yihoowi ‘yiilluwa, hanqquwa, cabbuwanne cashshaa’ ixxees. (Efi. 4:31, 32) Ba machchee bolli iitabaa haasayiya azinay ba machchee xallaara gidennan, Xoossaara dabbotido ba dabbotaakka moorees. (Yaaq. 1:26) Pornograafiya beꞌiya azinaa hanotaykka hegaa mala. I Yihoowara dabbotido ba dabbotaa moorees. Qassi I ba machchiyo kawushshees. Issi azinay oottiyoban xalaala gidennan, qoppiyobankka ba machcheessi ammanettidi deꞌanaadan Yihoowi koyees. Hara maccaasiyo aggennan xeellidi iira zinꞌꞌanawu qaaqqatiya attumaagee “he wode ba wozanan iira wodiraa laammiyogaa” Yesuusi yootiis.—Mat. 5:28, 29. w25.01 9 ¶6-8

Yihoowa ashkkarati xillo geetettidoogaa Geeshsha Maxaafay yootees. Hegaa giyogee nu oottido nagaraa gishshawu acuwa qanxxanaadan I koyenna giyogaa. Yihoowi hegaadan oottikkokka, suure pirddawu kessido ba maarata naagees. Nuuni xillo geetettidoy hegee nuussi bessiyo gishshawu gidenna. Qassi Yihoowi nagaran ufayttenna. Shin Yihoowinne Yesuusi wozuwa giigissanawu oottidoban nuuni ammaniyo gishshawu I nu nagaraa atto gaanawu koyees. (Roo. 3:24) Yihoowi nuna xillo giidoogan waani goꞌettiyoo? Yesuusaara saluwan haaranawu doorettidaageeti Xoossaa naata gidiyogan xillo geetettidosona. (Tii. 3:6-7; 1 Yoh. 3:1) I eta nagaraa atto gees. Hegaa giyogee eti nagara mule oottibookkona giyogaa mala gidiyo gishshawu, Xoossaa Kawotettaa laattana danddayoosona. (Roo. 8:1, 2, 30) Xillo geetettida harati saꞌan merinawu deꞌana. Yihoowi eta nagaraa atto giido gishshawu eti A dabbo gididosona.—Yaaq. 2:21-23. w25.02 5 ¶17; 7 ¶18

Kiitettida Pheexiroosi Yihoowagaadan qoppibeenna wodiya beꞌa. Yesuusi Yerusalaame baanaagaa, haymaanootiya kaalettiyageeti yan A oyqqanaagaa, I waayettanaagaanne hayqqanaagaa kiitettidaageetussi yootiis. (Mat. 16:21) Yesuusi Xoossaa asaa ashshiya, yaana geetettida Mase gidiyogaa Pheexiroosi erees. Hegaa gishshawu, Yihoowi Yesuusi hayqqanaadan paqqadees giidi Pheexiroosi ammananawu keehi metootennan aggenna. (Mat. 16:16) Yaaniyo gishshawu Pheexiroosi Yesuusa baakko zaaridi, “Godawu, neessi qoppa; hegee ne bolli mule gakkenna” yaagiis. (Mat. 16:22) Pheexiroosi he allaalliya xeelliyagan Yihoowagaadan qoppibeenna gishshawu, Yesuusaara issi malabaa qoppibeenna. Pheexiroosi qoppidobay loꞌꞌo milatikkokka Yesuusi A zoriya siyibeenna. Nuuni hegaappe tamaariyobay deꞌees. Yesuusi Yihoowa sheniya polanawu waayettidi hayqqana koshshiyogaa eriis. He wode Pheexiroosi Xoossay qoppiyogaadan I qoppana koshshiyogaa tamaariis. w25.03 9 ¶5-6

Neeni ammanettiyo uri nena qohido woy kaddido gishshawu keehi azzanaydda deꞌay? Issi asi nena naaqqikkokka, Yihoowi nena siiqiyogaa neeni hassayana koshshees. Hara uri nena kaddikko Daawiti yootido, hachchi gallassaa xiqisiya qofay nena minttettana danddayees. “Bantta ayyaanan liiqidaageeta” giyagee loꞌꞌobaa aybanne demmana giidi hidootennaageeta qonccissiyaba gidana danddayees. Bantta ayyaanan liiqidaageeta Yihoowi waati maaddii? Yihoowi nuussi “mataana.” I yeekkiya naꞌa idimmidi minttettiya aawa woy aayo mala. Issi uri nuna kaddido woy aggido gishshawu, nuuni keehi azzanikko, Yihoowi hegaa akeekidi nuna sohuwara maaddana. Nu wozanay meqqikko, qassi nuna pattenna asadan qoppikko I nuna minttettanawu giigi uttiis. Qassi yeemuwan naagiyo darobaa I nuussi immiyogan ha wodiyan nuna gakkiya metuwa genccanaadan maaddees.—Isi. 65:17. w24.12 23 ¶13-14

Ha wodiyan deꞌiya cimati Yihoowi eta loꞌꞌo oosuwa beꞌiyogaanne nashshiyogaa ammanettana danddayoosona. Daro cimati harata minttettiyogaa, tamaarissiyogaanne sabbakiyogaa xalla gidennan, keexuwa oosuwaninne daafabay gakkidoogeeta maaddoosona. Harati qassi Sahettidaageeta Oychchiya Citan woy Hosppitaaletuura Gattiya Konttetun oottoosona. Cimati galchchay asaba gidennan, Yihoowaba gidiyogaa eroosona. Hegaa gishshawu eti galchchan minni oottoosonanne eta oosuwawu Xoossay eta woytanaagaa ammanettoosona. (Qol. 3:23, 24) Nuuni ubbay cima gidana danddayokko. Shin ubbaykka Yihoowawu immana danddayiyobay deꞌees. Nuuni awu haggaazanawu nuussi danddayettida ubbabaa oottiyo wode I keehi ufayttees. Nuuni immana danddayiyobay guutta gidikkokka, kumetta saꞌan oosettiya oosuwawu miishshaa immiyo wode I beꞌees. Qassi I ne oottiyobaa nashshiyogaa ammanetta. Neeni hegaa oottido gishshawu I nena siiqees, qassi I nena woytana.—Luq. 21:1-4. w24.06 23 ¶12-13

Solomoni yootido taarikee Yihoowayyo goynniya oonanne gakkana danddayiyabaa qonccissees. I gita nagaraa oottana danddayees, qassi guyyeppe ubbabay ‘sohuwara’ hanidabadan qoppana danddayees. Woy I hagaadan gaana danddayees, “Qoppennan haniis.” Gidikkonne, I hanidabaa loytti qoppiyo wode gita nagaraa oottanaappe kase I iitabaa kuuyidoogaa akeekennan waayi aggana. Geella I Yihoowa siiqennaageetuura laggetennan aggenna. Woy I allaxxanawu doorido amaridabay, Interneettiyan I beꞌidobay woykko I biido sohoy issi Kiristtaaniyawu bessennaagaa gidana danddayees. Woy qassi I woossiyogaa, Geeshsha Maxaafaa nabbabiyogaa, shiiqota shiiqiyogaa woy haggaaziyogaa aggidaba gidana danddayees. Geella I Leemiso maxaafan odettida yelagaadan, daro iitabaa kuuyi simmidippe attin, ‘sohuwara’ gita nagaraa oottibeenna. Nuuni hegaappe ay tamaariyoo? Nuuni nagaraappe xalaala gidennan, nagaraa oottanaadan gaaso gidiyabatuppekka naagettana koshshees. Solomoni yelagaabaanne shaaramuxa maccaaseebaa yooti simmidi, hegaabaa loytti qonccissiis.—Mat. 5:29, 30. w24.07 16 ¶10-11

Ha minjjay aybee? Asaa ashshiya Kawotettaa mishiraachchuwa sabbakiyo oosuwa. (2 Qor. 4:1) Urqqaappe merettida miishshay aybee? Mishiraachchuwa haratussi yootiya Xoossaa ashkkarata qonccissees. Phawuloosa wode zalꞌꞌanchchati qumaa, woyniyanne miishsha mala alꞌꞌobata issisaappe harasaa efaanawu urqqaappe merettida xaaruwa goꞌettoosona. Hegaadankka, Yihoowi alꞌꞌo gidida mishiraachchuwa nuussi hadaran immiis. Yihoowi maaddin, nuuni ubbatoo sabbakanawu koshshiya minotettaa demmana danddayoos. Nuuni issi issitoo asawu yayyana danddayoos. Yaatikko yayyiyogaa waati aggana danddayiyoo? Kiitettidaageeti sabbakennaadan azazettido wode woossido woosaa akeeka. Eti yayyennan aggidi, xalan yootanaadan Yihoowi eta maaddana mala woossidosona. Yihoowi eta woosaa sohuwara zaariis. (Oos. 4:18, 29, 31) Neenikka issi issitoo yayyikko, asawu yayyiyogaa aggada, asaa siiqanaadan maaddana mala Yihoowa woossa. w24.04 16 ¶8-9

Nuuni Yihoowa siiqiyogee A sunttaa geeshsha oottidi xeellanaadan denttettees. Hegaa giyogee Seexaanay Yihoowa xeelliyagan yootido iitabay tuma gidennaagaa haratussi yootanawu koyoos giyogaa. (Doo. 3:1-5; Iyy. 2:4; Yoh. 8:44) Nuuni sabbakiyo wode nu yootiyobaa siyiya ubbawu Yihoowabaanne I ay mala Xoossakko odanawu wozanappe koyoos. A waanna eeshshay siiqo gidiyogaa, I haariyo ogee xillonne suure gidiyogaa, qassi A kawotettay mata wode waaye ubbaa xayssidi sarotettaanne ufayssaa ehaanaagaa asa ubbay eranaadan koyoos. (Maz. 37:10, 11, 29; 1 Yoh. 4:8) Nuuni Yihoowa xeelliyagan hageeta asawu yootiyo wode A sunttaa geeshsha ootti xeelloos. Qassi nuuni nu sunttaadan deꞌiyogaa eriyogan ufayttoos. w24.05 18 ¶12

Ishanttoo, intte mata laggetuyyo xalaala gidennan, haratuyyokka loꞌꞌobaa oottiyo wode ‘imattaa mokkiyageeta’ gidiyogaa besseeta. (1 Phe. 4:9) Geeshsha Maxaafaabaa qonccissiya issi xuufee yootiyogaadan, “imattaa mokkiya uri erenna asaayyokka keheesinne eta ba soo shobbiyogan ufayttees.” Inttena hagaadan oychchite, ‘Imattaa mokkiyogaara gayttidaagan tawu ay mala sunttay deꞌii?’ (Ibr. 13:2, 16) Imattaa mokkiya uri ubba asawu kehees. Leemisuwawu, hiyyeesatuyyo, haasayawu shoobettidi yiyageetuyyo, qassi ishanttanne michchontta minttettanawu minnidi oottiya woradaa xomoosiyageetuyyonne haratuyyo kehees.—Doo. 18:2-8; Lee. 3:27; Oos. 16:15; Roo. 12:13. w24.11 21 ¶6

Yesuusi geelaꞌotubaa yootido leemisuwan, mishiraa mokkanawu kiyida tammu geelaꞌotubaa yootiis. (Mat. 25:1-4) Eti ubbay mishiraara bullachchaa gelanawu hidootidosona. Yesuusi etappe ichchashati “cincca” gidiyogaanne hara ichchashati ‘cincca gidennaagaa’ yootiis. Cincca geelaꞌoti, mishiray gakkidoy qamma bilahiyan gidikkokka, eti I yaana gakkanaashin naaganawu giigi uttidosona. Yaaniyo gishshawu, eti xuman pooꞌissanawu xomppiyayyo zaytiya oyqqidosona. Eti geella mishiray takkikko giidi gujo zaytiyakka oyqqidosona. Yaatiyo gishshawu, eti xomppiya xomppiiddi takkanawu giigettidosona. (Mat. 25:6-10) Mishiray gakkido wode cincca geelaꞌoti aara bullachchawu gelidosona. Hegaadankka, Yesuusi yaana gakkanaashin beegottidinne ammanettidi deꞌiyogan giigi uttida tiyettida Kiristtaaneti Mishira gidida Yesuusaara saluwa Kawotettan haariyogan bantta woytuwa ekkana.—Ajj. 7:1-3. w24.09 21 ¶6

Sabbakiyo oosoy kumettan saꞌan daro asaa maaddiiddi deꞌiyogaa nuuni loytti qoppiyogee ubbatoo sabbakanaadan nuna denttettees. Mishiraachchuwa siyanawu koyiya daro miiloone asay layttan layttan nunaara Godaa Kahuwa baalaa bonchchees; qassi Geeshsha Maxaafaa xannaꞌees. Daro shaꞌu asati haattan muukettidi nunaara haggaazoosona. Ay keena asay mishiraachchuwa siyana danddayiyakko nuuni erokko; shin gita waayiyappe attana zawi baynna asaa Yihoowi shiishshiiddi deꞌiyogaa eroos. (Ajj. 7:9, 14) Cahaa oosuwa Goday Yihoowi daro asay mishiraachchuwa siyanaagaa ammanettiyo gishshawu nuuni aggennan sabbakoos. (Luq. 10:2) Yesuusa kaalliyageeti ubbatoo yeemottidi sabbakiyogan erettoosona. Leemisuwawu, kiitettidaageeti xalatettaaninne yeemuwan sabbakido gishshawu, asay “eti kase Yesuusaara zuppettidoogaa [akeekiis.]” (Oos. 4:13) Haggaazuwan nuna beꞌiya asati nuunikka Yesuusaagaadan yeemottiyogaa akeekana danddayoosona. w25.03 18 ¶15; 19 ¶17-18

Yihoowi harati kariyo asata wudidi xeelliyogaa Geeshsha Maxaafaappe akeekoos. Leemisuwawu, Yihoowi Isseya naatuppe issoy sinttappe Israaꞌeela kawo gidanaadan Xoossay erissidobaa yootiya Sameeli tiyana mala Isseya soo A kiittiis. Isseyi ba hosppun naatuppe laappunati Sameelaara gayttanaadan xeesiis; shin etappe yelagiya Daawita xeesibeenna. Gidikkokka, Yihoowi dooridoogee Daawita. (1 Sam. 16:6, 7, 10-12) Yihoowi Daawiti tumuppe ay mala asakkonne akeekiis. I he yelagay A keehi siiqiyogaa eriis. Yihoowi nena wudidi xeelliyogaa waati bessidaakko qoppa. Ne hanotawu haniya keehi loꞌꞌo zoriya I nena zorees. (Maz. 32:8) Hegee I neessi koshshiyabaa loytti eriyogaa bessees. (Maz. 139:1) Neeni Yihoowa zoriya oosuwan peeshshiyo wodenne hegee nena maaddiyogaa akeekiyo wode Yihoowi neessi qoppiyogaa ammanettaasa. (1 Odi. 28:9; Oos. 17:26, 27) Yihoowi neeni awu haggaazanawunne azazettanawu oottiyo ubbabaa beꞌees. Qassi I neeyyo deꞌiya loꞌꞌo eeshshata akeekeesinne ne dabbo gidanawu koyees.—Erm. 17:10. w24.10 25-26 ¶7-9

Intte Yihoowa siiqiyogeenne haratuyyo haggaazanawu koyiyogee qoncce. Intte ha oosuwa oottanawu koyanaadan inttena aybi maaddanee? Intte ishanttanne michchontta maaddiyogee intte keehi ufayttanaadan oottiyogaa qoppite. Yesuusi hagaadan giis: “Immiyogee ekkiyogaappe aaruwan ufayssees.” (Oos. 20:35) Yesuusi ba haasayidoogaadan deꞌiis. I harata haggaazidoogan ufayttiis. Marqqoosa 6:31-34n deꞌiya leemisuwa ane beꞌoos. He wode Yesuusinne I kiittidoogeeti xalalidosona. Eti guuttaa shemppanawu asi baynnasaa biidosona. Shin cora asay Yesuusappe tamaaranawu qoppidi etappe kasetidi yaa gakkiis. Inne I kiittidoogeeti ‘qumaakka maanawu wode demmibeenna’ gishshawu I eta tamaarissennan aggana danddayees. Woy Yesuusi guuttabaa xalla tamaarissidi eta yeddana danddayees. Shin Yesuusi siiqiyagaa gidiyo gishshawu “eta” ‘saꞌay yuuyana’ gakkanaashin tamaarissiyogaa aggibeenna.—Mar. 6:35. w24.11 16 ¶9-10

Yelidaageetoo, intte naati Geeshsha Maxaafaa tumaa haratussi yootiyo injjiya koyanaadan minttettite. (Roo. 10:10) Geeshsha Maxaafaabaa harata tamaarissiyogaa muuziqa miishshaa kaaꞌiyogaa tamaariyogaara geeddarssana danddayeeta. Hegaa tamaariyagee koyro heeran kaaꞌanawu metenna muuziqaa meezetana danddayees. Muuziqaa miishshaa kaaꞌiyogee loddan loddan metennaba gidees. Hegaadankka, issi yelagay koyro heeran ba ammanuwabaa qanttan yootana danddayees. Leemisuwawu, I banaara tamaariyagaa hagaadan oychchana danddayees: “Saynttistteti darotoo meretaa milatissidi oottiyogaa eray? Ufayssiya issi biiduwa ane nena bessays.” Hagaa Giigissiday Deꞌii? giyagaappe issi biiduwa bessi simmidi I hagaadan oychchana danddayees: “Issi saynttisttee meretan deꞌiyabaa milatissidi oottiyo wode sabettikko, nuuni meretaa beꞌiyo wode oona sabbana bessii?” Hegaadan tobbiyogee aara tamaariyagee Yihoowabaa gujjidi eranawu koyanaadan oottana danddayees. w24.12 19 ¶17-18

Yihoowi nuna nagaraappenne hayquwappe laꞌa kessanawu, wozo yarshsho gidanaadan Yesuusa kiittiis. Shin wottiyobi baynna issi asa hayqoy daro miiloone asaa nagaraappenne hayquwappe waati laꞌa kessana danddayii? Kiitettida Phawuloosi hagaadan giis: “Issi asi [Addaame] azazettibeenna gishshawu daroti nagaranchcha gididoogaadan, hegaadankka issi asi [Yesuusi] azazettido gishshawu daroti xillo gidana.” (Roo. 5:19; 1 Xim. 2:6) Hegaa gishshawu, wottiyobi baynna issi asi Xoossawu azazettennan aggido gishshawu, asa ubbay nagaraanne hayquwa laattidoogaa Phawuloosi yootiis. Yaaniyo gishshawu, nagaraappenne hayquwappe laꞌa kiyanawu wottiyobi baynna issi asi Xoossawu azazettana koshshiis. Yihoowi Addaame naatuppe bawu azazettiyageeti merinawu deꞌanaadan oottibeennay aybissee? Yaatiyogee metuwa giigissanawu loꞌꞌo oge giidi nagaranchcha asay qoppana danddayees. Shin Yihoowa qofan yaatiyogee suure pirdda gidenna. Ayssi giikko hegee Addaamee gita nagaraa mule oottibeenna, qassi A naatikka nagaranchcha gidokkona giyogaa mala gidana danddayees. Shin hanotay hegaadaana gidenna. w25.01 21 ¶3-4

Kiitettida Phawuloosi matan hayqqanaagaa erikkokka, ba oottidobaa qoppidi keehi ufayttiis. I hagaadan giis: “Ta wottaanne woxxada wurssaas; ammanuwaakka naagaas.” (2 Xim. 4:6-8) Phawuloosi ba deꞌuwan Yihoowawu haggaazanawu dooriyogan loꞌꞌobaa kuuyiis; qassi Yihoowi an ufayttiyogaa ammanettiis. Nuunikka loꞌꞌobaa kuuyanawunne Yihoowa ufayssanawu koyoos. Nuuni waatidi hegaadan oottana danddayiyoo? Phawuloosi babaanne ammanettida hara Kiristtaanetubaa odiiddi, “nuuni ammaniyogaadan deꞌoosippe attin, beꞌiyogaadan [deꞌokko]” yaagiis. Yihoowa ammanenna uri beꞌiyobaa, siyiyobaanne baayyo siyettiyabaa xalaalan kuuyees. Shin Yihoowa ammaniya asi issibaa kuuyiyo wode Yihoowa ufayssiyabaa qoppees. I Geeshsha Maxaafay yootiyo Yihoowa zoriya kaallikko, ha wodiyan A deꞌoy ufayssiyagaa gidanaagaanne sinttappe Yihoowi A darissidi anjjanaagaa ammanettiyogaa ba oosuwan bessees.—Maz. 119:66; Ibr. 11:6. w25.03 20 ¶1-2

Kase danobaa oottiyageeti, hanqqettiyageeti, woy ammanettennaageeti Yihoowa geeshsha ayyaanay maaddin bantta deꞌuwan laamettidosona. (Isi. 65:25) Eti bantta iita eeshshaa agganawu wozanappe baaxetidosona. (Efi. 4:22-24) Xoossaa asay nagaranchcha gidiyo gishshawu haꞌꞌikka balabaa oottiyogee attennaba. Gidikkonne, Yihoowi A siiqiyanne issoy issuwara siiqettiya “asa ubbaa” baakko ehiis; hegaappe denddidaagan, nuussi tumu sarotettaynne issippetettay deꞌees. (Tii. 2:11) Hagee ubbaa danddayiya Xoossaa xalaalay oottana danddayiyo malaalissiyaba! I yootidobay ubbatoo polettees. (Isi. 55:10, 11) Ayyaanaa gannatee ha wodiyan deꞌees. Yihoowi ba soo ehiido awu goynniyageeti tumuppe dumma. Nuuni A soo asaa yara gidiyo gishshawu, amarida hanotan sarotettaaninne qohiya alamiyappe naagettidi deꞌoos. (Maz. 72:7) Hegaa gishshawu nuussi danddayettida keenan daroti Yihoowawu goynnanaadan maaddanawu koyoos. Asay Yesuusa kaalliyagaa gidanaadan oottiyogan yaatana danddayoos.—Mat. 28:19, 20. w24.04 23 ¶13, 15

Yesuusi ba kumetta qofan Yihoowa siiqiis. Yesuusi Xoossay I oottanaadan koyidobaa eriis; qassi hegee I keehi waayettanaadan oottiyaba gidikkokka I yaatanawu murttiis. Yesuusi ba Aawaa sheniya poliyogan xeelaa wottido gishshawu, ba halchchuwa polennaadan aybinne diggana mala eeno gibeenna. Pheexiroosinne kiitettida harati Yesuusaara daro wodiya aattiyonne A qofaa tamaariyo loꞌꞌo injjiya demmidosona. Pheexiroosi ayyaanay kaalettin xaafido koyro dabddabbiyan Kiristtaaneti Kiristtoosa qofaa ola miishshadan oyqqanaadan minttettiis. (1 PHe. 4:1) Pheexiroosi, ‘ola miishshadan oyqqite’ giido wode wotaaddaratuura gayttida qaalaa goꞌettiis. Hegaa gishshawu, Kiristtaaneti Yesuusaagaadan qoppiyageeta gidikko, iita amuwanne Seexaanay haariyo ha alamiya eqettana danddayoosona.—2 Qor. 10:3-5; Efi. 6:12. w25.03 8-9 ¶1-3

Neeni aqo oyqqanawu qoppada wodiya issippe aattiyo wode he uraabaa erana koshshiyabay aybee? Neeni he ura loytta siiqanaappe kase keehi koshshiya amaridabata haasayanawu koyana danddayaasa; leemisuwawu, A halchchuwabaa oychchana danddayaasa. Neeni issi uraa waata loytta erana danddayay? Neeni oyshaa oychchiyogaaninne I yootiyobaa ezggiyogan he uraa loytta erana danddayaasa. Intte naaꞌꞌaykka intteyyo tumuppe siyettiyabaa haasayana koshshees. (Yaaq. 1:19) Issippe haasayanawu metootennaadan maaddiyabata issippe oottana danddayeeta; leemisuwawu issippe maana, asi dariyo heeran hemettananne sabbakana danddayeeta. Qassi laggetuuranne so asaara issippe aattiyo wode issoy issuwabaa loytti erana danddayeeta. Hegaa bollikka, dumma dumma hanotatuuninne dumma dumma asaara deꞌiyo wode I bessiyo eeshshaa eranawu issi issibaa oottanawu halchcha. w24.05 27-28 ¶6-7

Matan keehi waayissiyabay nuna gakkana, qassi nuuni awudeegaappenne aaruwan Yihoowan ammanettana koshshees. Geeshsha Maxaafaa taariketinne ha wodiyan Yihoowa Markkatu deꞌuwan hanidabati Xoossay ba ashkkarata waati maaddidaakko nuuni akeekanaadan maaddoosona. He taariketa loytta qoppa. Yaatiyogan, ne Zaalla gidida Yihoowan loytta ammanettana danddayaasa. Qassi nuuni nu ishanttanne michchontta minttettanawu nuussi danddayettida ubbabaa oottana danddayoos. Leemisuwawu, Yesuusi Simoona Keefa (“Pheexiroosa” giyoogaa) giidi sunttiis; hegaa giyogee “Guutta Zaalla” giyogaa. (Yoh. 1:42) Pheexroosi galchchan deꞌiya harata minttettanaagaanne eta ammanuwa minttanaagaa Yesuusi yootiis. Galchchaa cimati “gita zaallaa kuwaa mala” geetettidosona. Hegee eti galchchan deꞌiyageeta naagiyogaa bessees. (Isi. 32:2) Shin nuuni ubbay Yihoowagaa mala eeshshata bessikko, issoy issuwa minttettana danddayoos. w24.06 28 ¶10-11

Yihoowi ammanettidaageeta giido Israaꞌeela kawoti tumu goynuwa mintti kaallidosona. Yihoowi ammanettibeennaageeta giidi pirddido amarida kawoti A Higgiyawu azazettiyogaa aggidi worddo xoossatuyyo goynnidosona. (1 Kaw. 21:25, 26; 2 Odi. 12:1) Yihoowi goynuwa xoqqu ootti xeelliyoy aybissee? Issi gaasoy Xoossaa asay tumu goynuwa kaallanaadan maaddiyo aawatettay kawotuyyo deꞌiyogaa. Qassi asay worddo xoossatuyyo goynniyogee eti hara iita nagaraa oottanaadaaninne issoy issuwa naaqqanaadan oottiis. (Hoo. 4:1, 2) Hegaa bollikka, Israaꞌeela kawotinne Israaꞌeelati ubbay banttana Yihoowawu sheedhdhidosona. Yaaniyo gishshawu eti Yihoowawu goynniyogaa aggidi worddo xoossatussi goynnidoogee shaaramuxiyogaa mala gidiyogaa Geeshsha Maxaafay yootees. (Erm. 3:8, 9) Shaaramuxiya issi uri ba aqo laggiya woy ba aqo laggee bolli nagaraa oottees. Hegaadankka, bana Yihoowawu sheedhdhida issi uri Yihoowawu ammanettennan aggiyo wode A keehi azzanttees.—Zaa. 4:23. w24.07 22-23 ¶12-15