Gubaaꞌiyaa Minttettiyoogaa Aggoppite
“Issoi issuwaa minttettitenne maaddite.”—1 TASALONQQE 5:11.
1. Kiristtaane gubaaꞌiyan deꞌiyoogee ayba anjjo demissii, shin ayba metoy gakkana danddayii?
KIRISTTAANE gubaaꞌiyaa yame gidiyoogee tumuppe gita anjjo. Neeyyo Yihoowaara loꞌꞌo dabbotay deꞌees. Kaaleto gidanaadan a Qaalan ammanettiyoogee Kiristtaanetuyyo bessenna deꞌoy kaalettiyo iitabaappe nena naagees. Neeni loꞌꞌobaa oottanaadan koyiya tumu laggeti daroti neeyyo deꞌoosona. Ee, daro anjjuwaa demmaasa. Gidoppe attin, metoy dumma dumma gidikkokka, issi issi Kiristtaaneti metuwaara baaxetiiddi deꞌoosona. Issotuyyo issotuyyo Xoossaa Qaalan deꞌiya ciimma yohuwaa akeekanau maadoy koshshana danddayees. Haraati sahettoosona woykko unꞌꞌettoosona; woy qassi eeyyatettan kuuyidobay kaalettidoban metootana danddayoosona. Nuuni ubbay Xoossaappe haakkida alamiyan deꞌoos.
2. Nu ishata metoy gakkiyo wode waatidi maaddana danddayiyoo, aybissi?
2 Nuuppe ooninne nu mala Kiristtaaneti tuggatiyoogaa beꞌanau koyenna. Kiitettida PHauloosi gubaaꞌiyaa asa bollan leemisidi, “bollaa qommotuppe issoi seelettikko, bollaa qommoti ubbaikka aara” seelettiyoogaa yootiis. (1 Qoronttoosa 12:12, 26) Hegaa mala hanotatun, nu ishatanne michota maaddanau baaxetana koshshees. Gubaaꞌiyan deꞌiyaageeti metuwaa xoonanaadan gubaaꞌiyaa yameti maaddidoogaa bessiya daro taariketi Geeshsha Maxaafan deꞌoosona. He taariketa huuphiyan huuphiyan beꞌiyo wode, an deꞌiyaagaadan intte waatidi maaddana danddayiyaakko qoppite. Intte ishata ayyaanaaban waatidi maaddana danddayeetii; yaatiyoogan Yihoowa gubaaꞌiyaa waatidi minttana danddayeetii?
‘Banttanaara Soo A Efiidoosona’
3, 4. Aqiilinne PHirisqqila Aphiloosa ayba ogiyan maaddidonaa?
3 Aphiloosi Efisoonan deꞌiyo wode, mishettidi haggaaziyaagaa. Oosuwaa maxaafay: “Yohaannisa xinqqatiyaa xalaalaa eridi, ayyaanan mishettiiddi, Yesuusabaa sitti oottidi haasayeesinne tamaarissees” yaagees. Aphiloosi “Aawaa sunttan, Na7aa sunttaaninne Geeshsha Ayyaanaa sunttan” xammaqettiyoogaabaa erennaagee, Xammaqiya Yohaannisi erissiyo ashkkaratuppe woykko 33 M.L. PHenxxaqosxxe gallassaappe kase sabbakida, Yesuusi erissiyo ashkkaratuppe i tumaa siyido gishshataassa milatees. Aphiloosi mishettidi haggaaziyaaba gidikkokka, i eribeenna keehi koshshiyaabay deꞌees. I ba mala Kiristtaanetuura issippetettaa medhidoogee a waatidi maaddidee?—Oosuwaa 1:4, 5; 18:25; Maatiyoosa 28:19.
4 Aqiilanne PHirisqqilo giyo Kiristtaane azinaynne machiyaa Aphiloosi Ayhuda woosa keettan xalan sabbakiyoogaa siyidi, a banttanaara soo efiidi, gujjidi tamaarissidosona. (Oosuwaa 18:24-26 nabbaba.) Hegee siiqo bessiyaaba. Aqiilinne PHirisqqila Aphiloosa maaddanau, toochiyoobadan au siyettenna hanotan hiillan haasayissennan aggokkona. I Kiristtaane gubaaꞌiyaa doometta taarikiyaa erenna. Ha keehippe koshshiyaabaa ayyo yootidoogau Aphiloosi ba ooratta laggeta galatidoogee sirissenna. Aphiloosi ha eraa demmidi, Akaayiyan deꞌiya Kiristtaaneta “daro maaddiis”; qassi loyttidi markkattiis.—Oosuwaa 18:27, 28.
5. Kawotettaabaa aassiya shaꞌan qoodettiyaageeti siiquwan maaddiyoy ayba ogiyaanee, hegee ay demissidee?
5 Ha wodiyan Kiristtaane gubaaꞌiyan deꞌiya daroti Geeshsha Maxaafaa akeekanaadan banttana maaddidaageeta keehippe galatoosona. Geeshsha Maxaafaa xinaateti daroti banttana xannaꞌissidaageetuura mino dabbotaa medhidosona. Asay tumaa eranaadan maaddanau darotoo unddenna aginau ubbatoo xannaꞌissanau prograamiyaa giigissiyoogaa koshshees. Gidikkokka, Kawotettaabaa aassiyaageeti hegee asaa deꞌuwaara gayttidaba gidiyoogaa eriyo gishshau, dosan hegaadan oottoosona. (Yohaannisa 17:3) Asay tumaa akeekiyoogaa, aara moggottidi deꞌiyoogaanne ba deꞌuwan Yihoowa sheniyaa oottiyoogaa beꞌiyoogee ayba ufayssiyaabee!
“Ximootiyoosabaa Loittidi Markkattidosona”
6, 7. (a) PHauloosi banaara misoonaawe oosuwau baanaadan Ximootiyoosa dooridoy aybissee? (b) Ximootiyoosi ayba dichaa bessanaadan maaduwaa demmidee?
6 Kiitettida PHauloosinne Sillaasee misoonaawe oosuwau naaꞌꞌanttuwaa biido wode, Lisxxiran layttay 20 heera gidido Ximootiyoosaara gayttidosona. “Lisxxiraaninne Iqooniyoonen de7iya ishantti Ximootiyoosabaa loittidi markkattidosona.” Ximootiyoosa aayyiyaa Euniiqanne a aayee aayyiyaa Loyda banttana geppida Kiristtaane; shin a aaway ammanenna. (2 Ximootiyoosa 1:5) PHauloosi amarida layttaappe kase koyro Lisxxira biido wode, he keettaa asaara erettennan aggenna. SHin Ximootiyoosi keehi loꞌꞌo yelaga naꞌa au milatido gishshau, haꞌꞌi PHauloosi a keehippe koyiis. Yaatiyo gishshau, he gubaaꞌiyaa cimati doorin, Ximootiyoosi misoonaawe oosuwan PHauloosa maaddiyaagaa gidiis.—Oosuwaa 16:1-3 nabbaba.
7 Ximootiyoosi baappe gitatiya ba laggiyaappe darobaa tamaarana koshshiis. I loyttidi tamaariis; guyyeppe PHauloosi, bana kalꞌꞌatidi gubaaꞌiyaa geeddanaadan ammanettidi Ximootiyoosa kiittiis. Dungguuxanne daro meezee baynna yelagay Ximootiyoosi, PHauloosaara issippe oottido 15 gidiya layttan gooba gubaaꞌe cima gidiis.—Piliphphisiyuusa 2:19-22; 1 Ximootiyoosa 1:3.
8, 9. Gubaaꞌiyaa yameti yelagata ayba ogiyan minttettana danddayiyoonaa? Leemisuwaa yoota.
8 Kiristtaane gubaaꞌiyan deꞌiya daro yelagati ha wodiyan darobaa oottana danddayoosona. Ayyaanaaban loꞌꞌo leemiso gidiyaageeti ha yelagata minttettiyaabanne maaddiyaaba gidikko, eti baaxetidi Yihoowa asaa giddon gita aawatettaa oyqqana danddayoosona. Intte gubaaꞌiyaa hanotaa akeekite! Ximootiyoosaagaadan gidaa kunttana danddayiya yelagati deꞌiyoonaa? Intte maaddiininne minttettin eti aqinye, Beeteelen oottiyaageeta, misoonaawe, woykko bollaara geeddiyaageeta gidana danddayoosona. Eti hegaa mala hoolliyau baaxetanaadan maaddanau intte ay oottana danddayeetii?
9 Beeteelen 20 layttau oottida Marttini, 30 layttappe kase woradaa bollaara geeddiya issi ishaara issippe haggaaziyo wode, he ishay bana minttettidoogaa nashshidi hassayees. He ishay yelagatettan Beeteelen oottido oosuwaabaa ufayssan yootiis. Hegaadan Yihoowa dirijjitiyan ba dosan oottana danddayiyaakkonne qoppanaadan i Marttina minttettiis. Marttini ubbatoo hassayiyo ha minttettoy i guyyeppe kuuyido kuushshau keehippe maaddiis. Ayyaanaabaa hoolliyaa xeelliyaagan neeni yelagata minttettiyoogee ay keena goꞌanaakko ooni erii?
“Unꞌꞌettidaageeta Minttettite”
10. Eppafiroditoosau aybi siyettidee, aybissi?
10 Eppafiroditoosi ba ammanuwaa gaasuwan qashettida, kiitettida PHauloosa oychanau keehi daafurssiya ogiyaa manddaridi, Piliphisiyuusappe Roome biis. I Piliphisiyuusan deꞌiya Kiristtaaneti kiittin biis. I eta imotaa PHauloosau gattana xallaassa gidennan, bau danddayettida ubban PHauloosa metiyaaban maaddanau aara takkanaukka qoppiis. Gidoppe attin, Eppafiroditoosi Roomen deꞌiiddi sahettidi “haiqqiichchidi attiis.” Eppafiroditoosi ba qoppidobaa polibeenna gishshau, unꞌꞌettiis.—Piliphphisiyuusa 2:25-27.
11. (a) Gubaaꞌiyan deꞌiyaageetuppe issoti issoti unꞌꞌettikko nuuni garamettana koshshennay aybissee? (b) Eppafiroditoosa xeelliyaagan ay oottanaadan PHauloosi minttettidee?
11 Ha wodiyan daro hanotay asay unꞌꞌettanaadan oottees. Alamiyaa Payyatettaa Dirijjitiyaa naqaashay bessiyoogaadan, alamiyaa asan 5ppe 1y issi wode ba deꞌuwan unꞌꞌettana danddayees. Hegee Yihoowa asaakka bochees. So asau koshshiyaabaa kunttanau metootiyoogee, sahoy, mooridoban hidoota qanxxiyoogee woykko harabay issi uri unꞌꞌettanaadan oottana danddayees. Piliphisiyuusan deꞌiya Kiristtaaneti Eppafiroditoosa maaddanau ay oottana danddayiyoonaa? PHauloosi: “Godan de7iya ishadan, kumetta ufaissan a mokkite; qassi a milatiya asa ubbaakka bonchchite. Aissi giikko, intte intte huuphen tana maaddana danddayenna maaduwaa maaddanau, Kiristtoosa oosuwaa gishshau, ba shemppuwaa shenehoo giidi haiqqiichchidi attiis” yaagidi xaafiis.—Piliphphisiyuusa 2:29, 30.
12. Unꞌꞌettidaageeta aybi minttettana danddayii?
12 Unꞌꞌettida woy hidootaa qanxxida ishata nuunikka maaddana koshshees. Eti Yihoowayyo oottiyoobaa xeelliyaagan nuuni yootidi minttettana danddayiyo loꞌꞌobay deꞌiyoogee sirissenna. Eti Kiristtaane gidanau, woykko kumetta wodiyaa haggaazanau bantta deꞌiyo hanotaa laammennan aggokkona. Eti hegaadan baaxetidoogaa goꞌꞌaa akeekoos; qassi Yihoowaykka akeekiyoogaa eti ammanettanaadan minttettana danddayoos. Ammanettida issoti issoti kase oottiyoobaa ubbaa oottennaadan cimatettay woykko harggee diggidaba gidikkokka, eti daro layttau oottidobau nuuni eta bonchana bessees. Ayba hanotan deꞌikkokka, Yihooway baassi ammanettiyaageeta ubbaa: “Yayyiyaageeta [“unꞌꞌettidaageeta,” NW] minttettite. Wolqqi bainnaageeta maaddite. Asa ubbaa danddayite” yaagidi zorees.—1 Tasalonqqe 5:14.
“Ayyo Atto Gaanaunne A Minttettanau Bessees”
13, 14. (a) Qoronttoosa gubaaꞌee ekkido wolqqaama tanggoy aybee, aybissi? (b) Bohidoogee waatidi maaddidee?
13 Koyro xeetu layttan Qoronttoosa gubaaꞌiyan deꞌiya issi bitanee shori baynnabaa oottidi ba nagaraappe simmibeenna. I gubaaꞌiyaa geeshshatettaa mooriyaabaa oottiis; qassi hegaa malabay ammanenna asaykka oottennaba. Yaatiyo gishshau, he bitanee gubaaꞌiyaappe bohettanaadan PHauloosi azazidoogee bessiyaaba.—1 Qoronttoosa 5:1, 7, 11-13.
14 He seeray maaddiis. Gubaaꞌee mooriyaabaappe naagettiis; qassi nagaraa oottida bitanee ba mooruwaa akeekidi wozanappe ba nagaraappe simmiis. Bitanee ba nagaraappe simmidoogaa erissiyaabaa oottido gishshau, PHauloosi he gubaaꞌiyau xaafido naaꞌꞌantto dabddaabbiyan he bitanee gubaaꞌiyaara walahettana koshshiyoogaa yootiis. Gidikkokka, koshshiyaabay hegaa xalla gidenna. PHauloosi nagaraappe simmida bitanee ‘keehi daro azzanenna mala, gubaaꞌee ayyo atto gaanaunne a minttettanau bessiyoogaa’ yootiis.—2 Qoronttoosa 2:5-8 nabbaba.
15. Bantta nagaraappe simmidi gubaaꞌiyaara walahettidaageeta nuuni ayba ogiyan xeellana koshshii?
15 Ha taarikiyaappe ay tamaariyoo? Issi issi Kiristtaaneti bohettiyoogee nuna azzanissees. Eti Xoossaa sunttaa borissidabanne gubaaꞌiyaa cayissidaba gidana danddayoosona. Eti nuna naaqqidaba gidana danddayoosona. Gidoppe attin, he allaalliyaa xeellanaadan sunttettida cimati nagaraappe simmida uri gubaaꞌiyaara walahettana mala, Yihoowa azazuwaara moggiya hanotan kuuyiyo wode, hegee Yihooway ayyo atto giidoogaa bessees. (Maatiyoosa 18:17-20) Nuunikka Yihoowagaadan oottana koshshennee? Qareti baynnaageetanne atto geennaageeta gidiyoogee Yihoowaara eqettiyoogaa mala. Xoossaa gubaaꞌiyan sarotettaynne issippetettay deꞌanaadaaninne Yihoowan nashettanau, wozanappe bantta nagaraappe simmidi gubaaꞌiyaara walahettidaageeta nuuni “siiqiyoogaa” bessana koshshennee?—Maatiyoosa 6:14, 15; Luqaasa 15:7.
‘Marqqoosi Tana Keehi Maaddees’
16. PHauloosi Marqqoosa hanotan azzanidoy aybissee?
16 Geeshsha Maxaafan deꞌiya hara taarikee nuna azzanissidaageeta xeelliyaagan lancciyaa uluwan oyqqana koshshennaagaa bessees. Leemisuwau, Marqqoosa giyo Yohaannisi kiitettida PHauloosa keehippe azzanttiis. Waatidi? PHauloosinne Barnnaabaasi Misoonaawe oosuwau koyro biyo wode, Marqqoosi eta maaddanau etaara biis. SHin gaasoy erettana xayikkonne, eti biishin Marqqoosi etappe shaahettidi soo simmiis. PHauloosi hegan keehippe azzanido gishshau, misoonaawe oosuwau naaꞌꞌanttuwaa baanau qoppiyo wode, Marqqoosi banttanaara biyoogaa xeelliyaagan Barnnaabaasaara maayettibeenna. Koyro biido wode hanidabaa qoppidi, Marqqoosi banttanaara baanaadan PHauloosi koyibeenna.—Oosuwaa 13:1-5, 13; 15:37, 38 nabbaba.
17, 18. PHauloosanne Marqqoosa giddon merettida metoy giigidoy ayba ogiyaanee, nuuni hegaappe ay tamaarana danddayiyoo?
17 Marqqoosi hara heeran Barnnaabaasaara misoonaawe gididi oottido gishshau, PHauloosi a koyibeennaagan keehippe hidootaa qanxxibeennaagee qoncce. (Oosuwaa 15:39) Amarida layttaappe simmin PHauloosi abaa xaafidobay i ammanettiyaagaa gidiyoogaa bessees. PHauloosi Roomen qashuwan deꞌiyo wode, Ximootiyoosi baakko yaanaadan dabddaabbiyaa kiittiis. He dabddaabbiyan PHauloosi: “Marqqoosi tana oosuwan keehi maaddanau danddayiyo gishshau, a demmada nenaara ekkada ya” yaagiis. (2 Ximootiyoosa 4:11) Ee, Marqqoosi haꞌꞌi ayyaanaaban diccidoogaa PHauloosi eriis.
18 Ha taarikiyaappekka tamaariyoobi deꞌees. Loꞌꞌo misoonaawe gidanaadan oottiya eeshshaa Marqqoosi dichiis. PHauloosi koyro a koyibeennaagan xubettibeenna. Ikka PHauloosikka ayyaanaaban kaymida asa gidiyo gishshau, ooyetti attibookkona. Hegaappe dumma ogiyan, Marqqoosi keehippe maaddiyaagaa gidiyoogaa PHauloosi guyyeppe akeekiis. Yaatiyo gishshau, ishati bantta giddon merettida metuwaa giigissi simmidi oottana bessiyaabay, harati ayyaanaaban dichaa bessanaadan maaddiyoogaa. Loꞌꞌo xeelaa oyqqiyoogee gubaaꞌiyaa minttettees.
Gubaaꞌiyaanne Nena
19. Kiristtaane gubaaꞌiyaa yame ubbay issoy issuwaa waati maaddana danddayii?
19 Ha ‘wayssiya wodiyan’ gubaaꞌiyan deꞌiya ishatunne michotu maadoy neeyyo koshshees; etaukka ne maadoy koshshees. (2 Ximootiyoosa 3:1) Issi Kiristtaanee bana gakkiya metuwaa loꞌꞌo ogiyan kiyanau ayba tanggo ekkana bessiyaakko ubbatoo erennan aggana danddayees; shin Yihooway erees. Harati suure ogiyaa kaallanaadan maaddanau i nena gujjin, gubaaꞌiyaa yameta goꞌettana danddayees. (Isiyaasa 30:20, 21; 32:1, 2) Yaatiyo gishshau, danddayettida ubban PHauloosa zoriyaa ne wozanan wotta! “Ha77i oottiyoogaadan, issoi issuwaa minttettitenne maaddite” yaagiya zoriyaa kaalliyoogaa aggoppa.—1 Tasalonqqe 5:11.
Woygada Zaaruutii?
• Kiristtaane gubaaꞌiyan harata minttettana koshshiyoy aybissee?
• Harati ayba metuwaa xoonanaadan maaddana danddayay?
• Gubaaꞌiyan deꞌiya haratu maadoy nuussi koshshiyoy aybissee?
[Sinttaa 13n deꞌiya misiliyaa]
Nu mala Kiristtaanee metoy gakkin baaxetiyo wode kaafana danddayoos
[Sinttaa 14n deꞌiya misiliyaa]
Kiristtaane gubaaꞌiyan deꞌiya daro yelagati ha wodiyan darobaa oottana danddayoosona