‘Ayyaanaabaa Saamuwa’ Aliyogaa Aggoppa

1. Deꞌuwan deꞌanawu asawu koshshiyabati aybee? (Maatiyosa 5:3)

YIHOOWI asay deꞌanawu aybi koshshiyakko erees. Leemisuwawu, nuuni deꞌuwan deꞌanawu qumay, maayoynne keettay koshshees. He koshshiyabatuppe issoy amarida wodiyawu xayikko, keehi metootana danddayoos. Asawu koshshiya harabaykka deꞌiyogaa Yihoowi erees. I nuuni ayyaanaabaa saamettanaadankka oottidi medhdhiis. (Maatiyosa 5:3 nabbaba.) Nuuni tumuppe ufayttana koyikko, hegee nuussi koshshiyogaa akeekananne hegaa ubbatoo alana bessees.

2. “Ayyaanaabaa saamettiyageeta” giyogee woygiyogaakko leemisuwan qonccissa.

² “Ayyaanaabaa saamettiyageeta” giyogee woygiyogee? Hegee koyro xaafettido doonan maaduwa koyidi woossiya ura qonccissees. Issi woosanchchaabaa ane qoppa. A maayoy keehi qitattiis; qassi I ogiya gaxan uttiis. I qumaa miibeenna gishshawu daafuriis; I deꞌiyo hanotaappe denddidaagan asay akko shiiqenna; qassi galla away A xuuggeesinne omarssi meegoy A kokkorssees. He woosanchchay deꞌuwan deꞌanawunne wolqqaa demmanawu awu maadoy koshshiyogaa erees. Hegaadankka, ayyaanaabaa saamettiya uri ba deꞌuwan Xoossaa maadoy koshshiyogaa erees. Hegaa gishshawu, Yihoowi A siiqiyageetussi giigissiyo gidi palahiya ayyaanaabaa qumaa maanawu I yeemottees.

3. Ha huuphe yohuwan nuuni ay beꞌanee?

³ Yesuusappe maaduwa demmanawu woossida Pinqqe maccaaseeppe nuuni ay tamaarana danddayiyakko ha huuphe yohuwan koyro pilggana. Ha taarikee ayyaanaabaa saamettiyageeti bessana koshshiyo heezzu eeshshata qonccissees. Yaatidi ayyaanaaban mino gidida Pheexiroosi, Phawuloosinne Daawiti oottidobaa beꞌana.

NUUSSI KEEHI KOSHSHIYA HEEZZU EESHSHATA

4. Pinqqe maccaasiya Yesuusi iyyo ay oottanaadan koyadee?

⁴ Issi galla, Pinqqe maccaasiya Yesuusakko yaasu. I naꞌiyo “daydanttay oyqqidi keehi wayssiiddi deꞌees.” (Mat. 15:21-28) He maccaasiya gulbbatada Yesuusi maaddanaadan woossaasu. Nuuni ha maccaasiyo milatana danddayiyo heezzu ogeta ane beꞌoos.

5. Yesuusi he maccaaseessi ay oottidee, qassi aybissi? (Misiliyakka xeella.)

⁵ Pinqqe maccaasiya tumuppe bana ziqqi oottaasu. Nuuni hegaadan giyoy aybissee? Yesuusi O Ayhuda gidenna asaa son deꞌiya kana maraara geeddarissidaba gidikkonne, A yiillotabeenna gishshataassa. Yesuusi nena hegaadan giyakko ne waanuutee? Neeni yiillotada Yesuusa maaduwa oychchiyogaa agguutee? Shin Pinqqe maccaasiya hegaadan oottabeykku. A bana ziqqi oottaasu; qassi hidoota qanxxennan maaduwa oychchaasu. He maccaasiya Yesuusi maaddanaadan aggennan woossidoogee hegaa loytti qonccissees. A hegaadan oottidoy aybissee? Yesuusa ammaniyo gishshaassa. Yesuusi I ammanoy mino gidiyogaa beꞌido wode O maaddanawu kuuyiis. Yesuusi Israaꞌeela keettan bayida dorssatu xalaalaa maaddanawu kiitettidoogaa yootidaba gidikkonne, I he maccaasee naꞌeeppe daydanttaa kessiis.

6. Pinqqe maccaaseebaa yootiya taarikiyappe nu ay tamaariyo?

⁶ Nuuni ayyaanaabaa saamuwa alanawu koyikko, he maccaasiyo milatana koshshees. Nuuni nuna ziqqi oottiyageeta, hidootaa qanxxennaageetanne mino ammanoy deꞌiyogeeta gidana bessees. Bana ziqqi oottiya uri Xoossay maaddanaadan hidootaa qanxxennan woossees. Qassi nuuni Yesuus Kiristtoosa mintti ammanananne nuna kaalettanawu I goꞌettiyo asatunkka ammanettana koshshees. (Mat. 24:45-47) Yihoowinne A Naꞌay ayyaanaabaa saamuwa aliyageetuuninne he eeshshata bessiyageetun ufayttoosona. (Yaaqooba 1:5-7ra gatta xeella.) Ane haꞌꞌi Yihoowi nuussi ayyaanaabaa qumaa, maayuwanne keettaa waati giigissiyakko beꞌoos. Kiitettida Pheexiroosi, Phawuloosinne Kawuwa Daawiti oottidobata pilggiyogan nuuni hegeeta demmanawu ay oottana koshshiyakko beꞌana.

PHEEXIROOSAAGAADAN AYYAANAABAA QUMAA UBBATOO LOYTTADA MA

7. Pheexiroosawu imettida azazoy aybee? I ay oottana koshshidee? (Ibraawe 5:14–6:1)

⁷ Kiitettida Pheexiroosa hanotaa beꞌa. Yesuusi Mase gidiyogaa koyro akeekida Ayhudatuppe I issuwa. Yihoowi ‘merinaa deꞌuwabaa’ asaa tamaarissanawu Yesuusa goꞌettiyogaa I akeekiis. (Yoh. 6:66-68) Yesuusi hayquwappe denddidi saluwa baanaappe kase, “Ta dorssa marata miza” yaagidi Pheexiroosa azaziis. (Yoh. 21:17) Pheexiroosi ammanettidi he azazuwa poliis; ubba qassi, Geeshsha Maxaafaa shaaho gidida naaꞌꞌu dabddaabbeta xaafanaadan Yihoowi A goꞌettiis. Shin Pheexiroosi ayyaanaabaa qumaa bawukka loytti maana koshshiis. Leemisuwawu, Kiitettida Phawuloosi ayyaanay kaalettin kasetidi xaafido dabddaabbeta I xannaꞌiis. Phawuloosi xaafido ‘issi issibati akeekanawu metiyogaa’ Pheexiroosi yootiis. (2 Phe. 3:15, 16) Shin Pheexiroosi hegeeta xannaꞌiyogaa aggibeenna. Hegeeta akeekanaadaaninne I xannaꞌidobaa oosuwan peeshshanaadan Yihoowi maaddanaagaa ammanettiis.—Ibraawe 5:14–6:1 nabbaba.

8. Yihoowi ooratta azazuwa yootido wode Pheexiroosi waatidee?

⁸ Pheexiroosi Yihoowa mintti ammaniyo gishshawu I yootido kaaletuwawu azazettiis. Leemisuwawu, issi galla Pheexiroosi ajjuutaa beꞌiis; qassi he ajjuutan Muuse Higgiya maaraadan tuna gidida doꞌata maanaadan kiitanchchay A azaziis. Pheexiroosi Ayhuda gidiyo gishshawu kiitanchchay azazidobaa bala giidi qoppiis. Koyro heeran Pheexiroosi hagaadan giis: “Akkay, Godawu, taani tunabaanne geeshsha gidennabaa ma erenna gishshawu, hegaa mule oottikke.” Yaatin kiitanchchay awu hagaadan giis: “Xoossay geeshshidobaa tuna giyogaa agga.” (Oos. 10:9-15) Pheexiroosi azazettidi ba qofaa laammiis. Nuuni hegaa waati eriyo? He ajjuutaappe simmin heezzu asati Pheexiroosakko yiidosona. Eti bantta goday Qornneliyosi Pheexiroosi baakko yaanaadan koyiyogaa yootidosona. Pheexiroosi hara biittaa asaa soo mule geli erennaagee qoncce. Ayhudati hara biittaa asaa tuna asadan xeelloosona. (Oos. 10:28, 29) Shin Pheexiroosi Yihoowi awu qonccissido ooratta pooꞌuwa sohuwara ekkiis. (Lee. 4:18) I Qornneliyosawunne A son deꞌiya asawu markkattin eti Yesuusa ammanidosona; geeshsha ayyaanaa ekkidosonanne haattan muukettidosona.—Oos. 10:44-48.

9. Akeekanawu metana danddayiya timirtteta xannaꞌiyogee nuna maaddiyo naaꞌꞌu ogeti awugeetee?

⁹ Pheexiroosaagaadan nuunikka akeekanawu metenna Geeshsha Maxaafaa koyro timirtteta Xoossaa Qaalaappe ubbatoo xannaꞌana koshshees. Qassi akeekanawu metana danddayiya timirttetakka xannaꞌana koshshees. Xoossaa Qaalaa loytti akeekanawu wodiya bazziyogeenne baaxetiyogee nuna keehi maaddees. Waatidi? Baa giishin naaꞌꞌu ogetun maaddees: Koyruwan, Yihoowabaa tamaariyogee nuuni A wozanappe siiqanaadaaninne bonchchanadan maaddees; qassi naaꞌꞌanttuwan, saluwan deꞌiya nu Aawaaba kaseegaappe aaruwan haratussi yootanaadan nuna denttettees. (Rom. 11:33; Ajj. 4:11) Pheexiroosappe harabaakka tamaaroos: Xoossaa Qaalaappe nuuni akeekido qofay laamettiyo wode, nu qofaanne nu oottiyobaa sohuwara laamanawu eeno gaana koshshees. Nuuni ayyaanaabaa qumaa ubbatoo loytti miikko, qassi Yihoowawu ammanettidi haggaazikko yaatana danddayoos.

PHAWULOOSAGAADAN AYYAANAABAA MAAYUWA UBBATOO LOYTTA MAAYA

10. Qolasiyasa 3:8-10y yootiyogaadan, nuuni Yihoowa ufayssanawu ay oottana koshshii?

¹⁰ Nuuni Yihoowa ufayssanawu I giigissido harabaa, hegeekka ayyaanaabaa maayuwa maayana koshshees. Hegaa giyogee woygiyogee? Kiitettida Phawuloosi xaafidoogaadan nuuni “galꞌꞌa eeshshaa” qaari olidi “oorattaa eeshshaa” maayana koshshees giyogaa. (Qolasiyasa 3:8-10 nabbaba.) Hegaadan maayiyogee metiyaba gidana danddayees. Phawuloosa hanotaa qoppa. I naatettaappe doommidi Xoossan sabettanawu keehi baaxetiis. (Gal. 1:14; Plp. 3:4, 5) Shin suure ogiyan Xoossawu waati goynnana danddayiyakko I akeekibeenna. Phawuloosi Kiristtoosabaa tumaa eribeenna gishshawunne otorettido gishshawu iita eeshshaa maayiisinne harata kariya asa gidiis.—1 Xim. 1:13.

11. Phawuloosi laamettana koshshidobay aybee? Qonccissa.

¹¹ Phawuloosi Kiristtaane gidanaappe kase keehi hanqqettiya asa. Oosuwa maxaafan deꞌiya taarikee Phawuloosi Yesuusa kaalliyageetu bolli keehi hanqqettidi eta woranawu yashshissidoogaa yootees. (Oos. 9:1) Phawuloosi Kiristtaane gidi simmidi ha galꞌꞌa eeshshaa qaari olanawu keehi baaxetidoogee qoncce. (Efi. 4:22, 31) Shin, Phawuloosi Barnnaabaasaara issi allaalliyan maayettibeenna wode keehi hanqqettiis. (Oos. 15:37-39) He wode Phawuloosi Xoossay koyiyobaa oottibeenna. Shin I Yihoowa ufayssanawu ubbatoo baaxetiis.—1 Qor. 9:27.

12. Phawuloosi iita eeshshata agganaadan maaddidabay aybee?

¹² Phawuloosi ba wolqqan ammanettibeenna gishshawu, iita eeshshata aggidi ooratta eeshshata maayodan maayana danddayiis. (Plp. 4:13) Pheexiroosaagaadan Phawuloosikka “Xoossay immiyo wolqqan” ammanettiis. (1 Phe. 4:11) Gidikkonne, Phawuloosi issi issitoo balabaa oottiis. Phawuloosi hidootaa qanxxido wode, saluwan deꞌiya Aaway awu oottido loꞌꞌobata qoppiis; qassi hegee I Yihoowa ufayssanawu aggennan baaxetanaadan maaddiis.—Rom. 7:21-25.

13. Phawuloosa leemisuwa waani kaallana danddayiyo?

¹³ Nuuni Yihoowawu daro layttawu haggaazikkokka, galꞌꞌa eeshshaa qaari olidi ooratta eeshshaa, hegeekka Xoossay immiyo ayyaanaabaa maayuwa maayanawu baaxetiyogan Phawuloosa leemisuwa kaallana danddayoos. Nuuni balabaa oottikko, leemisuwawu hanqqettikko, woy issi ura bolli bessennabaa haasayikko, nuuni Yihoowa mule ufayssana danddayennabadan qoppana bessenna. Nuuni qoppiyobaaninne oottiyoban laamettanawu ubbatoo baaxetana koshshees. (Rom. 12:1, 2; Efi. 4:24) Shin ha keehi koshshiyabaa nuuni hassayana bessees: Nu eeshshay kaseegaappe aaruwan loꞌꞌo gidanaadan koyikko, Yihoowi nuuppe koyiyobaa loytti akeekana koshshees.

DAAWITAAGAADAN UBBATOO AYYAANAABAA KEETTAN DEꞌA

14-15. Yihoowi ba asaa ayba ogetun naagii? (Mazamure 27:5) (Misiliyakka xeella.)

¹⁴ Tumuppe ufayttanawu ayyaanaabaa qumaappenne maayuwappe harabaykka nuussi koshshees. Nuuyyo ayyaanaabaa keettaykka koshshees. Ayyaanaabaa keettay aybee, qassi hegan naagettidi deꞌanawu nuuni waatana koshshii?

¹⁵ Kawuwa Daawiti waayissiya wodiyan Yihoowi bana naaganaagaa ammanettiis. (Mazamure 27:5 nabbaba.) Yihoowi ha wodiyan ba asaa waati naagii? Yihoowi nuuni an ammaniyo ammanuwa xayssana danddayiya ooppenne woy aybippekka nuna naagees. Nuna qohanawu oottido ay miishshinne nuna qohidi kantti kiyennaagaa I yootiis. (Maz. 34:7; Isi. 54:17) Seexaanay, daydanttatinne nuna yedettiyageeti wolqqaama; shin Yihoowa wolqqay etaagaappe keehi aadhdhees. Eti nuna woriyaba gidikkokka, Yihoowi nuna hayquwappe denttana. (1 Qor. 15:55-57; Ajj. 21:3, 4) Yihoowi nuuni unꞌꞌettiyo wode, awu haggaaziyogaa aggennaadankka maaddees. (Lee. 12:25; Mat. 6:27-29) Hegaa bollikka, saluwan deꞌiya siiqiya nu Aaway nuna maaddiya ishatanne michchota nuussi immiis; qassi cimati nuna minttettoosona. (Isi. 32:1, 2) Nuuni shiiqota shiiqiyo wode, Yihoowa naaguwa demmana danddayiyo ogeta darotoo hassayoos.—Ibr. 10:24, 25.

16. Yihoowi Daawita ayba ogetun qohuwappe naagidee?

¹⁶ Daawiti Yihoowawu azazettido wode, I loꞌꞌobaa kuuyanaadaaninne ufayttanaadan Yihoowi maaddiyogan qohuwappe A naagiis. (Leemiso 5:1, 2ra gatta xeella.) Shin Daawiti Yihoowawu azazettennan ixxido wode, I oottidobay kaalettido qohuwappe Yihoowi A naagibeenna. (2 Sam. 12:9, 10) Daawiti harati naaqqin waayettido wode waatidee? I bana qofissida ubbabaa woosan Yihoowawu yootiis; qassi Yihoowi A keehi siiqiyogaanne awu qoppiyogaa yootiyogan I unꞌꞌettiyogaa agganaadan maaddiis.—Maz. 23:1-6.

17. Nuuni Daawita waani milatana danddayiyo?

¹⁷ Nuuni issibaa kuuyiyo wode Yihoowa zoriya kaalliyogan Daawita milatana danddayoos. Qassi issi issitoo wolqqaama metoy nu bolli gakkiyoy, nuuni iitabaa kuuyido gishshaassappe attin, Yihoowi nuna naagibeenna gishshataassa gidennaagaa akeekana koshshees. (Gal. 6:7, 8) Nu mooribeennabaa gaasuwan nuna metoy gakkiyo wode, Yihoowi nu wozanaanne nu qofaa naaganaagaa ammanettidi nuuyyo siyettiya ubbabaa woosan awu yootana danddayoos.—Plp. 4:6, 7.

AYYAANAABAA SAAMUWA ALIYOGAA AGGOPPA

18. Nu yuushuwan deꞌiya asay woygi qoppii? Ayyaanaabaa saamuwa ubbatoo alanawu waatana danddayiyo? (Misiliyakka xeella.)

¹⁸ Layttaa xiqisee, 2026gee hagaadan gees: “Ayyaanaabaa saamettiyageeti ufayttoosona.” Hagee awudeegaappenne aaruwan ha wodiyan keehi koshshees. Ayssi giikko, nu yuushshuwan ayyaanaabaa koyenna woy hegaa worddo haymaanotiyappe woykko asa eratettaappe demmanawu baaxetiya ufayttenna daro asay deꞌees. Nuuni etaagaadan qoppennaadan naagettana koshshees. Waatidi? Yihoowi giigissiyo ayyaanaabaa qumaa loytti miyogan, ooratta eeshshaa maayiyogaaninne qohuwappe nuna naaganawu Yihoowi oottidobaa goꞌettiyogan naagettana danddayoos.