LAAPPUNE 9-15, 2026
MAZAMURE 45 Ta Wozanaa Qofaa
Iitabaa Qoppiyogaa Waata Aggana Danddayay?
“Taani ayba azzanttiya asee!”—ROM. 7:24.
TAMAARANABAA
Nuuni unꞌꞌettanaadan woy azzananaadan oottiyabaa qoppiyo wode waatana danddayiyakko beꞌana.
1-2. Phawuloosawu issi issitoo aybi siyettidee? Nuunikka Phawuloosaara issi mala gidiyoy ayba ogiyanee? (Roome 7:21-24)
NEENI kiitettida Phawuloosabaa qoppiyo wode ay hassayay? I xala misoone, gooba asttamaare woy daro Geeshsha Maxaafaa shaahota xaafidaagaa gidiyogaa hassayennan aggakka. Ne hassayidobati tuma gidiyogee qoncce. Shin, issi issitoo Phawuloosikka azzaniis, hidootaa qanxxiisinne unꞌꞌettiis. Yaaniyo gishshawu Phawuloosi daroban nu mala asa.
2 Roome 7:21-24 nabbaba. Phawuloosi Roome Kiristtaanetuyyo xaafido dabddaabbiyan bawu siyettiya issi issibata yootiis. Nuuppe darotuyyokka aagaadan siyettees. Phawuloosi ammanettida Kiristtaane, qassi Xoossawu azazettanawu keehi koyiis. Shin I nagaranchcha gidiyo gishshawu Xoossay koyiyobaa ubbatoo oottanawu metootiis. Hegaa bollikka, Phawuloosi Kiristtaane gidanaappe kase oottidobaa qoppidi zilꞌꞌettiis. Qassi appe qaarettana danddayenna metoy gakkido gishshawu issi issitoo azzaniis.
3. Nuuni ha huuphe yohuwan ay pilgganee? (Tohossa qofaakka xeella.)
3 Phawuloosi issi issitoo azzanikkokka, iitabaa qoppennana agganawu baaxetiis. Ha huuphe yohuwan kaallidi deꞌiya oyshata pilggana: Phawuloosi issi issitoo ‘azzananaadan’ oottidabay aybee? Iitabaa qoppiyogaa agganaadan A aybi maaddidee? Qassi nuunikka iitabaa qoppiyogaa waati aggana danddayiyo?
PHAWULOOSI IITABAA QOPPANAADAN OOTTIDABAY AYBEE?
4. Phawuloosi zilꞌꞌettanaadan oottidabay aybee?
4 I kase oottidobata. Guyyeppe Phawuloosa geetettida Saaꞌooli, Kiristtaane gidanaappe kase zilꞌꞌettanaadan oottiya darobaa oottiis. Leemisuwawu, ammanettida Isxxifaanoosa shuchchan caddidi woriyo wode hashetiis. (Oos. 7:58; 8:1) Qassi Saaꞌooli Kiristtaaneta keehi naaqqiis.—Oos. 8:3; 26:9-11.
5. Kase oottidobaa qoppido wode Phawuloosi waanidee?
5 Phawuloosi Kiristtaane gidi simmidikka kase oottidobatun zilꞌꞌettiis. I Kiristtaaneta kase keehi naaqqido gishshawu, daro layttay aadhdhi simminkka kaseegaappe aaruwan zilꞌꞌettennan waayi aggana. Leemisuwawu, 55 M.Ln, I Qoronttoosa Kiristtaanetussi koyro dabddaabbiya xaafido wode hagaadan giis: “Taani Xoossaa galchchaa naaqqido gishshawu . . . kiitettidaagaa geetettanawukka bessikke.” (1 Qor. 15:9) Qassi ichchashaa gidiya layttaappe simmin, Efisoona Kiristtaanetuyyo xaafido dabddabbiyan bana ‘geeshshatu ubbaappe guuxxiyagaa’ giis. (Efi. 3:8) I Ximootiyosawu xaafiyo wode kase “Xoossaa toochchiya, A asaa naaqqiyanne kariya asa” gidiyogaa qonccissiis. (1 Xim. 1:13) Phawuloosi galchchata xomoosiyo wode I naaqqidoogeetuura woy eta soo asaara gayttiyo wode awu aybi siyettidaakko qoppana danddayay?
6. Phawuloosa keehi unꞌꞌissida harabay aybee? (Tohossa qofaakka xeella.)
6 Agunttay ta ashuwan deꞌees. Phawuloosi bana keehi unꞌꞌissidabaa ba ‘ashuwan deꞌiya agunttan’ leemisiis. (2 Qor. 12:7) I bana keehi unꞌꞌissidabay aybakko sittan qonccissibeennaba gidikkonne, geella hegee sahuwa woy hara metuwa gidana danddayees.b
7. Ubbatoo loꞌꞌobaa oottiyogee Phawuloosayyo deexo gididoy aybissee? (Roome 7:18, 19)
7 I nagaranchcha gidiyogaa. Phawuloosi ba eeshshaa laammanawu loytti baaxetiis. (Roome 7:18, 19 nabbaba.) I nagaranchcha gidiyo gishshawu, issi issitoo oottana koyiyobaa oottennaagaanne haroode qassi oottana koshshennabaa oottiyogaa yootiis. I iita amuwa gidennan, loꞌꞌobaa oottanawu ubbatoo baaxetana koshshiyogaa akeekiis. (1 Qor. 9:27) Gidikkonne, I issi issitoo balabaa oottiis. Giigissanawu woy laammanawu keehi baaxetidobaa zaarettidi haasayido woy oottido wode I ay keena unꞌꞌettidaakko qoppa!
IITABAA QOPPIYOGAA AGGANAADAN PHAWULOOSA MAADDIDABAY AYBEE?
8. Phawuloosi iitabaa qoppiyogaa waati aggidaakko A dabddaabbee ay qonccissii?
8 Phawuloosi ba dabddaabbiyan qonccissidoogaadan, inne A mala Kiristtaaneti Xoossaa ayyaanay maaddin iitabaa qoppiyogaa waati aggidaakko I wotti dentti qoppiis. (Rom. 8:13; Gal. 5:16, 17) Yihoowa ufayssanawu Kiristtaaneti haakkana koshshiya iita amotanne oosota Phawuloosi loytti qonccissiis. (Gal. 5:19-21, 26) Phawuloosi ba shugo miyyiyabaa wotti dentti qoppidoogee, Geeshsha Maxaafaappe zoriya koyidoogeenne iitabaa qoppiyogaa agganawu issi issibata oottidoogee qoncce. Harata zoridobaa I bawukka oosuwan peeshshidoogaa ammanettana danddayoos.
9-10. Phawuloosi ufayttanaadan maaddidabati awugeetee? (Efisoona 1:7) (Misiliyakka xeella.)
9 Phawuloosi issi issitoo hidootaa qanxxidaba gidikkokka, ufayttanaadan A maaddida darobati deꞌoosona. Leemisuwawu, haahuwan deꞌiya galchchata xeelliyagan loꞌꞌo oduwa siyidi keehi ufayttiis. (2 Qor. 7:6, 7) Ba mala Kiristtaanetuura laggetidoogeekka I ufayttanaadan oottiis. (2 Xim. 1:4) Qassi I Yihoowi banan ufayttiyogaa akeekiis. Hegaa bollikka, “geeshsha kahan” Xoossawu haggaazana danddayido gishshawu I ufayttiis. (2 Xim. 1:3) Ubba Phawuloosi Roomen qashuwan deꞌiyo wodekka ba ishatinne michchoti ‘ubbatoo Godan ufayttanaadan’ minttettiis. (Plp. 4:4) Nuuni Phawuloosa dabddaabbeta nabbabiyo wode I ba metuwabaanne ba balaabaa ubbatoo qoppibeennaagaa akeekana danddayoos. Phawuloosi hidootaa qanxxissana danddayiyabaa hassayiyo wode ubban sohuwara bana ufayssana danddayiyabaa qoppees.
10 Phawuloosi ufayttanaadan maaddida harabay wozuwa. Yihoowi A siiqidoogaanne A gishshawukka wozuwa giigissidoogaa I hassayiis. (Gal. 2:20; Efisoona 1:7 nabbaba.) Hegaa gishshawu, Yesuus Kiristtoosa baggaara Yihoowi awu atto giidoogaa I mintti ammaniis. (Rom. 7:24, 25) Ha ubbabay Phawuloosi ubbatoo Yihoowawu ufayssan haggaazanaadan maaddiis.—Ibr. 9:12-14.
Phawuloosi kase oottidoban issi issitoo azzanikkonne wozuwabaa wotti dentti qoppiyogan iitabaa qoppiyogaa aggiis (Mentto 9-10 xeella)
11. Phawuloosa hanotay nuna waati minttettii?
11 Nuunikka Yihoowa azzanttiyabaa qoppennan, haasayennan, woy oottennan agganawu Phawuloosaagaadan ubbatoo baaxetana koshshees. Gidikkonne, issi issitoo hidootaa qanxxana danddayoos. Layttay 26 gidido Elizoc giyo michchiya bawu siyettiyabaa hagaadan qonccissaasu: “Phawuloosa hanotaa qoppiyogee tana minttettees. Phawuloosi laamettana koshshidoogaadan, taanikka laamettana koshshiyogaa erada keehi minettaas. Yihoowi ba asaa gakkiiddi deꞌiya waayiya eriyogeekka tana minttettees.” Iitabaa qoppiyogaa agganawu baaxetiiddi, Phawuloosaagaadan nuussi geeshsha kahay deꞌanaadaaninne ufayttanawu waatana danddayiyo?
IITABAA QOPPIYOGAA WAATA AGGANA DANDDAYAY?
12. Nuuni ufayttanawu ubbatoo ay oottana koshshii?
12 Kaseegaappe aaruwan Yihoowakko shiiqanaadan maaddiyabata ubbatoo ootta. Ane hagaa qoppa: Bollawu maaddiya qumaa miyogeenne ubbatoo ispporttiya oottiyogee, qassi gidiyagaa keenaa xiskkiyogee nuna keehi maaddees. Hegaadankka, Xoossaa Qaalaa ubbatoo nabbabiyogee, mishiraachchuwa yootiyogee, shiiqotussi giigettiyogee, shiiqota shiiqiyogeenne shiiqotun qofaa yootiyogee nuna minttettees. Nuuni hegeeta ubbatoo oottiyogee, nuna hidootaa qanxxissiyabaa qoppiyogaa aggidi loꞌꞌobaa qoppanaadaaninne ufayttanaadan maaddana.—Rom. 12:11, 12.
13-14. Amarida ishatinne michchoti Yihoowakko loytti shiiqanaadan maaddiyabata aggennan oottidoogee eti waananaadan maaddidee?
13 Joona giyo ishawu layttay 39 gidido wode A kansseriya harggee oyqqidoogaa I eriis; ane A hanotaa beꞌa. Koyro heeran I keehi yayyiisinne unꞌꞌettiis. I ‘Taani ha yelagatettaa layttan waana sahettana danddayiyanaa?’ giidi qoppiis. He wode A naꞌawu biron heezzu laytta. Yaatin Jooni iitabaa qoppiyogaa agganaadan maaddidabay aybee? I hagaadan giis: “Hegee tawu wolqqaa xayssikkonne ta so asaara ubba shiiqota shiiqoos, haggaazoos, saaminttan saaminttan so asaa goynuwa goynnoos. Yaatiyogee keehi metiyo wodekka nuuni hegaadan oottoos.” Jooni gujjidi hagaadan giis: “Metiyabay gakkiyo wode koyro heeran keehi unꞌꞌettana danddayoos. Gidikkonne, nuussi koshshiya wolqqaa Yihoowi waati immiyakko, qassi nuna I ay keena siiqiyakko nuuni sohuwara akeekana danddayiyogaa taani tamaaraas. Yihoowi tana maaddidoogaadan inttenakka maaddana.”
14 Qommoora ibaa denttido Eliza hagaadan gaasu: “Ubbatoo shiiqota shiiqiyogeenne buzo xinaatiya xannaꞌiyogee Yihoowi ta woosaa siyiyogaanne I tana tumuppe siiqiyogaa taani hassayanaadan maaddees. Hegee taani ufayttanaadan oottees.” Afirkkan woradaa xomoosiya Noolani bananne ba machchiyo Diyano maaddidabaa yootiiddi hagaadan giis: “Nuuni unꞌꞌettiyo wodekka ubbatoo woossoos; Geeshsha Maxaafaa xannaꞌoos; shiiqota shiiqoosinne haggaazoos. Yaatiyo wode, Yihoowi nuuni ufayttanaadan ubbatoo nuna maaddees. Yihoowi nuna kaafanaagaanne anjjanaagaa hassayanawu baaxetoos; I waatidi hegaadan oottanaakko erokko; shin I hegaa oottanaagaa eroos.”
15. Iitabaa qoppiyogaa agganawu nu oottana koshshiyabati aybee? Leemisuwa yoota.
15 Nuuni ubbatoo unꞌꞌettikko oottana koshshiyo hara amaridabatikka deꞌoosona. Leemisuwawu, nena zokkoy sakkiyabadan qoppa. Sahoy agganaadan so asaappe issi ura gorppissiyogaappe aarobaa oottana koshshees. Sahuwa gaasuwa eranawu neeni pilggana, ubba qassi dottoriya haasayissana koshshees. Hegaadan, iitabaa qoppiyogaa waati agganaakko eranawu, Geeshsha Maxaafaanne nu xuufeta pilggana, ubba qassi kayma Kiristtaaneta haasayissana koshshees. Maaddana danddayiya harabatakka beꞌa.
16. Neeni iitabaa qoppiyo gaasuwa shaakka eranaadan nena aybi maaddana danddayii? (Mazamure 139:1-4, 23, 24)
16 Neeni azzananaadan oottidabaa akeekanawu Yihoowi maaddana mala woossa. Kawuwa Daawiti Yihoowi A loytti eriyogaa akeekiis. Hegaa gishshawu, Daawiti I unꞌꞌettiyo gaasuwa eranaadan maaddana mala Yihoowa oychchiis. (Mazamure 139:1-4, 23, 24 nabbaba.) Neeni iitabaa qoppiyo gaasuwa shaakka eranaadaaninne hegaa waata agganaakko akeekanaadan maaddana mala Yihoowa woossana danddayaasa. Nena hagaa mala oyshatakka oychchana danddayaasa: ‘Taani unꞌꞌettanaadan oottiya waanna gaasoy aybee? Taani ubbatoo iitabaa qoppanaadan oottiyabi deꞌii? Taani hidootaa qanxxissiyabaa qoppiyo wode, hegaa aggada ufayssiyabaa qoppiyanaa?
17. Minttettiyabaa qoppanawu nena maaddana mala neeni xannaꞌana danddayiyo huuphe yohoti awugeetee? (Misiliyakka xeella.)
17 Ne hanotawu maaddiya huuphe yohuwa xannaꞌa. Yihoowa eeshshatuppe amaridaageeta issi issitoo xannaꞌiyogee nena maaddana danddayees. Leemisuwawu, kiitettida Phawuloosi wozuwabaanne atto giyogaabaa wotti dentti qoppiyogan daro goꞌettiis. Neenikka hegaadan oottana danddayaasa. Xoossaa eeshshatubaa hegeetikka, A maarotaa, atto giyogaanne tasenna siiquwa xeelliyagan nu xuufetun kiyida huuphe yohota pilggana danddayaasa. Ne hanotawu maaddiya huuphe yohota demmiyo wode, hegeeta xaafa oyqqa. Ne xaafa oyqqidobata qoncce sohuwan wotta; qassi unꞌꞌettiyo wode he huuphe yohota xannaꞌa. Neeni nabbabidobaa oosuwan peeshshanawu baaxeta.—Plp. 4:8.
Iita qofata agganaadan maaddiya huuphe yohota xannaꞌa (Mentto 17 xeella)
18. Amarida Kiristtaaneti ay xannaꞌiyogee maaddiyogaa akeekidonaa?
18 Qommoora ibay odettido Eliza, Geeshsha Maxaafaappe Iyyoobabaa pilggaasu. A hagaadan gaasu: “Iyyoobaagaadan tana daro metoy gakkiis. Iyyooba metoy bolli bollan gakkiis. Shin Iyyoobi metoy gakkido gaasuwa erana xayikkonne, hidootaa qanxxido wode maaduwa demmanawu Yihoowa woossiyogaa mule aggibeenna.” (Iyy. 42:1-6) Qommoora ibay odettido Diyana hagaadan gaasu: “Taaninne ta azinay Yihoowakko Shiiqa giya maxaafaa xannaꞌida. Urqqaa medhdhiyagee ba medhdhido miishshaa loyttiyogaadan, Yihoowi nuna loyttiyo gishshawu, A keehi galatoos. Nu hanotan nuuni unꞌꞌettiyo wode, hegaa qoppiyogaa aggidi loꞌꞌo asa gidanaadan Yihoowi nuna tamaarissiyogaanne maaddiyogaa hassayanawu baaxetoos. Hegee nuuni akko shiiqanaadan maaddiis.”—Isi. 64:8.
YIHOOWI NUNA MAADDANAAGAANNE WOYTANAAGAA AMMANETTOOS
19. Issi issitoo nuussi aybi siyettana danddayii? Nuuni ay ammanettana danddayiyo?
19 Nuuni ha huuphe yohuwan deꞌiya ubba zoretakka oosuwan peeshshiyaba gidikkonne, iitabaa qoppiyogaa muleera aggana danddayokko. Hegaa gishshawu, issi issitoo hidootaa qanxxoos! Shin, Yihoowi maaddin iitabaa qoppiyogaa aggidi woppu gaana danddayoos. Nuuni Yihoowara mintti dabbotido gishshawunne awu oottiyogan I ufayttiyogaa eriyo gishshawu, nu deꞌuwan darotoo ufayttanaagaa ammanettana danddayoos.
20. Neeni ay oottanawu murttadii?
20 Simi yaakko kase oottidobaa, nuna gakkida metuwa, woy nu nagaraa gaasuwan iitabaa qoppiyogaa agganawu murttidaageeta gidoos. Yihoowi maaddin iitabaa qoppiyogaa aggana danddayoos. (Maz. 143:10) Nu qoppiyo ubbabay ufayssiyo ooratta alamiyan deꞌana deꞌuwa yeemuwan naagoos. He wode, nu unꞌꞌettanaadan oottiya aybinne deꞌenna. Nuna siiqiya Xoossawu Yihoowawu haggaazanawu ubba galla guuran denddiyogee ayba ufayssiyabee!
MAZAMURE 34 Suuretettan Hemettiyogaa
a Ha huuphe yohoy issi issitoo unꞌꞌettida woy azzanida asatubaa yooteesippe attin, adussa wodiyawu unꞌꞌettida woy dottoriya maadoy koshshido asatubaa yootenna.
b Ayfee Phawuloosa waayissiyo gishshawu, I dabddaabbeta xaafanawunne ba haggaazuwa polanawu metootidoogaa I xaafidobay bessees. (Gal. 4:15; 6:11) Woy Phawuloosi amarida worddo asttamaareti abaa likke gidennabaa yootido gishshawu unꞌꞌettennan aggenna. (2 Qor. 10:10; 11:5, 13) Phawuloosi hirgganaadan oottidabay aybanne gidin, hegee I unꞌꞌettanaadan oottiis.
c Issi issi asatu sunttay laamettiis.