Intte Ufayttanaadan Oottiyaabay Aybee?
1. Ubba aginaa wurssettan nuuni ufayttanaadan oottiyaabay aybee?
1 Ubba aginaa wurssettan haggaazuwaa irpporttiyaa immanaadan oychiyo wode, intte ufayttanaadan oottiyaabay aybee? Nuuni aginan aginan 130 saatiyaa haggaaziya dumma aqinye gidin woy 15 daqiiqaa haggaazanaadan paqqadidoogeeta gidin, ubbaykka kumetta shemppuwaappe Yihoowayyo oottiyo oosuwan ufayttana koshshees.—Maz. 100:2.
2. Nuuni Yihoowa oosuwaa minnidi oottana koshshiyoy aybissee?
2 Yihooway ubbabaa Haariya Godaa gidiyo gishshau, nuuyyo deꞌiya ubbabaappe loꞌꞌuwaa ayyo immana bessees. (Mil. 1:6) Nuuni a siiqiyo gishshau, a sheniyaa polanau nu huuphiyaa geppida. Yaatiyo gishshau, “koiro aifida katta ubbaappekka xeeraa” immiyoogaara issi mala gididabaa nu wodiyaappe, wolqqaappenne eraappe Yihoowa oosuwau immidoogaa akeekikko, omarssan omarssan woy aginaa wurssettan ufayttanaadan oottiyaabay deꞌees. (Lee. 3:9) Gidoppe attin, nu zoriyaa wozanay nuna walassikko, giigissanau ay oottana danddayiyaakko qoppana koshshees.—Roo. 2:15.
3. Nuna haratuura geeddarssiyoogee eratetta gidennay aybissee?
3 “Hara Asaagaara Giigissennan”: Nuna haraatuura woy nu hanotaa kase nuuyyo wolqqay deꞌiyo wodiyaagaara geeddarssiyoogee eratetta gidenna. Hanotay laamettees. Issuwaa wolqqay haraagaappe dummatees. Geeddarssiyoogee darotoo keesettanaadan woykko issi uri goꞌꞌennabadan bana xeellanaadan oottees. (Gal. 5:26; 6:4) Yesuusi issi ura haraara geeddarssibeenna. I ubba issi uri ba wolqqa keenaa oottidobau galatiis.—Mar. 14:6-9.
4. Yesuusi yootido leemisuwaappe ay tamaarana danddayiyoo?
4 Yesuusi yootido issi leemisuwan, oosanchatussi “huuphiyan huuphiyan eta wolqqaa keenaa” miishshay imettiis. (Maa. 25:15) Eta goday yiidi eti oottidobaa oychido wode, bantta hanotaadan bantta wolqqa keenaa minnidi oottidaageeta galatiis, qassi eti bantta godaara ufayttidosona. (Maa. 25:21, 23) Nuunikka hegaadan Kawotettaabaa minnidi sabbakiyo wode, Xoossay nuna nashshanaagaa ammanettana danddayoos, qassi nuuni ufayttanaadan oottiyaabay deꞌees!